|
|
 كلام .. كبار كبار
|
من منا لايعرف العم حمودة حلاق جامعة الخرطوم الأشهر - في عهدها الذهبي - ومن لا يعرفه فمن المؤكد أنه سمع بمقولاته الشهيرة في تعمده استعمال الكلام ( الكبار )
وحمودة هنا لتثبيت الفكرة فقط و لكن هناك حمودات كثر ..... واليكم ما صادفته أنا فقط
من كلام ( كبار ) أستعمله بعض البسطاء كل بطريقته ، ، ولكنه أنتج كوميديا لفظية بديعة .
- في أبو ظبي كنت أتحدث مع شخص أسمه "مبارك" بسيط حد البساطة ساقنا الحديث الي أحد أقاربه وهو رجل شهم أسمه " محمد " ،، تحدثنا عن شهامته المفرطة ومواقفه النبيلة فقال لي مبارك " والله محمد دة وقف معاي وقفات ما ساهلة أبدا والواحد ما عارف يجازيهو كبف ،، غايتوا ربنا يقدرنا ونرد ليهو الصاع صاعين " .
- في مرة ثانية وفي أحد جلساتي مع مبارك سألته ان كان بمحله خانة لعمل اقامة لاحد الشباب في حاجة شديدة لتعديل وضعه ،، أعتذر لي بشدة وأمسك تلفونه واجري اتصال بأحد معارفه للسؤال عن طلبي وبعد السلام من الطرفين فهمت من سياق المكالمة ان الشخص اعتذر له عن الطلب فسمعت مبارك يقول له " طيب ياخ ما في زول تاني تشير لينا ليهو بالبنان يقدر يعمل لينا الإقامة دي " .
في حلتنا ،،، شخص لطيف يلقب بـ " أب رونجة " يتساقط الكلام " الكبار" منه درر
- في مرة كان مجموعة من الشخصيات يلعبون الكوتشينة والتنافس حامي، وفجأة رمي أب رونجة كرت سرعان ما أختطفه الجالس علي يمينه صائحا " خمسين " .... أغتاظ زميل
أب رونجة واحتج قائلا " بالله دة كرت يرموهو في وقت زي دة يا حيوان " رد أب رونجة عليه قائلا " ما رميت إذ رميت ولكن الله قد رمي " .
- نفس أب رونجة ، ، جاءوا إليه بوالدته من مدني وهي مريضة جدا ودخلت في غيبوبة
وأصبحت لا تعرف من حولها من الناس ،، فجأة توفت خالته فترك والدته مع أبنائه وذهب إلي
عزاء خالته ،، في بيت العزاء سأله الناس كثيرا عن والدته وصحتها و...............الخ
أحد الرجال الكبار سأله ،، أها كيف الحجة هسة ما بقت تميز كويس ؟
قال أب رونجة : والله الحمد لله هسة بتميز تمييز عنصري عديل كدة ؟
|
|
 
|
|
|
|
Abd-Elrhman sorkati
فيس بوك
تويتر
انستقرام
يوتيوب
بنتيريست