|
الشــــــــــــــــــول
|
عند المشرع القدامى وفوق قيف ود عمر ومربط الدوامى ود المك وقف ازكر و يعاين والنيل متل سيفا للعروض صائن شوف الكرده والعشر والصفصاف كيف باين
اتلفت يمين و شمال وبقيت اصيح واقول الشول اضبح ليك بقره ولاتور الشول اضبح ليك بقره ولاتور يا ناس الشول ابى ما يرد ابى ما يقول تور تور تور ود المك وقف مزهول الشول يا ناس رحل مع السمحين والزينين الشول ساب الضفاف والطين الشول حالف ستين يمين تانى ما يبين وسالت على خد الولد دمعه وفى الحلق عبره وفى الفواد حسره على زمن الصفاء والوفره حليل اللمه والصفقة واللعبه والسره حليل الحمره والحميض حليل المقد والدفره حليل الباجه والغابه حليل الهجليجه والسدرة حليل ام بق بق والسبروق صوت السقده والرزه الجايه بقوق حليل ابو خريس والبهم والواسوق حليل الحجره والكونيه يا الرفاعى البى ما يروق حليل سرمه حليل الشمه حليل حاج ملود وابو النجا والسوق حليل ود التاى سديد الراى حليل الضامر ود رزيق والقمارى البسوى القوق حليل الكده والضقل والجنوى ديل فوق ديل حليل ام ماوديعه ادينى وديعه شيلى وديعه حليل شليل حليل طاب معناك بلى ما جاك يكف شينتك مليح بلحيل فخرنا اسامى قفرنا الدقناوى والترير هنومه ودابى الليل حليل الدرت والفليله والقرقار والقفر والتقه والحقنه ملانه عدار حليل الطيوب والطنوب حليل الدوبايه والمسدار حليل الشوره والمطمورة حليل فضاوة البال حليل خاله ست الزمام خاله خالك منو خاله خالى الامام خاله وره وقدام خاله ست الدفيس خاله مشيه ورقيص خاله سوى الترير خاله حليل الارباب ود حماد وجيب الدار نبكيك يا زمن حزنانين عليك ضايقين المر على زمن المحنه الفات وحالنا البقى ما بيسر يبكوك الشيوخ والسبحه والابريق يبكوك الجنيات والصفقه والكوريق يبكنك الخالات والعمات وحسنات الفريق سلام كتير يا اهلنا لنيل بلدنا وقمرنا سلام لطين الجروف سلام لبترولنا واملنا سلام للسمحه شمس الفريق سلام للسلام وفى بلدنا وانشاء الله السلام فى بلدنا انشاء الله السلام فى بلدنا وليد ال قسم السيد لندن 24 يناير 95
|
|
|
|
|
|
|
|
هو أشول ده منو؟ (Re: waleed500)
|
اكب سلامات وتشكرات كتير لأخوك بتاعنا وليد . ومنوت بيسأل إنتكم ، أشول دي منو ؟ ومن وين اسم دي بيجي ؟ لأنو انحنا في جنوب عندنا اسم بتاع أشول ده كتير .. ممكن ده بيكون موضوع لنقاش ؟ لو سمحتم ...
______________________
ومنقو قل لا عاش من يفصلنا
| |
|
|
|
|
|
|
Re: هو أشول ده منو؟ (Re: waleed500)
|
عزيزي الغالي جدا وليد لك التحية والاحترام وتصوير رائع لايام خلت ولك التحية اخي على شرحك لما جاء فى ماكتبت للاخ العزيز منوت ولك التحية احي منووت ولد جنوبنا ولك التحية اخي الحبيب على ماقدمت تحيااااااات.........واحشني
| |
|
|
|
|
|
|
Re: الشــــــــــــــــــول (Re: waleed500)
|
هلا يا وليد كلام حلو بيخليك تعيش معاهو بكل جوارحك بس الماضي ما بيعود ابدا لانو زي ما انت شايل منو زكريات حلوة في ناس بيكونو شايلين منو زكريات سيئة والله يدي العافية
| |
|
|
|
|
|
|
Re: الشــــــــــــــــــول (Re: بنت الاحفاد 2001)
|
العزيز وليد لك التحية مع الاسف عزيزي طفولتي كانت سجينة بين جدران الغرفه الاربعة طفولها وواسفاه على طفولتي التي قضيتها جميعا فى بلاد المهجر طفولتي التي خلت من شول وبقرة وتور وواسفاه على تلك احلى الايام التي خلت حياتي منها و يتفطر القلب وينزف دما حينما اجالس من هم بعمري ويحكون عن طفولتهم وكيف كانت وتجدني ساعتها اتنفس الصعداء لانوا لاتوجد فى ذاكرتي طفولتي فعزوني جميعكم ولك التحية عزيزي وليد
| |
|
|
|
|
|
|
تشكرات و سلامات يا جماعه (Re: waleed500)
|
إنتكم بيسأل عن دلاله بتاع اسم (أشول) في جنوب يا وليد .. زي ما إنتكم بيقول في زمن بتاع (براءه) وبنادي (أشول) .. نحنا كمان في جنوب في زمن براءه بتاعنا (المستمر) ما بينادي نيل بس ، لكن بيسمي ناسات حي بروح بتاعو كل يوم وكل ساعه .. يا اشول تعال .. يا صدى بتاع جمال تعال.. يا كل غزلاان وجدادات بتاع وادي تعال .. يا (ود عازه) تعال .. يا (يار) تعال ، ويار دي هو (تور بتاع دينكا أبيض .. ويا زمن بتاع حب تعال ... ويا ناسات هلوين تعال ... و (مهما هم تأخروا فإنهم يأتون .. من درب وددكونه أو من جبل الرجاف .. فإنهم يأتون ... يأتون في كلامنا .. في أعين الغالين من أمواتنا .. فإنهم يأتون ...
ولكن ... وين بيمشي )حراز ) لما مطر ينول (سيل) ؟
_______________
و منقو قل لا عاش من يفصلنا
| |
|
|
|
|
|
|
Re: تشكرات و سلامات يا جماعه (Re: منوت)
|
لك الشكراخى منوت على التوضيح وطبعا الشول عند حبوبتنا شى اخر عندنا الحبوبات بيسمن السجاره البرنجيه بنت الشول يعنى كان عادى الحبوبه ترسلك الدكان وتقول ليك جيب لى بنت الشول
| |
|
|
|
|
|
|
Re: تشكرات و سلامات يا جماعه (Re: waleed500)
|
وليد500 مساء الخيرات
كلامك حلو يا وليد وذكرياتك أحلى ويا بختك قضيت ايام من طفولتك في القرى والمدن الصغيرة لان بساطة الحياة فيها بتتناسب مع بساطة الطفولة نفسها عشان كدة بنتذكرها اكثر والفرح اللي بتجيبه معاها ذكراها اكبر يلا حجينا كمان زيادة
| |
|
|
|
|
|
|
Re: تشكرات و سلامات يا جماعه (Re: rummana)
|
تحياتى ايتها الرمانه العجيبه بى الفعل حياة القرى حلوه كتير وايام الطفوله فيها احلا اتخيلى نفسك تصحى من النوم على اصوات العصافير والاغنام والديوك وصدقينى يارمانه بعمل مقارنه طوالى بين حياة المدن والريف بجد الاخيره اجمل واحلى على ما يبدو لى حياتك كلها قضيتها فى المدن يارمانه
| |
|
|
|
|
|
|
Re: تشكرات و سلامات يا جماعه (Re: waleed500)
|
وليد أنا فعلا قضيت طفولتي في مدينة لكن كأمدرمانية جزء من عشقي لأمدرمان انها بتجمع بين الاتنين روح القرية وروح المدينة وبتذكر فيها من طفولتي أيام الاجازات ولمة الأهل في البيت الكبير يوميا والاصوات المحببة والمع قزاز واصلح سراير وسيد السمك وبتاع الخضار واهم منهم بتاع حلاوة قطن وحلاوة ديك وحلاوة قصب
| |
|
|
|
|
|
|
Re: و كيف حياه بتاع غابه (Re: منوت)
|
والمع قزاز واصلح سراير وسيد السمك وبتاع الخضار واهم منهم بتاع حلاوة قطن وحلاوة ديك وحلاوة قصب الغاليه رمانه ياه يا رمانه انتى قديمه بشكل ايام والله
الاخ منوت حياة الغابه برضو حلوه وبى المناسبه زرتا مدينة جوبا قبل فتره ما بعيده حاجه صراحه ما بتتوصف جمال وطبيعه غير عاديه ونتمنا انو السلام يعم مناطق الجنوب لو حصل الناس بيتركو السياحه فى لبنان ومصر وكينيا وبتوجهو لجنوبنا الحبيب
| |
|
|
|
|
|
|
Re: الشــــــــــــــــــول (Re: waleed500)
|
كلامك حلو 000 كلام غبش صحى صحى لكن ياوليد دة موضوع فيه سودنة شديدة يعنى فى جماعة كتيييير سطحوا وبينى وبينك انا كمان سطحت بى حبتين نحن ناس عشنا فى المدن لكن اى كلمة سمعناها من كبارنا مافوتناها وطفولتنا كانت بين شليل والاجهزة اليابانية وكمبلت بالحصا واكواز الصلصة يعنى بتاعين كلو وللاسف ياوليد ماضاع الشول براه ، ضاعت معاه حاجات كتيرة وياريت يسمعك السألناهم بتعرفوا عثمان دقنة؟ ردوا علينا دة صاحب ابوكم !! ولا يسمعك زميل دراسة ، ويومها الشباب كانوا عاملينه ونسة واى شئ قال مابيعرفه ، فى الاخر سألوه ( السفارة السودانية ) فى الخرطوم جنب شنو قال ليهم صدقونى ياجماعة انا فى السودان مابعرف اى مكان ولا زى ماجاء فى النكتة ، البت السألوها من العتوت ولما جننوها بالسؤال جاء ردها بكل براءة : انا مابعرفه هو قال بيعرفنى؟ يااااااحليل النساهم البلاى استيشن ومنتجات سونىو00000 ، وماعايزة اقول الضيعهم
| |
|
|
|
|
|
|
Re: الشــــــــــــــــــول (Re: OmDur)
|
ولا زى ماجاء فى النكتة ، البت السألوها من العتوت ولما جننوها بالسؤال جاء ردها بكل براءة : انا مابعرفه هو قال بيعرفنى؟ يااااااحليل النساهم البلاى استيشن ومنتجات سونىو00000 ، وماعايزة اقول الضيعهم
تحياتى امدر اى والله زمن وزمن عجيب كمان
| |
|
|
|
|
|
|
|