ناس قرشو وايمو وبكري والشلة والله ياجماعة انا سامع لي خبراً كده ماهو زين بقول انو الزبير نايل ناس قناة الجزيرة انهو عقد في الشغل والخبر ياريت لو انتهى على كده على ذمة الراوي وهو انو الزبير لم يطور نفسه في المقابلات الهاتفية والكلام صادر من بعض الاخوة النحن الان بناصر فيهم وهم الفلس والطين افهموها كده بدون شرح فوالله ياجماعة الجماعة ديل اخبس خلق الله بعد الجماعة اياهم واسلوبهم خسيس في التعامل والخبث في عيونهم والتجسس شيمتهم والخيانة دليلهم والتملق طريقهم والتوسل سبيلهم ولكن نحن اولاد بطونن حارة ونحن اولاد جعل ما بنركع ليهم وحقنا بنموت فيه عديل وانا عائز بس رائكم في الجماعة ديل شنو واوعى من كب الزوغة
04-15-2002, 02:39 PM
EMU إيمو
EMU إيمو
تاريخ التسجيل: 02-16-2002
مجموع المشاركات: 2924
حبابك يا الحبيب إبراهيم يا أخوي لا تتعب نفسك الجزيرة مؤسسة إستثمارية يعني هدفها الأساسي الربح وكون الزبير ننهى عقده هذا شيء متوقع ولكن لا تنسى ان معظم التقارير يعدها ويقدمها السودانيين
04-15-2002, 02:47 PM
Tabaldina
Tabaldina
تاريخ التسجيل: 02-12-2002
مجموع المشاركات: 11844
.. . يكون دا حماميزو دا لمن مشي فى هبب فى العيد خته ليها خازوق بهناك طفشة ديل والله مش يطفشو الزبير ديل يطفشوا العافية من الجسم .. . نسال الله يكدب الشينه الزبير مذيع مخضرم وما يستاهل انهاء عقدوا ؟؟ بس المؤمرات العربية ليست على فلسطين فقط بل قد تدخل اروقة الفضائيات
فهمت حاجة
04-15-2002, 02:54 PM
ebrahim_ali
ebrahim_ali
تاريخ التسجيل: 02-05-2002
مجموع المشاركات: 2968
ياايمو انا معاك كلامك كلو صاح انو الاستاف اغلبهم سودانيين واخيرا تم التعاقد مع عمار عبد الرحمن ومعتصم البكري على ما اعتقد مترجم وكذلك اغلب الخبرات الموجودة في الجزيرة سودانية واول صوت انطلق من الجزيرة صوت سوداني هو لقمان همام فقد تم تكريمه مع مجموعة من المذيعين في احتفال القناة بسنتها الخامسة قبل فترة وقصة انو الجزيرة مؤسسة استثمارية هذه ما فيها شك لكن برضو الخساسات موجودة تبلدينا والله حماميزو يعملها ياخي دا طفش كل المبدعين ناس الطيب عبد الماجد وهبة المهندس وواحدة شديدة جدا لمن غلط وبرضو في مذيعة تانية شردها لمن عرسوها وزوجها تقريبا الشاعر الدكتور معز بخيت في البحرين وكتتتتتتتتييييير من جماعة حماميزو الشردن بس الماقدر عليهو الصباغ عرفن السبب شنو دي المرة الجاية
الاستاذ و الحبيب ابراهيم على اتابع كل برامج قناة الجزيرة باستمرار ولفت امرى اختفاء الزبير وذى ما قال اخوان السابقون الحاجة ده ما غريب على الناس ديل بس الغريب انو القناة تجيب لقاء مع فلسطينى اسمر (يعنى شكله سودانى)من مخيم جنين لاول مرة يدعو كولن باول الى زيارة المخيم مع انو يوجد فى المناطق الفلسطينية المحتلة عدد كبير جدا من الفلسطينيين السمر لم نرهم او نسمع عنهم قبل كده فى القناة
04-15-2002, 04:35 PM
بكرى ابوبكر
بكرى ابوبكر
تاريخ التسجيل: 02-04-2002
مجموع المشاركات: 18728
اكب سلام لناسات بورد دي كلو لأنو كل يوم همن بيجيب موضوع جديد مفيد ، أخوكم منوت و الله ما بيعرف (زبير نايل) و لو همن بيشتغل في (قناة جزيره) ده فخر لسودانيين كلو ، و إذا زبير خلاص انتهى من شغل بتاعو في جزيره ، ٍودان و تلفزيون بتاعو في .. و همن يبدو مذيع (جديد) يعني بعد سنة 1988 . منوت بيسأل عن مذيعين (قدام) في إذاعه و تلفزيون سودان ، ناس عوض إبراهيم عوض و الصباغ و جمال مصطفى و حسن دوكه و رجاء حسن حامد ... مذيعين ديل مشو وين ؟ بالله لو في زول بيعرف همن وين خلي بيقول لمنوت ... لأنو أنا بيسمع همن و بحب برامج بتاع همن ...
_______
و منقو قل لا عاش من يفصلنا
04-15-2002, 09:32 PM
Bakhaf
Bakhaf
تاريخ التسجيل: 03-06-2002
مجموع المشاركات: 2434
الاخ منوت لك التحية والود لقد سألت من نجوم تألقت ومازال بريقها يرسل شعاعه جميلا فى عالم الاعلام الكل يعرف بالجميل الشاعر الدكتور عوض ابراهيم عوض بجنوب شرق اسيا خلبه سحر جمال الطبيعه فى جنة الارض ماليزيا الان دكتور عوض استاذ الاعلام بجامعة الملايو . اما صاحب الصوت العميق الجميل ( الباص ) الاسم العلمى لطبيعة صوته حسن دوكه ذلك الشاب الساحر ايضا التقت روحه بارض الملايو الجمال فاستقر به الحال واكمل ايضا رسالة الدكتوراه . الصديق جمال الدين مصطفى عاد للسودان مؤخرا من المملكه العربيه السعوديه وعاد للتألق عبر الشاشه البلوريه . الرائعه رجاء حسن حامد فالندعو لها بالشفاء وربنا يديها الصحة والعافيه . استاذ الجميع الصباغ مازال الى عهد قريب احدى البسمات القلائل فى تلفزيون السودان .. فأسألوا معى عن الفنان عصام الدين الصائغ لقد علمت قبل يومين بأنه تعاقد مع تلفزيون ابوظبى بعد ان كان ايضا بماليزيا اخوى مانوت ارجو ان اكون قدرت اشفى قليلك فهؤلاء اناس احملهم فى دواخلى فى حلى وترحالى
يا جماعة هل العرب عدننا اننا عرب لا للاسف الشديد احنا متمسكين بالعروبة لكن هي عروبة متسخة دعوة لكل السوداننين ان نتخلي عن عروبتنا ونتمسك بافريقيتنا عمر
04-16-2002, 05:40 AM
nadus2000
nadus2000
تاريخ التسجيل: 02-05-2002
مجموع المشاركات: 4756
كأحد الذين تشرفوا بالإنضمام لهذا المنبر الذي أراد له القائمين عليه أن يكون منبرا إعلاميا يعتمد المهنية الإعلامية، وبلا شك أن هذه التجربة أغضبت البعض وأفرحت آخرين وكذلك صاحبتها كثيرا من الإخفاقات ولكن ظلت تنتقل من نجاح إلى آخر. وفي إعتقادي أن أول مشاكلها إعتمادها على بعض كوادر التلفزيونات الحكومية العربية وكلنا نعلم كيف تعمل هذه التلفزيونات ويأتي على رأسها تلفزيون الأردن والذي يبدأ وينتهي برنامجه يسبح بإسم جلالة الملك...
أما عن موضوع أخونا الزبير فهو مازال يعمل في قناة الجزيرة وقد تم نقله إلى وظيفة أخرى. بالإضافة للعقد الفريد من الإخوة السودانيين، وعلى رأسهم صاحب أجمل صوت في القناة "على كما يحلو لرئيس مجلس الإدارة مداعبته" الأخ الكتبي، والأخ حسن أبو الحسن والأخ حامد عبدالرؤوف ووالإخوة بكري وعمار وبالمناسبة معظم طاقم الشؤون الإدارية والمالية من السودانيين ومنهم رئيس الشؤون المالية. وكذلك يضم موقع الجزيرة على الإنترنت عدد من الصحفيين السودانيين فالتحية لهم جميعا.
04-16-2002, 10:31 AM
ebrahim_ali
ebrahim_ali
تاريخ التسجيل: 02-05-2002
مجموع المشاركات: 2968
نادوس 2000تحياتي انا متاكد انو الزبير خامة اعلامية واذاعية متمكنة وكل العقد الفريد الذين ذكرتهم مميزين ومبدعون وغيرهم من المبدعون الذين يعشقون وطنهم ولكن فرض عليهم الهجرة والبعاد ولكن رغم يمنون النفس بالعودة للديار نادوس بالمناسبة اسم دا ما غريب علي ابدا واعتقد انو كان في جمعية اسمها على هذا الاسم في جامعة امدرمان الاهلية وكانت جمعية مصادمة وثقافية ومميزة ولها ابداعات مشهودة بين كل الجامعات في تلك الفترة وشنو اخبار النشاط في الجامعة وكل الجامعات الفي الوطن ولكن غريبة عن الوطن قريبة من همومه
04-16-2002, 10:19 AM
منوت
منوت
تاريخ التسجيل: 03-18-2002
مجموع المشاركات: 2641
اكب سلام و تشكرات لأخوك بتاع أنا (عزيز) لمعلومات قيمه دي عن مذيعين بتاع سودان ، همن بيعمل في إذاعه و تلفزيون سودان بكل ابداع و اجتهاد ، عشان كده كل ناسات سودان (الجميل) بيحبهم .. لو عندكم إيميل أو تلفون بتاع مذيعين ديل ، ممكن تكتبو لي أنا يا عزيز ، لأنو دائما أخوكم منوت بيحب يكون مع أهل بتاعو في اتصال... كمان انا بيسأل عن مبدعين بتاع سودان من جنوب و شمال و شرق و غرب .. وين شول دينق و أبو كوايه و ماجوري ألينانا و أمفريب ؟
________________
و منقو قل لا عاش من يفصلنا
04-16-2002, 12:17 PM
عزيز
عزيز
تاريخ التسجيل: 04-12-2002
مجموع المشاركات: 3290
أما عن الإسم فهو عكس كلمة سودان وقد إبتكره الشاعر المصادم حميد في قصيدة بنفس الإسم سبق أن نشرها الأخ بن بن وإليك مطلعها
نادوس
إن الأيادي التي في كتفها صقر قتلننا .. ثم لم يحيين قتلانا تعالي .. وشي الوطن دركان عساكر آخر الزمن واطَاه تعالي .. وماعلى كيفك .. تعالي .. وريِّحي الواطَة
الحال وراك كيفن تسر .. باقيلك إنتِ بلاك في زين ؟ ما اتهشم إبريق الرضا خنست نسيمات السمح والبسمة زي حبة قمح لفحَه وطف طيراً كُتُر أورث عصافير الضنا يبِّس غناها مع الفجر عانيت وراكي .. جِنس عنا
(عدل بواسطة nadus2000 on 04-16-2002, 02:01 PM) (عدل بواسطة nadus2000 on 04-16-2002, 02:04 PM)
04-17-2002, 09:44 AM
ebrahim_ali
ebrahim_ali
تاريخ التسجيل: 02-05-2002
مجموع المشاركات: 2968
سؤال لابو الجعافر وبما انك شغال في قناة الجزيرة وبتعرف البحصل في الكواليس والدهاليز وين الزبير بدون اي لف او دوران واجابة واضحة بدون غموض عشان الواحد يطمئن على هذه الخامة الفريدة وانها تشكل نوع من التناسق بين الدول العربية ولا بس هم دايرين دييييييييييييييكككككككككككككككك
04-17-2002, 10:27 AM
nadus2000
nadus2000
تاريخ التسجيل: 02-05-2002
مجموع المشاركات: 4756
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة