|
|
|
 Re: ملاحظـــــــــــين مــــــــــعاى ؟؟؟!!! ....... (Re: Tragie Mustafa)
|
سلامات ياتراجى .
| Quote: انت بس بوستات الغمز واللمز ما قاعد تمشيها. |
.
الواحد من زمان ما كان بيمشيها ،
بس هى كان بتجيك لحدى عندك يعنى Home Delivery ,
ده لو ما عتّرت ليك فى السكة ، لكن الملاحظ
أن هناك (ممرّات آمنة) يمكن المرور عبرها هذه
الأيام ، يعنى قلّت نسبة الطلقات الطائشة ،
و الـ Collateral Damage التى كانت سائدة .
ربنا يهدّى النفوس ، بطيب النفوس .
دمتى معافاة يا تراجى .
| |
 
|
|
|
|
|
|
|
|
Re: ملاحظـــــــــــين مــــــــــعاى ؟؟؟!!! ....... (Re: عبدالله شمس الدين مصطفى)
|
عبد الله ولدي ازيك
طبعا انا جاني احساس انو الهندي ده شغال مع بكري
مع الملاحظة الانت ذكرتها ضيف وقوف بعض الاقلام الرصينة في الخط الامامي للدفاع عن سودانيز اون لاين
هسع في صحفي عاقل بمشي يستثير المجموعة دي من كتيبة الموت؟
فيصل محمد صالح , سالم احمد سالم , عثمان ميرغني, د. زهير السراج , فضيلي جماع , د.بشري الفاضل و بكري الصايغ
وشايف كمان ناس الواثق ما قصروا مع شيخ ابوزيد النزلوه من عربية الهندي فى اخر لحظة.
| |
|
|
|
|
|
|
|
|
|
Re: ملاحظـــــــــــين مــــــــــعاى ؟؟؟!!! ....... (Re: Shams eldin Alsanosi)
|
أبو الشموس أبوى ، سلامات .
| Quote: وقوف بعض الاقلام الرصينة في الخط الامامي للدفاع عن سودانيز اون لاين |
.
شفت دى براها ردّت الروح فى الواحد ،
مش لـ(عصبية) الإنتماء لهذا المكان ،
لكن لعصبية الإنتماء ل(الحوش الكبير) ،
حوش أبوى وأبوك ، حوش كل الناس ، إلآ
من سخط ربى .
| Quote: فيصل محمد صالح , سالم احمد سالم , عثمان ميرغني, د. زهير السراج , فضيلي جماع , د.بشري الفاضل و بكري الصايغ |
التحية لهم ، فى وقوفهم مع الحق الأبلج .
عارف فى إنتخابات العام 1986 كنت مندوباً لمرشح
فى دائرة إنتخابية ، لو قلت لك كيف أن حباً غريباً
كان يفيض بين الجميع ... مندوبى المرشحين ، ضباط الإنتخابات ،
وأفراد الشرطة فى المركز ، كان الشاويش عم حسين يجمع
(الشيلنج) كما ينطقها إذ كان يعتقد أنها مشتقة من كلمة
( شيل) ، يعنى الماعنده يشيل أخوه ، وكان يرسل أحدهم لسوق
الخضار ليحضر اللحم لزوم الحلة المسبّكة ، والتى كان يعرف
كيف يجعلها كذلك ، ويجلس الجميع ليأكلوا من (طبقٍ) واحد ،
حتى فتيات الجبهة الإسلامية القومية الصغيرات كنّ يشاركننا
بالأكل ، إذ لم تسمح نخوة عم حسين بأخذ الشيلنج منهن .
يأكل الجميع ، ويحمدوا الله ، ويعودوا للعمل فى المركز ،
حتى أتى طواف من مركزية إدارة إنتخابات الجبهة الإسلامية ذات يوم ،
ومنذ ذاك الحين ، فإنزوت الفتيات ، ورفضن ما نقدمه لهنّ
من طعام ، وفى عيونهن حرجٌ ، وحيرة من (توجيهات) قيادتهن ،
وفى اليوم الأخير لم تمسك إحداهن نفسها ، فإنخرطت فى نشيجٍ
محموم لفراقنا ، وقالت لى ، وبالحرف الواحد "والله يا أخى
لم نر منكم ما يقال عليكم ، ولم نر فيكم إلآ كل طِيبٍ ، وطَيِّبٍ "
ولم ألتقيهن منذ ذاك الحين . هذا هو السودان ، أو هذا ما
وجد هؤلاء السودان عليه ، هذا ما أرادوا إنقاذنا منه ، تماسكنا ،
وأواصرنا ، و توحدنا ، وتداخلنا ما همّ ماهية إنتمائنا .
دمت أبو الشموس الذهبية .
| |
|
|
|
|
|
|
|
|
|
Re: ملاحظـــــــــــين مــــــــــعاى ؟؟؟!!! ....... (Re: عبدالله شمس الدين مصطفى)
|
الاخ عبدالله شمس
ملاحظين معاك .. و بالمناسبة دى شوف الكلام دا فى جريدة الصحافةالعدد رقم: 5185
2007-11-23
و فى ذات الموضوع:
ويســـألونك عن سودانيزونلاين
د.عادل الصادق المكي
موقع سودانيزون لاين قامت قيامتو وناس تهرج وناس تجوط... قالو يقفلوهو عشان الناس ما تشوف الفيهو.... والفيهو في السهلة بالكوم....
سودانيزونلاين ايها السادة هو المجتمع السوداني كلو واتحشر في النت...... سودانيزونلاين زيو زي السوق العربي...كل شي فيهو...فيهو ناس كويسين فيهو ناس ما كويسين لكن ما كعبين... فيهو ناس متفلهمين... وفاكنها في روحهم فيه دروايش..فيهو كراويش.. فيهو نشالين فيهو شحادين.... فيهو الزول الخايف الله عشان الله وفيهو الزول الما خايف الله وعامل فيها خايفو... فيهو حمير وفيهو قرود وفيهو قراد....فيهو ست الشاي. وفيهو ست الكسرة..وفيهو ست المررو.. وفيهو الفارش يبيع في عروق امبررو.... فيهو الزول الشايل هم وليداتو والنهار كلو يرعى في غنم ابليس...فيهو الزول المليان لود عينو من قراية الكتب وويجي يفضيها .... فيهو المزنوق وكايس للمستراح.....فيهو البينضم ليهو سنين ودنين ولي حسي ما ارتاح....فيهو غنماية وفيهو تمساح....فيهو النضمو تقيل وفيهو نباح ..ينبح ليلو نهارو.
وفيهو اللايوق اليلصق فيك لا ايدك لا كراعك...فيهو الكضاب يكضب عليك وما يخاف الله فيك.....فيهو وسواس وفيهو خناس وفيهو القعد فيهو كيتن علي الناس ..فيهو الجاي يرقص ويعلم الناس الرقيص.. فيهو بوليص... فيهو زول الله وفيهو المطيميص.....فيهو ناس مدروّشة وفيهو دراويش....فيهو ناس دايشة وفيهو دياشة....فيهو شماشة..فيهو البيخجل من ضلو...وفيهو اب عينن قوية.. فيهو ظار فيهو لولية.... فيهو طار فيهو حوليه....فيهو التغيان ونفسو عجاباهو ويعاين للناس من فوق... فيهو ابو الدردوق...وفيهو اليدردق ويحرد بلا سبب...فيهو المادب وفيهو الماعندو ادب..فيهو العجب...فيهو صعلوق شايل عكازو ومحدّر طاقيتو...وسكينو في ضراعو فيهو اليشترو وفيهو الاتباعو.. وسودانيزونلاين زيو زي السوق العربي..... فيهو فوراوي فيهو تكروني فيهو دينكاوي فيهو حلبي....فيهو زنجي خجلان منها.. وفيهو زنجي شبعان وتريان من وراها... فيهو العربي... النضمو كُتُر ..وفيهو الزول زول النصيحة فيهو سترة فيهو فضيحة.....فيهو المدرس...فيهو المفلس...
فيهو اليخليك تقبل ليغادي ويقعد يقرّص....فيهو النضمو كلو ملفق.. وفيهو المليان علم لامن دفق...فيهو الدلاهة اليباري الناس قدر مافي زول نضم فتح خشمو وصفق.....فيهو الكتب لامن فتر علا ما اتوفق....فيهو ناس تحوم وقت الهجعة ساعة الناس تنوم...فيهو ظالم وفيهو مظلوم.....فيهو الشمشار فيهو البوبار..فيهو الكوبار..فيهو الطبرة المطنبر وفيهو طنبار....فيهو زول فصيح يحيرك ان نضم فيهو زول لسانو فيهو لكنة عجم...
فيهو البلد من جم......فيهو شايقية فيهو بقارة....فيهو طنبور فيهو نقارة....فيهو غنا فيهو مديح..فيهو بكا فيهو رديح....سودانيزونلاين فيهو كل البلد بشينا وبسمحا.... .......والداير يتوكد من نضمي اليختف كراعو لعند الموقع . اخر الكلام يا حبيبًا زُرتُ يومًاً أيكهُ طائرُ الشوقِ يغني ألمي لك ابطاءُ المُذلِ المُنعمِ وتجني القادرِ المحتكمِ
| |
|
|
|
|
|
|
|
|
|
Re: ملاحظـــــــــــين مــــــــــعاى ؟؟؟!!! ....... (Re: اسعد الريفى)
|
اسعد أخوى ، سلامات .
والله د. عادل صادق نقل لنا (حالة)، وشريحة
تضم كل مكونات الموزاييك السودانى ، والذى
إعتادت أعيننا على رؤياه ، وآذاننا على سماع
رزمه و إيقاعه الجميل ، وذلك قبل قدوم التتار
بدوىّ طبولهم، وهزيم وقعقعة آلة حربهم العنصرية
اللئيمة .
هذا ما كان عليه حال السودان ، لم يجرّم أحدٍ أحدا ،
ولم يكفِّر أحدٍ أحدا ، وما تنابز الناس ، ولا تعايروا
بالأعراق ولا السحنات ، لكن أنظر أين نحن الان ، حين
زيّن الشيطان للبعض أنّما هم ظلٌّ لله فى الأرض ، يده
التى يبطش بها ، وعينه التى يراقب بها ، والله منهم ،
ومن أعمالهم براء .
أحلم بعودة ذلك الاوان ، أن يكون الناس سواسية أمام
الخالق ، لا وصايةٌ لأحدٍ على أحد ، ولا فضل لأحدٍ على أحد ،
بل كلنا سواء ، فى المواطنة وفى الحقوق وفى الواجبات ،
وفى حبنا ، وحدبنا على مصير هذا الوطن المهاب.
يا اسعد شكراً لك ، وشكراً للدكتور عادل صادق ، صادق
كتابته ، وتوصيفه
دمتم سالمين
| |
|
|
|
|
|
|
|
|
|
Re: ملاحظـــــــــــين مــــــــــعاى ؟؟؟!!! ....... (Re: اسعد الريفى)
|
Quote: نكتبه فى قلوبنا و عقولنا قبل الورق ...
ذاك تاريخنا
و هذا حلمنا .. و كل الأمل ! |
.
يا ريييت يا اسعد ، ومين سامعك ،
والله ما مرّ الزمن قليلاً ، إلآ و بكينا
على خصال حميدة تسقط عنّا ، كما يتساقط
الشعر عن فروة الكهل ، وأخشى أن يأتى
يومٌ لا يتبقى فيه شئ من ذخيرة ما علمنا
الآباء ، قلبى عليك يا وطنى ، لطفك يا الله .
كل الود أخى أسعد .
| |
|
|
|
|
|
|
|
|
|
Re: ملاحظـــــــــــين مــــــــــعاى ؟؟؟!!! ....... (Re: شهاب الفاتح عثمان)
|
شهاب الفاتح....
الرجل المهذب ، المؤدّب الودود،
سعيد بطلّتك الباهية علينا ،
مرات تحس إنو الناس "مكتوبة" ،
تلقاهم واقفين قرون قرون ، وشيطانهم
أعلى من برج إيفل ، وهاك يا تجريح
و صفع ولكم ونبش حال ، يضربوا الضعيف
ضربة يرتجف منها القوى ، و تخاف على
روحك وتسكت ، وتقرر أشياء كثيرة ،
لكن بريق الأمل فى قاع الصندوق يردّك
عمّا قررت ، فتعود .
ربنا يهدّى سر الجميع .
دمت يا شهاب
| |
|
|
|
|
|
|
| |
عبدالله شمس الدين مصطفى
Tragie Mustafa
Shams eldin Alsanosi
اسعد الريفى
شهاب الفاتح عثمان
فيس بوك
تويتر
انستقرام
يوتيوب
بنتيريست