|
منتخبنا الوطني هل يناسبه لقب ((تماسيح النيل)) أم ((صقور الجديان))؟؟
|
يبدوا أن لقب منتخب السودان((صقور الجديان)) قد تم تغيره للقب اخر هو ((تماسيح النيل)) تداول الإعلام أثناء قرعة نهائي افريقيا اللقب الجديد مبررين ذلك بنوم منتخبنا الذي طال ليعود للسطح ملتهماً فرق قوية في مقدمتها تونس!!
شخصياً مع اللقب الجديد الذي يحمل معناً اقرب لذاتنا وارتباطتنا بالنيل وافريقيتنا!!
ما رأيكم؟؟
|
|
|
|
|
|
|
|
Re: منتخبنا الوطني هل يناسبه لقب ((تماسيح النيل)) أم ((صقور الجديان))؟؟ (Re: سامى عبد الوهاب مكى)
|
سلام يا سامي وكل عام وانت طيب ياخي هسه الناس ديل نحنه في أواخر عام 2007 وباقي فترة بسيطة للنهائيات الحنظهر فيها بعد غياب ثلاثة عقود، يعني مفروض ظهورنا يكون مشرف لأنو الكأس ده - نكون واقعيين- لا طمعانين فيهو ولا بنقدر عليهو، مش مفروض يدخلو ليهم معسكر تدريبي في أوربا مثلاً، ويلعبوا مباريات ودية مع منتخبات تشابه منتخبات مجموعتنا؟؟ بدل ما يلملموهم من بيوتهم قبل النهائيات ويفضحونا؟؟ّ!!
| |
|
|
|
|
|
|
Re: منتخبنا الوطني هل يناسبه لقب ((تماسيح النيل)) أم ((صقور الجديان))؟؟ (Re: فدوى الشريف)
|
سلام طاير مع صقور الجو وراكي على تماسيح النيل بتبالغو ياسامي وود فرح التماسيح التبلعكم يعني نحن ناقصين عاهات قال تماسيح المرة دي الفريق ادو تمساح عديل ابلع ميزانيتو المافي وابلع التماسيح الصغار بتاعين الفريق الأولمبي واقبل على تماسيح الرياضة وفتش الديناصورات وين؟؟ والمعز وكمان عبد الباقي بثنيهو على البعاعيت هو نحن ناقصين بعاعيت كل افلام الرعب مارين بيها من الشكلوتا الى ود ام بعلو وابو الدودو وابو الزفت زاتو .. تماسيح النيل ده المصريين لعبوا بيهو قبل كده والبعاعيت اشيلوه البعاعيت الجابوه وفدوى تمساحيك عينة ومابخارج معانا وعمر الفاروق عايز اقيظ الخلايق فوق فهم وعلي مزمل زهجتو عينةكرهان حتى النيل زاتو اها ندخل في الموضوع انا بقول لالالالا لاصقور الجديان ولا التماسيح الأتنين ليهم في التأويل الشعبي الف سيئة وأحاول اوفق بينكم في اسم ليه سمات السودان الكبير وارضيكم كلكم فيهو من البعاعيت والتماسيح والنيل والتراب والهوا ســـــحـــــرة الـــنـــيـــل وهن السحر راجع لي الفن والعايزو اكون راجع للأنطون على كيفو ؟ الأولاد ديل لعبو كورة ساحرة وتجاوزوا المستحيل سحرة النيل الفريق الساحر ساحر براي انا عز الليل ســـحـــرو الـــنـــيـــل ايه رايكم ؟؟
| |
|
|
|
|
|
|
Re: منتخبنا الوطني هل يناسبه لقب ((تماسيح النيل)) أم ((صقور الجديان))؟؟ (Re: سامى عبد الوهاب مكى)
|
سامي والله اسمك والجلابية البيضه ومكوية هي الشفعت ليك اخش البوست بتاعك ياخي الولد الشايلو ولابس احمر ما كفاية ممسكو العلم في شان شنو ؟؟ لكن نقول انعل ابو التعصب لو جاني ولد حلف اسميهو سامي الدين محمد سامي الدين السهروردي ده اسمو كلو مالك ؟ لوعجبك امشي غير اسمك سامي طبعا صاحبي المفضل في الكورة هو جعفر سعيد الكاتب والممثل وطبعا هو معاكم وما بفوت مباراة واحدة الأيام دي واحشني جدا في المناكفات والتعليقات الظريفة رجاء مدنا بكوميديا رياضية معاصرة مودتي
| |
|
|
|
|
|
|
Re: منتخبنا الوطني هل يناسبه لقب ((تماسيح النيل)) أم ((صقور الجديان))؟؟ (Re: نادر محمد الراضي)
|
إحترام شنو ؟ انت خليت فيها إحترام ! انت إختلفت معاي عديل قال ملوك ..ملوك والله مابطال ملوك ملوك تخيل ريتشارد والصولجان موشوحو ولا العجب ملايان بالأوسمة والنياشين لكن تعال هنا يانادر عامل دقينتك الرهيفة دي تلقاك انت اكبر انطون عصري ؟؟ شوف يانادر ديل مادام عملتهم ملوك لازم ترقي لينا البرنس لي فرعون كبير ايه رايك ؟؟ ملوك النيل السحرة الذين سوف يطوعون الرعية من الدلتا الى جبال تميكتو يلتهمون ثعابين الفراعنة ويهزمون كوجور زامبيا ويروضون اسود الكاميرون ويمسحون كل لون اسود من سحر الأفارقة معاك ما بنختلف ملوك النيل سحرة إفريقيا
| |
|
|
|
|
|
|
Re: منتخبنا الوطني هل يناسبه لقب ((تماسيح النيل)) أم ((صقور الجديان))؟؟ (Re: سامى عبد الوهاب مكى)
|
محمد السني ونادر عملتو لي البوست ونسة في ميدان البوستة..
وحجازي يقترح الفراعنة السود!!
وهو في فرعون ابيض قالو ليك؟؟
لكن قلعوها مننا حمرة عين وحمرة حاجات تانية!!
وخليناها ليهم اي شي متفرعن ماااا دايرنو...
سحرة النيل!!
موضوع الاناطين دا بعوقكم يا محمد السني!!
إنتو في مجلس الإدارة عديــــــــــل عندكم واحد بي مخصصاتو للدجل!!
برضو ماااا نفع
عينو خبير هندي((للشعوذة)) وضموه للجيش البرازيلي!!
حاجة ما تخلص!!
| |
|
|
|
|
|
|
Re: منتخبنا الوطني هل يناسبه لقب ((تماسيح النيل)) أم ((صقور الجديان))؟؟ (Re: سامى عبد الوهاب مكى)
|
تعرف يا سني بصراحة من تخش ريحة السياسة في اي بوست الناس بتطفش منو لانها قرفت خلاص!!
يعني عندك المداخلة الاخيرة!!
((صبية الانقاذ)) ما عرفتهم ديل اللعيبة ولا المتداخلين ولا ناس ((الكاف)) ولا ناس الشرميطي((ساكت))
عليك الله خليهو اليغطس إن شاء الله ما يمرق منها!!
أنا بقيت متبري منو البوست دا!!
الداير يتبناه يتبناه!! \ دي مداخلة كتبها الاخ قمر الانبياء في منتدى المريخ رد على استياء اخوانا المصارنة على سرقة لقب تماسيح النيل ((بزعمهم))
Quote: استنكر عدد من المصريين فى منتديات كووره اطلاق لقب تماسيح
النيل على منتخبنا الوطنى بحجه النيل تطل عليه مجموعه من الدول
انصفنا الكاف وهو يفردنا عن جميع الامم الافريقيه ويمنحنا لقب تماسيح النيل
انصفتنا وسائل الاعلام الافريقيه وهى تسوق للقب الجديد الذى نستحقه الا من ابى ( ناس شمال الوادى )
بحجه ان النيل تطل عليه مجموعه من الدول .
وهم لا يدرون ان النيل عندنا متفرد فاالنيل يدخل السودان وهو طفل رضيع
فتمضى صبابته وهو في ديارنا ويصبح شابا يافعا وهو في ديارنا ونزوجه ايضا في ديارنا
ويشيخ في ديارنا ثم يهجرنا لانه لا يريد الموت في احضان من يحب .
العالم كله يدرى تفرد النيل في السودان الا هم .
واليكم لتعرفوا كيف تفرد النيل في السودان عن باقى الامم .
النيل الذى يجرى في مصر هو غير النيل الذى يجرى في السودان
والنيل الذي ينبع من يوغندا هو غير النيل الذى يجرى في ديارنا .
والنيل الذى ينبع من اثيوبيا هو غير النيل الذى يجرى في سوداننا
فالنيل عندما ينبع من يوغندا يجرى وهو يشعر بالوحده .
الا ان يصل داخل السودان وحينما يفيض به الكيل يتدفق في مساحات واسعه
بحثا عن من يانس وحدته مما يؤدى الى فقد الكثير من مياهه في تلك المنطقه بسبب التبخر
وعندها يلتقى ببحر العرب ونهر السوباط ونهر الجور وبحر الغزال ويغذيا قوته
ويتفقا على المضى قدما الا ان يلتقيا باشاقئهم في ملتقى النيلين .
فحينها ياتى الازرق مندفعا من هضبه الاحباش وهو في شوق لهما
وتكون الخرطوم هى الحضن الدافى للاشقاء النيل الابيض بابنائه بحر العرب والسوباط والجور
والنيل الازرق باشقائه نهرى الرهد والدندر .
وهنا يستحضرنى قول عملاق اللغه البروف عبد الله الطيب
ذكرت التقاء الازرقين كما دنى
اخو غزل من خدر عذراء مسكال
وبعد ان تكتمل مراسم الزواج بعذراء النيل يتعاهد النيلين على مواصله المسيره بحثا عن الابن الضال نهر عطبره وابنيه سيتيت وباسلام
ولكنه كان يعرف مسارهما فيهرول لانتظارهم في عطبره الحديد والنار . ويجتمع الشمل في السودان .
لذلك النيل متفرد عندنا اكثر من كل الدول التى تطل عليه .
فدول المنبع يخرج منها النيل وحيدا بحثا عن ابنائه واشقائه .
ودوله المصب ياتيها النيل بعد ان يلتأم الشمل وهو شائخ وقد اضناه التعب بعد اكتمال فصول المسرحيه في السودان
لذلك ما اجمل لفظ النيل وهو يقترن بالسودان . ان كان تماسيح النيل او حتى صقور الجديان التى تبيض في ضفاف النيل
الا يحق لنا احبتى ان نفخر بتميزنا عن باقى الامم بنيل العظمه والشموخ .
شكرا الكاف فلقد انصفتنا .
تخريمه :
قد يتفاجأ البعض منكم ان سكان شمال الوادى يقرنون النيل بديارهم وهم لا يدرون عنه شئ ولا عن اسراره وخفاياه
وهم لا يدرون ان النيل هو في الاصل نيلين . وعشرات الانهر التقت كلها في حضن السودان الدافئ
وحسب علمهم ان النيل ينبع في يوغندا ويصب في البحر الابيض المتوسط فقط |
| |
|
|
|
|
|
|
Re: منتخبنا الوطني هل يناسبه لقب ((تماسيح النيل)) أم ((صقور الجديان))؟؟ (Re: سامى عبد الوهاب مكى)
|
سامي الخصال .. السني يا ود دفع الله .. نبقا جادّين معاكم شوية المشكلة في إختيار الإسم حالياً أن الإسم سيكون إسم مؤقت يزول بزوال المؤثر ولا نضمن إستمرار فريقنا القومي لمواسم أخرى للظهور في المحافل الدولية وبالتالي لن نحصل على بلح الشام أو عنب اليمن ويصبح الإسم الجديد إسم مرحلي ليس إلا !!! ويذكرني البحث عن لقب لمنتخبنا القومي بالبحث عن إسم لمحل تجاري فتجد الكثيرون تورطوا في تسمية محلاتهم أسماء موسمية فنجد من يسمي محله (تايتنك) ايام فورة الفيلم وما ان إنتهت الفورة وصار الإسم دون معنى!!!!! بالتالي فإن إسم صقور الجديان هو الإسم المناسب ليس لهذه المرحلة فحسب ولكن لأنه لقب محلي نكرره كثيراً في صحفنا اليومية وفي حياتنا اليومية وحتى في التعليق عبر التلفزيون. ولكن إن غيرنا الإسم وحاولنا التسويق للإسم الجديد فقط لكي يقال خلال البطولة الإفريقية فستنتهي البطولة الإفريقية وربما يودع المنتخب من الأدوار الأولى قبل أن ينتشر حتى الإسم الجديد فيتوه لقب صقور الجديان .. وثقافة تغيير الإسماء للأسف هي ثقافة حكومات تحاول بها جاهدة مسح تاريخ طويل لحكومات سابقة ولثقافات سابقة فهاهي حدائق مايو صارت حدائق 6أبريل ثم جاءت الإنقاذ فغيرتها .. وهاهي مدرسة الخرطوم القديمة ومدرسة حنتوب وفي الطريق مدرسة المؤتمر تتغير وتختفي ملامحها .. وهاهو السلم التعليمي يتغير ويفقد هويته .. وهاهي الشوارع تتبدل أسماء بإسماء .. ولكن في نهاية المطاف يبقا ما علق في الوجدان وتعلق به القلب وإرتبطت به الذكريات .. صقور الجديان هو ما تعودنا عليه .. نسور قرطاج هم التوانسة .. الفراعنة هم المصريون .. أسود الأطلس هم المغاربة .. الأفيال هم ساحل العاج .. النسور الخضراء هم النيجريون .. الأزوري هو الإيطالي.. الماكينات هم الألمان .. السامبا هم البرازيليون .. التانقو هم الأرجنتينيون..
هكذا هي ثقافتنا الكروية وهكذا نستمتع بها فلماذا لا يتركوها وحالها سواء الإتحاد العام أو الحكومة .. هذا مع تقديري وإحترامي لكل الأراء بخصوص الأسماء المقترحة .
تخريمة : يا سامي شفتني كيف وانا جادّي ؟ أجنن وانا جادّي
| |
|
|
|
|
|
|
Re: منتخبنا الوطني هل يناسبه لقب ((تماسيح النيل)) أم ((صقور الجديان))؟؟ (Re: Mahathir)
|
الأخ سامى والأخوة المشاركون الأكارم انا اقترح ان تزين قمصان لاعبى فريقنا القومى بنجمة واحدة للدلالة على ان فريقنا حمل فى يوم من الأيام بطولة افريقيا اسوة بما تعمله الدول التى تفوز فرقها ببطولات قارية.المصريين مثلا ملصقين ثلاثة نجمات وتونس اظن نجمة واحدة.انا يبدو لى ان وجود النجمة فى قمصان لاعبينا اوقع فى نفوس الفرق المنافسة وعشان يعرفوا انهم بيلاعبوا فربق حمل فى بوم من الأيام كأس تلك البطولة. مع الأحتفاظ بأسم صقور الجديان. مع تحياتى.
| |
|
|
|
|
|
|
Re: منتخبنا الوطني هل يناسبه لقب ((تماسيح النيل)) أم ((صقور الجديان))؟؟ (Re: سامى عبد الوهاب مكى)
|
قلت لي يا فردة تماسيح النيل إسم موسمي زي تايتنك!!
خلاص قرضت التماسيح!!
هيييييييع عافي منك!!
اسمع نكلمك عديـــــــــــــل كدا غاندي جايني ومن ضمن الاجندة ((نشيل حالك)) أحسن تكون عارف عشان يوم القيامة ما تتفاجا!!
شاي الغزالتيـــــــــــــــــــــــــــن
عبوة في تيباااااااااااق!!
المداخلة الخاصة بشاي الغزالتين ليس لها علاقة بالبوست ولا تمثل اي نوع من الدعاية نظراً للمبلغ البسيط الذي دفعته الشركة
عمر الفاروق بالطريقة دي لو قلت ليك ما عندك بعد نظر حا تقول لي وإنت عيونك صغار
احسن اسكت.
بالمناسب موضوع اللقب دا انا حسمتو خلاص بيقت في مرحلة الإمضاءات
| |
|
|
|
|
|
|
الخوف من لقب ضفادع النيل (Re: سامى عبد الوهاب مكى)
|
العزيز الرائع دوماً سامى عبدالوهاب فى البدء كل سنىة وانت طيب وهنيئاً لمريخكم او مريخ السودان بالصعود للنهائى ونتمنى ان يحرز الكأس للسودان وليس للمريخاب كما ترددون . ثانيا بشأن منتخبنا والالقاب كما تعلم ان الالقاب الجذابة والمرعبة للفرق العاتية تسير وتتردد على الملأ حين يتوهج نجم منتخب الدولة صاحبة اللقب ولكن حينما يصبح المنتخب ملطشة وسلم لصعود بعض المنتخبات ساعتها لايتذكر احد لقب صقور الجديان او تماسيح النيل فالعبرة بالاداء القوى والنتائج الباهرة ولو تعرض منتخبنا لهزائم كبيرة ساعتها سنصبح ضفادع النيل بحق وهذا ما اخشاه فى ظل الوضع الحالى للمنتخب .
وبدون زعل صدقنى ان الكابتن مازدا ليس مؤهلاً لقيادة منتخبنا فى النهائيات فقد خدمته الظروف فقط فى التصفيات (جزر موريشص وسيشل وجزر القمر او الكنارى ) والصدفة فقط فى هزيمتنا لتونس. صحيح خريج ج. الخرطوم وعنده حبة شهادات وكورسات لمدة كم اسبوع من المانيا وكان لاعب مشاكس وصديق للكروت الملونة بالمريخ والمنتخب ولكن هو كغيره من المدربين السودانيين يفتقد للتكتيك ويختار عناصره للمنتخب بالعاطفة ويعتمد كثيرا كلام صبية الجرائد الذين لايتحدثون ابداً عن منتخبنا الوطنى وكل كلامهم وحديثهم عن الازرق والاحمر وهم فى الواقع لايفرقون بين ان شاء الله وانشاء الله وبين مربض الفرس ومربط الفرس.
| |
|
|
|
|
|
|
Re: منتخبنا الوطني هل يناسبه لقب ((تماسيح النيل)) أم ((صقور الجديان))؟؟ (Re: سامى عبد الوهاب مكى)
|
ابو السيم : موسمية اللقب انا قاصد بيها إختيار اللقب لكأس الأمم الأفريقية بغض النظر عن اسمو .. والدليل على إنو لقب للبطولة الافريقية هو إثارة الموضوع خلال الفترة دي وإلا لكان البحث عن لقب من زمان .. المشكلة يا ابو السيم الألقاب كتيرة والسودان بلد مترامي الأطراف ومتعدد السحنات (أحيييييييينا أخيراً لقيت فرصة أحشر سحنات دي في جملة) .. وللحقيقة إرتباط السودانيين بالنيل إرتباط ضعيف جداً وحتى ثقافتنا النيلية تعبانة شديد ويكفي إنو النيل بعد الساعة 8 مسا في السودان متروك للشياطين والسمك فلا أنيس ولا ونيس ولا كورنيش ولا حدائق ولا سمّار ... بعكس المصريين الذين يقدسون النيل وفي الماضي يقدمون له القربان ... يا أخوي نحن لو خلاص بقينا على الأسامي البتعني لينا حاجة ومن مقدساتنا فالنسمي نمور الفول أسوة بالطليان المعروفين بي الإسباجتي.. فكما تعني المكرونة والبيتزا للطليان الكثير حتى صارت لهم شعاراً فنحن كذلك الفول هو مقدس لنا ويعني لنا الكثير .. معاً لتسمية المنتخب القومي بي فهود البوش ..
تخريمة : غاندي ده ونستو عاضّة جداً وتتمحور في المريخ وريال مدريد .. كدي جرب خش معاهو في سياسة أو ثقافة من نوع ماركيز وسقراط وبعدين نشوف..
| |
|
|
|
|
|
|
Re: منتخبنا الوطني هل يناسبه لقب ((تماسيح النيل)) أم ((صقور الجديان))؟؟ (Re: سامى عبد الوهاب مكى)
|
تعرف يا نادر: ونسة غاندي عن المريخ زي ونسة سيف الدين الدسوقي عن حي العرب وزي ونسة اولاد البنا عن الصيد وزي ونسة الجقر عن الحقيبة يعني قد بي الطريقة الصااااااااااااح
تخريمة : من ناحية ليلة ثقافية فالحق يقال غاندي حا يمتعك بي ونستو عن المريخ لأنو والحق أقول أكتر زول مريخابي في المريخاب ديل .. النصيحة لله الزول ده مرضان بي المريخ وحا يحكي ليك حاجات تشيب الراس نوع جمال ابعنجة لمن شات الكورة في العراضة في المباراة الودية ضد أهلي القطينة ولمن سانتو ضرب الكورة هيد في الدقيقة 7 يوم كورة الفهود الكيني .. لكن علييييييك الله كدي جرب أهبشو في ونسة من نوع سلفاكير وعلي عثمان والشعر الجاهلي
| |
|
|
|
|
|
|
|