|
|
|
 Re: بنات من ورق ... واشياء اخرى (Re: يوسف الولى)
|
هوى يا الحبيب
احسن عويناتك تحن
وامسح غبار الجامعات الغبرن
عبرات هواى لو سدسدن حلقك دحين
لى زول سواى ما تنحنحن
وانا اصلى عارفك ما بتحن
ليه العوينات البريدنك تخونن وتجرحن
ليه بالدموع والنوح مع الناس تفضحن
وانا ديما بسال ربى الطالبات يسمحن
الطالبات يسمحن ويفرحن
وبالخير تملى يصبحن
بس لو ظهر كاشف رقم لا يصافحن ولا ينجحن
هو شنو الفضل فى الدنيا عشان الناس تزاكر وتمتحن
بس نبره من عيشه الفقر
وسمح السكات الفى خشم سيدو
وكمان سمح الصبر
ما دام فى مدرسه مدرسه
واساتذه خصيصين نجاح
وحصص صباح ودروس عصر
حنسوى ايه
حندق جرس اخر فصل او ننفصل نتلم ونشوف باقى العمر
ما واضحه زى عين الشمس
واضحه كان هسى او امس
واصلى مارق يا ضنا
من غنوتى الانا مدمنا
من بلوتى وسلواى انا
من قصه لا بتاكلنا عيش
لا تفرد جبين هذا العنا
من شده فارده الارتخا
ومتمكنه من ممكنه وما ممكنه
و
لسه فى باقى
| |
 
|
|
|
|
|
|
|
|
Re: بنات من ورق ... واشياء اخرى (Re: يوسف الولى)
|
الكـــبر خشه يا الولى ياحليك انتا!!!
بتزكرنى بى بوستك ده هتافات الحبيب لمحبوبته
فى ناصيه فى حى قريش ..وهو يشتاق اليها
ولايعرف كيف الوصل اليها..ولو قال كدا وخش الحله
الجماعه ناس ابن قرفان...وعبدالله بن ضكران بطقطقوهوا!!
فابت نفسه ان يرجع خائبا فقال: العوينات البريدنك تخونن وتجرحن
ليه بالدموع والنوح مع الناس تفضحن
وانا ديما بسال ربى الطالبات يسمحن!
ياسلام ياخى على زمن الشعر السمح والكلمات
الدقاق.
ــــــــــــــــــــــــــــــــــ
اها الكوره كم نا تقول لى تعادل!!
دايرين نفرح بالقون
| |
|
|
|
|
|
|
|
|
|
Re: بنات من ورق ... واشياء اخرى (Re: يوسف الولى)
|
Quote: بس لو ظهر كاشف رقم لا يصافحن ولا ينجحن
هو شنو الفضل فى الدنيا عشان الناس تزاكر وتمتحن |
بس صحبك ده هان بالغ عديل الظاهر عليهو متاثر بناس انصار
السنة...لى الحقد ده...اصافحهن وجكسن
واطلب الرقم منهن واقبلن ..
وفى الشارع امسكن من يدهن ومايطلقن...
وحبهم لمن جضمون اوجعن
وفى الحفله ارقصن...
ـــــــــــــــــــــــــــــــ
**
بوب ...من قصيدة الحب الطاهر...الشعر الجاهلى
ص258 لسنة10 هجريه
| |
|
|
|
|
|
|
|
|
|
Re: بنات من ورق ... واشياء اخرى (Re: يوسف الولى)
|
بوب ازيك يا لزيز
سمعته القال
انت السماء بدت لنا واستعصمت بالبعد عنا
المباره لسه درون ومافى اى هدف
وكم مره جات فى العراضه ... لكن زى ما فاز الهلال حيفوز النعام ان شاء الله
بس دعواتك... وخليك قريب من التلفون فى الويكاند عشان نبشرك
طبعا لقيتك شاعر بى حاجات كتيره ..
وحيات ابتسامتك انته اشعر من شعر فى العصر الحديث
دا كلو كنته داسيهو وين
يا ريت نسمعو منك فى ثوره ( اكتوبر )
وطبعا بعد اكتوبر اى مباره ليكم حتبقى صعبه
لانو لاعبكم الحريف والسعيد ساب الكاشف وخلا الدفاع كاشف
غايتو الا تلحقو موسم التسجيلات الجاى
وشايف السوق اتملات لعيبه جداد وحراف ولعابين
عارف كاشف الرقم دا بقى موضه قديمه زى ما قالو
هسى بقا فى الثريا والهزاز وما خفى اعظم
وربك يستر
| |
|
|
|
|
|
|
|
|
|
Re: بنات من ورق ... واشياء اخرى (Re: يوسف الولى)
|
وايه لزوم يعنى القصيد
وكتين تموت العاطفه
وكتين نعتم الفكرتو
وحروفو زاتا نلونا
وكتين نغطغط مهجتو
وندوس عيونو وندفنا
ايه لزوم يعنى الشعر
الماعرف معناهو لا شيتا معناهو
ابقى مارق يا جنا
لو من هناك او من هناك
كان مننا او منهم
من مزامير التوجس والغنا
من صباحات الهواجس
ومن طوابير المدارس
ومن مروق الروح
وامرق من متاهات النفس
ما واضحه زى عين الشمس
واضحه فى كل الجرايد
والقصايد
والمعابد
والمصانع
والشوارع
لما دون نشعر نحس
لما دون خاطر يمر
واضحه انو سكاتو مقدود من دبر
وكلامو مقدود من دبر
وضميرو مقدود من دبر
وقميصو مقدود من دبر
و
الباقى جاى فى الدرب
| |
|
|
|
|
|
|
|
|
|
Re: بنات من ورق ... واشياء اخرى (Re: يوسف الولى)
|
لتكتمل الروعه
النص ..
هوي يا الحبيب
أحسَن عيونك فتحن
ونفض غبار الجامعات الكــتحِن
عبرات هـواي لو سـْدسـْدن حــلقك
تحِــن لي زول ســواي ما تنحنحن
وأنا أصـلي عارفك ما بتحِــن
ليه العـوينــات البريِـدنك
تخــونن وتجــرحن
ليه بالدمــوع والنـوح
مع الناس تفضـــحن
وأنا ديمــه بسأل ربي
إنو الطالبات يســـمحن
الطالبات
يسمحن ويفرحن
وبالخير تملي يصبحن
ولو في مشيهن لكلكة
يصلحن
بس لو ظهر كاشف رقم
لا يصافحن
لا ينجحن
هو شنو الفضل في الدنيا
شان الناس تذاكر وتمتحن
بس نبرى من عيشة الفقر
وسمح السُــكات
الفي خــشم سِــيده
وكمان ســمح الصبر
مادام في مدرسة مدرسة
وأساتذة خصيصين نجاح
وحصص صباح ودرس عصر
حنســـوي أيــه
حــندق جرس آخــر فصل
أو ننفصل نتلم نشوف باقي العمر
ماواضحة زي عين الشمس
واضحة كان هسه وأمس
وأصلي مارق ياضنا
من غنوتي الأنا مدمنة
من بلوتي وسلواي أنا
من قصة لا بتكلنا عيش
لا تفر جـــبين هذا العنا
من شدة فاردة الإرتخا
ومتمكنة
من ممكنة وما ممكنة
وإيه لزوم يعني القصيد
وكتين تموت العاطفة
وكتين نعـــتم فكرتو
وحــروفو ذاتا نلونا
وكتين نغـــتغـت مهجتو
وندس عيونو وندفنا
ايه لزوم يعني الشعر
الماعرف معانهو
ولا شيتا عنا
أبقى مارق ياجنى
كان من هناك
أو من هنا
كان منهم
أو مننا
من مزامير التوجس والغناء
من صباحات الهواجس
ومن طوابير المدارس
ومن مروق الروح
وأمرق من متاهات النفس
ماواضحة زي عين الشمس
واضحة في كل الجرايد
والقصايد والمعابد
والمصانع والشوارع
لما دون نشعر نحس
ولما دون خاطر يمر
واضحة إنو سكاتو مقدود من دبر
وكلامو مقدود من دبر
وضميرو مقدود من دبر
وقميصو مقدود من دبر
لكن منو البشهد عليك
يابت مادام كلك عذر
يابت مدام عرفوك جد
بتخافي من ضل الضحى
ومن بشرة الناس السمر
ويؤسفنا جدا إننا
يؤسفنا أسود مننا
ومحنية ضهرو من الكبر
وعرفوك جد بتخافي من ضل الضحى
ومن ضحكة الناس السمر
عرفوك
بس هم ماأظن فهمو العيون السمحة فيك كانت شتر
ويسلم ضراع الطين
يسلم ضراع الطين
وقدح المونة
جيت أمونة
حر ا########## وادة صحونها
للولد البشيل طوريتو
سباق الفجر
وتضيع سنين العمر ليه في المدرسة
المدرسة المابتجبر الخاطر إذن
المدرسة المابتستر الحال بكرة
مابتملالنا فد شوال تمر
ياخ ايه لزوم يعني الدفاتر والمحابر
والشنط والأردية
والدق ودرس اليوم
وحلق الراس وقليم الضفر
ايييييييه
يا سنين المدرسة
فدتينا إيه يامدرسة
دي الجامعة لسع فيها ناس بتحب بعض
وتلبس بعض
وتاكل بعض
وتقوم بعض
وتقعد بعض
وت........
منو العوض وليهو العوض
وفي ناس كمان
تجمع ورق فاضي وتمر
تنجح فشل
تسرق حصاد غيرها وتمر
وكتيييييييير في ناس بتفط سطر
ياشعبي أصحى كفاك شقى
وكفاك خطاك علىي الجمر
لمتين حنحلم بالغناء
لمتين نعدي من الضياع
والفرقة والحرقة ونمر
وسمح السكات الفي خشم سيده
وكمان
سمح الصبر
والدنيامازالت بخير
والدنيا مازال فقر
وأنا زي دراويش العشق
ماسقت خطوات الرحيل
لكن مشيتا وبالجبر
لكن مشيتا وفوق جمر
وحبيبتي قالت لي تعال
تعال
ومرقت من جلدي القديم
ودرعت توب الصبينة
ومشيتلها وأنا منتهي
سنتين
ولا قعدت عيوني مع عيونا اتونست
لا في الخيال لاقيتا
لالاقتني هي
سنتين ولا بنبدالنا سكة
ولا خطانا بتنتهي
سنتين ورغم الابتعاد
والعشنا من خوف وارتعاد
لسعسعاد
هي بتستحي
وأنا بشتهي
وأنا بستحي
وهي بتشتهي
ومابين نعم واللقيا كان حرفين نهي
وأنا خاطري من كتر الهموم
الساعة خمسة نسى وسهي
وفي الهم غرق
وبالشوق حرق
وحبيبتي قالت لي تعال
خافت
وكت قتليها شيخ
مسكينة
ماعارفة الفرق بين الدراويش والشيوخ
بين الصفيقات والعِرق
بين الغرق والماغرق
تاريها زينا يا خلق
طينة
ومطينة بالعشق
ومقتولة لي حد السكات
ومتيمة
بس كنت ديمه بعلما
انو الحزن زاد الفرح
والفرحة نفسها مؤلمة
والعافية أسمح منها
لوحتى كانت بلسما
والشمس في توب من حلال
والقمرة أكبر مجرمة
وكضابة مابْتَحَلِبْ لبن
القمرة
مابْتَحَلِبْ لبن
ومليانة زيف ومهَضْلِمة
وممسوخة
مهما اتبرجت
مازي مصابيح السما
والقدرة مابتنفات شبر
القدرة
مابتنفات شبر
والسترة ميها الكمكمة
والناس سواسية كالمِشِط
والحرة
دينا ملجما
والحلوة مي حلوة طعم
والمرة ربنا قاسما
والقسمة ما بالإيد كمان
الإيد هي زاتا مقسمة
أصبع صغير
وأصبع كبير
وأصبع وسط
وأصبع نضم
وأصبع بدخل خاتما
وتفرق بداية الشوق
كتير
وكتين تصل للخاتمة
ماالريدة بتشوف بي تحت
والحب موشح بالعمى
ومابفهم النور
إلا زول عاش في دياجر مظلمة
النجمة مابتعني الوضوح
العتمة ميها الهضلمة
الوشمة مانزف الجروح
والبسمة عز البفهما
ماالنسمة في الصيف لو تفوح
تَحَرِق حشا البتنسما
والوجعة بااااااااردة
علي الببوح
وتسل رويحة البكتما
والروح بتمرق مابتموت
الروح بتمرق مابتموت
والجتة بتقيم مأتما
ونحن انعكاسات للنجوم
والواطا ضل راميا السما
وأنا ما رميت إذا رميت
وأي عاشق مارمى
وضحك المشيب برأسه فبكى
ونادى سلما
وسمت بغاة الطير حين كبا حزينا مرغما
ووريتا معنى القارعة
وعقروا
وربك دمدمَ
حفظتها الناس
والفلق
والحمدُ
والإخلاص
وطه
ولم يكن
والعاديات
وكأنما ماكان في شي
وبعد ده كلو بتنتشي
ولابتستحي ولابتختشي
وقرمت كرعيا بالمشي
وكلمتها
قت ليها أوعي تدقشي
الطيبة مافي كل شي
ومابتهبشي
الجوه خليو جوه فيك
والمايخش ماتخششي
ودمع الظنون البيني بينك قشقشي
ماتدقشي
الطيبة مافي كل شي
وماتهبشي
الجوه خليو جوه فيك
والمابخش ماتخششي
ودمع الظنون البيني بينك قشقشي
والشوق علي باب البريدك وشوشي
ونار النضال جمب الشمش
ماتمشي بي راحتك عليها روحي هوي
بتشمشي
وكان جاك خريف الوجعة
سويلك بيوت في داخلي أبني وعشعشي
وأديني إحساس
إني شي
وقرمت كرعيا بالمشي
وكلمتها
خلي بالك يابنية
العمارات البناطحن
والمعاني القرمزية
أوع تسرق من ملامحك
أو تغير فيك شوية
ماني شايل هم قرايتك
انتي قراية وذكية
أبقي جد ياحلوة فاهمة
وأبقي واعية
وكوني حية
أصلو في الجامعة العريضة
وفي بيوت الداخلية
في الحبايب وفي القرايب
وفي البقاسموك الأسية
إلا برضو خلي بالك
هي المصايب مي شوية
العقارب والكهارب
والدبايب والمصايب
وألف سوسة وألف حية
وانت سمحة
انت قمحة
ولسة نَية
ولو دقستي
أسأليني أنا الدقست
وأكلوني السمسمية
في زمنا
بدفنوك يازولة حية
أبقي واظبي علي صلاتك
قومي كل مانادى حي
وخلي بالك في الشوارع
والمسافات القصية
وفي مشاوير العصاري
وانت ساعة المغربية
وفي الحدايق والكباري
والملاهي الأجنبية
والوليدات الأخير لك من تصاحبيهم بنية
والبنيات البزلطن وش
والبتعمل فيها شيخة
أو تقول بتشوفلا طية
وفي القراية سجم رمادن
أبقي مارقة وناغمي ليا
مرة تلقى الضمة شدة
ومرة تلقى الشدة مدة
وعادي تلقى الخمسة مية
وأسمع أسمع
وياما تسمع في البغنن
الله ليا
وكر عليا
وجيبوا ليا
و...
ونحن ياحليلنا الغلابة
بلعبنبنا كوعلية
ودايرة بيرقرودايرة شية
ودايرة طرحة
وتيكو ملحة
ودايرة just
وميج ومسحة
وخصلة تايهة
وشنطة بطة
وعمو أسرع
انقبضت
وزولي نط
ودي المحطة
وهنا لقطة
وهنا ..!
وهييي ياانت وتاني هييي
وهيي وهيي
عندكم كلب ولا أجي بالدرب
أطفر ولابتدفر
الماف شنو
أبوك لاراضي لاراضي
كيسك فاضي ولانمشي القاضي
أشخت شخيت و ....
وفي النهاية القصة فك
في النهاية
القصة فكََ
دي الحضارة الدينا فكََ
ولاحقة حبوبة أمي مكة
وعاملة فيها رشيقة حية
ومهما نصرخ هي هي
وفي البتنسى أبوها يقدح
في ضنى أيامو الشقية
شان هي تقرا وبكرة تنجح
وتحيا مستورة ورضية
وهن حليل أماتن يبكن
بي وراهن
ووب وحي
إلا هن سجم المحنة
حليل زمنكن ياالرضية
لافؤادن مرة حن
لاطرن بالمرة جية
الشفايف مي شفايف
والشعر سوََنْلو كيه
وبدن الاسكيرت شرطة
وتاني فوق الركبة طية
وبمرقن ...
أحسن أسكت
أحسن أسكت
وشدي حيلك يابنية
شدي حيلك يابنية
| |
|
|
|
|
|
|
| |
يوسف الولى
bob
ismeil abbas
هاشم أحمد خلف الله
وصال عالم
فيس بوك
تويتر
انستقرام
يوتيوب
بنتيريست