|
|
 ما بين حفظك الله لوالديك و نادي وليّ أمرك ..
|
زامن لمن تكون الحصة إملاء الواحد بيكون شايل همّ الدنيا كلّو في راسو ..
الفصل مسخّن واليد عرقانة معناهو الورقة في الكراس حا تتوسخ معناهو إنت مجلود مجلود ..
والعجب لو كان إسبلينق (إنجليزي ده يا مرسي؟ )..
تنتهي الإملاء وتجمع الكرّاسات وفي اليوم التالي الأستاذ لمن يجي داخل ويقول يا ولد أمشي جيب الكراسات من مكتبي عشان نوزعا ..
الواحد مننا قلبو يقع تحت كرعينو والطالب الخفيف ولفيف يجي طاير طيران شايل الكراسات وإنت تسترق النظر من بين الكراسات المجلدة بجلادات مختلفة ده كراس هاني المجلد بي أكياس راقية وعليه ديباجة أرنب ..
ودااااك كراس سليمان أبو جلاد بي جريدة الصحافة وداااااااك كراس خالد لما مجلّد داك وبين هذا وذاك تبحث عن كراستك والأستاذ يقلّب الصفحات وينده الإسم ليأخذ كل نصيبه من جلدات على حسب عدد الأخطاء ..
دايماً بيكون في زول شاااااااااطر وخطّو سممممح وكتابتو واااضحة وحروفو مقعّدة فيبدأ به الأستاذ ويقول :
بالله شوفوا كراس زميلكم ده نضيف كيف؟؟ بالله عاينو للخط ده !! وشوفوهو جايب كم !!
صفّقو1 ليو !!!
رط رط رط رط رط رط رط رط رط رط رط ..
يشيل الطالب كراسو ولمن يجي يقعد في الكنبة ..الكنبة كلها تتاوق ليهو كدي كراسك كدي النشوف ونمتع ناظرنا بتعليقات الأستاذ :
حفظك الله لوالديك ..
سر وعين الله ترعاك ..
ممتاز جداً جداً ..
لنفوق بعدها على صوت الأستاذ ونموذج اخر مغاير ..
بالله ده خط ده ؟؟؟
إنت بتكتب بي كرعينك ؟؟؟
ده شنو القرف والوسخ ده !!؟؟
أطلع لي برة هنا ..
يدّك قدام ..يدك قدام ..
طاااااااااااخ ..
طراااااااااخ ..
يدك قدام ..يدك قدام ..
طيييييييخ ...
طرييييييييييخ ..
وتجي شايل كراسك وحانف وشك ده إذا ما ساعدتها بي الدمعة باكية وانتو تجافو ما تحنو ..
ونفس الكنبة يكتلها الشمار وتتاوق ليك وكدي كراسك وكدي النشوف ..
لتجد نفس خط الأستاذ مع عبارات جديدة مغايرة :
أعد ...
جلّد الكراس..
حسّن خطّك ..
نادي وليّ أمرك ..
هلالنا العظيم(والعظمة لله) حفظك الله لوالديك وأنت تحرز الدرجة شبه الكاملة ولولا أنك نسيت التنوين بالضمتين في كلمة(كأسٌ جميلٌ) لأحرزت الدرجة الكاملة ..
أحرزت الدرجة 64 من 66 رعاك الله و وفقك وسدّد خطاك ..
حافظ على هذا المستوى ..
تسلّمت كل الجوائز جائزة الخط النظيف وجائزة الكتابة الواضحة وأحرزت المركز الأول دون منازع ..
أما الباقون فكان عليهم ان ينادوا أولياء أمورهم كيف لا ولا طالب منهم إستطاع أن يصل الرقم 60 وكما هو معورف في قانون أستاذنا الجليل إنو أي طالب يجيب أقلّ من 60 يتجلد (3 جلدات) وحذاري من الرديف ..عفواً الترديف ..
ذكرتني يا سيد البلد بي أمهات الطلّاب زمان ..الواحدة منهم تقول ليك ولدي ما فكّ الأول دي من دخل سنة أولى لحدي أسة هو في سنة (خامسة) وبيجي الأول ..
عزيزي الطالب :
هل تودّ أن تكون من من يحفظهم الله أم تنادي ولي أمرك وتاخد ليك تلاتة سيطان ؟
|
|
 
|
|
|
|
عمر الفاروق
فيس بوك
تويتر
انستقرام
يوتيوب
بنتيريست