وقت يندهلك شوقي
وقت اندهلك اقول يا حليلك
ارضك واهلك ومليون ميلك
اوقد شمعة لو شمعة تنور ليلك
وامسح دمعة اه لو دمعة بنزف نيلك
لو تسطع نجمة لو موجة بتنشف بي منديلك
وقت احتاجلك ويعطش شوقي
وكتين قمرك يمر بي فوقي
وقت ما اخاصم النوم واللقمة
وقت ما تهرد جوفك جوقمة
وكسرة شوق من طرقة
وشوربة حب من مرقة
تغدي البيت حنية
و بتطلع شمسك من قوطية
بنرجع ونحلم جنبك
لا غالبانا القولوطية
ولا عدمانة القفي
نخلك غطي الضفة
وقت الضابط جانا اتخفي
وضاري عصياتو ورا الجاندرما
قلنا في سرنا كلمة
ليكم يوم ياولاد الهرمة
قلنا نتور جارنا
ليكم يوم حانقيف يامجارمة
نشيل حجارنا
لي متين يتعشي البيت
بي الفول والعيش
رزق الله صحيح لقييط
لي متين حاجزنوا غضبنا
ياغضبا نقط زيت نقيط
ساعة الضابط .. كف كف كمو اتهيج
ما نطيط
ولا خشمي بصمو مسيج
عشان شلوتو ولا الكفييت كلامي بتمو
وقت غالطنا غلاطو
والنوم صبحت واطاتو
ونوم الديك في الخيش
والمرتبة يمة بلاطو ..
ذي ماتقول في معسكر جيش
اتبسملنا واتكاسلنا
دخلنا المطبخ
مرفوع الراس للدائر يضبح
وقبال ما يرفع بونيتو يلطخ
حشينا الرز بي المحشي
طماطم سلطة وطرشي
من سجنك تطلع فكرة
والفكرة تخش راس مرسي
والفكرة بتصنع مصنع
والمصنع بصنع كرسي
في سجنك حتي اللقمة
حرم ما تدخل كرشي
في سجنك مين البقدر
في سجنو يكتف شمسي
السجن عذابو عذمنا
في سماك لمحنا المزني
بتمتع بيهو شقايا
وبخرم ليك يا حزني
شجع خوفي واهرش
يا حزنا كرج اذني
حبك اصبح مرضة
غير ارضك انا ما برضي
اتعلم قلمك يكتب
وبي اسمك تنبت وردة
وقت واترجل سكة سفرك
احن لي اهلك
امرق اخاتر
اقيف اندهلك
وسيل اشواقك يكسح أعلي سواتر
ويشهق صوتي الطالع نفسو يناتر
صمة خشمك تطفح و تملي دفاتر
وكتين يبكي سماك الماطر
وكتين شوقك ينمو و ينبت جوي الخاطر
شمسك نص الليل حا تشرق
ونص الليل حاتخاطر
وسماك بتضمو ايدينا
ذي نخلك نحن نشيلك
وذي والدينا
ذي غيمك وريحك اتمدينا
يحيط بي لليلك فجرك
وتطل لي عيونا سفينة
بي اسمك تكبر وتنمو
في السكة الجاية مدينة
ذي مطرك ناذل شوقنا
في مصبو نلاقي المينا
ذي جبلك عالي القامة
بترفرف حرة حمامة
من سجنك ما اتهدينا
ذي نخلك نكبر ريدة
ونغني الحزن قصيدة
بي دمنا تكتب اسمك
وبي اسمك تكسر قيدها
ذي ارضك راقدة محنة
لي مطرك تاني رحلنا
ياموسم عشقنا اتي
من ضرعك لبن اماتي
يوم نشهد مولد قمحة
يا قصة حب من لمحة
من حزني ومن اهاتي
ومن وهج عيون السمحة
مهما تتطل قدامنا مخاطر
شمسك نص الليل حا تشرق
شمسك طالعة تخاطر
حا تتطلع شمسك بري
يا زمن الفرح المري
ما بين غيمة ونجمة
الموجة الجاية تقود الهجمة
تعدي الشيمة ترش السهلة
واقفة تموت بي اسمك نيمة ونخلة
وبي اسمك يقدل نيلك
يقدل نيلك زمن المهلة
و انا متنضر اصدر
عز اجدادك وعزك لي
صفحة مجدك
وعهد عنادك ما بتنطي
وبينك وبين القلب قصيدة
وبين النفس الطالع شهقة عنيدة
ومنية مدلدل بين سجانك قيدها
وبين الدرب الراجع محنة والفة وريدة
ويوم ما غبت ويوم اتغيب صوتي
واللشي الهذاني ثواني سكوتي
والشي الازمني
الخوف في الجوف لازمني
وقت العكة يمين
لا مقصلة لا سكين
انا ختياري دياري
ولا اعيش جواك سجين
مغلوب علي تاري
لا حقا ضاع لاجاع مسكين
ماهو غداي ما غدي جياري
ولو نائم جار في الحارة حزين
كيف حايضاري الفرحة جداري
وكيف حا يوحد دربنا يوم في الرجعة حنين
لو قصة شعبنا ضاري
الدم والهم والخوف والحين
ويوم ما يطلع مني
جواي تاريو مستني
والحق بي الدق بي السن يا ود والدني
بي العمر الشاخ ياناس قدام الناس جالدني
و لا مجنون لوجني الجن يا روح ما تجني
اطلع مني
يطلع يمسي
يمسخ طعم الببسي
مذاق الفرح الغامض
يطلع حامض
جغيمة شاي تتدلي
في حلق الحالف
يرفع صوتو يخالف
يصلب نفسو في سكة زولا سافر ورسل قلبو مع الجواب
ويضحك وتضحك ليهو الدنيا متل ضحكات ستات الشاي
يرجع يدق الباب
صوبي يا بت
امولة الكبرت وصبحت ست
لسي علي ملهوفة
حرومة الراجية تعد
فاضل عيد ونشوفها
صبي صبابة
وعدي نصابها
مطر احزانا الجابو سحابها
مطر احزانا النقط
الشكشاكة تراها ترابة
ملك القعدة شرقرق وجبني
وبت ام سور ام وجني
يوم سوقها يصور
كلامها حلاوتو اللجني
والحردلو ذغاوي يوم شافها اتبرجل
عدل طاقيتو وهرجل
وقال حايسافر يسيب الحتي
والبنوت الصبحن ستي
عشان يرتاح من هم الاسمو الصاح
عشان يتفرج في بلاد الله مع السواح
ويشهد مولد قمحة
وقصة حب من لمحة
وموسم شوقا جاي اترجي عيون السمحة
ويضحك لي ضحكات ستات الشاي
وقت ما تبل دمعاتي الطرحي
وقت ما يدخل رئتك نفس النسمة ويمحي
عمائل السفلة
غبائن الحزن القام من جوي عروق النخلة
وسط الحلي يباكي
يباب المطر الشاكي
حموضت الجوع
ملاية الهم
ملارية شوقنا
الماسكة حشاكي
وساكنة الدم
يباب الزمن الصري
وزمن افراحك حولق حولك ومري
بينا وبينو طريق بتقاطع بينا وبينهم
الناس القلي
البابها قزاز السكنوا الفلي
ونفس عمارة الوالي العالية هناك في الناصية مطلي
العين بي العين والحق بي الدق والذلي
الحكماء اللؤما الهدوا البيت بي الجرافات
وباعوا سعايتك بي الدولار يا خلي
ويه يا زول فاضلك
وايه يازول في الصقعة بظلك
الحلمو عشاك يتوجه للتصدير والحلمو سرير
وصرير الريح في الباب
قمرك يوم ما غاب الضي برسلك
فصلت خيرك اخير لي غيرك
وباقي الشجر البي خودييرك
بي الكراكة البيت ادكي
علي جسر هموم احزانك ليه تتوكي
يا هلللات الامرا اللبسوا عقال الغني والصيت
العبدوا الصنم الاسمو السلطة
العوجوا لسان القالوا عليهو سليط
هللوا لي هامات الفقرا الماتوا
وفاتوا لا عيش لا سبيط
يا عم احمد قبل تتشهد دم القالك انت عبيط
صبح نهارك ليلك سهد
والدرب طويل
درب السافر ورسل قلبو مع الجواب اتنهد
ليه يا عم مخلاية الهم وليه بي العرق الدم الدرب اتمهد
يادارع حزنك شارع شارع وانت الضل الفارع تشهد
وسط الخلق براك تصيبك انت اللعني
وليه تتمني الموت اشمعني
ليلات القبر التحفروا انت براك بجمعني
اركب سرجك يا المتضر
اوعي تقول لي غيرك عر
ليل ونهار في الحر مونشر
اقيف في السكة وارفس وصور
مهر السافر وقلبو محلق فيك يا ام در
يا شامات الشطر المنو رضعنا
يا هامات الارض التبلع فينا تجر
يا امات الحم الحي الشائفو الزول الني هو البغني
والراجع يكوس لي شبابو صبي هو البفني
و لحمي مكوم في الخيران
عند الجيران وانا بتدخن بي سجاراتي
علي حدقات نظرات خالاتي
يا كافي الهم بي الهم رضيان متعافي
لي متين حا امد للشوق اكتافي
علي قدر سماك بريق النجم الصافي
علي طول الافق الهائم حائم
اقيف استني مرافي
مستني السفن الحمل ولي اطنان السود الهومل
ساحل الذهب الطافي
الصادر من كاتينقا ممزوج بي عرق المخمل
وصوت مانديلا وحب المطر الدافي
المارق من القلي ولا الجولي
عصاية موسي دقيق الفيني
كلاش المولي الكوبي الصيني
وانا يا ضيم يكفيني الفيني
الورق الصفق القلم الشيني
عارش حزني مظلة حردان يا ليل دفيني
يا حزني اليوم اتسلي
بعدما تفك جنحيني
ليك يا زول بس الله يا الله الهووي اهديني
وانا بتدخن بي سجاراتي وانا مشدوه ومكرفس
بي الاحضان جواي الحزن الساكن وبابو متربس
ومنقد نار الصبر السخن
بنذف عرق انفاس الناس الرطبة مدخن
وتحت اقدام الناس حفيان والشوك البطعن
ابصق والعن
خاش العبدوا الصنم الاسمو السلطة واسال عن عن
عن قانون الدولة وبندو الواحد الليهو بنذعن
عن الكتاب والكضاب الغيبوا فكرو من الكتاب
عن الاتعين شان اتفرعن
وانا قدام حراسي مجنح وطائر
واقف قمت عليهم عائر
وقبل ما اصلك جالك صوتي مكتح
فوق القمة
ايادي مسمة
وانا بطوطح مدي ايدينك لي
بي حزني مدخن نائر ثائر
بطلع صوتي من الشباك
من طاقات السفن العابرة حداك
من البرقية
من جواب مبعوت بي الايد
لا ايد جايبالي بريد
لا حروف مقرية
وجراح القلب التنذف دم الروح مطرية
بنقط فوق واطاتك ساعة الجد
ساعت اتلقف حسك من حزنك احس الرد
وقت يجتاحني حنينك
ويجرفني عليك يا غالية المد
وقت ما دمعك يطفح ويسقي الورد
وقت سيفي اسلو واعرض نص الدائرة
اقطي قدح سيقان البائرة
واسن كلماتي الجارحة
خيلي كسح بي الحيل الخيل السارحة
عن اشواقك مبعد
علي حافة صوتك مبرد
علي خرطة جسمك مجلد
علي ضحكت حزنك قهقه فرحا
اتنهد مرحا اتوهدب كرها
وانا مجروح من جوي ومنهك مجهد ومرهق
وانا مكتول بقدر عدد جرحات الارض عليك متكول
والخائف الضحكة اللجري ويضحك ومهما دربك يطول
والدائر الطعنة الاشهق ويزرع
نبتت حب من بذرة
وطرقت شوق من كسرة
وصاج بنوت ستات الشاي الولع في جواي النار الزفرة
وانت بتضرب وتلتخ بي سكينك اسلخ
جلد النهر الواقفة عليو جاموسة
وتاكلة عليو النخلة الضل
وامسح عرقي في ارضك شمو عبير الفل
وانا مرهون بي اشارتك ارضخ لا اقيف لا امشي
ولا تشرق باكر شمسي
وانت الخائف من يوم خوفك
جهز باكر لينا كتوفك
واجلد واجلد في زريبتنا النعجة بتولد
النار الجوي في يوم الشمعة بتوقد
عيونا مسافرة مساهرة بترجي المولد
عيونا مسافرة عيونا مساهرة
مهما سيوفكم قاهرة
في يوم حا تنط البت القاهرة
العتبة وتقفز باقي السلك الشائك
البت العاشقة عشيقها عشائق
تتلب فوق الحفرة
البت الخيلها كسح في الخيل الخيل المهرة
وانا مرهون بي قرارك لا اقيف لا اجري
ولا بي اسمك شمسا تشرق بدري
وانا مطعون بي اشارتك دمي مدفق
فوق المكتب بكتب
تاني قصائد ضد الواقع
يضوي شعاع الشمعة الفاقع
عكس تجاه الريح اتشري
الزول الضاق يا ناس الزري
والزول الضري في يوم بنضري
يوم نتضرع ونطلع بري
نقيف في السهلة
تموت علي حبك واقفة النخلة
ما بين غيمة ونجمة
الموجة جاية تقود الهجمة
بي اسمك تقدل زمن المهلة
محمد الفاتح خالد
[email protected]
ترحب سودانيزاونلاين بجميع الاراء الحرة و المقالات ,الاخبار و البيانات لنشرها فى هذه الصفحة.ويمكنك لزوارنا الكرام ارسالها الى [email protected] كما نرجو ذكر الاسم الحقيقى و الكامل و مكان الاقامة مدة بقاء المقال فى هذه الصفحة 10 اعوام
أعلى الصفحة
