|
|
 سيناريوهات : الخروف المعافى !
|
صحيفة الرأى العام
عدد الجمعة الموافق 7 ديسمبر 2007م
موقع الكاتب : www.alfatihgabra.com
هذا السيناريو تمت كتابته ونشره قبل حوالى عامين من الآن .. أعيد نشره لمواءمتة للظروف والمستجدات الحالية عن طريق الصدفة وحدها لا الإستشعار عن بعد !!
البداية :
مع إقتراب موعد عيد الأضحية تفاجأ المواطنون بإعلانات مكثفة فى كل الوسائط الإعلامية تنوه بأنه قد تم إعداد زرائب ومراكز لبيع الخراف والبهائم فى كافة المحليات وأنه على جميع بائعى ومالكى الخراف والبهائم عموما بكافة المحليات الإمتناع فوراً عن عرض وبيع الخراف والبهائم على الطرقات وفى الفسحات والشوارع وكل من لا يلتزم بذلك فسوف يكون عرضة للمساءلة القانونية التى تصل عقوبتها إلى مصادرة الخراف والبهائم المخالفة .
- والله ناس الحكومة ديل حريصين على صحتنا جنس حرص !! شوف قالو زول يبيع خرفان فى الشارع ساكت مافى
- يا (السر) يا خوى حريصين شنو ؟؟ على بالطلاق لازم الكلام ده يكون تحتو كلام ؟
- تقصد شنو يا (خضر)
- حكومت شنو القاعده تعاين لى مصلحت المواطن ؟ والله هسع يكونو عاوزين (يحلبوهو)
- (حلب) شنو كمان يا السر يا خوى (حلب) كمان فى (الضحية؟)
- والله ديل يحلبو (الشاهد ذاتو) مش الضحية !!
- كيفن يعنى ؟
- أنا أقول ليك ... ياخوى عيد الضحية قرب والناس ديل يكونو ناوين ليهم على حاجة
بينما كان ذلك الحوار يدور بين (عم السر) و(حاج خضر) أثناء جلوسهما أما منزل الأخير فى إنتظار بقية شلة الضمنة اليومية إنطلقت من المنزل زغرودة تنبئ بولادة أول حفيدة لحاج خضر من إبنته (سعاد) … ما لبث أن جاءة إبنه الصغير (أحمد) يجرى وهو يقول :
- يابوى ناس أمى ضربو تلفون من (الدايات) قالو سعاد جابت ليها بت
إنهالت التهانى على (حاج خضر) من افراد شلة الضمنة الذين تزايد عددهم بعض الشئ وبعد أن هدأت المسألة قليلا قال حاج خضر مخاطباً (السر) :
- قوماك يا (السر) يا خوى نركب البوكسى بتاعك ده نمشى الزريبه نجيب لينا خروف كرامة نضبحو للبنيه دى ، ما لبث (السر) أن أحضر البوكس الذى كان يقف مجاوراً أمام منزله وعندما عاد وجد (حاج خضر) جاهزاً قد قام بإرتداء جلابيته ووضع الطاقية على رأسه بينما بقية أفراد الشلة منهمكون فى تجهيز قعدة (الضمنة) ..
- أها نمشى نشترى الخروف من وين هسع والحكومة منعت الناس القاعدين يبيعوا فى الشوارع ديل ؟
- كيف نمشى وين يا حاج خضر ؟ ما ح نمشى الزرائب الجديدة العملتا الحكومة – مواصلا- أنا عارف مكانا والله قالو زرائب حاجة تمام
زرائب 5 نجوم :
بالفعل فقد كانت الزرائب الجديدة التى تم إنشاؤها حاجة تمام على حد قول (السر) فالزريبة من الداخل مقسمة إلى مساحات صغيرة لعرض الخراف والبهائم كما أن هنالك مكاناً مخصصاً لبيع الأعلاف وكذلك آخر لأحواض شرب (البهائم) كما توجد على مقربة من ذلك وحدة بيطرية ، لم تمض دقائق معدودة على دخول (السر وخضر) إلى الزريبة حتى كانا قد قاما بشراء خروف (مدغلب) وأخذا يجرانه أمامهما خارجين من باب الزريبة لوضعه على البوكس حينما إستوقفهما (شخص) عند (البوابه) :
- شنو يا حاج طالعين بالخروف ده ساكت كده ؟
- وعاوزنا نمرق بيهو كيف يعنى ؟؟
- لا.. يعنى إنتو مشيتو عملتو الإجراءآت ؟
- إجراءآت شنو كمان؟؟ ما خروف وإشتريناهو ؟؟ نعمل ليهو بطاقة ؟؟
- لا.. لا.. بس فى شويت إجراءآت صحية لازم تعملوها ليهو؟؟
- صحية كيف يعنى ؟
- يعنى لازم يكشفو عليهو عشان يشوفوهو لائق صحياً..
- لائق صحياً دى كمان شنو ؟ هو أنحنا ح ندخلو (الكلية الحربية) ما ح نضبحو !!
- يا حاج ده عشان صحتكم .. ممكن الخروف ده يكون مرضان لا سامح الله يقوم يمرضكم
- طيب والكشف ده مكانو وين ؟؟
- (مشيراً بيده) : هناك يا حاج محل الصف داك
حيث أن الوقت كان بعد العصر بقليل كما أن المواطنين لم يبدأوا بعد فى شراء الأضاحى فلم يكن هنالك زبائن كثر بالزريبة .. كان يقف فى الصف خمسة أشخاص فقط .. كل يمسك بخروفه فى إنتظار خروج الخروف الذى بداخل الغرفة التى وضع أمام بابها لافته صغيرة مكتوب عليها (غرفة الكشف)
صوت 1 : ياجماعة هسع فى داعى لى جنس التلتلة دى ؟؟
صوت 2 : من زمان اللحم ده ما قاعدين ناكلو ساكت والخرفان دى ما قاعدين نشتريها من سوق الله أكبر ده الحصل لينا شنو مرضنا وإلا إتسممنا ؟؟
صوت 3 : عليكم الله كشف شنو العلى الخرفان ؟ أنحنا روحنا دى ما قادرين نكشف عليها
3 صور باسورت :
لم يقطع الحوار الذى كان يدور بين المنتظرين إلا صوت الموظف وهو يخاطب (خضر) الذى وصل إلى أول الصف قائلا :
- ملف الخروف وينو؟
- ملف شنو ؟
- الملف المتل الشايلنو الناس ديل
إلتفت (حاج خضر) وفعلا لاحظ أن المواطنين الذين فى الصف كل منهم يحمل ملفاً أخضر فخاطب الموظف متسائلاً :
- والملف ده بجيبوهو من وين ؟
- (مشيراً بيده) : شفت الشباك القدامو النفرين ديك ؟ بس هناك
إتجه (حاج خضر) بعد أن قام بتسليم (الخروف) للسر نحو الشباك الذى وجده قد خلا من المواطنين
- بالله عاوز ليا ملف
(يقوم الموظف بأخراج ملف من الدرج ويضع بداخلة ورقة وهو يمسك بدباسة ويخاطب حاج خضر) :
- الصورة وينا ؟
- (فى إستغراب) : صورت شنو؟
- ح يكون صورت منو يا حاج يعنى؟ ما صورت الخروف
- (فى إندهاش شديد) : كمان الخروف عاوزين ليهو صورة والله دى ما أدونا ليها
- كيف يا حاج لازم الشهاده دى بعدين يكون فيها صورة الخروف بتاعك ده
- ليه عاوزين تطلعو ليهو باسبورت) وإلا بطاقه شخصية يا إبنى الخروف ده رايحين نضبحو بعد شويه
- يا حاج المسألة ما مسالة تضبحوهو بعد شوية وإلا بعد شهر .. كدى النفهمك بررراحه بررراحة
- كدى فهمنى أصلو إنتو ما خليتو لينا مخ نفهم بيهو ذاتو
- يا حاج الخروف ده أنحنا ح نطلع ليك ليهو شهاده إنو (متعافى) ولائق طبياً ... صاح؟
- أيوه صاح
- طيب هسع (البهائم) أقصد الطلاب البيتخرجو من الجامعات ديل مش بيطالبوهم يختو صورتهم مع الشهادات عشان الناس تعرف إنو الشهاده بتاعت الطالب المصور فيها ده
- أيوه
- طيب يا حاج ما دى نفس الحكايه نحنا !! لازم نخت صورة الخروف فى الشهاده عشان نعرف إنو الخروف المصور ده هو الخروف المعافى والسليم – مواصلاً- هسع أفرض خروفك ده إتلخبط وخش ليهو وسط خرفان عيانة ومرضانة ح نطلعو كيف لو ما عندنا صورة ليهو – فى حزم ورجاء- بالله يا حاج ما تأخرنا وخش المكتب البى جاى ده طلع لينا 3 صور باسبورت سريعات للخروف وتعال نديك الملف !!
وسط دهشة وذهول (حاج خضر) قام بمناداة (السر) الذى كان يقف فى صف الكشف طالباً منه الحضور لتصوير (الخروف) بواسطة (المصوراتى ) الذى كان يمسك الكاميرا بيد و(حزمة برسيم) بالأخرى لزوم إستخدامها فى توجيه (الخروف) ليكون فى مستوى (العدسة)
- (وهو يناوله الصور بعد أن قام بوضعها فو ظرف صغير) : خمسة ألف ياحاج
- بتاعت شنو؟
- 3 صور باسبورت سريعه
- (وهو يدخل يده فى جيبه لإخراج حافظة نقوده ) : يحلنا الليلة الحلا بله !!
خرج (حاج خضر) وهو يحمل (الصور) فى يده وهو يهز رأسه فى تعجب ووقف أمام شباك مكتب (الملفات) وما أن رآه الموظف حتى بادره وهو يستلم منه الصور قائلاً :
- أيوااا يا حاج كده إنت فى السليم ... التلاته صور ديل صورة ح ندبسا ليك فى الشهادة وصوره ح نسلما ناس (الأمن البيطرى) وصوره ح نختها عندنا فى الأرشيف – وهو يقوم بتدبس الصورة على الملف- شوف يا حاج الملف ده جواهو الشهاده بتاعت (الخروف المعافى) فاضيه وكل ما يعملو ليهو (فحص) بيكتبو ليك فيها (النتيجه) وفى الأخير بيمضوها ويختموها ويسلموها ليك !
- (وهو يغادر الشباك) : شكرا يا غبنى شكرا جزيلا
- تعال يا حاج أدفع لينا حق (الملف) و(الفورم) بتاع الشهاده
- وديل بى كم
- عشرة ألف بس
- إنتو بتستهبلو؟؟ على بالطلاق شهاده (كمبريدج) إستخراجا ما بى عشرة ألف
- بتقول شنو يا حاج؟
- لا دقيقه أهى دى العشرة ألف بس عشان نتفكا منكم
الميزان قبل الكشف :
عاد (حاج خضر) وهو يحمل الملف فى يده ومن خلفه (السر) يجر (الخروف) إنتظرا قليلا فى الصف الذى كانا يقفان فيه قبل (عملية التصوير) ولم تمض دقائق حتى :
- مشيت يا حاج طلعت الملف ؟
- أهو ده
- جميل خلاص بالله يا حاج ه طلع ليا الخروف فى الميزان ده
- وعاوزين توزينوهو ليه ح يلعب فى (الأولمبياد) ؟؟
- لا بس لأنو رسوم الكشف قاعدين نشيلا بالوزن بتاع الخروف
- (فى إستغراب) : ما فاهم ؟؟
- أفهمك يا حاج … قول هسع خروفك دا فيهو خمستاشر كيلو … كده ح نشيل منكم رسوم كشف خمستاشر ألف .. يعنى على كل كيلو ألف جنيه
- ليه إنتو مشترنو معاى ؟
- لا يا حاج المسألة ما كده
- يعنى المسألة شنو؟؟ كلو حاجة عملتو ليها رسوم .. كرهتونا أى حاجه كمان قبلتو على الخرفان دايرين تكرهونا (السماية) ذاتا !! –ثم مواصلا فى تبرم- أها وبعد وزنتوهو عاوزين تكشفو على شنو فيهو .. على النظر ؟؟
- بالضبط كده يا حاج … إنت جيت هنا قبل كده وإلا شنو ؟ - ثم وهو يمسك بقرنى الخروف – مخاطباً حاج خضر :
- بالله يا حاج وقف ليا خروفك ده هنا وما تخليهو يتحرك عشان أكشف على عيونو ديل؟
- سبحان الله ..كمان خروف شنو البكشفو ليهو النظر ..إنت يا زول بى صحك ؟؟ إنتو عاوزين تطلعو ليهو رخصة سواقة ؟؟
- لا الموضوع ما كده يا حاج .. كشف العين ده بيورى أمراض فيروسية كتيرة وما ممكن نعرفا إلا بالكشف ده !
- (وقد فاض به الكيل) : أها نتيجة الكشف ده بتطلع متين؟؟
- على بال ما النتيجة تظهر حقو يا حاج تمشى تدفع حق الكشف
- هو كشف عيون الخرفان بى قروش … والله قصة عجيبة .. أنا عاوز أعمل (كشف نظر) ليا خمسة سنين ما قادر .. والله حكاية عجيبة !!
ذهب (حاج خضر) إلى شباك الرسوم وقام بدفع رسوم كشف النظر ثم عاد وما أن شاهده موظف كشف النظر حتى أخذ يربت على ظهر الخروف وهو يقول :
- ما شاء الله … ما شاء الله يا حاج خروفك طلع نظرو مية فى المية يعنى ستة على ستة !!
- طيب أدينا النتيجة دى خلينا نمشى – ثم مواصلا فى تبرم- أها كمان فى حاجة تانى ؟
- أيوه . كييييف يا حاج ؟ فى أمراض النظر براهو ما بيوريها
- يعنى شنو؟؟
- يعنى عاوزين برضو نشوف نتيجة فحص (البول) !!
- كشف النظر عرفناهو هسع الخروف ده ننتظرو يعنى لمن (يبول) ؟
- والله شوف يا حاج التعليمات العندنا واضحة …لازم يتم إجراء كل الفحوصات الطبية دى وتاخد شهاده بأن الخروف (لائق للذبح) حتين تطلع بيهو من هنا يعنى لازم يكون خروف (معافى) !!
- والله الظاهر أنحنا (اللايقين للذبح) مش الخروف
- شوف يا حاج والله أنا متعاطف معاك لأنك إنت راجل كبير فى السن وما قدر التلتلة عشان كده شفت الزول القاعد هناك وخاتى ليهو (ألواح تلج) فى تربيزة داك ؟؟إسمو (جادين) إنت بس أمشى وقول ليهو مرسلنى ليك (عبد الحميد)
- (ينظر فى ذات الإتجاه) : أيوة شفتو … مالو
- إنت سوق خروفك ده وأمشى ليهو ح يجيهك جيهه تمام
وجع إصطناعى :
قام حاج خضر يتبعه (السر) بجر الخروف من رجله الأمامية وإتجه للشخص المعنى
- السلام عليكم
- وعليكم السلام
- إنت جادين؟
- أيوه أنا جادين فى حاجة؟
- والله أنا مرسلنى ليك عبد الحميد
- أيووا ياحاج الظاهر إنت عاوز (وجع إصطناعى)
- يا ولد إتهذب شويه (وجع فى عينك) إنت فى زريبة مش فى (الدايات)
- لا يا حاج أنا بقصد إنك يعنى عاوز (بول إصطناعى) للخروف
- كيف يعنى ح تصنعو ليهو بول يعنى ؟
- لا يا حاج المسألة أبسط من كده بى كتير - مواصلا- كدى هسع طلع ليا خروفك ده فى التربيزة دى
بعد أن قام (حاج خضر) بمساعدة (السر) برفع الخروف ووضعه على التربيزة قام (جادين) بحمل (لوح التلج) ووضعه على بطن الخروف الذى ولدهشة (حاج خضر) قد قام بمسألة (التبول) فوريا هنا قال جادين وهو منهمك فى جمع بول الخروف فى زجاجة صغيرة وهو يخاطب حاج خضر الذى أخذته الدهشة :
- والله يا حاج لو ما التلج ده كان تقعد هنا يومين راجى بول الخروف ده !! .. – ثم مواصلا- بعد كده على (المعمل) عديل !!
بدون أن ينبت حاج خضر ببنت شفه قام بإنزال الخروف من التربيزة ثم قال مخاطبا (جادين) الذى قام بتسليمه عينة البول :
- طيب شكرا .. مع السلامة
- شكرا دى شنو يا حاج يعنى أنا جايب تلجى الكلو ساح ده وقاعد مضيع فى زمنى (أبول) ليكم فى الخرفان يعنى (هواية) ؟
- يعنى شنو يا إبنى؟
- يعنى كلك نظر يا حاج
- (فى تبرم وتحدى) : وأفرض هسع ما دفعتا ليك ح تودينى البوليس ؟
- والله يا حاج أنا بحلف إنك ما قاعد تقرأ جرايد ؟
ودخل الجرائد فى الموضوع ده شنو؟
لو كنا بتقرأ جرائد يا حاج كنت عرفت إنو المسؤول العمل المشروع ده أجازو ليهو (مادة) قانونية فى المجلس التشريعى بتقول : كل من يمتنع عن دفع أى رسوم تخص مشروع الذبيح المعافى ح يغرم ويسجن ويجلد كمان !!!
قال (حاج خضر) فى سره (لو الحكاية فيها سجن وجلد وغرامة أحسن ندفع) فقام بإدخال يده فى جيب جلابيته وأخرج ورقة حمراء فئة الخمسة ألف جنيه وأعطاها (جادين) الذى تهللت أساريره !!
الفتيل بى ألفين :
بينما (السر) يقود الخروف و(حاج خضر) يحمل فى يده (العينة) فى طريقهما للمعمل ... يقابلهما عدد من الصبية فى الطريق يحملون فتايل بداخلها سائل اصفر اللون وهم يتمايلون ويتصايحون كما حركات الباعه فى السوق
- (فى صوت مموسق) : الفتيل بى ألفين بس … الفتيل بى ألفين بس …بى ألفين الفتيل .... الفتيل ........ بى ........... ألفين !
- (يلتفت إلى أحدهم) : بى ألفين بس معنى كده الريحة بتاعتكم دى مغشوشة
- ريحت شنو يا حاج؟
- (فى إندهاش) : طيب الشايلنو فى الفتايل ده شنو؟؟
- ده (بول) يا حاج …(بول خرفان) جاهز يا حاج .. يعنى بدل ما تتجهجه وما تعرف تبول خروفك ده تشترى ليك بول جاهز مننا وتمشى توديهو الفحص وتتخارج -مواصلا- وكمان يا حاج ده بول (خروف بيت) مضمون لا فيهو سكرى لا زلالى لا(حميات) لا ترسيب !!
أمام معمل إستلام العينات وقف حاج خضر وهو يحمل زجاجة العينة بينما (السر) يمسك برجل الخروف (الخلفية) حتى وصل إلى الشباك حيث قام بمد العينه للفحيص الذى يجلس واضعا نظارته الطبية السميكة على (أرنبه أنفه) وهو يمسك بقلم وأمامه عدد من (النتائج) والذى ما إن إستلم العينة حتى قال مخاطبا حاج خضر :
- ستة ألف
- وهو مندهشا : فحص بول الخروف سته ألف؟
- أيوه يا حاج ومالو ؟؟
- مالو كيف إذا كان (بولى أنا) بفحصو بى (خمسة ألف)؟ بول الخروف يكون فحصو بى ستة ألف كيف ؟؟
- إنت يا حاج قاعد يجيكا جرب ؟
- لا
- قاعد ه تجيك حمى قلاعية
- لا
- طيب قاعده تجيك حمى نزفيه؟
- لا
- قاعده تجيك أنتروتوكسيميا؟
- لا
- قاعده تجيك باستريلا ؟ قاعد يجيك السارس ؟ قاعد يجيك …….
وقام الفحيص بذكر عدد هايل من (الأمراض الفيروسية) التى تصيب الخراف ولا تصيب الإنسان وإختتم حديثه وهو يخاطب (حاج خضر) وهو ينظر إليه من تحت عدسات نظارته الطبية :
- شوف يا حاج .. بول خروفك ده أنحنا بنفحص فيهو (مية سته وتمانين) مرض معدى .. عشان كده ما تأخر نفسك ساكت أدفع سته تالاف الكشف وسوق خروفك ده وأمشى أقعد بيهو هناك إنتظر النتيجة مع الناس القاعدين ديلك !!
فى مواجهه شباك الفحص جلس المنتظرون كل يمسك خروفه بيده بينما جلست الخراف فى صمت ودعة وكأنها تترقب نتيجة الفحص
صوت 1 : هسع الناس ديل يا جماعة وكت عاوزننا ناكل خرفان متعافية وما عندها مرض مش كان بدل العذاب ده يفحصوها فى الأول عند الناس القاعده تبيع ويطلعو الخرفان السليمة عشان نحنا نشتريها؟؟
صوت 2 : وكان عملوا كده قروشنا دى البشيلا منو ??
صوت 3 : والله إنتو ما عارفين حاجة ساكت !!
صوت 1 : شنو؟؟
صزت 3 : مشروع الخراف المتعافية ده عاملنو الجماعة ديل أصلو عاملنو محصلين بيهو الضحية .. يعنى شوفو لمن السودان ده كلو كل واحد يفحص خروف ضحيتو يكونو جمعو ليهم كم مليار ؟
صوت 2 : هو الحاجات دى بيفكروا فيها كيف؟ إن شاء الله يفحصهم اللا نام ولا أكل طعام
صوت 3 : هسع المشروع ده تلقاهو بتاع واحد
صوت 1: ما طبعا هى الحكومة فاضية عشان تفحص ليها خرفان ؟؟ هى قادرة تفحص البنى آدمين
صوت 2 : والله أنا خائف بكرة يعملو ليكم فحص آلى للخرفان !!
صوت 4 : يا جماعة خروفى ده نظرو طلع مجلى العمل شنو؟؟ أعمل ليهو نضارة وبعدين أضبحو وإلا أعمل شنو؟؟
صوت 2 : هسع يا جماعة خرفان المسؤولين دى بيكونو قاعدين يفحصوها وإلا الفحص ده لينا نحنا ؟؟
صوت 1 : يا بوى فحص شنو؟ المسؤولين بياكلو بدون فحص !!
صوت 3 : وما قاعدين يمرضو؟؟
صوت 1 : يمرضو كيف ديل عندهم حصانه
وطلعت النتيجه :
بينما كان المواطنون يناقشون بعضهم البعض أطل الفحيص بنظارته الطبية السميكة من شباك المعمل ممسكا بأوراق النتائج وهو ينده :
- خروف عمر بدوى
- خروف صديق الطيب
- خروف مأمون شلبى
- ……………………
- ……………………
- خروف الحاج خضر معروف
وهنا قام ( حاج خضر) بتسليم (رجل الخروف) التى كان ممسكاً بها (للسر) وتوجه لإستلام النتيجة
- أها النتيجة طلعت كيف؟
- (وهو يتمعن فى النتيجة) : والله يا حاج خروفك ما عندو مرض معدى لكن بس عندو صليبين سكرى وشويه أملاح !!
- طيب خلاص أدونا شهادة الذبيح المتعافى القلتوها دى !! عشان نمشى
- تمشى وين يا حاج ؟ إنت عملت ليهو فحص الدم
وهنا لم يتمالك حاج خضر نفسه وإنفجر … فحص دم يا ما عندكم دم … قلتو كشف نظر قلنا كويس .. قلتو فحص بول مشينا بولنا الخروف بالتلج .. قلتو إنتظرو إنتظرنا يا حرامية يا مستهبلين يا… تجمع الناس على أثر المشادة وأخذوا يحاولون تخليص رقبة الخروف التى أطبق عليها حاج خضر بيديه بقوة وهو يردد:
- مش الخروف ده ؟؟ مش الخروف ده ؟؟ أهو ح أكتلو .. ح أكتلو … ما دايرو ..ما دايرو
بينما كان الفحيص يخاطبه فى هدؤ :
- شوف يا حاج ما تعمل لينا فيها (قلبك حار) الشعب الشايفوا ده كلوا قالو ليهو أكشفو (نظر) للخروف كشفو .. قالو ليها أفحص (بول) للخروف فحصو … قالو ليهو أفحص (دم) خروف فحصو وكان قالو ليهو أمشى على العجين ما يلخبطو بمشى .. والله يا حاج تكتر كلامك هسع لو ما عملت لينا ليهو (أشعه مقطعية) ما نديك ليهو شهاده !!!
|
|
 
|
|
|
|
|
|
|
|
Re: سيناريوهات : الخروف المعافى ! (Re: الفاتح يوسف جبرا)
|
Quote: ما شاء الله … ما شاء الله يا حاج خروفك طلع نظرو مية فى المية يعنى ستة على ستة !
تسلم الاخ الفاتح على الابداع المتواصل
واصل نحن متابعين باعجاااااب شديد
تحياتى اسماء الجنيد/ مسقط
| |
|
|
|
|
|
|
|
|
 Re: سيناريوهات : الخروف المعافى ! (Re: الفاتح يوسف جبرا)
|
أستاذ الفاتح ،، مساء الخير (توقيت الدوحة) ...
مسؤول من الخير إن شاء الله ،،،
الأستاذ أسعد الريفى مسجل غياب من البوست ده ،،،
تعودت ألاقيه دائماً متحكر فى دياركم العامرة ...
(عسى ماشر) ...
------
سجلت إسمى فى حجوزات الخرفان السودانية القادمة إلى الدوحة على متن طائرة الخطوط الجوية، رحلة يوم الإثنين،،،،
هنا بقى تعالواا وشوفو الأشعة المقطعية الماها خمج ...
وبجد المشترى بيسجلو إسمه فى خروفو يعنى لحين الإستلام من الزريبة يظل المشترى و الخروف يحملان نفس الإسم....
لو مغالطنى أصورهم وأ جيب الدليل ...
إنتو براكم يا ناس شهادة الخروف "المتعافى" المتحضرين ....
ش
| |
|
|
|
|
|
|
|
|
|
Re: سيناريوهات : الخروف المعافى ! (Re: الفاتح يوسف جبرا)
|
الأستاذ الفتح
تحياتي وجيتك مرة تانية ولكن بالخبر اليقين ..
منذ قليل وقبل 5 دقائق بالضبط إتصلت بالأهل بالسودان وبعد السلام والإطمئنان ..
سألتهم السنة دي الخروف كيف ؟
قالوا أن الولاية قررت أن يكون هنالك مركز للخرفان [ علماً أن أهلي بمدينة عطبرة ] ..
وسوف يكون ذلك المركز هو [ بالقرب من نادي الشبيبة الرياضي بالسوق ] ..
سألتهم والله كلام ممتاز ماشاء الله ماشاء الله ده إهتمام بالغ من الولاية بصحة الناس .
قالوا لي ممتاز بتاع شــنو الكشف بي 25 ألف ..
سألتهم على منو البايع ولا المشتري ؟
قالوا لي والله ماعارفين .. بس ربنا يهون القواسي .
قلته ليهم القواسي هينــة لاكين شيلــو ليكم معاكم بول خروف في فتيل ..
وبالعــدم شيلــو معاكم قالب تلج ..
الجماعة سألوني وده كلو لزومووا شـــنو ؟
قلته ليهم : أصلـــو الفلم ده كاتب السناريو بتاعو الأستاذ/ الفاتح جبره ..
تحياتي والحكاية بقت جد جد ..
أخوك/ الأرباب
| |
|
|
|
|
|
|
|
|
|
Re: سيناريوهات : الخروف المعافى ! (Re: الفاتح يوسف جبرا)
|
العزيزة أسماء بت الجنيد
والله مشتاقين وطولنا من إطلالتك الأنيقة .. إن شاء الله تكونى وجميع أفراد الأسرة الكريمة بألف خير .. كل سنة وإنتو جميعا فى أمن وأمان لك خالص تحياتى ومودتى .. ولو عاوزة نصيحتى جيبى معاك خروفك !!
| |
|
|
|
|
|
|
|
|
|
Re: سيناريوهات : الخروف المعافى ! (Re: الفاتح يوسف جبرا)
|
تنبؤاتك حصلت...وعند (السودانى) الخبر اليقين
Quote: السودانى العدد رقم: 743 2007-12-09
تحديد اسواق بيع وتجميع خراف الاضاحي بمحليات الخرطوم
حددت وزارة الزراعة والثروة الحيوانية والري بالتعاون مع وزارة الثروة الحيوانية الاتحادية اماكن واسواق بيع وتجميع الخراف بمحليات العاصمة القومية كافة الي جانب تخصيص مسالخ ومساطب لذبيح الاضحية وذلك ضمن برنامجها لسلامة قطعان الماشية. اعلنت ذلك د.حاجة عبدالقادر مدير عام وزارة الزراعة والثروة الحيوانية بولاية الخرطوم بالانابة خلال اللقاء الذي عقد بوزارة الثروة الحيوانية الاتحادية والذي ضم الي جانب وكيل وزارة الثروة الحيوانية الاتحادية ممثلي محليات الولاية، اتحاد البياطرة، اتحاد الرعاة وشعبة تجار الماشية. ويهدف البرنامج الذي يستمر لمدة عشرة ايام سبعة ايام منها قبل العيد وثلاثة ايام حتى نهاية فترة العيد يهدف الي ضمان سلامة القطعان وتطمين المواطنين بوجود الاشراف البيطري للقطعان واستخراج الشهادات الصحية البيطرية لها وذلك بتخصيص فرق بيطرية متخصصة علي المستويين الولائي والاتحادي للقيام بعمليات الكشف والفحص. وقال الدكتور بشير طه وكيل وزارة الثروة الحيوانية الاتحادية ان البرنامج يهدف الي سلامة الذبيح وتفادي تلوث البيئة مضيفا ان هذا البرنامج سيخفف الكثير على المواطنين وذلك بتوفير خراف صحيحة مفحوصة. واشار الوكيل الي ان هذه الاسواق والتي ستوزع علي مختلف محليات ولاية الخرطوم لن تفرض فيها اي رسوم اضافية لقاء خدمات الكشف والفحص التي تقدمها الجهات المختصة. من جانبهم اكد ممثلو المحليات عزمهم علي تخصيص اماكن معينة لتجميع الاضاحي للمحافظة علي سلامة القطيع والمظهر الحضاري للعاصمة القومية.
=========
|
غايتو ياجبرة اخوى خروف الخرتوم قالوا متعافى طب.
تحياتى
| |
|
|
|
|
|
|
|
|
|
Re: سيناريوهات : الخروف المعافى ! (Re: الفاتح يوسف جبرا)
|
و الله ضحكت ضحك
دا ذى الزول البتكلم فى العصور الوسطى يقول ليهم
انا جيتكم بى حديدة كبيرة بتطير فى السماء وبجيبو ليك
الاكل فى كرسيك وبتقوم تمشى الحمام !!!!!!
بكونو شايفنو مسطول
انت عارف قصتك دى بى ضبانتها حصلت وباسرع من تصورك ذاتو؟؟
شكرا جبرا للحظات الجميلة ،، كنت مدبرسة والله
| |
|
|
|
|
|
|
|
| |
الفاتح يوسف جبرا
abubakr
ابن الرشيد
Khalid Saeed
شكرى سليمان ماطوس
مهيرة
طارق أحمد أبوبكر
دينا خالد
فيس بوك
تويتر
انستقرام
يوتيوب
بنتيريست