عرفتك..

عرفتك..


09-17-2005, 06:12 PM


  » http://sudaneseonline.com/cgi-bin/sdb/2bb.cgi?seq=msg&board=90&msg=1134470681&rn=0


Post: #1
Title: عرفتك..
Author: Dr. Moiz Bakhiet
Date: 09-17-2005, 06:12 PM


هنــــا


عرفتك..

قصيدة جديدة
شعر: د. معز عمر بخيت

عرفتك في هواي غيمة
وخيل جامح على البيبان
وطن سابح على نجيمة
سحاب عاشق ضحى الحيشان
مطر مسجون تحت خيمة
وبين الساقية والعمدان
وبين سكة خريف عطشان
وقف قلب الصباح ولهان
موشح بي جروف النيل
ومن زخة هواهو يشيل
نسيم العزة من معناك
ومن شفق المغيب قنديل
وفي نبض الأصيل بلقاك
صبية ندية ما بتميل
لا لي قسوة الأقدار
و لا لي نمة المسدار
ولا لي رونق الترتيل
جداول ريد سقاها رحيل
رذاذ سفرو السرابو نخيل
وطبع احساسو رقة وذوق
ونبض هواهو دربو عديل
ولما تقيف موانيك فوق
بحار الشوق نزيفها يسيل
دمعة حنينة في منديل
وتاني الشمس تنزل ليك
وتطلع من مدن عينيك
تقيف عريانة وسط الليل
لا بغطيها غيم رويان
ولا بطفيها شلال سيل
ويطلع وعدك النديان
سنابل عافية في بستان
وفي شجر الحنين ريحان
وآية الكرسي في القرآن
وبين كفيك مركب نوح
إذا ما اتمكن الطوفان
من همس الشجن والبوح
ومن الآهة والأحزان
ومن لوعة هجير مسكوب
على رمل الأسف والطوب
كماين هايمة عز الصيف
بتحرق في الزفير أنفاس
وفي شهقة لهيب القيف
بتدي الناس
نسايم روحها والإحساس
وتطلع في الضحى الممزوج
بلون الطيف
نجمة فرحة واستئناس
وهجعة كيف
على الزمن الوقف مشدود
على الأجراس
بيسقي الضيف
رحيق العزة والإيناس
كفاك يا صبر من أيوب
وسيب الخير علينا يتوب
عشان نتوسد الميعاد
ونطلع ليك إنت وثوب
فوق عرش السنا الوقاد
ومن سجن المسافة هروب
وما بين الشجن أعياد
صباح ما بمسا فيهو غروب
تعال خلي المعاني وداد
تعال جيب الزمن مقلوب
تعال نبدا العمر ميلاد
تهال خلّي المحنة دروب
تعال يا خاتم الأوراد
تعال يا وعدنا المكتوب
تعال جيب الحروف أعداد
مدد تتوضى بيهو قلوب.


Post: #2
Title: Re: عرفتك..
Author: WADKASSALA
Date: 09-17-2005, 06:23 PM
Parent: #1

لك كل الحب يازول ياسمح ياحلو يارائع

Post: #11
Title: Re: عرفتك..
Author: Dr. Moiz Bakhiet
Date: 09-18-2005, 05:42 AM
Parent: #2

WADKASSALA
Quote: لك كل الحب يازول ياسمح ياحلو يارائع


ولك الجمال والحب والمعزة
يا سيد الروعة

Post: #3
Title: Re: عرفتك..
Author: نادية عثمان
Date: 09-17-2005, 06:24 PM
Parent: #1

ميلاد عصيب لرجُلٍ ما!!!


عشان بريدك وما بريد غيرك حلفتَ
أبقى شريان نبض قلبك وضخَّة الدم للوريد
اقتحمتك بي عواطفي ونار حواسي اللَّهْلَبَتْ فيك نار شبابك
وذوّبت فيك الجليد
ما سألتك لو بتقبل
لو بترفض
وما شغلت البال بأنك:
قد تفكِّر بَِي تأنِّي وتُبدي أو يمكن تعيد
* * * *
استلمتك هادي طبعك.. واختزلت الحُزن مِنَّك
نور حروفك عِقْد أنجُم.. والهلال في سماكَ عِيد
بطني شالت ريدتي ليكَ نُطفة كبرت
وجيت ولدتك
وكان مَخَاضَكْ طلقو زي ثَكَلِي الشهيد
جيت ولدتك واحتضنتك.. زندي لُولاي ليك يَهَدْهِد
صدري زي شهد الخلية.. ورفرف القلب السعيد
* * * *
إنتَ حَقِّي وما بهمني غيرك إنتَ
لا العوازل ينفو حُبِّي
لا الظروف تلوي لي إيد
أنا حملتك في فؤادي.. زولي وحدي ..
حُر كما الطير في البراري
وزي جموح خيلا عنيد
خيل كَسَر حافرو وتمرَّد.. وطار جناحو الحب يرفرف
وحطم أصفاد الحديد
جوّه في أعماقي شلتك.. وجيت ولدتك زول جديد
* * * *
صافي يا بحر النوارس.. بارك الحب وهَدِّي رَوْعَك
ورِغْوَة الزبد الوعيد
كرنفالات سيرة تَقْدِل... القمر فرحان يلالي
القماري تَقَُوقي لينا... والمراكب شايلة غِيد
إبتسامتك.. وغمزة العين المشاكسة
ونور جبينك.. وضمة الإيد في سلامك.. وقُبلة الحب في الخديد
همستك.. لمستك.. قَُولَةْ حَبَابِكْ.. وكلُّ ما فيك قال ده ريد
قولها بي نبضك وقلبك.. بي لسانك في سكونك.. قلبي غرقان في غرامك
يا البحبك حب شديد
قولها يا جنا قلبي قولها
قول بَحِبِّك واني أُولَى
نجمة ما حان يوم أُفُولَها
قولها يا طفلي الوليد
إنت حَقِّي أنا عِشِقْتَكْ
وجُوَّة في أعماقي شِلتَكْ
وجيت ولدتك زول جديد!!!!

Post: #13
Title: Re: عرفتك..
Author: Dr. Moiz Bakhiet
Date: 09-18-2005, 10:05 AM
Parent: #3

الأميرة نادية،
من كل أركان المدى تأتين
صبية كما الندى
وسوسناً وياسمين..

كلماتك فجر مقدس في ذاكرة رجل تتوق للخلاص من زهو إشتاء الحلم بك

وهو ميلاد عصيب لشوق لا يغيب

وإشراق عجيب..

ما أحلى كلماتك وإيقاع أحرفك

أيتها الجميلة مثل أزهار الربيع..

لك محبتي مترعةً بالبوح

وببعض الأمسيات المشرقة,,

Post: #4
Title: Re: عرفتك..
Author: بدرالدين شنا
Date: 09-17-2005, 10:55 PM
Parent: #1

الغالي "تميز" عمر بخيت
سلامي واشواق وطول غياب
معز الحرف ومذل الصلف يا راقي
Quote: تهال خلّي المحنة دروب
تِهِبْتَ ولا شنو؟؟؟

Post: #14
Title: Re: عرفتك..
Author: Dr. Moiz Bakhiet
Date: 09-18-2005, 01:39 PM
Parent: #4

بدرالدين شنا
Quote: الغالي "تميز" عمر بخيت
سلامي واشواق وطول غياب
معز الحرف ومذل الصلف يا راقي

Quote: تهال خلّي المحنة دروب

تِهِبْتَ ولا شنو؟؟؟

بدر الدين حلاوة..

حبيبي والله انت يا سيد الناس..

تعبت تعبت تعبت والله

تهبت ألقى هروف ما سمهوا بيها الناس..

Post: #5
Title: Re: عرفتك..
Author: أبوذر بابكر
Date: 09-17-2005, 11:01 PM
Parent: #1

إزيك يا بديع

تعرف يا دكتور
والله العظيم لى زمن كايس وافتش جوه كل الأشياء السمحة
عشان ألقى لى شى أشبه بيهو طعمك ونكهتك

وما لاقى

عشان كده فكرت إنه ليه ما يكون فى طعم جديد فى الدنيا
إسمه "طعم معز"

طعم براهو ما زى أى طعم تانى

طعم كامل المعنى والمذاق

إنشاء الله ياخى تلقى العافية والأيام الطيبة الجميلة
بقدر ما فيك من جمال
وبقدر ما قاعد تجمل حياة الناس وتسعدهم

شعرا وأدبا وإنسانية وعلما وجمال

Post: #6
Title: Re: عرفتك..
Author: ابو جهينة
Date: 09-17-2005, 11:15 PM
Parent: #5

د. معز

دخلت عيادة هذه الأحرف ، فآنست من جانب القلب الأيمن ناراً وهاجاً :

Quote: وفي شهقة لهيب القيف
بتدي الناس
نسايم روحها والإحساس
وتطلع في الضحى الممزوج
بلون الطيف
نجمة فرحة واستئناس
وهجعة كيف
على الزمن الوقف مشدود
على الأجراس


و بس

Post: #7
Title: Re: عرفتك..
Author: munswor almophtah
Date: 09-18-2005, 00:11 AM
Parent: #6

نحن بنعرف المسادير
وإنتو بتجيدوا النشيد
كل حروف الورد جاتكم
والنحل طنان وشهدوا
كما الدرب يسقى الوريد
نحن راكبين فوق بكارنا
وفوق خلاء البر البعيد
نرعى فى الصيد كان يولف
ومن برم طلح الغرام
كالفنو كان الريد يزيد
وإنتو يا عسل النحل
قلع النحل مالينوا ريد
حتى الفراش خلى الطفاش
عشق الدعاش وأيامو عيد
جات الحروف رقصت كشف
رطنت مصارين القلب
تاهت مودره للدرب
درب النشيد
لامن كحل عينيها
صوتا للفراش
والأذن....سمعت جمال الصوره
والألوان بتهمس فى الآذن
هل من مزيد
هل من مزيد


منصور

Post: #8
Title: Re: عرفتك..
Author: Dr. Moiz Bakhiet
Date: 09-18-2005, 02:24 AM
Parent: #7

سأعود إليكم أيها الرائعين

ومهداة لكم هذا اللحن حتى أعود:

Killing Me Softly With His Song
( Roberta Flack )

Post: #9
Title: Re: عرفتك..
Author: Elsamani A.Malik
Date: 09-18-2005, 03:47 AM
Parent: #8

دمت تدفقا أيها الرائع

Post: #18
Title: Re: عرفتك..
Author: Dr. Moiz Bakhiet
Date: 09-19-2005, 02:53 PM
Parent: #9

أخي الحبيب السماني

أشكر لك كلماتك الطيبة
ودمت أيضاً رائعاً ومشرقاً أبداً

Post: #17
Title: Re: عرفتك..
Author: Dr. Moiz Bakhiet
Date: 09-19-2005, 08:33 AM
Parent: #7

الحبيب منصور المفتاح..

أنت رجل لا حدود لروعتك

ما أجمل هذه الكلمات التي تمنح النفس السعادة

وكل ألوان الجمال

شكراً لك يا سيد الحرف الأنيق..

Post: #16
Title: Re: عرفتك..
Author: Dr. Moiz Bakhiet
Date: 09-19-2005, 04:35 AM
Parent: #6

أبو جهينة،
يا بحر الألق والفخر

شكراً لزهو حضورك المبجل

ولك الشكر أيها الحبيب


معز

Post: #15
Title: Re: عرفتك..
Author: Dr. Moiz Bakhiet
Date: 09-18-2005, 10:47 PM
Parent: #5

الشاعر المطر

والشاعر الرحيق أبوذر

يبقى طعمك أنت بنكهة العذوبة
ويبقى لك لون الصدق
ونبقى أنت عافية الجمال والنقاء كله

شكراً لك أيها الحبيب

وأنت تمنحني حقل نخيل وبستان زهو وسعادة

تحياتي لك وامتناني العظيم..


معز

Post: #10
Title: Re: عرفتك..
Author: saadeldin abdelrahman
Date: 09-18-2005, 04:36 AM
Parent: #1

نقول شنو بس ?



ما أحلاكم


Post: #20
Title: Re: عرفتك..
Author: Dr. Moiz Bakhiet
Date: 09-19-2005, 11:33 PM
Parent: #10

الحبيب سعد الدين عبد الرحمن

دعني أردد ما قاله جماع مرة أخرى:

هين تستخفه بسمة الطفل
قوي يصارع الأجيالا

حاسر الرأس عند كل جمال
مستشف من كل شيء جمالا




هذا أنت..

Post: #12
Title: Re: عرفتك..
Author: Abdulla Ageed
Date: 09-18-2005, 06:25 AM
Parent: #1

عرفتَك في الوجود نسمة
تطوف بالفرحة للحبان
حروفك نور، وشيك بسمة
سماح ينداح مدى الأزمان
شعور دفاق
قلب خفّاق
ودايما بِقبل القسمة
على كل زول في كل مكان


فلك الشكر

Post: #19
Title: Re: عرفتك..
Author: motaz
Date: 09-19-2005, 04:10 PM
Parent: #12

تعال خلي المعاني وداد
تعال جيب الزمن مقلوب
تعال نبدا العمر ميلاد
تهال خلّي المحنة دروب
تعال يا خاتم الأوراد
تعال يا وعدنا المكتوب
تعال جيب الحروف أعداد
مدد تتوضى بيهو قلوب.


تسلم يا دكتور على الكلمات الحلوة
بس خليك قريب وما تطول الغيبة

Post: #21
Title: Re: عرفتك..
Author: nashaat elemam
Date: 09-20-2005, 00:51 AM
Parent: #19

وبين كفيك مركب نوح
إذا ما اتمكن الطوفان
من همس الشجن والبوح
ومن الآهة والأحزان


ها هو طوفان حسنك حيث لا عاصم منه إلا الدنو منك..
.. سلمت د. معز
وكن كما أنت دائماً..

Post: #24
Title: Re: عرفتك..
Author: Dr. Moiz Bakhiet
Date: 09-20-2005, 02:27 PM
Parent: #21

الحبيب نشأت الإمام

لكم تسعدني كلماتك

ولكم يسعدني مرورك المدهش على أعتاب المدىوالشوق

تحياتي لك الرائعين الذين معك

وكل الأصدقاء بالراي العام

Post: #23
Title: Re: عرفتك..
Author: Dr. Moiz Bakhiet
Date: 09-20-2005, 10:56 AM
Parent: #19

يا ألف مرحب بيك يا معتز

ومشكور على المرور الجميل

وأهو جيتك جاري جري..

تسلم يا حبيب

Post: #22
Title: Re: عرفتك..
Author: Dr. Moiz Bakhiet
Date: 09-20-2005, 08:21 AM
Parent: #12

Abdulla Ageed
Quote: عرفتَك في الوجود نسمة
تطوف بالفرحة للحبان
حروفك نور، وشيك بسمة
سماح ينداح مدى الأزمان
شعور دفاق
قلب خفّاق
ودايما بِقبل القسمة
على كل زول في كل مكان

فلك الشكر

لك أنت الشكر أيها العزيز عبد الله

على نبض إحساسك الجميل وعلى أنيق كلماتك

الرائعة مثلك..

Post: #25
Title: Re: عرفتك..
Author: Elmosley
Date: 09-20-2005, 04:47 PM
Parent: #1

What a nice poem, and poet.Wow

Post: #26
Title: Re: عرفتك..
Author: Dr. Moiz Bakhiet
Date: 09-21-2005, 00:05 AM
Parent: #25

حبيبنا الموصلي،

دائماً أنت بقلبي............

Post: #27
Title: Re: عرفتك..
Author: Saifeldin Gibreel
Date: 09-21-2005, 00:31 AM
Parent: #26

Quote: موشح بي جروف النيل
ومن زخة هواهو يشيل
نسيم العزة من معناك
ومن شفق المغيب قنديل
وفي نبض الأصيل بلقاك
صبية ندية ما بتميل


تقولى شنو وتقولى منو .... يا دكتور ما شوية علينا.......

ألا يا طبيب الجن ويحك داوني....فإن طبيب الإنس أعياه دائيا
أتيت طبيب الإنس شيخاً مداوياً....باالمنامة يعطي في الدواء الأمانيا
فقلت له ياعم حكمك فاحتكم....إذا ما كشفت اليوم ياعم مابيا
فخاض شراباً بارداً في زجاجةٍ....وطرح فيه سلوة وسقانيا
فقلت ومرضى الناس يسعون حوله....أعوذ برب الناس منك مداويا
فقال شفاء الحب أ، تلصق الحشا....بأحشاء من تهوى إذا كنت خاليا

Post: #31
Title: Re: عرفتك..
Author: Dr. Moiz Bakhiet
Date: 09-21-2005, 05:49 AM
Parent: #27

سيف الدين جبريل يا حبيب

أين انت يا صديقي؟

والله نحن في شوق عظيم لك

تسلم على الأحرف الندية

وربنا يديك الف عافية


معز

Post: #30
Title: Re: عرفتك..
Author: Elmosley
Date: 09-21-2005, 03:29 AM
Parent: #26

تسلم اخي وصديقي العزيز (بروف معز)

هنالك مفاجأة كبري لك ولجمهور السودان


بل والعالم العربي

(امسك الخشب)

Post: #33
Title: Re: عرفتك..
Author: Dr. Moiz Bakhiet
Date: 09-21-2005, 10:13 PM
Parent: #30

Elmosley
Quote: تسلم اخي وصديقي العزيز (بروف معز)

هنالك مفاجأة كبري لك ولجمهور السودان


بل والعالم العربي

(امسك الخشب)


حبيبنا

لهواك عافية المطر.................

Post: #36
Title: Re: عرفتك..
Author: Elmosley
Date: 09-22-2005, 07:35 AM
Parent: #33

اذا

Quote: لست اكتمك الخبر


Post: #28
Title: Re: عرفتك..
Author: Teeta
Date: 09-21-2005, 00:37 AM
Parent: #1

كلام جميل يا دكتورتعال خلي المعاني وداد
تعال جيب الزمن مقلوب
تعال نبدا العمر ميلاد
بس الزمن مقلوب دى ظريفه شديد يا ريت الزمن ينقلب عشان كلنا حنعمل حاجات كتااااار
ربنا يديك العافيه ام الاء

Post: #35
Title: Re: عرفتك..
Author: Dr. Moiz Bakhiet
Date: 09-22-2005, 07:12 AM
Parent: #28

تيتا العزيزة

ربنا يديك العافية يا أم آلاء

وياريت الزمان يرجع تاني من جديد..

مش كده بالله.........

Post: #29
Title: Re: عرفتك..
Author: عبد الرحمن الشبلي
Date: 09-21-2005, 01:34 AM
Parent: #1

ويفضل سؤالي عليك ملح
وانا بين ايدي شايل فرح
مستني ايديك تنفتح او بالاصح تتحننك
وتتجرتق الاطفال وصول معناك لي عمق الجرح


لك كل الحب والتقدير

Post: #38
Title: Re: عرفتك..
Author: Dr. Moiz Bakhiet
Date: 09-22-2005, 05:34 PM
Parent: #29

عبد الرحمن الشبلي

ألف شكر على كلماتك الرائعة مثلك

تسلم يا حبيب يا غالي..

Post: #32
Title: Re: عرفتك..
Author: محمد الامين محمد
Date: 09-21-2005, 12:28 PM
Parent: #1

ياسسسسسسسسسسسسسسسسسسسسسسسسسسسسسسسسسسسسسسسلام معز
تحياتي

Post: #34
Title: Re: عرفتك..
Author: waleed500
Date: 09-21-2005, 11:06 PM
Parent: #32

Quote: تعال خلي المعاني وداد
تعال جيب الزمن مقلوب
تعال نبدا العمر ميلاد
تعال خلّي المحنة دروب
تعال يا خاتم الأوراد
تعال يا وعدنا المكتوب
تعال جيب الحروف أعداد
مدد تتوضى بيهو قلوب.
مااظن فى اجمل من كده متعك الله بالصحة والعافيه

Post: #40
Title: Re: عرفتك..
Author: Dr. Moiz Bakhiet
Date: 09-24-2005, 02:44 AM
Parent: #34

الأخ الحبيب وليد500
ومتعك الله أيضاً بتمام الصحة وموفور العافية

مع محبتي وامتناني..


معز

Post: #39
Title: Re: عرفتك..
Author: Dr. Moiz Bakhiet
Date: 09-23-2005, 01:51 PM
Parent: #32

الحبيب محمد الأمين محمد

تحياتي
ومحبتي لك

وكل احترامي

Post: #37
Title: Re: عرفتك..
Author: elsawi
Date: 09-22-2005, 09:09 AM
Parent: #1

Quote:
كفاك يا صبر من أيوب
وسيب الخير علينا يتوب
عشان نتوسد الميعاد
ونطلع ليك إنت وثوب
فوق عرش السنا الوقاد
ومن سجن المسافة هروب
وما بين الشجن أعياد
صباح ما بمسا فيهو غروب
تعال خلي المعاني وداد
تعال جيب الزمن مقلوب
يا لدفء الحروف وروعة المعاني .. تشكر يا إنسان علي هذا الدفق الجميل.

الصاوي

Post: #41
Title: Re: عرفتك..
Author: Dr. Moiz Bakhiet
Date: 09-24-2005, 02:40 PM
Parent: #37

حبيبنا الصاوي

لكم تشرفت بحضورك الزاهي

وأحرفك العبقة

تسلم يا سيد الناس..

ويديك ألف عافية..

Post: #42
Title: Re: عرفتك..
Author: شمهروش
Date: 09-25-2005, 02:14 AM
Parent: #41

Quote: تعال يا خاتم الأوراد
تعال يا وعدنا المكتوب
تعال جيب الحروف أعداد
مدد تتوضى بيهو قلوب

الدكتور الغالي ...........
لك كل الشوق والحب...
عادل الشوية يقريك السلام..
ويقول لك كن انت كما انت..
وعشمه في التلاقي

Post: #43
Title: Re: عرفتك..
Author: Dr. Moiz Bakhiet
Date: 09-25-2005, 08:45 AM
Parent: #42

شمهروشنا الجميل

تسلم يا غالي

وسلام حار وخاص لعزيزنا وحبيبنا عادل الشوية..