|
الى روح المغفور له عبد الباقى الجرارى
|
الى روح المغفور له عبد الباقى الجرارى اللهم الهم أهله ومعارفه الصبر الجميل كلمات الشاعرة السودانية نجاة محمد الياس فجيت الأسى الودار ضهبته عليك اكوس وأكوس لقيتك جوه فى الأغوار تحرك فى مسامى تروس ماكان الأمل مغروس .. وكان الحلم ما مدسوس ووعدك بكره تتعافى وحلمنا نلقى ليك عروس يا وجعاً نخر فى الروس .. يا ناراً تلهلب جوه فينا تحوص ما قدرى الصعيب غدار وقد فى حشايا النار فتح ضلفة جحيم حراق نفخ كور الوجع مدرار ياوجعى وجع ناساً عزاز بلحيل من الجرار عبد الباقى يازولاً عجل بى رحيلو وسار وآدمرة شباباً راح قبل ما يكمل المشوار وهد قوايا هدانى صديق الويب سنا الاشراق فقدك زعزع أركانى يا زمن الرجا القتال غاب فى رجاك انسانى رجيتك يا صديق الروح فى شان اشكيك احزانى وأحكيلك زمان الغربة كيف بى فقدك أعيانى وكيف الويب حزينه على زويلاً فات كان زى معجم الكلمات وطوى صفحاتو فى لحظات وأشقانى زويلاً زى نداوة أرضنا لما يفج قليبو بفرحه يلقانى وشيشا زى تقول مكتوب عليه ملامح أوطانى وحروف تعبر مخيلتنا تحس بى زول رهيفاً زى نسايم النيل حميم ونبيل وانسانى بفتش فى قلوب الناس على منديل مطرز بى حرير حانى يمسح بيه دميعاتو فى شان ما تشوفها خياتو .. لآنه صبور وكان فى حبو متفانى هزم وجعاً رقد جواه سنين وسنين وهو بعانى وكان مكتوب على جبينو يموت فى الغربة وحدانى ويشيلو االوجعه أصحابك كأنك بعضهم ثانى وأنا الحبوبه تترجاك تحجى صغارها دوم بلقاك بإنك يوم حتلقاهم وتلقانى خيبت الأمل فى رجاك فجعته قليبى بستناك وبفتش ليك نوراً ببدد اشجانى ولما تغيب عن الماسنجر الحانى بشتاق ليك وبعمل سيرش وبخلق ليك عذر معليش أقول مشغول عليو بشويش وياما عليك كثير بقلق عواطفى تجيش كأنك بعض من ذاتى أو ذاتك من أولادى كأنك ريحة الطيبين وكت شقوا الجروف داجين كأنك بعض من قدرى بعرفك من زمن بدرى ما قالوا الولف قتال بقيت الليله قاتلنى باقيو يا صديق الروح ويافقد القلب مجروح صحيح فارقت أزمانى ؟ ؟ لا بلقاك أون لاين ولا بتلون الحانى ؟ صحيح حتغيب عن الهوت ميل ؟ صحيح الحال خلاص حيميل ؟ بلاك الشبكة ما بتتراد ولا بندخل على الشاتات حتبقى الذكرى فى الميعاد يرن صوتك فى أذانى واسمك باقيو ما محذوف بعضاً فيه عنوانى ولو أفقد حروف أسمك أجيب من وين بلد تانى ؟ يا هازم حدود الخوف مقامك سامى ربانى شبائب الرحمة تترجاك فى حوض كوثراً هانى رفاقك شهداء صديقيين وثانى اثنين ورفاتك ضُمَ للطاهرين .. شهيد الصبر يا انسان ... معوض بى جنان وحسان وحوراً عين .
|
|
|
|
|
|