كالعادة دائما .. بعد النكسه و(المرمطه) والهزيمه البشعه .. الفوز على مريخ بورتسودان المسكين الغلبان التعبان الهابط ب 5 أهداف مقابل صفر !! _________
الزعيم سيد البلد (الهلال) .. التقى أمل عطيره ناقص من الشوط الثانى لاعبين، فأكتفى بهدف واحد كافى وشافى وأمضى باقى الزمن استعراض بالراس و(بالكعب) زى (قون) تانا اليجا .. لم يلجأ الهلال العظيم للتبشيع بأسد (عطبره) رغم سوء جمهوره، فنحن لسنا ناس (المطرفه) و(القاصيه) و(المنبطحه) ، و(المنفنسه) وحتى (البعيو) ذاتو كان (انفنس) بنسترو ونرفعو من يدو ونقول ليهو (أقيف) فوق .. ارفع راسك .. لهذا كما يقول اخى (اشكا) المشرف على (منتدى الهلال):- نحن (هلالاب والحمدلله) !! ما بنستغل الناقص عددا أو ناقص وزنا وقافيه .. لكن الجماعة اصحاب (الصفر الكبير) محلى ودولى ما صدقو تانى يوم طوالى بعد (علقة) الصفاقسى (فشو) غبينتهم فى ولدهم الصغير يتاع بورتسودان!! ولسان حاله يردد:- (اسد على وفى الحروب نعامه)!!
البعيوات البحبو كل شئ (محمول) جوا، لحدى ما بقو (حاملين) جوه .. اقصد حاملين (فيروس) الهزائم والأنكفاءات والأستسلام من (العصر) وقبل ما تغيب الشمس .. للدرجة التى تفننوا فيها فى (اختلاق) اصطلاحات غريبه وجديده (بعرفوها) براهم!! مثلا: (المريخ لا يبطره نصر ولا تهزه هزيمه) أو كمال قال!! فريق (هاردلك) أو (الأصلاح) الأم درمانى برضو كان كده .. ولقب (بهاردلك) لأنه لاعبيه بعد كل هدف يدخل مرماهم كل واحد بمر على اخوه مسلما عليه فى يده ومرددا (هاردلك) .. ما مهم اتغلبوا بى 3 أو 4 أو 5 أو 6 أو 9 .. (لا يبطرهم نصر ولا تهزهم هزيمه) .. برضو المباراة الجايه عادى يدخلو الميدان (متمرين) يلمعوا (زى المضروبين) اورنيش !! مرة واحده (بث) .. اتعادلوا فى مباراة بعد هزائم عديده من الفرحه (نسو الكورة فى الشبكه ومشو حضرو حفلة عرس بى فنائل الكوره) !! عادى جدا :- (لا يبطرهم نصر ولا تهزهم هزيمه) !! شنو يعنى (هزيمه) .. ما كل الناس (حاكماها ظروف) وبرضو (بتنهزم) !! وآسفى .. على (الشياطين الحمر) !!!
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة