|
|
 الأسطورة في كلام الحبوبات : في الفروع الخدر
|
راودتني فكرة هذا البوست أثناء ونسة مع عزيز كان يشكو من صحته
وعندما اتت سيرة الموت قلت له ( برية في الفروع الخدر )
سـألني عن معناها
واندحت اتداعى عن كلام الحبوبات وحضور الأساطير وبديع القصص الشعبي فيه
***
يقال ان جميع الخلق مسجلة اسمائهم / ن على أوراق شجرة على العرش
كلما يولد شخص تنبت ورقة جديدة
وعندما يقرب اجل المرء تبدأ الأفرع التي بها ورقته / ها في الاصفرار
فتقول الحبوبات في الدعاء بطول العمر
برية في الفروع الخدر
ومنها الدعوة على الشخص
يرمي ورقتك
أي تسقط من تلك الشجر ائذاناً بموتك
وبرية كلكن / م في الفروع الخدر إن شاء الله
لكن ما رأيكم / ن بان ننبش هذا الأمر ونتداوله هنا ؟
يبدو لي مادة بحث خفيف ظل وعميقة ايضاً
وشكراً لذاك العزيز لاهدائه لي هذه الفكرة
كل الاماني بالصحة وطول العمر والسعادة
|
|
 
|
|
|
|
|
|
|
|
Re: الأسطورة في كلام الحبوبات : في الفروع الخدر (Re: الجندرية)
|
الجندريه سلام
كلامك سمح لكن الناس الدخلوا ديل كلهم بيقولوا نمشى ونجى تانى ولا واحد فيهم قال حاجه انا شخصيا عجبنى العنوان وقلت البيجى من السمح كلو سمح . اها الجمله الاخيره دى رأيك فيها شنو كلام حبوبات ولا لا
غايتو انا عندى حبوبتى رحمها الله عندها دعاء جميل بتقوا اضانى فى العتق الغزال لما تسمع ليها كلاما ما ياهو ومثل هذه الاقاويل اندثرت اليوم . بعدين الحبوبات يقولن ليك الوليد ودوهو التمنه يعنى نقطة البوليس . وانا برضو لى عوده
ام الاء
| |
|
|
|
|
|
|
|
|
|
Re: الأسطورة في كلام الحبوبات : في الفروع الخدر (Re: الجندرية)
|
جيتكم راجعة الجندرية وضيوفها
عاوزة اصحح المثل بتاع تيتا
هو مش اضانى وراء العتق الغزال هو كما تقول حبوبة انا واقعة وراء العتق الغزال شفيع الامة .
وقصة الغزال العتقها الرسول ( ص ) معروفة لدينا الغزالة اسرها اليهود وبكت لانها عندها صغار يرضعون وضعتهم لتوها ورفضوا واخذوها معهم وفى الطريق رأت الغزال الرسول ( ص ) وخاطبته ودموعها تسيل من وجهها فدهش اليهود عندما عتقها الرسول ( ص ) مقابل مجموعة من الاسرى اليهود لديه .
ومن يومها يستجير المسلمون وراء العتق الغزال محمد عليه الصلاة والسلام .
ولكم التحايا
ام وضاح
| |
|
|
|
|
|
|
|
|
|
Re: الأسطورة في كلام الحبوبات : في الفروع الخدر (Re: الجندرية)
|
الأخت العزيزة... السلام عليكم ورحمة الله وبركاته والحضور الكريم أجمل تحية
طبعا لايمكن أن نغيب الفكر الشيعي عنا نحن السودانيين وبرغم إننا نصنف أنفسنا كسنة... ولكن توجد كثير من الأفكار والمعتقدات التي نتعامل معها بشكل مسلم به وهي أصلا للمذهب الشيعي ولا نري فيها اي ضرر وحرج.. وهي كذلك ...إما حكاية شيعة وسنة ده موضوع طويل كانت للدسائس والفتن والإطماع نصيبا وافرا في تأجيج الخلافات وتوسيع الهوة بين المذهبين... طبعا دخل الإسلام السودان وانتشر بواسطة الطرق الصوفية وشيوخها الإجلاء الذين اتي اغلبهم من بلاد العراق وفارس...و كثير من المعتقدات والممارسات التي نمارسها في يرجع أصلها للشيعة ومن ضمنها فكرة المهدي والمهدي المنتظر ... والاحتفال بالمولد النبوي .. وأذكار الصوفية الرائعة...والكثير والمثير..... ومن أهم ما في الأمر أن الشيعي والسني سيان في بلاد السودان .. وليس كما ينظر للأمر عند الوهابيين مثلا.....
| |
|
|
|
|
|
|
|
|
|
Re: الأسطورة في كلام الحبوبات : في الفروع الخدر (Re: الجندرية)
|
الجندريه انت تتعلي ما تتدلي
حبيت اسلم عليك... وشكرا علي بوست الحبوبات والله انا بريدم ريده...
قريب دا عزمونا ختوبه و مشيت انا و امي.. دخلتنا بيت العيزومه كدي عيني و قعت علي مره حبوبة حلاة الدنيا فوقا... لابسه التوب الساكوبيس البرتقالي و الشلوخ لي ورا... قلتا لااااازم اشوف لي طريقه اتونس معاها... يا زوله انا الليل كلو بتونس معاها هي زاته تكون استغربت...الذ شي قامو قالو لي قومي ارقصي... لمن شافتني ابيت اقوم قالت يا بت خير ليك قومي التقله الزمن دا ما بتنفع... اكان لقيتيلك شي امسكي فوقو قووي....
الله يطراها بلخير ريحتني بي ونسته البسيطه..
| |
|
|
|
|
|
|
|
|
 Re: الأسطورة في كلام الحبوبات : في الفروع الخدر (Re: ود الشيخ)
|
سلام يا الجندريه
كتلو عريف اهله فى الريف تقال حينما يتم قتل ثعبان او اى من الهوام . والفكره انه حين قتل الثعبان فان انثاه ستأتى للانتقام من قاتله ليلا لذلك يجب وفى لحظه قتله ان نقول كتله عريف اهله فى الريف لكى(نجهجه)المنتقمه فلا تعثر على قاتل رجلهاولا تعرف من هو -لى حبوبه غضبت جدا حينما قتل ابنها ثعبان وقالت قولتها هذه فاصر ابنهاوكان صغيرا ان يقول(كتلو سليمان اهله فى امدرمان) وباتت ليلتها ساهره خوفا عليه.
اما بالنسبه لتربيه الحبوبات فأنا تربيه حبوبات اصيله لى اربعه بدل اتنين لا انسى حبوبه (غاليه) رحمها الله التى كانت متعتى المفضله فى ان تأخذنى فى حجرها لالعب بشعرها الناعم ذو الالوان الثلاثه وامرر يدى فى تجاعيد وجهها ويديها و اعطن وجهى فى توب الزراق ذو الرائحه التى لا انساهاوتحكى لى احاجى اهلها البقاره ...لا انسى لهجتها الحلوة... كانت مربيتى رحمها الله
اما بالنسبه لاستاذه حبيت اشاغلك وبرجع ليك تانى احكى ليك عنها
| |
|
|
|
|
|
|
|
|
 Re: الأسطورة في كلام الحبوبات : في الفروع الخدر (Re: بت القبايل)
|
العزيزة الجندرية تحياتي وكثيف احترامي
ياسلاااااام عليك الدرر دي من وين بتطلعوا فيها مزيد من الدرر الغوالي بنكهة الحبوبات وجلساتهم العصرية وقهوة الضحوية وقعدة في بنبر كده تحت ضل شجرة نيم وعنقريب هبابي
بس عائز اعرف كلام الحبوبات لمن يقولن ليك يالكباشي يانبي نوح وبالذات بالليل أو لمن يشوفو ليهم عقارب أو ثعابين دي يكون شنو
بت القبائل حلاً لسؤالك دي مش الأبرة
هاكي دي
حبوبتي في ديوانا تأكل في مصرانه
دي البعرفها ليهو جائزة
| |
|
|
|
|
|
|
|
|
|
Re: الأسطورة في كلام الحبوبات : في الفروع الخدر (Re: الجندرية)
|
الأستاذة الجندرية
نبي الله الخضر
صلاح مصطفي
حزب الخضر
كلها لاحت بخيالي عندما توقفت عند هذا العنوان
ليه؟ لا أدري؟
سمعت جدتي شينة أم المليح
تقول عندما تقدم لها هدية
(خضر زراعك)
كيف يعني
وبالمناسبة جدتي ليست شينة كما كما تكنى
بل في زمانها ( وام جركم ما بتأكل درتين) كانت جدي
وخوف عليها من عين الحاسدين أطلق عليها لغب شينة
بدلاً من سمحة أو جميلة
| |
|
|
|
|
|
|
|
|
|
Re: الأسطورة في كلام الحبوبات : في الفروع الخدر (Re: الجندرية)
|
الاخت الجندرية
سلام بطعم سر الرحيق
اختك تربية حبوبات مية مية
كمان ماركة امدرمانية
طيب احسبي
لمن الحبوبة تكون رضيانة عنك بتناديك تقول ليك
تعالي "يا حبيبة الليل الطويل"
ولمن تكون زعلانة من زول
* شكيتك لي بيدن قوية
* شكيتك لي لا نام ولا اكل الطعام
او تقول ليك يابت هوي "ارعي بي قيدك"
أو تقول ليك البت دي خليها "قائمة بي جهله"
أو خليها كدي لمن تجيب ليها "مصيبة ضقلة يكركب"
| |
|
|
|
|
|
|
|
|
|
Re: الأسطورة في كلام الحبوبات : في الفروع الخدر (Re: مناهل محمد الحسن)
|
والله يا الجندرية الموضوع عايز بحث فعلا لأن كلام الحبوبات مليئ بالحكم والأمثال التي تعكس الواقع وتجليه رغم إرتباطه في بعض الأحيان بالأسطورة وحتى الأساطير ربما كان الهدف من تداول أدبياتها توجيه وتقييم المجتمع أو رموز من المجتمع والرمزية تنشط في عهود الدكتاتوريات والظلم من قبل الحكام والسلاطين والملوك على مر العصور
والامثلة كثيرة كأساطير كليلة ودمنة وقصص ألف ليلة وليلة والشاطر حسن وأبوزيد الهلالي أما في أدبياتنا الشعبية المحلية الامثال كثيرة وتضرب في مناسباتها
أها يا الجندرية حبوباتي الاثنين محسيات وأدبنا النوبي مليئ بالحكمة والامثال المعبرة وكذلك الاساطير الشعبية وكتاب الأحاجي للأديب الراحل الطيب صالح مليئ بالأحاجي ذات الجذور النوبية
أكتفي الآن ولي عودة بإذن الله ومعي بعض من كلام الحبوبات وساعدوني في الترجمة من الرطانة للغة العربية
| |
|
|
|
|
|
|
|
|
|
Re: الأسطورة في كلام الحبوبات : في الفروع الخدر (Re: Raja)
|
بعد تأكيدنا كلنا على عشق الحبوبات و كلامهن هاكن/م الرصه دى
الحبوبه متباهيه و متعوجبه:
ابزق فى الرز الابو الخلفه و العدس الابو الطلبه
نمل السكر فى بيتنا يترهرج
الحبوبه زعلانه:
انتى انتى تلديك الخصيمه لى ديمه
انتى تقعدى كببه
تضحكى؟؟ تضحكى بلاهن يعجبنى خلاهن
خليتك للاقوى منى و منك
الحبوبه مستهكمه:
أضحكن يا ركبى سننونى عجزانه
دق الباب و اخنق العتبه
و ح اواصل يا جندريه لانو الموضوع شيق و عشان قربت اكون منهن و باقى لى اخير استعد
| |
|
|
|
|
|
|
|
|
|
Re: الأسطورة في كلام الحبوبات : في الفروع الخدر (Re: Siham Elmugammar)
|
العزيزة جندرية تحايا بالكوم
هناك مابيننا توارد خواطر عجيب انا هذين اليومين مسكونة بااغاني الحبوبات وبدات بالكتابة عن هذا ولكن وجدت نفسي انداح في مساحات خواطر ذاتية جدآحول عذابات المرْأة والاسي الذي الذي يلف مسيرتها علي العموم شكرا لك لتصحيةالخاطر وسااكتب واستكتبك في هذا .
اتذكر الان في كتابة توثيقية عن احاجي الحبوبات والاغراق في الاسطورة والخرافة والمتامل لادب الحبوبات ان جازت التسمية هو ادب ذو نزوع واضح نحو الخرافة وفي راي ان علة ذلك في محدودية محيطها مما يدفعها لخلق فضاءآتها الخاصة والتحليق فيها ومن ثم استدعاء رصيدها من الخيال لتضفي عليها اتساعا واتساقا وذلك في حد ذاته فن صعب ويحتاج لدربة وحنكة ....تخيلي لوان هذه الحبوبة في زمانها تمتعت بقليل من حرية الحركة والتجوال والسفر مانوع الادب الذي كانت ستنتجه ربما سيكون اكثر تعقيدا من واقعية ماركيز السحرية .
في البال الان هذا الدعاء الملفوف بروح الاسطورة كثيرا ماكانت ترددهامي وهي في اقصي حالات الرضي عني
(يسعدك سعد بت المني الابوها دفعها والمولي رفعها)
ويسعدك ياجندرية
الهام
| |
|
|
|
|
|
|
|
|
|
Re: الأسطورة في كلام الحبوبات : في الفروع الخدر (Re: الجندرية)
|
في مداخلة للأخت زولة في احد البوستات
عن كيفية معاملة زوار / ات بوستاتك
انتبهت لقلة ذوقي
فعذراً لكل الأكارم والكريمات اللذين / اللواتي مروا من هنا
وساعود لهم / ن فردا فرداً
شكراً زولة
انشاء الله ما تتراجعي عن فكرة بوستك بتاعت أداب المنتديات
عشان الطقش الروش زينا ديل ينتبهوا / ن
| |
|
|
|
|
|
|
| |
الجندرية
محمد عبدالرحمن
Giwey
Adil Osman
Rawia
essam&amal
تولوس
محمد اشرف
Elsuhaili Magzoub
Ahmed Al Bashir
ebrahim_ali
EMU إيمو
adil amin
Habib_bldo
Ibrahim Algrefwi
shiry
Raja
Siham Elmugammar
فيس بوك
تويتر
انستقرام
يوتيوب
بنتيريست