|
|
 مرحبا بالاستاذ الشاعر محمد طه القدال بهذا المنبر
|
تحدثت اليوم فى الماسنجر مع استاذنا الشاعر محمد طه القدال ووجهت اليه الدعوة للمشاركة فى المنبر الحر ، فوافق ووعدنى بان ينضم ، ارجو من الاخ بكرى او الاح نزار مراسلتى اليوم لامدهم ببريد القدال حتى ترسل له كلمة مرور للمشاركة فى المنبر
راجيا ان تعم الفائدة
|
|
 
|
|
|
|
|
|
|
|
Re: مرحبا بالاستاذ الشاعر محمد طه القدال بهذا المنبر (Re: يحي ابن عوف)
|
رجعلك قليبى المهضلم
_______________
محمد طه القدال
________________
رجعلك قليبى المهضلم
يراجع صنوف الغناوى العصيه
يراجع معاك الكلام القبيل استباك
الكلام المبهرج وخاوى
الكلام المزيف
ولافيه غير احتلام وانفصام
تموت الحروف يوم تقوم القصائد
مقام الطبول والبخور
بشوفك جرايد شواكر حوامد
ولاهامى فيها
عليها المصائب تمام التمام
مغايص بتفرم حشاها
وغبائن بتنفخ بطون البسفو التراب
وحايح لهيب البتلفح تلهلب وتكوى الجلود
اتف القصائد
اذا ما القصائد دايره ليك البكا
البصاحب ..رضا ..السردار
واتف القصائد اذا ما القصائد
بتنزل مريده وتسبح بحمد الذى
ابتلاك وهدانى الودار
طريتك وانا الكنت قايل
خيالك معشعش جواى
سكنتك ومالاقى فجه
اخيرلك اقول البحرق حشاى
اخيرلك افضفض جراب الخبايا
اقول الكلام البفكفك سوارك
يوقف جدارك ويرفع عضايا
تضيع الرموز التغتى الكلام
اقول السكاكر ابتنى ورمتنى وكفانا
اقول العساكر تبارى الكبارى
وتفتش قلوب الجهال الشلوخهم هويه
واغنى الزيود والكنانه
..كضب
اقول البنات البفتحن صدورن
يقالدن رشاشك ويخلن حبيبن
..كضب
مراحك يعشى ويفشى
خضارك مرطب يندى الضهارى
ترابك ..دخن لو زرعتو الحجاره
بلادك ولادك كروها السحالى
تسفر سعيتك تقنب تبارى
الجداد العقالى
تجوع يا البشدر خريفك
سوا فى البطانه
ويمطر رزازك عزازا حصايا
وقموحك سنابل مشاط كردفانى
ابيت الكلام المغتغت وفاضى
وخمـج
ولادك قصادك شعاع التحايا
يضووا الشقوق التلم الدوابى
يوروا الدروب للقلوبهم عمايا
عرقهم حبالك
وصوتهم مشانق
تلم الدقون الكبيره
وتحدر فقر سمنتها الليالى الضليمه
بتهدر حرائق وتحمى البياكلوا المطايب
وتسجن بطون الجياع العرايا
وشوشهم سمر حر اباطك
صفوفهم مرامك وحلمك حلمهم
رغيفه وكرامه وسلامه
مصانع بتحرق قبل تبدا فيها
مزارع بتيبس ونيلك ممدد جنازه
وعقيدك وسيدك بيكتب ويمحى
وتبقى المحايا
_____________
rani-sudani
| |
|
|
|
|
|
|
| |
bamseka
بكرى ابوبكر
يحي ابن عوف
rani
فيس بوك
تويتر
انستقرام
يوتيوب
بنتيريست