غدا هو عيد ميلادي .. وقد يكون غريبا بعض الشي أعياد الميلاد التي تفاجئنا على حين غرة ولا ننتبه لها أو لانجد الوقت الكافي للإحتفال بها ..!!!
حدث جلل وقع في عيد ميلادي الخامس أو السادس عندما كانت أسرتي تحتفي بي بتلك المناسبة .. إذ جاءت إحدى قريباتي من مدينة القضارف صدفة في ذات يوم الإحتفال وتفاجأت بالمناسبة أمامها .. فما كان منها إلا أن خرجت خلسة دون أن تخبر أحدا وإستقلت تاكسيا وذهبت للسوق الشعبي لشراء هدية مناسبة لي ...
لم يفتقدها أحد مع كثرة المدعوين وغبطتهم .. وأذكر أنني كنت سعيدا في ذلك اليوم وأتلقى التهاني والقبل والهدايا .. وقبل أن نبدأ بتقطيع التورتة جاءنا الخبر الأليم من المستشفى وهو أن التاكسي الذي يقل قريبتي تلك قد تعرض لحادث مفجع في الطريق وأن قريبتي الأن في المستشفى تعاني الإصابة ..
وسرعة وفجأة إنقلبت المناسبة الجميلة إلى صراخ وبكاء وولولة!! .. وكنت في ذلك الوقت لا أعي ما يحدث جيدا أمامي ولا أفهم كيف ان ينقلب الناس هكذا من حالة السرور والفرح إلى حالة البكاء والعويل !!
المهم أن قريبتي تعافت من أثر الإصابة ولكن إرتد أثر علينا نحن أفراد الأسرة حين أقسمت والدتي ومن خلفها أبي ألا نقيم في منزلنا أي نوع من أعياد الميلاد مرة اخرى .. وصرنا نكتفي عندما تمر علينا تلك المناسبة أنا وإخوتي بالتجمع فقط في المنزل وتجهيز القليل جدا من المستلزمات مثل الشاي والبسكويت دون أن ندعو احدا أخر ....
وإستمرت تلك الحالة فترة طويلة في أسرتنا .. وعند ذهابي للهند طالبا .. وجدت أن أعياد الميلاد هناك يقيمها السودانيين لأنفسهم بغرض التغيير من حالة الدراسة والتخفيف من الغربة .. إذ حين يأتي ميعاد عيد ميلاد أحدهم يقوم على الفور بتجهيز المستلزمات ويدعو الأخرين وتكون مناسبة جيدة للتلاقي وتغيير الأجواء ...
وأذكر أنني في إحدى السنوات في الهند فكرت بالإحتفال بعيد ميلادي مع بعض الأصدقاء .. وتلك كانت سنتي الدراسية الأولى أو الثانية على ما أعتقد .. وكانت توجد إستقطابات حادة من جانب التنظيمات السياسية لإستمالة الطلبة الجدد .. وفي تلك الاجواء صادف ان وجهت الدعوة لأحد أصدقائي ممن ينتمون لإحدى الأحزاب ، وأخبرته ان الدعوة محدودة جدا .. إلا أنه حضر في الموعد ومعه إثنتان من الطالبات الذين ينتمون لذات حزبه .. ولم يكن ذلك يشكل فارقا بالنسبة لي ..
وفي منزلي ذاك طلبوا مني أن أغني لهم إحدى الأغاني الثورية .. وكان معي بصحبتي ألة العود ولعله كان العود الوحيد في ذلك الوقت الموجود بالمدينة بأسرها .. ولم أجد مانعا من الغناء لإكرام ضيوفي .. فغنيت لهم أغنبة (يا والدة يا مريم) .. فطلبوا المزيد فأردفتها بأغنية (قاسم أمين) ومن ثم توالت الأغنيات من هذه الشاكلة ولا يوجد شئ يشئ بوجود أي نوع من التوتر !!
ولكن في صبيحة اليوم التالي وجد ان المدينة كلها تفيض بالأقاويل ومنها أن ذلك الحزب قد نجح في إستقطاب ناذر لصالحهم والدليل انه غنى لهم أغاني من أدبياتهم .!! ولامني البعض وقاطعني البعض الأخر .. كل ذلك وانا مذهول من ردود الأفعال والتي لم تفارقني حتى خروجي من الهند ...
ورغم ان الحالة عادت لطبيعتها في عائلتنا وصار إخوتي و أبناء إخوتي الكبار يحتفلون بعيد ميلادهم بالمنزل بصورة طبيعية إلا أنني قررت هذا العام ان يكون إحتفالي بعيد ميلادي مختلفا هذه المرة ..
قررت أن أحتفل به هنا بهذا البوست !!!!!!!!!!!!!!!!
رغم أنني لن أتمكن من تذوق أي نوع من قطع الحلوى في هذا الفضاء السيبيري !!!
ولكن يكفيني أنكم معي وتحتفلون معي !!!!
جعل الله أيامكم أعيادا ... وبارك لكم في مراميكم ...
أبو النيز ....
08-20-2005, 07:46 AM
عادل فضل المولى
عادل فضل المولى
تاريخ التسجيل: 11-28-2004
مجموع المشاركات: 2165
عيد سعيد بس عيدك دا رقم كم يامان؟ لانك رجل استثنائى وفنان عشان كده كرت المعايدة برضو طلع غير تقليدى.. كان ما عجبك بغيرو ليك بكمية من الشموع بس عددها كم؟ عليك التحديد وكان خايف اقسم"سنواتك" على عشره وعام سعيد
مبروك و ان شاء الله الشمعة المية - اها انا حسى عاوزك تغنى لواحدة مناضلة فى المنبر دة أغنية
اِتألقى و اِتألقى ترى رى رم
اِتألقى و اِتألقى ترى رى رم
اِتألقى و اِتألقى ترى رى رم
و تم باقى الكلمات انت براك - رأيك شنو نقعد نعمل لينا غنية جديدة
طبعا أنا زعلان منك تمشى تعمل قصيدة لى خالد كودى و انا تفتح لى ساكت لا قصيدة لا يحزنون - بالمناسبة انا حا أشيل الصورة العملها نصر وأختها فى البروفايل بتاعى دة طبعا لى الاِذن و المعلومية
و شكرا زول بن زول
08-20-2005, 08:27 AM
ناذر محمد الخليفة
ناذر محمد الخليفة
تاريخ التسجيل: 01-28-2005
مجموع المشاركات: 29251
إنت عارف إنو الصور العريانة دي جات ني منها عقدة حتى لو كانت صور شفع
عدد الشموع أحسبا من البروفايل بتاعي
زول إبن زول ...
Quote: طبعا أنا زعلان منك تمشى تعمل قصيدة لى خالد كودى و انا تفتح لى ساكت لا قصيدة لا يحزنون - بالمناسبة انا حا أشيل الصورة العملها نصر وأختها فى البروفايل بتاعى دة طبعا لى الاِذن و المعلومية
الله يبارك فيك يا راجل ... وإنتا متين شفروك عربي !!
ما مشكلة أول أوتومسفيرية حاتكون من نصيبك .. إنت بس أبقى قدرا
ختها في البروفايل طوالي إذنك معاك .. بس لمن يجي الجكس ما تتسلبط تقول ليهم دي صورتك
08-20-2005, 12:30 PM
waleedi399
waleedi399
تاريخ التسجيل: 08-20-2003
مجموع المشاركات: 2767
إنتا عارف ... كان حقو عيد ميلادي وعيد ميلاد (تسجيلك) يكونوا في بوست واحد
ناجي الملك ........
تسلم عل الأغنية كتير ............ والله خجلتو نواضعي الإصلو خجلان دا ...
يا اخوانا بس لفت نظر صغير ........
عيد ميلادي بكرة ما الليلة .. الليلة دي القيدومة والحنة وبكرة راجي التورت والجاتوهات منكم لإني خسرت كتير في البوست دا وداير أعوضو .. ما تشبكونا صور وهدايا وكروت ..
وانت ذاتك يا ناذر مسكتك فوبيا اعياد الميلاد والله دي قصة الزول اتفاجا بالفرد كلهم حناكيش .؟ ما يقوم كمان كودي يتفاجا بالبوست دا ويقرر يمشي يجيب ليك هدية من السوق الشعبي بتاع فرجينيا ونسمع بيهو في برينسات تكساس
08-20-2005, 04:51 PM
مريم بنت الحسين
مريم بنت الحسين
تاريخ التسجيل: 03-05-2003
مجموع المشاركات: 7727
لكن بالغت، الجاتوهات والبسكويت واللازي منه بيجيبو المحتفى به والباقين بيجيبو الهدايا، حسع شايف البوست ده قطعة جاتوهاية واحدة ما فيه، الجاتو ده بذكرني خالتنا زمان اول ما غنية حمد الريح حمام الوادي يا راحل طلعت جديدة فيها مقطع بيقول "وعارف القاسوه ما شوية" وهي سامعها "عارف الجاتوه ما شوية" والغريبة كانت بتنقد فيه "هسع الراجل ده ما ببالغ... الجاتوه ده الدخلو هنا شنو؟؟؟"
تعرف ذكرتني زمان لما كنا صغار، كان لما تعمل عيد ميلادك الجماعة كلهم يشبيكوك هدايا بسكويت كرم، ولا حلاوة كسلا لمن تآمن زاتو، كان الصندوق كامل بي طرادة الزمن داك، اوع تقول لي الطرادة دي شنو
فانت هسع سجل عندك عدد واحد صندوق بسكويت كرم، وان شاء الله اول ما اصل الخرطوم يكون بي طرفكم
يا أخوانا أنا جيت لإنو الليلة فعلا عيد ميلادي ما أمبارح
الليلة الصباح كنت بتونس مع الوالدة وسألتها قلت ليها إنتي ولدتيني الساعة كم ؟؟
قالت لي : الساعة خمسة صباحا !!!!
قلتا ليها : وليه يعني جايباني بدري كدة في وش الصباح !! الدنيا طايرة ولا طايرة ؟؟؟؟
قالت لي : جبتك فجر عشان تلحق الشاي وأخوانك ما يكملوهو منك
أساسي الأساسي ...
Quote: وانت ذاتك يا ناذر مسكتك فوبيا اعياد الميلاد والله دي قصة الزول اتفاجا بالفرد كلهم حناكيش .؟ ما يقوم كمان كودي يتفاجا بالبوست دا ويقرر يمشي يجيب ليك هدية من السوق الشعبي بتاع فرجينيا ونسمع بيهو في برينسات تكساس
ما حناكيش ولا بطيخ .. الواحد يعني ما يتذكر اليوم الأشرقت عليهو الشمس ولا شنو !!
بعدين صحبك كودي دا حريييييف ونجييض ، يعني لو هو قرر يمشي السوق الشعبي للهدية ما حايمشي بي نفسو !!!
حا يرسل الزولة ديك
ما قلت ليكم هو زولا مبروك
العزيزة مريم
Quote: عيد ميلاد سعيد أخونا ناذر.. وربنا يحقق كامل أمانيك واجملها في الدنيا والدين
وإنتي بي ألف ألف خير وأنتهز الفرص مرة ثانية لمباركة زواجك الميمون ..
وإنشا الله بيت مال وأبروف
ياسر حنا ....
Quote: لكن بالغت، الجاتوهات والبسكويت واللازي منه بيجيبو المحتفى به والباقين بيجيبو الهدايا، حسع شايف البوست ده قطعة جاتوهاية واحدة ما فيه، الجاتو ده بذكرني خالتنا زمان اول ما غنية حمد الريح حمام الوادي يا راحل طلعت جديدة فيها مقطع بيقول "وعارف القاسوه ما شوية" وهي سامعها "عارف الجاتوه ما شوية" والغريبة كانت بتنقد فيه "هسع الراجل ده ما ببالغ... الجاتوه ده الدخلو هنا شنو؟؟؟"
والله حبوبتك دي لماحة خلاص
Quote: فانت هسع سجل عندك عدد واحد صندوق بسكويت كرم، وان شاء الله اول ما اصل الخرطوم يكون بي طرفكم
بسكويت كرم دا ما أدونا ليهو .. !!
لكن إحتياطي كدة جيب معاك واحد تاني كابتن ماجد البرير
Quote: صباحية مباركة يا عريس ،،
أعتقد أنو اليوم دا يوم عظيم في تاريخ الفن والمسرح السوداني
وتاريخ البورد دا
ودعقاب كيفنك ...
Quote: شمهروش حتى اللظه ما خش عللى عيدك دا
بطل حركات وحقاره
والله ديبلي سوري .. إنتو اللتنين غايتو الله يديكم الغافية !!! زلمن تقابل ود عمك دا قول ليهو عقوبتو يجيب معاهو تورتة من المريديان عشان إتأخر ناصر البطل
Quote: اها يا أخوى خلينا من حكاية العيد ميلاد دى أهم حاجه انت أصبحت كيف لعلو مافى عوجه و القاعده اتكسرت
والله الليلة ناس البيت كانو مصرين يعملوا لي عيد الميلاد دا لكن أنا أصريت ما يحصل .. لإنو الشغلة زي الما راكبالي في راسي بعد سنوات التجميد الطويلة دي
الأخ جمال الصادق ...
Quote: 1914 وفاة المؤرخ العربي جورجي زيدان في القاهرة (ولد عام 1861).
1940 وفاة الزعيم الشيوعي ليون تروتيسكي.
1944 عقد اجتماع بين ممثلي بريطانيا والولايات المتحدة وروسيا لوضع مسودّة ميثاق الأمم المتحدة.
1969 إحراق المسجد الأقصى من قِبل المستوطن اليهودي مايكل روهان، وإلحاق أضرار بالغة.
1976 ولـــــــــد ناذر محمد الخليفة
1983 مقتل زعيم المعارضة الفلبينية بنينو أكينو في مطار مانيلا.
1952 - مولد الفيلسوف المسلم ابن سينا في مدينة بخاري الروسية (جمهورية أوزبكستان حالياً)
1973 - إنشاء مؤسسة الطاقة الذرية في ليبيا
1985 وفاة وزير خارجية قطر الأسبق الشيخ سحيم بن حمد آل ثاني عن عمر يناهز 52 عاما.
1986 روسيا تعترف رسميًّا بكارثة المفاعل النووي "تشيرنوبل".
1991 جمهوريات البلطيق السابقة تعلن استقلالها الكامل عن الاتحاد السوفيتي.
عيـــــــــد ميلاد سعـــــــيد جمال حسين
وإنت بخير لكن ..........
أنا اليوم دا قايلو بتاعي براي .. بالله الجماعة ديل كلهم والأحداث دي كانت في نفس اليوم !!!
Quote: 1940 وفاة الزعيم الشيوعي ليون تروتيسكي.
وأنا أقول معتز تروتسكي دا بيتشاءم مني لييه
08-21-2005, 06:52 AM
محمد عكاشة
محمد عكاشة
تاريخ التسجيل: 01-27-2005
مجموع المشاركات: 8273
تعرفي كدة يادوب شعرت بي عيد ميلادي جد جد ... الساعة هسي في السودان تسعة شوكة ودا الوكت البيقطعو فيهو الشموع ويقطعوا التورتة . وأنا من ما بدأ البوست ما لاقتني ولا قطعة حلاوة لكوم خلي من تورتة .. مع انو عادل فايت ما قصر معاي وأهداني تورتتين بدل واحدة في بوستين كمان ..
لكنب حقيقة هسع مستمتع بإلتهام التورتات الأوتومسفيرية دي وأنا مرزوع قدام الكي بورد دا في يوم عيد ميلادي لدرجة إني زي الإتخيلت طعمم ...
تسلمي على التورتات الغالية دي وإنشالله يوم شكرك ما يجي ..
08-21-2005, 12:38 PM
Deng
Deng
تاريخ التسجيل: 11-28-2002
مجموع المشاركات: 52555
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة