|
لماذا يغتربون؟؟؟ (Re: Shekar)
|
الاخ شيكر تحية عطره بنفحات (الدُعاش) وقت العِصير فى شاطئ النيل تحت اللبخ وحاره مثل حرارة شهر مايو والكهرباء مقطوعه والماسوره تشخر وتفور من الغضب والغبار يسد الدرب ويملأ كل مكان حتى العيون ويقلب النهار ليل والليل نهار والناموس يزن فى الليل جنب الاضنين ويقرص كل مكان فى الجسم من سبيب الشعر لغاية القدمين والملاريا الما معروف ليها دواء تشيل وتخت فى الجسم وتخلى العمر بدل عشره عشرين ولا تلتين ...ده كان مرت بسلام وإتوفر الدواء أوالمداوى العارف وإلا ....يفتشوا لشبر داخل الاراضى البقت مُسوره كان يلقى ليهو قبير .. وكان مالقى ربك يكون فى العون ويكون آخر المجانيات بقى بالقروش وكان حيين وأصبحنا تبدأ الجكايه والموال الذى لا ينقطع والحلقه المفرغه التى كلما تأقلمت معها قفزت منك قفزات طويله لا تواكب نطة الراتب المتواضعه ونقوم الصباح والمويه مافى واللبن مافى والسكر مافى ... والبنزين مافى وكان القروش متوفره لابد الشئ التالت أو الرابع المطلوب يكون مافى يا لسع ما جا من بيتهم ولا عيان ولا عندهم بكاء ولا ولا ولا وهلم جرا وكان لقيتو ماشرط أمرك يتم أوينقضى
| |
|
|
|
|