04:02 AM Oct, 21 2015 سودانيز اون لاين Kabar-كـــندا مكتبتى فى سودانيزاونلاين
(1)
الصديقات ، بت ابا اميرة السيد.. بت ابا بسمات الشيخ.. وصديقنا ول ابا على عبد الوهاب.. حبابكم..
صدفة غريبة ، او هي قد تكون ليست بالصدفة ، حينما بدينا كتابة (امسودان: عن اناقة الغيم والقونقليز والحرجل).. كنا قد ذهبنا الى مجالي جنوب كردفان الحنينة..وقامت الحكومة توشك خشت شمال..و اعلنت مدينة كادقلي بانها عاصمة التراث السوداني..و احتفالات ووعودات بمشاريع منها افلام وثائقية ومكتبات ومسارح وحاجات كتيرة خلاص..فقلنا كويس الحكومة مرات بتسمع كلام الناس التحت..!
مدينة كادقلي ، عكس مدينة الدلنج.. تحيطها الجبال من كل ناحية ، وهي جبال عالية شديدة..وفيها عيون طبيعية مثل عين (كــُلبا) و(مــُرتا)..وفيها اساطير عجيبة ومدهشة عن ثعابين تحمل الجواهر الطبيعية وتسرح في الليل في قمم الجبال على ضوء تلك الجواهر المدهشة..والحاجة دي انا شفتها بعيني ..!
قضيت فيها تلاتة سنين ايام الدراسة في مدرسة كادقلي الثانوية الحكومية..في منتصف التمانينات من القرن المنصرم..واذكر فيها مشهد عجيب.. حيث كنا نصحو في الصباح الباكر ونشاهد منظر قمم الجبال والمآذن وهي تسلل برشاقة فوق غلالات الضباب.. أي والله الضباب الواحد ده..!
عشان كده ما كنا بنستغرب لمن صديقنا واستاذنا الشاعر والقاص والمسرحي يحي فضل اهمق..حينما عمل اجمل واغرب اهداء..وكان لمدينة كادقلي وقال فيهو (كادقلي المدينة التي علمتني التأمل)..!
(2).. من الحاجات الطريفة..مشينا من الدلنج عشان نقرا المرحلة الثانوية في مدرسة كادقلي الحكومية..و اسمها (تلو)..و تلو جبل ضخم يقع في شمال شرق المدينة..و اسمو تلو حجر الطير..!
عاصرنا اخر ايام استاذنا المرحوم يوسف كوه ، وكان استاذ اللغة الإنجليزية..والمدرسة اتخرجت منها خلق كتيرة خلاص.. منهم ول ابا بريمة عضو المنبر..واخونا فضل الله خاطر عضو المنبر..ومن القدامي دكتور الحاج ادم يوسف (نائب رئيس جمهورية امسودان السابق) وحاج ماجد محمد سوار (الوزير في كم حتة ،والآن يتخيل لي سفير)..وناس تانية كتيرة..!
جماعة السديم المسرحية ، اول ظهور ليها اشتغلت في كادقلي..و منهم كنا نحفظ قصيدتهم الجميلة (تبقى مني وابقى منك..حبيبتي زعلانة اظنك.. يا اللذيذة يا الكلكي جنك)..!
وبدري شوية ، خصوصا الناس العواجيز ..بتذكروا مسرحية مشهورة في امسودان اسمها (خطوبة سهير)..وفي المسرحية دي كان بيرد ذكر بعض احياء كادقلي (كلموه ، مرتأ ، كــُلبا)..!
قبل انقلاب عمر البشير بتلاتة شهور.. كان البشير قايد منطقة غرب النوير..و ناس الجبهة الإسلامية ، خارجوهو..في فترة استجمام وكانت في مدينة كادقلي..اها اخينا كان بيمشي الجبل ناحية عين كــُلبا ، وبيعمل بروفة لخطابو بتاع الإنقلاب..!!!
ناس كادقلي كانوا عاملين نكتة بالحكاية دي.. فعمنا واحد ، الله يطراهو بالخير.. قال لينا زولكم ده (يقصد البشير) كل يوم بالعصر بيمشي الجبل ويقعد يطقع بالحجار (الشعب السوداني البطل ، اها المواطنون ..وشنو كده ما عارف) لمن مرق رئيس جمهورية..وعينكم ما تشوف الإ النور..طقيع وفليق وشلاليت لمن الشعب قال الرووب..!
وكانت كادقلي مسرح احداث روايتي المنشورة في هذا المنبر (اٍختفاء: حكاوي الزمن الموات)..!
ح نضيف بعض الفيديوهات.. لأنو اليوتوب كتر خيرو قرب المسافات والشوف..وهي عن مدينة ..كتير من الناس سمعت عنها بالخير..والشر الوحيد حكاية جوطة ناس قطاع الشمال بتاعة الكتمة..ونقة احمد هرون..! ولكن..!
يظل هناك الإنسان النبيل ، الإنسان الذي يحكي عن المدينة بروح نبيلة للغاية..
في هذه المدينة ، ولأول مرة اشوف ناس حكايين شديد مثل ناس كادقلي..اخونا الأمير..محمد رحال.. استاذنا على جمعة سنقادو..عمنا القبطي وصفي قنديس (وهو رجل لم يغادر كادقلي في اصعب اللحظات واشدها حلكة)..وعمنا الحاج مبارك شيبون ..وهم يحكون عن المدينة..نشأتها ، انسانها ، ايامها..وذكرياتها..والأهم.. فكرة الأحلاف التي كانت تنشأ في المنطقة ..و يا بسمات لو لقيتي طريقة هناك كتاب لواحد من ابناء جنوب كردفان ، هو صديقنا واستاذنا حامد ابراهيم البشير ، وهو استاذ انثروبولوجيا درس خلق كتيرة من الناس الحايمين هنا.. عندو كتاب عن تاريخ التعايش والأحلاف في جنوب كردفان والعلاقات بين الناس هنا..يا ريت تلقي الكتاب ده.. جبت معاي نسخة من امسودان لكن لغاية الليلة طاشة..و بريمة بتكون معاهو نسخة..باقي اليومين ديل شغال استثمار ساكت.. لكن ح يديك نسخة هدية..!
كبر
10-21-2015, 05:26 AM
Kabar Kabar
تاريخ التسجيل: 11-26-2002
مجموع المشاركات: 18547
(4) كتر خير صديقنا واخونا عضو المنبر ..صاحب التجربة الفذة التي تمثلت في سلسلة فيديوهات اسمها (سودان فيديو)..وفيها جاب كل ربوع امسودان (وعندو فيديون عن عطبرة يا بسمات) وكان بيصور بنفسو..هذه التجربة لم يتناولها احد..بتحليل عمقها القائم على فرضية كبيرة (انو ناس امسودان مشاكلهم انهم ما قاعدين يعرفوا بعضهم البعض) ، وهي الفكرة التي تطرح عن مبدأ التنوع الثر في امسودان..اخونا ، كتر خيرو.. قام اختبر الفرضية دي على ارض الواقع ، وحاول يثبتها برحلاتو لكل بقاع امسودان..و اكيد استفاد كتير..و الشعوب السودانية استفادت اكتر..طبعا صديقنا من قبل طلب منا الأ نذكر اسمو.. ويا ريت يسمح لينا.. لأنو قنوات كتيرة في امسودان قاعدة تسرق الفوتش بتاعو وبتعرضو بصورة توضيحية من غير ما تذكر المصدر..!
صاحبنا استفاد من نقتنا الوصفية عن الدلنج وكادقلي ..و قام بتصوير المدينتين..و هنا .. لأنو الحديث عن كادقلي.. فح نستلف منو بعض الفوتش.. البتوضح فكرة انو كادقلي محاطة بالجبال..
كبر
10-21-2015, 05:32 AM
Kabar Kabar
تاريخ التسجيل: 11-26-2002
مجموع المشاركات: 18547
يا سلام استاذنا كبر .. هكذا رجعت إلى قواعد الابداع .. كنا في إنتظارك ولم تخيب ظننا .. بوصفك الدقيق للجغرافيا والديموغرافيا جعلتنا نعيش وسط أهلنا هناك ( لا زمن ولا مسافة )
بعد الحج مباشرة وفي ( فندق نباريس ) في جدة كانت هناك ليلة تحت مسمى ( نوبة السودان ) لتنجاوز ( الشمال والجبال) وألقى فيها اللواء معاش بروفيسور شمشون خميس كافي ( عميد جامعة الرباط ) محاضرة عن الشعوب الاصلية .. وكان لي شرف إلقاء مداخلة تراثية عن نموذج المشترك الثقافي وكان الموضوع ( المصارعة ، الصراع ومصطلحاته في الشمال ) كثقافة أصيلة كنا نمارسها
صدقني أستاذنا كبر طوال تلك الليلة كنت أستحضر مقالاتك وابحاثك ولم تغب عن خاطرنا .. ليتك كنت معنا في تلك الليلة ..
ثم كان الشيخ حامد دامر الناشط المؤسس لهذه الروابط في جدة هو من نظم الليلة ( وإنتهز فرصة وجود هؤلاء ضمن بعثة الحج)
وكانت الخاتمة بمداخلة من الوزيرة عوضية باشا ..
هكذا تجلت ملامح الوطن .. فطوبي لوطن بدايته من النوبة ونهايته من النوبة .. واحسب أنه بين قوسين من الذهب الخاص
يا أخى .. أرحتنا من عناء الغربة .. أهل كادقلي طيبون .. هل تصدق من شدة طيبة أهل كادقلي، حينما رجعت للمدينة عام 2012م بالصدفة وأنا أتجول فى سوق المدينة أجد أستاذ محمود من أبناء كادقلي ... أخر مرة رأيته فيها كنت فى المتوسطة. أمسكنى أستاذ محمود فى سلام طويل .. قلت ليه يا أستاذ محمود، أهلنا بقولوا الكبير بودر الصغير .. قال لي أنتم أولادي وكنت معكم صباحاً ومساءً .. كيف أنساكم! ..
عبد العزيز الحلو كان طالب بكادقلي الثانوية .. وكثيرون من قيادات الحركة الشعبية.
بجيكم بعد الدوام للطبيعة والبيئة والأنسان ..
بريمة
10-21-2015, 11:43 AM
nour tawir nour tawir
تاريخ التسجيل: 08-16-2004
مجموع المشاركات: 17638
و قامت الحكومة توشك خشت شمال..و اعلنت مدينة كادقلي بانها عاصمة التراث السوداني.. ...
ما ان رايت كادقلى فى صدر المنبر.. حتى دخلت توش بلا مقدمات.. فقد نقلتنا فى لمح البصر.. الى حضن دافئ... وجذور عميقة.. وراحة بال اصبحت كل همنا أن تعود..
وبمناسبة عاصمة التراث هذه.. فأن كادقلى.. من أكثر المدن السودانية التى تستهدفها حكومات المركز كما تعلم.. وبشكل يحمل(غبينة) عجيبة... وقد وصلت هذه الغبينة.. الى ان قامت ألانقاذ عام 2007 بقطع كل الشجر الذى يظلل كادقلى... ويجعل منها جنة وارفة لآهلها ولكل وافد.. وتركتها جرداء تندب حظها.. وكان المبرر... هو أن الحكومة تحتاج الى الحطب فى شمال السودان !!! هل سمعت بمثل هذه ( الغبينة) من قبل ؟
المهم فى ألامر هو أن اوراق الشجر قد نبتت مرة أخرى.. وعاد لكادقلى جمالها والقها.. ولا ندرى ما حل (بالحطب)!
اسعد الله صباحك بألف خير.. وأن كنت قلقة من مصير البوست.. الذى قد يختفى بقدرة قادر.. فى ظروف غامضة..
سلام لكل الأبّات، الواحد لمان يلقى ليهو بوست لكبر يكون اليوم كلو بفكر ليهو بمداخلة تليق "بغلال الجبال الشفيفة" عربون مداخلة: لو في زول خلانا نحن ناس الوسط الجلابة ديل نعشق كادقلي دي من غير ما نشوفها فهو يحيى فضل الله العوض هل تصدق يا كبر، انو أنا في السودان كنت كلما ما أمر لي بطابونة وتلفحني ريحة الرغيف بتذكر كادقلي، وبتخيل روحي دخلت الفرن دا وشلت لي رغيفة حارة ومسحتها بعرق أباطي، وشميتها ورفعت أنفي للنجوم ثم قرمتها ومضغتها بتلذذ كما في حكاوي فضل الله! وأتخيل المدينة محاطة بهلال من الجبال الخضرا وأنا زي النجمة الأسلامية تتلألأ مع الهلال
ابوذر..حبابك يا صديق كتر خيرك على المرور.. حكومات امسودان لو انتظرناها عشان تفهم ..ح تعمل نايمة طول عمرها..! كردفان يا صديقي ، على قول البروف على مزروعي عن افريقيا كلها ، بلد لو قطعت اضافرك من باب النضافة ورميتها في الأرض بتقوم ليك شجيرة ما..!
المحزن الغريب يفهم عنها اكثر من اهلها.. فامريكا مقاطع نظام امسودان وفارضة عليهو حظر اقتصادي لعشرات السنوات.. وبتدخل انفها في اي نزاع دموي في امسودان.. ما عدا الجزء الشمالي من كردفان..خالي تماما من النزاعات الدموية..عارف ليه؟.. لأنو ده الحقل الوحيد البينتج اجود انواع الصمغ العربي..و الصمغ العربي مهم لعديد من الصناعات الأمريكية عشان كده حاصل ليهو استثناء من الحظر الإقتصادي..طيلة سنوات المخاصمة مع امريكا الصمغ بتاع كردفان طوالي بيمشي امريكا وبطريقة رسمية..! عموما كردفان فيها حاجات كتيرة سمحة ومفيدة..و جنوب كردفان اغني اقليم بعد ذهاب الجنوب..بس ربنا يهدي النفوس والناس تقعد في الواطة..! لو لقينا لينا فرقة سلام شوية وفيدرالية حقيقية.. ممكن نخلق شراكات اقتصادية بين كردفان وحتات تانية كتيرة..والك يستفيد..
كبر
10-21-2015, 08:23 PM
Kabar Kabar
تاريخ التسجيل: 11-26-2002
مجموع المشاركات: 18547
ول ابا علي..حبابك يا صديقي كتر خيرك على المرور.. طبعا في بالي نقتنا قبل تلاتة سنين وفي هذا المنبر ..و خيطنا بتاع عذابات البحث عن معنى ابو كرشولا..الفيديو الأول..وناس الأنثروبولوجيا بيسموهو اثنوغرافيا عن مدينة كادقلي..وردت فيهو معلومات طريفة وجميلة..اهمها من وين جات تسمية كادقلي..طبعا نحن ناس هناك كنا عارفين انها اسم احد الأجداد العظماء..و هنا ترسيخ لكيفية نطق الإسم.. الحاجة التانية تسمية احياء كادقلي ..وهي بترجع لتسمية مجموعات وخشوم بيوت..كلمو..كلبا..مرتا..الخ.. التحية للشباب الذين ذكرتهم..وكتر خيرك يا صاحب انك بتطرانا لمن ترجع لبعض ونساتنا واقوالنا هنا.. غيرك يا حبيب بيشيلوا الحاجات وبيمشوا في سكتهم..وما زعلان منهم تب.. لأنو الشغلانة عندنا.. لو في فكرة طيبة في نص الحديث وفي زول/ة عندو القدرة يعملها واقع ما عندنا مانع تب..! سوف احاول جاهدا تفريغ كتير من احاديث الشباب الفي الفيديو (الأمير رحال ، استاذ علي ، استاذ وصفي ، استاذ مبارك شيبون)..ونحاول نعمل منها نصوص مكتوبة..مع اضافة تخاطرات اخرى.. عشان نقرب المسافات..! كادقلي مدينة جميلة للغاية..و لو جيت للحقيقة يا صاحب مدن جنوب كردفان كلها جميلة وكل واحدة عندها قصة مختلفة عن التانية..ومدهشة..
نشوفك
10-21-2015, 08:25 PM
Kabar Kabar
تاريخ التسجيل: 11-26-2002
مجموع المشاركات: 18547
ول ابا هيثم..حبابك يا صديقي كتر خيرك على المرور من هنا.. عوامل كتيرة يا صديقي اثرت على انسان جنوب كردفان/جبال النوبة..خصوصا عوامل الحفر الأيدولوجي وغاباتو المتشابكة.. لكن المدهش انو الإنسان العادي واعي جدا بوجودو الحضاري..وحافظ قصصو واساطيرو..نفس الناس ديل يا هيثم ممكن تلاقي عشرات الآلآف زيهم وبيحكوا بطريقة مدهشة..! زمان ايام الجهل لمن تحدث مشكلة والواحد يعمل فيها مفرنب شوية..بيقوموا اهلنا الكبار بيرجعوك لعلبك..و بطلع الزول/ة الداير تشاكلوا..بتطلعوا اولاد دم واحد واقرباء.. قصص الثعابين دي حقيقية يا هيثم..وما دايرين نتكلم عنها كتير خصوصا ونحن في ظل جنون البحث عن الدهب.. بعد شوية يشبكونا البحث عن الجواهر النادرة.. فهي كنوز يا صديقي تغني افريقيا كلها..ولكن..! الجبال الجوه تستع وتسعين..ولو حبت معاه جبيل الفينقر وجبيل كردفان فهي مية واتنين جبل..اجمل مافي الفكرة..كل جبل ليهو ميزات جمالية وثقافية ولغوية وجغرافية تختلف عن التاني..!!! كتر خيرك..
10-21-2015, 08:26 PM
Kabar Kabar
تاريخ التسجيل: 11-26-2002
مجموع المشاركات: 18547
ول ابا بريمة..حبابك يا صديقي كتر خيرك على المرور.. والتحية لأستاذ محمود.. طبعا متذكر اخونا عبد العزيز الحلو..لكن اتخلبطت بينو وبين استاذنا يوسف كوه ودانيال كودي..فسقط اسمو سهوا..! طبعا اهم حاجة زغنا منها.. انو وزير الثقافة بتاع امسودان من كادقلي..! وحكاية الدورة الرياضية الأفريقية التي اقيمت في كادقلي..يعني ماشين كويس يا صاحب.. زمان في احد الأعياد يا بريمة..كانت مبارة بين منتخب الدلنج ومنتخب كادقلي.. اها ناس كادقلي غلبونا سلفكة ساكت..والجماهير قام تناكف لعيبة الدلنج.. قام توفيق عمو..واهو احد الشخصيات الظريفة في الدلنج..وقف بين الجمهور ولعيبة الدلنج..وخطب فينا وقال ..يا اخوانا ناس كادقلي ديل نقوم نغلبها في الكورة بكرة يتمردوا..!!! لمن سمعت كلام مبارك شيبون وهو يعدد المناطق حول كادقلي..اقول ياخي ده تلقي ول ابا بريمة سرح فيها..و دي صارع فيها..و دي لعب فيها ضالا..ياخي المناطق دي لمن تشوفها الناس بتحكي عنها في التلفزيون تحس انو الحاجات ماشي كويس..! كتر خيرك
10-21-2015, 08:28 PM
Kabar Kabar
تاريخ التسجيل: 11-26-2002
مجموع المشاركات: 18547
بت ابا نور..حبابك يا صديقتي.. كتر خيرك على المرور..ومعا نكتب اكتر واكتر.. فاهل امسودان محتاجين يعرفوا الحاجات بطرق اخرى.. الشدر براهو يا نور الإتقطع؟..لازالت بالذاكرة الشباب الزواهر..و النجوم التي عبرت مدينة كادقلي سواءا في التصفيات أو الإختفاء..و سيظلون بالذاكرة.. الحكومة يا ها ناس ولدنا الطيب حسن بدوي..وزير الثقافة..وياريت الباقيين يحذوا حذوه..ويعملوا لينا شوية حاجات..بالعدم يدونا فرقة نعرض حاجاتنا..! فكرة كون كادقلي تكون عاصمة ثقافة وتراث.. فرضتها حاجات الجبال السمحة النقية..و الناس اقتنعت تماما انو ممكن توصل حاجاتها من غير معافرة وبندقية.. فكانت الفرق التراثية والمهرجانات الثقافية في الخرطوم..و شكلت وجود واضح..عشان كده الحكومة ما كان قدامها الإ تعترف بحاجات الناس وتعمل على تطويرها..! في نيتي افراغ نصوص مدخلات الشباب (رحال ، سنقادو ، وصفي ، شيبون) في شكل كلمة مكتوبة..و يا ريت تدعمينا بحاجات تاريخية..! التحية لكادقلي واهله النبلاء.. كتر خيرك..
10-21-2015, 08:29 PM
Kabar Kabar
تاريخ التسجيل: 11-26-2002
مجموع المشاركات: 18547
ول ابا ابوبكر..حبابك يا صديقي كتر خيرك على المرور.. التحية لصديقنا واستاذنا يحي فضل الله العوض..بعدين يا ابكر لمن نمسك الحيكومة..ح اعمل مركز ثقافي في كادقلي ويكون اسمو (مركز يحي فضل الله )..! يحي كتب كتابة جميلة ومفارقة.. فيها واقعية سحرية عجيبة..وذلك باهتمامه بتصوير التفاصيل بتاعت الناس التحت..! اجمل قطعة كتبها يحي ..قطعة عن شخصية اسطورية وعجيبة من شخصيات كادقلي..عمنا توتو كورو (شيتو كورو)..وهي من فئة الناس القاعدين نقول عليهم مجانين..! اسطورية توتو كورو بتظهر في تلاتة حاجة ..نظام كرامات وكده..! اول حاجة.. أي جنازة في كادقلي .. الكائن ده بيكون حاضر فيها.. ناس بتقول الساعة اربعة صباحا ..وتوتو واقف جنب المقابر..و بعد الدفن.. بينسحب.. التانية..كائن ما بتصور نوهائي..و خواجات كتار حاول تصوير..و بيحصل عطب في الفيلم أو الكاميرا.. الصورة الوحيدة المرقت.. كانت حتة فاضية..حتى ظلال ساكت مافي..وعملتها خواجية بكاميرا بلورايد..تصوير سريع..و مالقت صورة..ليهو..!!! التالتة.. كان بيمشي عريان في السوق..ولو هفت ليهو خطف منك جنيه..ح تنال ثروة تفوق المية جنيه..عشان كده كان بعض المستهبلين بيمرقوا قروشو مخصوص عشان توتو كورو يختفها.. لكن عمك بيعمل نايم..! مثل شخصية توتو كورو..كتب عنها صديقنا يحي بذاكرة الفنان والأديب..وكانت كتابة في اولها الناس بتندهش بيها لرصانة اللغة وجمالها وتفاصيلها..و ناس بتندهش بيها لأنها هي جزء من ذاكرة نبيلة..
كتر خيرك..
10-22-2015, 10:35 AM
أبوبكر عباس أبوبكر عباس
تاريخ التسجيل: 03-04-2014
مجموع المشاركات: 3595
الخواجة وصفى.. سامى سّمان.. بكتر..(بضم الباء والكاف).. و غيرهم كثر ممن سقط من الذاكرة المملوءة هما وغما..
هؤلاء هم قلب الحركة التجارية فى كادقلى.. بل وأن هذه الحركة التجارية استصحبت معها.. قيم وأخلاقيات.. لم تتوفر حتى فى بعض أبناء المنطقة..
سامى سمان كان يمتلك دكانا للمينيفاتورة... وبعض الاراضى.. ولقد سّخر تجارته لاعمال الخير فى البلدة... نذكر منها.. انه اشتهر بمساعدة أسر الايتام والارامل... حيث كان يأتى فى منتصف الليل.. للاسرة المنكوبة.. ويلقى بجوال من العيش... وبعض المستلزمات.. وظرف بداخله نقود ثم يختفى.. ولقد رحل سامى سمان من مجتمع كادقلى فى هدوء... كما عاش فى هدوء.. ولقد وصل به حب الناس والاحتكاك بهم... الى انه أجاد لغة أهل كادقلى..
بكتر من الشخصيات التى حفرت اسمها فى ذاكرة كادقلى بقوة.. ويذكر ايضا .. أنه كان يمزق دفتر(الجرورة).. حيث يستلف فيه الموظفين... حالما يمتلئ الدفتر!
الخواجة وصفى.. ابضا عرف عنه كثرة المجاملات فى المناسبات الاجتماعية.. خاصة الوفيات..
أما مدرسة الراهبات فى كادقلى... فقد كانت من قبل منزلا أحد الخواجات.. عاش فيه وحيدا.. وقد كان يدير طاحونة للعيش... ثم يجلس فى المصطبة... خارج الطاحونه ليتسامر مع المواطنين.. ثم تبرع بمنزله.. لبناء مدرسة الراهبات فى كادقلى..
واذا اسعفتنى الذاكرة.. أعود ببعض التفاصيل...
10-22-2015, 01:34 PM
عبدالكريم الاحمر عبدالكريم الاحمر
تاريخ التسجيل: 01-09-2013
مجموع المشاركات: 424
ول ابا كبر سلام جاك من يومين وانا اوقف الفيديو الطويل وارجع تاني اعيده واسجل بعض الملاحظات ، استاذنا علي جمعه استاذ كبير ورجل يبدو عليه مثقف شديد والامير محمد رحال رجل بالمثل ، هذا الفيدو ولا حتى ناس الجزيرة الوثائقيه يقدروا يعملو زيوا والمعلومات الفيهو دسمه للغاية وشامله وانا برغم اني قضيت 3 سنوات في كادقلي في زمالة ول ا با بريمه الا انو ما بعرف عن كاقلي ربع اللتقال وناس سودان فيدو ما بنعرفم لولاك ياكبر ... انت راجل تحفه فعلا جهودك لا تعوض رغم الوهاد والجبال التي تفصلك عن تلك المناطق او غيرها او عن السودان كله الا انك قادر في نقل الناس نقله مدهشه حقاً وصدقت لما قلت ( انو ناس امسودان مشاكلهم انهم ما قاعدين يعرفوا بعضهم البعض) صدقت والله مافي واحد عارف عن اي واحد اي حاجه , اهل الوسط والشمال يقولو ليك على سبيل المثال دا غنا ناس الغرب او كلام ناس الغرب كلام يفقد الدقة في كل شئ لان الغرب نفسه يساوي مساحة دول بحالها ، حتى نحن في كردفان عندما نتحدث عن دارفور بنقول ناس الغرب .... شاكرين ليك يا ول ابا كبر هذه المتعة السياحية والمعلوماتية الهامة جدا فانت مكانك السودان وليس في صنقور التراب القاعد فيهو دا لانو يمكنك ان تضيف الكثير للتراث وللثقافة السودانية وعندك الطاقة التي يمكنك بها تحريك مؤسسات رسمية لتنتج عمل قومي ليهو شنه ورنه . انت مثال حي للسياسة الطارده التي انتهجتها النخبة منذ بداية التاريخ ضد الناس العندهم ثمرة وشغلتهم في انفسهم وفي الحصول على الرغيف ، وان يضيعوا وقت واحد زي كبر عشان يتكلم في السياسة وخلقوا في السودان ما يسمى بي Generation Gap والجيل القايم دا عامل زي الدابي القاطعين راسو ، مرة لقيت اولادي فاتحين كتاب التاريخ الجبتو معاي من السودان وبضحكوا في شكل يونس الدكيم
كتر خيرك على المرور..و لو اتفرجت في تجربة سودان فيديو ..ح تشوف المدن التي ذكرت انك ما شفتها..وامسودان كلهم متشابهة.. بس ربنا يهدي النفوس..! أي حاجة كتبها يحي فضل الله سمحة شديد.. وصعب المفاضلة بينها..مجموعة القصص التي اهداها لكادقلي هي (حكايات واحاديث لم تثمر) وتقريبا هي اول مجموعة طبعت في كتاب في اواخر الثمانينات.. واقعية سحرية عجيبة.. التحية لأستاذنا وصديقنا يحي فضل الله..!
كبر
10-22-2015, 04:14 PM
Kabar Kabar
تاريخ التسجيل: 11-26-2002
مجموع المشاركات: 18547
بت ابا نور تاور..حبابك يا صديقي كتر خيرك على المرور.. كتر خيرك على هذه التقاطعات الثرة اللطيفة..و المدن لا احد يكتبها عنها غير اهلها.. اعجبتني تجربة الأقباط في كادقلي..وكنت مرة بتونس مع بعض الأصدقاء..واستغرب احدهم وانا بحكي ليهم عن وجود الأقباط والأغاريق في مدن جنوب كردفان..وكان سؤالهم: انو كيف الناس دي قدرت على التطبع والتعايش مع بيئة المنطقة..؟.. اجمل حاجة في حديث مبارك شيبون ، حكاية استزراع المنقة..و انو جابوها من بحر الغزال..! سوف اعود كتر خيرك..
10-22-2015, 04:16 PM
Kabar Kabar
تاريخ التسجيل: 11-26-2002
مجموع المشاركات: 18547
ول ابا عبد الكريم الأحمر..حبابك يا صديقي ومعليش ..الكبر حصل يا صديقي ، والواحد كان عارف انو فاطي بعض الأسماء..كتر خيرك يا صديقي وانت واحد من خريجي مدرسة تلو الحكومية.. ايام الناظر ..استاذنا عبد الوهاب الجاك (كارلوس) وايام استاذنا عثمان عبد الله (دانفوديو)..و اساتذة اخرين كثر الله يطراهم بالخير..!
ككيف يا عبد الكريم ماك عارف عن كادقلي؟.. ياخي متذكر بلبصة اصحابنا البعثيين لمن كانوا بيقولوا على حي الفقرا بانو هو (بغداد الصغرى)؟.. الشباب هناك معظمهم كانوا بعثيين..!
اخونا الشاب بتاع سودان فيديو..عضو في المنبر..وزول هميم..واجتهد كتير للغاية..وزار مدن كتيرة في امسودان ، في بعض المدن الواحد متذكر ملامحها طشاش طشاش لكن بتجربة سودان فيديو الواحد شاف فيها جوانب تانية..ودي التجربة الممكن أي زول يعملها..!
طبعا حقيقة مدهشة يا ول ابا ..انو حكاية صور المدن بدوهو ناس الدلنج..وكان الشباب بيمشي جبل الدش ويصور المدينة من فوق..بعد شوية ناس كتيرة شافت الحكاية دي وعجبتها..فكان ناس لقاوة..وبابنوسة..لغاية ما بقت ظاهرة واصلة..!
الإعلام الرسمي..بقى محرج في كتير من المرات.. لأنو زمان الناس كانو كسالي حدهم الإستديوهات.. هسع مع توفر وسائل التواصل.. القنوات بقت مجبرة انها تمشى تفتش الحاجات في اماكنها..
امسودان يا ول ابا ..ما بنقدر على القعاد فيها ، والظروف المرقتني منها قبل عشرات السنين..لسع قاعدة..وزادت عليها حاجات..ياخي تمشي تقعد هناك نص سنة.. يعرسوا ليك مثني وثلاث ورباع..و تمرقها في امطرقا عراض..!
فعلا هناك هوة كبيرة بين ألأجيال يا صديقي..وعندي قناعة ..لو الناس وظفت تكنولوجيا التواصل بصورة جيدة ممكن تعمل تجسير للهوة دي..لكن زي ما قلت النخبة اكتر عوامل الهدم في امسودان ، فهي بتفتكر انو التواصل مفروض يتوظف لأغراض سياسية..وحتى السياسة نخبة امسودان ما بتعرفها تب..!
اهلنا قالوا (الكلمة الطيبة بتمرق الدبيب من جحرو)..واهو نحن شوية شوية نباصر..مين يعرف يمكن بعد شوية ناس امسودان نفوسهم تتطايب لمن يعرفوا بعض بصورة حقيقية..
كتر خيرك..
10-22-2015, 04:25 PM
طلحة عبدالله طلحة عبدالله
تاريخ التسجيل: 09-14-2007
مجموع المشاركات: 18426
اضافة للملكة اطو..التي ذكرها اخونا الأمير محمد رحال (مك عموم كادقلي).. فلقد كانت هناك الملكة زهرا في منطقة جبال والي في جنوب غرب مدينة الدلنج..و ابنها المك عبد الحميد..كان موجود لغاية بداية تسعينات القرن المنصرم..و منطقة والي هي الأخرى واحدة من مناطق النوبة التي تحتاج الى توثيق..وفيها معالم اثرية واسطورية (جبل ابو دموع) وتحتاج لكثير من الحفريات والتوثيقات..من والي كانت هناك فرقة تراثية.. في بداية الثمانينات كانت تقدم عروض رقص مربوطة بنظام التوقيت المحلي ..خصوصا فكرة الزراعة والحصاد..والفرقة في ذلك الزمن توفقت في تقديم عروض في سويسرا..و بعض من الدول الأوربية...!!!!
اخونا الأمير محمد رحال ذكر بطون قبيلة كادقلي..وقال هي : كــُلبا ، مــُرتا ، تافري ، دمبا ، كلمو وتقوي..وكلها ، ماعدا تقوى ، هي احياء في مدينة كادقلي..واستثنائي لتقوي لأني لم اسمع حي باسمها ، واحتمال لو راجعت جغرافية المدينة بصورة كويسة الواحد يقدر يتعرف على موقعهم..
طريقة اعداد الفيديو ..جميلة للغاية..فالمك محمد رحال ، يجلس تحت جبل يقع في شرق المدينة..وهو مقر رئاسة سلطة كادقلي ..ويقع في شرق المدينة (لو اعتبرنا السوق ومركز كادقلي الحالي هو نقطة القياس).. الأستاذ علي سنقادي..يجلس تحت سفح جبل كلموه..ويقع جنوب غرب المدينة..والأستاذ وصفي يجلس في منتصف المدينة..و الأستاذ مبارك شيبون..يجلس في منطقة اقرب الى الجزء الغربي من المدينة.. والكاميرا كانت تتجول كلما جاء ذكر احد الجبال المكونة لمدينة كادقلي.. استاذنا محمد ابو عنجة اب راس..كان نائب برلماني في فترة حكومة الديموقراطية الأخيرة (1986) عن الحزب القومي السوداني ..وهو من اهلنا دمبا (ان لم تخني الذاكرة)..!
كبر
10-25-2015, 05:20 AM
Kabar Kabar
تاريخ التسجيل: 11-26-2002
مجموع المشاركات: 18547
وكما ذكر اخونا الأمير محمد رحال ، انو مكوك كادقلي كانوا ساكنين في الجبل فوق..ومن عندنا نضيف انو..انو المكوك ديل كانوا بينزولوا لتفقد الرعية.. اها النزلة دي كانت بتكون مصحوبة باغاني وترانيم (لو ملاحظين في الفوتش عن مدينة كادقلي هنا تصوير لنقاقير كتيرة ومتنوعة ومختلفة الأحجام من ضمن ميراث المكوكية هناك)..اها بعض من الترانيم بتاعة زفة المك.. الترنيمة التالية..والتي اصبحت واحدة من ارسخ مارشات الجيش في امسودان (الجيش بتاع زمان طبعا)..!
الترنيمة كانت اصلا كلمة ولحن..ولكن الذاكرة لم تحفظ غير اللحن..وسجلنا طلب سابق..و نكرر الطلب الآن.. يا ريت ناس كادقلي يتحصلوا على النص الكلامي..و ترجمتو لكم لغة حية.. عشان يفيد الباحثين والباحثات فيما بعد..!
كبر
10-25-2015, 05:23 AM
Kabar Kabar
تاريخ التسجيل: 11-26-2002
مجموع المشاركات: 18547
ولازلت ابحث عن كتابة استاذنا دكتور حامد البشير..ولم اعثر عليهو..وكنت داير استعين بيهو في توثيق الحاجات ..خصوصا ، وان لم تخني الذاكرة ، اخونا الأمير محمد رحال احد ممن قدموا افادات في ذلك الكتاب..!
اخونا الأمير محمد رحال تحدث كثيرا عن حكاية (الرباط)..وهي فكرة تكوين الأحلاف في المنطقة ..وكيف انو اهلنا النوبة عموما ، وكدقلي خصوصا ، كانوا منفتحين للغاية..و عندهم حسابات دقيقة جدا.. فكانت الأحلاف والتحالفات..عن طريق اجتماعي ثقافي بحت.. حيث كان التبادل الثقافي والإجتماعي (الزيجات المتبادلة)..وكلها ترجع لعهد المك رحال..!!
من افادة استاذنا على جمعة سنقادي..عن الفكي على الميراوي..انو كان متزوج من اولاد ام سليم..وهم جزء من المسيرية الزرق في لقاوة..ومنهم ناظر المسيرية الأسبق محمد ولد الجبوري..وعمنا محمد صالح البقاري وكان نائب برلماني في الإتحاد الإشتراكي بتاع نميري..وهو والد صديقنا الناقد محمد الربيع محمد صالح.. والأستاذة المذيعة بخيتة الجبوري..وايضا من ام سليم الأسطورة النجيمة ملاح..وهي صاحبة القضية المشهورة التي كان يمثلها طلاب وطالبات كلية القانون في جامعة الخرطوم فيما يعرف بالمحاكمات الصورية..وايضا من اهلنا ام سليم الفنانة الشابة ابنتنا بت ابا شادن محمد حسين..!
وكما ذكر استاذنا علي جمعة سنقادي ، ان قبر الفكي علي الميراي بمدينة الدلنج..و يقع في الدزء الشمالي من جبل ابو زمام (جبل الدش) في حي يعرف باسم حي الجيولوجيا/الطرق والكباري ..وسمي كذلك.. لأنو لمن عملو شارع الدبيبات كادقلي في سنة 1974 ، كانت المعدات والورش في ذلك الحي..و هو حي يتبع لأهلنا قبيلة الدلنج التي سميت عليها مدينة الدلنج..كثير من الصور عن مدينة الدلنج تكون من قمة جبل ابو زمام..و اذكر اتعمل فليم وثائقي عن سبر الخيل الخاص بقبيلة الدلنج..ولكن الكاميرا لم تذهب بعيدا لتتجول في المدينة..و من هنا نناشد الجميع بتصوير قبر الفكي علي الميراوي..لأنو بعد شوية ما ح نلقى زول متذكر الحاصل شنو..!!
كبر
10-25-2015, 05:44 AM
Kabar Kabar
تاريخ التسجيل: 11-26-2002
مجموع المشاركات: 18547
(6) واحدة من اجمل ظواهر مدينة كادقلي الجمالية..و التي ابحث عن اثرها حتى الآن..ولا اكل عن البحث عنها..حاجة اسمها (فرقة جاز كادقلي)..وناس كانوا من اعمامنا ناس البوليس في مدينة كادقلي.. الفرقة كانت حية..و بتقدم عروض غنائية وموسيقية في غالبية مدن جنوب كردفان (الدلنج ، ابو جبيهة ، العباسية ، بابنوسة ..الخ)..! في الفيديو عن كادقلي عروس الجبال.. استاذنا وصفي قنديس قال علبة حلاوة الماكنتوش كانت بخمسطاشر قرش...وفي نفسي قلت: ياعم وصفي جبت لينا الهوا في صمة خشمنا..يعني ناس كانت بتضرب الماكنتوش زي الترتيب.. المتمردين ليها شنو؟.. خمسطاشر سنة وانا ابحث عن تسجيل واحد لجاز كادقلي..و لم اوفق..اخر ذكر هم.. ان صديقة ما التقت مصادفة احد افراد الفرقة في محلية امبدة..واندهش عمنا انو في ناس لسع متذكرة حاجة اسمها جاز كادقلي..!! في سنة 1981..وفي مدينة الدلنج.. حضرت حفلات كتيرة لفرقة جاز كادقلي..وكانوا بيقوموا باداء اغنية البي جييز.. Stayn’ alive وهي الأغنية التي ظهرت في فيلم جون ترافولتا (حمى ليلة السبت..1977)..
شفت الإستنارة دي كيف يا ابكر الطويل؟..
غنية البي جييز في اليوتوب..بلغت عدد مشاهداتها قرابة الأربع وتسعين مليون..!!!.. يا تري لو ناس جاز كادقلي ظهروا..العدد ح يكون كم؟..
التحية لأعمامنا واخوانا في جاز كادقلي..و بسببهم الواحد اشترى سبع اسطوانات لفرقة البي جييز...!
كبر
10-25-2015, 09:03 AM
حافظ البشاري حافظ البشاري
تاريخ التسجيل: 01-23-2006
مجموع المشاركات: 203
متابعة لصيقة .. لهذا البوست الجميل .. وكأنني أتجول في هذه الجغرافية مترعة بكل أنواع الجمال .. وفي ليلة ( نوبة السودان ) الثانية والتي نظمناها في جمعية ( أبناء بنا ) وهي جمعية إحدى قرى دنقلا التي تعمل بنشاط من أجل التراث النوبي .. تولى أبناء جمعية ( بنا Bina ) القيام بكل ما يخص الضيافة والتكريم .. وتواصلت المحاضرات التراثية .. والأجمل والجميل جداً تم عرض فيلم ( إختيار ملكة جمال .. جبال النوبة ) دي خطوة كبيرة إلى الأمام ..
يا سلام يا كبر .. ديل ناس راقين .. صدقني تخطوا المجتمعات الاخرى بسنوات ..
تحياتي .. ومودتي .. ( المشكلة أنني من ناحية التكنولوجيا خلف التاريخ .. زول تربال .. حتى الجوال من نوع ابوكشافة )
استاذنا الجليل ول ابا كبر زي ما قال ابوبكر عباس ..نحن لمن نشوف بوست ممهور باسمك بنفكر مرتين كيف نجيب تعليق انيق يليق بالكلام السمح والكلام الدائما رائع وجذاب البتسطره في اي موضوع واي مجال.. وكتر خيرك ان طفت بنا في معالم كادوقلي..وعلم كادوقلي وثقافة كادوقلي...نتابع هذا السفر الرائع بشفافية وبتمعن...وحلفنا انا وبسمات الا نزور كادوقلي عند زيارتنا القادمة للسودان...فقد زرعت فينا رغبة شديدة في زيارة هذه المدينة .... اخبرت بسمات بموضوع البوست هاتفيا لانها غادرت صباح اليوم لرحلة خارج نيويورك ...واظن عندها طلب ..وستخبرك عند وصولها .. والله يديك الصحة والعافية
10-26-2015, 04:29 AM
Kabar Kabar
تاريخ التسجيل: 11-26-2002
مجموع المشاركات: 18547
Quote: يا سلام استاذ كبر على السياحه الجميله , لقد اعدت لي ذكريات جميله حيث مكثت بكادقلي حوالي اربعه سنوات , ذهبت لها لاداء الخدمة الوطنيه بمستشفي كادقلي وطاب لي المقام بعدها حوالي ثلاثه سنوات اخرى , اهلها افاضل وطيبون , نسأل الله أن ينعم عليهم بالأمن والسلام والرخاء
عباس..حبابك يا صديق كتر خيرك على المتابعة والمفاكرة.. حاجة مفرحة انك تكون مريت بمدينة كادقلي..وهي مدينة عجيبة ومدهشة..رغم القواسي التي مرت بيها..! امنياتنا ان تعمها افراح الهدوء والإستقرار..فهي مدينة تستحق كل الخير..
10-26-2015, 04:31 AM
Kabar Kabar
تاريخ التسجيل: 11-26-2002
مجموع المشاركات: 18547
حافظ..حبابك يا صديق كتر خيرك على المرور واشراكنا في قراءة بعض من كتاب (المدينة الخلاسية..سيرة مدينة)..واهنيك عليهو..ونتمنى نلقى فرقة نقرا النسخة الأصلية..فهو بالجد مساهمة مهمة في الحديث عن مدينة كادقلي.. عارف يا حافظ..فكرة (الخلاسية) التي قلتها في وصف كادقلي.. بتتجلي كتير في حاجات انسان كادقلي ككائن مدهش وعندو عبقريتو الخاص..والنص التالي..عبارة عن فيديو صغير لأغاني البن في المنطقة..المدهش اللغة المستخدمة..وانت لمن قلت انو لغة اهلنا الشوابنة اشبه بالغناء.. فالحكاية دي بتتجلي في النص ده..اصوات موزونة كأنها مدربة تدريبات كتيرة عشان تتناغم..والريتم القوي..والأدوات المستخدمة..عدة الجبنة العادية (فنادك ، فناجيل..شغالات..كشاكيش صغيرة)..وهو نص يزواج بين المدينة والريف بصورة مدهشة ومنسقة..!
ياخي عماتنا وخالاتنا ديل..عندهن اصوات قوية بصورة تصل حد العالمية..و اصوات نقية بشكل مدهش..!
عندي فرضية خاصة..لو لقيت لي زمن ح اطورها.. انو انسان الشوابنة هو اقرب نموذج حاضر لإنسان حضارة مروي..خصوصا تجربة الشوابنة الممتدة لقرون في جبال النوبة واهتماهم بخبرات نادرة ..تحديدا التعدين والتعامل مع صهر المعادن وتنقية الذهب في جبيل شيبون..!
كتر خيرك على المرور..
10-26-2015, 04:33 AM
Kabar Kabar
تاريخ التسجيل: 11-26-2002
مجموع المشاركات: 18547
ول ابا علي عبد الوهاب..حبابك يا صديقي كتر خيرك على المتابعة.. والتحية لكل الأصدقاء في الجمعيات الثقافية في جدة..وتحية خاصة لأخوتنا في جمعية بنا..
هناك افلام كتيرة عن ثقافات جبال النوبة..والجيد فيها انها في اتجاه انها تكون سودانية صرفة.. فالمنطقة ، خصوصا زمن الحرب الأولى ، كانت مرتع لمجموعات اوربيين يقومون بجمع المعلومات لأغراض تخصهم..ونادرا ما كانت هناك حاجات عن ثقافات النوبة..صحيح بعض الباحثين الجادين امثال لآيف منقر ..استقرت في المنطقة وكتبت عنها بعض الدراسات..اضافة للمصورة الألمانية التي كانت متخصصة في عرض ثقافات شعب الكاونارو..! الببي سي عندها مجموعة افلام تاريخية.. عبارة عن سلسلة..وبدأت من مصر لغاية اقصى جنوب الجبال..وبتتحدث عن الصلة بين نوبة السودان..! هناك افلام سودانية مثل فيلم (الريكة) ، (البخسة) ، (البرداب) ، (سبر الخيل)..وكلها ظهرت في العشر سنين الأخيرة..و نتمنى تستمر الجهود..! مهرجان ثقافات جبال النوبة..الآن وصل الدورة الثالثة..ويقام في الخرطوم.. اضافة للإحتفال بيوم الشعوب الأصيلة العالمي..! كلها حاجات جميلة يا صديقي..و لكن اجملها جميعا.. وجود الإنسان على طبيعته هناك في الجبال..وهو انسان عندو القدرة على الفرح والجمال والدهشة بصورة عجيبة..! كتر خيرك..
10-26-2015, 04:34 AM
Kabar Kabar
تاريخ التسجيل: 11-26-2002
مجموع المشاركات: 18547
بت ابا اميرة..حبابك يا صديقتي كتر خيرك على المرور والمطايبة..! وحبابكم انتي وبت ابا بسمات في كادقلي والدلنج ورشاد والعباسية وابوجبيهة ولقاوة وبابنوسة والمجلد..وغيرها من مناطق جنوب كردفان..وهي مناطق حنينة بشكل عجيب خلاص..! ومافي مشكلة تب..و ان شاء بسمات تجي راجعة بالسلامة..!
ودمت
كبر
10-26-2015, 01:22 PM
عبدالحفيظ حسن عبدالحفيظ حسن
تاريخ التسجيل: 05-05-2009
مجموع المشاركات: 1282
فى اوائل الثمانينات كان مقر عملى بالأبيض وذهبت إلى كادوقلى فى مأموريات عدة مرات ..... وفى الفترة ما بين عامى 1990 - 1992 .... كنت مديرا لشرطة محافظة كادوقلى وفى ذلك الحين جابهت مواقف معادية من والى الولاية أحلت على اثرها للتقاعد للصالح العام ......
في الحقيقة الموضوعات الرائعة التي تكتبها عن التراث الفني والشعبي في غرب السودان تفيدني كثيرا في دراساتي الجامعية .. وانا اتنقل كل يوم من ثقافة الى ثقافة ومن ادب الى ادب من دولة لاخرى ودائما آتي بامثلة من وطني السودان.. ومن خلال هذه الثقافات بنعمل مقارنات شيقة جدا ومفيدة جدا... .. واليوم عرفنا الكثير عن كادوقلي.. وهذه المدينة فعلا جديرة بان تكون عاصمة التراث الفني والشعبي... .. انا لي صديقة أمريكية زميلتي وعزمتها تزور معاي السودان في الصيف القادم عشان نوريها الكرم السوداني كيفن.. ولمن كت بحكي ليها قصص الكرم السوداني وكيف ان ناس قرية في الجزيرة كانو بيوقفو العربات في طريق مدني الخرطوم وينزلوا الركاب بالقوة عشان يفطروا معاهم فطور رمضان وحتى ان واحد منهم اشتكى جاره في المحكمة وقال انه بيخطف منه الضيوف.. ولمن الامريكية دي سمعت القصص دي طبعا ما مصدقة ومعتبرة ان دي قصص خيالية.. وعشان كده وافقت تمشي معاي وتشوف الحقيقة .. ونحن حنمشي في قرى الجزيرة .. ونوريها الكرم السوداني الصحي صحي.. لكن كمان عاوزة اعزمها لكادوقلي.. واكيد ان اهل كادوقلي كرمهم لا يقل ابدا عن كرم اهل الجزيرة كدأب اهل السودان جميعا ( وطبعا ما حاوديها الخرطوم( وجه ضاحك).. ولمن السفر يقرب تدلنا على صديق ليك في كادوقلي يكون لينا دليل في المدينة وضواحيها... قرأت من قبل عن التراث الشعبي والرقصات الشعبية في كادوقلي وجنوب ولاية كردفان .. وقرأت لعضو في المنبر اسمه آدم جمال كتب عن رقصة الكمبلا والمردوم والجراي .. وجاب نماذج لهذه الأغاني والرقصات .. ومن امثلة أغاني المردوم:-
يا الســـــــــــــــــــــــاجيلة أنا بجافي أهلي بدور لي قبيلة مشتاقة ليك يا خضار النجيلة الزرعـــــــوه في أراضي هبيلة
**** بت أم سبيب ..مقلوبة قلب شديد سافر بعيد خلاني ....بلد الصعيد البلد كردفان .........وليالي عيد شفتوا الحبيب خشيمه لبن جديد
Quote: فى اوائل الثمانينات كان مقر عملى بالأبيض وذهبت إلى كادوقلى فى مأموريات عدة مرات ..... وفى الفترة ما بين عامى 1990 - 1992 .... كنت مديرا لشرطة محافظة كادوقلى وفى ذلك الحين جابهت مواقف معادية من والى الولاية أحلت على اثرها للتقاعد للصالح العام ......
عبد الحفيظ..حبابك يا صديق كتر خيرك على المرور..
والسنوات التي ذكرتها ، هي من اقسى واحلك السنوات في جنوب كردفان كلها ، ناهيك عن كادقلي..وهي الفترة التي شهدت ابشع انتهاكات حقوق الإنسان ، من تصفيات جسدية واعتقالات واختفاءات ..!
وكت داك يا صاحب ، الحسيني عبد الكريم عامل فيها اله صغير.. فأين هو الآن؟..
واين عبد الوهاب عبد الرحمن؟..واين باشبوزك التصفيات من اتيام الإستخبارات وناس الأمن؟..
سنوات السلام (2005-2010)..ايام الحركة الشعبية جابت بقت حيكومة مع ناس المؤتمر الوطني..تناسوا كل تلك المآسي..ولم يعد ذكر لها..حتى ممن طالب باقامة نصب تذكارية لمآسي تلك الحقبة جوبه بالسفه والقمع..!
التحية ليك يا صديق..و ليتك تلقى فرقة تكتب عن تلك الفترة..!
عزاؤنا ، ظلت كادقلي المدينة/الإنسان/الأساطير/التراث..و الدهشة..و ستظل..
كتر خيرك..
كبر
10-27-2015, 04:24 AM
Kabar Kabar
تاريخ التسجيل: 11-26-2002
مجموع المشاركات: 18547
الحقيقة انا خاطبتك اليوم باللقب الجديد ول أبا كبر) .. ولا اعرف معنى ول أبا) ولكن سألت اميرة بت مصطفى ، وهي دائما تستخدم هذا التعبير في مخاطبتك) وقالت ان ول أبا معناها ود ابوي، وبت أبا معناها بت ابوي) .. وطبعا انا اتخيلت انها ربما تخمن ذلك .. فهل هذا المعنى صحيح؟؟ واذا لم يكن فما هو المعنى الصحيح؟ وفي أي اطار يستخدم هذا التعبير؟ ومنكم دائما نتعلم كل جديد ودمت بالف خير وصحة وعافية
10-28-2015, 06:29 AM
Kabar Kabar
تاريخ التسجيل: 11-26-2002
مجموع المشاركات: 18547
بالنسبة لموضوع الزيارة.. ابشري بالخير..وعلى قول اهلنا الخواجات.. I will see what I can do
عندي خاطرة سمحة عن خواجية زمان زارت كادقلي..تحديدا بادية الحوازمة..و قام واحد صاحبنا وداها ليك بادية الحوازمة (بتاعة ناس بريمة القدامك ده ) والخواجية سارت مع الضعاين.. واخيرا مرقت بكتاب طريف وعجيب..!! صاحبنا الكان مرافق للخواجية دي ، اسمو سلطان محمد سلطان ، ودرسني مادة الأحياء وانا ممتحن الشهادة السودانية ..!
بعد ما جيت كندا ، نسيت الموضوع ، ويوم جانا صديقنا الجميل دكتور ابكر ادد اسماعيل ، مبتهجا ، لأنو لقى ليهو كتاب عن فكرة القرابة في مجتمع الحوازمة..وصاحبة الكتابة باحثة امريكية..!! قايلا شنو يا بسمات..!! صاحبة الكتابة ، طلعت هي الخواجية القام استاذنا سلطان وداها تسير مع ضعاين البقارة الحوازمة (ناس بريمة القدامك ده)..وألأجمل طلعت الخواجية دي زولة امريكية.. ومش بعيد تطلع من نيويورك ولا بروكلين ولا هارليم ذاتو..!!! (ذكريني اجيب ليك المراجع)..!
الونسة مرات يا بسمات سمحة شديد خلاص.. !!
بريمة وعبد الكريم الأحمر دفعة في كادقلي الثانوية ، وانا وراهم.. يعني انا برلوم بريمة وعبد الكريم..والأظرف.. اخونا الجميل ادم جمال هو برلومي.. وديل كلهم يا بسمات.. برالمة اخونا الباحث المكي اسماعيل قادم.. الغنا الجابو ادم جمال..والبحوث.. هي من انتاج وبحث اخونا المكي اسماعيل قادم..و ادم جمال اشار للحكاية دي في نفس الخيط القمتي انتي باقتباس بعض اغاني المردوم منو..!! والمكي..موجود في الخرتوم..واخديها مني يا بسمات.. اي غنية مردوم حايمة ومكتوبة في نص اسافير الله الواسعة دي.. هي من بحث صديقنا واخونا واستاذنا المكي..!! (طبعا في بقاري واحد تاني سوا البدع ، وح نكتب عنو يوما ما)..
لو طلعتي فوق شوية يا بسمات..كنتي لقيتي نص اغنية جميلة وحميمة.. اسمها (حوالي الساعة خمسة).. الغنية دي بتوريك تمازج شعوب جنوب كردفان (نوبة وعرب وشوابنة وشنو كده ماعارف..!!)..وهي اغنية غريبة وحبيبة..وناس البقارة في جنوب كردفان بيحترموها شديد.. عارفة ليه؟.. لأنو الزولة القالتها.. قالتها.. وبعد ساعتين انتحرت.. والله صحي يا بسمات...!!
الفيرشن بتاع زحل ادم ، فيرشن مديني..ولو سألتي ح نجيبو ليك بتصورات البقارة..(عباس عبد الحسب عربان ، سليمان عمر..واخرين)..!
كبر
10-28-2015, 06:31 AM
Kabar Kabar
تاريخ التسجيل: 11-26-2002
مجموع المشاركات: 18547
Quote: رائع كالعاده يا كبر. حدثني من أثق به وهو صديق مقرب للأستاذ يحيى فضل الله أن دراسة القران في الخلوه عند الصغر كان وراء نبوغ يحيى ومقدرته العجيبه في وصف الأشياء. الموضوع ليس إستناره كما يعتقد أبوبكر عباس.
ول ابا..حافظ..حبابك يا صديقي كتر خيرك على المرور والمتابعة.. والتحية لأستاذنا يحي فضل الله.. فالتفاصيل في تلك المجالي مبذولة .زبس محتاج تجويد الأداة وهي اللغة..و الخلوة.. لمن كانت خلوة صاح ..كانت اداة مهمة لتعلم حاجات كتيرة.. بالمناسبة يا حافظ ، انا عندي موقف قد يعتبر غريب.. ولكن لمن اقرأ عن تاريخ الخلوة والتعليم الأهلي في امسودان ، فديل كانوا ادوات الإستنارة في ذات نفسها ..ككيف؟..ده موضوع طويل..
كتر خيرك..
10-29-2015, 06:05 PM
Kabar Kabar
تاريخ التسجيل: 11-26-2002
مجموع المشاركات: 18547
كلام بت ابا اميرة صحيح.. ناس امسودان عندهم حاجات جميلة يا بسمات..حاجات لمن يكونوا في الفضاءات البعيدة عن البنادر..ففي بعض الثقافات في الوسط بتكتر عبارة بت العم..وهي نفس الفكرة عندنا في ثقافات البقارة.. فالبقارة مافي زول بيقول عمي فلان..و انما ابا فلان..! الحاجة اللذيذة عندهم.. الأب لمن يكون في حال تجلي بيقول لبتو (بط امي) وهي (بت امي)..او يناديها (امي) ..لكن نوهائي ما بيقول لولدو (ولد ابوي)..ولا حتى (ابوي)..
في الوسط..في الجزيرة او بحر ابيض مثلا.. بتكتر عبارة (يابا)..وبتكون عبارة مخاطبة او نداء ( ده كلام شنو يابا)..او (تعال يابا) ..لكن (يمه) ما بيتم استخدامها بنفس الحميمية..وبتكون شكلها رسمي شوية..!
وزي ما شفتي في الفيديو بتاع اثنوغرافيا كادقلي القاعدين بيتكلموا فيهو الشباب عن مدينة كادقلي.. ذكر اخونا الأمير محمد رحال.. فكرة تعظيم الأمومة..والخيلان..ففي ثقافات النوبة الخيلان اكتر اهمية وتعظيم من الأعمام.. يعني فكرتين (ثقافة بطرياركية) وثقافة (امومية)..ولو راجعنا تاريخ امسودان ، ح نكتشف انو الثقافة الأمومية دايما ثقافة مفتوحة الذهن تجاه الأخر..ودي الحتة القامت عليها الهجرات في تاريخ امسودان وشكلت لينا ما نراه اليوم..
كتر خيرك..وعندنا مدينة اخرى في الخاطر..ح نكتب عنها في المرة الجاية..ويبدو القصة ح تكون حوامة في مدن كتيرة.. بس ربنا يهون لينا نلقى مواد تساعد..!
والتحية لعبقرية الإنسان في خلق تكنولوجيا التواصل وزمن المعروفة المفتوحة..! كبر
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Kabar
اباذر عبد العال
علي عبدالوهاب عثمان
بريمة محمد
nour tawir
أبوبكر عباس
عبدالكريم الاحمر
حافظ البشاري
عبدالحفيظ حسن
Hamid Elsawi
اسامة الكاشف
فيس بوك
تويتر
انستقرام
يوتيوب
بنتيريست