|
|
 الى الاصدقاء الفاضلابى وعمر عبد العزيز يجدهم بخير
|
الفاضلابى
أخبــار ذِكْركْ الفي خسوســى
وصلن عندي محفوظات بقن في الدوســي
القت سيف برنجو ومحددنــــــو لبوســي
خلن قلبـي يلعب زي نتيجة السوسـي
ذاكرتى تمتلى ببيان الاصدقاء ورسائلك الى مصطفى سيد احمد وبوب مارلى وذكرى اللقاء الاول بيننا فى تلك الرحله التى نظمها الشمباته بجامعه الخرطوموم و ماكان بعدهامن رحله طويله وممتده من الصداقه التى اعتز بها كثيراً حتى وان كانت فيها تباطوء لخطواتك اذ عليك ان تتحدث اثناء السير فاعذرنى يا صديقى.
صديقى(المتحدث) البارع والفنان الجميل على الرغم من التقارب بيننا فى السن لكنى اجد نفسى شاكراً لكل التجارب التى كنت فيها معلماً بحق جعلتنى خبيراً فى التعامل مع الاشياء وفى بعض الاحيان اردد وبثقه كما قال قاسم حداد وخالد الشيخ فى ذلك الكاسيت الذى احتفلنا به كثيراً فى العربيه الفولكس ان كنت تذكر (كل هذى الوجوه الصغيره اعرفها واحداً واحداً)
و كما كنت اصادف طرقاً مسقوفة بالرعب كنت استخدم تلك الطاقه التى تبثها وصوت ادونيس واحرسها بزعفران المرايا.
يا صديقى مشتاقين وللعربه المذكوره اعلاه خالص الود وجميل الذكريات تعلمت القياده عليها ذات مساء لكى تنتهى من موضوع مع جميله من الجميلات
العربيه الخدرا التى كانت يمكن ان تجعل منك شهيد الثقافه و الشباب
فاضلابى
شكراً
شكراً لانك اتخذت الهجره خياراً ,لعلك اذا كنت متواجداً هنا تسكن بيننا وتمارس فعل المودة والرحمه كنت لتكون صاحب عادى وبايخ وتقليدى زيك زى البلد دى
اللهم احفظ لى اصدقائى
داير اقول ليك حاجه
البارحه كنت فىConcert لعازف بارع على اله العود يسمى نصير شمه الرجل ده مبدع حقيقى وله عازف ايقاع راجل عجيب
لكن اغرب واجمل ما كان الحفل باب كان فى اعلى الوسط على الخشبه, ان ابصرته وارجعت البصر كرتين يتغير احساسك بالموسيقى و تملاك لحد بعيد شكراً للباب وشكراً لك لانك علمتنى (الشوف) المختلف.
تحياتى لمدينه وارجو ان تعلمها اى حب احمله لها ولابوها (رسامى المفضل)
قال تعالى (ولاتدرى نفس ماذا تكسب غداً ولا تدرى نفس باى ارض تموت)
|
|
 
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: shabaka)
|
اخى الحبيب اب احمد
يا شيخى فى الغناء مشتاقين
لا ادرى ما الذى يحدث لى هذه الايام انا ملك الحزن او كما قال صديقى رضى الله عنه ضاقت البلاد علينا نمارس القرف اليومى من بعد صلاة الصبح فى الوقت الذى يدعونا فيه الاب ان قوموا لانه لا يريد ان يكون ابنائه من الخائبين والخملات ويبداء فى ترديد بيت الشعر ذاك
ناموا ولا تستيقظوا ابداً ما فاز الا النوم
ونحمد الله على انه جعلنا من ابناء هذا العالم والمعلم الجليل
الزهج فى الشارع العام وعند قراية الجرايد او مشاهدة التلفزيون ونستعين بالصبر والصلاه واحاول ايجاد طريقه ذكيه للتغلب على الشعور بالفشل الذى يعترينى تماماً كما كنت تفعل حين كنت تعلمنى كيفيه التقاط الكره الطائره وا نا فى المرحلة الوسطى بواسطة (الطشط) بتاع حاجه ام سلمه.
اشتاق لدافورى ما ضرورى يكون فى البيت بل الافضل فى اى مكان غير المنطقه الجغرافيه التى تسمى السودان فهى مكان غير امن لاحمد و اولاد اخوانك التانيين.
اذكر انك وبقية الاخوان الكبار علمتونا ان نكون صادقين ونحب من حولنا ونحاول ان نكون مفيدين للغير وبعد ذلك نخليها على الله.
لكن عارف يتعاظم احساسى هذه الايام بان هذه الافعال (نقيز) بره نوبه الكذب و الزيف التى اجتاحت الجميع كانها فيروس واصبحت لا اعلم ان كنت انا الفيروس ام هم.
مشتاقين لى لمة فيها غناء فى الصالون بتاع عمك البروف وحتى وان كان الغناء عند البعض شى ما كويس لكن ياعمر تجدهم يرقصون حتى ينشرط (.........) نعم تلك القطعه التى تحب ان تذكرها
وياريت كان بقت على الرقيص يعنى ممكن يكونوا بعملوا اى شى الـ7 وذمتا لكن يتم تقييمك فى الفيش انك غناى الا انهم هم الغنايين ولكن لا يشعرون
كل ما اسمع كلام بتاع انو احمد المصطفى غير مفهوم الناس عن الفن و الفنانين اكتشف انو البنى ادم الوحيد الحصل ليهو كده عمك البلوفستر
والغريب فى الامر ان ما يحدث فى بلادى يحدث فى هذا القرن وانا لا اتحدث هنا مئات السنين ago
تعرف يا اخوى (اللخبته) حاصله انا قناعتى بالحركه الشعبيه و المؤتمر الوطنى والتجمع ومفهوم الديمقراطيه والشموليه والشرفاء والحراميه والمريخ واااااااااااااحد
متذكر مجدوب ود خالتك ثريا كان عندهم فريق كوره فى الرابطه فى شندى اسموا (الجوطه قامت) بس ده الحاصل لكن عارف الواحد (جايط) لدرجه تجعلنى اتسأل (الجوطه) دى فى راسى ولا بره منو.
اخر ماتبقى لى حلقومى والهلال و ان الحمد لله رب العالمين
ماتطولوا الغيبه او كما قال محمود تاور
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: نهال الطيب)
|
شبكــــــة الجميل
تصدق لي زمن ما ضحكتا الليلة عرفت فيك قدره ساخرة على الكتابة
وعبرك احي الصديق عمر عبد العزيز الذلك الغناي واتذكر معاهو زمن
بروفات نادي العباسية والجميلة ( رزاز ) تلك المجموعة ذات العمر القصير جدا
اذكر ان غنى معنا في مسرحية جميلة هو تماضر زميلته الشمباتيه
يا سلام على ذلك الزمن ....
شبكـــــــــــة
انت هنا ترسل لنا صورة قاتمه جدا عن الوطن وانت ما زلت تغني مع ذلك
العقد الفريد ( عشان عيون اطفالنا ماطوق الهزيمة ) ولكنك تعلنها ان الهزيمة
مستفه في سندوشاتهم وفي حقيبة المدرسة ...
الفاضلابي ... ذلك الجميل الذي يضحكـ ومادي لسانوا لنا نحن جماعة الجمام
( اظنك فاهم يا فاضلابي )
بالله عمـــــــاد ببو كيف ؟
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: shabaka)
|
شبكة صاحبي
(المكتوب المنك جاني) ..
قال صاحبنا الذي غاب بهنس
هديت مسداري لي بلدا منغنغ وجارف
وأكرم نادره خاصة مواسم السوق القضارف
محل قعدو الفحول واتباصروه العارف
هم بحر العباب وايش النقيص لي غارف
دهب كلمة الصريف
ليلا مرصع بالحنين يلمع دمع
وجه البنات والريح تتندل في الشمع
الطوف مطلوح موج بيفرد وينجمع
ليلا يصن فيو بلعة الريق تنسمع
ليل في خريف
تنقرش عصبي في النجمات تلوح ده صوابي
ملتهب الوجود تنفخ رماد أعصابي
غبيت في الرحيح دون ضيف فتحت ابوابي
دخلت فيها غيمةورحمنت أسبابي
مابعدم خريف
حافي عليها مشيت والحسكنيت سجاده
غيلان الالم جو وأكلتهم لباده
حفيان بت حضنتهاواتخلقت سعاده
حفنه من النعاس والغفوه بالجباده
شفت عيون خريف
..شفت عيون خريف
أما بعد .. مدينة بخير
ثم إنه يا شبكة في المسرح العبثي مسرحية جميلة إسمها في إنتظار غودو .. بطلها هو الزمن وغودو الذي لا يأتي أبدا..بالرغم من حضوره الطاغي في المسرحية.. أظن ما بيننا يشبه غودو فمنذ أن زرتني في أوسلو و أنا أفكر كثيرا و أتمتم لسري قول عاطف خيري  يا غربة نحن مشينا وين) ما بنا الآن يا صاحب غربة ليست كغربة المكان فهي ملتصقة بالروح زي القرادة..
و لكن رغم هذا أعلم أن لدي الكثير لأكون شاكرا...
القوى الخارقة كانت دائما الى جانبي..
الموسيقى كانت تضع أشيائي في مكانها دائما وترتب فوضاي
الغروب عند النيل ساعدني أن أحس زهرة كما يجب
التعب أخرجني دائما من عزلتي الروحية و ساعدني أن أتصل بوحل الحياة
الجنون ساعدني أن أقرر دائما
أصدقائي ستعرفونهم بسيماهم
هم طرق العالم يقودونني إلى قلبي... فألتحم بنهر الصبر الذي يتخلل حياتي
أصدقائي أنا أحبكم
لهذا أحسني أحيانا كأنني الضوء
راجع ليك يا حمار
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: shabaka)
|
منور البورد يا شبكة..
إنت عارف صاحبك فاضلابي ده راجل فناااان شديد.. إتصاحبنا فترة من الزمن أيام رابطة شميات بجامعة الخرطوم وبعدين ما عارف الحصل شنو!
العجبني فيهو إنو راجل مليان نشاط زي ما هو مليان إحساس وجمال ... كان عندو كرت Business card صغييير ما بتلقاهو إلا عندو، تصدق لسة محتفظ بيهو بالرغم إنو الكلام ده ليهو أكتر من ستة سنين..!!
ما عارف عمل شنو في موضوع صفحة الإنترنت الخاصة بيهو لأنو كان في فكرة نعملها سوا.. الزول ده مجنون وعندو حاجات ما عند غيرو يا ريت كل الناس تشوفها وتستمتع بيها..
أما عمر ده قصة براهو ... راجل فنان وغنااااااي شدييييد.. الزول ده ما عادي في حاجات كتيرة (والكلام ده ما بقولو لأنو نحن أولاد عمومة وكده "يعني مافي ريحة كسّير تلج").. ربنا يوفقو أكتر ويحفظكم أكتر "بالمناسبة عمر مبارك عاوز تلفونو وعنوانو"..
صدقني يا محميد لما تكون زهجان فكر الحاجات الكويسة الحاصلة ليك في حياتك.. فكر في الناس البتحبك.. فكر في نجاحاتك.. بتلقى الزهجة شوية شوية فكت..!
أبقى عشرة يا فردة
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: omer ibrahim)
|
مثلاًً أخد عندك معتصم "ود الجمام" و عليش
الشباب ديل يا أبو الشباك أناآخر مرة لقيتم بي مزااج كدة كان في حفل تأبين مصطفي في نادي أب سعد (سنة شخته) .. كان عليش لطيفاً و رشيقاً علي الخشبة و كان معتصم و(كالعادة) نفسو قايم "أولا"ً من جراء فعل حب المسرح علي قلبو "و ثانياً" من نقة و شكلة مع الكمساري الذي لم يقبل أن يدفع ود الجمام تعريفة الطالب (النص علي أيامها) لأن "و العهدة علي الكمساري" دقن ود الجمام كانت "أكبر علي" دقن أبوهو!
المهم غنينا يومها لفاطمة سمحة تسأل الجلابة قائلة:
ما شفتو أبوي
...... يا جلابة ......
أبوي .. أبوي
...... يا جلابة ......
توبو توب حرير
...... يا جلابة ......
صوتو الوروير
...... يا جلابة ......
عمي .. عمي
...... يا جلابة ......
عمي .. خي أبوي
...... يا جلابة ......
كتل أمحمد أخوي "فأعمل حسابك من أعمامك"
و طار و طار
في سبعة بحور
ومن يومها طار مني ود الجمام خلف أحد هذي البحور السبع و أراه الأن مبلبل العروق أنيقاً و مكرفت العنق وجيهاً و"مغترب" أصلي. ديني أنا يا السعودية.
أما عليش الذي يكتب في هذا المنبر تحت إسم مكتوب بلغة "الفرنجة" فلو لم يفتح الله علي بالتمعن في "صورتو الخايف عليها و خاتي لينا نصها دي" لما عرفته و أنا الذي ظللت أنتظر طلته يوماً بعد يوم في الدراما السودانية التي أدمنت إظهاراً دائماً لممثلينا أصحاب التأوهات التي لا تنتهي أههههههههههههههههههههههه
المهم يا صاحبي روي فيما روي بعد ذلك أن "الأمن" قد قام ب:
1- تأمين البلد ليلتها بقطع الكهرباء وتوفيرهاومن ثم إعادة توزيعها لأنشطة أخري "ذات أهمية".
2- فرتقة ذلك التجمع "غير القانوني" .
ثم .....
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: shabaka)
|
شبكة
بطل الجرسة يازول........
الناس ديل بلفوا وبجوا راجعين....
ما تغرك العيشة علي الطريقة الاوربية والبيت ابو حديقة خلفية والمطبخ الجميل والستائر البي ريموت والمقعد المخصص للطفل في العربية.....
الفاضلابي ده لما جا يسافر...روحوا ابت تركب معاه الطيارة......يعني ح يلف ويجي راجع لي ليالي الخرطوم البتحرق الروح.....
بس انت خليك قريب....
تحياتي لكبري شمبات من الناحية الشرقية
عمر عثمان
اخو صاحب صاحب
غرب الاطلنطي بالنص
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: shabaka)
|
فاضلابى
وصلنى ردك
عارفك ود ضكران وصاحب عظمه وسلطان ومعالى
شفتا المعلم الاسموا طلال ده جاب الصوره عشان تأمن
زى الناس البشيلوا كاميراتم وحايمين نسميهم المصورين لكن طلال دا اسموا الملاحظ
شكراً يا طلال عامل عيونك السمحه دى
وانت بتعاين للباب طوالى بتتذكر صاحبى العادى ابوذر عبد الباقى (عوض شمارات)
امانه فى ذمتك اسه مش ياهو ذاتو نفس
الباب الموارب غير مكترث بنا......
يقوم يجى صاحبى العادى متلب لينا اسفيرياً عشان يملا المكان الفه ويزيد الشوق واللهفه لفنجان قهوه الصباح شربتوا معاك ومعاهو
اما عن صديقنا العادى فساحكى لك عن غناهو وحرف الحاء المافى زول بقولوا زيوا فى الغنا
تذكر لمن علقت ليك على ابوذر لمن يقول
حليوه صاحيه...... الخ
قلت ليك الزول ده بيطلع الحاء دى بصوره غريبه وسمحه قلت لي:-
عارف ياشبكه الحرف ده غريب خالص واحساسنا بيهو مختلف وقلت لى عاين ليهو فى الكلام زاتو مربوط طوالى بى حاجه بتهبشك
حب ,حبيبه ,حنان و حرب
فيا صديقى حباً بحب و العاقبه لكم فى المسرات.
بجيك يا معفن
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: fadlabi)
|
محمد مبارك
ود عمي مبارك ود الفكي يس (رضي الله عنه و عنهم أجمعين ... و عنك انت زاتك)
ود الشيوخ الما خمج
ود عمي اللذيذ يعني إنت عامل فيها ما فنان ولا شنو؟ ياخ إنت بيتكم دا كلو بيت (فن و طيبة و تقي) عيني بااااارده. ياخ هسه المنبر دا كلو شوف فيهو كم واحد أبوهو راقي لمن (كان بلعب تنس)؟ أتحداك إنت بس.
و الله عمر مبارك رسل لي أيميل خلعني ليك خلعه (أستغفر الله العظيم و أتوب اليه)
قال راجع قريب و إن شاء الله حا يمر بيجاي يعني حا يكون في إجترار ذكريات كدة عجيب من نوعو النوع البمرق العجاج داك.
بديك خبر لما نتلاقي.
عمر
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: omer ibrahim)
|
أما بعد
فأحمد عمر صار يمارس الحوار يومياً
أمس وانا جالس و مهموم شوية،
جا و قال لي:
مالت آ بابا؟
قلت ليهو:
أنا ممتاز مافي حاجة
فقال رافعاً إبهامه:
تمام آ بابا
وذهب
جا تاني بعد دقيقتين و انا في مكاني فسألني:
أيان آ بابا؟؟
قلت:
لا لا ما عيان و الله ... كويس
قال:
شاطل آ بابا
ثم ذهب
.................................................
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: esam gabralla)
|
ما قلت ليك البوست دا بشبه الجنة ... يعني أنا و عصام دا ممكن نتلم وين غير في الجنة.
.................. .......................
أهو دا مثلاُ دا واحد من الناس الصاحبهم الفاضلابي بسرعة عجيبة و الفضل يرجع لي أخوك الجمع بين رأسين في "الحمار"
عمك عصام جبرالله دا "خريج إقتصاد برضو" لكن نوع الناس البتحكي ليك بي جامعة الخرطوم زي التقول بحكوا عن نانسي عجرم.
التقول نحنا إتخرجنا من جامعة "كراع الخرفان"
بعدين الونسه معاهو بتشبه الفيلم الما بتكون دايرو ينتهي داك
بس يا شبكة مشكلتك الوحيدة معاهو إنك ما حا تقدر تتونس معاهو الونسة حقت .. فلان داك كان دفعتكم ولا الوراكم ولا القدامكم؟ محتاج ليك يا شبكة لي "أقلاه بروفسور" كدة عشان يلم بيناتكم.
عصام جبرالله
الله يفهمنا الحا يقولوهو أولادك! غايتو ممكن تعيش علي الموضوع دا كويس.
عندي واحد صاحبي جابوهو عندكم كورس في سانت جاللن تعرف قال لي أكتر شي محيروا شنو؟
الناس ديل بشربوا ليك المريسه دي في سويسرا شراب و ما بتلط كيف؟
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: omer ibrahim)
|
Quote: يا عميان و "مفتتتح"
مد رجليك علي قدر الشوف
دي الضلمة و ضل كرعيك عقارب زمنك يا
يا عميان و "مفتتتح"
يا فاقد الضو
فتشو في قلبك و حن للسكة الصاح
ووري وشيك الشمس عشان تمدد صاح
و يغنو صغار الزمن الجاي |
بالمناسبة
يا عمر الكلام الفوق ده حقي انا
واللحن كان للصافي مهدي او ببو لا اذكر صراحة
كان الغناء لك انت وتماضر في مسرحية ليلة الكروان والتمثيل جماعة الجمام
لكن لقيتك متذكر حتى يوم نادي ابوسعد اليوم الصعب ده المرقنا منو بالتيله
وين اراضيك يا عمر شكلك في الامارات ...
البوست ده جميل وفيهو حكي جميل
لكم الود
معتصم
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: معتصم ود الجمام)
|
البوست دي لوحه جميله خلاس
قدر ما اقراهو يجيني حنين متلب بردلب وابكي..
والعجب بالليل يا عمر يا صديق
اتذكر نادي العباسيه كما اليوم
اتذكر ريحه الجمام ومازالت في دواخلي لن تخرج حتي الان
اتذكر لما كنا جايين انا والفاضلابي وشبكه وفتمين من بحري في رمضان والوكت داك كان فاضلابي بيقول لي:
دينك نحن ماشين مع نجم(وكان الوكت داك نزل اول مسلسل لي مع فاروق سليمان اسمو نداء) وكنت بخجل
كنت فرحان انو عندي اصحاب زي العورة ديل وشبكه كان يادوب سجلوهو ناس عقد الجلاد وبتذكر برضو كنا ان واحمد سعد في بيت الرسام خالد حامد (سيد الموتر الفيسبا داك) وقام احمد سعد جاء ودق لي الباب (خالد حامد بيتو كان في ميدان المولد اب روف وجرس الباب عملو بي حبل طويل مدلدل من الطابق الفوق الساكن فيهو لغايه الواطه(جرس عجيب) هو فكره عجله غايتو ..قام احمد سعد جاب لي الشريط بتاع عقد الجلاد الجديد (كسدار ابو السرة) وبقينا نسمع وعيد نسمع ونعيد للصباح وقطعنا في شبكه جنس قطيعه اليوم داك؟؟؟
المهم..
فاضلابي يوم تخريجي كان الاب الروحي للعرض وكان باحساسو الجميل بيدفعني لفوق رغم مرارة المعه في الايام ديك.
معتصم
اهداني قصيده من احب القصايد لي في قطعه جلديه..
تسافر تباريح والبيفضل سموم
ينشف عروقي ..ييبس حلوقي واصوم
اشيلك خريطه
افتش اكوسك احوم
احلم تزح العوارض
تفوت الهموم
تعرف يا شبكه
انا بحبك والله يعلم بمقداره
والعاقبه عندكم
امشي ابكي وارجع
عليش
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: معتصم ود الجمام)
|
| Quote: يا عمر الكلام الفوق ده حقي انا |
ود الجمام عذرا كبير لشخصك الجميل و للصافي أجر المناولة و الحانا "بعرفا براهو".
فعلا في دبي من سنه و "حبتين صبر عند اللزوم".
عبتني المشاوير الطويلة وزحمة العربات بي:
1- لندن
2- رملة
3- صبر
4- زهج
5- بضع كيلوجرامات
والغنا لم يعد أخضر ... و الحبيبة صارت أما تمارس العيشة اليومية وتتحدث "عربي كلكتا" مع من حولها و "لغة أحمد" الذي عندما ينطق:
أقيفوا
يصفر قطر حلة كاملة
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: fadlabi)
|
طبعا شبكهحالف ما يسلم علي في البوست ده
رحبت بيهو في المنبر
دخلت البوست بتاعو ده
يوم ضربت ليهو والله يعلم في المحمول تبعو وقلت ليهو عليش معاك من امريكا (تنكر يا شبكه؟؟) بعد التلفون حسيت انو في ناس كنت بحبهم ساكت بدون ما اقول ليهم وبعد جيت هنا في البلد دي بدت الذاكرة تدور وتلون لي المشاهد لغايه ما عرفت انو من هم الاقرب الي من حبل الوريد
كنتم جميعا اقرب
وكنتم كما تخيلت ذاكرتي كيف لي ان اكون بينكم واحبكم لمن استطاع سبيلا
يا شبكه انت وين ياخ؟
ابوذر الصديق العادي وين؟
وينكم؟
فاضلابي انا موش برضو ضربت ليك لما كنت انا في استقبال عمارتنا بالليل وقلت ليك ماعايز اطلع فوق ازعج الناس بالمكالمه دي لانو حاكورك والناس نيام هسه؟حصل؟
طيب يلا اضرب لي
0017034857907
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: shabaka)
|
الان يوجد نوع جديد من المواطنه
انها المواطنه الكونيه
مواصفات المنتمين اليها
انهم جداد وادى(صغير لكن نجيييييييييييض)
بيض جداد الوادى بنفس حجم جداد الما وادى
لكن لما يفقش
الكتاكيت بتعرف محل الاكل ومحل تندس
يا شبكه فكر بالمواطنه الكونيه
كن من تريد حيث انت
كن مع من تريد
حيث هم
الشتا دخل
والسنقو وصل
| |
|
|
|
|
|
|
|
|
|
Re: الى الاصدقاء الفاضلابى وعمر عبد العزيز يجدهم بخير (Re: shabaka)
|
عميره اخوى
امبارح كان يوم الجمعه
عمك يويو يمارس هوايته المحببه بتقبيل ارجل السيده الوالده لان الجنه تحت اقدامها
كتكوت,عبودى و ايمن يمارسون الازعاج كالعاده صباحاً
الليله مشيت الجامعه (شمبات)
عصمت قرشى و امير يمارسون التدريس
وياعمر الجامعه فى خطر
خطر بالجد جد ما زى ثقافة معتصم
عندى ليك اقتراح اسمع حمودى ده ما نديهو البت الخلاسيه دى (بت الفاضلابى)
عسى ولعل ينال الجواز
اسمع الناس قاعدين يفطروا
بجى تانى
| |
|
|
|
|
|
|
| |
نهال الطيب
معتصم ود الجمام
fadlabi
Mohamed Ahmaed Olyesh
Mohd Mubarak
طلال عفيفي
abazar hamid
وليد محمد المبارك
omar altom
فيس بوك
تويتر
انستقرام
يوتيوب
بنتيريست