|
|
 حاج الخضر ،،، ياحُرْ .... ( رباعية )
|
حاج الخِضِر ،،، يا حُرْ
فَلَقَ الصباح اللاَّح ،، بى نورو كشف الضَّلْمَه
فـرَّنْ اُمَّات عشيش ،، الكان ضراها العـتمه
هبـهبْ أبْ عُـرُف ،، بى صياحو قال يا اُمَّه
جافـو النوم امُرْقُـوا ،، خلّوُ الضُرَاع تِتْحَمَّى
............
حاج الخضـر صنْقَر ،، فوق عنقريبو اتحكر
صـلى الركعـتين ،، لى ربو سـبَّح وكـبر
شال الفاتحة صنقع ،، حَمَد الكريم واستغفـر
صاح لى أم مساير ،، بشـويش وما اتنـهر
............
بى مهـلْ البتول ،، فتحت ضَـرَى الشُكَّابا
عَـدَلَتْ للمسـيره ،، وربطت طرف قُرْقابا
لفــحتْ النِعـلات ،، خلَّت بواقـى عَقَابا
جـاياك يالتُكُل !! ،، وينو النِّعاجْ حلاَّبا ؟؟
...........
تَكـَتْ الخُمَّارَه ،، غَرَفـتْ للعـجينه وكبَّت
فـوق طاجـن السجم ،، النارو هبَت وبقَّت
قـطعت للعصيدة ،، مـلت الكوارى وعبَّت
حـبات العرق سالت ،، من وجيها وصبَّت
...........
حـاج الخضر ،، دخل الزريبة يقْـدِل قدْلو
عـلَّق لى حـمارو،، المابشـوف تبْ مِتْلُو
وهَّـط سرْجو ،، باللـباب يَوَِزْنو يعـدْلو
يربط فى اللَّـجام ،، مـرات يكربو يفـتْلُو
...........
قبَّل على الشـاى ،، أب بوخا يقـوم يا فوق
باللقـيمات أم سـمن ،، الباقيه ليهو عِلُوق
يمـسح فى الشوارب ،، بَرْمةْ رُبَطْ حنقـوق
يا اللـبن المقـنن ،، الزَىْ حلاك ما بضوق
...........
حـزَم مُخْـلايتو ،، وبوخ العـصيده يفـور
لا مُـلاح لا شمـار ،، حـبةْ مـلح مصرور
فد فحْـلين بصل ،، من عِـرْشُو مـو مبتور
حاشـاك من الخـمج ،، كورة العُكارَه سَحُور
..........
نقْـرَطْ للـحمار ،، الوَسْـمُو بانْ فوق كُدْرُو
هـوَّدْ بالـدريب ،، المِِنْ طيَّعُـوهو بِخَـبْرُو
حاكْل المـَلود فى أيدو ،، سلُّوكه فَرقةْ سدْرُو
رحـمن يارحـيم ،، يسِّـرْ نهـارنا واجُبْرُو
..........
حـاج الخـضر يالزول ،، الْمِنْ وِعِينا وشُفْنا
فيك الغَـبَاش مَوْسوم ،، أصلك بِقـالْنا عُرُفْنا
من طـيبك المدفـوق ،، عبـَّينا منَّو كرَفْـنا
ياكـا الموكر فينا ،، ومزروع كمان فى جَرِفْنَا
...........
رحم الله ـ رمز إبن البلد ـ خالى الخضر ....
الفاتح الجنيد
|
|
 
|
|
|
|
الفاتح الجنيد
فيس بوك
تويتر
انستقرام
يوتيوب
بنتيريست