|
|
|
 Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: HOPELESS)
|
تاني ياهوبليس
دي عاوزة واحد يتابعها زي التلفزيون
اول شيء تطلع ليها العنقريب المغرب
وبعد البرد ينزل الساعة حداشر تدخلها جوة البيت
وكمان لازم تديها اللبن بعد المغرب
لأنها أكيد حاتروح في سابع نومة بعد ماتشرب اللبن
كان عندي جدتي بتشبه المصيبة دي
المغرب امي بتوديني ليها
تعرف عشان شنو
عشان تحكي لينا القصص وننوم
عندها قصة واحدة
بتاعت الخروف والعلف والمرفعين
اها كل يوم ونحن في القصة دي
المشكلة قبل ماتكمل القصة بتنوم هي ونحن بنكون صاحيين
قال مرفعين قال
| |
 
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: HOPELESS)
|
أخي الكريم أبو حراز : لك تحياتي و تقديري
حديثك مليء بأكثر من موضوع ، و لكنه حديث صادق تغلفه مسحة من السخرية المحببة و العتاب الرقيق.
رغم ولوجي لهذا المنتدى الوطن قبل أيام معدودة ، إلا أنني كنت أتابع كل ما تكتب.
و كما قلت أنت ، فإن سنة واحدة لا تكفي ، إعتبر نفسك في أولى جامعة و كرر المحاولة في سنة تانية ، يمكن ربك يوقف في طريقك ( غزالة ) بدل الفريزيان ، أو تلم ليك في واحدة حسب مواصفاتك المطلوبة.
لك مودتي.
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابو جهينة)
|
ولك اشواقي وتقديري يا ابوجهينة
نحن اصحاب طبعاً
ابوحراز وابوجهينة وابومركوب وابوالزفت وابوتالولة
انتم من منحني هذا القلم الذي اكتب به الان
ولا شيء عندي
فهي انفاسكم
قد قرأتها وحولتها الى كلمات
معكم تعلمت اشياء كثيرة
وتعلمت كيف اكتب ومتى ارد ومتى أعتكف عن الكتابة
تركتموني فعلاً على هيئة كتاب
فهو يحوي كلماتكم وحروفكم من الغلاف الى الغلاف
ويحمل الرحيق والحب من القلب الى القلب
ويزيل الظمأ من الماء الى الماء
جهينة أخبارها شنو ؟؟؟
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابوحراز)
|
يا ابوحراز
القالو ليك ابجضوم ليش ما اهديتهم/ن
وردة
واللا وردك كمل
عدي البحر ده وتعال لينا بي جاي
والله الجكس بالهبل
ويعزموك كترة عوازيم
لما يعرفو انك اعزب نوتردام
واكيد حا تطلع ليك بي عروسة حلوة
مع بعض التنازلات منك
لانها اكيد لا تجيد
الاعمال المنزلية
ولا تجيد قطعا ملاح الفرك
الذي تجيده امهاتنا
وانا احساسي انك بتموت في المفروكة
ما عارف ليش
والله يا ابوحراز بالجد بالجد انت
فعلا فاكهة ونكهة هذا البورد
وطلتك تضيف
الينا فرحا لا يضاهي
امنياتنا لك باعوام مديدة
حافلة بالعطاء
وربنا يفك عزوبيتك
و
.....
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: nazar hussien)
|
يانزار ياحسين
جضومي ذاتها على هيئة وردة
لكن العمى كاتلكم
ماقادرين تكتشفوا الجمال الأخاذ والنائم على الخدود
اشكرك بحرارة
فإن كنت انا فاكهة البورد
فأنتم التربة التي نمت عليها هذه الفاكهة
وأنتم الماء الذي اروى شفاه هذه الفاكهة لتعطي بلا حدود
انتم كل شيء
فلولاكم لما كنت
واتمنى ان اوفق في الكتابة الساخرة التي قربتني منكم
واصبحت مسافة الود بيننا الآن
لاتسمح حتى بمرور الضوء والصوت
رغم بعد المسافة الجغرافية بيننا
التحية لك ولكل ابناء الوطن الضخم
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: HAMZA SULIMAN)
|
الموسيقار الرائع
قال خمسين سنة قال
تعرف انا اي واحد وصل من العمر خمسين سنة
دا أنا مازولي وما بباريه
لأنو بيكون باقي ليهو سنتين ويتلحس
طبعاً عندنا اصحابنا في السودان
ديل اقل واحد مات وبكوا عليه بحرارة شديدة كان مائة وعشرة سنة
هسي قبل اسبوع عندنا واحد منهم مات على مائة واربعة
واحد قال أكيد طبقة الأوزون نزلت شوية
لأنو فعلاً بدأ يحدث تغيير في الأسرة
طبعاً نحن مع الجماعة ديل صحبة شديدة
لكن ماتقول لي واحد صاحبي
كل اهلوا بس اربعين سنة والقبر
دا شتتت منو
وفكيتو في الهواء
قال صديق قال
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابوحراز)
|
ابو حراز
بالغت عدييييييل طرح واضح وصريح دئما روح الفكاها غالباك لكن انت ذاتك مابتبالغ في كل بوستاتك لازم امضتك الشهيرة
***ست النفر ***
البخلي البنات ينافسه ست النفر شنو على العموم حاول مره تانيه او استنى بتي بس ماعارفه حتكون وصلت سنه كم... ولاحتكون لسه سنه أولى اعاده وعلى العموم مبرووووووووووووك مقدما
بقوله فالكم في لسانكم
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: مهيرة)
|
مهيرة
جميل أن أنتهي من الصف الأول
يعني كدا الواحد يقول قاعد قدام في المدرجات في الصف التاني
كيف أخبارك مع الشرق الأوسط
أنا كنت أكتب فيها وقرأها بشراهة
لكن بعد المسابقة وقفت منها
قلت خلاص ما حا اشتريها
يعني زمان الواحد كان بيصطاد عصفورتين بحجر
وياريت ناس الشرق الأوسط يعيدوا النظر في ذلك
بمناسبة المدرجات دي
واحد عمك محاضر ومرتو مكرفسة
يعني شناة تجيب المرض
أها مرة قالوا كان بيقدم في محاضرة
وبيقول هناك اشياء كثيرة تشرح النفس
ابتسامتك في وجه أخيك
قول كلمة رائعة لمن يقابلك
اهداء زهرة لطيفة
اها بيتكلم كدا جات واحدة جميلة جداً من ناس العمارات داخلة
ولابسة الكعب العالي واسكيرت وبلوزة من اروع مايكون
قام عاين فيها وقال
والجمال برضو ياناس بيشرح النفس
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابوحراز)
|
اب حراز اخوى
انا زاتى الشرق الاوسط خليتهابعد وقفت المسابقة،لكن عليك امان الله اكان عندهم دم يدونا جائزة على المواظبة على حل المسابقة لمدة 3 او 4 سنين ما كدى؟عندى ليك فكرة،ليه ما نعمل لى رسائلنا للشرق الاوسط اخراج جميل كدة،وننزلها فى كتاب؟ فكر فى الموضوع وادينى خبر
بمناسبة الشناة
قالوا الجبهجية ايام الجامعة بوزعوا الجبهجيات على الجبهجية للعرس(يعنى عشان يغتوا مواعينهم)بعدين فى واحدة وقع ليها واحد وهى رامية عينها على واحد تانى قيافة،بعدين لمابقروا فى الاسماء-فلانة وفلان- نطت من وراء وقالت ليهم:-وتاج دة مالو؟
طبعا تاج دة الكانت منشنة عليه،لكن القرعة جلت.
اها انا عندى اقتراح لبكرى نعمل قرعة للعزابة والعزابيات فى البورد،بس لكن غير الصورة،انت من الاول الشلاقة ليك شنو؟ما كنت تخت ليك صورة وردة، ياسمينة ولا ان شاء الله زهرة جهنمية حتى!!
لووووووووووووول
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابوحراز)
|
اب حراز اخوى
انا زاتى الشرق الاوسط خليتهابعد وقفت المسابقة،لكن عليك امان الله اكان عندهم دم يدونا جائزة على المواظبة على حل المسابقة لمدة 3 او 4 سنين ما كدى؟عندى ليك فكرة،ليه ما نعمل لى رسائلنا للشرق الاوسط اخراج جميل كدة،وننزلها فى كتاب؟ فكر فى الموضوع وادينى خبر
بمناسبة الشناة
قالوا الجبهجية ايام الجامعة بوزعوا الجبهجيات على الجبهجية للعرس(يعنى عشان يغتوا مواعينهم)بعدين فى واحدة وقع ليها واحد وهى رامية عينها على واحد تانى قيافة،بعدين لمابقروا فى الاسماء-فلانة وفلان- نطت من وراء وقالت ليهم:-وتاج دة مالو؟
طبعا تاج دة الكانت منشنة عليه،لكن القرعة جلت.
اها انا عندى اقتراح لبكرى نعمل قرعة للعزابة والعزابيات فى البورد،بس لكن غير الصورة،انت من الاول الشلاقة ليك شنو؟ما كنت تخت ليك صورة وردة، ياسمينة ولا ان شاء الله زهرة جهنمية حتى!!
لووووووووووووول
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: مهيرة)
|
مهيرة
ظريفة حكاية التاج القيافة دي
طبعا انا لأني انسان صريح وواضح جداً عشان كدا وضعت صورتي المهببة دي
قبل كدا طبعا الصورة دي عملت لي مشاكل كتيرة جداً
وكان مفروض الواحد يتوووووووب توبة نهائية
لأنو في واحدة رسلتها ليها
قامت قددت عيوني في الصورة ورجعتها
بالنسبة للشرق الأوسط
انا مقالاتي فيها لاتتعدي عشرين مقال
لكن فكرة حلوة نكون دويتو مع بعض
ونعمل الكتاب دا
بس انا ماعندي قرووووووش
شايفك انتي غنيانة لي حلقك
قالت جهنمية قالت
*****************
ولياب
والله انا افكر كثيرا في الانتقال للرياض
بس يكفي صيوانات واستراحات العرس دي
يا أخي في الطايف
الا بس تمشي ترفع يديك وتقرا الفاتحة
بعدين شوف بورداب الطائف
ولا واحد منهم ماشاركني في الإحتفال السنوي دا
خايفين من الحكاية
مفتكرين فيها كشف
كمان بورداب جدة برضو ماشاركوا لسه
والله اسمعوا هنا لابعرف ليكم عميد ولا أهلي
اذا ماشاركتوا هسي بكشف الأوراق
انت عارف ياقرشو وياقرجة ويا اساسي
ويافالكون والجعلي 00 قال سمينة قال
عارفين حا اتكلم بالكلام القاعدين تقولوه في المسنجر
غايتو على كيفكم أديتكم فرصة لحد نهاية اليوم
*******************
حبيب الكل
انت من عرست غتست غتسة عجيبة جداً
قلت سمعت حاجات خطيرة
اها ورووووووونا معاكم
قال خطيرة قال
ياحبيب مافي أخطر من العزوبية
انا على وشك الحضور للسودان
عاوز اقابلك
لكن لو المكتب بتاعك كلو زي ناس عمو قرجة وفالكون
اقول ليك من هسي ودعتك الله
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابوحراز)
|
يا أبو حراز
ما عرسنا ليك لآنك من قولة تيت ،،، شبكتنا خطيبتي وحب بي تي ،،، وما عارف شنو .... وما عملنا ليك كشف لأنك دايما بتجينا نص الشهر ...
شوف يا خوي ،،، طبعا الجالية في الطائف قليلة شوية
لكن هنا في الرياض ،،، الجالية كبيرة وطويلة وعريضة
أوائل المغتربين بي أسرهم ،،، خلاص بدو يعرسو لبناتهم
لينا كام صيف ،،، مهيصين في إستراحات الرياض
الخطوة المهمة للعرس وعمل الكشف
نقل خدماتك للرياض
أو نقل الكفالة لكفيل رياضي
وهاك الورد الطائفي
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابوحراز)
|
العزيز ابو حراز
ياخوي كان علي العرس ساهلة
بالله رسل لينا المعلومات كاملة ومعاها صورة حديثة وما تخاف لانو الخواجيات هنا ماعندهن شغلة بي جمال الراجل وسنقوم بنشر طلبك وشوف البحصل شنو والله لمن تستغرب وطبعا اليومين ديل هنا في رغبة مبالغ فيها للزواج من الافارقة بس الحقنا سريع بالمعلومات والصورة والباقي خليهو علي الله وياخوي بدون قروش بس تكون في كامل صحتك
دا كان داير تفرس الناس كلهم
عبدالله جعفر
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: Abdalla Gaafar)
|
السنجك
اول شيء انا لو ماقلت بسم الله ما اقدر أدخل البوست حقك
الصورة دي جبتها من ووووووووين ؟؟
بعدين عاوزني ابتسم أكتر من كدا
والله مرات النسوان ديل راسهن قووووووي جداً
لو شتتن منك تاني ما أظنك لحقتهن
*************
المهندس
عاوزون تاكلونا حنك سااااااااكت
نحن هنا شغالين بالهجري
تميت السنة زمان
ماقلت لينا رايك في الكشف
*******************
عبدالله جعفر
انتو ياتو خواجات
بالنسبة للقروش مافي
لكن بالنسبة للصحة ماعندك مشكلة
والله بس عاوزين نجيكم أهم شيء
اديني عنوانك
خلينا الواحد بعد كدا يكتب انطباعاته على الهواء مباشرة
طبعاً نحن ناس اهل العوض الواحد لو جاء العمارات بيكون مندهش اليوم كلو
فكيف لو جاء المانيا
او السويد
او امريكا
حاتبقى عليهو حكاية العربي لمن جاء الخرطوم لأول مرة
أكثر شيء استغرب فيهو اشارات المرور
وقعد جمب الإشارة
وبقى يقول : أمك 00 ولعت
أمك 00ماتت
أمك 00 ولعت
أمك 00 ماتت
أمك ولعت
هييييي 00 ماتت
أمك 00 سرقوني 00 طبعا اتلفت لقى الحقيبة سرقوها
قال أٌمك قال
لكن انا لو جيت ما أظني زول اشارات
مشكلتنا حاتكون مع البقر الفريزيان
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: Raja)
|
الشريف
جد انك صادق
كتير من ناس البورد الواحد بعد مايعرس بيختفي
ربما مسئوليات الزواج
لكن كلهم السنة الأولى بس
بعد كدا لو فتحت في أي وقت تلقى الراجل يتلصص ويكتب
وكذلك المدام 00
**************
ابوقوتة
لك تحياتي
كيف حالك
قلت لي في زواج بالنت
وزواج بالبورد
وزواج بالطرد
كلو دا مامشكلة
كدي انت ظبت موضوع الكشف والباقي ساهل
***************
رجاء
قلت لي برضو طلعتي من المولد بدون حمص
يعني سنة ناشفة
ولايهمك انا وانتي نشوف السنة دي
وكان ما اتوفقنا نجي مع بعض ونعمل نقابة
ولكن كما قلتي خرجنا بأشياء رائعة وجميلة
يكفي أننا اصبحنا مع عمالقة
نكتب لهم
ونقرأ لهم
ونضحك معهم
ونتشاكس معهم
ونصل احيانا حد التطاول عليهم
يكفي اننا اصبحنا قبيلة واحدة
وحب واحد
وفصيلة دم واحدة
تعلمنا هنا الكثير
وخرجنا بالكثير من الصداقات والود
دخلنا على هيئة بذرة ضعيفة واهنة
وخرجنا ونحن الآن أزهار متفتحة
| |
|
|
|
|
|
|
|
|
 Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابوحراز)
|
خالي العزيز ابو حراز
سلام ياطيب اناغايتو لا وصفتك بأبوالقدح لا بأبو جضوم ولا انك شين لانو سمعته.. سمعته انو الشتيمه بتلف وبتلف وترجع لصاحبه ماعارف الكلام جد ولا كلام "مصرين" ولا يمكن عشان الحال محصل بعضو,عموما انا غايتو عايز كل الورود العندك ومتخاف برجعه ليك (دبول).
____________________
بهديك كل الحب والاحترام
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: oudenoord)
|
عرديبة البورد
اب حراز
اذكر اننى حين دخلت البورد كنت ، اقنقش بالضحك
ليل نهار
من كثرة حكاويك عن خطيبتك الزرافة ذات الدوكة والبتنوم من المغرب وجدودك الرايحين
واب تلولة الذى نوى يزورك فتنازل عن كرامة تلولته من اجل التساهيل
اين ذهبت هذه الزرافة
وماعرستها مالك؟؟؟
حتى هى بى كرعينها المشققات ابتك؟؟؟
معناها انت مشكلتك مزمنة
المهم لك وردة من القلب بقدر ما ساهمت
باريحيتك وفكاهتك اللاذعة
وكذلك مساهماتك الجادة تنم عن عقل وقلب كبيرين
لك السلام
والف مبروك
بمرور عام
لكن انا جيت بعدك كيف عيد ميلادك يبقى بعدى
حساب ولا كوار؟؟
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: hala guta)
|
oudenoord
لن اهديك كل الورود التي عندي
بل سأهديك وردة واحدة
فهذه الوردة عبارة عن قنبلة
لو قدحتها بأنفاسك
فإنها ستنفجر وستتحول الى ملائيين الورود
لك حبي وتقديري
***************
العزيزة تماضر
وردتك المرسلة من القلب وصلتني بكامل رحيقها
فأنا عندما دخلت البورد دخلت بعدك
فقد كنت اتلصص على ماتكتبين
كانت كلماتك في غاية الروعة
ترددت الف مرة 00 كيف أدخل بورداً بهذه الضخامة
ولكنني حملت حقيبتي الساخرة وقررت الولوج معكم
فكانت ردودك هي من تمنحني القوة لأكتب مرة أخرى
حتى شعرت أن قدماي فعلاً قد بدات تثبت
اشياء كثيرة قرأتها لك 00 كانت أكثر من رائعة
مازلت احكي لإخواني وأصحابي الكسرة بالشاي بي لبن
واشياء كثيرة مازالت في الذاكرة
رقصنا معكم رقصة العروس
وتعمقنا في بوستاتك حد الجنون
ست النفر 00 لا ادري هل هي اسطورة أم حقيقة
ولكن ان كانت حقيقة حتماً ستتعرف عليكم يوماً ما
ستأتيكم 00 وسوف تمنحكم الكثير
***************
hala guta
طبعاً في البداية قلنا ست النفر دي حرير سوق سااااااااكت
لكن واحدات مما يعرفن انك خاطب وللا مرتبط ب ش ت ت ن طوالي
والحكاية دي حولتني الى سلعة بايرة ومنتهية الصلاحية
الواحد تاني لو دخل بورد جديد لابد يدخل بتصور جديد
يعني حكاية الخطيبة دي يعمل فيها ماعارفها نهائي
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابوحراز)
|
الأخ أبـو حـــراز ســـــلام كـتـيـر
علشان الناس ديل إعرفوا طبعا أنا اللي قلت ليك جضومك زي لقيمات الصدقة
بعدين العرس اللي إنت بتهاتي بيهو دا يا خوي أهلنا قالو الحداث ما سواي
و يا خـوي بي صـراحـة كـدا لـو كنت جادي فعلا في موضوع العرس أول حاجة
شـيـل صـورتك دي و جيب ليك حاجة رومانسية خالص وردة صفراء أو حمراء
عصفور جميل لكن خاتي ليك صورة ......... أجكسوك كيف و إجكسوك لي شنو ؟؟.
أنسى أهل العوض و في بوستاتك إتكلم عن حكايات أهل الرياض و المنشية و المعمورة
شيل ست النفر من بوستاتك و خت بدلها هيام و مرام.
إتلحلح شوية و أحفظ ليك كلمات برتاح ليها الجكس مش كلام الحبوبات دا
و زي ما قلت ليك شيل صورتك دي و حاول الجكس و لو واحدة قالت ليك رسل لي
صورة قول ليها إلا دي قول ليها خائف من العين علشان كدا ما برسل صورتي
و بي كدا إمكن تصل لي شى.
مع أمنياتي ليك بالتوفيق .
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: فيصل النعيمه)
|
ابوحسين
والله وصفة طبية جميلة جداً
يعني الوردة الحمراء دي بتليّن الرؤوووووووس ونحن ماعارفين
اما حكاية هيام ومرام وياسمين دي عندي معاها عقدة بطالة جداً
لأني مشيت أتطاول وصاحبت واحد في المنشية
المشكلة بيتو قريب من بيت الترابي
وكنت لمن اركب تاكسي
بسألني البيت وين
بقول ليهو جمب بيت الترابي
تصدق طوالي يوصلني 00 طبعاً ملح
اها صادقت واحد هناك
ودا كمان عندو اصحاب في المعمورة والرياض
يوم نشلوني في الخرطوم
لأنك عارف اهل العوض الواحد لمن يجي الخرطوم
اقل شيء بيتنشل
قام الأصحاب في المنشية والمعمورة والرياض عملوا لي كشف
وأدوني الورقة
حاجة ظريفة جداً
سوزان مائة الف
هيام خمسين الف
جوليا خمسة وسبعين
مرام خمسين
سوسن خمسة وسبعين
جوليتا خمسة وتمانين
بالله الكشف عندنا هناك في أهل العوض
لمن تقرأ الأسماء لازم تعطس
بس زي الشطة
حاج التوم عشرة جنيه
الفكي الزاكي خمسة جنيه
شيخ العوض الف جنيه
حاج قسم السيد خمسمائة جنيه
فرج الله الف جنيه
قال جوليتا قال
طبعاً ورقة المنشية دي لو طلعتها واديتها جدي
كان العكاز المضبب حايكسر راسي
********************
انت الأظرف يافيصل
لكن برضو جضومك أكبر مني ومنفخات زي لقيمات الصدقة
بس ماقاعدين يقولوا ليك لييييييييييه ؟؟
يا أخوي فيصل في قرية اسمها نعيمة 00 انت منها
منها واحد عربي نسيت اسمو درس معانا الثانوي
زول نضام نضمي شديد
وكنا مرتاحين معاه
دا تعرف كان بيدخل في المخزن بتاع الداخلية
وبجيب لينا المربى والطحنية
يعني نحن السنة كلها ماقاعدين نشتري أي شيء
أكل ملح ساااااااااااكت
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: HOPELESS)
|
ياسلام عليك يا ايهاب على هذه الروعة
بس لو كانت من بنت كان حاتكون أجمل
جميلة الشموع في كل حالاتها
عندما تنضيء وعندما تنطفيء
وهي فعلاً تسافر بنا الى عوالم نحبها ونعشقها ونهيم بها
لوحة معبرة جداً
سأحملها وأنا حافي الأقدام
لأضيء بها لكل الفقراء في العالم
لكل المضطهدين
لكل المعذبين
لكل العاشقين
************
هوبليس
والله بالجد زولتك ظريفوووووووووووونة
لكن اعتقد انها سكند هاند
أنا الطازجات عندي فيهن راي
تقوم تجيب لي تشليح !!!
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابوحراز)
|
ازيك يا ابحراز
مسألة جضيماتك ديل بدون زول يقرصهن ليك صباح وعشية بالتأكيد حاجة غريبة
على الأقل تاخد ليك خبطات على دنقوسك وانت سايق في طريق من خمسة مسارات عشان تشوف السيارة عندها توازن ولا لا
أوصيك بالإستماع لأغنية الجابري
ناس تحاول ليها مدة وناس بتهنأ بالوداد
الوداد مش التبليج
أو بالإنجليزي الدايفنج
بعدين الأوزان الثقيلة دي تجيك طائرة مثل الريشة
الأثاث لازم يكون من الزواية عشرة لينيا المدعوم بالخشب
تأكد انك تقوم بتصنيعه من ورشة صناديق اللواري البدفورد
بعد عمرك ده لازم تراجع مركز استشارات متخصص في عدم انكسار القلوب الهشة عشان ما تقصمك قشة
أو تعاقد مع مدرب الألعاب البهلوانية وخاصة لو طبت يدين حول زمارة رقبتك القول مو قولك والحال موهولك
انت قلت شي
حد سمع حاجة ياناس
ياناس ياشر كفاية قر
| |
|
|
|
|
|
|
|
|
 Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابوحراز)
|
الأخ العزيز أب حراز
أشهد الله أنك أديب مبدع، عميق الثقافة وان معجمك الصوري يظهرك أديباً صاحب تجربة عميقة الجذور بالعصر والانسان والذكرى.. إن صورك الأدبية تدفعني إلى الاعتقاد بأنك ترى المقال كياناً فنياً متكاملاً وسامياً بلغتك الأدبية الرمزية العالية التي تسمو على اللغة الإشارية. ان قدرتك الفائقة في الجمع بين الوضوح والتجريد قد تبدو سمة فنية بارزة من سمات شاعريتك المتدفقة فكراً وإحساساً وهذا ما توضحه هذه المقالة الرائعة.
وإن شاء الله كان ما عرست ست النفر في حرينا ما تعرس وتبور بورة بت المنى خير السيد
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابوحراز)
|
أبو حراز
مائة عام انشاء الله في البورد
يعني لما تعمل 120 سنة ذي ناسكم ديل ! لووول
لوووووووووول @ جدك الراح في الحج ليقيتوه
والله ماليهم حق
لا والله ماشاء الله عليك
انت محبوب في البورد من كل الناس وده شي واضح شديد
ده كله ما شايفه كفاية ؟
بس كدي روق المنقة ، وشيل الصبر
الباقي كله بيجيك لحدي عندك
نصيبك لازم يصيبك
في وردة فوق
تحياتي
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: ابوحراز)
|
الظريف أبوحراز ...
والله نعيمه دي كلوا اليشوف اسمي يسألني عنها .. طبعاً اشتقت أني أزورها.. نعيمه في النيل الأبيض منهاد/ عمر نورالدائم .. لكن أنا النعيمه لقب لجدي السادس .. انا من مطقة بربر ..
بالله انت ما عرفت أنا ما بسألوني ليه .. أنا عايزين مني شوا عشان يش؟أوني متزوج من زمان .. هم بقعدوا عاينا في غير المتزوجين ..
بنتي في أولى ثانوي لكن برضي اصغر منك يا ابوحراز..
مع تحياتي وتقديري لك ولجميع الاخوان والأخوات
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: فيصل النعيمه)
|
ثمانية يا مفتري ? كفاك ستونا..هاك الهدية دي..
أبو حراز ..في القفص الذهبي..و الكشف مفتوح )..
أخيرا ..قرر أخونا أبو حراز دخول القفص الذهبي..و الشغلانة حتبقي قفص حديدي و قفص صدري و قفص جداد(باعتبار ما سيكون)..لانو العروس (ست النفر) أنا شفتها..من النوع ابو كديس..و الله يا ابو حراز جد لي أمك..لكن (المرة) ما عندك!.
.
الحكاية كالآتي: بالأمس حضر أبو حراز عرس فرفور(في بوست أوضة العرسان)..و شاف العروس..و بقي يبلّع في ريقو..و انتهزت أنا الفرصة التي لا تعوض..و مسّكت الباب لي السنجك و جّريت نفسي شوية كدة جنب أبو حراز و بعد داك بديت معاهو في الدردقة..قلت ليهو شايف العرس سمح كيف؟قال لي آى والله سمح تب..قلت ليهو طيب مالك مضيع زمنك؟ البنت منتظرة منك اشارة! قال لي وينا هي؟أنا لقيتها و أبيتها؟..و هنا كان المقلب..لاني قدّمت دعوة سرية لي ست النفر..و قلت ليها تعالي لابسة كحلي لانو أبوحراز هلالابي..البنت طقّمت أزرق مع أبيض بقت جاهزة لحل مشكلة حراسة مرمي الهلال..خاتة ليها وردة بيضاء فوق قلبها بقت زي الفنار..طويلة طول!!..ما علينا..دة موضوع العريس..المهم انا فاجئتو و قلت ليهو ست (النفر قدامك..ادها نظرة)..و قدّمتها ليهو..زولكم العامل لينا فيها مكمّل الفصاحة بقي زي اذاعة قرنق..نفتش لي حسّو فتيش..قلت ليهو أثبت يا راجل..الموضوع ابسط من كدة..و خليتهم مع بعض و رجعت أمسك الباب..زولكم عشرة دقايق ما تمّاها..جاني يزح زحيح..و قال لي خلاص اتفقنا!!..و يبدو انهم حددوا كل المسائل المتعلقة بالعرس..و يبدو انوالعروس قالت الحفلة بي زيدان ولاّ ما دايرين!
عليه قررنا فتح (كشف) للعريس..انا ختيت ليهو الفيها النصيب..رجّعها لي و قال (بالريال)! و قال كمان الما بخت ليهو الليلة تانى ما زولو !!
| |
|
|
|
|
|
|
|
|
|
Re: عام أمضيتـه معكم ما عرستوا لأبوحراز وماعملتوا ليهو كشف ؟؟؟ (Re: Abdalla Gaafar)
|
المسافر
اولاً أكرر اسفي واعتذاري عن التأخير لأنني لم أكن متواجد خلال الفترة الماضية 00 لك التحية على المشاركة المعنوية
اما المشاركة المادية فلم نرى أي شيء حتى الآن
تعرف انتو باخوي وأخوك مافي أي طريقة نقلع منكم
بس لو عملوا لينا عرس جماعي بالبورد تكون المشكلة انتهت
قلت لي حاتجيك طايرة
الله يستر من الطيران
دا عرس دا وللا جمباز
ست النفر بالمناسبة وزنها 54 كيلو
عشان كدة حاتكون خفيفة
يعني حتى لو طارت بترك بسهولة
bushramk
شكراً على المشاركة
ونحن في انتظار المواعيد
مش قلت حايجنك براهن
نحيا ونشوووووووووف
ساري الليل
بالغت
والله الصورة رائعة جدا
بالله دي سودانية
بالله ست النفر رقبتها غاتسة غتسة بطالة جداً
ولاعفريتة بنشر ما حاترفعها فوق
من زمان اقول ساري الليل دا منو
تارك كاتل الجدادة و0000000
أهل العوض
واحد اتزوج في الشرقية
ارسلنا ليهو الكشف من هنا
والله انا محروووووق على الميتين ريال الدفعتهن ليهو
اول شيء لأنو اتزوج واحدة جميلة جداً
وتاني شيء بهيمة بهامة عدووووووك
ورابع شيء كان نام وقعد يشخر المراة دي لو شالها منو كلب مابتلفت عليها
وخامس شيء طلقها
قال ميتين ريال قال
اخي الملا عمر
اشكرك يا أخي بحرارة وأنت تخلق مني اديباً مبدعا
رغم أنني مازلت اتلمس الخطوات الأولى عبر نفق كبير يقودني الى حيث الدرجات الأولى في عالم الكتابة
وبعدها ستكون أمامي ملائيين الخطوات
وكما قلت فإنني عندما أكتب أي مقال أحاول أن اخرج عن النص لأضيف اليه نكهة خاصة
كان اصدقائي يستغربون عندما يراسلونني
فقد كنت عندما ارد عليهم ادخل مباشرة فيهم
وربما لا أكتب أسماءهم حتى نهاية الرسالة
أحياناً أبدأ رسالتي بوصف لوحة لسيزار
واتحدث بعد ذلك في كل شيء
حتى طريقة تحضير ملاح الويكة
أكره المواضيع الصامتة والجامدة
وأحاول قدر الإمكان ان أبث الروح فيما أكتب
لهذا احاول أن تكون مواضيعي ومقالات متنوعة قدر الإمكان
وأسعى لكي أنقل القاريء
من مرحلة الى أخرى
ومن رذاذ الى مطر
ومن سحب الى غيوم
ومن حالة الحزن الى حالة الفرح
وربما تجدني وسط كل ذلك أتسلل وأكون اوف سايد
بت الأحفاد 2003
عرفتك منذ 2001
كاتبة مبدعة بكل المقاييس
وتتطورت كتاباتك عندي فلماذا لاتكوني 2003 الآن
لك التحية
وانا ناوي ان انزل السودان عما قريب
واذا كان هناك زواج
فحتماً سننقله لكم بالأقمار الصناعية
عارفة عاوزين الملح
دي فرصة يغني لينا الموصلي وحمزة سليمان وسيف الجامعة
ونطرب مع رقصة العروس
لأنو المشاهير ديل لو انتظرناهم لحدت مايرجعوا السودان
فالرماد كال حماد
حايعملوا لينا فيها لازم تقابل مدير الأعمال وتتفق معاه
عاوزين نستفيد في وجودنا معاهم بالبورد ووجودنا معاهم
الباقين برد ليكم
ماشي اتغدى
لأنو العزابة عندهم معاي حساسية
كان اتأخرت بياكلوا الغداء
عشان يقعدوا يضحكوا بعدين
كتير عملوا معاي
وانا بيني وبينكم 00 الغنماية تاكل غداي
قال غنماية قال
والله انا آكلها وآكل التيس ذاتوووووو
| |
|
|
|
|
|
|
| |
ابوحراز
ابو جهينة
nazar hussien
اسامة الخاتم
HAMZA SULIMAN
Adrob wad Elkhatib
بدرالدين شنا
مهيرة
ولياب
7abib_alkul
alsngaq
almohndis
elsharief
abuguta
Raja
oudenoord
Tumadir
ABUHUSSEIN
ايهاب
المسافر
bushramk
sari_alail
بنت الاحفاد 2001
فيس بوك
تويتر
انستقرام
يوتيوب
بنتيريست