|
|
Last Updated: Jul 11th, 2011 - 15:37:55 |
أركِز يا وطن
________________
الفاضل إحيمر/ أوتاوا
اركِز يا وطن
رغم المِحن
أغرس رجولك في الأرض
و أمسك بيديك السما
لملم بدور االضاحكات
و اقطف روائع انجما
من ضيها كحِّل عينيك
و شبِّع الحسَّاد عمى
و انظم حلياً باذخات
بالدرِ زاهية مطعمه
يتلاصفن فوق عزَّه
و يرقصن
فوق جيدا اللجين
و يزينن لي معمصما.
أركز يا وطن
رغم السياط المولمة
ما البطان حق الرجال
أخوان البنات
اللرجاله متممه.
أركز يا وطن
و أبقى زي حر الدهب
يزداد نضارك كلَّما
زاد اللهيب
و الجمر تحتك حما.
اركز يا وطن
للعدو حمي الوطيس
و ابقى لي أهلك حمى
غالي و منيع
و فيض عليهم مرحمة.
اركز ياوطن
يادوب بدت الملحمة
كِمِل الكلام
و روّح زمان الفلهمه.
أركز يا وطن
و ارمي
كل من بالسوء
ليك رمى
بي عداوتو يجاهرك
أو في خِسه ساقا مبلمه.
أركز يا وطن
رتِّب صفوفك
و كل جهودك لملما
و أبقى زي عاتي الجبال
تصادم القدر
و ما في ريحاً تهزما
و زي حسام
في يد همام
ضريرتو غار
و جرتقو يوم الجد دِما.
أركز يا وطن
صحي عزك
و أمجاد قرون
متوارثه و متراكمه
أركز يا وطن
لمتين حتبقى الملطشة
للحاقدين مداس
و حيطة واطيه مهدمه
لي دولاً كسيحه
و اخرى طفلة
وغيرها لسع ما اتولد
رابطانا بيهو المشيمه.
أركز ياوطن
للحبيب افرد يديك
و للعدو جهِّز نعالك
منو راسو اوع تسلما
أركز يا وطن
ما بيعيبك تُمتَحن
لكن بيعيبك تُمتَهن
و تبقى انفك مرغمه
ترضخ لي عدواً
كل مرادو يقسِّمك
و جهودو نحن ندعمه:
يلقانا أمه مقسَّمه
تعلي الأفاضل
شوامخ عزها
و تجي الأراذل تهدما.
اركز يا وطن
من حقك تكون
أعظم وطن
و تبقى زي جنة عدن
عامراك أمه مكرَّمه.
اركز يا وطن
و انطلق زي القطار
في ضهره
يحمل كل زول
لا تفرقة و لا شرذمه
للعديل يبقى البراق
يسبق يفوت حتى الزمن
لا همهمة و لا دمدمه
و البقيف في سكتو ..
يوسِّدو سكة حديدو
و يبقى ليهو المفرمه.
اركز ياوطن
خلينا نلحق بالشعوب
نتقدمه
لا نحن بلداً فقير
و لا شعب جاهل
ليه بنرضى
نسمى "فاشلة"
و دولة "ساقطة" محطمه؟
أركز يا وطن
و مهما النفوس
غِلت او حِلت
رخيصه ليك نسلما
عشان إنت تركز يا وطن.
الفاضل إحيمر/ أوتاوا 1/9/2008
© Copyright by SudaneseOnline.com
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
الأخبار و الاراء المنشورة لا تعبر بالضرورة
عن رأي الموقع