فنانات جنوب الحزام ..!!

Quote: لوووول يا أبو النيز مشتاقين يا مان ياخ و الله أنا عندي نظرية إنو الفن الصادق هو الفن البيطلع من قاع المدينة لذلكـ فنانات قاع المدينة ديل ما برضي فيهن

Quote: ياحليل الحزام ياناذر زمان كنا بنمشى نصطاد فيه ابوالدنان ونربطه بخيط ونحن راجعين بنشيل معانا كمية من المستيك جنوب الحزام كان فيه منطقة السلمة فقط ظهرت بعد ذلك منطقة مايو الان مايو والانقاذ والازهرى تسلم

Quote: الأخ سليمان آدم معليش ياخي هاجر كباشي دي من أجمل الأصوات النسائية لكن كسلانة والبلد ضيقة كدي اتمعن صوتها والراحة البتؤدي بيها الأغاني

Quote: طيب ناس بنبر وكورية ديل من وين يا ناذر والله مُشتاقين

Quote: ياخ في فنانة هنا في الرياض إسمها شيماء مبالغة لو ما شفتها (أو شفت مدير أعمالها اللبناني*) بتقول دي هاجر كباشي بذات نفسها ...

Quote: العزيز ناذر تحياتي يا اخوي ما تتملصو منهن، ياهن فنانات الخرطوم، بلا حزام ناسف بلا جنوب حزام موش بغنوا في الخرطوم؟ وتيب، ان شاء الله بعداك جاين من كسلا زاتو ما بتفرق دع عنك انهن جايين من نصصصصصصصصصص الخرطوم او هكذا علمت مؤخرا ان منطقة جنوب الحزام ياها سنتر الخرطوم هذا هو انتاج الخرطوم الثقافي اليوم والقادم اسوأ by the way

Quote: تحياتي يا ناذر ؛؛؛ ياخي في فنانة كده عندها اغنية كدة بتقول :حرامي قبضو ...قبضو قبضو اول مرة اسمعها في حفلة عند جيراننا في الجريف غرب ... وهسع لقيتها في اليوتيوب ...صمصنق كده موسي...!!! وبتخلي الجماعة علالهم واقف....صوتا يعني مقبول بس.

Quote: نبلتكم دي عاملنها بلستك عجل قطر والا شنو ؟؟!!

Quote: 99 كان عندنا عرس بتاع قريبي وصحبي وانا كنت اللوجستك بتاع الفنانة والذي منه والمهم جبت واحدة من الانقاذ لاني شفتها في عرس في اركويت وربت الحفلة ساعتها ربة السنين اها الفنانة كانت اخر ظرافة ولطافة وحتي العداد اصرت بلطافة شديد انها تاخدو بعد الحفلة الختامية لاني جبتها كم مرة كده وقالاني يا باشمهندس ومنزلاني يا باشمهندس اها يوم الحساب عينك ما تشوف الا النور في خلاف بسيط كده حول جزء من القروش ركبت لي وش كرتون تاريخي وطلعني كرعيني من الزولة ديك والاكتشفت انو معاها زي كم بودي قاردية كده جو حتة الحفلة دي كيف الله تعلم

Quote: خطفتها من كي بوردي ياناذر . كباشية اكتر فنانة سودانية مظلومة واجمل صوت نسوي سوداني ( بالنسبة لي عشان ما يجي زول ينظر ) . مظلومة مظلومة اريتو صوت مونيكا .

Quote: امال انا بنزل مع شقيقي في الازهري ليه ياناذر

Quote: والله يا ناذر الواحد طول من بوستاتك الطاعمـة دي .. لانك حارمنا ليك مدة عملتها لينا كلها طوب واسمنت وحجار نار ..

Quote: اول مره طلع الموضه دي عازف اورقن أسمو ايمن الربع الربع ظاتو شنو نفرو لمن الكل يقلد فيهوا

Quote: سلامات يا أنور ... رغم أن كل ما يقوم به أيمن الربع لا ينم عن إبداع حقيقي في العزف ولا يعدو كون انه تهريج ومحاولة الإندماج مع إيقاعات الأورغ المعلبة الجاهزة كما السلطانيات داخل العلب ليحظو بأكبر قدر من لفت الإنتباه وسرقة الاضواء عن المغني الواقف أمامه في حيلة ماكرة ومقصودة (بالضبط كما الإستعراض الذي كان يقوم به عازف الدنب المرحوم عبد الله هندي عندما كان عضوا في فرقة عقد الجلاد) .. إلا أن ذلك لا يمنع أنه يجيد العزف على عدد من الآلات بمهارة أكبر من المتوسط ، ولكن كما أسلفت فأنه يسرق الأضواء عن الفنان الواقف أمامه .. وهذا ليس عيبه فإن الساحة الغنائية في السودان هذه الأيام لم تعد تهتم بالسؤال عن إسم المغني الذي سيحيي الحفل مثل كان في السابق ولكن السؤال الرئيس هو : العازف منو ؟!!! أتساءل إن كانت فرقة عقد الجلاد إستغنت عن خدمات عازف الدنب لديها المرحوم عبد الله هندي (رغم مهارته) بسبب ميله للإستعراض الكثير لدي عزفه مما يقوم بسرقة الخشبة من بقية المغنيين والعازفيين ..!! للأمانة أذكر أن الكثيرين من أصدقائي عندما كنا مدمنين لحفلات عقد الجلاد في أوائل التسعينات في نادي الضباط كل خميس لم يكونوا يحبون الذهاب إلا لمشاهدة حركات وبهلوانيات المرحوم عبد الله هندي التي كان يقوم بها بألة الدنب وربما كنت واحدا منهم في تلك الايام .!! لا حظو للربع عندما يعزف .... لم يأت بالبدع أو الجديد .. فقط عدة ضغطات على الكيبورد وعندما يريد لفت الانظار يضغط إحدى أزرار الكي بورد فتعمل الموسيقى تلقائيا ثم يبدأ في الرقص الغريب الاطوار !! فقط للفت الانظار .. المعروف عن عازفي الأورغ من الشباب في حفلات السودان أنهم يمتازون بالهدوء الشديد والرزينة والسكينة (لا أدري السبب ) ؟؟ وأيمن الربع يريد أن يختلق شيئا مخالفاللفت الانظار وخلق شعبية وأظنه نجح في ذلك !! اما إذا أردنا مقارنة المستوى الحقيقي لعزفه على الاورغ مع أي مبتدئ أخر فلن تكون النتيجة لصالحه بالتأكيد !! هذا إذا أستبعدنا الرقص من شاكلة القرد والنبق والركشة وما إلى ذلك مما لا يجيده عازفي الاورغ من الشباب ومراكزه الذين يصاحبون المغنيين والمغنيات في ليالي الحفلات والأعراس في الاحياء ..!! لا حظ معاي للصولة دي يا أنور من صولات وتهريجات الربع ... فرقها شنو أو تميزا شنو لمن تسمعا بدون فيديو وبدون صورة من الصولة البيعزفا عاطف أيسكريم مع منى القوز في أغنية (راجل المرة حلو حلا) !! المقارنة العملية والعلمية بكل تاكيد ما من صالح أيمن الربع الذي أراد أن يجلري والده في الإستعراض بإختلاق بدعة جديدة تنطلي بكل تاكيد على الضحايا المستمعين البسطاء والذين تم إفساد ذوقهم تماما بواسطة الاورغنات الحديثة التي دخلت إلى السودان في النصف الاول من عقد التسعينات المنصرم .. لاحظ لي نهاية الصولة الجبتها في التسجيل بتاعي يا أنور ... سلامات خدوري ... Quote: و دي حاجة كويسه ياناذر انو يكون في فنان زي ده والله حاجة كويسة وأصلو الناس في السودان بيحبو التجديد .. فلمن عازف أورغ يجيهم بي ستايل جديد وشوية جلكسات وجاكات ليهم حق ينبهرو .. لكن برضو حا تظل الإشكالية قائمة ... مساهمة الربع ودورو الأساسي في ترسيخ الغناء الهابط لمن يعزف لهم من مغنيي ومغنيات الاحياء والحواري بالصولات الهابطة المكررة من شاكلة القرد والنبق ..

Quote: ياجماعة كلام ناذر واضح ومحدد والتنميط بتاع إنهم جايين من جنوب الحزام ولا من قاع المدينة ده ما بيحدده ناذر براهو.

Quote: قوومي يا هاجر كباشي أمشي عولقي الأغنية ونزليها في شريط ماستر بي كلمات مغايرة ونظام الأغنية جاادة ففقدت طعمها وحلاوتها ..

Quote: ما كتبه الأخ ناذر هو الواقع بالضبط فى الخرطوم ولم يأت بشئ من عنده و مافى أى عنصريه ألا فى خيالك أنت فأنت أعتبر زى ما عايز ... هؤلاء الفنانات مبسوطات بما يقمن به من غناء و عندهن جمهور من الشباب و الشابات وليهم زبائنهم و ما شايفين أى عنصريه أنهم يجوا و يغنوا ... فما تحمل الأمر أكثر مما يحتمل و كلما دخلت فى بوست قلت عنصرى ... يعنى الناس تبطل تكتب أو تتكلم فى أى شئ..!!؟؟

Quote: ما بطال إنو يكون عندنا النوعية دي من الغنا ....لكن البطال إنو يكون النوع دا منتشر انتشار النار في الهشيم في كل قرية ومدينة وبص سفري وحافلة ركاب داخلية حتى أدى ذلك لمسح الهوية الثقافية للبلد ....لو ملاحظين الإيقاع كلو أثيوبي أو زائيري ما عارف وعلى نمط واحد....والرقيص فيهو عبارة عن نطيط ...المهم إيقاع ما بمثلنا ....بس بصراحة بتماشى مع تقليعات شباب اليومين دي

Quote: ما كتبه الأخ نازر هنا أنا أعتبره عنصري وتنميطي في المقام الأول. أنتم هنا تتحدثون عن ما يسمى ب غناء البنات.

Quote: طبعا البوست ده انا منتظرك تفتحو من زمااااااااااااان بس علشان اقول راي في هاجر كباشي ياخ دي اجمل صوت نسائي في القرن الافريقي بس عدم الواسطة والدهنسة منعت عنها الاعلام وكمان في حاجات تانية انت ادرى بها يانازر انو مستوى الفنان الاجتماعي والثقافي والتعليمي ومستوى علاقاته واصحابو وبعاماتو ليهو دور في مسالة انتشارو دي ولا رايك شنو , فهاجر ما لقت البعامات والعلاقات البتخدمها وتقدمها للاعلام بالصورة المثلى ..