قهوه ود اللاغا ...
هذه القهوه كانت فى بدايه شارع الاسبتاليه وتواجه ركن نادى الخريجين وعلى بعد رميه حجر من اجزخانه امدرمان . ويمكن الوصول اليها من الزقاق من شارع المورده مرورا بقهوة مكى . وفى نفس الزقاق كان مطعم جعفر الذى كان ينافس مطعم صبير فى الفول . ومطعم صبير كان شمال الملجه فى السوق ويواجه قهوة السمانى سابقا التى صارت قهوة على شلوفه .
قهوة ود الاغا كانت من القهاوى المحترمه . ولا يدخلها كل الناس . والعم يوسف ود الاغا كان مهاباً ومحترماً ولونه يميل الى البياض يحب امدرمان ويحبه اهل امدرمان . وكثير من رواد نادى الخريجين كانوا يجلسون فى هذه القهوه .
جار ود الاغا فى العمل وصديقه كان الخواجه كربيت وهو ارمنى الجنسيه . وقديما كان اهل امدرمان من كل الالوان والجنسيات يجمعهم الحب والود والالفه . وله ورشه على بعد امتار من القهوه . وكربيت كان يضرب به المثل فى القوه . ويقال قوى ذى كربيت . احد اصدقائنا من حمله الاثقال كان اسمه كربيت , تشبها بكربيت . والى ان تركت امدرمان لم اعرف اسمه الحقيقى . ولقد سألت فيصل الخير بطل كمال الاجسام عن اسمه مره وكان الرد , والله بس بعرف اسمه كربيت . كان يحكى عن كربيت انه يمكن ان يرفع مكنه الهيلمان بيديه .
قهوة ود الاغا كانت تؤجر الكراسى للمناسبات . والكرسى كان يؤجر بقرش فى اليوم زائدا اجر الكارو الذى يساوى ريال او خمستاشر قرش للمشوار . والسيوفى كذلك كان يؤجر الكراسى . واسم السيوفى يكتب على ظهر الكرسىباللون الاحمر . وحرف السين يعلوه خطان متوازيان كالعاده قديما فى حرف السين . او يكتب على ظهر الكرسى ود الاغا .
بالرغم من قوة ود الاغا كان رقيقا مع اصدقائه ومعارفه واهل امدرمان . من اصدقائه وجلسائه العم محجوب عثمان والد عبد الخالق محجوب الذى عرف بالرقيق لانه كان رفيع القامه . وكان يجلس وسط هذين العملاقين وبينهم ود . كما سمعت قديما . ان ود الاغا كان يسترد المسروقات وينصر الضعفاء . وكما حكى لى الاخ الدكتور محمد محجوب عثمان . ان لصاً سطا على منزلهم . وسرق كل ذهب الاسره . وعندما علم العم ود الاغا , طلب من احد عمال المقهى أن يذهب ويحضر شيخ الحراميه . واعطاه مهله لكى يأتى باللص . ورجع شيخ الحراميه ومعه شخص ( جهامه ) ومعه كل الذهب . فصفع العم يوسف اللص الى ان طرحه ارضا . وقال له ده اخوى مافى زول تانى يجى مارى جمب حلته .
بالرغم من هذا كان العم يوسف يحب النكته والدعابه . ويجتمع الناس حوله ويستمعون الى قصصه وحكاويه التى لا تنتهى . ومن المؤلم ان هذه الاشياء لم تدون . لانه كان يعرف كل اهل امدرمان كبارهم وصغارهم , اعيانهم وبسطائهم . من القصص التى عرفناها ان القهوجى قال محتاراً للعم يوسف ان الفندق الذى يدق فيه البن قد انكسر . وكانوا قد استأجروا احد ابناء النوبه الاقوياء . ونظر العم يوسف للفندق المكسور والبن المسكوب . وقال لود النوبه فطرته ؟ وعندما كان الرد بالنفى اعطاه شلناً وقال له خش على جعفر افطر عشان تجى تهد القهوه دى فى راسنا .
اغلب زبائن القهوه كانوا مهندمين ومرتبين ويحسنون التصرف . وعندما قام احد الوافدين باطلاق بصقه كبيره فى القهوه تضايق العم يوسف وقال له ده شنو ؟ ولم يجد الوافد اى غرابه وقال مالو؟ وكان الرد . مالو كيف , انت تبزق كده واخوك ده يبزق كده ويجى واحد تانى كمان يبزق .. انحنا نعمل شنو نعوم ...؟؟؟ .
عندما اختلت الامور قليلا فى امدرمان واختلط الحابل بالنابل اوقف العم يوسف نشاط المقهى . وفى سنه 1964 عندما تركت امدرمان صار المقهى محل لبيع الادوات الكهربائيه . وفقدت امدرمان احد معالمها . كان العم يوسف ود الاغا وقهوة ود الاغا من اشهر معالم امدرمان . تحدث الناس عنها كثيرا وعرفت على نطاق كل السودان .
فى نهايه المسالمه كانت تسكن خالتى نفيسه خليل . وعلى بعد خطوات منها كان منزل كابتن اسامه يوسف عمر الاغا . الذى لعب فى السودان وصار احد نجوم فريق الزمالك المصرى .شقيقه عوض الذى عرف بعوض فرطوق . كان مدربا للكره فى الامارات فى السبعينات . واشتهر بعوض فرطوق لانه كان عندما ينطلق بالكره ينظر الى الارض . وكان المشجعون يطالبونه بان ( يعاين فوق ) . وكما فى اهزوجه الاطفال التى تقول ( يا فرطوق عاين فوق ........ ) ولا ازال اذكر اليافطه التى على باب منزلهم التى تقول منزل يوسف عمر الاغا .
كلمه الاغا هى فى الاصل كلمه ايرانيه وتعنى سيد . ولقد اخذها الاتراك والمصريون والعرب . ومن ابناء امدرمان اللذين من اسرة الاغا الفنان الجقر الذى ارتبط بآل البنا وصار يحسب كأحد آل البنا . واذا لم تخنى الذاكره فأظن ان والده كان يدير المراجيح التى فى شكل صناديق تلف بالايدى فى الاعياد والمناسبات . وكانت فى الفضاء شمال المسالمه والذى احتلته مدرسه الهجره اخيرا . عطر الله ذكرى آل الاغا فلقد كانوا ولا يزالوا احد الاسر المشهوره فى امدرمان . رحمه الله على الاموات والاحياء منهم .
التحيه
شوقى ......
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى bakriabubakr@cox.net كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
