|
|
 إحذروا أن يصلي معكم العبيد والسود !!!!
|
خرجت قبل قليل بعد آداء صلاة الظهر
تفاجأ أحد المصلين بعدم وجود الفردة اليسرى من حذائه
وبحكم بساطتي وزمالته بدأت أبحث معه
ثم خرج علينا معتوه وسأله ماذا تبحث ؟
قال : فردة حذائي اليسرى لم أجدها
فقال له : هل صلى معنا عبيد ؟؟؟
فقال نعم : صلى خمسة منهم !!!
فرد عليه : أكيد سيكونون قد سرقوا الحذاء !!!
سبحان الله
وقبل أن يكمل حديثه إذ بفردة الحذاء كالشاة القاصية تقبع بعيداً
سؤال : من الذي زرع مثل هذه الأفكار في كل شعوب العالم
ولماذا كل الجرائم والسرقات واللامبالاة تقع على مسئولية السود ؟؟؟
|
|
 
|
|
|
|
|
|
|
|
Re: إحذروا أن يصلي معكم العبيد والسود !!!! (Re: Hussein Mallasi)
|
حبابك حسين ملاسي
كمان ازيدك من الشعر البيت
هنا يتعوذون من الكلب السود
والزول الأسود
والقط الأسود
والأرنب الأسود 00 هو في ارنب اسود ؟؟
والمشكلة جابت ليها عنب اسود !!!
قبل فترة سوداني قال لي واحد العنب الأبيض ماكويس
خذ من الأسود دا !!!
قام الاجل قال ليهو : أول مرة اشوف واحد يقول انو الأسود أحسن من الأبيض
أخيراً قرر يشيل العنب المنتهي الصلاحية
شوف ليك حقارة بشر
| |
|
|
|
|
|
|
|
|
 Re: إحذروا أن يصلي معكم العبيد والسود !!!! (Re: ابوحراز)
|
Quote: هنا يتعوذون من الكلب السود
والزول الأسود
|
.
حدث هذا معي في فترة تواجدي بالخرطوم وبالتحديد في مصنع مامون البرير, كان هذا عندما اجتز امام عربة احد الموظفين الذي كان في طريق العودة الي منزله وهو لم يشغل محرك العربة بعد , وسمعته يهمهم بالاستعاذة والخ !!
اثار هذا الانسان دهشتي وغضبي في ان واحد!!
ولكن كان رحمة الله لي اني لم ادم في التفكير في ذلك كثير بل حمدت الله ان لا احمل افكارا كهذه تجاه البشر اي كانوا... والحمد لله.
وهناك الكثير من الغرائب في ذاكرتي عن كلمة العبيد ولعبد والخ..
ونسال الله الغفران والرحمة
امين
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
Quote: ياخي الواحد لو جات قدامه راجمة صواريخ مابتعوذ منها بالطريقة دي
فكيف بانسان ؟؟
|
صدق استاذي ابوحراز.
ولكن يبقي المصيبة لو كان الانسان اسود!!!
وصدقني المهزلة دي موجودة حتي في اوساط السود برضو كالبقارة مثلا يقولوا للدينكا عبيد وايضا يقولالحمر لن المسيرية عبيد وبهذا المفهوم يتحرر الانسان (حر) كلما كان لونه فاتح انشاء الله لو بقي اسود فاتح!!
والصدمة ان يقال لعرب السودان عبيد بالخارج
وصدق المثل: مصائب قوم عند قوم فوائد
واسال الله الرحمة والنعمة
وليبارككم الرب . امين
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: نجود حسن عبد الرحمن)
|
نجود
انتي متين رجعتي ؟؟
شايفك مسجلة غياب كتير جداً
الصورة بتاعتك دي بالله مناسبتها شنو
شكلك كدا بتعايني في التلفزيون ؟؟
طبعاً انا مش محظوظ في الصور
اقول هذا الكلام وذلك لتبرير الشناة الظاهرة للعيان
لاتوجد عندي صورة جميلة نهائي
يعني الصورة عندنا هنا في السعودية 20 ريال
انا بدفع اربعين 00 لكن برضو الحال في حالها
اها الواحد لو عاوز الصورة تطلع جميلة يعمل شنو ؟؟؟
هسي واحد يقوم يقرا المداخلة دي يقوم يقول : انت في شنو والحسانية في شنو ؟؟
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: نجود حسن عبد الرحمن)
|
نجود
تمسح الوجه دا شبعنا فيهو
كان معانا واحد كل يوم نشوف وجه ناير
ونحن الغبشة ياكافي البلاء في كل الجسم
المهم سألته بيعمل شنو
قال لي : عليك { بقشر البرتكان }
يعني تجيب ليك كم برتكانة كدة وبالقشر تمسح وشك الشين دا
اها مشيت ر ملجة الخضار } واشتريت كرتونتين
والله العزابة اتخلعوا يومها
قاموا قالوا : يازول انت عندك سماية وللا شنو ؟؟
قلت ليهم : البرتكان دا بمناسبة مرور 28 عاماً على ميلادي
لكن بس تاكلوا البرتكان وتدوني القشرة
قالوا والله مافاهمين أي شيء : قلت ليهم ان شاء الله مافهمتوا
اها 00 هم ياكلوا وأنا اشيل القشر وأخت في الكيس
وانتظرنا المساء ولابد أن تتركهم يناموا
لأنني لو فعلت فعلتي أمامهم فإن غدا سينتهي كل البرتقال
اها اشيل وأمسح 00 اشيل وأمسح
صحيت من النوم الساعة 5 صباحاً عشان اشوف وش توم كروز
عليك أمان الله مافي أي تغيير
بس خسرنا 50 ريال بدون فائدة
قال قشر برتكان قال
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
Quote: عليك أمان الله مافي أي تغيير
بس خسرنا 50 ريال بدون فائدة
قال قشر برتكان قال |
تستاهل .. انا اقوليك سورة الحمدو تمشى نشترى برتكان
شكلك كدة مانفزت صاح تقرا سورة الحمدو كل يوم قبل النوم تلاتة مرات
وبعد ماتقوم من النوم تلاتة
بس اصحابك لوشافوك وانت بتقرا وعرفوك بتقرا فى شنو وقامو عملو زيك
الناس كلها بتبقى سمحة ويبقى مافى فايدة تانى تكوس الشنة ماتلقاها
ودى صراحة ماعندى ليها سورة.
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: نجود حسن عبد الرحمن)
|
نجود
المرة الجاية سوف أعدل الخطة
وسوف اقرا الفاتحة عشرة مرات
ان شاء الله يحدث تغيير
المهم يكون في تغيير
لأني بصراحة مليت كتير جداً
يعني في الطفولة والمراهقة وحتى بعد نهاية الدراسة النسوان كانت الواحدة منهن تجري وراك وتكرهك حياتك لو ما اتكلمت معاها أو بادلتها نفس الشعور
هسي تجري وراها تقوم جارية منك صوووووووووف
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
| Quote: بعدم وجود الفردة اليسرى |
ذكروني السكران القبضوا البوليس قال ليهم: دقيقة طاقتي.قالوا ليهوا ماأهو دي لابسا
قال ليهم: لا الفردة التانية.
............................................................................
ياربي كانوا قايلنهم بعملوا شنوا بي فردة واحدة؟ولا مافكروا في الموضوع دا..يكونوا..
إستغفرتك يامالك روحي.
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: Eng. Mohammed al sayed)
|
Eng. Mohammed al sayed
النكتة رائعة وجميلة جداً
عندنا برضو واحد سوداني يعمل مع اسرة سعودية ومحترم جداً وكلمته مسموعة
اسمو عمك ابراهيم
يعني راجل كله وقار وصلاح وأمانة وقل ماتشاء في الصفات الجميلة
أها عندهم بت عاد جمال عدوك
شعر منسكب حتى الخصر وبياض يستحي منه القمر
تقدم لها أحدهم للزواج منها
ولكن الفتاة الجميلة قابلت كل توسلاتهم بالرفض التام للعريس
وأخيراً لايوجد حل الا { عمو ابراهيم } لأن الجميع يسمع كلامه
وقالوا له لقد عجزنا عن اقناعها وجاء دورك اليوم
وبالفعل يثقون فيه جميعاً
انفرد بيها عمك الحاج وبدأ يقول لها في آيات الزواج والاستقرار
قرأ عليها ما قرأ وقال لها ما قال
لم يترك النساء ولا البقرة
ولاانس بن مالك
قال لها كل شيء من أجل أن تتزوج { براز بن جهيمين بن دغيليب الكلبي }
طبعاً دا اسم العريس كتبته لكم بضبانته
المهم بعد أن أكمل { عمو ابراهيم } المواعظ
قالت له : والله يا عمو ابراهيم لو اتزوج عبد زيك كدا ما بعرس براز بن جهيمين دا }
قال عمو ابراهيم قال !!!
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
مساك الله بالخير يا أبا حراز!
إنت عارف! ذكرتني موقف طريف حصل لواحد من الأصدقاء قبل عدة سنوات. كان هذا الصديق مسافراً عن طريق البر من الرياض إلى شمال السعودية وبرفته ابن عمه. وفي الطريق توقفا عند أحد المساجد. الوقت كان بالضبط صلاة العصر، لكن لم يجدوا أي واحد غيرهم في المسجد. المهم، صلوا لوحدهم، وبعد انتهاء الصلاة التفتوا للوراء لقوا كمية من الخلق بيصلوا وراهم.
في واحد كدا ما عجبه النظام دا وكان يرى إنو الصلاة ما جائزة خلف العبيد. بعد شوية في زول كبير (عجوز أو شيبة) اخذ الزول الزعلان دا من ايدو وأنبرشوا في نص المسجد وقد يتكلم مع صاحبه شكلهم بالضبط زي القاضي ومساعديه في المحكمة (المحلفين يعني). أتاري يا عزيزي كانوا يتناقشوا في مدى جواز صلاتهم خلف السودانيين. وفي النهاية الزول الكان زعلان اقتنع بكلام العجوز. إنت عارف اقنعوا كيف؟: أصلو يا أخوي كان بيشاكل فيه لأنه جاهل وما فاهم... قال شنو قال كيف يحرض الناس إنو الصلاة خلف العبيد ما جائزة والدليل هو الآية الكريمة: "أرايت الذي ينهى ، عبداً إذا صلى" . قال أقنعوا قال.
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ALHALAWI)
|
الحلاوي
مرة سوداني ذكر برضو انو في واحد قال ليهم
العبيد لايدخلون الجنة !!!!
يعني قرايتنا ياكافي البلاء وصومنا وصلاتنا كلو طلع فالصو
قلت ليه قول ليهم : نحن من 89 قاعدين نتزوج في الحور العين
وبرضو تقولوا ماندخل الجنة !!!
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: محمد السر)
|
كتبت نجود :
Quote: عارف يا ابو حراز انا دخلت البوست دة عشان العنوان قايلاك متلوم فى الجماعه ديل لكن
لقيتك والحمد لله مامقصر معاهم..
|
الجماعة ديل منو قصدك العبيد ولا السود؟ يعني انت بتقري كدا بانه في حاجة اسمها العبيد واطلقتي عليهم (الجماعة ديل) ..؟؟
يا ابوحراز
ياخي من فارقت الغربية وكضومك (كشت ) زي قماش الدمورية لمن يدخل الموية
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: اساسي)
|
قال قماش دمورية قال
رضينا بيكم وباجتماعاتكم الكلها مذكر دي
وبرضو ماعاوزين تتلموا
والله اشتقت انا برضو لجضومك
وكنت عاوز اشوفها عاملة كيف بعد العرس
عليك الله لو عرست صحي بس ماتعديها ليها كلها ميتافيزقية
الجندريات عاوزات كلام معسول
بعدين يوم زرت مؤسسة الجريسي
انت مش شغال هناك
فتشت عليك في كل الأقسام
وقلت ليهم اسمك الياباني والتايواني وكله ماعرفوه
طبعاً قلت عاوز امشي اتغدى معاك
لأنو انتو ياناس جدة بي اخوي وأخوك مابتجوا نهائي
الواحد الا يباغتكم
اتصل على الرقم دا 0507063205
قال طيرة قال
طبعاً استاذ في الابتدائي يوم قال لي : { ادخل ياطيرة }
والله لحد الآن بكرهو
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
شـكرا ابو حـراز علي كـلماتك... اعـتز كـثيرا برأيـك
Quote: يعني قرايتنا ياكافي البلاء وصومنا وصلاتنا كلو طلع فالصو
قلت ليه قول ليهم : نحن من 89 قاعدين نتزوج في الحور العين
وبرضو تقولوا ماندخل الجنة !!! |
ياتري الوضـع بالنسبة 'للسـود' في دول الخليج خـاصة زي البحـرين مماثل
لمناطـقكـم ولا أخـف 'وطـأة'
مـني
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: Muna Khugali)
|
منى
اشكرك كتير
أكيد الوضع كله زي بعضو
المشكلة ليست في دول الخليج
بل هي مشكلة عامة
حتى في السودان تفوح رائحة العنصرية في كل مكان
اذكر قصة غريبة جداً أن بعض القبائل عاملين لينا فيها عشرة بي قرش !!!
هناك قبيلة كدا رافعينا لينا رؤوسهم في السماء
اها قلنا نتزوج منهم
وانا عارف انو الموضوع الا تنزل معاه ليلة القدر
والشاكوش لابد منه
لكن برضو قلنا الواحد يجرب حظه
اها ارسلنا الجماعة الكبار البيعرفوا يصلحوا ويقعدوا الكلام
مشوا لأبو البنت وقالوا ليهو
والله اب حراز دا عاوز بنتكم
والراجل دا على خلق ودين وتربية سليمة
وأخو أخوان وراجل ملتزم وخلوق وودناس
قام قال ليهم : انا بتي دي مابديها
أها أكبرهم وأكثرهم وجاهة تدخل في الموضوع
وقام قال ليهو : اب حراز دا اضافة لما ذكر فقد كان مؤذن الجامعة
قام رد عليهو وقال : والله لو كان مؤذن الحرم انا بتي دي مابديها ليه
شوفي ليك عنصرية !!!!
| |
|
|
|
|
|
|
|
|
|
إحذروا أن يصلي معكم العبيد والسود !!!! (Re: ابوحراز)
|
العزيز ابو حراز
التحايا والود
التفرقة العنصرية سىء بغيض .. بسبب اللون تعرضت لكثير من المواقف الحقيرة
فقد ذكرنى الموقف الذى تعرضت اليه انت حادثة وقعت لى فى فارنا ( بلغاريا )
فهناك يقوم الطلبة الاثيوبيون بتبديل الدولارات ... ونحن بلاشك نشبههم فى السحنة
كثيرا ... ففى وسط المدينة كان احد البلغار يمشى خلفى ويتحدث معى بصوت عال
فلم اتوقف حيث اننى لاافهم اللغة البلغارية .. فأحسست ان صوته بدأ فى الارتفاع
شيئا فشيئا ..كما لاحظت ان الناس بدأوا ينظرون الينا فأيقنت ان الامر فيه سب وشتيمة وكان منظرا وقحا ظل فى ذاكرتى ختى الان ...رغم ذلك واصلت مسارى ولم اتوقف ابدا ... وتركته يشتم .. وفى اليوم التالى التقيت بصديق من غرب افريقيا كان يرصد الموقف فرجوته ان يترجم لى ما قاله ذلك البلغارى ... قتبسم فاحسست انه لايود ان يقول ولكننى اصررت عليه فاستجاب فكانت كلمات قبيحة تفوح بالعنصرية البغيضة..مثل ايها العبد القادم من الغابة ... لماذا لاتتوقف ... يا أيهاالاسود
يا ...... و يا.......هذا بالرغم من ان لونى ليس اسودا وشعرى ليس فلفلا .. فقد قال لى سودانى ظريف فى بلد اخر .. اسمع يا ابو الشباب نحن هنا كلنا عبيد بس نحن عبيد نضاف . فضحكنا بصوت عال .
النصرية شىء مقرف وبغيض وتحز فى النفس كثيرا .
لك خالص الود.
احمد داود
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: على محمد على بشير)
|
استاذنا علي
افو .. تنزل العصايه فى نص راسه واليحصل يحصل .
والله عافي منك
لكن هو بتلقاه عشان تنزل ليهو العصاية في راسو
معانا واحد هنا قال لينا اسمعوا
لو الواحد اتشاكل مع خليجي لازم ينجض الضرب حقو
لأنو في الحالتين حا يشتكيك للشرطة
لو ضربته بالراحة حايشتكيك
ولو لفختو لفخه كاربه برضو حايشتكيك
وفي الحالتين الشرطة حاتقول { العب } غلطان
{ العب } دي بتذكرني نكتة أبوداؤود الفنان المخضرم الرائع
قالوا في عريس بيشبه ابوداؤد شبه غير عادي
المهم ابوداؤد غنى للعريس حتى الصباح
اها العريس الصباح دخل الحمام عشان يستحم طبعاً
جات ام العريس ولقت ابوداؤود قاعد في الكرسي ويتثاءب من النعاس
افتكرتو ولدها العريس
قامت قالت ليهو : أظن { العب } اب تلاليش دا ساهر بيك البارح ؟؟؟
قام قال ليها : اسكتي عليك الله { العب ابتلاليش في الحمام مايسمعنا }
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: Ahmed Daoud)
|
أخي أحمد داود
موقف صعب جداً ومؤلم هذا الذي تعرضت له من اخوك البلغاري
وهذا في حد ذاته رسالة لي ولك بأن نعمل جميعاً ةبيد واحدة
نعمل من أجل أن نحارب العنصرية البغيضة
وأن نحملها الى مثواها الآخير
وأن نضع عليها الشواهد
علينا أن نقف مثل ابراهام لنكولن
ومارتن لوثر كنغ
وروزا باركس
واليكس هيلي
ومالكوم اكس
ونيلسون مانديلا
انه مرض خطير جداً
واعرف أن محاربته تتاج للكثير من الجهد
والكثير من الشفافية
لنتعامل مع الانسان على انه انسان
انسان مبدع وخلاق وذو طاقة هائلة
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: JAD)
|
جاد
جاد
قال شفيف قال
عارف الواحد مما يعدي ال 30 وال 35 تاني فارق الشفافية دي
يعني بصيبو خرف مبكر
ست النفر تسميها مراهقة متأخرة
يعني انا لاحظت معظم السودانيين في جيلنا دا بالذات أتتهم المراهقة متأخرة
ويبدو لي أن عدم استمتاعهم بالمراهقة في وقتها هو الذي جاء بالطامة هذه لهم
يعني مفروض بعد هذا السن يكون الانسان في مرحلة النضج
لكن بيني وبينك المقابضة ماتكتر الا في العمر دا
السعوديين عندهم قرار انو مافي واحد يشتغل في محلات الملابس النسائية
الا بعد أن يكون عمره ال 35 سنة ومافوق
قال شنو قال 00 عشان الناس الذين وصلوا هذه السن عاقلين !!!
سبحان الله
هذه السن كما يقول الجزار في المثل { يادوب حلت للدعس }
والسبب أن جزاراً سرق وتم قطع يده من مفصل اليد
فذكر أنها يادوب حلت للدعس
أي ان اليد بدون اصابع ستساعده في سلخ الذبيحة كثيراً
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
العزيز أبوحراز:
شكراً للموضوع..
ما زلت أحتفظ في جهازي الخاص بهذا الموضوع للدكتور عبد الله علي ابراهيم في عموده - آنذاك - بجريدة الصحافة(ومع ذلك)..
هذا العمود على الرغم من أنه نشر قبل ما يربو على العام، إلا وأنه يبدو طازجاً يحمل في جوفه جوهر ومضمون القضية محل النقاش كما ويحمل الكثير من التساؤلات و.. مشروع إجابة!!
Quote: ومع ذلك
شجن ود العرب ومحنه في شعاب الدنيا
د. عبد الله علي ابراهيم
قرأت لأحدهم في الإنترنت يعلق علي كلمة الأستاذ محمد محمد خير (الصحافة 5/5/2004) التي قال فيها أنه عربي شديد الإعتزاز بعروبته في وطنه السودان. ورد عليه أحدهم (ممن عاني من عرب المهاجر فيما بدا لي) يقول له سعيدة عليك عروبتك وبخيتة. وأذهب الي عربك الذين رفض اللبنانيون منهم قبول السودان بجامعة الدول العربية، ويسمي الفلسطينيون منهم حي السود عندهم بحي العبيد، والأخرين منهم الذين سيقولون لك يا عبد حتي في موسم الحج. وذكرني هذا بما كتبته عن متاعب السوداني العربي المسلم الشمالي مع هوياته متي خرج من صدفته المحلية الي فجاج العالم. وأعيد نشرها هنا للتذكرة:
يبتلي العالم السودانيين الشماليين في هويتهم أو هوياتهم العنصرية والثقافية بعد خروجهم الكبير في فجاج العالم. وبدا واضحاً أن مناعتهم الثقافية عاجزة عن صد سهام تفرس العالم لهم أو إستخفافه بهم. فقد هيأت الحركة القومية الشمالية، التي ما يزال لثقافتها وشعاراتها الغلبة في تكويننا الفكري، الشماليين الي أنهم أمة اصلها للعرب وأن دينها خير دين يحب. كما تربوا علي مغالطة ثقافية عنيدة لحقيقة سوادهم وسموه "بالخضرة" للتلطيف وأصبح السواد عنهم قاصراً علي "الزرقة". ومنو النفس أن الخضرة كانت فاشية بين العرب القدماء. وهيأت لهم انسابهم السمرقندية، ولسانهم العربي الفصيح، وإرتباطهم بمصائر العرب وآدابها عن طريق مصر، أن يزعموا العروبة لأنفسهم بغير كبير عناء. وحين يفيقون لأفريقيتهم فهم يقرون بها كحيز مكاني جغرافي إكتنف عروبتهم وإسلامهم أو كخبرة في النضال المشترك ضد المستعمرين نحو الإستقلال.
وكانت صورة "ود العرب" هذه عن نفسه سائغة الي حد كبير طالما إقتصر علي بلده ولم يتخطفه العالم. علماً بأن لم يأمن مائة بالمائة لهذه الهوية العربية حتي في داخل الوطن لأن اصل مسالة جنوب السودان هي في صلاحية ود العرب (بما يظنه في نفسه من عزة بهويته) لإحتكار السلطان أو تمثيل السودان بأي زعم كان.
لقد خرجنا الي العالم وقد توشحنا الهويات الأصاغر أي تلك التي استهجنها أهل الشوكة في العالم. فنحن سود، ومسلمون وندعي مع ذلك نسباً الي العرب.وساضرب صفحاً عن المرارات التي تجرعها "ودالعرب" السوداني في بلاد المهجر العربي والتي سمع فيها ما لا يرضاه عن سواده من العرب البيضان وهو الذي ظن أنه أمة منهم. أما كساد هوياته الأصاغر الثلاث الحق فقد ظهر له حين بدا يقيم في بلاد الغرب او الفرنجة. وقد قام سلطان هؤلاء الفرنجة وشوكتهم علي كسر العرب والإسلام وإسترقاق الأفارقة منذ القرن الخامس عشر الميلادي. وترافق مع ظفر الغرب بالعرب والاسلام والعرب نمو ثقافة سلبية تجاه جدارة أهل السواد والإسلام والعرب وقيمة ثقافتهم.
وأنتابت "أولاد العرب" حيرة ونزاع ويأس من هوياتهم الثلاث المبخوسة الحظ في الغرب. وأقرأ منذ حين علي شبكة الإنترنت صوراً من هذه المحنة السودانية الشمالية. فمنذ عهد قريب قرأت لنفر من أولاد العرب تجارب لهم مع هوياتهم الأصاغر في سياقات أمريكية. وأختاروا لها عنواناً شقياً هو "ملخبط وملخبطون" ( Confusing @ Confused). فقال واحدهم أنه اضطرب وهو يملأ خانة العنصر في أرنيك ما. فهو لم يضع نفسه من ضمن أهل آسيا الذين منهم العرب العاربة واختار أن يصنف نفسه في خانة السود. غير انه لم يقبل أن يضع نفسه في صندوق "أسود من افريقيا" بل وضع نفسه في صندوق "أسود من منشأ آخر". وحكي عما جري بعد المقابلة مع المخدمين الذين إحتاروا لهذا السوداني الأسود الذي أنكر افريقيته. وحكي آخر أنه كان مسافراً مع عربي في جنوب الولايات المتحدة. فأحتكا مع أمريكي أسود. فقال لهم بقصد الإساءة: "أنتم مكسيكيون وبس". فما كان من العربي أن قال للسوداني الشمالي" "هذا العبد يسبنا". واصبح السوداني كالمستجير من الرمضاء بالنار.
إن حاجتنا الي النظر الثقافي ماسة. فجماعة من أنبه شبابنا تضرب في الآفاق بلا تدريب في هوياتها الأصاغر سواء في الإلفة مع نفسها أو
في الوطن.
|
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
شكراً مرة أخرى أبو حراز وكل المتداخلين،
وددت أولاً إيراد معلومة تاريخية حول المقال الذي اقتطعته أعلاه من كتابات الدكتور عبد الله علي ابراهيم حتى نفهم السياقات التي كتب خلالها، حيث كانت تدور قبل حوالي عام ونصف من الآن سجالات ضخمة حول قضايا الهوية وتفرعاتها المختلفة عبر هذا المنبر.. كانت تماسات هذه القضايا تشتبك وتتقارب مع أطروحات (الأفروعروبية)، ساعتها كنا من على المساطب نتفاعل مع اللعبة الحلوة .. شد ما أعجبني حينها ذاك الطرق الكثيف حول موضوعة (النقروفوبك)، والتي أكاد أجزم بأنها من أثمر البوستات بهذا الموقع منذ تدشينه سيما وأن دفة الحوارات كانت يعزز من سخونتها نهج الشفافية الذي حدا بكل المتداخلين يومها بدلق كل مصطلحات وتعابير المسكوت عنه.. كما وأن مشاركة العديد من الأسماء ذات الحضور والطرح الخاص فيما يتعلق بقضية الهوية شكل دعامة لذاك البوست أمثال الأستاذ عجب الفيا، بشاشا وكفيله في البورد عادل عبد العاطي، عثمان محمد صالح، كمال عباس، عماد الدين وحافظ خير (فردة) وغيرهم.. وهو الشئ الذي أدى لخلق جلبة موازية للنقاش خارج مدارات الموقع تمثلت في ردود متابعي السجال من غير الحائزين على (باص بكري) أمثال الصديق محمد محمد خير والدكتور عبد الله علي ابراهيم وغيرهم عبر أعمدة الصحف اليومية..
يمكن بملاحظة بسيطة أن ندلل على علو كعب ذاك البوست، حيث أن المعتاد في صحافتنا السودانية أن تكون هي المبادرة ونلتقف منها في البورد ما هو صالح للتداول والنقاش حوله في شكل بوستات ما جعل من الساحة هنا عبارة عن رجع صدى لما هو منشور بالصحف في الغالب.. وأكاد أجزم بأنه لم يشذ عن هذا المنحى خلال العامين المنصرمين سوى البوست الذي ذكرته، وموضوعة (التيموليت) للعزيز محسن خالد .. فكلاهما مارس عملية (الفيدباك) بعكس إتجاهها الخطي الاعتيادي إذا صح إستقرائي!! محسن جعل الصحافة تأتيه صاغرة لتتجاذب وتشد أطراف فتوحاته الإسفيرية، وكذا بوست (النقرو فوبيك).
آسف إن صادفت مداخلتي بعض التطويل ولكن ما دعاني لإيراد السطور أعلاه هو اعتقادي بأن البوست الحالي يصلح كمدخل لإعادة إنتاج ذات السجال وفقاً للمعارف الجديدة المكتسبة خصوصاً وأن كثير من أطراف القضية ما زالت تشكل حضوراً عبر ساحات المنبر.
فكيف يكون الحال إذا علمنا كذلك أن هناك أساطين بهذا المجال قد نالوا حظوة الدخول مؤخراً لحوش سودانيز أمثال الدكتور الباقر العفيف؟
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: الفاتح وديدي)
|
استاذ الفاتح وديدي
لاحظت أن في هذا المنبر توجد مداخلات كثيرة أجمل من البوست الحقيقي
وتحمل جودة عالية وتطرح أفكاراً قمة في الروعة
مداخلتك اعتبرها بلا تردد سحبت البساط من البوست الأصلي
وفي الوقت نفسه منحته المزيد من الضوء
وقد دققت على جدار حساس لم يوفق كاتب النص الأصلي في الولوج له
انها مداخلة راقية جداً وهادفة
لك التحية
وسأعود للرد عليك
فقط أحببت أن اقول لك أن ماكتبته وكتبه الصحفي المخضرم
هو أجمل بكثير مما طرح شخصي الضعيف هنا
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: Hozy)
|
Quote: والزول الأسود
والقط الأسود
والأرنب الأسود 00 هو في ارنب اسود ؟؟
والمشكلة جابت ليها عنب اسود !!! |
اب حراز سلام
زمان فى واحد عزل ليه بطيخة كبيرة
من النوع العائلى وكانت عاجبة صحب البطيخ
لكن الزول اصر عليها وقال للتاجر افتحها لى ..اها
طلعت بيضاء..صاحب البطيخ قال للرجل على الطلاق
تشيلها..طلعت بيضاء زى نيتك
اها ناسك ديل نسبو للسرقة للعبيد
عشان بنوت مكة الابنوسيات البيعن النعلت
وبشتتن القمح للحمام....
زمان انا دخلت مستشفى فى الهند ليلا
ولقينا النبطشى دكتورة ...
وكنت تعبان شديد..اظاهر تسممم
اها الدكتورة قالت لى تانى ما تسكر يومى
حاول خليه كل شهر..لان جسمك مليان كحول
قلت ليها انا عمرى ما سكرت..قالت لى فى عبد ما بسكر
الزول المعاى انصار سنة متعصب
بس الله ستر ما كان بعرف انجليزى..وانا جعليتى هدت
وكنت ممكون عشمان فى علاجها..والا كان راحت فيها المسكينة
اها فتك عافية
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: abuguta)
|
Quote: اب قوته
اب حراز سلام
زمان فى واحد عزل ليه بطيخة كبيرة
من النوع العائلى وكانت عاجبة صحب البطيخ
لكن الزول اصر عليها وقال للتاجر افتحها لى ..اها
طلعت بيضاء..صاحب البطيخ قال للرجل على الطلاق
تشيلها..طلعت بيضاء زى نيتك |
كويس انها ما طلعت سوداء
قلت لي الدم كلو طلع مريسة
شوف حتى الهنود نظرتهم لينا بهذه الطريقة
والله لو على اللون فيهم ناس اسود من الفحم
قبل قليل كنت استمع لمونتي كارلو
لأنني متابع قضية المهاجرين السود في فرنسا
ونحن بنشوف فرنسا أكثر بلد متعاطفة معانا
لكن برضو اليومين ديل شيراك رفع ضنبو
سمعت المذيعة بتقول ان اسباب الهجرة الكثيرة هو الزواج الأبيض
يعني طلع برضو في زواج ابيض
لكن لم تعط تفاصيل عن الموضوع
ويبدو لي معناه أن الفرنسيات يقمن بتدبير هذا الزواج
والذي يبدو لي أنه يتم من أجل الهجرة
ولا أدري هل تتم فيه اشياء أخرى على طريقة الزواج التقليدي
أم أن الأمر مجرد أوراق لتمرير الاقامة بفرنسا ؟
بمناسبة المريسة
فعلاً لدينا جهل حتى اللحظة حيث توجد في بعض المناطق بالسودان
وأذكر اننا ذهبنا لواحدة من القرى النائية جدا
اول شيء قدموه لنا العرقي
وكان الشباب الذين معي ماشاء الله تبارك الله
انا الوحيد الذي كنت لا اشرب
فقلت لهم : والله لا اشرب العرقي نهائياً
فقال لي صاب البيت : طيب نجيب ليك مريسة !!!
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: Hozy)
|
الأستاذة هوزي
التفرقة في كل مكان
والعنصرية ضاربة في الأعماق
كان في سوداني عمرة
والراجل حاظ القرآن كله من البقرة حتى الناس
لكن طبعاً مافي ليهو طريقة يصلي امام
اها قام يوم السعودي صلى بالجماعة صلاة العشاء
وعلى التسودها عليه قرا آخر سورة مريم
وكان كل لحظة بيغلط
والسوداني يشيل ويصلح في صاحبنا
الراجل تضايق جدا من السوداني
اها انتهت الصلاة
قام قبّّّل على السوداني وقال ليهو
اسمع ياسوداني انت جيت تدور على الشغل وللا تصلح الناس البتقرا
والله تاني تفتح خشمك وراي الا اسلمك الشرطة واقول ليهم انت عمرة
اها السوداني تاني في آمين بقى مايفتح خشمو
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
Quote: جاد
قال شفيف قال
عارف الواحد مما يعدي ال 30 وال 35 تاني فارق الشفافية دي
يعني بصيبو خرف مبكر
|
قال مما يعدي 30 وال 35 ..
يعني بتدي إشارة إلى الأطراف المعنية بأنك في حدود الـ 35 سنة .. بالله قوم كدا .. إنت يا سيدي بالميت ساي قرمشتا لـ 43 سنة ..
قال 35 إنت .. إنت حلو يا شفيف .. قرقرقرقر  .
Quote: تااااااااااااني ياجاد
يازول انت نطحتك بقرة وللا شنو
هسي رديت ليك
نجود أخبارها شنو 00 ولا اشتغلت بيك 00 تستاهل
|
المشاركة جدعتها مرة واحدة لكن زي التنقزت كدا ..
بالله عليك نطحة بقرة سودانية ما أحسن من الشغل في السعودية .. صدقني طالع اليوم الصباح من البيت الساعة 7:40 دقيقة وصلت المكتب الساعة 8:25 ص .. وتيت تيت .. وإجيك سعودي يتلب قدامك بأضيق زاوية .. تقول نطحة بقرة ..
أخوك جاد بتعامل بحسن النية وبقول الغائب حجته معاه .. وإلى الآن متوقع الأستاذة نجود تعود وتعود تاني وتلقاني منتظر الإجابة ..
فلاش:
بيني وبينك الإجابة صعبة .. متل سؤال: بتحب شيخك ولا ملاح النعيمية بالسمن
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: JAD)
|
احمد داوود
اب قوته
هوزي
جاد
الله يجازيكم ضحكتونا كتير بمداخلاتكم الرائعة
وقد خفتم علينا مأساة فردة الحذاء
اها انا سوف ارد عليكم باذن الله كل واحد على حدة
بنستعد الآن للصلاة
والله يستر ماتقوم تروح فردة تانية
| |
|
|
|
|
|
|
|
|
 Re: إحذروا أن يصلي معكم العبيد والسود !!!! (Re: ابوحراز)
|
الاخ الرايع ابو حراز لك التحية والاحترام ؟؟
ذكرتنى فى واحد صاحبى اشترى حذاء جديد اول ما لبسه مشى صلى فى الجامع ولقى الصلاة فاتتو المهم فى اتنين حراميه متابعينو لما دخل المسجدواتوضاء ووضع الحذاء قدام وكبر قام الحرامية ديل اتوضوء ودخلو معاه فى الصلاة لزوه ليك قدام الحذاء بقى امام؟ سرقوا الحذاء ومشوا خلو ليك يصلى براه؟؟؟
كويس زولك كانت فردة واحدة ؟؟
ولك الود والاحترام
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: عبدالله ادريس محمد)
|
أنا ما محتار في الحصل دا ..
لكن شوف التفرقة في بعد تاني
في السعودية عادي جدا إنك تسمع (العرب ديك) يقولوا "تحت ...تحت" العبيديفعل كذا .. العبيد ........
مره جا واحد جعلي أحمق تالت يوم ليهو في الشغل ناداهو الكفيل ( تعال يا عبيد)
وطبعا عبيد ما إسم الراجل ..
عمك حنبك حنبكة شديدة وربط شنطو ..وسألوا زميلو ليه ماش ما عادي دا كلامم كدا ..
قال(أنا ما شي .. بلد ذي ما بفرزوا فيها الجعلي من العب .. ما لي قعاد فيها )
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ABDELAZIZ MAHADY)
|
ABDELAZIZ MAHADY
التفرقة العنصرية بغيضة جدا
وأسواء مافيها أن تمارس ضدك وفي بلدك
أذكر قصة لأحد جدودنا المتشددين جداً
والمشكلة لو شفته من السواد تستغرب دا جايي من وين
والعيون ماشاء الله { 24 } ساعة حمراء اللون ويتطاير منها الشرر
والمريسة لازم يشربها قبل الشاي
طبعاً كان ماشي مناسبة عزاء في احدى القرى
والجماعة جابوا اللوري وصاحبك لازم يركب قدام
المهم اللوري ركب فيهو اثنين كبار في السن من قدام
وجاء جدنا لقى الحتة قدام مليانة وكان السواق أسود
شوف العوارة دي 00 قال الا السواق يرجع يركب وراء وللا ما بمشي !!!
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: عبدالله ادريس محمد)
|
عبدالله ادريس
عليك الله لو لاقيت صاحبك المسروقة نعلاته قول ليهو ابوحراز بيسلم عليك
لكن بصراحة زولك دا بليد جداً
تعرف أنا لو كنت في محله
كان أول ما الجماعة لزوني قدام
قبل ما اركع بشيل معاي شبشبي
انا طبعاً كنت اذهب للمسجد بحذاء أي كلام واترك الجديد في البيت
يوم جانا ضيف أنصاري سنة وشافني لابس شبشب من الحرب العالمية الأولى
والشبشب الجديد قاعد يسمع في كلامه
اها قام قال لي : يا ابوحراز خذوا زينتكم عند كل مسجد
سمعت كلامو وعلى طول لبست الجديد
عليك امان الله لحد اليوم مالميت فيه 0
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: بلدى يا حبوب)
|
سلامات
يا أخوانا ما تتعبو روحكم ساي
أصلو السعوديين ديل لا بتعلمو ولا حاجة
ما سمعتو زمان بالولد الكان قاعد مع ابوه وسط جماعة كتار
قام واحد من بعيد بينادي يا عبد الله يا عبد الله
فرد واحد من القاعدين أي عبد الله تعني فكلنا عبيد الله
الأب قال لإبنو تعلم كيف ترد بي لباقة زي أخونا دا
بعد شوية برضو واحد من بعيد بينادي يا حمزة يا حمزة
قام الولد إتشوبر وقال ليه أي حمزة تعني ؟ كلنا حماميز الله
تحياتي
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: Fadl Karrar)
|
فضل كرار
حدثت معي قبل فترة قصة غريبة جداً
يوجد منزل سعوديين بجوارنا
وانا لزاماً علي أن امر بهذا المنزل يومياً خمس مرات لأداء الصلوات
يعني مفروض نكون تعودنا على بعض
أذكر مرة أنني أتيت من صلاة المغرب وكانت لديهم طفلة صغيرة جداً عمرها اربع سنوات
كانت تبكي والجميع يتوسل اليها بان تدخل المنزل
الأب والأم وأخواتها واخوانها وخالاتها وعماتها والخادمة والسائق الهندي
جميعهم يرجونها وكانت تبكي بحرقة وترفض الدخول
وجاء أخيها واعطاها 50 ريال في محاولة لإغرائها
ولكن دون جدوى
تصادف مروري وقتها
فقالوا لها : شوفي داك الزول جاي بياكلك
بالله بت الذين طوالي قامت صوووووف ودخلت البيت
وعندما وصلت قال لي والدها 00 الله يجزاك خير !!!!
طبعاً انا لم اسمع عبارة الزول جاي بياكلك الا يوم غد من السائق الذي حكي لي بالقصة وقال لي : { هذا بنت أنت شوف في خوف عشان انت في أشود }
طبعاً كلمة اسود ينطقها الهنود { أشود }
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
اكتفى برفع هذا البوست القيم حتى يستذكره العروبيون .
الفاضل الفاتح وديدى شكرا على التذكرة القيمة التى أوردتها.
أحيى من هنا فناننا الكبير أبوداؤد الذى حارب العنصرية تجاهه بالسخرية المريرة على طريقته الخاصة .
شكرا للأخ ابو حراز .
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: AMNA MUKHTAR)
|
AMNA MUKHTAR
لك التحية على هذه المشاركة وهذا التضامن
أحببت مثلك الفنان ابوداؤود لمعالجته الساخرة لبعض القضايا الاجتماعية
ومثله الرائع عوض دكام
هناك قصة مشهورة ايضاً للطبيب المخضرم عامر مرسال اخصائي العظام الشهير
يقال ان عربياً جاء ليتعالج من انحناء وتقوس في الظهر
وعندما دخل العيادة ووجد الطبيب أسود اصابه الغرور ورفض العلاج عنده
اذا كيف يعالجه هذا الأسود
وسرعان ماذهب للندن للعلاج هناك
ووصفوا له أكثر العيادات والأطباء شهرة
وعندما دخلها وجد فيها عامر مرسال ايضاً 00 سبحان الله
يقال وقتها كان لابد أن ينصاع هذا الرجل للعلاج
وفعلاً تم علاجه وتحول من زاوية قائمة الى خط مستقيم
يجب علينا أن نحترم عقول الاخرين وعلمهم وكفاءتهم
لا أن ننظر للونهم وأشكالهم 0
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
الاخ ابو حراز
السلام عليكم ورحمة الله تعالى وبركاته
اخى العنصرية شئ بغيض اذكر موقف لاحد السودانيين
بمطار طرابلس قدم جواز سفره لضابط الجوازات واسم السودانى
عبيد . ساله الضابط شن اسمك؟ رد السودانى عبيد
رد له ضابط الجوازات ادرى انك عبيد شن اسمك؟
وهذه واقعة حقيقية .
غايتو نعمل شنو دا مع العقول الناقصة!!
انتصار
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: عبدالرحيم ابوحراز)
|
الأخ عبد الرحيم ابوحراز
أوعدك يا أخي لو جبت ولد اسميهو عبد الرحيم
اها جهز بس حق السماية
والدي الله يرحمه { كمل قروشنا كلها }
كل ما واحدة تسمي ابنها عليهو 00 جخ ضبح ليها غنماية اللبن
عليك أمان الله بكرة نشرب الشاي سادة
مشيت معاه مرة الخرطوم
والله عمل فينا عملية عجيبة جداً
كل ما يجي { شحاد } يشيل ويديه
أخيراً قلعت منو القروش واحتفظت بيها عندي
الله يرحمهم ياخي 00
كانوا ناس قمة في الكرم والابداع
والصفاء والنقاء والبساطة
الآن نحن قروشك دي مابتمرق الا لمن تشوف ليك واحدة جميلة
هاك ياعصير وهاك يااسكراتش وياسوق عربي
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: انتصار محمد صالخ بشير)
|
أختي انتصار
كثيرون عانوا من هذه المشكلة
هناك تفرقة في كل مكان
وهناك استعباد
وهناك اضطهاد
حتى أنني عندما قرات كتاب {Roots} للأديب الزنجي الأمريكي المسلم اليكس هيلي
اصبت بالحيرة والذهول
فقد كان هناك عملاء سود من غرب مالي كانوا يبيعون العبيد للأمريكان
وكان لبعض شيوخ القبائل الأفريقية دور كبير في ذلك
والسودان ليس ببعيد
فهذا المعتوه الذي يسمى { الزبير باشا } قد أجحف كثيراً في حق شعوبنا
والشهادة للتاريخ طبعاً
فهذا الرجل حسب ماذكر التاريخ يعتبر مجرماً حقيقيا
وكل من له يد في ذلك فهو مجرم وليس في داخله ذرة من الإنسانية
بغيضة هذه العنصرية
ومؤلمة جداً
وياليت أن نحاربها مثلما نحارب الارهاب والايدز والسرطان
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
ابو حراز
Quote:
رضينا بيكم وباجتماعاتكم الكلها مذكر دي
وبرضو ماعاوزين تتلموا
|
يازول على الطلاق كل خميس نحن ملمومين كمان عاوز تلخبت ؟؟؟
الا انت العامل لينا فيها ثقيل وضبان ضكر
ما عاوز تظهر خايف يسحروك
ودى دعوة من الليلة كل خميس نحن فى انتظارك
شنو ليك ؟؟؟
وكمان قرييييييب ده عندنا حنة عريس
شنو ليك ؟؟؟
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: هاشم نوريت)
|
تحياتي من الأعماق لكل المشاركين في هذا البوست المتواضع
سأعود باذن الله للرد عليكم جميعاً
سعدت كثيراً بمداخلاتكم حزنت لبعضها وضحكت من اعماقي في الكثير منها
والحمد لله الذي أتى بهذا البوست لأعرف أنني { ضكر ضبان }
الله يجازيك ياقرشو
انتظر بنتلاقى في جده 00
يعني معناها ضكر الضبان دا مكره مرتو العيشة{ تستاهل }
ان شاء الله الرجال جميعاً يحذون حذو هذا الضكر
فالغلبة الآن كما أراها للأنثى
عندنا قريبنا لسانو طويل جداً
تزوج بت خالي وكنا خايفين عليها
لأنها مسكينة وأضينة والغنماية تاكل عشاها
زرتهم عشان ابارك ليهم ويادوب الجماعة في العسل طبعاً
والله لقيت صاحبك العريس شغال في المطبخ
انتهى من الطبيخ
جاء غسل { العدة }
طبعاً بمناسبة عسل دي { قرات موضوع أو مداخلة قبل فترة }
أحدهم كاتبها كالتالي { حبيبتي عثل }
والغريب رددها كثيراً
وتشاء الصدف أن عرفت أن كلمة { عثل } معناها ضكر الضبان
تمنيت ان لاتدخل الحبيبة البوست
لأنها لو عرفت المعنى الحقيقي ستصاب بالصدمة
قال عثل قال
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
الظريف ابو حراز كيفك يا راجل
تعرف كان عندي صديق ظريف شديد يوغندي في ماليزيا (الزول دا حسي ابوهو مسك وزارة السياحة يعني الواحد ليهو ضهر في يوغندا) المهم الزول دا يوم قابل ليهو هندي اسوااااااااد حتي هو كان قايلو سوداني المهم الهندي دا عينو اصلو ما نزلت من صاحبي اليوغندي دا ,قام اليوغندي اتغاظ شديد من الحكاية دي و قال ليهو بتعاين لي كدا لييييه ... قام الوهم الهندي قال ليهو لانك اسود و زاد عليها نيقرو .صديقي اليوغندي رد عليهو:my color is black , but at least a shining black
يعني اب سنة بضحك علي اب سينينتين
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: manubia)
|
اب حراز سلاااام
الشوق نيلين.. يا ود الجروف والطين
زمن ياخى وينك ؟ ..
يعنى لما تجيبك لينا فردة نعال ياكافى البلا
ضحكتنى يااساسى كتير بتعليقك الظريف على الزول الظريف
قول ما شاء الله بالله يا اساسى .. اب حراز ده ود حلتنا وفريقنا
وياها جضومو دى النحن بنتفاخر بيها .. ولا شنو يا ود البلد
اما اصحابنا العرب ديل .. والله معظمهم لاعندهم ذمه ولا ضمير
قريب ده ولا شيتا بعيد .. فى عمرة رمضان الفات ده..
فى مكه .. داخل المسجد شايفه الحريم خامات وطابات شباشبهم بدون مؤاخذه وتوووووووشك داخل المسجد ..
صراحه شىء ما حميد وانت داخل الحرم شايل ليك جزمه ولا شبشب عشان تختها قدامك ولا خلفك .. سالت واحده كانت جمبى ..ليه انتو بتجيبو معاكم الاحذيه داخل المسجد؟
قالت لى بكل بساطه ..عشان ما يسرقوها..
طبعا انا يوميا بشترى نعال على قولهم بى 10 ريال .. الحمد لله البقن رخاص..
ليه لانه بنختهم بره وفى مكان يعنى لوما قصدت تشيلو ما ممكن يتلخبط مع احذية باقى الخلق .. لكن التقول فى زول بوصفوا ليه .. يمشى ويشيلا . وزى كتااااااار
واتكرر نفس المشهد ده فى المدينه وداخل الحرم ..
الشىء الؤسف انه الناس دى جايه للعباده وفى اماكن مقدسه زى الحرم المدنى أو المكى ..ولا جايه تضاعف ذنوبها باشياء دنيويه لا تساوى ماديا حفنة تراب .. سبحان الله
وصدقونى ديل معظمه اصحاب البشره البيضاء .. يشاكلوك ويدافروك حتى فى الصلاة .. وبعدما الامام يقيم الصلاة.. واشياء كتيره يا اب حراز اكتر من فردة نعال العربى ده .. يقشعر لها البدن .. لكن نحمد الله على عزة نفسنا وكرامتنا وتمسكنا بدينا الاسلامى الحنيف..
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: soma)
|
Quote: يعنى لما تجيبك لينا فردة نعال ياكافى البلا
ضحكتنى يااساسى كتير بتعليقك الظريف على الزول الظريف
قول ما شاء الله بالله يا اساسى .. اب حراز ده ود حلتنا وفريقنا
وياها جضومو دى النحن بنتفاخر بيها .. ولا شنو يا ود البلد |
الرائعة الشاعرة المتفردة سوما
بالله عليكم الله انتي والعائلة في مكة وماتزورونا
نحن في الطائف في طريقكم
كان على الأقل نسمع تلفونكم ونجيكم جاريين
أصلي اشتريت لي خروف في رمضان
وكان محرق روحي
كل يوم نقول يجينا ضيف ونقضي عليه
لكن لحد قبل العيد بيومين الحمد لله ماجانا ولاضيف
قمت في النهاية بعته وسط امتعاض العزابة
المرة الجاية تعالوا لينا لو الظروف جابتكم هنا
بعدين بوصيك 00 لو كنتي عاوزة تعملي عمرة لازم الحذاء يكون قديم
انتي مفتكرة نفسك ماشة تحضري حفلة لماجدة الرومي
لازم عشان تحافظي على الحذاء يكون من النوع المتهالك
عليك أمان الله تمشي وتجي تلقيه في مكانه
برجع ليك مرة أخرى لموضوع العبيد والعنصرة
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: manubia)
|
منوبيا
| Quote: رد عليهو:my color is black , but at least a shining black |
والله حاجة عجيبة جداً
قلت ليك عندك ضهر في يوغندا
كمان ابشرك لو كان وزير السياحة عسكري
ثق تماماً يمكن يكون في يوم من الأيام رئيس ليوغندا
الدول الأفريقية والله ملطشة
قبل فترة واحدة في افريقيا الوسطى { عريف }
دخل على الرئيس في القصر الجمهوري
وجاب حبال وكتفو من يديه وكرعيه
ومشى الاذاعة وأعلن البيان رقم { 1 } استولى على السلطةورقى نفسو { عقيد }
الراجل استحى شوية طبعاً
ما ممكن من عريف الى مشير
برضو أظنو في ليبيريا واحد برضو وكيل رقيب { صمويل دو } استولى على السلطة
لاحظ رواندا وغيرها
شغب ليس له حدود
يستولي العسكر على السلطة في لحظات
بحكم محاربة الشغب كما يقولون
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: هاشم نوريت)
|
الأخ هاشم نوريت
للأسف رسخ في أذهان كل المعتوهين أن هذا عبد لمجرد اللون الأسود
واحيانا كل من هو سوداني فهو عبد
لا ادري من الذي زرع مثل هذه الأفكار
كما أن كتب التاريخ والدين تتطرق دائماً لمثل هذه المسائل
فمثلاً 00 كان مؤذن الرسول { بلال الحبشي } يطلق عليه عبد للونه
كما كان في زمن الجاهلية تعتق رقاب مثل هؤلاء السود
ولايتم تحريرهم الا بشرائهم
وهذا في حد ذاته أعطى انطباع للأجيال التي أتت بعد ذلك
فكل من هو أسود هو عبد
ابراهام لنكولن حرر هؤلاء الناس منذ فترة طويلة جداً
ولكن مازال الأمريكان يعماملون السود بانهم مواطنون من الدرجة المنحظة
وقس على ذلك بقية الدول الاسلامية منها والشيوعية
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: قرشـــو)
|
الأخ قرشو
بس حنة عرس دي أوعا يكون واحد من المتزوجين
ترا لو عملتوها تاني حانزعل منكم
يكفي الجعلي مما عرس { التانية } تاني مارفع راسو لي فوق
والله حضرت الى جدة كثير جداً لكن ماسمعت انكم اجتمعتوا
الخبر جاني من المهندس قبل فترة
كمان اتصلت عليكمم في { دلة } ولاحياة لمن تنادي
التحويلة غيرتوها وللا شنو ؟؟
برضو جيت ماشي بعندكم لكن قلت يمكن الجماعة نقلوا حتة تانية
المهم نحن في انتظاركم
مامامشكلة لو الحكاية فيها خروف أنا حقي جاااااااهز
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
الحبيب ابوحراز
والله بوستك جاب ناس عزاز بالحيل يا سيدى وانت تستاهل
ياخوى انت ادينا الو لما تصل ياخوى وعندك الموبايلات
أديك موبايل أساسى ؟؟؟؟؟ هاهاهاهاهاهاهاهاهاي
الحنة لى عريس جاهل وصغير ياخى ومعانا هنا فى البورد ده
الجعلى ياخوى والله الشافوا ثانى ما انشاف
اتاريه التدبيل بيسوى كده ؟؟؟
اوعك تعملها ....
ها ها ها ها ها ها هاي
المهم الحكاية كاربة والله وما تفوتنا
ونحن فى الانتظار
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: قرشـــو)
|
أخي سيد أحد الريح
طبعاً أول مرة أقرأ مداخلتكQuote: عندى ليكم سؤال بسيط ايها الاخ ابوحراز
لما نقول دا حلبى او حمريطى دى تفرقه غنصريه ام مداعبه..وشكرا |
الظاهر جماعتنا عشان شكلهم أسود وعمتهم الغيرة من اللون الأبيض
عشان كدا مشوا على طريقة المثل { المابتلحقو جدعو }
بعدين هناك بعض القبائل أو بعض الطوائف لاتزعل عندما تنعتها بمثل هذه الصفات
أو ربما يعتبرونها من الأمور العادية
لكن بيني وبينك في بعضنا طوالي بطلع ليك السكين
يعني كان معانا واحد بالثانوي معقد جداً
والغريب انه لونه افتح كتير من لوني
وكان انطوائي
المهم دائماً في الداخلية بنعمل نكات
وكان هو لابيدي نكته ولابتفاعل مع النكته
يعني لو { كلكلتو } ما أظن يضحك ليك
المهم في مرة من المرات اصريت عليهو انه يعمل نكته
والطلبه كلهم بدأوا يستمعوا له
لأنهم اعتبروا أن ذلك { سبق صحفي }
طبعاً مافهمنا اي شيء في النكته
المهم آخرها قال { انو الراجل الذي تم القاء النكته عليه }
ضحك لحدت ماسنو طلعت !!!
الجماعة طبعاً كلهم قعدوا يعاينوا في خشم الراجل منتظرين نهاية النكته
اها قام طلع السكين 00 قال ليهم والله المابضحك الا ابعجو بسكيني دي
أخيراً ضحكنا 00 نسوي شنو
| Quote: حمريطي دي بالمناسبة ماعرفت معناها |
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
ابو حراز
رئيس حزب الامة بالمانيا من اولاد الحواته تكون سمعت بها مش بعيدة من القضارف, المهم مشينا صلاة الجمعة في مسجد المغاربة , في محل الوضو سمع واحد مغربي بيقول ليهو لاتسرف يا بلال لا تسرف يا بلال لاتسرف في المويه
اها دي مش اخير منها ماتصلو مع العبيد
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: saif massad ali)
|
saif massad ali
قل له : كم نفخر كثيراً لو وصلنا الى مكانة بلال
هذا الانسان الذي يتسلق صوته الفضاء الرحب ليصل الى عنان السماء
تحضرني هنا قصة الهولندي الذي أنجبت زوجته توائم
كان أحدهم أبيض
والثاني أسوااااااااااااااااااااااااااااااااااد
وعندما طلب منه الحضور للمستشفى لاستلام توائمه
قام باستلام الطفل الأبيض
وقال لهم 00 دا ما حقي !!!!!
زوجته نفس الشيء قالت دا ما حقي
والمشكلة الأثنين ولدتهم
وكل الفحوصات أثبتت أن لها توائم
وأخيراً أخيراً تم اجراء فحص {DNA }الحمض النووي
طلع الراجل مش أبوه 00 ياساتر
ودخل المستشفى في مشكلة كبيرة جداً
للقصة بقية 00
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
| Quote: قصة الطفل الهولندي الأسود |
الغريب انو الجماعة أخذوا الطفل الأبيض
وتركوا صاحبنا الأسود يرفس في السرير
واصبحت هناك حالة استنفار بالمستشفى
وياما جات لجان حقوق حماية الطفل
ولجان حقوق حماية الانسان
ولجان حقوق حماية الحيوان !!!
المهم بدأت ادارة المستشفى بمراجعة كل السجلات
وخاصة التحاليل كلها التي أجريت للذين يودون الانجاب
وتم الإجتماع بكل موظفي المختبرات لإظهار الحقيقة
المهم رجعوا لليوم الذي أجرى فيه هذا الهولندي الأبيض تحليلاً للسائل المنوي
وتصادف في نفس اليوم أن هناك هولندياً أسود قد أجرى نفس التحليل
يعني هم أحسن مننا وللا أحسن مننا
ويقال أن الممرضة عندما ارادت أن تغسل الأنبوب الذي جرى به التحليل للأسود
حاولت المستحيل من أجل تنظيف الأنبوب
ولكن يبدو أن الحيوانات المنوية بت الذين دي مازالت عالقة بالأنبوب
وهي تخص صاحبنا الأسود 00 الله انعل أبو دي حيوانات !!!
ومن ثم جرى عمل اختبار في نفس الأنبوب للرجل الأبيض
تلكم الحيوانات العالقة هي التي أتت بهذا الطفل
تصور الرجل الأسود كان يحاول الانجاب منذ أكثر من عشرة سنوات
وفي كل مرة تطلع النتيجة مخيبة للآمال
المهم المستشفى عن بكرة ابيه ذهب للأسود في منزله ليبلغه بالخبر السعيد
زول نايم في البيت وزوجته نايمة معاه يأتي اليه مجموعة من الناس
ليقولوا له { مبروووووووووووووووك جالك ولد ياعم }
طبعاً لايمكن لأي انسان ان يصدق
ولكن أتوا به للمستشفى وأجروا تحليل الحمض النووي
ليطلع الشافع الأسود تيبكال مع صاحبنا دا
وللقصة بقية
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: قرشـــو)
|
الحبيب قرشو
| Quote: الحنة لى عريس جاهل وصغير ياخى ومعانا هنا فى البورد ده |
الراجل العريس دا عليكم الله انصحوه
أول شيء الجماعة في السودان منعوا { الطلح }
والكلام دا على لسان أخونا كبسيبة
يعني معناها الزول دا لو عرس الا { حفرة } الدخان يقلبها بتاعت مندي وشية
كما أن العروس أيضاً بيكون ليها طقوس معينة أثناء الدخان
وهي في هذه الحالة ستفقد هذه الخاصية
الا صاحبنا دا يحاول يغطي ليها هذا الفراغ
ان شاء الله يقرا ليها { طلع البدر علينا }
أمس عندنا في الطائف ارتفع سعر الطلح فجأة
سألني سعودي عن السبب
فقلت له { السبب هو ارتفاع سعر صرف العملات الأجنبية مقابل الريال }
قال لي { والله مافاهم اي شيء }
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
Quote: فقالوا لها : شوفي داك الزول جاي بياكلك
بالله بت الذين طوالي قامت صوووووف ودخلت البيت |
الله يجازي محنك يا أبوحراز
أنا إستمتعت بهذا البوست وخاصة بردودك التي تؤكد أنك تملك زخيرة من الحكايات الممتعة وتملك قلم ساخر وفنان كبير (لابد) بس
| Quote: إحذروا أن يصلي معكم العبيد والسود |
العبيد والسود كاحلات
لك حبي وتقديري
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: بدرالدين شنا)
|
شكراً أخي بدر الدين
أنا مازلت تلميذ في مدرسة السخرية
ولم انهل منها سوى ربع قطرة
منكم نستفيد
أها ضمونا معاكم لفرقة الأصدقاء
بس لو كان فيها الجنس الناعم
أما لو كانت كلها مذكر 00 اها دا طرفي منها
عافي ليكم لله ورسوله
أها مازلنا مع السود
مرات يمارسوا عندنا العنصرية في السودان بطريقة غريبة جداً
يعني واحدة تكون سوداء وزوجها اسود
يقوم المولود يجي ابيض
اها الحلة كلها تبقى تتكلم فيها
دا { جابتو } من وين ؟؟؟
وياما تلحقها الأقاويل أينما ذهبت
في المقابل تكون هناك واحدة بيضاء أو قمحية كما يقولون
وزوجها نفس اللون
اها الجماعة ديل يلدوه أسواااااااااااااااااااد
طوالي يقولوا ليك { البطن بطرانة }
قال بطرانه قال !!!
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
Quote: أها ضمونا معاكم لفرقة الأصدقاء
بس لو كان فيها الجنس الناعم
أما لو كانت كلها مذكر 00 اها دا طرفي منها |
فنياً أنت لائق ولكن لابد من كشف طبي
أما شرط الجنس الناعم فربما أغلق كل الأبواب أما إتمام الصفقة
هو ناعم لكن ليس كامل النعم
حقيقي أنا من المعجبين بك
لك خلاص معزتي وخوَّتي
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: Sidahmed elrayah)
|
Sidahmed elrayah
اشكرك على اهتمامك
لا اعتقد اننا في السودان نعاني من هذه الكلمة كثيراً
والمؤلم هو كلمة عبد لأن الناس يقولونها بشيء من العنصرية البغيضة
طبعاً قرقدي دي لن أنساها
فقد جلدنا فيها أحد المصريين
وهو بالطبع لن ينساها مدى الحياة
بل لن يقولها مرة أخرى
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: بدرالدين شنا)
|
الشفيف بدر الدين
| Quote: فنياً أنت لائق ولكن لابد من كشف طبي |
عاد لو الحكاية فيها كشف طبي لازم نشوف لينا شغلة تانية
الوجه خلاص اصبح ما زي زمان
والأضراس باقي لينا واحد محتفظين بيهو لخروف الضحية القادم
وبعديها الرماد كال حماد
شكراً على الاعجاب
هكذا 00 أنا 00 كل المعجبين لدي في سودانيز اون لاين من الرجال
يعني الواحد لو قرر يوم اجتمع بالمعجبين
لازم يتوضأ ويلبس الاحرام
قال معجب قال
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: JAD)
|
غايتو ياجاد عندك عكلته عجيبة جداً
عاوز النسوان يردن عليك باي طريقة
وبالصورة دي حاتطفش الجنس الناعم من بوستي دا
ذكرتني واحد قريبنا عوير جداً
طبعاً { الريالة } بتاعتو كل يوم سايلة في خشمو
وعنده بنت عمه جميلة لدرجة ماعادية
والأسرة بتاعتهم ماشين على طريقة { غطي قدحك }
يعني كلنا كنا خاتين يدينا في قلوبنا
وقلنا لو قال عاوز يعرس البت دي
خلاص الحلة كلها حاتصيبها هزة أرضية بقوة 9 درجات على مقياس ريختر
لكن الجماعة طمنونا وقالوا الراجل عوير ومابعرف حاجة اسمها عرس
لكن فجأة الراجل سواها ولايخاف عقباها
جاء لعمه وقال عاوز البت
عمو أصيب بالاحراج واهتزاز في المخ
وقام قال ليهو ياولدي ماباباك
لكن البت عاوزنها تكمل الثانوي العام
صاحبك { ريّل } وقال ليهو بنتظرها لحد ماتكمل العام
قام عمو قال : عاوزنها برضو تقرا العالي
صاحبك عكلتة شديدة طبعاً 00 قال ما مستعجل
عمك قال ليهو 00 عايزنها للجامعة
قام { ريّل } وقال ليهو معاكم لحد الدكتوراة
عمك زهج وقال ليهو : يازول أقول ليك حاجة
ماعايزين نديك عديل كدة
اها انت ماعايزين يردو ليك
قال الجنس الناعم قال
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: Abdelrahman Elegeil)
|
Quote:
......تعرف بطرفنا أمريكان سود مهجنين بالفرنسيين في ولاية لوزيانا لونهم أبيض متل الحليب ...رجالهم عيونهم خضر و بناتهم الحور العين جسومهن كالسحالي .....تشوفهم حلب المسالمة عديل لكن قاشين الوااطة وقاعدين عليهاوفخورين بأصلهمBLACK AMERICAN
|
ود الجيلى
ياخوى وقت مرقت الزمة يبقوا فوق عديلهم
ليهم حق يفخروا
لكن نحن فوق ام كم ياخوى ...
| |
|
|
|
|
|
|
|
|
 Re: إحذروا أن يصلي معكم العبيد والسود !!!! (Re: قرشـــو)
|
ياخوي الفايدة شنو هسع ما اهو خمسين سنة بنقول عرب ولسع الزرقة في محلو والشنة زايدة وفي اخرتها زدناها خرة من اليونان
واحسن تكون افريقي ابيض ولا عربي او اوربي اسود متشعبط في العباس وسيدي الحسن والحسين
وبن امية والاشراف.
وكان بيقيت عربي بجد تتنكر عشان شناتك وسواد لونك!!
وليبارككم الرب .
امين
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: Albino Akoon Ibrahim Akoon)
|
Albino Akoon Ibrahim Akoon
تعرف معانا واحد متشبق بهذه العروبة لدرجة غير عادية
بعدين الراجل عندو شوية وسامة
ومصاحب واحد سعودي موووووت
يقوموا ويقعوا مع بععض
وكانت بينهم صداقة غير عادية
صاحبنا يبدو انه عنده حالة انفصام
ودخل في دائرة غريبة جداً
وهي ان السعودي صاحبه مائة بالمئة
المهم الصداقة جرت وشوية هدايا وزيارات هنا وهناك
بعد فكرة السوداني فكر يتزوج
اها السعودي لديه أخت ماشاء الله
شعر منسكب حتى الخصر
وعيون بلون الليل والقمر
وثغر بطعم الكرز
هسي واحد حاينط ويقول { كيف عرفتو انه بطعم الكرز }
أها مشى ليهو في البيت
وقال ليهو انا عاوز أختك { هيلة }
السعودي قال ليه : والله لو ما كنت في بيتي لقتلتك دون تردد
طبعاً رغم ان الحكاية فيها اجحاف وعنصرية غير مبررة
بكن أنا كنت متكيف جداً من الساطور دا
قال صداقة قال
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: Abdelrahman Elegeil)
|
الأخ عبد الرحمن
شكراً لمشاركتك الجميلة والهادفة
سأعود ان شاء الله للرد عليك
لكن سوف أمنحك شوية مسكنات ريثما أعود للرد
هناك ممثل امريكي أسود رائع لا أتذكر اسمه الآن
هذا الممثل حاز اخيراً على الأوسكار عن أحد افلامه المسمى { راي شارلز }
وأصبح بيته قبلة لكل المعجبين
تحدث هذا الممثل بحرقة عندما ذكر أنه تعرض لموقف عنصري
ليس له بالطبع وانما لصديقه
حيث أخذ الممثل صديقه لأنه كان مدعواً عند أحد رجال الأعمال البيض
وكان كلاً من الممثل وصديقه عازفين للبيانو
لكنهما عندما وصلا الحفل 00 قال لهم رجل الأعمال
اني لا أستطيع أن أتحمل أسودين في وقت واحد
وسمح للمثل بالدخول
لكنه رفض ورجع مع صديقه
هذا الممثل اليوم وبعد أن أصبح بيته قبلة للزوار والمعجبين
يسمح فقط لرجل ابيض واحد بالزيارة خلال اليوم
بينما البيض يتوسلون بان يزيد من هذا العدد حتى يمكنهم رؤية بيت النجم
الغريب أنه يسمح بدخول كمية من النساء البيض يوميا لحاجة في نفس النجم الزنجي
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
Quote: طبعاً ياقرشو الجماعة ديل الواحد مما ترفع ليهو العصاية
طوالي يقول ليك : ما الخطأ في ذلك ؟؟
كلنا عبييييييييييد الله
اها في الحالة دي تسوي شنو ؟؟ |
غايتو في واحد صاحبي..
راح يهبدوا بالعصايه و يقول لي : جل من لا يسهو 
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
حكى لي صديق درس في ليبيا واشتغيل فيها فترة, بانهم مرة من المرات كانوا مجموعة من السودانيين في مكان لا اذكره بالظبط لكن كمااظن مركبة عامة واتى مجموعة من الليبيين ومعهم ليبي اسود. واحد من الليبيين فاتح اللون قال لليبي الاسود شوف اهلك ديل بشبهوك كيف, الليبي الأسود رد عليه وقال ليهو: والله لو ربنا خلقني زي ديل كنت حأنتحر
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: aosman)
|
aosman
Quote: واحد من الليبيين فاتح اللون قال لليبي الاسود
شوف اهلك ديل بشبهوك كيف,
الليبي الأسود رد عليه وقال ليهو:
والله لو ربنا خلقني زي ديل كنت حأنتحر |
لو كنت في مكان السوداني لأنتحرت أولاً
هذا ربما لايدرك قيمتنا
صحيح أنه يملؤنا السواد
ولكنا قلوبنا عامرة بالحب
وكما قيل عنا أننا شعب لايصدأ
انها حقاً قمة العنصرية المتعجرفة
هذا الموضوع يذكرني بنكتة للفنان المخضرم محمد الأمين
قيل أنه كان يقوم باحياء حفل في إحدى المناسبات
وكان هناك معجب بود الأمين ينتظر ود الأمين لينهي وصلته
وبالفعل حضر اليه وكان المعجب منكسراً جداً
وقال للفنان : أنا اسمي محمد أحمد
وأتيت اليوم لأعتذر اليك لأن لدي كلب اسمو { أسمر }
وقد حاولت كثيراً تغيير اسم الكلب
ولكن أهل الحي كانوا يصرون على مناداته { بأسمر }
وهذا الموضوع أزعجني كثيراً 00 لهذا أتيت لأعتذر اليك
فرد عليه ود الأمين قائلاً :
ولايهمك ياحبيبي 00 ماتزعل
انت خلي كلبك أسمر في محلو
وأنا بغيّر اسم أغنيتي وحا أسميها { كلب محمد أحمد }
| |
|
|
|
|
|
|
|
|
|
Re: إحذروا أن يصلي معكم العبيد والسود !!!! (Re: ابوحراز)
|
ما أقبحها تلكم العنصرية وما أكثر شيوعها في عالمنا العربي وحتى عالمنا السوداني لا يخلومنهاوإن كانت في السودان في غالب الأحايينتوجه كسخرية أومزاح
قاتلها الله وأزاحها عن مفاهيمنا وصدورنا
كنا طلاباً بليبيا
وأذكر أن صديق وجار بالسودان كان يعمل مع ليبي في متجر
ولظروف ما سافر صديقي فأستنجد بي للعمل في محله بدكان جملة
فسافر الليبي وسافر صديقي وأدرت المتجر بصورة جيدة لدرجةانه قال لي تعال نعمل بالنص وأترك الدنيا أم قدود التي تدعى جامعة
طبعاً قدرت موقفه وأحترمت رأيه ورفضت بأدب شديد بأنني لا يمكن أن أبيع صديقي
فقال لي نفتح دكان آخر
ما صدمني مع صديقنا الليبي أنني كنت مضطر للسفر خلاص الإجازة قربت تكمل وصديقي لم يحضر من السودان
ففكرت أن أحضر بديل عني
فوقع إختياري على قريب لزميل دراسة جلس فترة طويلة بدون عمل وكان قريب زميلي هذا شاباً وسيماً حباه الله ببيضة اللون
فلما أحضرته وأنا أعلم تركيبة هؤلاء الناس ذهبت بعيدا عن قريب زميلي لأقنع مفتاح الليبي
فبدون قصد خرجت منه تلك الدواخل التي تربوا عليها
عايز تشغل معاي العبد النظيف هذا
فضحكت ضحكاً عميقاً هز أرجاء المكان
قلت ليه يا عديم الذوق يعني أنا عبد وسخان
حاول الإعتذار بأنه لا يقصد
ولكن لا فائدة
ومرة حضر هو وبناته أغلبهن دون الخامسة فذهبت لأصغرهن وكانت تبكي فحملت لها كيساً من الحلوى وطيبت خاطرها فسكتت
ثم ممازحا طلبت منها أن تذهب معنا البيت لترى بناتي
فكان جوابها والتي حسبت أنها لا تتكلم
نحن ما بنمشي لبيوت العبدات ولو نظيفات يعني بيض
طبعا لمأحس بالحرج الذي شعر به والدها فقلت له ما تربوا اولادكم تربيةجيدة
لكن هذا يعكس ما بداخل تلكم البيوت العربيةوأن معالجةالأمر صعبة جدا
المهم الصبر لغايةما يعدل الحال في بلدنا
ونرجع نظيفنا على وسخاننا
فهل أنت عبد نظيف؟
عموما لو في سوداني حلبي ما يفرح فهو في ليبيا عبد نظيف.
وبعدين ما سمعتوا بحكاية السوداني الإسمه الله (إستفغر الله العظيم) الوقفوا بيها طائرة كاملة في المطار؟
وإلى لقاء آخر
| |
|
|
|
|
|
|
| |
ابوحراز
Muna Khugali
Hussein Mallasi
Albino Akoon Ibrahim Akoon
قرشـــو
saif massad ali
اساسي
Ahmed Daoud
على محمد على بشير
JAD
الفاتح وديدي
abuguta
Munir
بلدى يا حبوب
Fadl Karrar
AMNA MUKHTAR
هاشم نوريت
manubia
بدرالدين شنا
Abdelrahman Elegeil
saadeldin abdelrahman
aosman
othman mohmmadien
فيس بوك
تويتر
انستقرام
يوتيوب
بنتيريست