صديقي العزيز  / الأستاذ صلاح عووضة

سلام من الله تعالى عليك ورحمة ورضاً وبركات وخير مسـتدام

(( في زمان الحكي)) يحلو الكلام.. وفي الحكي يتذكر الناس.. ومن الحكي يتعلم الناس.. وبعد المغربية لما تبدأ (الحبوبة)الحكي.. ولما تتذكر(إبليس) بتقول نعوذ بالله يا عيال من الشيطان الرجيم.. دحين هسـه داير أقول نعوذ بالله من (إبليس ) اللعين.. وبمناسبة (حكاويك) ولشئ اعتلج في صدري مع الحكاوي.. إسمح أن أقول..

                                                                                أخوك / د. فاروق البدوي

يا ود عووضة.. بي حكاويك الناس ديل بيتضايقوا...

وفي ضيقهم بتفرحنا نحن.. وهم بقوموا بزعلوا... وزعلهم علينا نحن الغبش ما كويس...

كويس يعني لينا لما يقوموا يفشّـوا غبينتهم فينا...

وفينا يا صاحبي من المحن والبلاوي ما تكفينا...   وبيكفينا يا ربي صحن الفول ده للغداء...

غداء أيام زمان السمح بالروقة يا حليلو.... والعشاء موية فول موية جبنة وموية زيت.. صحن بوش...

( بوش ) المسكين دخل في الكر عشمان...  لكنو مرق كحيان... بس في ( ناس ) بتقول يا حليلو

حليلو شـليل هَي ما كفتو التمساح...  ( التمساح) ده والله زول ما كويس...

ما كويس معانا ( أوكامبو) الفقري ده.. وضهرنا مكشوف...

(مكشوف الحال)!!  يا ود الشيخ .. ندهوهو في الظبطية...

الظبطية ما ترسوها بي المجاهدات ( ستات الشاي... )

الشاي هو (كيف ) للراس.. ؟ ولا مصدر رزق لي حياة ناس !!...

ناس (حياة ) السمحة مهمومة برعاية الطفولة السمحة... ووين مشت الناس السمحة...

السماحة وصفة وشهادة لي أهلنا زمان أجيال الخير...

الخير هسه ما منظور لي شباب غريب في بلدو من ديلك سنين...

سنين ضنك وضيم طويلة من يوم داك سنة 69...

69 جنيه قالوا زمان بتجيب عربية( بيدي فورد)...

(فورد ) ده خليفة ( نيكسون) بعد فضيحة ( ووتر قيت)...

و (ووتر قيت) مبني ضخم وفخيم في واشنطون جنب السفارة السعودية...

السعودية و (اخواتها شرق وغرب ) نايمين لواشنطون نوم...

واشنطون دي ما قالوا لينا ( دنا عذابها )...

وعذابنا نحن يا ربي الدنا... ولا انتهى... ولا باين عليهو لسه ما جه...

جاكم يا ناس ديك .. البسـموهو سهر الجداد ولا نومو...

النوم النوم بكريك بالدوم.. النوم تعال سكت العيال...

العيال كبرت وعندو صغار.. ومحروق حشاهو  واقف مكتّف...

مكتف عم عبد الرحيم بالعليهو.. وقيودو أحمال في كتافينو...

وكتافينو انحنت بعد ما كان لي امبارح.. سيد الجولة والطولة والحارة في عز نهارا...

نهارها شمس قَلاّية وليلها كتاحة مَلاّية.. وبي بركات (الجماعة) موية ونور كمان  قاطعين...

(قاطعين !!) ولَلا َخَمة نَفَس... مزاج وهدوء ورغبة وأمل وصفاء وصلة رحم..

وَللاَ قاطعين  ريد وسُكنى ومحنة... !!!

المحنة في القلوب .. والقلوب مكسورة ومغلولة.. والكان السبب...

والسبب إن اتعرف بِطل العجب...

و ( العجب) بيهز الأقوان وبيقد الشبك.. وانا هلالابي عالسكين...

والسكين سنوها لي شداد واتحاد الكورة.. والكورة هي من واقع مسارات ونظام حال البلد...

البلد ما بتنفذ فيها قرار ولا أمر.. وعييينك (للفيل) تطعن في ضلو..!! ما لأنو المسائل فردية واحتكاربة...

واحتكار البلد والناس زي احتكار السوق والسلع... وسلعة البني آدم في بلدنا بقت أرخص من ملعقة ملح....

 والملح بقى ما بيطعم ملاح...  والمرارة والعلقم هو البقى طعم حلوقنا...

وحلوق الباب إنكسرت...

وبابنا بقى ديمة فاتح للغاشي وللماشي...  والماشي مننا تاني ما بيرجع.. ويا حليل حكاوي زمان.

وأبداً ما هنت يا ســوداننا يوماً علينا.

ســودان الشـتات / أميريكا *****  mufakarah@gmail.com