|
|
 يا اخوانا دي حمة شنو دي ليها شهرين ومستمرة وما عالجتها صيدلية الكاسات المحمولة جوا
|
وصلنا مرحلة الهضربة يا ناس
من يوم ما جاتنا ( رجاء) في بيتنا ودخلت فينا حمى ابت ما تمرق بالذات من نوع فيروس ضلو ميت كده اسمو ( ذو القعدة) اها بقينا في الرترتة والسخانة ليل نهار شي مكمدات شي عسل نحل شي تصاريح وناس الصدى شايلين العواميد في الزيارات وفارشين في النجيلة ياكلوا ساكت وانا ارترت من الحمى وكمان الدعوات اها شدة بتزول وانت ماشاء الله عليك صحتك تمام وبتشم العافية قريب ودي عين دي وما يهمك يا زول ادوني ليك المسكنات دي لحدي ما حسيت اني قادر اشيل روحي وكتبوا لي خروج وفترة نقاهه عشان اتم العافية
اها الجماعة قالو لي (صفاء) جات تعال قابلها في بيتك . والجماعة نفخوني ليك الاسد النتر ، الزعيم، الوطن , قلت يا زول انا سيدها وسيد سيدها بلا صفاء بلا رجاء ومشيت منفوش كده لقيتها قدامي صغيرة وحليوة قلت خلاص ده المطلوب ويا دوب حفلة الاستقبال بدت وجاتني الدوخة كلها خمس دقايق لقيت ليك راسي لافي والدنيا كلها لافة وانا ما عارف انا وين ذاتو يا زول الحفلة كانت صعبة خلاص ووقعت وقعة شينة خلاص الجماعة شالوني بي نقالة على الانعاش مباشرة اها اوكسجين على ادوية سريعة ومرقوني العنبر وبروضا الجماعة جوني ليك المرة دي وشابكني ( ستظل وستبقى وستكون ومهما حصل انت القوي وانت الزعيم) والعواميد تتطاقش شي كسرة وشي فتة وشي ام رقيقة لايوقة خلاص
وانا لسه عضامي ترترت واسناني تصتك
اها لما الدكاترة فشلوا في علاجي قالو لي كدي امشي لي رجاء دي يمكن يكون عندها دواء لفيروس - ذو القعدة- يا ناس مشيت ولا حاجة كسرت لي راسي وجيت غاشي ليك ناس صفاء برضو ما عالجوني -
اها بقيت بين اتنين يا امشي الاردن للعلاج او ارجع البلد
الجماعة اخواني وحباني قالوا لي لقيناك الدواء في بيتك تعال
رجعت البيت وجهزت البيت كويس
وجبت الادوية معاي اصلهاعندي من زمان ( كل الصيدلية جبتها معاي - كاس ما نديلا - كاس دبي - كاس الشارقة- كاس شنو ما عارف ) والجماعة ما قصروا كتبوا ليك اسم الادوية في البيت في لافتة بالخط الكبير
قالوا لي بس اخوك الزعيم ده هو الاداك عين انت بس اهرشوا وخوفوا واغلبوا ومفعول الادوية دي حيشتغل
اها بالله العظيم الزول ده قدر ما حاولت معاه ما قدرت كل ما افوتو يلحقني لحدي ما تعبت ووقعت وهو فاتني هناك وغلبني الحقو
يا ناس طوالي راسي لفة وحمتى وصلت الراس كل الادوية المعاي في الصيدلية دي ما نفعت وبقيت اهضرب هضربة شديدة خلاص ( ضربة الجزاء هدية من الحكم - الحكم هلاللابي - عنتر قتلو اعمى - وغيرها وغيرها من الهضربات )ا
اها هسه انا في الانعاش والهضربة شغالة هبطرش وجابوا لي فكي كده من جماعتنا قال لي دواك في الكاس المحلي خلاص حاول السنة دي امشي الحج واصلوا الحج على الابواب توب واستغفر ربك وادعو كثير انك السنة الجاية تشرب كاس الدوري الممتاز - غايتو دي حاعملها وانشاء الله ربنا يقبل دعائي
|
|
 
|
|
|
|
جمال السنوسي
فيس بوك
تويتر
انستقرام
يوتيوب
بنتيريست