مالو عيبوه لينا سودانا القديم
سودانا سودان الهنا سودان النعيم
والماعندو والله قـديم
عمرو ما بسلك سليم
والساسو مصبوبا قويم
ديمة مظبوط مستقيم
وكل شي نسبي والنسبية مفهوما عظيم

لكن افندية الزمن الرجيم
دابة الغرب اللئيم
الليلة عابوه وسموه القديم
افنديتنا افندية الفهم السقيم
افندية الدجل المأدلج
عنقالة الفهم العقيم
وقلمن عمرو ما زال بلم
و ديمة مسكون بالسجم
طبالة للحاكم الدميم
ودلوكة للحكم الظليم
منظراتية في الفاضي العديم

اتاجروا بجهل العباد
وانافقوا لي حاكم البلاد
عشت يا حارسنا يا فارسنا
يا ريس انت يا سيد النجاد
ويا ريس براك شفت
اروع واعظم استفتا
ريسنا ياخالق العباد
امامنا يا رب الجهاد
وصدق الطرطورانو ربك يا بلاد
وما داري انو مصدر الشروالفساد
وراهو مثقفاتية الفكر الكساد
افة من صنف القراد
ماصة لدم العباد
وان قلت هذا الحال ازيم
ووب عليك ايها الرجعي القديم
انت اكبر رجعي امبريالي
انت من سودان قديم

طيب
مالو عيبوه لينا سودانا القديم
سودانا سودان الجدود
جابوه بفخر المكارم
جابوه بهيبة اسود
جابوه من بطن العدو
بالموقف الوطني الصمود
لا بعرفوا الواوالضكر
ولاعندهم شهادات اكسفورد
ولا كان عندهم كمبيوتر
ولا الموبايل السمح القيافة
ولا طيارة ركبوها ما بعد الحدود
ولا الفنادق السمحات لقوها
وما ضاقوا دولار السجود
وما ضاقوا البيتزا واللحم المفلهم
وما شافوها باريس ام خدود
وما لبسوا بدل كاردان القيافة
وعشقوا البنيات الورود
كانوا غبشا زي ترابنا
كانوا شامخين زي حرابنا
يلبسوا الهدم اب قدود
زادهم الصبر الجميل
وفيهم الحس الاصيل
عمرو ما خانوا العهود
وبعد ده خلوه لينا سودانا كبير
(وطن حدادي مدادي)1
واحد موحد هدية من شرف الجدود
وكان سودانا يا هوالواحد الموحد
اية من رب الوجود
يكفي انو ما كان شمال لا كان جنوب
ولا كان شرق لا كان غرب
وابدا اهلنا ما عرفوا الحدود
ولا عرفوا خط طول لا خط عرض
ولا الجغرافيا سواية الحدود
ولاالايدلوجيا والشعارات الدخيلة
ولا عندهم افندية من صنف القرود

ويكفي انهم ما عرفوا معناها الاجندة
ولا الاوامر الجاية من تحت المخدة
ولا المواثيق الخوازيق المعدة
وما اعلنوا يوما سجود
بل قرروا تحريرنا من داك المغير
الخواجة بجيشو الخطير
دعكناهو بعزة بلادنا
طردناهو بالسيف والجفير
وايمانا بالوطن الكبير
وكان سودانا واحد
وشعب واحد
وكانت كررى بقعة لقانا
وفيها امتزجت دمانا
والوطن في اعناقنا قد كان الامانة
والبيناتنا صافية زي لبنا نضير
وما بيناتنا لا( ايقاد)2 ولا اوغاد
ولا (بوش) البحاحي الناس زي الطير
ولا بيناتناالجيوش الجاية للتشطير
ولا (نيفاشا) ولاالتشاشة والكضب الكتير
ولا الاوامر الجاية من سيد الحمير
ولا الاجندة الجاية بالفهم العضير

ومالو سودانا القديم كان بلادا للجميع
فيهو دكان اليماني وبارالخواجة
وفيه الفلاتي سيد العروق والحلبي بياع القزاز
والعريبي راعي المعيز واهلنا الرطانة في كل النجوع
وجرس الكنيسة وصوت الاذان
كان موسيقى في الجو البديع
وفيه الخلوة والانداية
وابليسنا القديم قد كان مطيع

وفيهوعلب البيرة قادلة في زير السبيل
تسقي في الناس العطاشى
الطاشة في حر المقيل
وكانت اشرف من كوز الجعيدي
بياع الموية في الزمن الجميل

وب(الطرادة)3 انت زولا مستطيع
من صباحك
تملا قفة ملاحك
والباقي للكيف البديع
والماعندو في زمن الضرورة
حق الملاح والبينضورة
كمان عندو كراس الجرورة4
اول بطاقة (كريديت)
مفتوحة للناس الفقيرة
وكلو ماشي
Good credit
Bad credit
وكان بلد ماشة في كف القدير
لا غش لا كضب
ولا تجارة باسم الله الكبير
لانهم كانوا ظابطين الامور
وكمان عندهم عفة الروح والضمير
وبوعيا بسيط كانوا عارفين البصير
والوطن في بالهم حاجة واحدة
ما برضو بي ترسيمو بي تقسيمو
حتى لو جاهم نكير

والمهدي الامام قايد الوطن الكبير
تب ما كان الشمالي الدنقلاوي
لمن كاتل الغازي المغير
وما قال ادونا تقرير المصير
لدنقلا وناس الحفير
وكانوا معاه فرسان المهابة
من كل بادية مثلوا الوطن الكبير
ودقنة ما كان شرقاوي وبيجاوي
لما سافر لي قدير
وكلفوه شان ابقى للشرق الامير
وما قال ادونا تقرير المصير
وبرضو حارب في كرري في داك الهجير
شان انصر الوطن الكبير
واب عنجة ما كان الغرباوي النوباوي
وما قال ادونا تقرير المصير
وبرضو في شرقو كاتل بهمة الاسد الهصور
وكمان ود سيد احمد5 ما غنى لدار الشوايقة
بل غنى للوطن الكبير
الفيهو ادروب البيجاوي
والفيهو دينق الجنوبي
و ادومة في غرب السرور
وما كان (ود شريف)6 شماليا صغير
ولا جلابي في وعيو الجسور
قال (وطن حدادي مدادي)
وماهو ام در ولا كان ود البصير
وبرضو ما قال دايرين تقرير مصير

ويكفي جدودنا انهم أهل العزيمة
وعمرو ما عرفوا الهزيمة
وداوسوا الغازي الحقير
وحرروا البلد الكبير
وما سمعنا بتقرير مصير

ونحن في زمن الفضاءات الكبيرة
لا زلنا نحلم تبقى افريقيا واحدة
قارة واحدة
دولة واحدة
عشان نوازن الحال الكسير
والليلة نسمع بتقرير مصير
ودعاوي من نوعا ختير
رغم انو اتحلحلت كل الامور
وفي ميثاق اسمرا الهام الكبير
حسمناها اسباب الشرور
وحق المواطنة بند واضح في السطور
وما في زولا برضى بالظلم والفجور
وما في زولا فينا مولودا امير
ومافي زولا فينا يحقر بالصغير

شوفوا اوروبا بعد حروب الدنيا فيها
والملايين الراحوا في جو القبور
والعداوات الماثلة في كل الدهور
الليلة صبحت دولة واحدة
وعملة واحدة
وقوة واحدة
وكلمة واحدة
دولة من نوعا خطير

وشوفوا امريكا ام الجنون
بشرا من كل لون
من كل دين
من كل طين
طلعوا افضل هجين
فالوحدة قد كانت مصير
وما في حد اقدر اقول
الليلة عايزين تقرير مصير
ونحن في عالم كبير
عالم الكتل الكبيرة
ما فيهو قيمة للبلد الصغير
والعولمة قد صارت حقيقة
دايرة امة واحدة في هذا المسير
ودايرة همة شان تنافس التور الكبير

لا زلنا نحلم بيهو سودان النعيم
ما بشطب السمح القديم
لكن بضمد الجرح الاليم
وبدي للناس حقوقها
وبنصر الزول العديم
وكل زول بدينو قادل
كان مواطن كان مقيم

ما هو سودان الحكم الثنائي
والشعار الالتوائي
والقرار الاحتوائي
ما فيهو خفاش الضلام
وهمباتة الرزق الحرام
وما فيهو تجار السلام
بياعة الشر و الخصام
ودينهم النار والحديد
لا زلنا نحلم بيهو سودانا جديد
وتمد ايدك يا(جون) اخونا
للعاهدوك ولا زالوا في ذات العهود
وبيناتكم اسمرا ام الشهود
و(كوكا وامبو)7 والاف الوعود

ما كت مصدق انو الحكاية قد صارت كوار
قسمة كراسي وقسمة فلوسا كتار
وانك تقاسم الحرامية الكبار
وانت المحرر سيد الشعار
وات عارف انهم سبب الودار
وشعارك الليلة قد صار عدار
وفي النهاية الحكاية قسمة
ويا قسمة8 شيليه الشمار
وغني في البلد المخوزق
بالشعارات الكبار

وصدقت قولك يا جونا يا جون الهنا
لانك( انت سوداني وسوداني انا
ضمنا الوادي فمن يفصلنا
نحن روحان حللنا بدنا
منقو قل لا عاش من يفصلنا
هاهو النيل الذي ارضعنا
وسقا الوادي بكاسات المنى
انت سوداني وسوداني انا)9
وده قالوا شاعرنا القديم
وبرضو كان من سودان قديم

ما هو سودان الوصاية
والجيوش الجاية بكضب الحماية
ودستورو الدكاكيني مكشوف النوايا
والقصة واضحة ما بتدور قراية
ماالبلد هاملة ما فيها الكبير
سيد الحكمة والراى البصير
البنصح الناس للهداية
وتب ما فيها الوجيع
البواصل في وجعو حتى النهاية
وكان لي حكامنا حكام السجم
آفة من نا سا بجم
ما همهم غير هذا الحكم
وما همهم تحرق بلد
تغرق بلد
بعد ان نهبوا البلد
باعوا البلد
قسموا البلد
ممكن ارضوا بتوتي وكفاية
والله شايف
والله عارف
نحن صامدين للنهاية
نهاية الحال الكعب
ومن هناك نبداها البداية
ولمن نكاتل نكاتل نحن للبلد الكبيرة
ما بنكاتل عشان جهاتنا
وعشان قبايلنا الصغيرة
نحن اكبر ونحن للحارة الكبيرة
وبلادنا حاجة واحدة
وتف للفكرة الصغيرة
وتف للروح الكسيرة
وتف للنزعة الحقيرة

هشام هباني

1: مقطع من قصيدة للشاعر المناضل محجوب شريف غناها المبدع وردي بعيد الانتفاضة
2:هي منظمة الايقاد المعروفة
3: الطرادة هي ورقة تداول نقدية سودانية سابقة وهي فئة الخمسة وعشرين قرشا
4:كراس الجرورة هو كراسة تعامل تجارية قديمة في السودان وخصوصا في الارياف
بين المواطنين وتجار القطاعي تقيد فيها المشتريات وبالدفع الشهري المؤجل
5:الفنان الراحل المناضل مصطفى سيد احمد