|
|
 إهداء للأستاذ/ عبد الله بولا - غزليات ود الفراش شاعر بربر
|
العم الأستاذ بولا
كل التحايا
نعلكم طيبين وشديدين ،،
لاحظت في كتابتك هنا ايرادك لبعض شعر ود الفراش
بشوف بربر وبشوف جوخا وحريرا
وبشوف الميضنة الجنب الجزيرة
وبشوف ركب العبابدة البي خبيرا
بشوف تربيزا فيها تمانية بيره ..
نرجو الأ يطالب البعض هنا بحذف هذا البوست نسبة لذكر البيرة ،،
واليك جزءٍَِِِ من السيرة وشيئا من الشعر
ابراهيم الفراش
هو ابراهيم بن محمد بن ابراهيم
ولد ببربر عام 1847م وتوفي 1883م
ينتهي نسبه برجل من الأولياء يقال له عبد السلام الباز والذي بدوره
ينتهي الي السيد احمد الرفاعي
امه هي المحبوبة بنت محمد فضل
كان شاعر بربر جميلا جمال الرجولة ، حتي قيل أنه اذا مر بالطريق
تنظر النساء اليه من ثقوب الأبواب ،، كان ابيض اللون فارع القامة
بادن الجسم ،، قوي العضلات
المصدر(ديوان الفراش- شاعر بربر)
لنا عودة لأكمال السيرة والتي يتضح جزء كبيرا منها من خلال شعره
ومن هنا ننم ونركب معه فوق جمله الحار حار
او البار قدم وهو يترنم بمحبوبه (الدون لحق)
ماها السمينة
عَنَاق التوتــــــــــو الخضّر عِسيـــــنَ
تفرد الديس علي الروبة الدهينــــــة
بتسند تقول ماسكاها طيــــــــــــــنة
ماها ام تموكة
عناق التيتل الخضّر تبوكهَ
تفرد الديس علي الروبة الدهوكة
بتسند تقول طاعناها شوكة
ماها ام كراشة
عناق ام السومر الخضر رشاشة
شبيهة الدون جديةً ضاربَ قاشه
لهيج الدون بيروي اتنين عطاشه
ماها ام جفاينْ
تقول ال بالحدب وغل بِعاينْ
شبيهة الدون جديةً بالعساينْ
خدود الدون متل عنب الجناينْ
ماها التَليفــة
كل صبحاً جديد ترجاك نضِيفة
يضوي شليخَ يلمع زي شريفا
فريع رمان جنينة ود خليفة
|
|
 
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
حاضر يا ود الناظر
اليك المزيد الي حين عودة العم بولا عشان يشرح
للجميع هنا كلام ناس بربر
صايـــــــــدني حـــــــــــــــــرا
من الفــوم من الزرقي المقرنْ
طريت ال بالمزاح دماعَ فرنْ
تقول طافات عَرد اوراكـا صرنْ
صايـــــــــدني غُــــلــــكْ
متل فص العقيــق منظومة كُلكْ
متين يا ديـــفة الراتعات اظُـلـكْ
متل تبــر الغديــر الكابي ضُلــك
صايـــــــــدني همــكْ
متل نار العويــش حارقني سِمك
متين يا ديـــفة الراتعات المــِك
واجدّع فوق جرايد ايــدي كُمك
اعرب ما تحته خط
| |
|
|
|
|
|
|
|
|
 Re: إهداء للأستاذ/ عبد الله بولا - غزليات ود الفراش شاعر بربر (Re: nazar hussien)
|
سلام...
قصائد ود الفراش مازال والدى يرددها فى أوقات الروقه وبحفظ جيد لم يرهققه تقدم السن
والدى من مواليد الشرام(الأورطه)أعتقد من نفس المكان ال>ى ولد فيه ود الفراش
مع غزليات ود الفراش ودونه لود الفراش قصائد فى الفروسيه سمعت أحداها من والدى ولا أستحضرها الأن وأتمنى أن تنزل فى ه>ا البوست لو تكرمت
أنا القطر أب كهارب
و انا الفى الحوبه
مانى هارب
مو..كدى
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
العزيز أحمد حنين
كيفك والاسرة
صايـــــــــدني همــكْ
متل نار العويــش حارقني سِمك
متين يا ديـــفة الراتعات المــِك
واجدّع فوق جرايد ايــدي كُمك
هذه هي مفردات القاموس الأساس للدارجية السودانية
انتشرت من (أدب المدائح) ثم الحقيبة
لكنها تحوي العصي أيضــاً
كلنا بذات الحاجة لسبر أغوارها
كانت أشواق ود الفراش
عارمـــة
شكرا للامتاع
تحياتي
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
عزيزي، ود اخوي، احمدحنين،
أحر تحياتي وأخلص مودتي،
ياسيد عمَّك ماني لاقي لي كَلِمتةً أشكرك بيها، الله لاجاب يوم شكرك.
هذه هدية عظيمة جداً، إن شالله اقدر اشيلا مع المجابدة العينك تشوفا دي في كذا بوست.
ود الفراش حته واحده؟!!
لكين اصبر علي شويه نامن اكمِّل الفي إيدي، واجيك.
وسوف أكتفي مؤقتاً بالإشارة إلى أن الديوان على الرغم من المجهود الجبار الذي بذله مؤلفه، فيه بعض المشلات في موضوع كتابة عامية ذلك الزمان. وإن كان جهد المؤلف في ضبط كتابة أصواتها ومخارجها مستحقٌ للتقدير الكبير، ومذهبه في تدوينها(الصعب أصلاً) على قدر كبير من السداد. سأحاول بقدر ماعندي المساهمة فيما يبدو لي أن الصواب "فيه" خلاف تقدير المؤلف.
مع جزيل شكري لك على هذا الفضل.
بـــــولا
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: عبد الله بولا)
|
قال شيخنا عبد الله بولا:
| Quote: وسوف أكتفي مؤقتاً بالإشارة إلى أن الديوان على الرغم من المجهود الجبار الذي بذله مؤلفه، فيه بعض المشكلات في موضوع كتابة عامية ذلك الزمان |
وأنا اتفق تماماًَ مع الشيخ عبد الله بولا. مشكلات لا حصر لها.
الحمد لله الذي أنقذني بعبد الله بولا لأنني أحجمت عن الدخول في هذا البوست المغري لأمثالي، لا لشيء إلا لأن لي موقفاً سابقاً، وحالياً، من الأخ أحمد حنين.
فعلاً يا شيخي (أو إمامي الغائب) عبد الله بولا .. فقد فطنت منذ البدء لاستعانة أحمد حنين بكتابٍ مطبوع، وبئس ما طُبع. لمحت ذلك في بعض الأخطاء الواردة في كل ما كتب من شعر ود الفراش عاليه، أخطاء لا تخفى على أمثالي من أبناء "التلوب الـنايِـبــُــنْ لالوب". ولا جحودَ لما بَذَلَ الجامِعُ من مجهودٍ جبار.
الأخ أحمد .. ما عندك اي مشكلة .. بس نزّل لينا الكلام الجمعو الأفندي بتاعك ده .. وأنا حاصلّحو بطريقتي.
عاد المرقة برا شكر كعبة. بشكر أحمد حنين وبتمنى انه يواصل في الكلام السمح ده (مع انه لا يتماشى مع السودان الجديد!!! كدي كدي) .. وبشكر عبد الله ود عمّنا بولا الذي "نجدْني" من المغازلة عن بُعْد .. وبالمرة كدي بسلّم علي قريبي نزار ود حسين؛ نزار ود دار جَعَلْ دَعَتْ الرَّضيمة الــوّحَّ.
والعفو يا ود حنين .. لكن والله ما بريدك .. الله يعلم .. بس البوست بتاعك ده بقى لي زي الطُعْمَة.
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
اخونا الشايقي
سلامات
والله مشتاقين
الجميع بخير ،، لك الشكر ونطمع في مشاركتك هنا
العم الأستاذ بولا
دخولك هنا يكفي بدلا عن كل الكلمات
لا عليك يا استاذ ،، بقدر ما زمنك يسمح نحن في لنتظارك
واعتبر هذة فرصة لكي ننقح ديوان الفراش مع الشكر لمن جمعه
اخونا شانتير
لا عليك يا صديقي
لا احمل نحوك شئيا في داخلي ،، سوي صحابة صيف
وعدت ،، وسوف يعدي الكثير من امثالها
دحين خلينا نقعد مع ود الفراش دا واطة ،، ونجر النم
بعدين لا تنسي ،، السودان جديد لا يتعارض مع الأبداع
علي العموم مرحب بيك هنا وبمشاركاتك القيمة
مع التحية
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
نواصل
خمسة شهور تمام والهلَ طوبة
روحي مشحتفة وياربي توبـــــة
عبلوجة التري القلبت هبوبَ
ردودة روحي انا اللافحا توبه
خمسه شهور تمام والهلَ سايقْ
روحي مشحتفة وانا ماني فايقْ
لهيج المشرق العند الشوايقْ
ردودة روحي انا وكِت ابقي ضايقْ
خمسه شهور تمام قاعد اعاين
يبقن فيّ نيران الغباين
لهيج الفي المحس جلب الزباين
ردودة روحي يا عنب الجناين
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
التحية لكم جميعا
اخونا خضر
شكرا من هنا لي عندك
عرفنا انك الأيام في دولة الإستكبار
وبرضك بتقول دوبيت
تماضر يارائعة
التحية
سوف احاول ارسل ليك شريط مسجل مع الترجمة
نواصل يا ابحجل
الدون حبابه الدون حبابه
ام شعراً متل وتر الربابة
يا فراش ابوي كان شُف جِعابا
تجرد المال تخلي الحوش خرابه
ود الأريل البرعي الهباطة
غرب هندوب صعيد القبلة شات
إن وزنوا جمال ريرة وبناتَ
تفوق الدون تزيد الطاق تلاتة
ود الأريل الضارب تبوكُه
مغزز في الضلع دايما سلوكُه
غالبني الصبر مُرا بلوكًه
حليل دهب الخواجة الفي بنوكُه
ود الأريل الضارب له باجة
مرعاه الخريف ما شاف عجاجة
كملت المعاي ما عندي حاجة
دحين سافرتَ قفل يا خواجــة
ود الأريل الضارب سِحاه
شم الزيفة امه مدرجاه
حليل من الوسِيط ضامر حشاه
خزاز يا نوم علي الفي جيل براه
ود الأريل الضارب رتومهُ
يتبادن علي كل يوم هيومهُ
يا اسماعيل اخوي ما ضق شيومهُ
جلوسة الهجعة بعد الناس ينومو
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
وَدْ الأرْيَل الضارِب سِحاه
شَمّ الزيفة أُمّو مْدَرِّجاه
حليل الــ مِن وسِط ضامِر حشاه
خزاز يا نوم .. على الـ في الجيل براه
يا سلام يا سلام يا سلام. ود اللريل الضارب سِـحاهُ .. شم الزيفة أمّو مدرجاه. السِـحا ده بالذات يا أحمد حنين بيخليني أشكرك كتير خالس خالس؛ بس عصاة نايمة وعصاة قايمة.
كلام؛ يرد الروح بعد ميعاد خروجا. الله يرحمك يا ود الفراش ويرضى عنك.
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: Shinteer)
|
من الهودي قام بي مكندي
وكت جبد الرسم جاب راسو عندي
قال لي يا سيدي انعدل الوريك ذندي
وعقب نحضر مشاط بت الافندي
وهذا من شعر الفراش ولكن ببحر مختلف و (تيمبو سريع) .. كنت قد حاولت عمي بولا كثيرا ان يكتب لنا عن نساء بربر او شاعرات بربر وهو العالم ببواطن و دروب و حواري الفن هناك
صدقوني في تلك البقعه من العالم رايت بام عيني الفنون و الفراسه ( الفراسه من فارس و شجاع)
تجول و تصول
و كانت بت الافندي اقصي مطامح اولي الامر منا حينها فالاسكيل العالي و (هذا تعبير شائع هناك)
من الرتب الماها هينه واهلها ماهم هينيين
فرع المحلب الشايل عمارو و خوخو
و مدخن ضحا والفرخه شايله لخوخو
كاوشتو وبكا و ذرف الدمع بي شلوخو
شفت الوز رطن وقع البحر بي فروخو
اتمني ان يكتب دكتور بولا هنا ما تيسر وانا اعلم ماتيسر دي من بولا ماهاشويه
وسلام
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
يا سلام عليك يا خضر يارائع
تعرف وصف الجمل والمسدار عند الفراش
كتير جدا ،، وعنده مسدار من بربر الي سواكن
للوصف والسفر بجيك تاني
اخونا شانتير
ود الأريل ،، حقيقة يعجب بهذا الوصف الرائع
واليك المزيد
ود الأريل الضارب وهايده
شاغل فكري دائما قلبي رايدهُ
وكتَ الفوم يركرك فوق فنايدهُ
يهرْد الكبدة واب دمامي صايدهُ
ود الأريل الضارب عروشهُ
لجلج غلَّب القناص يحوشهُ
شاهدته وجفل بي جوه حوشهُ
يهرد الكبده قَلب الزول ينوشهُ
ود الأريل الضارب حقبتــــُه
ضامر من وسط تعجب رقبتهُ
غالبني الصبر انـا ما غلبتهُ
بَتُكْ دَايبُ وانْدِيتوك جَنَبْتُه
ارجو اعراب ما تحته خط
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
نواصل
ولف قصيــــدة
عناق ام السومر الولدت فريدة
تخنق الطنة ساعة اتوسد إيدا
اموت بي شوقا ست الريد بعيدة
ولف غناها
عناق التيتل المفرود جناها
تطن تتخازز التيس ان دناها
العجب يا اخوي اكان الزول لواها
ولف حكاوي
نارك يا ام رشوم في الجوف تكاوي
كان عقلي انسلب اياني غاوي
بحلف يمين ريقك يداوي
ولف حكيه
يا قلبي المريض مابي الهدية
دحين يا بقه العسل الروية
بعد باصور بقيت بركب حوية
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: nazar hussien)
|
ولِّف حَكِيّة
يا قلبي المريض مابي الهديّة
دحين يا بُقَّة العسل الروِيّة
بعد "باصور" بقيت بركب "حَوِيّة"
نزار عليك الله شوف الشغل المو مغشوش ده!!!!! بعد باصور بقيت بركب حوية!!!. أب حَسَكة الـ بِفكّك مَحَكَر الباصور؛ خليناهُ في العُقَد الـحُمُر مكْسور. هللا هللا.
أحمد حنين أنا ما بريدك إن كسرت رقبتك .. لكن شغل ودالفرّاش ده جبرني على غَشْوة مجالْسك. ربنا يوفقك في دي .. ويغتس حجرك في الغيرها. اعتبر كلامي ده هزار لكن جواه جَد.
سجيمان يا نزار فعلاً زول مفضوح وفي شغلات هنا ما في زول بيهبشها غير سجيمان: من الـحَجْرة ودوب لـ أهلنا.
العفو يا أحمد .. وواصل.
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
Quote: ولكن بماانك تطرب لمثل هذا الفن
فيبدو ان دواخلك نقية ،، |
بس هنا يا أحمد جيت في اللحم الحي ووصلت الميس: دواخلي النقية دي هي البتخليني ما أريدك .. لانك إنت دواخلك ملَغْوَسة بطريقة لا تتناسب مع الأدب الرفيع القاعد تنقلو لينا هنا ده. أي زول بيتذوّق شعر ود الفرّاش لازم يكون زول نقي وضميرو صافي زي الحليب .. لكن إنت بعيد عن الكلام ده بفراسخ. المهم نستفيد من نقلك ليه، بكل أخطائه المطبعية الواضحة .. وربنا يعيش المساكين في المجانين.
خلينا نستمتع بود الفراش .. وفي ستين داهية خرابيطك البتسوي فيها بيهناك.
والعفو
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
نواصل
ود الأريل الضارب مخبُه
البارح ورد والليل غبــُه
كفيل المنتني وعَلاه ربــُه
يناتل فيهو داير يتقلبــُه
سلبت لحمي انا وقلت رياي
كلما تهف ليْ بركب براي
جنيبه موسي باشا الفي الصرايه
جليدِك طاقة القطن اب شراي
بقيت في جلجلة وشيتا يشيب
كلما طِريتَ أشد فوق اب نُويب
تَعرفْ للمشي وتتكي طيّّب
تقول فُوسِيبة ضاربَال الهِبيب
بقيت في جلجلة وشيتاً يكفر
كلما طريت اشِد واركب وادفر
اتاوق بالحيط وادور اطفّر
نعلت إبليس نزل في الأرض احَفْر
بقيت مرضان عليل اكلي المهلّج
سببي الرخرخ ام فاطراً مفلجْ
عُبْلوج التري المن ميسه عَلجْ
مقيلُه الضحوي في ضُل الهَجلجْ
الليلة الغرام نيرانو ناويه
بقيت مكتول حسار واقع لي هاويه
كربابيه حُره وليّ شاويه
تقول لي كُتّنين فرّاش دبايوه
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
ود شاموق يا إنسان لك التحية يا رائع
Quote: ولِّف ولايف
شِن لمَّ الركف للقام هو زايف
تكسر في نهيدن ماهو هايف
تبرد حمة الصيف المصايف |
هذا الشعر والمعني ليس بعيدا عن ود الفراش
اليك هذة
فرع المحلب القايم حَجرةَ القيف
هَباه النسيم ومدندح العُليـــف
بي نجلِس معاهن وبي نتم الكيف
تَدفيني الشِتا وتَبرِد ليالي الصيف
ونواصل
جيب لي مِتونَ
نامت وانتكت تعجب عيونا
قصيبة المرنعية الفي مِرونا
تلم الدون عليْ يا ود حِسُونه
تبقالي طيبه
متل باشَهْ عُموم فوق رأسا هيْيه
جَنيبة الرّتبُو ودقَّ ام كتيبه
لِهيج الدُون يداوي بلا تِريْبه
أُماتك عُزاز دايما يصلنْ
مـــا شربنْ خٌمٌر زريعه بلنْ
جنيبه موسَ ب المزيقتُو رتن
براطم الدون تقول كَبْدةْ حملّن
كلما ادور انوم آخُد لي هَجْعَه !
احس بالليل كِلايْ يَدّني وَجْعَه
بِعدنا من البلد ونجعنا نجعـــه
علي البُرّيب متين ياربي رَجعَه
وسوف نعود
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
سمحاتْ وِصوفَ
لابسه الهندي كيةً للبشوفَ
تركت الدنيا صارت ليْ لهُوفَه
بدور احكي ، لكن حاصله خوفَه
طلع العنقريب نَجماتُه شَبّن
حَلاةْ ضَهر التِلوبْ ساعةْ يَخُبنْ
حِسارِن في الضمير راقِد مَغبّنْ
طريت خُمره وجَلاداً ليهُ كَبّنْ
طلع العنقريب قبل التريّــه
حِسار الكوله بتبْادن عليّ
تشابه البهرجت بالليل عَشيه
بتتمايح فِتينةَّ الصندليـــــــه
طلع العنقريب مَرقنْ نِجومُه
مِرسيل أم قبيل قال لينا قوموا
علي فصَّ العقيق الجضَّ فومـــه
سهر ليلاتي ناساً ما بنومـــوا
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
شكرا ليكم جميعا
الأستاذة نجاه ،، لك التحية ،،
كنت عاوز اقول حبوبة نجاة !! لكن خفت اكبر عمي بولا
البنية الصغيرة دي مهجة آخر العنقود ،،
ممكن مهجة تقول ليك يا حبوبة نجاة ...
المبدعة تماضر ،،
شوفي يا اختي لازم تجتهدي معانا وتحاولي تقنعي
العم بولا و لا ود ابحجيل ،، يترجموا ليك
وجاكم واحد جديد كبير الجسم كبير العقل شلولخ
اسمه كمال قسم الله برضو شوفيهو
ود ابحجيل
مبروك السماية
والله كمان عشنا وشفنا اسم ابوحجل اليهز ويرز
بقي يدلعوه في النت وانقلب الي حجيل ،،
عيييييييك كان سمعوا ناس معينيفة وابوحمد
مع تحياتي
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
نواصل
كربت يا جمل الليلة يومكْ
علي دُغس العيون كارِب شيومكْ
وكت الليل برد كِترن همومكْ
ارح يا البار قدم سِتك تلومك
كربت ياجمل لا تجدع ايدك
علي دُغس العيون كارب شديدك
وكت الليل برد قليت غميضكْ
أرح يا البار قدم ستك تريدكْ
يا طه الرسول الفي الشروقُه
جني الفراش يبس بل ليه شوقُه
يروح بربر شيوم الحم يضوقُه
يشوف شدرا كبار في النيل عروقُه
ضاقت لي فرج ياربي جيبو
زهج فراش وطول من حبيبو
يركب ايريــابيـــا خبــيــبـو
يشوف نخلا يحت في النيل وضيبو
طوّلت طولاَ
مَاني مجرب اتحمل حمولاً
عوجات الزمن لابد يزولن
بعد دا الحال نشوف عُقلاَ يجولن
دايما بهادي
واسدد في الشقوق الباقية وادي
حِسار ام زين تري الحارق فؤادي
اخير الموت ولا شمت الأعادي
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
نواصل
قصيبةً في اب عدار واديها نّسم
طويل الليل عليْ والنوم مقسّم
طريت الفي البنات لابسه المرشم
مسيخ الجيل بلا ام خدا مَوسّم
ماكلاني نارَ
ست الكسكس ام روبة عُزاره
ترباية بطر من بيت امارة
جَزم زولا بلاي ما قالوا زارَ
بشد واركب علي ناقتي الوهيطة
علوقَ حميس ماهو الفيتريته
جِبت العنقريب فوقه انتكيتَ
طريت فوما ينقط فوق رحيطَ
من قومتهُ بيّن
طِريت مفرودة ام ضرعا محين
قصيبة منصح الوادي اللوين
كتر للناس قسا وانا ليّ هين
من قومتُه قاهل
صغير في السن تني وفي اصله جَاهل
فِطيمة الفوقن الضهراوي با هل
كتر للناس قسا وانا ليّ ساهل
دغس من غير كحل عينيها زُرق
تقول ود الجدي الأماتُه بُرقْ
تشابه الفي اب عدار الدابو كُرقْ
حسارَ شواني خلي كبدتي حُرقْ
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
الأخوان ابحجيل
وخدر
والشايقي
لكم التحايا الحارة في هذا البرد الشديد
دحين خلونا نتلما في خيمة مع بطانية تقيله
وشاي لبن مقنن وصحن شريق ،، ونواصل مع الفراش
من عصر كبير رَفتْ كراعِي
مرق نجم الدغش ارجيتُه واعي
ركبت اصهب نشيك للكول يَراعي
جَدع ديسا محرت فوق ضراعي
قام بيّ هَمَ
متل ود الغزال ياخد لهُ خَمه
يقول لي انعدل وجُر فوقي نمه
المبيت ناس سارة في قَلع المتمه
بوريك فَنُه
الخيل والزمل ما بلحقنه
يمحق في الدرب حالاتُه جنه
شيوم ناس حاجه في الحمران كلنُه
من بربر عصير يا ناس عُنابي
يقمزْ بي تقول صقرا قُطابي
جبيتُه من الزحيح قَنّب يشابي
حوي السادات انا والأيريابي
اب علامه
يكوّرْ بي متل ديك النعامة
في دي السفرة كان القا السلامة
اشوف ال في اللكيب يلصف زماما
قام بي يقن
يصرصر تقول لابس الدلقن
قِرب من ام شليخ شكراتُه حقّن
بشوف في ارياب عَرب نيرانَ بقّن
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
سلام احمد حنين ..
وكل الذين مروا من هنا ..
ومتابع كلام ود الفراش ..
---------------
فرع المحلب القايم حَجرةَ القيف
هَباه النسيم ومدندح العُليـــف
بي نجلِس معاهن وبي نتم الكيف
تَدفيني الشِتا وتَبرِد ليالي الصيف
الكلام السمح دا في نمة قريبة منو في بنينة الجرتق او الحنة عندنا هناك ( جيهة المحمية).. ودائما ما اتذكرها من دون البقية .. بتقول:
(شوف الناس في شنو وانا في شنو؟؟ )
اللهم صلييييي
علي الرسول دُخرية ..
ومن عين الحسود ..
لامة الخِلوق كُلية ..
اللهم صلييييي ..
شِدرت المحلب الفوق حَجِرة القيف
شايلة مدندحات فروعا من العِليف
هبا النسيم مِسِك الجلال الكيف
مِقيلين تِحِتا ناس الرسول في الصيف
واللهم صلييييي ..
أها..
*** عمنا بولا ..في مداخلة له في بوست تهنئة اخونا (قصي) بالزواج ، ذكر ان ناس بربر عندهم بنينة للعريس وبنينة للعروس برضو.. انشاء الله مشاغلوا تديهو مهلة شوية اكان يهبش الحتة دي تاني ..
بِكون فيها شيتا مبدِّع .. انا براي اصلو ما وقعت في اضاني بنينة للعروس ..
عموماً ..
قلنا ندخل البوست دا ..وبعدين ما تنسوا انو اليومين دي عندنا (مع السقط القبيح دا) ..غمام ..ومرات مطراً مجننة كدي ما تعرف راسا من قعرا ..لاكين بي حالا دا بتخلي الزول شوية عقلو رايق ..
و...
أقعدوا عافية
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
اخونا قيسان
سلامات يا رائع يا فنان
عاد في موضوع البنينة دي يفتيك شيخنا العم بولا
وخلينا نواصل مع الفراش
بشد واركب علي ود حنانه
بكرب لُه الفرد وارخي الرسانه
حسارن في الضمير هرد كلانا
صعيد طوكر طريت لهج الرطانه
اب زرداً ملوّي
ولاه الشين ولا المدبور مَكَوي
تري ابراهيم صحيح الليلة نوي
علي قمر السبوع البقَ ضوَي
كربت يا جمل رزقك علي الله
سِيدك من حسار الحُم مقلّي
طريت الرتبو وفي الجيل مولّي
ارح يا تيس علي ام فاطرا مجلّي
ابشر يا جمل لي بيتا جينا
سلام يا الجاهلة بريبة العَسينه
لقِيت مردم المبروع قرينا
خديدا وصفُه زيْ عنب الجنينة
بَديك يا جمل في حوشَ راحه
يزولن مِنك الشُوم والسَناحة
بشوشةً ما بتقابلك بي قَباحة
جميلةَ يفرح الحزنان صبَاحا
| |
|
|
|
|
|
|
|
|
|
Re: إهداء للأستاذ/ عبد الله بولا - غزليات ود الفراش شاعر بربر (Re: ahmed haneen)
|
العم الأستاذ بولا
لك التحية
والعذر لك مقدما لضيق الوقت وكثرة الشغل
والظاهر ياعم دخلك الكبر
جنس كلامك دا شعرا ما عندي ليهو رأس
وعينو الكلام البترصو دا ياعم
انا بقعد اتعلم فيهو حبة حبة
يمكن مخنا دا يقدر ويحاول ان يجاري ،، ولكن هيهات
بس بونسك بي كلام اهلنا
تعرف ياعم الشاعر ابوعلي لم يحفظ شعره ولا غناءه
وقد عاني من الأهمال والشفاهية ،،
وانا طبعا كنت متربي في الحوش مع حبوبتي زينب بت كلمون
وكانت تحفظ الكثير من اشعار اخيها وترددها بفخر
لكن الزمن داك ،، ما كنت عارف انا ما تقوله الحبوبة في ترنمها
كنز من كنوز الأدب ،،
والأن بعد ان رحل جميع ال كلمون ،، وكانت اخرهم حبوبتي عيشة بت كلمون
(الله يرحمهم جميعا) لم يتبقي من يحفظ شعر ابو علي ،، الأ قصائده ومدحه
في اخر ايام حياته للميرغنية ،، حيث ما زال الشباب ،، الحافاب والبوسوتاب
يرددون ،، شرفت الشمال اليوم ،، هيا هيا ياشباب ارح نزور المرغني
اما باقي التراث فقد اندثر ،،
وهناك الكثير من الشعراء في بربر لا يوجد توثيق لأعمالهم
مثل الشاعر نافع المكي
عموما اشكرك للفتك النظر لهذا الأمر
وفي اول اجازة سوف احاول ان اسجل شيئا من هاشم ود ابوعلي
وهو الوحيد الذي يمكن ان نجد عنده شئيا ،، والناظر حسين المضوي
لك تحياتي
وما زال قيسان في انتظارك
وبالمناسبة قيسان دا من قبيلة الرسامين ،،
مع مودتي
| |
|
|
|
|
|
|
| |
ahmed haneen
ود شاموق
Salah Abuhigill
nazar hussien
حاتم الياس
أحمد الشايقي
عبد الله بولا
Shinteer
khider
Tumadir
صديق الموج
Nagat Mohamed Ali
)، مشغول
bayan
gessan
فيس بوك
تويتر
انستقرام
يوتيوب
بنتيريست