صوت من لا صوت له وطن من لا وطن له

مقالات و تحليلات : قصة و شعر English Page Last Updated: Jul 11th, 2011 - 15:37:55


عايز أقول أنو الكلام القلتو دا/د. شهاب فتح الرحمن محمد طه
Oct 26, 2008, 20:29

سودانيزاونلاين.كوم Sudaneseonline.com

ارسل الموضوع لصديق
 نسخة سهلة الطبع

عايز أقول أنو الكلام القلتو دا

علّمني ليهو أستاذ أمين

 

[email protected]                                 د. شهاب فتح الرحمن محمد طه

لو مسلمين و تعرفو دين

و مسيحيين و تعرفو دين

و لو قلتو نحن مناضلين

أو حتى كنتو مجاهدين

و لو إنتو اصلوا سياسيين

و بقيتو فينا الحاكمين

كان تعرفوا إنو الجنا، إنو الضنا

 الجادعنو في كلما* المُهين

بالنسبة ليّ ياهو العشم

دخُري السنين

باكر بكون حامي الحِمى

سند البلد، درعو المتين

أَمنْتوُ رب العالمين...

بس يا بلد كيف العمل؟

كيف العَلمَ يفرد يرفف في السما؟

و لسّا الولد مجدوع هناك

عايش غريب داخل وطن

ممسوك سجين

راجي الطحين، حتة عجين

مكتول كمد، محروق حنين

مشتاق إبردب في الفصل

يعمل شغب، يشبع لعب

يفقع ضحك

يسكت يَصِنْ...

يسمع كلام أستاذ عمر

و أستاذ مجوك

و أستاذة نور بت الخزين

نقلوها من وسط البلد

ناس بيتها في حلة حمد  

ودّوها لى ناس الغرب

ناس الكرم، ناس الأصول

شالوها جوّا المُقلتين

تلقاها طايرا من الفرح

مبسوطة تبْ بى مهنتا

تدي الولد درسن رصين

يكبر يقيف ينْضُم فهم

يرفعنا فوق

ينقذ وطن مليان سجم

متروس هجين

هذا الكلام لى ناس محكّرا في الحكم

و ناسن مسلحا... خارجين

و عايز اقول أنو الكلام القلتو دا

علّمني ليهو أستاذ أمين

*معسكر كلمة للنازحين في جنوب دارفور


© Copyright by SudaneseOnline.com


ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام

أعلى الصفحة



الأخبار و الاراء المنشورة لا تعبر بالضرورة عن رأي الموقع