اولا اهنئكم جميعا بعيد الاضحى المبارك وكل عام وانتم بخير وصدقوني واحشني جدا جدا جدا بحمد الله وصلت السودان لقضاء اجازة مع الاهل والاحباء ووجدت الاهل بخير ... بس بكل اسف الاوضاع متردية وحالة البلد زي الزفت حتقولوا زي شنو حاقول ليكم من كل النواحي والمغترب هنا يعتبر بئر فلوس الكل بدءا من اصغر موظف ضرائب وحتى ....... يغرف منو، وانا على استعداد لتنويركم فادلوا بدلوكم
03-11-2002, 10:20 AM
قرشـــو قرشـــو
تاريخ التسجيل: 02-05-2002
مجموع المشاركات: 11385
كولا ازيك ياخوى والحمد لله على سلامة وصولك وان شاء الله الاهل كلهم بخير ياخوى قول بسم الله وخت الرحمن فى قلبك الحكاية بسيطة وهى انك بتصرف من غير ما تدخل وده سبب المشكلة يعنى الناس القاعدين فى السودان وبصرفوا زيك ما حاسين بالمشكلة دى ببساطة لانهم بدخلوا ويصرفوا اقعد ياخوى واعمل مقارنة بين صرفك فى الغربة وصرفك فى السودان حتى الايجار ما تنساه وحاتلقى انك ما غيرت حاجة والحكاية هى هى .. دى مناسبة حلوة بالله قول لينا لينا اى حاجة هناك بالتفصيل نحن شايفين فى التلفزيون ابهار عديل كده يلا ورينا الحقيقة كيف وبالتفصيل الممل جدا وفى انتظارك وما تنسى تورينا اخر الاعمال الادبية شنو حتى الاغانى الاكثر رواجا..
03-11-2002, 10:30 AM
يازولyazoalيازول يازولyazoalيازول
تاريخ التسجيل: 02-05-2002
مجموع المشاركات: 10210
فعلا السودان حلو بسجمو ورمادو لكن الواحد بيغيب عن البلد وبيرجع وهو بتمنى يلقاها تحسنت بالنسبة للصرف يا قرشو انا وصلت السودان عن طريق بورتسودان ومعي عربيتي ومن ما وصلت انا بدفع فلوس على طول الطريق ما معروفة بيعملوا بيها شنوتخيل في كل 100 كيلو تجد كشك وعسكري ودفتر وعليك ان تدفع بدون نقاش ولاحظ كما قلت التلفزيون ابهار وسمعت شخصيا من مسئول حكومي انه تلاشت الاكشاك والدفع في الطرق فوجدت العكس نجي لشوارع الخرطوم المتلاشية من تراكم الاتربة والاسفلت المحفر وكمية من الغبار ... اين البترول السوداني الذي يملأون بخباره العالم؟؟؟؟ واين يذهب الزفت؟؟؟ الى هنا اتوقف الحاجة الجميلة في البلد ان الناس لسة محتفظة بروحها الحلوة لكن بالنسبة للاخبار الفنية الموجودين في الساحة فرفور ومحمود عبد العزيز وتجد في كل بيت صوت وصورة للرائع مصطفى سيد احمد وهذا شيء ملفت واسعدني جدا
03-11-2002, 11:10 AM
shammashi shammashi
تاريخ التسجيل: 03-10-2002
مجموع المشاركات: 2278
الله يعينك وتقدر على حلاوة قطن حلاوة قطن طبعاً ياها القروش السودانية تتلحس في دقيقة غايتو كان اتقطعت أعمل لي Missed Call عشان نلحقك بحاجة
بعدين أوعك تقوم تمرض والله واحد من أهلم يمرض لأنو 500 ألف مابخارجوك وأوعك من العوازيم الكتيرة والقعدات وأوعك من عساكر المرور . وأوعك من ناس بسط الأمن الشامل وأوعك من النشالين. وأوعم ما تهوب ناحية المغتربين لو ما جيبك مليان دولارات أو عندك واسطة مكربة ، يعني يكون عضو مؤتمر وطني مكرب
03-11-2002, 01:22 PM
shammashi shammashi
تاريخ التسجيل: 03-10-2002
مجموع المشاركات: 2278
وكمان أوعك تكون مجكس ليك واحدة في الجامعة وتمشي ليها ساعة الفطور لأنها حتعزم صاحباتها كلهن عشان توريهن إنو الجكسوية حقتها مغترب . ,اوعك يكون في عزاء في بيت بكا وتقوم تمسك الكشف لأنو أي واحد حيجي يقول ليك سجلي خمسة ألف جنيه وأدفعن لي لمن أديك ليهن. وطبعاً تاني لمن تجي مسافر ما حتشوفن. وأوعك الجماعة يكونوا دايرين يأجروا ليهم بوكس عشان ماشين البلد لمناسبة تقوم تركب معاهم لأنك إنت الحتدفع أجرة البوكس كلها حتى لو مليون. وأوعك تمشي لزيارة مريض في المستشفى ساعة الزيارة لأنو حتلقى كل معارفك في خشم الباب وحتدفع إنت حق الدخول - طبعا مستشفى الخرطوم الدخول ليهو بألف وخمسمية. وأوعك تمشي الملحمة بتاعة الحلة الصباح. وأوعك تحضر ليك نقطة لعريس لأنو الجماعة بقوا يقولو اسم الزول ويقولو معاهو مبلغ خرافي وكلو كضب في كضب. وإنت تقوم تشيلك الهاشمية تدفع العندك كلها. وأوعك ناس البيت كان قالو ليك ناس الكهرابا جابو إنزار بالقطع تصدقهم لأنها الكهراب مدفوعة من القروش الكنت قاعد ترسلن لكن دايرين يملصوك ساكت. وأوعك تاني تمشي السودان
03-11-2002, 09:36 PM
Elsadiq Elsadiq
تاريخ التسجيل: 02-04-2002
مجموع المشاركات: 1657
الاخ كولا مرحب بالعودة والحمد لله علي سلامة الاهل اما كيفية تقييم المغترب او المهاجر للسودان في اجازته القصيرة جديرة بالمناقشة فعلا ساعود لاحقا للتعقيب
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
cola
قرشـــو
يازولyazoalيازول
Elsadiq
فيس بوك
تويتر
انستقرام
يوتيوب
بنتيريست