|
|
 سيناريوهات : كذبة أبريل
|
صحيفة الرأى العام
عدد الجمعة الموافق 30 نوفمبر 2007م
موقع الكاتب : www.alfatihgabra.com
أصبح الصبح .. بدأ المواطنون فى الإستيقاظ .. بدأ الأمهات فى إيقاظ الأولاد للذهاب إلاى المدارس ثم دخلن إلى المطبخ لتجهيز الشاى .. إرتدى الآباء ثيابهم إستعداداً للذهاب إلى العمل .. اليوم يوم عادى ككل الأيام غير أن ما يميزه هو ذلك الصوت الجهورى الذى يذيع فى المذياع بين الفينة والأخرى أن هنالك بياناً هاماً فترقبوه ..
- باقى ليك يا أبو محمد البيان ده يكون شنو؟ إنقلاب؟
- إنقلاب شنو يا حاجه إنتى ما نصيحه ؟ الإنقلابات دى إنتهت زمااان
- طيب يكون شنو يعنى؟
- والله إحتمال حاجه تكون بتخص الشريكين
- الشريكين ديل منو كمان؟
قبل أن يجيب أبومحمد على حاجه (محاسن) إذ بالصوت الجهورى يعلن عن أن وزير المالية والإقتصاد سيلقى على المواطنين بياناً هاما بعد قليل فتخاطب حاجه محاسن أبومحمد قائلة :
- شوف كلامى ده أكان ما قالو كل زول يجى يشيل نصيبو فى (البترول)
- يا ولية إنتى غبيانه نصيب شنو وبتاع شنو؟ إنتى قايلاهو (صندوق) وإلا صرفه !!
- أها يعنى عاوزين يقولو فى البيان ده شنو؟ معقولة يكونو عايزين يزيدو الرغيف تانى ؟
- إحتمال ! يعنى ح يخفضوهو !!
المذيع : ايها المواطنون الآن يذيع عليكم السيد وزير المالية والإقتصاد هذا البيان الهام من خلال المؤتمر الصحفى الذى يعقده سيادته :
الوزير : بسم الله الرحمن الرحيم .. أيها المواطنون الشرفاء لقد ظللنا نستمع إليكم وأنتم تجأرون بالشكوى من أن دخلكم الشهرى لا يكفى متطلباتكم وإنكم تعانون كثيرا من نفقات العلاج والتعليم ومصروفات الحياة اليومية من أكل وشرب ومسكن وملبس . أيها المواطنون الشرفاء لقد ظللنا نراقب فى أسى وحزن عميقين ما ألت إليه حياتكم البائسة الفقيرة من فقر ومسغبة ولكن حينها لم يكن باليد حيلة فأنتم تعلمون الحصار الذى كان مضروباً علينا وآثارة الإقتصادية المدمرة كما تعلمون الفواتير الباهظة التى كنا ندفعها يوميا للحرب والآن أيها المواطنون الشرفاء وبعد أن وضعت الحرب أوزارها وساد السلام وعم أرجاء الوطن وقمنا بتوفير منصرفاته الباهظة كما ومن نعمة الله علينا أن تزامن ذلك مع تصديرنا للبترول فإنى أبشركم بنهاية الفقر والمسغبة وبداية عهد جديد لا تحتاجون فيه إلى شئ أبداً فالدولة سوف توفر لكم كل شئ مجاناً ودون أن تدفعوا مليما واحدا للمأكل والمشرب والملبس والعلاج وحتى التعليم .
المواطنين الشرفاء :
إننا نشكر لكم أن ربطتم الحزام كل هذه السنوات الطويلة وصبرتم معنا على حياة الفقر والتقشف دون ضجر أو كلل ولا ملل والآن وبعد أن زالت كل المسببات وأصبحنا بعون الله تعالى دولة بترولية تنعم بالأمن والسلام والإستقرار جاء يوم رد الجميل لكم لذا فقد أتينا لكم بما لم تأت به الأوائل وما لم تفعلة حكومة فى شعبها من قبل
المواطنون الشرفاء لقد قررت حكومتكم المجيدة أن تلبى لكم كل إحتياجاتكم مجاناً ودون أن تدفعوا أى نقود
وذلك إبتداءاً من مطلع العام الجديد .. وفقنا الله لخدمتكم والله المستعان ولا نامت أعين الجبناء والمتربصين وشكراً
مقدم المؤتمر الصحفى : الآن الفرصة للحضور من مندوبى أجهزة الإعلام علماً بأن الزمن ضيق شوية فسوف نكتفى بعدد قليل من المداخلات ... أيوة الأخ هناك
مندوب 1 : الحقيقة البيان بتاع السيد الوزير ما وضح لينا المسألة دى ح تتم كيف ؟
الوزير : أيوااا كلام كويس .. أول حاجه فى فورم ح يتوزع لكافة المواطنين عشان يملوهو كل أسرة وكل فرد لازم يملأ الفورم ده ويسلمو لينا ، الفورم ده بيحتوى على كافة البيانات المتعلقة بالشخص والناس البيعولهم إذا وجدوا وبالتالى نحنا بعدين ح نعرف الإحتياجات الفعلية لكل مواطن من مأكل ومشرب ملبس وكده وح نديها ليهو بالقدر والوكت المحدد يمشى يصرفا عادى ذى ما كان بيصرف التموين
مندوب 2 : الحقيقة أنا سعادتك بتسائل عن مسالة التعامل بالنقود يعنى العملة المواطن ح يعمل بيها شنو طالما إنتو ح تدوهو كل حاجه مجانا؟
الوزير : ببساطه لأنو ح نوفر للمواطن كل حاجه مجانا فما ح يكون فى تعامل بالعملة .. يعنى ببساطه مش ح يكون فى قروش متداولة .. يعنى الزول بدل ما نديهو مرتب ح نديهو إحتياجاتو أصلو إنتو قلتو المرتب ما بيكفى ..
مندوب 3 : الحقيقة أنا عاوز اسأل عن مصير القروش العند الناس ح يعملو بيها شنو؟
الوزير : القروش العند الناس دى أنحنا ح نبيع ليهم بيها قبل ما يبدأ المشروع أى حاجات عاوزنها .. يعنى ممكن الواحد بالقروش العندو دى يشترى ليهو عربية .. تلاجه .. نديهو بيها قطعه واطة .. المهم أى زول ح نديهو حاجات قدر القروش العندو ..
مندوب 4: طيب السؤال اليفرض نفسو سعادتك إنو الناس كلها إحتياجاتا ما واحده بمعنى هل إحتياجات العامل مثلاً والدكتور ح تكون واحده؟
الوزير : طبعا لا ح تتفاوت نوعية الإحتياجات لكن فى مسائل العلاج والتعليم ح تكون واحده
مندوب 4 (متداخلا) : وطيب بالنسبة للناس الما شغالين فى الحكومة ؟
الوزير : ديل عشان نحنا نحفزهم على العمل ح يستخدمو أسلوب (تجارة المقايضة) يعنى مثلاً ميكانيكى صلح ليك عربيتك تقوم تديهو (علبة سجائر) عمة توتال أى حاجه قدر الشغلانه العملا !!
بعد أسبوع :
مجموعة من العربات تطوف بجميع الأحياء وتعلن بواسطة المايكرفون :
عزيزى المواطننن عزيزتى الممواطننا .. غدا آخر يوم لتسليم العملة التى بحوزتك وشراء ما توده بها من حاجيات .. قطع أراضى بمختلف الدرجات .. أدوات كهربائية .. تلفزيونات جميع المقاسات .. تلاجات .. بوتوجازات .. خلاطات .. راديوهات .. مسجلات.. فديوهات .. سى ديهات .. جنريترات .. أدوات مطبخ .. برستو .. أطقم شاى .. غداء .. أطقم قهوة .. عشاء .. أثاثات .. حجرات نوم .. حجرات سفرة.. أطقم جلوس .. أثاثات مكتبية .. ملبوسات حريمية .. ملبوسات رجالية .. لبسات أطفالى .. أحذية .. كل شئ تقدمه لك الحكومة فقط تعال ومعك آخرون .. عزيزى المواطن غداً ستصبح العملة غير مبرئة للذمة فسارع لشراء إحتياجاتك .. عزيزى المواطن لا تحمل هما لإحتياجاتك الضرورية لأن الحكومة سوف توفر لك الأكل والشرب والملبس والمسكن فقط أملأ الفورم المعد لذلك وتسليمة للجهات المسئولة .. أخى الموااطن أختى المواااا......
الناس ما ناقشة حاجه :
ككل المشاريع التى تقوم بها الحكومة فقد إفتقر هذا المشروع لقيام أى حملات توعية مما جعل الناس يتخبطون فى فهمة وطريقه عمله فهذا هو (أبوزيد الحلاق) يخاطب زميله (عبدو) :
- يعنى هسع الزبون الجاى يحلق يدفع لينا كيف ؟
- والله حسب الشئ الفهمتو أنا من الناس إنو كل زول الحكومة بتعمل ليهو دفتر (حلاقه) يقوم يجى يحلق ع الدفتر ونكتب ليهو قيمة الحلاقه ونختم ليهو وبعدين الحكومة تحاسبنا
- والله أنا سمعت كلام غير كده
- اللهو شنو؟
- قالو الحكومة حاجات الحلاقة والتفصيل والحاجات الزى دى الحكومة ما عندها بيها شغلة يعنى حسب ذوق الزبون ممكن يديك (طاقية) يديك (جوز حمام) يديك أى حاجه تعادل قيمة الحلاقه
- (مقاطعا) هو عليك الله حاجه ذى دى مش مفروض يشرحوها لينا بدل ما نكون ما عارفين أى حاجه ؟
- الحكومة دى حكايت الشرح للناس دى أبدا ما بتدورا ولا بتكلف نفسها بيها
فى هذه الاثناء يدخل (زبون) ويجلس على الكرسى .. يتجه نحوه (الأسطى ابوزيد) الذى يبادره :
- مرحب مرحب الأخ (رأس) وإلا (دقن) ؟
- لا (راس)
- (من خلف الزبون وهو يضع عليه المريلة ) : شوف ياخينا الأولو شرط آخرو نور .. أها طريقة الدفع كيف؟
- (فى إستغراب) شنو كيف ؟ يعنى ح ادفع ليك بالفيزاء كارد
- لا ما اصلو ..
- (وهو يقوم من الكرسى) أصلو شنو؟ والله حكايه عجيبة عشنا وشفنا الواحد يجى يحلق يسالوهو ح تدفع بى شنو؟ عالم عجيبة
- (وهو يلحق به) : يابن العم تعال يا .. استاذ
وفى موقع غير بعيد من (صالون الأسطى أبوزيد) كان سائق الركشة (عمرين) قد قام بتوصيل
الحاجه (نفرين) من منزل إبنتها بأمبده وما أن نزلت الحاجه (نفرين) من الركشة حتى قامت بفتح (محفظتها) وأخراج (طاقية جديد) وضعتها على رأس (عمرين السائق) وهى تثبت عليها وتخاطبه :
- أريتا فى راس (معاوية) ولدى .. أريتا طاقية السرور
- فوجئ (عمرين) بهذا التصرف فقال مخاطبا الحاجه (نفرين) فى إندهاش :
- يا حاجة أنا عاوز قروش المشوار ما عاوز طاقية
- وحاتك إنت يا ولدى وما طالبنى حليفة أنا الطاقيه دى مشترياها لأبوالأولاد قبل ما يموت بى خمسة تالاف
- يا حاجه عليكى الله ما تأخرينا ساكت أدينا حقنا خلينا نمشى
- حق شنو .. إنت ما عارف الحكومة قالت تانى قروش مااافى
- يا حاجه لسه الكلام ده لسه ما عملوهو
- ما عملوهو شنو سمع (أضانى) دى الوزير ذااتو بى خشمو قال خلااس مافى تانى زول يدفع قروش
الناس تتخلص من الفلوس :
تزاحم الناس على نقاط إستبدال العملة والتى تم تصنيفها تبعا لفئات الشعب المختلفة كالآتى :
نقاط الإستبدال (الماسية) : وهى التى تخص كبار تجار العملة والسوق الاسود والراسمالية الطفيلية وغاسلى الاموال وآكلى المال العام وفيها يتم إستبدال (النقود الكاش) بقطع الاراضى المميزة والمزارع المطلة على النيل
والسيارات الفخمة والشاحنات الضخمة والفلل الجاهزة
نقاط الإستبدال الذهبية : وهى التى تخص الراسمالية الوطنية وكبار التجار والمهنيين وفيها يتم إستبدال القطع السكنية درجة أولى والعربات الصالون والهايس والأمجاد والاثاثات الفاخرة والأدوات الكهربائية
نقاط الإستبدال الفضية : هى تخص (بقايا) الطبقة الوسطى من صغار التجار وكبار الموظفين وفيها يتم إستبدال
القطع السكنية الشعبية وبعض الأجهزة الكهربائية الصغيرة والملبوسات
نقاط البيع البرونزية : وهى تخص الطبقة الكادحة وعامة الموظفين والعمال وفيها يتم إستبدال النقود بالملبوسات والستائر والملايات وبعض المأكولات المعلبة ..
كلو مجانا :
وأوفت الحكومة بوعدها .. رصدت (صحف) اليوم الأول من يناير 2008(بالصورة والقلم) البدء فى تنفيذ المشروع الذى يعد الأول من نوعه فى تاريخ (البشرية) .. تزاحم المواطنون على نقاط (التموين) لأخذ إحتياجاتهم (المجانية) وقد تزامن ذلك مع الذكرى الثانية والخمسون للإستقلال حيث جاءت كلمة الحكومة بمرور هذه الذكرى المجيده وهى تمجد هذا الإنجاز الإعجاز بتوفير كل إحتياجات الشعب
كاول حكومة فى التاريخ تقوم بهذه السابقة وقد جاء فى كلمتها توجيها للمواطنين أن يحملوا (كارت التموين) ويذهبوا إلى أقرب نقطة (تموين) ليأخذوا كوتتهم الأسبوعية من إحتياجاتهم المنزلية .. شاى سكر لبن بسكويت بهارات دقيق بقوليات لحم زيت سمن كبريت بهارات وكل ما يحتاجه حتى إستهلاكة من الكهرباء (الجمرة الخبيثة) وذلك طبقا لما قدمة من بيانات أشرفت عليها جهات عده وتم إدخالها لشبكة كمبيوتر ضخمة خصصت لهذا الغرض .
- الحاجة الرضية آدم عثمان
- أيوه يا ولدى
- أهو دى حاجاتك .. خمسة كيلو رز .. باغة زيت تحمير .. باغة زيت سمسم .. كروسة كبريت .. ستة ارطال سكر .. و .......
- واللحمة والخضار يا ولدى
- أمشى الدكان التانى داك أديهم الكرت بتاعك ده
- يا يمة الحكومة تتعلى ما تتدلى .. يا يمة الحكومة الله يخليها لينا .. طيب من زماااان مالهم كانو مضيقين
علينا العيشة
ما أن تخرج الحاجة الرضية من شباك التموين حتى ينده (الموظف) الذى يقوم بتوزيع التموين بإذاعة شخص آخر :
- الحاج عثمان فضل السيد
- نعم أيوا يا ولدى
- طيب عندك يا سيدى علبتين لبن بدرة كبير .. وسبعه رطل سكر .. ونص رطل زيت و..
- أهم حاجه يا ولدى التمباك ... السعوط يعنى
- يا حاج تمباك ده ما أدونا ليهو .. بس اكل وشراب ولبس وحاجات ذى دى
- لكن يا إبنى راسنا ده نعمل ليهو شنو هسع ؟
- شوف يا حاج ممكن تمشى تشترى تمباكك ده براك يعنى تجارة (مقايضة) وكده .. يعنى تشترى منو (رطل) تمباك وتديهو (راديو ترانسستور) مقطع (جلابية) حاجه ذى دى
- (أحدهم متدخلا) : يا حاج مش بركة فى الحكومة أكلتك وشربتك مجانن كمان عاوزا تعدل ليك راسك
- هو راسى ده الطير (برجو) منو ما الحكومة دى ذاااتا
كلام نواعم :
- عليكى الله شوفى جنس الغبا ده .. حنان الحنانة قلت ليها تعالى حنينينى قالت ليا بلا أديها توب الشفون المشجر الجابو ليا (مأمون) من لندن ما ح تختها ليا
- توب الشفون المشجر الاحمر ؟
- ومش كده وبس قالت ليا لو عاوزاها منقوشة إلا أديها معاهو (شبشبى) أب كعب (بلية) البمبى !
- والله حنان الحنانة دى بتبالغ دى اصلها حنة وإلا صبحية !! والله أنا أخت ليك جنس الحنة الما خمج يا فتحية بس ادينى البلوزة المخططة ذى لون النمر ديك والله ظارى نازل فيها عدييييل كده
- عليكى الله هو كان ما ساكت يا علوية الناس دى كيفن حياتا تمشى بدون قروش؟
- والله بركة اللغوها ذاتو أكان الورقه أم خمسة ما بتفرزيها من أم عشرين ! – مواصلة- وإنتى القروش عايزة بيهن شنو ما قالو ليكى الحكومة بتتكفل بيكم الأكل مجانن والشراب مجانا وأى حاجه مجانا
- الأكل والشراب ده عرفناهو لكن طيب هسع أكان ماشة (أفتح الكتاب) وإلا (أفتش روحى) دى عند فكى (أبكر) ده أديهو البياض ؟ أحاسبو كيفن
عدادات :
- والله شوف يا استاذ لو عاوزين الفنان عادل أبوكراع ده يطلع يمشى معاكم يحيى ليكم الحفلة دى غير (موتر فيسبا) ما بمشى عشان محتاج ليهو شديد والمشى من بيتهم فى أم بده لى نادى الفنانين ده هدا حيلو !!
- العريس ده عندو دكان عجلات فى السوق ما ممكن نديكم بدل الموتر تلاته عجلات رالى !!
- والله ما أظن يوافق - مواصلاً – إنتو حفلتكم دى إلا فنان؟
- كيف يعنى؟
- لا أقصد فنانه ما تنفع ؟
- ممكن مافى مشكلة
- طيب خلاص نشوف ليكم حنان (مس كول) دى ممكن بى علبت (كريمات) تجى .. بى كم باكو حنة (حجر) وإلا كرتونة بتاعت فيرأندلفلى ..
مقابلات مع المواطنين :
سيداتى آنساتى سادتى يسر برنامج (مع المواطنين) أن يخصص هذه الحلقة لإستطلاع آراء المواطنين حول المشروع الأنجازى الإعجازى الذى لم يسبق له مثيل والذى يعد الأول من نوعه منذ أن خلق الله الأرض ومن عليها إنه مشروع (الكفاية المجانية) ... معانا المواطن :
- سيف الدولة خضر
- يا استاذ سيف أيه تعليقك على المشروع وهل عندك أى آراء أو إنطباعات
- والله فى الحقبقة مشروع ما كنا نحلم بيهو والله نحنا ظلمنا الحكومة دى سااكت وقلنا إنها ما جايبه خبرنا لكن إتضح إنو أنحنا ظلمناها كتير
- طيب ما عندك أى ملاحظات يا استاذ سيف على المشروع ده أو إنتقادات
- والله أنحنا بس كنا عاوزين (السجاير) يخش ضمن (الشغلانه) لأنو بينى وبينك يعنى (عمك) مدخن من الطراز الأول وهسع أنا قاعد أبدل الهدوم بتاعتى بالسجاير وخلاص فضلت ليا بس جلابية وعراقى ويعلم الله بعد ده الواحد يعمل شنو
- شكرا يا استاذ (سيف) وإن شاء الله مناشدتك توصل للمسئولين عن المشروع
سيداتى آنساتى سادتى .. يسرنا ان نلتقى أيضا بالآنسة .. منو معاى ؟
- لنا هيثم الرشيد
- إذيك يا لنا
- أهلا بيكى
- ممكن تورينا يا لنا رأئك فى المشروع ده شنو؟
- والله شكرا لكم .. أنا المشروع ده شايفه بابى ومامى قالو إنو كويس للطبقات الفقيرة دى وإنو نحنا موش ح نتأثر بيهو لأنو (بابى) بجيب لينا كل حاجه من بره ...
- يعنى إنتو هسع ما بتمشوا الدكاكين بتاعت التموين دى ؟
- نو .. نو قاعدين نخلى عم (خليل) الغفير يصرف حاجاتنا
أبريل 2008 م :
المواطنون يقفون أمام نقاط (التموين) المقفلة فى إنتظار أن يقوموا بإستلام حصصهم (المجانية) .. الإنتظار يطول.. تغيب الشمس .. لا أحد يستلم حصته .. يعود البعض إلى منازلهم خاليى الوفاض .. يجلس البعض أمام (نقاط التموين) آملين فى ان يتحصلوا على إحتياجاتهم ..
- يا جماعه الناس ديل وين
- الناس ياتم
- الناس المفروض يوزعو لينا إحتياجاتنا ... المشروع ده هسع ماشى ليهو اربعه شهور ... معقول يقيف؟
- وما يقيف ليه إنت ما سمعت الكلام القالتو الحكومة
- قالت شنو؟
- قالت دى كذبة أبريل !!
|
|
 
|
|
|
|
|
|
|
|
Re: سيناريوهات : كذبة أبريل (Re: محمد مكى محمد)
|
استاذ جبرا , كلمات جميلة ومعبرة , ياخى السناريوهات دي حتبقى افلام متين ؟ كتابة مبدعة وجميلة وبرضو يقولو ليك فى ازمة دراما فى السودان , الحكاية ما ازمة دراما , الحكاية ازمة نظر من الممثلين الذين لا يلاحظون مثل هذه السيناريوهات الجميلة ... الى الامام
| |
|
|
|
|
|
|
| |
الفاتح يوسف جبرا
عزان سعيد
محمد مكى محمد
فيس بوك
تويتر
انستقرام
يوتيوب
بنتيريست