الطريفي زول نصيحة
مبارك الفاضل الحزب حقو وحق أبو وحق جدوا لا بقلع مسمار ولا عايز اعتذار
غيابك المرة دي طال يا الطريفي .. كنت مدفون وين ؟
عثمان النمر - الدوحة - ( فاتحتي ) عند أبو علي البتصرف عند ( أبو عبده ) .. ووصفتي عند دكتور جون وواقع على ود الترابي !! .
التحالف الوطني المعارض دا حيودينا وين .. ؟؟
الصادق حسن - أمدرمان - أودينا وين دي انتهت بدري السؤال هو مقطوع الطارئ مودي نفسو وين ؟
كيف انتصرت مصر على منتخبنا بنصف دستة .. وإلى متى تلاحقنا الهزائم ..؟؟
عبدون حميدة - أركويت - أصلوا الهزيمة دستة لكن لحقتنا بركة العلاقات الأزلية وعبارة ( ونحن والنبي أخوات ) وحتلاحقنا الهزائم ما دام ورقتنا أورنيك فقدان وفرسانا فاقد تربوي .
مولانا الميرغني تأخر .. ولا كيف ..؟
حسن قادم - الضعين - أولاد الميرغني ناس حارة وتاني ودراسات جدوى وشورى وأصحاب وصية تاريخية ( القراصة لو ما بقت حارة ) ما بندخل فيها أيدينا ..!! أما قصة الفتة الباردة فهي من حكايات المنكرين .
بالمناسبة يا الطريفي - زيدان إبراهيم صمت فجأة - الحاصل شنو ..؟؟
سليمان إبراهيم - الحاج يوسف - من أقرب مكتب بوستة الرجاء إرسال البرقية التالية ( صحي أتغيرت أنت خلاص ) نسبت العشرة يا سيد روحي والإحساس بقيت قاسي ونسيت الناس .
معارضة فيها الصادق المهدي وحسن الترابي ومحمد إبراهيم نقد طعمها ولونها ورائحتها كيف ..؟
علي أمين - شندي - السياسة بعد الدستور والطعم بعد الدرت واللون بعد الصبح القريب والريحة بعد عرس الكورة .
لماذا اختار د . المتعافي هذا التوقيت للاعتراف برداءة الطرق ..؟؟
منى السيد - الكلاكلة - جوطة الخريف والخواجة الظريف والمتمرد المخيف دايرين مصاريف والمتعافي الفحل فتح الأمل والجاتك في مالك سامحتك .
متمردين دارفور طالبوا بفصل الدين عن الدولة .. الناس ديل ما عارفين الحاصل ..؟؟
آدم أبكر - نيالا - البفصل الرأس عن الجتة بدم بارد شن شغلتوا في الدين والعجين !!
الصراع الحاصل في التلفزيون أسبابو شنو ..؟؟
فضل المولى حسن - الرياض - أسبابو إنو الشاشة الغشاشة قطع الجماعة فشفاشة بالعواسة الدراشة ومزائبة فتاشة والله ليهم من كاشا .
كثرة الصحف .. وأزمة التوزيع .. وقلة المعلومات .. ماذا تعني ..؟؟
أيوب عبد الرحيم - دنقلا - تعني أن الحريات المفتوحة أعتى أنواع الإستبداد ، لكن ياأيوب صدقني بجي الخريف والورق بقيف .
ثم ماذا تبقى لنا بعد رحيل الفاضل سعيد ..؟
أبو بكر عمر - بانت - رحل الفاضل سعيد والحظ السعيد والأيام السعيدة والضحكة السعيدة وبقيت أشجار ( القضيم ) واستقالة ( العجب ) !!.
تتوقع شنو في 9 يوليو القادم ..؟؟
دينق وليام - سوبا - اتوقعوا في 9 يوليو 19 يوليو !!
لماذا تتساقط الطائرات .. والعمارات والطرق في الدقائق الأخيرة ..؟؟
جميل علي التوم - الأبيض - ديل ما أولاد الرايق كسار الحقائق ياجميل يا نور الشقائق عبي مونتك وأصبر دقائق .
عمنا الطيب مصطفى ليه زعلان من الاتفاقية والسلام والوحدة والحركة والحكومة .. و ..؟؟
علي يس - الكدرو - الطيب مصطفى زعلوا زعل مناظر الله لا شوفوا الفيلم !!
ليه وردي بهاجم الحلنقي وصلاح إدريس على طول ..؟؟
أحمد الماحي - شمبات - لأنه وردي عارف اسحق بحبوا وصلاح بموت فيهو يعني باختصار القصة دلع عشاق !!
أخونا سبدرات في الزحمة الجاية حيكون وضعو شنو ..؟؟
نور الدين الكاهن - كوريا - الزحمة فيها الرحمة يا كاهن والمحامي عارف نظام الأسامي ورأسمالي الفحامي الله لي كوريا من شباب كوريا .
سمعنا يا الطريفي أنو ود المهدي تاني حيرجع مبارك الفاضل للحزب ؟
عثمان عبد الرحمن - الطائف - مبارك الفاضل الحزب حقو وحق أبو وحق جدوا لا بقلع مسمار ولا عايز اعتذار .. كعبين الأنفار وحراس الدار وضاربين الطار .
من هو يا الطريفي أقوى المرشحين لمنصب ( رئيس الوزراء ) في الحكومة القادمة؟
سامر الطيب - ود نوباوي - حسن الصادق محمد عثمان نقد بدر الدين الفاضل أبكر المصوبن .
هل سمعت أن مجدي شمس الدين بعد كل هذا الخراب قال مدافعاً عن هزيمته أن الاتحاد ستتحدث عنه أعماله ؟
بغدادي عابدين - أم القرى - قلت أعماله أم عماله أم عمايلوا أم عمالته يا بغدادي .
معناها شنو يا الطريفي نودي الأولاد للمدارس الساعة ( 8) ونرجع نجيبهم الساعة ( 10 ) ؟
مصطفى محجوب - الموردة - دي اسمها فكة الريق وسياسة التعويق وبؤس الفريق .
رأيك شنو يالطريفي في مشروع استقرار الشباب تحت رعاية الاتحاد الوطني للشباب السوداني ؟
أشرف حافظ - الهجرة - أنا سمعت بمشروع استقرار الاتحاد الوطني تحت رعاية الشباب السوداني والأمهات والآباء وسكان المقابر السودانيين .
هل صحيح أن د . قرنق تحدث للجنوبيين بالجامعة الأمريكية بواشنطن عن الوزارات والمقاعد التي ستتحصل عليها الحركة في الخرطوم وبلغة الحساب ؟
عبد السلام صالح - امتداد ناصر - لا أنا سمعت بواشنطن تتحدث عن وزارات قرنق بالخرطوم دون أن يعرف الدكتور ودون أن تعرف الجامعات الأمريكية .
صديق المجتبى عاد من الأردن ولا زال بتعالج وعبد الباسط عبد الماجد طريح الفراش بساهرون وزراء الثقافة ديل الجاهم شنو يالطريفي ؟
طارق الأحمر - ود مدني - بالنسبة لصديق القريض بيجب الضيق ، وبالنسبة لعبد الباسط التعليم بجيب التأليم .
عايزين لينا مسدار من دفاترك القديمة يالطريفي ؟
محمد سيد - الملازمين - الدرب انشحط واللوس جبالو اتناطن والبندر فوانيرو البيوقدن ماتن أمات هضاليم الخلا البنجاطن أسرع قودع أمسيت والمواعيد فاتن .
وعسل سوداني كمان ؟
ما تقول ضعت من إهمالي أنا عامل الحزم رأسمالي ، بس أيامي ما باسمالي ، ظروفي القاسية متقاسمالي !!
صحيفة الوان/ العدد (3186)
12/ يونيو 2005م
الخرطوم