|
|
 مقتطفات من الواقع 10
|
الامهات السودانيات ربنا يديهم العافية ويطول عمرم
لديهم خاصية فريدة في نوعها وهي الدعاء
يعني لو الدعوات دي بتحقق لكان نصف الشعب السوداني
مكسر ومرضان وحالته بالبلاء والنصف التاني في خبر كان
من الامثلة
النيني اليشرطك يكسر رقبتك
طلعتي وين تطلع روحك
عمي كباس
قومي تقوم قيامتك
ختي الغداء يخت رقعك
ما جاية تجيك الكشة
نعم النعامة التزوزيك
وغيرها وغيرها
Any one tell me z reasons?
tasneem
|
|
 
|
|
|
|
|
|
|
|
Re: مقتطفات من الواقع 10 (Re: tasneem)
|
الفاضلة تسنيم
والله ما اعتقد انو في والد ممكن يدعو على اولاده
بقصد انما هي عادة على ما اظن والعادات السودانية السيئة كثر
وقد ورد عن الرسول عدم الدعاء على الابناء فربما يصادف الدعاء ساعة اجابة
| |
|
|
|
|
|
|
|
|
|
Re: مقتطفات من الواقع 10 (Re: Mandela)
|
اها نجي للاباء السودانيين العسل ربنا يديكم العافية
ويشدكم علي تحمل مهامكم وتربية ابناءكم علي
الوجه الاكمل وعارفين المهمة دي ما ساهلة بس عاوزة اقول ليكم لي معظمكم
صارمين لمن غلط يعني لو حاولتوا تكونوا اصدقاء
لابناءكم وبناتكم حتكون حاجة جميلة وخاصة البنات
ديل رقيقات وحنينات وبطبيعة البشر البنت ميالة
اكتر للاب يعني حقو الاب السوداني ما يضيع الفرصة
دي لانه ممكن تكون العلاقة جميلة بين البت وابوها
اذا استبعدنا حاجز الخوف لانه بصراحة كدا في نوع
من الاباء كدا يدخل الرعب والخوف في قلوب ابناءه اول مايجي داخل البيت
وفي نوع برضو كدا يمثل مصدر دخل فقط في
نظر اولاده ليه ما يكون الاب نبع للحنان والعاطفة
وهل اظهار الحب والعاطفة ينقص من قدر الاب
وليه الحواجز وليه العلاقة ما تكون عمادها الصراحة والوضوح وفي كثير من الاحيان الاب هو اخر من يعلم وكثير ما تدار اتفاقات سرية بين الام والابناء
tasneem
| |
|
|
|
|
|
|
|
|
|
Re: مقتطفات من الواقع 10 (Re: tasneem)
|
النيرة المتنورة تسنيم
أب واحد؟ أنا عما قريب سأكون سبعة أباء..الصرامة لم ألبسها لكنهم ألبسوها لي..اقصد أمهم خلقت لي هيبة من حيث لا أمتلك..كيف لا أعرف..شغل نسوان..أنا لا أدق ولا أضرب ولكنهم يهابوني..اتكلم عن الكبار والكبيرات..يعني الآولاد والبنات الكبار..أما الصغار فالجيب واحد والسرير واحد والعربية واحدة ومالك يابابا ما بتفهم دي..ويابابا شعرك منكوش..ويابابا مش وعدتنا ومش عيب الواحد يوعد ويخلف..أما الكبار فقد قررت أن أنزع من أذهانهم الصورة التي دخلت فيهم من رأس أمهم..فقد خمنت أخيرا أن ما فعلته أمهم هو نوع من التكتيك للسيطرة على الرأس الكبيرة بطريقة غير مباشرة..يعني هي تبعد الآولاد مني لتقرب مني أكثر وأكثر..شفتي كيف المرأة دي هي دائما السبب..تتذكري حكاية الطهورة؟
| |
|
|
|
|
|
|
|
|
|
Re: مقتطفات من الواقع 10 (Re: banadieha)
|
Dear banadieha
salam
عزيزي بناديها
لازم تغير سياستك تجاه الكبار ديل سريع
وبشتي السبل .
صدقني يا اخوي الامهات ورغم دعاويهم الصعبة ديك
الا انهم هم الكسبانيين
عشان كدا لازم تفطنوا للمسالة دي يا اباء
بتذكر عندي صحبتي ابوها من النوع المضيقة شديد
كانت بتقول لينا انا ابوي دا لحدي الان ما اتاملت
ملامحه بالضبط لاني ما بقدر اعاين ليه كتير
فالوا ليها البنات الحل الوحيد انه تخلي ينوم عشان
تملي عينك فيه.
بعدين في نوع كدا بسبب الصرامة دي اولادهم بيريدوهم
ريدة كدا بس تادية واجب
| |
|
|
|
|
|
|
|
|
|
Re: مقتطفات من الواقع 10 (Re: tasneem)
|
Dears wad aljaili & mandela
Salam shadeed
اهة ما قتوا لينا ستات الحبايب كانوا بيقولوا ليكم شنو لمن تجوا قمصانكم وكرعينكم مليانة طين من لعب الكورة وخاصة لمن توسخوا ملايات الحوش
| |
|
|
|
|
|
|
|
|
|
Re: مقتطفات من الواقع 10 (Re: tasneem)
|
حقيقة الموضوع محتاج لأن نقف عنده كثيرا ووقفة بتأمل كمان
ولكن الظاهر انها بقت طبعة واتلصقت فينا لدرجة انو ما قادرين نخليها
وزي ما قال ود الجيلي بالنسبة لدعاء الامهات اقول الحمد لله انو ربنا ساترنا ساااااااااي يعني لو جات في وقت وربنا استجاب للدعاء ما عارف البيحصل شنو لأم الشافع البتحصل ليه حاجة
وبالنسبة للرجال فعلا نجدهم جادين اكتر من اللازم وكانو لما يدخلو البيت داخلين معركة ولا حاجة كدا(الله يستر ابوي ما يسمعني بس) المهم كتر خيرك يا تسنيم
وان شاء الله الجيل الجديد يغير هذه الطبعة التي التصقت بنا رغم طيبتنا المعروفة
ولكم كل الود
| |
|
|
|
|
|
|
|
|
|
Re: مقتطفات من الواقع 10 (Re: motaz)
|
الاخت تسنيم تحياتى واشواقى
مما لا شك فيه حنان الابوين على اطفالهم .. ولكن هذه الالفاظ اختى تسنيم تستخدم احيانا للتوبيخ دلاله على اهميه الموضوع واستعمال الشده احيانا فكلنا يعلم ان الشده والقسوة وحدها لاتنفع بقدر ما لاينفع ايضا اللين وهنا يستخدم معظم الاباء والامهات شعرة معاويه مع اولادهم فالقسوه مطلوبه احيانا مثلما اللين مطلوب ولو ربى الاباء اولادهم على وتيرة واحده لفسدوا فلا ينفع اللين حد الدلال ولا تنفع القسوة حد الاختناق 0
ومن اقولاهم
ادينى مويه ..ابو مى يشرطك
طير طياره تقلبك
ما تجى .. تجيك الطاويه حبالها
واتخمد نوم نومه مامنها قومه
واتلهى
بتقع تتكسر كسار امى ان شاء الله ( ومرات تكون حبوبتك شديده ؟ ) 0
عميان .. عمى كباسه
وايضا ننتقل اختى تسنيم للجزء المكمل للاباء وهو المعلم حيث حدث ولا حرج
فللمعلمين كلمات معروفه وكثيره ربما تترك اثرا سيئا بالنفس مستقبلا
اترزع
وانت كان تنجح يا عشى البايتات
وكنبه ورى انتو تمومه عدد
ما سامع تسمع الطرش
اها سمع .. نسمع خبر موتك
وكتير .. كتير
ولك الامنيات الصوافى تسنيم
ديك الجن
| |
|
|
|
|
|
|
|
|
|
Re: مقتطفات من الواقع 10 (Re: tasneem)
|
المحترمة تنسيم
عزاك اللة وابقاك
واللة يا تنسيم ما عارف اقوليك شنو ولكن موضوعك دة جاء معاى انا فى الصميم
اولا انا اتفق معاك فيما يختص بالامهات بنسبة 10% الانو واللة زى ما ذكر احد الاخوان انو مافى ام بتتمنى انو دعوتها دى تستجاب ولكن الانسان فى ساعة الغضب لايستطيع ان يتملك نفسة وهنالك.
عامل اّخر يمكن ان نعزى لة هذة العادة هو اننا كلنا من جيل لم تجد فية
امهاتنا قدرا وافيا من التعليم الامر الزى اثر سلبا فى طريقة تعامل الامهات مع ابنائهم من ابناء جيلنا
ولكن فى يما يختص بالاباء فانا اتفق معك بنسبة 100%, ما عرفناو واللة يا تنسيم جهل, ولا غطرسة ,ولا رجالة فى البيت بس, ولا حارقهم الشغل البشتغلو برة ,البيت والاولاد قاعين تجيهم الصينية مدنكل جاهزة , ولا ندمانين على الولادة
فى نوع كدة بعد ما ولدو يكبر ويعمل خطاء صغير يقولو دى تربيتى الربيتك ليها دة تعليمى العلمتك ليو فى حين انو منز خلق اللة ابنة لم يعطية درساً واحدا ف الاخلاق واللة العظيم يا حماعة ما تستغربو للكلام دة الكلام دة حاصل فى مجتمعنا السودانى كثير جداًالاخلاق او الدراسة كيف واكثر من ذللك تجد ان الابن اكثر خلقا من ابية
وبعدين فى حاجة تانى تلقى الولد بعد ما يكبر ويشتقل ويعمل لية قروش يادوب حتن الوالد بيدايناديو يا ولدى ويا ابنى مع ملاحظة ان فى السابق كان ينادية بياولد وطيب زمان كان شنو؟ واللة يخليك و كلام من هذا القبيل
وفى نوع ثالث تلقاة ولد اولادو وباقين ليو شوكة حوت فى حلقوا يحلف يقول الا يخلص
حقو منهم!!! ولو سالنا قلنا حقو شنو حقو هو انو ابوهم
وفى زول قليك الدهم ياخى
| |
|
|
|
|
|
|
|
|
|
Re: مقتطفات من الواقع 10 (Re: motaz ali)
|
يا جماعه ما ننسى الجانب الاخر يعني الدعوات الطيبه و الجميله
والله لو نظرنا لي امورنا كدا بنلقاها ماشه بس بي سبب دعاهم لينا
و بعدين ما تظلمو الاياء لانو في نماذج كتيره بنلقى في امهات صعبات شديد
و الشده برضو احيانا بتكون لازمه بس التوازن هو المطلوب يعني ما تكون في غير محلها
تعرفو ابوي الله يديهو العافيه لو شفتوهو ما بتفرقوهو مننا يعني زي صاحبنا واكتر حتى اصحابنا لما يجو البيت و يكون هو قاعد معانا ما بيحسو بي اي فرق
و في نفس الوقت فرض احترامو وحبنا ليهو بي ثقتو فينا و مشاركتنا في كلو حاجه حتى في الكوشتينهو حتى المجكسفينا بيسالو و يشاغلو وقدر يعمل توازن تعرفو انو انا بتزكر انو في حياتب ما درتا اكذب عليهو ولا مره ما عشان انا بخاف منو بس عشان فعلا بخجل من نفسي اعمل كدا بي سبب ثقتو فينا و معاملتو لينا رغم انو برضو زوول ممكن يكون صعب ولما يكون زعلان البيت كلو بتكهرب لكن ممكن يتراجع بي كلو بساطه وشجاعه عن رايو لو ما منطقي ولو سالتوني عن اقرب صديقه لينا حا تكون الوالده ربنا يديها العافيهاها دي بقى حتى في الكوره تلقاها تشجع معانا او تكاوي فينا و عارفهاسماء اللعيبه و معلومات كتيره عن الكوره و انا اعتقد انو دي هي الطريقه السليمه و اكييد في نمازج كتيره زي دي اتمنى من الله انو يقدرنا نكون زيهم
لكم كل الود والتحايا
| |
|
|
|
|
|
|
|
|
|
Re: مقتطفات من الواقع 10 (Re: ايهاب)
|
Dears mataz & Ehab
Hi
I thank u & appreciate nearly everyone contributions
وربنا يخلي ليكم اباءكم وامهاتكم
وانشاء الله نشوفكم اباء مودرن كدا لتمحوا صورة الاب السوداني الصارم لمن غلط
| |
|
|
|
|
|
|
|
|
|
Re: مقتطفات من الواقع 10 (Re: tasneem)
|
لكن الامهات رغم دعاويهم الصعبة دي ومفراكتم الشغالة
طوالي دي( يا ربي لسة المفراكة هي الاداة اللتي تستعملها
الام ولا اتغيرت مع التطور) ومع ان الاب نادر ما يلجا الي
الضرب الا في الحالات المستعصية ولكن الابناء يهابون
الاب اكتر .
وبرضو الام لمن طفلها يعمل حاجة غلط تقول ليه انتظر
لمن يجي ابوك يعني الاب يستعمل كاداة تهديد بصراحة كدا الام
عاوزة تشيل الاب وش القباحة
عشان كدا
لازم الاباء ينتبهوا للنقطةدي
والامهات رغم المفاريك والدعوات هم الكسبانين
لانه دايما في نظر الابناء ان الام ملاك وضحية حتي لو كانت غير كدا يعني مافي زول بيشوف امه غلط
ولو في مشكلة او خلاف بين الاب والام تجد الابناء
في صف الام يعني متحيزين للام دائما
| |
|
|
|
|
|
|
|
|
|
Re: مقتطفات من الواقع 10 (Re: tasneem)
|
This r another da3awy & z meaning
جوع بت البرقد ...الشوت رحطها و اكلتو
البرقد بكسر الراء و أظنه مكان ما في المليون
ميل مربع الغالين علينا كلنا ... و هو في الاصل
مثل ... استغل المثل للرد على الصغار كلما شكو
الجوع و خصوصا عند طرح الاسئلة على شاكلة
الغداء ما طلع ؟؟ نحن جعانين ... العشاء لسه ؟؟
زيدو لينا ... ما شبعنا ... وهكذا
| |
|
|
|
|
|
|
|
|
|
Re: مقتطفات من الواقع 10 (Re: tasneem)
|
العزيزة تسنيم ....طبعا في دعاوي الامهات ما كانو بيحبو يستعملوهاو بيستغربو لما يسمعو ام بتدعي اولادها بيها زي :
يا ولد خشمك بالكلف ...وللحين ما عارف الكلف ده شنو
ويا ولدخشمك بالحليق ...و الغريبة كلها للخشوم!!!
والرقدة الما منها قومة .....
تجيك الجات في ابوي ..... ويكون ابوها متوفي
والغريبة الواحدة فيهم لما تسمع التانية تدعي تقول (كر)!!!!!يبرا ويستبرا
والله يدي امهاتنا و ابواتناالصحة والعافية
| |
|
|
|
|
|
|
|
|
|
Re: مقتطفات من الواقع 10 (Re: فنجرى)
|
This another meaning of da3awi
اقعدي يقعد نصك...اي تصاب بالشلل والنصفي منه تحديداً حمانا الله
يختخت رقعك... واظن المقصود بالرقع هي رقع الملابس اي كأنما هي دعوة بالفقر أو شئ من هذا القبيل أو ربما رقع الجلد وهي اسوأ واكثر يهودة من غيرها
اتكلمي اتكلموا بكلامك..وهي من اسخف الدعاوي...وتعني ان يلوك الناس في سيرتك بالشر
| |
|
|
|
|
|
|
|
|
|
Re: مقتطفات من الواقع 10 (Re: tasneem)
|
قلبى على ولدى وولدى قلبه على حجر
نعم الامهات والاباء عندما يدعون لايقصدون ولاكن لحظة غضب ، ونهينا عن ذلك ،
التربية لكل اسلوبه فيها ويختلف من فرد واسرة لاخرى
| |
|
|
|
|
|
|
|
|
|
Re: مقتطفات من الواقع 10 (Re: al_msaa)
|
Dears alfanjary & almsaa
Salam
Thankx alot
I appriciate your contributions.
I will comment later
لكن احيانا الدعاوي دي قد تسبب مشاكل لناس العايشين
في الغرب والقصة دي حصلت لام سودانية معانا هنا
الام دي عندها بت عنيدة يوم كدا جات معاها صحبتة
الخواجية ولعبوا في الاوضة ووسخت اوضتة شديد
امها اتغاظت شديد وقالت ليها الليلة لو ما نضفتي
الاوضة دي ورتبتيها انا حاكسر رقبتك واطلع عينك
واهرد مصارينك قامت صحبتة سالتها وقالت ليها
امك قالت ليك شنو البت ترجمت ليها الحاصل الخواجية
طوالي اتصلت بالبوليس . البوليس طوالي طبعا مستعد
للحاجات دي وقاعد علي الهبشة
البوليس بهدل ليك الام بهدلة واسئلة تسل الروح
الام دخلت في دوامة عجيبة مع ناس البوليس وalchildern aid
الام
دخلتة جنس خلعة وعقدة من البوليس
| |
|
|
|
|
|
|
|
|
|
Re: مقتطفات من الواقع 10 (Re: tasneem)
|
عزيزتي تسنيم
لك التحية
في قريتي الصغيرة تعودنا منذ أن كنا صغاراً على
نهرة الوالدين ومصع الأذن والضرب أحيانا
فكانت أمي تمصع وتضرب وبعد لحظات تمسح يدها على رأسي
وفي المدرسة المعلم يمصع ويضرب ويشتم (ياوقح يا زفت...الخ)
وتمر الأيام ونشكي إلى جدتي الحنون تضمني في حضنها
تقل لي : إنهم يريدون أن تكون راجل كلس
ما علينا إنه بداية حديث نحو التربية
والخلاصة لا الأب ولا الأم تريد أن تؤذي ولدها
بل العكس . الله ينور دربك الله يحضرنا جديد
والكلام الحلو
أما مسألة المرأة التي طلبت البوليس
فهذا مرجعه العادات والقوانين المتعارف عليها
فهل يصدق أن تستدعي شرطة الخرطوم لمسائلة مرأة
نهرت إبنها؟
| |
|
|
|
|
|
|
|
|
|
Re: مقتطفات من الواقع 10 (Re: EMU إيمو)
|
تسنيم لك التحية يا غالية
وهاك حكاية حصلت عندنا الأب سوداني والأم اجنبية
والولد نوع العيال الما بسمعو الكلام ..اكثر من مرة
ابوه بيقول ليه يا ولد واالله ما تقعد ساكت بكسر ليك رأسك ده
ويوم عادي جدا الأب كان بيلاعب في ولده ..الولد وقع وخبط الحيطة
الخبطة كانت شوية كبيرة..راحت الأم طوالي متصلة بالبوليس وقالت ليهم
انو الأب عايز يكسر للولد رأسه
وهاك يا سين وجيم والحكاية بقت حكاية
وتحقيق و أسئلة ومسلسل حلقاته طالت
| |
|
|
|
|
|
|
|
|
|
Re: مقتطفات من الواقع 10 (Re: bitalneel)
|
Dears bitalneel & Emu
سلام من الاعماق
I appriciate your contributions
Emu
يا ايمو في جنس قصص في البلاد دي وفي النهاية قانونم هو البيمشي
يعني ناس الشرق عندهم قصص وحكاويي مع هذه القوانيين
| |
|
|
|
|
|
|
|
|
|
Re: مقتطفات من الواقع 10 (Re: tasneem)
|
يضربك الضريب
والضريب هو مرض السحائي أو الذي يسمونه (ابو فرار) على ما اعتقد... أما لماذا يكسر العناقريب فالله اعلم...ربما من طول مدة المرض والرقاد الدائم على السرير...ودي من عندي
و...ارجعي تجيك الراجعة
وهي نوع من الحمى الفتاكة
وتنوم السهر...دعوى بالإصابة بالأرق والسهر
ويموت حيلك...دعوة بالموت أو الشلل شبيه الموت
| |
|
|
|
|
|
|
|
|
|
Re: مقتطفات من الواقع 10 (Re: tasneem)
|
ماذلنا في البحث عن اسباب هذه الدعاوي
يمكن يكون عدد الاطفال هو من ضمن الاسباب القوية لانه في الغرب الغالبية العظمي
بيكون عندهم طفل او طفلين عشان كدا الام تعاملها بيختلف
لكن تعال شوف عندنا في السودان بس اتخيل ام عندها
7 اطفال وكل لديه احتياجاته وبالذات الولادات المتقاربة
يعني الام ما عندها زمن لنفسها عشان كدا
ما عندها طريقة تنفس بيها الا هذه الدعاوي
tasneem
| |
|
|
|
|
|
|
|
|
|
Re: مقتطفات من الواقع 10 (Re: tasneem)
|
بعدين عاوزة اقول ليكم ان الاباء والامهات بيفرقوا بين
الابناء يعني الريدة والحب ما مقسمة بالتساوي
يعني عاوزة ام او اب يقول لينا ماهي المعايير اللتي
توزعون بها عواطفكم ومشاعركم بين الابناء ومرات في
بعض الاباء والامهات بيعملوها ظاهرة من غير خجلة
وفي بعض بيحاول يخفيها.
مرة لمينا ليك في امي وقلنا ليها يا ماما انحنا عارفين انه الانسان ما بقدر يتحكم في مشاعره ويا ماما عواطفك ومشاعرك انتي حرة فيها بس عاوزين نعرف انتي بتريدي
اكتر واحد منو
ويا ماما يكون في علمك انه الموضوع دا ما حياثر فينا
فكانت اجابتها
الصغير لمن يكبر والمريض لمن يشفي والمسافر لمن
يرجع من السفر والممتحن لمن يخلص الامتحانات.
الخ......
طبعا الاباء والامهات جبانيين جدا عندما يوجه لهم
السؤال مباشرة .
مرة سالت حبوبتي وقلت ليها يا حبوبة هل الامهات
بيساوا في الريدة قالت لي يا بتي المثل بيقول
في اولادك ليك ولد
| |
|
|
|
|
|
|
| |
Wad Aljaili
banadieha
motaz
motaz ali
ايهاب
EMU إيمو
bitalneel
فيس بوك
تويتر
انستقرام
يوتيوب
بنتيريست