|
|
 يا ود يا خواجة
|
وهم الغربة
>يـا غربـة..يـا غشاشـة..يـا مستهبلـة
>إتغربنا بي درهم قروش و زاده قنطار بـهدلة
>جـيناك سـنة أو قـول سـنتين بنكملـة
> نبني البيوت في العاصمة وبي كوم أثاث بنجملة
>وكرلا حارة نرسلهـا اصله التنقل مشكلـه
>ونكمل الدين بي مهل و السمحه جاهزه نحصله
>غير القروش للأهل عبر الشهـور حانرسلـه
>والباقي يدخل في البنوك ونشوف دباره نشغـله
>ناس فكرت تجني العلم تبدأ الدراسـة تواصله
>أحلام كثيره وشيقة وآمـال كبـيره نأمـله
>لكن حساباتنا الغلط في كل عـام بنرحلـه
>مرت سـنين من العمر بنعزهـا و نفضـله
>والحسبة وصلت طاشرات إمكن نعيش وندبله
>وتعال نحاسبك يا وهم من غير رقم أو أمثـلة
>كان للقروش نجري ونحوش لكن تقول بنشاكله
>ما راضيه تقد في الجيوب وتقول حرامي بينشله
>ممحوقه ما بتقضي الغرض واقل حاجه تكمله
>لكن بترقد في الضهور بي ديون ثقيله مطولـه
>كملانه سفره وحق وزن ومجاملات مستفحله
>ضرائب ابعاج المشى وإلزامي حـمدي نحوله
>وأحلامنا صبحت زي سراب نمشي ونجرمانحصلة
>ياريت يكون هم القروش ياغربه فيك هوالمعضلة
>لكن تعال شوف الهموم ألما افتكرنا نقابلـه
>ذله ومهانة و احتقار خلو النفوس متملمـلة
>سجناً كبير فيه الكفيل سجان قيوده مكبلـه
>أشغاله شاقه ومؤلمة ودائماً تكون مستعجـلة
>ما عاد يكفيها النهار تـحتاج ليالي مليـله
>أمراض كثيره بدأت معاك عايزه الفحوص مستعجلة
>ناس الضغط والسكري ومرض القلب ووجع الكلى
>مصران وقرحه واكتئاب ونفوسنا ما متحمله
>وبنينا فيك كيمان لحم تحت الهدوم متندلـه
>وأكيد يكون أكل المعلب والـمجمد عامـلة
>عدم الرياضة والكونديشن لابد يكون ليهن صله
>وكمان تعال لمعادلة ما قدرنا أصلاً نعدلـه
>سجن العيال جوه الشقق و فراق الأهل والعائلة
>جيب العيال بجيبنا مال وجيوبنا غيره مـميله
>وصغارنا صبحت بالزهج متوحشة ومتجفلـه
>لا قادرة تلعب في خلا لا ضل شديره يضلله
>لا قادرة تدرس بي نفس من الدروس المزهلـه
>تلقى الولد غالبو الكلام والبت كبيرة مريله
>كل الضغوط جاتكم سوا ما قدرنا حتى نقلله
>في كل طرف تلقى القرف تلقى الخيوط مداخله
>يا غربه اديناك كثير أدينا خاطرك يسهلـه
>خلينا نرجع بالفضل نلحق حياتـنا نعدلـه
>آمالنا فيك بدري انتهت إلا الرجول متوحله
>وبقينا زي أهل القبور لا البره عارف يدخله
>لا الجوه يرجع لى وراء يحكي الحقيقه يوصلـه
>لكن خلاص هان الخلاص عنك نزل مهما علا
>إنشاء الله نحيا نودعك وتكوني ذكرى نغازله
> يا غربه..يا بكايه..يا غشاشة..يا مستهبلة null
|
|
 
|
|
|
|
|
|
|
 يا ود ياخواجة (Re: zoro)
|
علي اليمين إنت وصفت الحاصل بضبانتو
لكن كان ماالغربة دي كان ناس حيكومة الفقر ديل يلقوا دولارات من وين
اختشي يا راجل وما تخليني اتهمك بعدم الوطنية
نحن لازم نتغرب ونتعب ونساهر الليالي عشان ندفع الضرائ والزكام ورسوم الفضائية السودانية ورسوم بناء السفارة
سؤال
البيعرف لي السفارة حتتبني متين ليهو جائزة قيمة عبارة سفرة للسودان وعودة وتأشيرة خروج دون الذهاب للمغتربين
| |
|
|
|
|
|
|
|
|
|
Re: يا ود ياخواجة (Re: Hurouf Ismik)
|
اسمع السفارة دي وين؟؟؟
في السعودية ولا الامارات؟؟؟
ولا في سفارات تانية ما اتبنت؟؟؟؟
لانو هنا في الامارات السفارة لسة ما اتبنت
غايتو لو في كل دولة في الكلام بتاع السفارة الما مبنينة دا.....يبقي دا لحس عدييييل بس
البياز
عوافي
| |
|
|
|
|
|
|
|
|
|
يا ود يا خواجة (Re: zoro)
|
يا شباب الحكاية لو بقت علي السفارة براها و بناها كويس جدا لكن تقولوا شنو في فكرة ان القنصل يطردك من السفارة عشان انت غير مقيم او ما عاوز تدفع قروش الضرايب.......يعني الاهانة مش بس من الاغراب بقت من القريب قبل الغريب
| |
|
|
|
|
|
|
|
|
|
Re: من العمل كدا؟ (Re: banadieha)
|
هو ما تندفعوا كتير
وانحنا التولندا واتربينا هنا يكون موقفنا كيف
بالمناسبة كمية كبيرة من البنات والاولاد وكلهم كبروا وهم نسبة لا يمكن تجاهلها
ناقشوا الموضوع من جميع زواياه وقسموا المغتربين اثنين
مغتربين قضوا جزء من حياتهم ( وهم الاكبر ) باسودان
ومغتربين بالميلاد
وللموضوع بقية
| |
|
|
|
|
|
|
|
|
|
Re: يا ود يا خواجة (Re: zoro)
|
يا زورو كلام صاااااااااااااااح لكن عشان اشياء كثيرة يجب ان تتصالح مع الغربة وهذه الاشياء منها
في الزمن الملح .. ما تلقى الحكيم ساعت تنجرح؟؟
تشرب في السراب
تاكل في التراب
وتشحد بالفريق في حق الكفن ؟؟
ليه؟وعشان شنو؟
وشان خاطر منو؟
مظلوم الحسين ..
ومظلوم الحسن؟؟
ليه حلو الحديث .. موصوم زندقة؟؟
والسمر الطفولي .. راجا المشنقة؟؟
شيشك.. يا زمن
يا زمن الملح
ما هديتو .. هد ..كتف ام الحسن !!
| |
|
|
|
|
|
|
|
|
|
يا ود يا خواجة (Re: zoro)
|
التحية و التحيات
بقولوا اهلنا الشكية لغير الله مذلة لكن في حالتنا دي ما لينا الا نقول يا لطيييييييييييييييييييييييييييييف
| |
|
|
|
|
|
|
|
|
 Re: يا ود يا خواجة (Re: zoro)
|
كل يوم بتاكد لي اني اخترت القرار الصاح
تعرفه انا رفضت فكره الاغتراب دي اكتر من اربعه مرات وبعروض مغريه لكن كان عندي احساس كبير بانه التجول في شوارع امدرمان الحبيبه والعشي عند فول ابو صليب والجان ومشاهدت الناس في محطه الشهداء وعصريه في دار الرياضه ببعد يوم عمل متعب شويه وزحمه مواصلات احسن بكتير من اني اعيش غريب الدار
وربنا اكتب ليكم العوده يا اهلنا الطيبين
| |
|
|
|
|
|
|
|
|
|
يا ود يا خواجة (Re: zoro)
|
العزيز حبيب االكل
اكيد ما قمت به من اختيار كان عين الحقيقة و الصواب.........الغربة في الاول و الاخير ياها الغربة بكل ما تحمل هذه الكلمة من معنى .........و رغم التعب و الجري الكتير في شوارع الخرطوم لكن برضه ارحم مليون مرة من رفاهية في وسائل المعيشة و الحركة و قلب محروق من البعد عن الاهل و الاحبة ..........وفول الكوتش الرهيب
| |
|
|
|
|
|
|
|
|
|
يا ود ياخواجة (Re: zoro)
|
هو صحيح الغربة مرة وقعدة العصرية على كرسي في خشم الباب تساوي مليون دولار
لكن كمان ياجماعة لمن تغلبك العيشة في بلدك تسوي شنو
إما تبقى جبهجي أو مرتشي أو حرامي
وديل كلهن أحسن منهن الغربة. لكن إذا توفر لك الحد الأدنى من مقومات الحياة الكريمة فتطير الغربة في ستين داهية
وطني ولا ملي بطني
سكاتي ولا الكلام الني
لكن الغربة لم تصبح ملي بطن وعمارات وسيارة مكندشة . أنما الغربة أصبحت تقتضيها لقمة العيش الشريفة
واالله يجازي الفي بالي
فتش في ترابك
قلبو ذرة ذرة
تلقانا بنحبك أكتر كل مرة
نحن أولاد كفاحك رغم وجودنا برة
رغم الخطوة تاهت .. رغم الغربة مرة
الله يديك العافية يالمكاشفي
| |
|
|
|
|
|
|
| |
قرشـــو
banadieha
yasiko
7abib_alkul
فيس بوك
تويتر
انستقرام
يوتيوب
بنتيريست