|
الكديسة ولا الفار يامنى خوجلى؟ مسابقة رمضانية بحوافز مغرية...
|
يالبراءة الكديسة يعنى مسترخية كدى والفار ينطط، الكديسة دى يامنى لو ماعاوزاه معاك فى البحر تقول لى كتحتينى
ويالشجاعة الفار مآخد راحتو للنهاية، والله لو قبلت عليهو الا توريهو النجوم عز الطهر { حصل شفتى النجوم عز الطهر؟}
اها يامنى والجماعة المتسابقين والمتسابقات قبال ما اجيكم لسؤال المسابقة كلموا الفار ده يوقف النطيط الكتير ده وحياة البنى بطنى وجعتنى خليها الكديسة دىياتوقف والا اجيب ليهم الجن المابعرفوه...
|
|
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: Muna Khugali)
|
الاخوات العزيزات اشراقة ومنى.. رمضان كريم وهاكن النص الفكاهي دا عن مصالحة القط مع الفار والذي كتبته قبل عامين.. بجيكن صادة..
نماذج من الحياة
القطط والفئران وتغير الامزجة..!!
تصالح القط والفأر وانتهت الحرب الباردة بينهما
حليمة محمد عبد الرحمن [email protected]
لبعض الناس مقدرة هائلة علي رسم البسمة علي شفاه الآخرين، مستغلين حوادث بسيطة، ليحلق بها خيالهم في جو من الفكاهة. جلست صديقتي التي تنتمي إلي هذه الفئة تحكي لي عن البون الشاسع بين زماننا ومعارفنا والزمن المعاصر حيث يعيش أبناؤنا.. قالت محدثتي: احتكم إلي أبنائي الصغار في ايهما يفضل القط اللحم أم الدجاج، ووصلوا إلي خلاصة مفادها غرام القط بالدجاج بدلاً عن اللحمة. قالت صديقتي لم املك نفسي من الضحك وتخيلت فعلا أن القط تعلق قلبها بفراخ الاسياح، أو الوطنية أو دواجن دو..وصارت تحدد طبيعة طبخ الدجاج حسب الحالة النفسية لها، أسوة بكلبة زميلك الدنقلاوي.. يوماً تطالبنا بفراخ باربي كيو ويوما فراخ محمرة أو فرايتز ويوماً مسلوق لزوم الريجيم وتحلية بعد الأكل مع نخاسة أسنان وصابون لوكس أو دوف لزوم غسل اليدين. ضحت وعلقت قائلة لها طيب ما كان تعملي ليها شوكة وسكين مادام كديستك إفرنجية كدا..
واصلت صديقتي في عقد المقارنة بين زماننا وزمان أبناؤنا.. تصوري يا حليمة الكديس دا زمان لما نفسو تخاوزو ويتطلع إلي نتشة من ربع كيلو اللحمة أيا كان تصنيفه المُراحي، ضان ولا بقري ولا معيزي، كنا نألب الحلة كلها ونساكك الكديس من حيطة لحيطة ومن ضهر بيت للتاني ويطلع واحدين فوق روسين بيوتهم استعداداً للفوز بالقبض علي القط حين المرور ببيتهم. يشكل كل أطفال الحي ماراثون جماعي، ولا يهدأ لنا بال حتى نقوم باسترداد ربع الكيلو أو الجزء المأخوذ منه ولعل ذلك ما طبع شخصيتنا بذلك الطابع المتمثل في عدم ترك حقنا مهما صغر.. وبعدين ربع الكيلو دا كان علي اقل تقدير بيشكل أساس وجبتين رئيستين في حياتنا لعائلة مكونة في المتوسط من ستة أو تمانية أشخاص، هذا إذا لم يتداخل مع وجبة اليوم التالي. وأضافت محدثتي.. أما استهلاك الدجاج فقد كان محسوباً احدي محاسن الغربة، حتى بدأ تبدي لنا سوء الإفراط في الاستهلاك فحمدنا الله علي قصر مدتنا الاستهلاكية له وان طفولتنا أساس البنا ء المتين كانت خالية منه.. بعدين، عارفة رأيي المسبق في الدجاج البلدي والكيفية التي يتغذى بها، وأنا شركات عربية ما عندي في منطقتي..
شرد بي خيالي إلي خالي محمد أو أُمْحُمَّد كما يحلو لنا مناداته. فقد امتلك هو الآخر حساً فكاهياً وقدراً من السخرية لا يستهان به. جلس في احدي المرات يحكي عن مشكلته المزدوجة مع قطه وفار مخزنه. قال خالي أمحمد: يعلم الله الزمن من شدة ما أتغير أكان فاضلو يمد ايده يرصعنا علي قفانا وينهرنا ويقول مالكم ما بتحسوا.
- كيف؟ كان تساؤلنا المدهوش.
- الشهر ألفات الفار تعبني خلاس. قدد الشوالات كلها في المخزن. هو كان بياكل ساكت البطن ما فيها وجعة. إلا الموجعني ِتِشِتِتو للعيش. مشيت عزلت لي كديساً أصهب سمح وماكن من ناس كِرَّة وجبتو ختيتو في المخزن. عليكم أمان الله آ أولاد أختي، الفار بقي بعد ما يأكل ويشبع ويشتت يجي يتضرع ويلعب في الصقرية يختم ويعقب الكديس أكان فاضلو يشَبِل من شنبو(أي ياخد شَبَّال) والكديس يفتح عين واحدة ويعاينو بيها التقول بدور يقولو خلاص امش قضيت غردك(غرضك).
- ويواصل الخال أُمْحُمَد في قصته: روحي حرقتني كل يوم نفس المشهد يتكرر قدامي وأنا خات عنقريبي أعاين فيهم مغيوز(مغتاظ) بدور الكديس دا انشا الله يمد كراعو دي يقبض الفار دا ولو مرة واحد من ضنبو كان يخوفو.. ماسوا أي شي. قلت في نفسي إمكن الكديس دا ما ضاق لحم الفار. مشيت جبت لي شرك وغزيت فيهو بصلتن ماكنة ورقدت في عنقريبي وقابلت خشم الباب عشان المشهد ما يفوتني وسويت روحي نايم.. عليك أمان الله جا الفار ووقع في الشرك والكديس فتح عين واحدة عاينلو بيها وغمَّدا تاني. كأنما المشهد ما بيستحق المعاينة. تبيت من عنقريبي حفيان. الكديس دا ما نصيح ولا شنو؟ فضول ساي يشوف بيهوالفار دا كيفنو ولا يتكرف ريحتو دي ما عندو؟. جبت عكازي المضبب وفرد ضربة طقيت الفار كتلتو. والكديس يعاين.. شلت الفار بدمو ينقط جبتو وجيت ماشي علي الكديس.. والكديس كلما يعاين لي يصر في وشو.. التقول بدور يقول لي هسع إت راجل كبير راسك عدمان السبيبة السودا، تطير وتقع من قبيل.. دا عمل تعملو؟. أتحاملت علي روحي وجبت الفار وجيت. رت(مقلداً صوت وقوع جثمان الفار علي الأرض) رميتو قدام الكديس. بس في اللحظة ديك فتح عيوني الاتنين وعاين للفار ورفع راسو عاين لي مسافة التقول بدور يعلق ويقول لي: غايتو انت زول عجيب خلاس.. خلاس شيلو اجدعو..ورجع تاني رقد.. المرة دي كما ما رقد ساكت غير اتجاه نومو للجهة التانية.. معلناً نهاية المشهد..!!
- اها عملت شنو؟
- شن سويت.. حسيت بالنار دي قامت في من راسي لكرعي. هو بدورني احللو ليهو (أي اذبحه علي الطريقة الإسلامية) ولا بدورني اجي شايلو ليهو في صينية مغتية خاتيها فوق طربيزة بعجلاتها تسوى سيييييت؟
- شلت الفار جدعتو في الكوشة ورَجَّعْت الكديس لاهلو وخليت باقي الفيران تنقز في المخزن لي يوم الليلة..!!
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: حليمة محمد عبد الرحمن)
|
يا حليمة الحكيمة دة كديس قلوبالايزيشن وملم بقوانيين امنيستي انترناشونال مش دااك الفي الحلة .. داك زمن ودة زمن والكدايس هسع عندها وزن سياسي واجتماعي وبتشارك في السياسة العامة للدول .. انتي ما شايفة الفار العاملة بطن كديسة مني خوجلي ترمبليين ...دة ما زمن الكدايس والفيران ....وبعدين اشراقة ما عارفة انو حق الحياة والنطيط الزمن دة ما للبني ادميين .. دة كان زمان ...
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: abubakr)
|
Quote: يا حليمة الحكيمة دة كديس قلوبالايزيشن وملم بقوانيين امنيستي انترناشونال مش دااك الفي الحلة .. داك زمن ودة زمن والكدايس هسع عندها وزن سياسي واجتماعي وبتشارك في السياسة العامة للدول .. انتي ما شايفة الفار العاملة بطن كديسة مني خوجلي ترمبليين ...دة ما زمن الكدايس والفيران ....وبعدين اشراقة ما عارفة انو حق الحياة والنطيط الزمن دة ما للبني ادميين .. دة كان زمان ... |
غايتو ملاسى حقو فى الجائزة يبدو انو راح لو ابوبكر شارك على النمط اعلاه
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: خضر حسين خليل)
|
انت ياخدر فى الكديسة التسك الفار ولا فى كديسة جيرانا الخربشتنى فى يدى
تصدقوا ياجماعة، غايتو منى بتكون حرشت لى كديستها دى رغم انى متعاطفة معاه أى مع الكديسة الليلة زى الساعة خمسة ونص وخلاص الجوع الرمضانى عمل عمايلة اخدت لى انبطاحة ياقول اهلنا وخليت الشباك مواراب {حسع مواراب دى بتشبة الانبطاحة لو ماحركات من ساكت} ماعلينا، الكديسة الطلعها من بيتهم شنو ماعارفه حاولت تدخل رأسها بفتحة الشباك ومالاقية طريقة تطلعو او تدخل لبيتنا حاولت اساعدها عشان تطلع لانو خوفى كلو تقوم تدخل بيتنا وابقى لى فى مسرحية طويلة عريضة مع مرافىء البتحب الكدايس والكلاب واذ بالكديسة تخربش يدى، شختتين يقولن تح حسع دى
أها يامنى بيقولوا والله يكفينا شر قالوا انو الكدايس دى مسكونة وكديستك دى بمسكنتها دى بتكون رسلت لى روح من ارواح وليداتها اللى اكلتهم..
دى بالمناسبة قصة حقيقة وبحكيها ليكم وانا تريانة ورويانه، يعنى لاجوع ولاعطش!
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: Ishraga Mustafa)
|
Quote: اول مرة اشوف لى برلومة فاتت السنايير بالاشكال البتلصقيها دى، بتعمليها كيف يادى |
يا اشراقة انتي بي جدك ولا بتبرلمي فيني؟ غايتو انا صدقت وحأجاوبك يمين مربع النص في حاجة اسمها smilies library اضغطيها بتفتح ليك نافذة على قول تمبس وزي ما قالت سهام المجمر فيها ستة وشوش عشرة منهم ما شغالات اضغطي ع الوش العاوزاه
وغايتو كان بتبرلمي فيني بس عافية ليك
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: Ishraga Mustafa)
|
يا دكتورة انا لقيت ليك تحليل تاني بس ان شاء الله ما يزعل الجماعة الكديس هو حكومة المؤتمر الوطني والفار زي الحركة الشعبية يلا السيناريو يبدا من انو الحكومة واللي هي الكديسة شالت الحركة الشعبية في بطنها بعد ما وقعت معاها اتفاقية السلام (نيفاشا) الفارة هااااااي قصدي الحركة الشعبية بقت تنطت في بطن الحكومة شوية تنط باسم قسمة الثروة والسلطة وبعد يومين تنطط بعوائد النفط اللي وصلتهم ناقصة او اخروها المرة دي ونطيط تالت في ملف ابيي وهي لسع في بطن الحكومة والنطيط الرابعة كانت زيادة واحد فاره للولايات المتحدة عشان يعمل تحالف مع بوش قصدي نمر من بره عشان يسكت علن نطيطه في الكديسة والمسكت الكديسه لغاية اسع شنو الله اعلم اصلوا الكديسة دي بطنها غويييييييطة وما معروفه حتودي الفار لغاية وين ولا يمكن قالوا نحن نخلي الفارة دي تنطط ليها يومين عشان بعد مدة ورقها يكون كله اتحرق وما عندها شئ تلعب عليه تحياااااااااااااااتي
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: abubakr)
|
Quote: اهه وصلتوا وين؟ انا ما بعلق علي اي زول علشام ما ألخبط المسابقه.. ولا بعلق علي كلام ابوبكر لما شاف الكلب المتمحن كديسه.. بس بقول ليكم..
رمضان كريم |
شوف يامنى بعد ده الجد جد والهزار هزار يازولة شوفى ليك طريقة ياتشيلى الكديسة دى ولا ترسلى الفار لهبة اصلها متضامنة معاه
يادمك ياخى...غايتو عندك يومين فرصة تشاوريهم وبعد داك لاعزر لمن انزر نمرى جاهز وكمان محمود*
* محمود والنمر فى قصة المطالعة زمن حفروا البحر دى معلومة للجيل الجديد وكدى!!
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: Ishraga Mustafa)
|
البني ده منوا يا إشراقة ؟؟؟ موضوع الرسالة ده إتفتح تاني ؟؟؟
ما كدة وبس وكمان أسماء جديدة
Quote: غريبة تصورى
لكى التحية استاذة اشارقة ورمضان كريم ... |
ما أسماء جديدةوبس حتى كمان أنواع جوائز جديدة
وإتفاقيات سلام جديدة
Quote: انت يارهف الكديسة الغياظة دى وفارها كانوا فى نبفاشا ولا شنو؟
|
ومسابقة لنج اللنج
Quote: خلاص ده كمان يا حلو ه عايز يدخل في المسلبقه...ممكن؟
|
وتحديث في العشانية بإدخالها زُمرة العلشامية
Quote: انا ما بعلق علي اي زول علشام ما ألخبط المسابقه.. |
عموماً يا إشراقة بطني وجعتني وكرهت الإنقاذ (ما عارف ليه!!!)
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: فيصل عثمان الحسن)
|
Quote: ممكن برضو سوء أفعال الكديسة ,وتاريخها المخزى فى ملاحقة الفئران هو الذى جعل ذلك الفأر الثائر ينتفض ويطالب بحقه ,ويلاحق تلك الكديسة التى بررت لها مخالبها القاسية ملاحقة حتى فئران الاحتياطى المركزى. |
فيصل عثمان جيتك تانى
عارف الكديسة عندك هنا زى كديسة ميادة مع اختلاف فى التحليل {حسع التحليل ده الدخلوا هنا شنو؟ اها عرفت دخلوا الاحتياطى المركزى} بينى وبينك الكديسة دى ساكتة على رأى والفأر لقى يدو واتفسح
لكن الكديسة دى ما اظنها بتخلى عرشها بالهين والفار ده حايتعرض للسك والافتراس { تراهن؟}
غايتو لحدى حسع مافى منافس ليك ختير زى ابوالريش وتماضر الخنساء
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: Sidgi Kaballo)
|
استاذنا صدقى سلام واحترام
كلامك ده نبهنى لحالة الكديسة دى، ماعارفة لية اتزكرت انتفاضة مارس ابريل العلاقة شنو بين استكانة الكديسة دى واستكانة شعبنا قبل الانتفاضة هل كان فعلا مستكين ام كانت دبلوماسية منو لمن قال لفار مايو اقيفى هنا...
اها الكديسة دى باين عليها كدى والعلم عند الله فى حالة تكتيك
غايتو تدى الفار طهرها دى شايفة انو ماحل لازم من المواجهة على طريقتنا السودانية مع الاستفادة من تجارب الشعوب.... اقصد الكدايس
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: Ahmed musa)
|
سلامات يا احمد موسى
غايتو الاخطاء المضحكة الطلعتها دى ذادت لى وجع بطنى ذيادة بس فى حكمة من ملاحظاتك دى...
مثلا حرف واحد يغير الكلمة ويغير مشاعرنا تجاهها مشاعر تتغير من حالات الغضب الى السكينة او العكس
بعدين ماقلت لينا الحكمة شنو من الصورة دى
* ماحاراجع كتابتى دى اصلو الجوع خلاص اتكمن ولسه قدامنا اربعة ساعات
سؤال جانبى: حسع ياربى الاجر بيكون واحد بين ناس بيصوموا 14 ساعة وتانين 10 ساعات؟
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: Hassan M Saeed)
|
Quote: يا دكتورة انا لقيت ليك تحليل تاني بس ان شاء الله ما يزعل الجماعة الكديس هو حكومة المؤتمر الوطني والفار زي الحركة الشعبية يلا السيناريو يبدا من انو الحكومة واللي هي الكديسة شالت الحركة الشعبية في بطنها بعد ما وقعت معاها اتفاقية السلام (نيفاشا) الفارة هااااااي قصدي الحركة الشعبية بقت تنطت في بطن الحكومة شوية تنط باسم قسمة الثروة والسلطة وبعد يومين تنطط بعوائد النفط اللي وصلتهم ناقصة او اخروها المرة دي ونطيط تالت في ملف ابيي وهي لسع في بطن الحكومة والنطيط الرابعة كانت زيادة واحد فاره للولايات المتحدة عشان يعمل تحالف مع بوش قصدي نمر من بره عشان يسكت علن نطيطه في الكديسة والمسكت الكديسه لغاية اسع شنو الله اعلم اصلوا الكديسة دي بطنها غويييييييطة وما معروفه حتودي الفار لغاية وين ولا يمكن قالوا نحن نخلي الفارة دي تنطط ليها يومين عشان بعد مدة ورقها يكون كله اتحرق وما عندها شئ تلعب عليه تحياااااااااااااااتي |
الكدايس، اقصد الكلام دخل الحوش ياميادة استنى قرايتى لقرايتك، بعدين بجىء لمن الفار يهدأ شوية
اىىىىىىىىىىىىىىىىىىىىىى يابطنى، قلت لى قسمة ثروة وبترول طيب ما انا عملتها ساكت فى الفار المسكين ده، انا الموجع بطنى، اقصد روحى حاجة تانية، بجيك برواقه ياميادة {البرلومة فى بوردينا}
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: Ishraga Mustafa)
|
أها ياميادة جيتك بروقة شوية
يبدو ان الموضوع الكدايسى والفيرانى حايجيب السياسة لجحورها من تحليلك الفوق نصل للآتى:
الكديسة هى الحيكومة الفأر هى الحركة الحكومة ساكتة والحركة بتنطط
يالله نبدأ:
تفتكرى الكديسة/الحكيومة دى ساكتة ساى ولا على رأى الفار/الحركة الشعبية بتنطط برضو فوق رأى الكديسة فتحت الدرب للنمر فالذنب ذنبها الفار كان نطط بينطط فى حقوقه
Quote: اصلوا الكديسة دي بطنها غويييييييطة وما معروفه حتودي الفار لغاية وين ولا يمكن قالوا نحن نخلي الفارة دي تنطط ليها يومين عشان بعد مدة ورقها يكون كله اتحرق وما عندها شئ تلعب عليه
|
الجزء الاول ده بتفق معاك فيه مئة المائة الفارة تحرق ورقها دى ما اظنو، كلما تتحرق ورقة بتولع غابة الهامنى فى الموضوع الغابات تولع الغطاء البناتى يتم كشطة الفار المسكين مابلقى ليهو جحر فى شجرة يدس نفسو فيها
قلتى لى:
Quote: Quote: يا دكتورة انا لقيت ليك تحليل تاني بس ان شاء الله ما يزعل الجماعة |
غايتو انا مابزعل لكن نوع الكلام ده بيقوم كدايس السياسة بتاعتى ودى كان قامت الا يحلكم الله منى دى لابتعرف استكانة لا بتهدأ، دى عفريتة عديل وبتخوف النمر ذاتو...أها بمناسبة النمر محمود عمل شنو؟*
* محمود والنمر دى قصة فى المطالعة ادونا ليها زمان قبال مايغنوا سنتر الخرطوم وتلعب الفيران فى عفراء
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: Ishraga Mustafa)
|
شوشو .. كيفك .. هسي فطرت وهسي ختيت كباية القهوة ..
انا عندي غرام مع الفيران عارفة كيف .. جني وجن اشوف لي فار حايم انشاء الله في اي مكان كان .. والا احلف باني لازم اكتلوا .. شفتي !!
انا جادة ولما يجي الفار في بيتنا اليوم داك بكون يوم عيدي .. لاني بصارع صراع غريب حتى انال مرادي الا وهو قتل الفار !!
في يوم من الايم جاءنا فار وقلت لابوي تعال ساعدني نكتل الفار دا قام الفار دخل في سبورة عملناها للعيال في البيت (اولاد اختي) السبورة مجوفة الفأر عمل فيها حريف ودخل وراء السبورة .. قلت لابوي انت ارفع السبورة وانا جاهزة بالعصاية ..
قام ابوي رفع السبورة من على الحيطة والفار جاء ناطي وناوته ليه واحد عصاية لما فهم حاجة ومات !!
شفتي دي قصتي مع الفار
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: Ishraga Mustafa)
|
حاضر شروقتي..
الوشوش عايزاهم شينين بيخوفوا؟ فعلا أحسن ليك بيرعبوا..احنا ماشيين علي موسم الرعب "الهلاوين"
وبعدين انتي ما وريتينا الجوائز شنو...بس قلتي مغريه.. مغريه كيف يعني؟ مش امكن المغري لسعيده مختلف من المغري لسعيد؟ ولا شنو؟ وبعدين قفل باب المسابقه ده متين؟
ارجو الأفاده وبسرعه.. وده من باب انه الفار البينطط ده أمكن اكون انا.. وبرضه احتمال الكديسه تكون أنا.. والوضعين أنا تعبت منهم.. وخلاص منتظراك!
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: انعام حيمورة)
|
Quote: حاضر شروقتي..
الوشوش عايزاهم شينين بيخوفوا؟ فعلا أحسن ليك بيرعبوا..احنا ماشيين علي موسم الرعب "الهلاوين"
وبعدين انتي ما وريتينا الجوائز شنو...بس قلتي مغريه.. مغريه كيف يعني؟ مش امكن المغري لسعيده مختلف من المغري لسعيد؟ ولا شنو؟ وبعدين قفل باب المسابقه ده متين؟
ارجو الأفاده وبسرعه.. وده من باب انه الفار البينطط ده أمكن اكون انا.. وبرضه احتمال الكديسه تكون أنا.. والوضعين أنا تعبت منهم.. وخلاص منتظراك! |
وبناء عليه تقرر اللآتى/
بكرة زى الوقت ده، يعنى بمواعيد رمضان الكريم سيتم الاعلان عن النتيجة فترجو اللجنة الموقرة من الذين واللآتى يرغبن فى المشاركة الاسراع بتسديد قيمة الفواتير
تخريمة لانعام: قلتى لى بتخافى من الجرادة، بالغتتتتتتتتتتتتتى ياختى الجرادة دى لذيذة ومسكينة الواجعنى فى الموضوع انو فى بعض القبائل فى السودان بتاكل الجراد، يعنى جمالها للناظرين ده كلو ماحوطها من الاكل ماقلت ليك الجراده لذيذة، غايتو يانعام جراد فيينا عامل زى قوز قزح بجيب ليك منو دستة بس ماتاكليها
| |
|
|
|
|
|
|
Re: الكديسة ولا الفار يامنى خوجلى؟ مسابقة رمضانية بحوافز مغرية... (Re: Ishraga Mustafa)
|
Quote: واللآتى يرغبن فى المشاركة الاسراع بتسديد قيمة الفواتير |
هوي مشاركتنا دي كلها وتقولي سددوا فواتير ؟؟؟!! فواتير شنو ؟؟ خلي حركات الجماعة الهاررنا بالعربات الايام دي .. سجلوا .. سجلوا ..
كمان انتي هسي سددوا !! القصة شنو ؟؟
بالله عايزين الفائز/ة والعيد على الابواب ومافي ابرايل دا رمضان .. كل سنة اونتي طيبة
Quote: تخريمة لانعام: قلتى لى بتخافى من الجرادة، بالغتتتتتتتتتتتتتى ياختى الجرادة دى لذيذة ومسكينة الواجعنى فى الموضوع انو فى بعض القبائل فى السودان بتاكل الجراد، يعنى جمالها للناظرين ده كلو ماحوطها من الاكل ماقلت ليك الجراده لذيذة، غايتو يانعام جراد فيينا عامل زى قوز قزح بجيب ليك منو دستة بس ماتاكليها |
كلامك دا ساااااي خوفي !!
حبي
| |
|
|
|
|
|
|
|