|
|
 ســـقـوط عـثـــمان بـشــــــري
|
سقوط
الشاعر عثمان البشرى
----------------------
إيقاعى إختلّ يا أختاً
بحجمِ المحنة والزمن الهزيل..
وجمراً باقى فى عُمق الشرايين
المداخل
المطبات المراحل
إنمحى الوجه القبيلا
تشوفى زى صدر
الجزيرة
وإنبهت لون السريرة
وحالف العمر
الرحيل...
معادلة الزمن صَعبت
تليت سُور الخلاص لاذت
خطى الزمن الخليل
لا فُت لا جيت
لا لقيتك يادروس العبرة
ضليت السبيل
والكوة فى جُدُر الخواطر
والمخاطر إعتلت
كُل المنابر شوَهت إسمى
وبديت أسقط..
سمق إسمك
شمخ فى دورة الرعد
إنفتح باب السما
وصبيتى
نبت من جديد نبضى
وبديت أسقط
شدخ فاسِك عباب الضلمة
لاحت فى الأفق عينيك
برق ثغرك
ولج عمقى
وبديت أسقط
هتف جُوّا الوجع نبضك
رِتاج وصد الدروب إنحل
بديت أجرى النفس كمّل
ركضتَ قُبالك إتلاشيت
وبديت اسقط
مع الزمن السقط منى
نسيت أديك عناوينى
ونسيت أرسم خطاى تانى
وثابت زى عمود الهم
لا لميت ولا بتلم
لا حصلتك
آه
أوبى
الدروب إنسدت
الفرح أنقتل جواى
أتوب ياسكه ما توبى
كفاك أوبى
أتوب ياذاتى ما توبى
وأعلن ياصحف:
ضليت
خرجتَ ولم أعد للآن
وقد ودّرت محبوبى
مواصف ذاتى كالآتى
طويل الهم
كثيف الغم ولون البشرة
نواتى
سرابيل الوجيع
فينى
ولا يكفيها يكفينى
ولا تكفينى آهاتى
وشوك السكة فى الخُف
الحِفا وتوبى
وبين الدم وشريان الرحيل
شكلك
كفاك أُوبى
كفاك أُوبى
مشيت هرب الدرب منى
اقيف أفتُر
أزيد أعتر
أمد الإيد ركاب ضوك
تزَح تنتَر
كتاتيح البلد تنكال
تشيل كوخ الصبّر منى
عصب قصب اليقين يَنكَش
يجف النيل يموت القش
ورم قلب
الرحيل منك ولا يمكن قريب
يَنفَش
رمال الدفن ساست
فى خلايا الذات
عوامل تعرية وإسقاط
بديت أنساك
كفاك أُوبى
أتوب يا إنت ِ ما توبى
بلغت مراحل الإفلات
من الواقع إلى المجهول
وحدّ مرونة المعقول
ما بين العُسر والممكن
وبين الممكن المعقول
وقف عمرى
وبديت أنهَد
أنا وأرتَد
كفاك أوبى
|
|
 
|
|
|
|
|
|
|
|
Re: ســـقـوط عـثـــمان بـشــــــري (Re: ابو يسرا)
|
يا خي النص
ده فيهو صعود غريب خالص وفيهو امل واسع
شكرا لعودته
شكرا ابو يسرا
تعرف الزول ده في النص ده جلد روحو حنس جلدا ليك (بحوار ذاتي ,وعراها جنس تعريه)
تقول لي سقوط سفوط انت ياخ..
فرحان بيك والله ياعثمان وفرحان جدا بالنص ده...
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: فيصل عباس)
|
ما أروعك يا شاعر النار
عندي يقين بأن عثمان بشري
افضل من يكتب الشعر الان
وان لغته هي الارفع
فقط .. هذا القلق الجامح يبدد
حروفه .. وما يتبقي منها قادر
علي اثارة الاعجاب حد الدهشة ..
اين انت يا عثمان
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: ابو يسرا)
|
ابو يسرا
ليك وحشة وكمية من الاشتياقات
آه
أوبى
الدروب إنسدت
الفرح أنقتل جواى
أتوب ياسكه ما توبى
كفاك أوبى
أتوب ياذاتى ما توبى
وأعلن ياصحف:
ضليت
خرجتَ ولم أعد للآن
ويا بشرى الحاصل شنو ما قلنا خلاص جعت البلد
والنفسيات فى احسن حالا
نتمناك بخير
واياك من السقوط
محبتى للجميع
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: khatab)
|
في احدي الايام كان الشاعر عثمان بشري يشاهد في التلفزيون وكان هناك لقاء مع فنان ناشيء فقام الفنان باداء نص سقوط وقال انه للشاعر المغترب عثمان بشري رد الله غربته وفي ذلك الحين لم يكن عثمان قد غادر السودان خالص.
تاني يوم ذهب عثمان لاتحاد الفنانين وسأل عن الفنان الذي ادي اغنية سقوط فدلوه علي مكان تواجده فقام قابله وبعد السلام قال ليهو منو الاداك نص سقوط؟ فدله على فنان آخر أ.أ فذهب عثمان الي أ.أووبعد السلام ساله عثمان عن النص وكيف وجده ومن هو شاعره فقال له الفنان أ.أ النص دة من الحاني انا وادناني ليهو الشاعر العظيم عثمان بشري فقال له عثمان وهل لك علاقة مع عثمان بشري؟ فرد أ.أ كيف يااخي دة كاسنا واحد ومابنتفارق خالص!!!!!!
فقال له عثمان يااستاذ انا عثمان بشري اها بتعمل شنو بتقع في البحر الامانا دة والا كيف؟ فضحك أ.أ وحضن عثمان بشري الذي لم يتذمر وقال ل أ.أ مع السلامة وتبادل معه ارقام الموبايل .
عندما حكي لي عثمان هذه الواقة قلت له نصك رخيص لهذه الدرجة؟؟؟؟ رغم الاحداث التي واكبت كتابته؟ قال لت تعمل شنو مع ناس ديل؟؟؟
المهم في النهاية اهدي هذا النص لابنتي يسرا وقال لها الحق ان تبيعه لمن تشاء وهو متنازل لها تماماً لانها البريئة في هذا الزمن الوسخ.
اي فنان عايز النص دة ياموصلي يتصل بوكيل يسرا الهو انا
| |
|
|
|
|
|
|
|
|
 Re: ســـقـوط عـثـــمان بـشــــــري (Re: ابو يسرا)
|
(عبقري) ك (عثمان بشرى) حري به أن يحتفي بالحياة و حري بالحياة أن تحتفي به
الحياة حلوة يا عثمان و خاصة في حضن الأهل
إملأ رئتيك بعبيرها و لا تفكر في مفارقتها بسرعة
لاوي الموت
لك التحية أخي الحبيب أبو يسرا
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: ابو يسرا)
|
هذه المداخلة من الشاعر عثمان بشري
***********************************
التحية والتجلة ايها العابرون بحار شوقي خالص المعزة ورمضان كريم وكل سنة وانتو طيبيين.لم اكن ادري بهذا البوست لابتعادي الدائم عن هذا الاثير الالكتروني الساحر .وعلمت من الصديق ابو يسرا مؤخراً انه قام بانزاله وعلي العموم هذا النص(سقوط)كتب في مرحلة سابقة من العمر وتحديداً في العام88 بعد تجربة قاسية ومريرة علي كل المستويات عاطفها واجتماعها ودراسيها يعني بالواضح كدة انا في الثانوي العالي وابن لعشرينيات العمر والتجربة كما ذكر اخونا وحبيبنا فيصل عباس كانت جلد روحي بحق واستنزفتني كثيراً.ورحم الله حبيبنا المصطفي سيد احمد عندما قدمته بها في ليلته البهية بسنار ذات مطر وغيم واناسيين عظماء طالب بها ليتغناها لكني خشيت ان يفضح عريي يافيصل اهذا ماتريده؟ لك التجلة والتحية لكل الحبايب وياموصلي حاول فيها
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: ابو يسرا)
|
الاخ العزيز ناقل النص وكاتب البوست بالله السلام الشديد لهذا البشري عايز اي
تلفون او ايميل ليهو قوليهو البسال عنك كتب هذه الابيات من ديوانك شبق اليقين:
الي نسا الله غيمه غيمه ثم الي اولا ريثما افرغ من البكا بين فخذي الوطن
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: ابو يسرا)
|
الاعزاء يسرا وأبوها وعمها ود البشرى
طيب أصبروا كلكم
قاعدين تعملوا خيانات من ورانا
أها يا يسرا أنا ملحن لعثمان أربعة (أنصاص)
رأيك شنو أهدي ليك واحد ملحن
وتهدي لي نص السقوط ??!!
عثمان بشرى سنة 88 إنت كنت مغترب ??
وعامل نفسك صغير.. الثانوي ياتو ???
بتاع عبود ولا عبد الله بك خليل ???
بختكم والله يا ابويسرا
عارفكم قعد تعملوا في شنو هسه...
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: Saber Abdelhadi)
|
الاخ صابر لك تحياتي
يسرا مافنانة عشان تهديها نصوص ملحنة يسرا عايزة حقها كاش ورق بنكنوت وهي ليس كعثمان لاتقدر الاعمال المميزة يازول رسل الكاش وسنرل لك التنازل من المحامي وانا شايف الموصلي دخل في الخط واحتمال كبير يذهب النص له خاصة وان هناك نسب مرتقب بيننا
عثمان بشري كتب نص ليسرا في عيد ميلادها العاشر في مارس الماضي انت لحن النص دة وبعد داك نشوف البيحصل شنو
***************************************************************
مليون شمعة فكرة/ليسرا في عيد ميلادها
عثمان بشري
###########
زي مابتحلق فراشة
ويدفق الغيم لينا مطرة
وزي ما اصل الورد طيب
بملأ دنيا الحقل عطرا
وزي ماكل جميل ورائع
بمنح الناس خير وبشري
ياني ياماما وياباباواعدة جاياكم ببشري
اسالوا لي الله يقيني شر هذي الدنيا بكرة
وكلوا ماتطفولي شمعة
بتضوي مليون شمعة فكرة
القصيدة طويلة وغداً بنزل البقية لان الجو هنا مسخن والصيام شتت النص من راسي
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: ابو يسرا)
|
الكائن الخلوي ده ما قلنا ليهو( الموبايل) أو الـ cellular phone كما يقول الامريكان.
بالمناسبة واحد في أمريكا شايقي جد جد ما زيي وزيك يا ابويسرا بيتكلم الإنجليزي بالشايقي ..
ضرب لصاحبه في الكائن الخلوي بتاعه قال ليهو (برجاك في بطن كاروقر) ..
(Kroger سوبر ماركت بحجم مدينة مروي).
بسأل عن صاحب (كتاب الإنسان الغائب) الشاعر الغائب عبد الله الزين ولماذا هو غائب ??
أما عن الموصلي فهو أستاذ الكل والفنان الثورة ولو عندو وليد فاضل كلنا دايرين نناسبو.
مازن يا مازن : ألا زلت تهطل ?? أم أن صحراء نجد أخدت منك شوية H2O.
2 دي أبت تنزلي تحت الـ H. ماعارف ناس الكيمياء ح يقبلوها مني ولا لأ.
تلفونك حفظتو صم.. وتلفوني ح يظهر ليك لما أضرب ليك بكرة..
تحياتي لسامي .. عمر عبدالعزيز.. مجاهد..والقصاص إذا عندك معاهم إتصال.
أما عن أبوساطور وزرقة فلما أكلمك في التلفون..
اقعدوا عافيي..
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: Saber Abdelhadi)
|
الناس كلكم سلامات وكل سنة وانتو طيبين
خالد العبيد
انا زيك راودني نفس احساسك .... وضحكت من الاعماق لما لقيتا قصيدة جديدة
الرائع عثمان بشرى
هل ما زالت الاماكن في أماكنها؟؟؟؟
وهل ما زالت المية طائرة؟؟؟؟؟؟
أبوطالب جوبا
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: Abutalib Elgorashi)
|
زي مابتحلق فراشة
ويدفق الغيم لينا مطرة
وزي ما اصل الورد طيب
بملأ دنيا الحقل عطرا
وزي ماكل جميل ورائع
بمنح الناس خير وبشري
ياني ياماما وياباباواعدة جاياكم ببشري
ادعوا لي الله يقيني شر هذي الدنيا بكرة
وكلو ما تطفولي شمعة
بتضوي مليون شمعة فكرة
كم منحتوني السعادة
والامان بالفة نضرة
بي كمال سورتو عمري
وياجمالكم اهل عشرة
بالمحبة الصافية تمشي كل ايام اللي بكرة
وياإلاهي ياالآهي ليك احمد
وبيك اباهي
تملأ دنيانا المحبة وتزع الايام ملاهي
نحن اطفال الحقيقة البكرة حاتضوي الدواهي
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: ابو يسرا)
|
ابو يسرا
ازيك ياخ
مرة الزول ده جاني في بيتنا في الصحافة..كان حزين...وعطشان....ومغيوظ....شال علبة سجائر برنجي
فاضية وعمل منها ورقة وكتب فيها الكلام ده:
في حنجرتك وما زلقتنا حبالك برة
ولا فاض بينا الريق للساحل
غرقانين في دمك صرة
وبينا وهمك ببدأ الفاصل
ما بيناتنا وحزنك فرة
امرقي عنك وفيك للداخل
وينا صبايا احلامنا الحرة
ووينو رزاز الزمن الفاضل
اتسربنا معاك في فرة
وما كرينا خيول الحاصل
........نام....... وصحي تاني يوم الصباح....مشي....وتاني ما شفتوا....الكلام دة قبل 12 سنة...
سلم عليه ياخ ..وقول ليهو عمر عثمان التوم بيسال عنك وبيقول ليك ورقة البرنجي قاااااعدة في
البيت...محل ما خليتا......
عثمان بشري...اين تومة؟؟؟؟؟؟
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: omar altom)
|
الاخ عمر سلام
عثمان مدهش يكتب في اي وقت وتحت اي ظرف ممكن تحكي لي امر وتقول له اكتب طوالي ياخذ ورقة ويدون بشكل مميز
بلامجاملة له عثمان متفرد وقامة شعرية سامقة وياليت ناس الثقافة يهتموا به شوية فالراجل غير اعتيادي واستثنائي
سانزل لك توما في هذا البوست
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: ابو يسرا)
|
توما الحلم / الثورة
الشاعر / عثمان البشرى
-----------------------
بين طيف وحلم
سكنت عناوين وإنتمت
ونزلت أنتى تحددى..
يا بت كفاكى... ندهنا ليك
يا بت تعالى نقدمك...
الدنيا جالت فى الكلام
والحكوة سالت تعزمك
الله على الزمن المعاك
الله على الزمن البجى
وسكنتى ليه...
وكان الحر صحت فى الجتة (ترشحى )
من فضاء الجسد الشفيف.. تسقيه
ومن عجب الفصال
عند المغطين بالنصوص الظاهرة
تمسحى روحو
بى نهد الشجن تهديه..
أقولك .. إيه!؟
خلاف أندَّس فى الوعى البسيط الراعى
يا مسخوته
( يابت الذين أحبهم )
سعن ما بملاه غيرك
نيل... وعطشانة المحنَّة بلاك
إذن شن فايدتك
مدسوسة؟
شن فايدة تكونى
خلاف وما معناى إذا إستسلمت..
لى نسفك
قدر الطفل ما يبقى زول
وَيَليتمك
يبقى الرهان فى مأتمك
ياتوما
يا إنعام سبيل... يا طينة ..
يا وَجع النخيل يا مُشبَّعه..
مليون خريطة وطقس واحد...
وإمتحان
يا مشبهة
مليون خريطة وطقس واحد
وإمتحان
أنا كان
شن السويتو شان أتمَّلى
فيك
وأعرفِّك لى ( بالإشارة ) إلى مراجع
واهية
الفاصل قريب يا طالبة إيدك من أبوك...
يا طالقة فى
عدّ المعانى
سلَوك مربوكة
لا حلال ولا مدناً تفك الرِّيق
يبقالى عارفة سماك بوين
من تانى جات القصة
أغلى ضلمة شيلى الشعلة
من طرف الكفاية وحددى الباب البِدَّخِل
جُّوا ، كل ماشُفت فيك غشيت
لاوين أعرفك
أنساك عشان تتجدد الدهشة
عشان تتعلم الأحزان
فخاخ الدايرة...
تمطر
ولسة الدنيا
بعضها يابسة
والمشهد وراهو زمن منافى العِرفة
أصلها صعبه يا أسطى
وليل الحفريات مسطول
إذا زنّت طبول الحس زفر نفس الزمن مذهول
ونبدأ من النشاز اللحظة يبقى أقدِّمك
من تانى ياخيل الرقيص المر...
الشافو نارك عارفين
والخشو دارك كان غزاه
وحكاية إنك ماك نبى
قالوها عنك ناس سقاه
محل إتعامدت كسرة
مع قطفة دليبة نواه
وشايلتك
قدر ما تنفتق فينى
قدر ما تمشى بين عيدين نذور وصلاة
وتتَّفن على وسن الغنا المفضوح
رمال وخلا ..
وخيل مسنونة جوا الروح
تجاه معنى الفضا المفتوح
تجاه ضد متفق فى النوع
وعارف مفرزات الكم
وفاصل فى حدود الكيف
بلا تنسدَّ هدى الفجة
لا تسقِّفنى ولا توصِّينى
لا تلخِّصنى ما من حق تراب مدلوق
بهذى المحنة
أنو يشيل أتر على تانى إنو يقول بفوق إعلانى
إنو يفَّضَل الحسحس عَلىّ أكلانى
جربانه أم بناياً فانى
والصوت الفضل خلانى
من عند المريسة
إلى أعالى هسيسها فاض إنسانى
وإتنملّت
مثل الضو وكت تنّدلى منو ثوانى
صوب الكشف
فى ذات المسار الطقسى
أركب تكسى واللاَّمعانى
ما فرقت ، سوى زمنين:
أجيك قبل الخيار الحسى
أو أختار
عشان تلقانى
فى الزمن المؤاتى النفس قيد مكانى
تحفر شن تلاقى بلاك
إذا كان الجسد معطى
وفايض القيمة
شيلى معاكى بعض هلاكى
يقينى إليك فيض المعنى نبقى
وننوجد لابّد
يامشبوح
خيار فى شوف
ويا مقبوح
خلاف فى الجوف...
ولا يهمك
ولو دقَّقتَ من بعد السهر فى الذات
تعديها النجوع والخوف
فى آخر المجرة هناك
كما لو كان يجى المعطوف
على العاطف
وتتوقى البلاغة حروف
وأنا شن أسوِّيلك
ومن أىِّ الجنون أهديك
وعاد.. من تانى منديلك
شهيد دمع الأسى المنتوف..
أنا أصلى كان واحد غبى
فاكرنو كان الناس نبى
ختوه فى كرسى الهلاك
صوح كما يفعل صبى!!
معليش.. إذا إنفطرت سما
ومطَّر وجيف الغيب هما
ماكُل حُزُن إن فَرهَد نَمَى
ممسوحة دمعة لوعتو
والشال على قلبو الأسى
وباشر بشاشتو وروعتو
يتدَّلى من كتفو الجبل فى سبتو
كان أو جمعتو
وإت ياكى فينا جنوب شمال
من صبحت الدنيا ومشت
يوم قرنبيطه بلا سؤال
يوم تعذريها إذا إختشت
أصلو الجنو عليك عيال
دائماً بأصلك
ما وعت
يا توما
صدر الخيل جُواَّ محروق
على صدر عمرك مسار
إن دحدح الليل وإتزوى
برضك فلابُد من نهار
باقيلى وين تنشقّ إيد
حفرت إليك درب الهوى
يا توما
من وجعى العنيد
هل عفرت لوحة هواى
فى البحث
عن سكة خطاك
خيل الجوى
أو كل ما آخيتُ فى الزمنِ النوى
لونَ الصَبَاحاتِ البعيد...
أمسيتى
تانى بَلا دوا
أشرت ليك ما تتطلعى
أنا أصلو خان عشقى الوعى
وإنجف فى حلقى الهوا
لابُدَّ من شجرٍ حديد
يزهر رصاص الإستوا
ويباشر الفجر النشيد
يفتح على الجدران كُوى
والضَّى
يبتق فى الوريد
بذرة وخصوبة وإرتوى
هَضلمتى
مانا مُسَّفين
لكن بنسقيك الدوا
أضرمت نارك ناسفين
كل المقاصيف الزَّوا
يلاَّكى نمرق
من هنا لاوين
تَدُخلِى بلا
حِوا
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: ابو يسرا)
|
ليل المساجين
الشاعر / عثمان البشرى
-----------------------
قَعدَتَّ بيك
فى العتمة..
كان ضُلِّك طعم ليل
المساجين لما يحتدم التوقع..
ما بتشابهى الليل ولا الضو بجرحك
لكنّى تريان بملامحك ومشتهيك
كان مكانك لاتحت ولا فوق
توسَّط فينى لونك
فأنتبهت لقيت زمانك لا صباح لا ليل
قَعَدَّتَ أوقّعك فى الدَّم...
ونُمتَ.......
( ليس نوماً مثلما يبدو ولكنى نسفت’ مساحة
الوعى القديم
وإرتضيت بك الرسالة..
ساعةً أخرى وأرض’’ للتواصلِ والهتاف )؛..
إتكأت وقالت:
تريان بالخمج
وفكرتك فى الخوف
على شبه المدينة الرطبة
وقرقرك
ضحكك على كل القرى المبلولة بى
عطش
الفراغ
وسماك مشققة بالدخان
فايت تحدث ضلك الغايب
ولا الغايبين فى دمك سمموك
بالضو
وأطفال الحقيقة وورطوك بالنار
على حافة أساك ومشوا
زولتك
تجيك فى الطيف
صفحة أمس نديان
وتغنيلك فتر مابينها وإحساسك
شجر حفيان.. وعصفورة إستكانت
للفضا المسكون بنادق فكرتك
أفظع قصيدة إتلملمت بالليل
من الشارع وغنت للصرير فى الباب
وخشخشة الرواكيب الغرف
مانزَّ منك
كان سوى الطين
والدعاش
مطرة ولف راشد.
وبعد
حقت لى وجعك محق ليل الرطوبة الفى
نفس
كلماتك الجاياك تعزى؟
إترتبت بى يأسك
وخانى الفتر نمت
مساحة الوعى القديم
وإرتضيت بك الرسالة
ساعةً أخرى
وأرض’’ للتواصلِ والهُتاف
وتشبهين الضوء
لا يعادل الإظلام
فى ضدِّيه الوَهَج النقِّى إن للإظلامِ
ما يُعطى خِصَاص الرّوح أنه
سَرَيانُ
أغنية السكينة
فى الدَماءِ المُستَحَّمةِ بالوُجود
فلتشبهينَ إذاً دمى
علاقةُ إندماج الذات فى جسدِ
الطبيعة بالذى فينا
من الطينِ
النيى
زمنُ التحرُكِ فى المدى
مابين وَخَز الشمس
حتى بؤرةِ الأحساس
فى عصبِ التنبُه أنتِ.
فأنتقلى بما يكفى
التوَّحُدَ والشمول
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: zumrawi)
|
مرحبا الاخوان زمراوي وفتحي البحيري
ليك وحشة يافتحي كنا علي علم بليلة عثمان بشري ولكن ظروف قاهرة منعتنا من الحضور
الاخ عثمان بشرتي بانه سينشر نص سيحدث ضجة في الاوساط الثقافية وسيتم النشر في صحيفة خرطومية وسانقله لكم هنا فترقبوة النص القنبلة وهو مزلق من مزالق عثمان بشري الكثيرة
| |
|
|
|
|
|
|
|
|
|
Re: ســـقـوط عـثـــمان بـشــــــري (Re: ابو يسرا)
|
شكرا لك ابو يسرا
تحياتى للاخ عثمان بشرى وارجوا ان تمدنى بموبايل عثمان وقول ليه شاكر كوستى
بسلم عليك وكل الشله عبد التواب (راستا). لوى حسن عوض. خالدحسن
وهذا هوا رقم جوالى 0508860165
[email protected]
عشان توازى الحال
شعر عثمان بشرى
حتظل مسم بارتجاج الحس وذاكرة الامانى المستباحة
تفت عصب بؤيق انتباه المرتقب
حتظل مدبس في عيون الدهشة فاقد حاسة الرغبة
وظلالك تنتحل عطر السكون المنسلخ
رج حنينك في علب صيف المشاوير العديمة
ما اترسبت جواك مفاهيم التخاذل وانتحر طعم الحفاوة
لما خش الضوء مسامك ليلت كفك حروف الاتى من غينوات تراحيب البيوت المحرجة
كان عفنت شهوت خطاك بكره الترابيس الكنيرة
وهد نخوة حاضرك المعلن ازيز الماكنات وتطاولت الشرف السميكة وتواطأالزلط الجحيم
هزاك هوان الجوع ولسعة عشقك الوارم من الترحال
ام قص دربك الزقاقات الهزيلة وتشابه البقر عليك
انتباه انتبه والى الاسف الوقفة خلف الاحتمالات الخصية اتشربت نحو النهاية المفرغة
لا توما قدرك لا قميصك من حصارات الشموس الحاضرة دى
تحميك من شتاء الخوف ال لى جاى
حتكون والى اى الموانى ينتهى بيك هاجس الاوغاد
تدخل اخر الاشواق منتعلا صباحك والنوى يطل ملامحة
بحرصك كفى اطفالا من الاسقاط واكتب فى دماك كلمتين النا وطن النا وطن
خشيت معاى يادوبك اللوحة الخطيرة واعتلت خشبة خطاك عمق الولف
باعت مابين النحافة فى سكتك وما بين سباتى المنكسف
وعشان توازى الحال بصحوة قيفة فى عمر الثوانى الراقدة ديك اقراء الشجيرات الهنا
وخت احتمال انو الرياح بتهب شمال او افترض بتهب جنوب على اي حال
امسح شقوق المزرعة المحروقة دى وارفع بوابير التوقع والاحتمال
شان تخدر عزتى البتقول نشقف ازدهارا ومات
مات فيك حس التامل والقراءات الحميمية بالوقوف
اللوحة الان استفاقت من غبار الليل
هل شاهت نجمااو سماءا من عصافير صديقة هل رايت الغيمة العزراء قادمة الى عرس السرابات العريقة
توما توزع قهوة حمراء فى الطرق التعيسة رغبة فى الصمت
وانت تغيب فى اوراقك المبتلية الحزينة لا دمعا ولا اسفا يعيد لك الحروف الشاردة
والقلب محبوك باورام الهوى اللزج
الغناء الفى يمينك صودرت كل الحفاوة فيه وارتفع النشاز
دوزن همومك بالقاحات الندى وامطر غناء من صمود من رزاز
يا توما والشارع ركب قلبى المحفر بالعساكر ابتديت انسى الشعارات القديمة
وانسحب من حر نشيدى الجاى ليك
حفيان نداى والمركب المهزومة لا الريح عافتها لا الموج سمع احساسى بيك
سابت هواى غرقان تعب والضفة ابعد من هموم الخوف عليك .
انشاء الله اكون كتبت كامل القصيد وماتكون الزاكرة خانتنا
لك شكرى ابو يسرا
شاكر حامد. السكرتير الثقافى لفرقة المسرح السودانى بالرياض
| |
|
|
|
|
|
|
| |
ابو يسرا
خالد العبيد
معتصم الطاهر
Elmosley
فيصل عباس
جمال ادريس
khatab
lana mahdi
منذر نقدالله
Saber Abdelhadi
احمد العربي
omar altom
فتحي البحيري
Shaker Hamid
Safia Mohamed
فيس بوك
تويتر
انستقرام
يوتيوب
بنتيريست