|
ما دام الحلم واحد ولون الدم كمان واحد وطعم الطين اكيد واحد دفعت الروح عشان مليونك الواحد
|
وطريت عينيك وقت كتف رؤاى الليل وناديتك أقيف يا ضى أقيف قول لى بدونك كيف
خطانا تفارق العتمة وكيف انفاسنا تتجاسر اذا عبأ السموم الجو وما تتلاشى فى الكتمة ولو حام الرجل فى الزيف بدونك كيف ؟؟؟ تكون زنزانتوا فى الكلمة
ومتين يا ضى ؟؟؟ تجود عينيك تسوقنا عليك تمطر شوف يبل الجوف يفرهد طفلنا الآمل ويموت الخوف
ومعول نور يدك الجور ويبنينا
وطن فى سطور
ولادو بخور يحوم فينا بناتو الحور امانينا
سماهو صفا وطاهو وفا
ونسيمو حبور
أديمو نخيل وماهو النيل ونبتو شتيل مرق طربان يغنينا ومسك طنبور
تقوم ترقصلو طورية وتديهو الزهور شبال
يتب جنبو القلم يعرض حروف تريانه حرية
يلحن عود ويحفظ لحنو كوم اطفال
يحومو الحلة يتغنو يصحو الفول
يفيق من غفوتو السمسم ويفارق مخدعو البترول
يغور الجوع ,,, ترافقو دموع يبيت جوف الغبش مسرور يكون باكر حلم مشروع
يضج صوت الفرح مسموع يموت حس الالم موجوع عشان تحيا السعادة دهور
ما دام الحلم واحد ولون الدم كمان واحد وطعم الطين اكيد واحد
دفعت الروح وعصبية زمن مقبوح عشان مليونك الواحد
غشيت النيل غسلت الهم ولون الدم
وضيت قلبى بى نورك وناديتك أقيف يا ضى أنا الفى الظلمة ناجيتك أريت عينيك تكون هسى ويكون باكر فرج امسى نعيم فى العافية مدسى لقيت حسك ابيت حسى
عشان اقرأ الوطن فى سطور عشان اقرأ الوطن فى سطور
شعراء المنبر,,,, والبورداب كلكم ,,,,
اها قولكم شنو ؟؟؟ فى الشعر الرائع ده من شاب فى جامعة الرباط الوطنى .
محمد عوض ابو القاسم ود اختى ولسه ما شفتو حاجة الجايات اكتر .
ام وضاح[/B
|
|
|
|
|
|
|
|
Re: ما دام الحلم واحد ولون الدم كمان واحد وطعم الطين اكيد واحد دفعت الروح عشان مليونك الواحد (Re: essam&amal)
|
يا قراضابى يا هلالابى نحن عائلة كلها هلالاب وشايلين موبيتل لأنه المريخاب شايلين اريبا ما سمعت بى وضاح ولدى يا قرضاوى لما كان عمره خمسة سنوات فى الامارات سأله واحد اماراتى كان محرشوا ابو وضاح { عليه رحمة الله } قال ليه اسألو فول ليه انت مريخابى ؟؟ قام وضاح قال ليه لا يا عمو نحن السودانيين بيولدونا مسلمين وهلالاب . محمد يا استاذ جارى كدارى من ودنوباوى للفتيحاب ويصرخ فى الشارع جاتو هستيريا عديل كده . وان شاء الله تكون هلالابى وجعلى كمان عشان تتم الناقصة . شكرا لمرورك ورأيك فى القصيدة . تحياتى ام وضاح
| |
|
|
|
|
|
|
Re: ما دام الحلم واحد ولون الدم كمان واحد وطعم الطين اكيد واحد دفعت الروح عشان مليونك الواحد (Re: essam&amal)
|
Quote: ومتين يا ضى ؟؟؟ تجود عينيك تسوقنا عليك تمطر شوف يبل الجوف يفرهد طفلنا الآمل ويموت الخوف |
يستعجب الكثيرون أن كيف لـ ( طالب الثانوي ) - حسين بازرعة - أن كتب أغنية القبلة السكرى . وأن كيف لطالب الصف الأول بالجامعة - الجيلى عبد المنعم عباس - أن كتب أغنية مرحباً يا شوق . إبننا أو أخونا الأصغر محمد عوض ابو القاسم بدد ذلك التعجب وتلك الحيرة ليؤكد ما ظللت دوماً أردده بأن الإبداع طالب فمن لم يكن مبدعاً أيام الطلب والتلمذة يندر أن يكون مبدعاً في مستقبل أيامه .
شكراً كثيراً أختي أم وضاح تحياتي لمبدعنا ولك
| |
|
|
|
|
|
|
|