 |
 |
 |
 |
|
|
|
|
|
شعر عزمي أحمد خليل
مهما تسوي … غير ما تنوي
الله القادر والله القوي
نضف قلبك وخاف من ربك
في الضلمه الحالكه نورو بيضوي
***********
ماتتوقع فى كل مره
إنو كلامك هوه الحق
ياما مصيرو البيحفر حفره
بكره بيقع في نفس الشق
والله الخلقك وأداك قدره
ياما كمان لسواكا خلق
والقال الدايره مصيرها تدور
ياما حقيقه في قولو صدق
والبيقيد النار بي ايدو
تشب النار في قلبو وتكوي
مهما تسوي … غير ما تنوي
***********
كون حقاني ولو على نفسك
وما يغشك البيضحك ليك
ونفس الهلل ليك في مره
ياما حيشمت برضو عليك
وأوعى يصور ليك غرورك
إنو الحظ دائماًً في ايديّك
والسويتو في غيرك كلو
برضو مصيرو يلف ويجيك
ومهما تداري الحق حيـبـين
وصوتو الصارخ ياما يدوي
مهما تسوي … غير ما تنوي
***********
عيش مع نفسك صادق ديمه
وما يغشك في الدنيا المظهر
خليك منصف في كل حاجه
وعلى الناس أوعك تتكبر
لاقي الكل بقلب مفتوح
وعلى الظالم ما تتستر
وللمظلوم خليكا نصير
وشد من أزرو وما تتجبر
ما في الدائم غير وجه الله
وحتى الجبل الشامخ بيهوي
مهما تسوي … غير ما تنوي
واشنطن أغسطس 2005