حرائق الذات في شتاءات الغربة أو ....عمو الطيب كما غنته الاشجار
)1( الموت ياتو.........؟ الموت فال الايام الختفت ريحة الطمي العاطن صوتك الموت مقلوب موتك الموت ياتو........؟ الموت يتشرّف بيك لو ساكت فكر فيك الموت ياتو.......؟ الموت الميت حيلو المخصي فحولة الصوت والضو الهاو ضهبان في ودرة ليلو العطشان نيلو الباحّي صهيلو الحاضر انت وغايب هو الموت ياتو ........؟ (2) اشوفك بكرة يا عم الطيب قوم اتمدّ..ونوم ..تصبح على خير وطنك برّانا .......تيربنا قناديل كفنك كفّانا .....فرقنا مناديل واشوفك بكرة )3( شايفك في غيمة شفيفة ترش بيوضة بمطر الليل في غنوة بتطلع بين رقراق الذكرى رهيفة تونّس كل اطفال الحلة المورودين عن معنى شليل وكل ما فجّ عيونهم قبلي صرّوا الامل الوطن العمل الاسم الحركي لزمنا زين في جوف النيل لو يرشح نهرك عرق اصدافو كنا نطمن مركب نوح من حلمو الشافو وكان سوّرنا الدنيا هديل شايفك واضح زي النخلة هدّاية تقيف زي الفا احمر ومهما بتقسو عليها رياح الآهة سبيطها تلمو وتشر الضل لي زولا طاش اشوفك باكر في حالة صفو الهي اخدر وباش بتشاغل كل زميلة وجيهة راي تريانة وعاجنة العولمة بالقنديل تقوم من نومها تضاير يومها تسن حلقومها شان ما تجيك وتغني همومها تخدر فيك الصفق الناشف وتهش الطير لا ينقد عيشك يلا يا ساندة..الله يلون غيمات ريشك ...الكهربا رجعت ...*- شغّلي غنية....تنهر حزن الدنيا...ورشّي الحوش بتحب ياتو .....كدي ورينا......؟--- * مصطفى سيد احمد وولا ابو عركي......؟ فيروز الدم.....................................؟ مارسيل الشوق.........؟يا الكلك ذوق.......؟ ولا جراح الطين في وردي الوارد من نيل كوش..........؟ ايوة دة كلو ..... *- وبرضو بحب غنوات الكاشف......وتسكت فجأة (وحاجة كاشف ) وتكشف مبسوط عن وعي جميل بي بكرة الاجمل وباكر اجمل باكر فارش في اسواق المعنى ضميرك ودفْ حضورك ولاّ كانك يا هدّاي فلّوكة الروح في الريح والعتمة عارف للحا يكون لمن يصدق حدس الزمن الفيك وتسأل ملهوف عن ضيفا جاي مين بيدق الباب يا هاشم..........................؟*- افتح سرعة دة يمكن هاشم. (اسرع لا تكون نسمات الصيف جرحنّو ) ويجيك ترهاقا........تيجاني اشراقة فاطنة السمحة قاسم امين الوعي الجمعي ادريس جمّاع الحاجز كرسي في رئتك وراجي ....المطرة ....الهمس....الامس الضايع منو سنوات العمر تجيك معتذرة فرج فودة.......علي القيوم ........بابلو نيرودا غارسيا ماركيز ................عنبر جودة وتجيك الطبقة العاملة عمايل وما شاقيها غير ما توازن شرط العدل المايل ومين من بعدك يا هبّاب الجمر الحي يسند اوجاع الروح بي شعبو الراسية ان مالت ومين حيسرّح فينا ضفيرة الغنوة الجاية او حيفلّذي النيل من حظو العاثر النيل الساكن جنبك وجنب الصبر الساكن نيلك وفارد موجو عليك جنحين النيل معزوم عندك يوماتي علي خاطر طيب شاي نديان نشرة خبر الشوق العاتي واكل بيجيك ودران بس اوعى تنوم من بدري يا سابق الكون بي ركعة حب دة النيل مشتاق لي قعدة معاك لي ونسة تكلكل جلد المغرب ورملة حوشك تتونس ولا هاميك البحصل والراديو حوارك بي جنبك بتطوف في الونسة حواري الدنيا محطة محطة تحكي وتحكي بشجن مفضوح زي ضو يتراقص في النجمات تحكي وتحكي عن بذرة وعيا...نبتت بدري ....في الشيخ بدري وعن العنوة الما منضبطة عن مؤتمر الشهد التالت عن حلف المانجو ونادي الطل.......منتدى تلوين للفلاحين جبهة هيئات الحب والثورة وعن خرطوم بالليل مرتبطة
عاطف انيس فيلادلفيا...14 فبراير 2002
(عدل بواسطة TIME on 03-20-2002, 09:56 PM)
03-20-2002, 10:04 PM
bunbun bunbun
تاريخ التسجيل: 02-04-2002
مجموع المشاركات: 1974
عمي الطيب... الموت وقوفا كماالاشجار إشتهاء الارض حد الهلاك له الرحمة والمغفرة أنيس... لك التحية ونحن نحترق مع ذلك الوطن في شتاءات الغربة تايم.. شكراً علي هذا البوست الرائع
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
bunbun
فيس بوك
تويتر
انستقرام
يوتيوب
بنتيريست