سخانه ...سخانه ..سخانه 1000

سخانه ...سخانه ..سخانه 1000


14-08-2003, 06:53 PM


  » http://sudaneseonline.com/cgi-bin/sdb/2bb.cgi?seq=msg&board=99&msg=1254354774&rn=0


Post: #1
Title: سخانه ...سخانه ..سخانه 1000
Author: 3mk-Tango
Date: 14-08-2003, 06:53 PM




سخانه ..سخانه... سخانه 1000 ..ورطوبه مبالغة ..يعني زي العايش ليك في حلة كوارع ..والدنيا كلها مولعه نار ..العراقيين كانو بقولوا شهر آب البخلع المسمار من الباب من السخانه .. والله آب السنة خلعنا وبقي ابو لهب عديل...... ناس اوربا قالو العجايز انقرضن..والشباب فكه اخرو خالص ...والشفع ما خلو ليهم نافورة ولا جردل مويه ما دخلو فيهو ..والغابات اتحرقت ..دا كلو ودرجة الحرارة 36 لحدي 40 ... ديل بهذرو الظاهر عليهم ... زمان كانو بمشو يصيفو ..بعد كدا اخير ليهم يمشو يشتو ..... تتصل علي السودان يقولو ليك الجو حلو اولله ..وتعاين في التلفزيون تلقي درجة الحرارة 38 ..ناس صحراويه و شماشية خالص...
اما الخليج بتاعنا دا ...تقوم من الصباح تقطع ليك جك مويه بااارد وتقول هل من مزيد ... والله دي لو عملتها في السودان .. تلقي الناس يتلامزو ويتغامزو ..ويقولوا ليك انت امبارح كنت مساهر وين ؟؟ دا لو ما جا واحد اداك شمه كدا ..
سمعت لي شمار قالو ناس خليجنا ديل بختو تلج في الترمومتر البقيس درجة الحرارة ... عشان ما يقرا درجة الحرارة صاح .... ياربي دا داير ليهو كم لوح ؟؟ ....علي الانا حاسيهو دا بتكون درجة الحرارة كان60 ولا 70 امكن... غايتو الواحد داير ليهو جهاز يبرد بيهو المويه عشان يعرف ياخد ليهو دش .... تقول خلاص امشي اقعد في التكييف شوية ..والله بس زي القاعد ليك جوه طاحونه ..وتبقي عليك ميته وخراب اضان ... واحد قال لي امشي اشتري ليك مكيف ما فيهو صوت اسمو اسبلت قال ..قلت ليهو خلي المطالب الميري انطوانيتية دي ..... اسة فرقك شنو من ميري انطوانيت لمن قالت للجماعة اكلو قراصة بي عسل والناس ما عندهم دقيق .... ناس السودان الواحد يدي ليك الحوش رشة بي موية وكان الله رحمو بالكهرباء يشغل المروحة وينوم ويشخر.. ويقوم زي الداقيو بي عكاز عمنا قرجة..جسمو كلو مكسر .. تقول لي اسبلت .....
انا داير لي كركدي في جك قزاز مندي بي برا ... واقطعو زي قطعة الاوستن لي رمال الابيض
واخت الجك دا تااااخ في الواطه ... وبعد داك خلي الاسبلت ينفعك ... قال لي اشرب شاي ببرد ليك جسمك ...لووول ..شاي دا انا خلقة ما عندي معاهو علاقة ...لكن والله الشاي الببرد الجسم دا الا يكون جايبنو من روسيا ..خليني مع جكي دا ... انشاء الله يعمل لي قرحة ..لكن شاي يجيب لي احتراق زاتي في معدتي ... دا ما بنفع معاي ...
قالو الاوزون اتخوزق وخوزق العالم معاهو ..وخوازيق العالم زادت ... كان كدا الله يستر علينا من رمضان البعد الجاي ..باقي انا جرسة في رمضان ..الظاهر حتبقي علي حكاية الليله عدوك ما صايم ...
الله يمشي آب دا بي خير زي ما مشي تموز.. والله يحفظكم من حرارة الشمس و العين ...
ولكم الحب

تنقو


Post: #2
Title: Re: سخانه ...سخانه ..سخانه 1000
Author: Munir
Date: 14-08-2003, 08:15 PM
Parent: #1

عمك تنقو ــ اذا سخنت شديد ابلع حبوب الكندشة ـ قالوا ايـام هبرة الجاينيز علي السودان جابو معاهم حبوب كندشة ـ ناس كانوا شغالين معاهم قالو لينا كانو يجو للمواصلات ساعات الذروة في ابو جنزير الواحد يكون بالع حبة كندشة واحدة تلقاه مرطب بمزاج والناس من حوله مسخنين الواحد تقول مبارينه بي كانون ـــ

Post: #4
Title: Re: سخانه ...سخانه ..سخانه 1000
Author: 3mk-Tango
Date: 14-08-2003, 08:34 PM
Parent: #2




منير الله يديك البرد والسلام
قلت لي حبوب كندشة ؟؟ لوووول ..ما سمعت بيها قبل كدا والله ..غايتو شايف لي حاجة زي البالطو كدا بلبسوها ناس ارامكو للعمال البشتغلو في الحر عشان ما يغمي عليهم..قالو فيهو حاجة بتبرد..والله كان عرفت الحاجة دي اجيبها واعمل منها ناموسية


Post: #3
Title: Re: سخانه ...سخانه ..سخانه 1000
Author: Zongiya
Date: 14-08-2003, 08:28 PM
Parent: #1

..
.
سخانه لدرجه ..... انو الواحد ممكن اسيح
البحيره الموجوده في فرنسا نشفت ....وقالو الحر الجا الايام دي في فرنسا و غيرو من الدول الاوربيه ما جا من سنه 1919
الله بس افوت شهر 8 و 9 ده على خير ...

Post: #5
Title: Re: سخانه ...سخانه ..سخانه 1000
Author: 3mk-Tango
Date: 14-08-2003, 08:40 PM
Parent: #3





والله يازنجية انا شايف حر ناس اوربا دا كضب كضب كدا..طبعا اكيد لانهم ما متعودين عليهو
الغريبة في السودان زمان لمن الكهرباء تقطع الدنيا بتسخن..وبقت حاجة عادية يقولوا ليك اي الدنيا سخنت ما الكهرباء قطعت..الكلام دا ما كان بدخل راسي لكن كان قطعت في خليج السجم دا ياها الولعت بينا عديل
هو شهر 9 كمان فيهو حر زي دي يا زنجية...والله ما طمنتيني خالص


Post: #6
Title: تنقو
Author: توما
Date: 14-08-2003, 09:07 PM
Parent: #1

تنقو
سلامات
اديها ميه..
تديك طراوه..
سلم للعازه
توما

Post: #7
Title: Re: سخانه ...سخانه ..سخانه 1000
Author: zola123
Date: 14-08-2003, 09:13 PM
Parent: #1

عمك تنقو
كنت حاقول ليك اشتري مكيف زي الناس لاكن صحبك سبقني

وقال قال بتسمونا حناكيش

زولة123

Post: #8
Title: Re: سخانه ...سخانه ..سخانه 1000
Author: nassar elhaj
Date: 14-08-2003, 09:54 PM
Parent: #7

عمنا تنقو

كلما
ضاقت العبارة
اتسعت الرؤيا

مش كده احسن

Post: #9
Title: Re: سخانه ...سخانه ..سخانه 1000
Author: 3mk-Tango
Date: 14-08-2003, 10:56 PM
Parent: #1


.



توما
اذا قلت ليك المويه زاتا مسخنة حا تدينا شنو ؟؟
اهو غايتو محبوسين وقاعدين

zola123

والله يا ستي السخانه دي ما معاها زول حنكوش وزول ما حنكوش .....اها قولي اشتريت لي مكيف زي الناس كان ماشي البقاله اشيلو في ظهري ... لوووول

نصار
كلما زادت السخانه زادت الرطوبه .... وحلها ديبفريزر فيها مخده

لكم الود ولوح تلج

تنقو


Post: #10
Title: Re: سخانه ...سخانه ..سخانه 1000
Author: طرقوش
Date: 15-08-2003, 10:19 AM
Parent: #9

الغريبة المروحة فة لندن كانت بى 13-18 جنيه أسى بقت بـ48 جنيه

Post: #11
Title: Re: سخانه ...سخانه ..سخانه 1000
Author: maia
Date: 15-08-2003, 10:27 AM
Parent: #1

عم التنقو
السخانة مش الف دي سخانة مليون كده
وبعدين يا ربي نحن السودانيين محكوم علينا نعيش تحت ظل السخانة دي وين ما نمشي
غايتو اجارك الله من سخانة البلد الخليجية القعدين فيها الشمس نازلة معانا في الارض
ياربي حنعيش في بلد باردة في يوم من الايام تنسينا السخانة الشفناها
قول آآآمين

Post: #12
Title: Re: سخانه ...سخانه ..سخانه 1000
Author: HAMZA SULIMAN
Date: 15-08-2003, 11:00 AM
Parent: #11

اميين يا ميا

Post: #13
Title: Re: سخانه ...سخانه ..سخانه 1000
Author: alfatih
Date: 15-08-2003, 11:20 AM
Parent: #1

عمك تنقو
تضحك فينا ؟
وحات الطاحونة 17 قرية فكت البيرق فى اسبانيا ودة من حريق الغابات
السخانة هنا كتلت الناس الشباب مش العجائز ... يعنى سخانة بتحرق
الغابة دى سخانة دى ؟ .... تخيل الغابات بقت حناكيش برضو ؟

نحن هنا غايتو فى اوربا الناس بقو زى القعونج كبار وصغار فى الموية
لكن اقول ليك سر .... امبارح ناس اميركا سخانة وكهرباء قاطعة كمان
الناس مرقوهم من الانفاق زى الشوالات والاشارات كبست سدت ليك الطرق كلها ....والاسانسير فى الناطحات تعطل يعنى الا تطير بالشباك او يكون
عندك لمبة .
تقول لى سخانة بس ؟
الجميل عندنا انو رمضان بجينا فى الشتاء واليوم قصير وما بتشعر بيهو زاتو

Post: #14
Title: Re: سخانه ...سخانه ..سخانه 1000
Author: 3mk-Tango
Date: 15-08-2003, 04:04 PM
Parent: #1


.



طرقوش
..قلت لي المروحة طارت السماء ..اها لوح التلج لحق كم عندكم ؟..تعرف انا لو كنت هناك علي الناس المستجدة سخانه دي كنت عملت لي حفاظة داندرمة..وحاتك موسم واحد وياني المنافس صلاح ادريس


مايا
.انا غايتو بديت اصدق نظرية لوح التلج البختو في الترمومتر دي كدا فكري فيها معاي مش ممكن تكون واردة ؟؟

حمزة الشفيف
امييين كميات

الفاتح
طيب ما تحاول تجيبو ليكم ملايات كبيرة وتدوها موية وتختوها قصاد طواحين الهوا الكبيرة دي امكن تبرد الجو شوية ..اهو علي الاقل تكونو عملتو الما عملو دون كيشوت
يا اخوي ناس امريكا ديل كمان عملوها كبيرة..نحنا كهربتنا بتقطع..في احياء وتجي في احياء ..حتي لمن اتحرقت محطة بري..غايتو كل يوم تظهر لينا عظمة بلدنا..نحنا سباقين في اي حاجة والله


ولكم الحب ..وكاس ايسكريم للحناكيش ....وداندرمة للزينا كدا

تنقو


Post: #15
Title: Re: سخانه ...سخانه ..سخانه 1000
Author: ابو جهينة
Date: 16-08-2003, 09:06 AM
Parent: #14

عمك تنقو
تحياتي
الأربعاء و الخميس هنا ، حاجة مبالغة ، يعني أنا متأكد ما كان في أوكسيجين في الجو. كتمة و خنقة ، بالله الشجر كأنو مرسوم في ورقة.
حليل القيالة في ضل النخل على ضفاف النيل.
تسلم