لأول مرة : صور جميع معتقلي مؤتمرالطلاب المستقلين والحركة الشعبية من داخل معتقل كوبر

Quote: NNC في تطور مفاجيء وسريع في سير قضية مقتل طالب النيلين المنتمي لحزب المؤتمر الوطني والذي توفي إثر أحداث عنف في فبراير الماضي بين مؤتمر الطلاب المستقلين ووالقطاع الطلابي للتنظيم الحاكم في السودان قررت المحكمة أن تكون جلسة 7/11 جلسة توجيه التهم . وقد فوجئت الأوساط المتابعة للقضية بتوضيح هيئة الإتهام عن الحق الخاص وممثل النيابة اعتذارهم عن تقديم مزيد من الشهود في القضية والإكتفاء بالذين أدلوا بشهاداتهم، علماً بأن مجمل الشهود في القضية حسب إفادات المتحرين في القضية حوالي الثلاثين شاهداً . وقد قرر القاضي من فوره الشروع في استجواب المتهمين رغم محاولة هيئة الدفاع تأجيل ذلك بحجة حوجتهم للجلوس مع المتهمين على ذمة القضية إلا أن القاضي رفض ذلك لاعتبارات تطاول مكوث المتهمين في الحراسات على حد قوله . هذا وقد استجوب مولانا عصمت محمد يوسف جميع الموقفين على ذمة القضية وهم عشرة يتنمي سبعة منهم لمؤتمر الطلاب المستقلين وحزب المؤتمر السوداني والبقية ينتمون إلى الحركة الشعبية لتحرير السودان، ويذكر أن من بين الموقفين أحمد محمد الحاج المين العام لمؤتمر الطلاب المستقلين و أبوبكر يوسف أبوبكر مسئول الطلاب السابق في حزب المؤتمر السوداني بالإضافة إلى ين ماثيو سكرتير الطلاب والشباب في الحركة الشعبية قطاع الشمال هذا وينشر مركز أخبار السودان الجديد تفاصيل الإستجواب الذي قام به القاضي للموقفين على ذمة القضية: استجواب المتهم الاول الاسم: عثمان اسماعيل بشير عثمان المحكمة: الحاصل شنو؟ ذهبت لجامعة النيلين يوم الخميس الساعة 12 ونص ظهراً تحدثت في اجتماع مع طلاب دارفور عن مشكلة الرسوم الدراسية بعد الاجتماع ذهبنا لمكتب مدير الجامعة طلعنا من المدير الى المخاطبة وتحدثت انا اول وتحدث مرتضى وياسر بعد ذلك طلعت الى الغربي ومعي 6 اشخاص من ابناء دارفور من الساعة 2 ونصف ـ 5 ومعي جميع اعضاء الرابطة كنا نناقش عدة قضايا منها قضية الرسوم بعد ذلك ذهبت الى بانت ومنها الى البيت وفي الصباح حوالي الساعة 9 صباحاً اتصل علي زميلي اسمه نور الدين قال عايز شيت وصفت ليه البيت واثناء خروجي لمقابلته رأيت بكسي واقف ونزل لي واحد وقال لي انت عثمان قلت ليه نعم اول سؤال قال لي انت تورا بورا والله جنجويد؟ قلت ليه لا هذا ولا ذاك مصادرنا قالت انك ماسك معارضة ابناء دارفور قلت ليه انا ما عارف أي حاجة سألوني تنظيمك شنو قلت ليهم مؤتمر طلاب مستقلين قالوا لي في مشكلة في جامعة النيلين عارف قلت ليهم ما عارف بعد ذلك مافي زول سألني. في يوم جاءني واحد من ناس الامن وطلب مني التخلي عن لجنة دارفور انا رفضت ذلك جابوني سجن كوبر. هل شاركت في احداث النيلين؟ لم اشارك فيها. هل عقدت اجتماعاً مع المتهمين؟ لا كيف سمعت باحداث الجامعة؟ قرأت في الصحف المعروضات التي نسبت اليك السكين ما حصل اخذت سكين. السكين لقوها في الثورة؟ نحن بيتنا اصلاً في الواحة مربع 4 وما عارف السكين الفي الثورة تبع منو. تعرف منو من المتهمين؟ عبد الرحمن ابراهيم علاقتك بيه شنو؟ معي في التنظيم مؤتمر الطلاب المستقلين. حدد معرفتك ببقية المتهمين؟ كلهم من ابناء دارفور بتعرف مصطفى طفش؟ ابداً تعرف المرحوم المعز؟ ابداً تنفي علاقتك بالبلاغ؟ نعم واسئلة التحري جميعها كانت عن دارفور وجدتها امام المحكمة. استجواب المتهم الثاني احمد محمد الحاج ذهبت الى جامعة النيلين يوم الاثنين بدعوة من مؤتمر الطلاب المستقلين للاعداد للمؤتمر العام وكنت المتحدث في ركن النقاش وتحدثنا فيه عن رأي د. الترابي في شهداء جنوب السودان. حديثك تطرق لماذا؟ قضايا طلابية الانتخابات، اتحاد طلاب جامعة النيلين اثناء الركن طلعت بشرب في شاي معاي واحد اسمه ايهاب فوجئت بكادر من المؤتمر الوطني قال لي اسمه كاشان قال لي انتم تجاوزتم الخطوط الحمراء ولو ما اعتذرتم نحن حانجلدكم داخل الجامعة بعد ذلك طلبت منه التعامل الجيد بشكل يتماشى مع النقاش ودخل مصطفى طفش الركن وقدم اعتذار عن أي اساءة قدمت واعطينا المؤتمر الوطني فرصة في النقاش وانتهى المنبر. يوم الثلاثاء والاربعاء كنت في جامعة الخرطوم يوم الخميس نايم في داخلية الوسط جامعة الخرطوم جاءني صاحبي ممدوح صحاني قال لي نمشي جامعة النيلين احتمال يكون في ركن للطلاب المستقلين هناك جئنا النيلين حوالي الساعة 2 ظهراً وفعلا ًوجدنا حجز لاركان النقاش. ركن بتاع منو؟ بتاع المستقلين بدأت انا كمتحدث اول وهو تحديداً عن مسألة التحول الديمقراطي ونبذ العنف لاستقرار العام الدراسي في جامعة النيلين فجأة جاء كاشان وسمعت صوت تكبير وفي هذه الاثناء خرجت نصف كلية اداب انا بدوري قمت خارج لان الكوادر في الاحداث دائما بتكون مستهدفة حاولت الطلوع بشكل سري في الشارع لاقيت واحد اسه فقي وعبد الملك لقينا حافلة قدام الباب. ياتو باب؟ باب اداب بعد ذلك تحركت لداخلية جامعة الخرطوم وكان عندي اجتماع مع التنظيمات السياسية حوالي الساعة 3 وصلت حوالي 3 ونص او 3 وثلث وفي اثناء الاجتماع واحد من التنظيمات السياسية اسمه مصطفى شريف ضرب نبه واحد قال ليه في احداث في النيلين بين المستقلين والكيزان حيث تم الغاء الاجتماع وفي داخل مجمع الوسط قابلت واحد من حزب البعث العربي الاشتراكي قال لي في كوز اتقتل في احداث النيلين بعد ذلك خرجت الى البيت. البيت وين؟ في اركويت يوم الجمعة والسبت بيت مع صاحبي اسمه محمد بشير في السجانة. يوم الاحد الصباح تقريباً اتصل بي الوالد وقال لي جاء البوليس يفتش فيك في مدني وقلت ليه بشوف الحاصل شنو ذهبت لجامعة الخرطوم عرفت انه الكيزان قاعدين يفتشوا فيني تحركت لشرطة الشمالي برفقة الاستاذ محمد حسن عربي المحامي ومجموعة من ضباط الشرطة عرفت انهم ضباط لجنة التحقيق في مقتل الطالب عبد المعز بدأ التحري معي في اني انا القاتل وطلبوا السكين اداة الجريمة قلت ليهم انا ما بعرف اقتل كيف قالوا لي المرحوم بعرفك قلت ليهم بعرفني كيف قالوا لي كان بيقرا في جامعة الجزيرة قلت ليهم احتمال اكون بعرفوا تواصل معي التحري في اني مفترض اعترف بأني قاتل، بيت في الحراسة وجوني الصباح الساعة 8 وركبوني في عربية وقالوا لي حانتبع معك الاسلوب الماكنا عايزنو وعملوا لي طابور شخصية وقفت في الصف جاء زول وبقى بعاين وجوه الناس واتعرف علي انا ومعي شخص اخر وقال ياهودا يا دا قالوا ليه حدد واحد فيهم وفشل في الاختيار قال وقفوا الزول بعيد عشان امثل الحادث ادوني اداة بلاستيك وقالوا لي مثل الطعن كيف بعد ذلك الشرطة طلبت مني الاعتراف بقتل المعز وقلت لهم ما باعترف بشئ ما عملته قالوا لي نحن امام قضية قتل ولازم نلقي قاتل واستمر معي التحقيق قرابة الـ30 مرة تحولت الى كوبر وتفاجأت باني مقدم للمحكمة بأني ضربت المرحوم بسيخة في رأسه. بتقرأ وين؟ جامعة الخرطوم كلية العلوم الادارية جيت جامعة النيلين كيف بدعوة من مؤتمر الطلاب المستقلين الجاب ليك الدعوة منه؟ لا اذكر ماحصل اجتمعتوا للانتقام من العلقة الساخنة؟ لا انت شخصياً تحدثت عن نبذ العنف في ركن النقاش؟ نعم ماذا تمثل في التنظيم؟ كادر خطابي بتعرف المرحوم؟ احتمال اكون بعرفه حصل اطلقت على المتهم اسم ميمون في احد الاركان احتمال تنفي صلتك بالاحداث؟ نعم الحافلة التي ركبتها مواصلات عامة كانت واقفة وين؟ قصاد باب كلية الاداب بتعرف منه من المتهمين؟ عبد الرحمن وحسين وابو بكر بتعرف المتهم الاول؟ ابداً ما لاقيته؟ اطلاقاً ما عندك أي علاقة بالبلاغ؟ اطلاقاً استجواب المتهم الثالث عبد الرحمن ابراهيم يوم الاربعاء كنت في جامعة الجزيرة لمناسبة زواج يوم الاحداث جاءتني دعوة من مؤتمر الطلاب المستقلين بجامعة النيلين تمهيداً للمؤتمر العام. الحصل شنو؟ حددوا ركن النقاش وحوالي الساعة 3 داخل الركن جاء طلاب المؤتمر الوطني يكبروا وبحالة عنف واضح بعد كم وعشرين يوم تفاجأت بأني مطارد من قبل الاجهزة الامنية وقبضوني وبحققوا معي في مقتل المعز وقالوا لي المرحوم مضروب في رأسه وضربوا واحد بشبهك في اثناء التحقيق جاء طالب من كوادر المؤتمر الوطني وقال ليهم ياهو دا الضرب المرحوم. ما حصل اجتمعتوا لرد العلقة الساخنة؟ لم يحدث تمثل شنو في التنظيم؟ رئيس اللجنة التنظيمية للمؤتمر العام بتعرف منو من المتهمين؟ احمد الحاج وعثمان بشير وين ماثيو حضرت ركن يوم الخميس؟ نعم لا قيت منو من المتهمين في اليوم؟ قابلت احمد انت بتقرأ وين؟ جامعة الخرطوم كلية العلوم الادارية استجواب المتهم الرابع يعقوب جبريل يعقوب انا عضو في اتحاد طلاب جامعة جوبا يوم الخميس سمعت في ركن مركزي في جامعة النيلين بتسكن وين؟ امبدة الحارة 4 جيت جامعة النيلين حوالي الساعة 2 في الباب لا قيت لفيف من الطلاب خارجين بالباب طوالي رجعت ركبت المواصلات الى السوق العربي وطوالي ركبت الى البيت يوم الجمعة رجعت الداخلية وبعد 40 يوم جاءني تلفون من المحامي محمد حسن عربي وقال لي عايزنك لبعض الافادات في احداث جامعة النيلين وذهبنا معاً الى القسم الشمالي وفي اثناء التحقيق قالوا لي انت عاوز تبقى متهم ولا شاهد قلت ليهم في شنو قال لي في احداث النيلين قلت ليهم انا ما عارف حاجة لقيت ناس جارية وجريت ودوني الى سجن كوبر وجدت نفسي موجه لي تهمة بالمادة 130 ما حصل حملت ملتوف؟ ما حصل لم تجتمعوا لرد على العلقة الساخنة؟ ما حصل بتعرف منو من المتهمين؟ بعرف حسين محمد حسين لاقيتو اليوم داك؟ سمعت بركن الحركة الشعبية؟ لا طلعت من الجامعة بأي باب؟ بوابة اداب ما عندك علاقة بالحادث؟ اطلاقاً استجواب المتهم الخامس حسين محمد حسين يوم 20 / 3 بالضبط اتصل علي المحامي محمد الحسن عربي وقال لي عاوزنك في القسم الشمالي اعتذرت عن الموعد لانو عندي بحث وبعد يوم قابلتو في السوق العربي وجدنا العقيد فيصل قال لي انت تابع لوين يعني منظم؟ قلته ليه مؤتمر طلاب مستقلين قال لي احكي لي الاحداث؟ قلت ليه ما بعرف ما عندي علاقة بجامعة النيلين قال لي شوف يا ابني نحن بنسألك اسئلة محددة انت عندك سكين؟ قلته ليه نعم قال وين؟ قلت ليه في البيت قال لي بتجيبا لينا؟ قلت ليه نعم قال لي نحن عايزنك تبقى شاهد وتقول انك شفت الزول الطعن المعز قلت ليهم ما شفتو ولا بعمل كدا قالوا لي اقعد مع نفسك شوية وتاني جوني قلت ليهم ما بقدر اغير اقوالي طلعوا لي صور لم اتعرف عليها. حصل مشيت الركن في الجامعة؟ اطلاقاً لم تشارك في أي اجتماع؟ اطلاقاً وضح علاقتك بالمتهمين؟ بعرف حسين ويعقوب المتهم السادس حسين الشيخ يوم الخميس كان عندنا شغل تنظيمي في دار الحزب في ام درمان العباسية ومن مستور عرفت في ركن مركزي في جامعة النيلين بعد انتهينا الساعة 12 مشينا النيلين وجدنا اعلام ركن المستقلين وجدت عدد من العضوية موجودين حوالي الساعة 3 ظهراً بدأ الركن وفي اثناء الركن جاء قزاز طائر والناس تكبر طلعت طوالي ركبت مواصلات السوق العربي ومشيت البيت ثاني يوم من الجرايد عرفت انه في طالب اتقتل وفي يوم 15 /3 اتصل بي المحامي عربي وقال لي عايزنك في التحقيق في احداث النيلين وفعلاً ذهبت للشمالي وقابلت لجنة التحقيق العقيد هيثم قال لي نحن ما دايرنك ولا محتاجين ليك ولو قلت الصدق حاتطلع مع ابوك وقال لي اذا عاكستنا حاتعاكس نفسك ونحن دايرين الحقيقة ودايرنك تتعاون معنا وقلت ليهم انا ما بعرف أي حاجة قالوا لابوي خليه وامشي وفعلا مكثت بعدها حولوني لسجن كوبر. الاجتماع بخصوص شنو؟ الاجتماع بخصص جامعة جوبا يعقوب بعرف الاجتماع؟ لا لاقيت منه من المتهمين؟ احمد الحاج وعبد الرحمن وصلت الجامعة لقيت شنو؟ لقيت مكان محجوز لركن الركن البداهو منو؟ احمد الحاج استجواب المتهم السابع ابو بكر يوم الاحد كنت في كسلا للاعداد للمؤتمر العام في كسلا يوم الاثنين جيت يوم الثلاثاء بدأت بالاعلام للمؤتمر العام وكان عندي اجتماعين واحد مع د. حيدر وورشة مع د. عبد الرحيم بلال لمناقشة ورقة اقتصادية جئت يوم الاربعاء حوالي الساعة 4 ونصف لدار الحزب في العباسية للاجتماع مع اعضاء الامانة اعتذر المتهم الثاني من الحضور لمناسبة زواج بدأوا الاجتماع الساعة 6 مساء ناقشنا الورقة الاقتصادية وبعدها يوم الخميس ايضاً كان عندي تكليف للرجوع لـ د. عبد الرحيم بلال ود. حيدر بعد الساعة واحدة لاقيت زميلي اسمه عبد الرحمن الشيخ طالب في النيلين تحرك معي وجاهو حوالي الساعة 4 تلفون وكان معنا صحفي من جريدة السوداني اسمه سموءال قال لي جامعة النيلين فيها احداث اتصلت بطارق منصور وقال لي ضروري تجي عندنا ولد اسمه نادر انضرب في الاحداث، وصلت دار الحركة وجدت الطالب تم اسعافه وفي دار الحركة سمعت في طالب مات وذلك بمداخلة من صحفي في جريدة الصحافة في المؤتمر الصحفي الذي عقدته التنظيمات السياسية بدار الحركة الشعبية في بيان صحفي منو الذي اعدة؟ نحن والحركة الشعبية. المؤتمر الصحفي فيه احزاب اخرى؟ نعم احزاب تسمى بالاحزاب السياسية الوطنية يوم 15 / 2 اعلنا عن قيام المؤتمر العام يوم 16 /6 اتصل بي العقيد فيصل وعرفني بنفسه وقال لي دايرك تجي وذهبت ليه وسألني عن التنظيم وقال لي عاوز تتعاون معنا قلت ليه حاضر قال لي بتتعاون حتى لو كان الجاني واحد من اولادكم قلت ليه نعم قال لي في زول دايرك تلاقيه وتقعد معاه وتتصل بي وتوريني انتو وين واعتذرت ليه وقلت ليه ما بعمل كدا نادوني لمكتب المباحث ومنه قسم المنطقة الصناعية وفي اليوم الثاني في القسم الشمالي قالوا لي انت لو ما بتقول انك شفت احمد الحاج طعن المرحوم بالسكين قول ان احمد الحاج قابلك يوم الجمعة خائف وقال ليك انا طعنت المرحوم. استجواب المتهم الثامن فيكتور توماس انا مسئول الحركة الشعبية بالقطاع الشمالي بالجامعات يوم السبت 10 /2 كنت في مكتبي بالمقرن ضربوا لي طلاب تلفون من جامعة الزعيم الازهري وقالوا انهم تعرضوا لضرب من طلاب المؤتمر الوطني وتم طعن 3 من الطلاب اثناء الحادث قلت ليهم اخلوا الجامعة وقالوا لي محاصرة ببوليس النجدة والعمليات طلبت من نائب سكرتير الشباب والطلاب ان يخاطب امن الحركة الشعبية ويوضح موقف الطلاب المحاصرين واتصلت الكتلة البرلمانية ولاية الخرطوم وجدت ان الطلاب اخذوا قسم بحري للتحري معهم ذهبت هناك ومنعوني من الدخول ودخلت في نقاش حاد مع العساكر ومنعوني برضو ادخل وجاء ملازم ودخلت لضابط وسألني من اسمي وقال لي عندنا معاك اجراء في القسم الشمالي ركبت معاهم العربية وسجلوا اسمي ودخلوني الحراسة من الساعة 6 ـ 7 بعدها طلعوني وجدت خمسة ضباط منهم العقيد فيصل والمقدم سراج والمقدم خليل سألوني عن اسمي وسكني وتلفوني وقالو لي ديانتك شنو؟ قلت ليهم انا ما عندي التزام ديني بعرف الله بس قالو لي ما عارف في شنو؟ في طالب مات المقدم سراج قال لي وضح لينا خط سيرك من يوم الاربعاء قلت ليهم جيت المكتب حوالي الساعة 9 ونص طلعت جامعة جوبا لاجراءات في شهاداتي رجعت حوالي الساعة 3 ونص مشيت البيت وصلت حوالي 4 ـ 4 ونص يوم الخميس طلعت 11 ـ12 حيت مربع 8 ابو سعد لوفاة بعدها بنصف ساعة جيت المكتب لاجتماع مع الشاذلي ميرغني في هذه الاثناء جاء بعض الطلاب وطالبوا بقاعة لمؤتمر صحفي قلت ليهم المؤتمر بخصوص شنو؟ قالو لي في احداث في النيلين قلت ليهم براكم ولا معاكم تنظيمات ثانية قالوا لي معانا تنظيمات ثانية استأذنت ليهم القاعة بعد فترة استدعوني وسألوني وقالوا لي طلاب دارفور بجو في مكتبك لي شنو؟ قلت ليهم هم اعضاء في الحركة الشعبية سألوني عن اشياء الحركة قلت ليهم اسألوا المسئول عن ذلك قالوا لي منه قلت ليهم ياسر عرمان. قالوا لي بتعرف ين قلت ليهم نعم رجعوني الحراسة ومكثت اكثر من شهر في السجن جاءني وكيل النيابة قلت ليه انا قاعد بدون اي توجيه اتهام قال لي ورقكم في جهات عليا بعد ذلك حولوني لقسم التحقيقات الجنائية بحري وقعدت 12 ـ 15 يوم ثم الى مكتب السجلات قعدت في الحراسة 12 يوم بعدها ودوني للاوسط الخرطوم قعدت ما يقارب شهر مافي زول سألني عن اي حاجة بالليل قالوا لي لم حاجتك وركبوني بكس لقيت فيه احمد الحاج والمتهم الثاني ذهبنا لقسم الرياض اخذنا معنا حسين لما جئنا الى الشمالي وصل عددنا 7 بتعرف شنو عن يوم الاحداث؟ ولا حاجة بتعرف الحركة عندها ركن نقاش في الجامعة؟ عرفت في المساء انت كنت سائق عربية؟ ما بعرف اسوق ضربت ذخيرة؟ لا هذا الحديث سمعت به في المحكمة انت مسئول الدار لا لماذا طلبوا منك بالتحديد القاعة؟ لا عندنا قاعة في الدار تحت مسئوليتنا استجواب المتهم التاسع ين ماثيو اشول جئت جامعة النيلين الساعة واحدة ونص ـ 2 اعطوني فرصة التحدث في الركن تحدثت عن الوضع السياسي الراهن وموقف الحركة من قضية دارفور واثناء الحديث سمعت تكبير والطلبة قاموا فارين دورت عربيتي وطلعت وجدت كمية من الطلاب راكبين معي قالوا العربية فيها ذخيرة؟ انا ما عندي أي سلاح الكان راكب قدام منو؟ لا احد في دار الحركة وجدت منو؟ لمة بتاعة طلاب في مصابين في الدار؟ لا عربيتك شنو؟ بوكس دبل كاب هل في العادة العربية بتكون فيها ذخيرة؟ مع اني كنت ضابط في الجيش لكن بعد الاتفاقية لم احمل سلاح انت طالع من الركن سمعت صوت ذخيرة؟ مع اللفة في الاستوب قرب السفارة الامريكية أي صوت من اصوات السلاح؟ ما بقدر احدد تنفي علاقتك تماماً بالبلاغ؟ نعم المتهم العاشر خميس جون مامور يوم 8 /2 حوالي الساعة 5 مساء وانا طالع من مكتب الحركة الشعبية المقرن وفي تقاطع كلية التجارة جامعة النيلين قبضت بواسطة افراد الشرطة انت شغال شنو؟ سائق سائق شنو؟ بوكس دبل كاب حكومية جاء عسكري قلع مني مفتاح العربية وقال لي اركب ركبوني ودوني رئاسة شرطة ولاية الخرطوم قلت ليهم في شنو قالوا لي بطل الاستهبال مشيت جامعةالنيلين؟ قلت ليهم نعم فعلاً مشيت في نفس اليوم ضرب لي واحد اخوي اسمه كولن قال لي في مشكلة في النيلين نزلت من الاستراحة في المقرن ركبت العربية وقصاد كلية قانون ضرب لي قال لي انا قاعد جوة وجيت بالشارع وبالمراية شفته جاء رفعت ليهو التأمين ركب وشعرت بركوب ناس خلف العربية وذهبت به الى المكتب سمعت صوت ذخيرة؟ لم اسمع ما اطلقت أي نار؟ ابداً

Quote: لا يعقل أبدا أن يظل هؤلاء الأبطال كل هذه المدة داخل معتقلات عصابة الإنقاذ.. وضاع العام الدراسي وهاهو عام آخر سيضيع!!

Quote: ولن يتوقف نضالنا طالما هناك ظلم وقهر وموت وتعذيب.. لقد إغتالوا هؤلاء الشباب بتضييعهم لهم كل هذا العمر خلف الزنازين بدون أي جناية ..هذا الشباب بريء ..

(عدل بواسطة خالد الطيب أحمد on 11-06-2007, 10:31 AM)

Quote: الا ان ضياع سنين عمرهم هذا لا يعوض

Quote: وبغض النظر عن كل الخروقات القانونيه بحقهم الا ان ضياع سنين عمرهم هذا لا يعوض

Quote: المتحري في قضة النيلين يتراجع عن أقواله بخصوص آداة الجريمة والدة القتيل تعتقد براءة المتهمين والاتهام يرفض استعاء الدفاع لشهود (مركز أخبار السودان الجديد) تحت تواجد أمني كثيف للغاية قدر بحوالي الـ 400 فرد لعدد من الوحدات العسكرية كان أبرزها القوات الخاصة والشرطة الأمنية وشرطة النجدة والعمليات عقدت صباح اليوم الثلاثاء 14/8 جلسة جديدة في قضية مقتل طالب النيلين والمنتمي لتنظيم المؤتمر الوطني، وكانت جلسة اليوم مخصصة للاستجواب الثاني ... من قبل هيئة الاتهام للمتحري والذي حدثت فية مفاجأة بتراجع المقدم سراج عن أقواله التي قدمها في خطبة الادعاء والتي تحدثت عن عدم وجود دم في آداة الجريمة والتي تعود للمتهم الأول عثمان اسماعيل بشير حيث ذكر أن المعمل الجنائي أفاد بأن السكين قد تم غسلها بصابون بدرة وأن دماء القتيل وجدت في الجزء السفلي من نصل السكين والمغطى بالمقبض كما أن الدم الذي وجد في جورب المتهم الأول يعود للقتيل الأمر الذي وصفته هيئة الدفاع بالأمر الغريب بعيد انتهاء الجلسة. وكانت الجلسة التي امتدت لحوالي الثلاث ساعات شهدت سؤال القاضي لذوي القتيل عن رغبتهم في الاستمرار في القضية أو التنازل عن الحق الخاص فرد شقيق المجني عليه بأنه لن يرضى بأقل من القصاص،أما والدة القتيل فقد سمعت خلال استراحة لآداء الصلاة تتحدث عن تشككها في كون أن المتهمين لهم علاقة بمقتل ابنها وأنهم لا تربطهم علاقة بالمؤتمر الوطني وأنها تتمنى من الأجهزة العدلية أن تصل إلى الحقيقة. إلى ذلك فقد تم تحديد جلسة الغد للاستماع إلى شهود الاتهام والتي ستعقد في تمام الواحدة ظهراً بمحكمة الخرطوم شمال، وكانت الجلسة قد شهدت جدلاً بين ممثلي هيئت الدفاع والاتهام عند طلب القاضي منهما تسليم أسماء شهود الطرفين حيث قدم الاتهام التماساً إلى القاضي عصمت محمد يوسف طالياً بأن لا يسمح للدفاع بالاستعانة بشهو وأن يتم الاكتفاء باستجواب المتهمين من قبل القاضي الأمر الذي رفضته هيئة الدفاع بشدة وعبر عنه عضو هيئة الدفاع أ. ساطع الحاج بعد انتهاء الجلسة بأنه السابقة الأولى من نوعها من حيث الطرافة في تاريخ القضاء. هذا وكان القاضي قد وجه سؤالاً للمتهمين العشرة كل على حدة حول هل يعتقدون أنهم مذنبون فأجابوا جميعهم بلا.