مخ - سن خالد -- المعروف ب "محسن خالد"

مخ - سن خالد -- المعروف ب "محسن خالد"


04-17-2007, 08:29 AM


  » http://sudaneseonline.com/cgi-bin/sdb/2bb.cgi?seq=msg&board=85&msg=1201279061&rn=22


Post: #1
Title: مخ - سن خالد -- المعروف ب "محسن خالد"
Author: أبوذر بابكر
Date: 04-17-2007, 08:29 AM
Parent: #0

أوقفتنى فى سدرة المعنى وقالت
لن ترانى مثلما أراك
قليست الرؤية فى العين / الرؤية فى القاف
ولن تشهدنى مثلما اشهدك
فليست الشهادة فى النجاة
الشهادة فى التهلكة
ولن تضعنى على جرح مثلما اضعك
فليس البلسم فى التعديل
البلسم فى الجرح

الكلام لقاسم حداد

أعرف يا صاحبى
انك الآن تلتحف ذلك البرد الساكسونى الجامد
"تدافر" وتزاحم مناكب الوقت
ولا وقت لديك لمعاقرة الحبر

وأعرف انك تعرف إننا نعرف
أنك تعرف إننا نعانى هنا من شظف الكلام
من قلة "فئران" تستجدى ما تناثر حول موائد الكتابة

لكن

رجاءا لا تعد الآن
فالمكان يضج بصمته
والصمت إسم الموت الأعلى
ونحن لا نريدك أن تموت معنا

دعنا نموت نحن أولا
نخبر عنك تراب القبح، أنك أجمل العالمين
عسى أن يحجز لك مقعدا بعيدا عن حموضة الموت
قريبا من حلاوة الحياة

لا تعد الآن

قالوا من قبل

إذا كنت محبرا فسوف تدرك بجلاء أن هناك غيمة تسير فوق هذه الورقة الخالية، ومن دون الغيمة لن يهطل المطر ولن تولد الأشجار، لذلك فسوف لن نقدر أن نصنع الورق، الغيمة ضرورية لخلق الورق

لا غيم هنا الآن

بل ثقوب سوداء تبتلع مجرات الحروف

وأخيرا

سلم لى عليك

Post: #2
Title: Re: مخ - سن خالد -- المعروف ب "محسن خالد"
Author: Mohamed E. Seliaman
Date: 04-17-2007, 08:35 AM
Parent: #1

الأخ أباذر

السلام عليكم


تسجيل حضور ومتابعة

Post: #3
Title: Re: مخ - سن خالد -- المعروف ب "محسن خالد"
Author: ابو جهينة
Date: 04-17-2007, 08:42 AM
Parent: #2

أباذر

سلام بحجم الشوق للبلد

Quote: قالوا من قبل
إذا كنت محبرا فسوف تدرك بجلاء أن هناك غيمة تسير فوق هذه الورقة الخالية، ومن دون الغيمة لن يهطل المطر ولن تولد الأشجار، لذلك فسوف لن نقدر أن نصنع الورق، الغيمة ضرورية لخلق الورق
لا غيم هنا الآن
بل ثقوب سوداء تبتلع مجرات الحروف
وأخيرا
سلم لى عليك


و سلام عليه و عليك

Post: #8
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-17-2007, 09:52 AM
Parent: #3

يا سيد الجلال

أبا جهينة

سلام بحجم ومقدار محبتنا ليك

وشوقنا لذلك المحبر العظيم

محسن شبيه الغيم

Post: #7
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-17-2007, 09:50 AM
Parent: #2

أخونا
Mohamed E. Seliaman

شكرا للحضور والمتابعة

Post: #4
Title: Re: مخ - سن خالد -- المعروف ب "محسن خالد"
Author: هشام المجمر
Date: 04-17-2007, 08:47 AM
Parent: #1

نعم يا ابو ذر

نفتقد ذلك العقل الماضى ( السنين)
الفكر المتقد

والقلم الذى يضع كل حرف فى مكانه
ورغم ذلك تفاجئك الكلمات
و تمتعك بالدهشة

ويخليك تقول: مخ-سن خالد بيجيب الكلام ده من وين؟
الشى ده على عندو شيطان

Post: #13
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-17-2007, 12:26 PM
Parent: #4

كيفك يا مجمر

شوق كتير والله ليك

محسن ده زول ما بشبه أى زول

تسمعه
تقول يا ريته ما يسكت تب

تقراهو
تقول إن شاء الله الحبر ده أصله ما ينتهى

تشوفو
ملامحه تختصر ليك وجوه البشر أجمعين

الكلام كتير يا هشام

لكن الدعوات الصادقات ليهو أكتر

إنه يبقى طيب وشديد وكل يوم يزداد سماحة وضوء

شكرا ليك على انضمامك لينا فى موكب الهتاف بالشوق لى محسن

Post: #78
Title: Re: مخ - سن خالد -- المعروف ب "محسن خالد"
Author: عبد المنعم ابراهيم الحاج
Date: 05-01-2007, 02:38 AM
Parent: #4


Post: #5
Title: Re: مخ - سن خالد -- المعروف ب "محسن خالد"
Author: tariq
Date: 04-17-2007, 09:01 AM
Parent: #1

ونحنا خلانا يا ابوذر لصيف سخانته ورطوبته فوق الاربعين . . التحية ليك و لا محسن وين ما كنتو ...

Post: #14
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-17-2007, 12:29 PM
Parent: #5

إزيك يا طارق

طولنا منك ياخى

محسن زول بحب التحليق
وما برضى غير إنه يكون سابح فى السماء العاشرة

ووين ما يمشى يبراهو العافية إن شاء الله والنجاح

وصيف فراقه أحر من صيف الله والرسول ده

وليك وليهو المودة والسلام

Post: #6
Title: Re: مخ - سن خالد -- المعروف ب "محسن خالد"
Author: Ashraf el-Halabi
Date: 04-17-2007, 09:42 AM
Parent: #1

أبا ذر
سلامات
Quote: ما ضرّ الشجر لو جلس حين أحبّ
ما ضره!!

حقيقة نفتقد الأديب محسن خالد

Post: #10
Title: Re: مخ - سن خالد -- المعروف ب "محسن خالد"
Author: Ahmed Yousif Abu Harira
Date: 04-17-2007, 10:11 AM
Parent: #6

Quote: ما ضرّ الشجر لو جلس حين أحبّ




تحياتي لك أباذر وللمخ-سن خالد

وأريتو هو يبقى طيب..

Post: #21
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 05:38 AM
Parent: #10

وأطيب التحايا

ليك يا أبا حريرة

والأمنيات الخدرا السمحة

لى محسن وليك

Post: #15
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-17-2007, 02:38 PM
Parent: #6

عزيزى اشرف

فى بعض أحايين
على الشجر أن ينحنى ليجلس
قد لا يتسع المكان
أو قد يضيق رغم سعته

وفى بعض الإنحناء إنكسار

وهنا مكمن الضرر

لكن أرد معك ايضا

ما ضره؟

أحييك يا اشرف وأهديك الود عامرا

وعلى أمل اللقيا تحت ظل شجرة محسن قريبا

Post: #9
Title: Re: مخ - سن خالد -- المعروف ب "محسن خالد"
Author: esam gabralla
Date: 04-17-2007, 10:07 AM
Parent: #1

رايته للمرة الاولى منتصف الشهر الماضي... تيقنت ان لقلبه ذات عطر كتابته ... ساعود بمزيد

مطرنا

مقصر معاك ... لكن...

المحبة باقية في القلب يا صديق....

و بالجنبة تحايا لهشام المجمر و الراقي ابوجهينة

يا اشرف هل انت الحلبي بتاع رومانيا؟


Post: #11
Title: Re: مخ - سن خالد -- المعروف ب "محسن خالد"
Author: عبدالغني كرم الله بشير
Date: 04-17-2007, 10:15 AM
Parent: #9



لما ترجع بالسلامة،...
وترجع أيامنا الجميلة...
يامنى الروح، يامدامه، ياعوطفنا النبيلة..
تهدي ليلاتنا ابتسامه، من زمان بنقول حليلة....

Post: #23
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 05:46 AM
Parent: #11

عبد الغنى

الزول الغنى بالسماح

أكرمتنا ياخى بالإبتسامة الندية والطلة البهية

ولما يرجع
تضحك اللحظة وتزغرد
تنتشى الفجة وتفرهد

شكرا يا زول يا زين

Post: #22
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 05:44 AM
Parent: #9

عصام جبر الله

جبار كسر المسافة

شوق مهول والله

عليك الله شفت نوعية البشر المتجسدة فى الزول الإسمه محسن ده؟

بخيتة وسعيدة عليك الملاقا

المشكلة إنه "تلفونه بيهو ما خبور"

وقدر ما أديهو هبشه الخط يحرن معاى

المهم كان لاقيته تانى
قول ليهو

تشتاق الشمس تلمع فى أديمك

وخليك قريب عليك الله يا عصام

لأنه من تالاك بتهب نسايم الجنة
ويفوح عطر المحنة

وبرضو سلم لى عليك وعليهو

Post: #26
Title: Re: مخ - سن خالد -- المعروف ب "محسن خالد"
Author: Ashraf el-Halabi
Date: 04-18-2007, 05:52 AM
Parent: #9

عصام جبر الله
سلامات

قبل كم سنة كنت ماشي رومانيا لكن قبل السفر بأربع ساعات كنسلت الرحلة

يكون دا حلبي تاني

Post: #12
Title: Re: مخ - سن خالد -- المعروف ب "محسن خالد"
Author: بدرالدين شنا
Date: 04-17-2007, 10:18 AM
Parent: #1

صديقي ابوذر بابكر
سلامي وإحترامي وإشتياقي

تحياتي لك وللرائع "مُمتع خالد"

Post: #17
Title: Re: مخ - سن خالد -- المعروف ب "محسن خالد"
Author: شهاب الفاتح عثمان
Date: 04-17-2007, 03:29 PM
Parent: #12

Quote: ولن تضعنى على جرح مثلما اضعك
فليس البلسم فى التعديل
البلسم فى الجرح
"


يبقى الكبير كبيرا ..
و الجميل من يقدر الجمال ..

تحياتي لكما

Post: #25
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 05:50 AM
Parent: #17

شهاب الوهج المنير

كيفك يا دكتور

وايامك بهجات ومسرة

ومن جمالك يا صديقى نستلف حبة سماحة

ليك المودة والتقدير كله

Post: #24
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 05:49 AM
Parent: #12

حبيبى بدر السما والواطا

الشوق والريد
والمعزة الكتيرة ليك

محسن ده كون من المتعة

شكرا يا بدر الدين "سنا"

Post: #16
Title: Re: مخ - سن خالد -- المعروف ب "محسن خالد"
Author: صديق الموج
Date: 04-17-2007, 02:47 PM
Parent: #1

افعال مطر تمام.....المطر تكنس العويش والهردبيس
لتقيم حله سندسية زاهية مكانها....
وهاهى محاولة هنا لفعل ذات الشىء..
صيف غائظ الذى نحن الان..
فهل تجدى محاولات المطر؟؟
لكم ارفع قبعتى ..عمامتى..اى شىء،،

Post: #30
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 07:15 AM
Parent: #16

الموج الأزرق فى منبرنا

يأخذنا نحو الأعمق
والأجمل
والأزهى

كيفك يا صديق
يا زول يا أنيق

المطره بتغسل خوفنا الفينا

والله يا صديق بقينا نخاف من ضلنا
من شدة الملاوا والمدافرا والعجاج الهنا

وفى عز الهجير
يفوت مننا ناس زى محسن

حيث يسكن الندى ويرتاح العبير

نحن لينا أجر المناولة

وليك إنحناءة
قدر لفة النيل الأزرق قبل ما يقالد الأبيض

هناك جنب خد أم در
وقلب الخرطوم

تسلم يا زول يا سمح

Post: #18
Title: Re: مخ - سن خالد -- المعروف ب "محسن خالد"
Author: منوت
Date: 04-17-2007, 05:28 PM
Parent: #1

أيها المطرُ الصبيّ ،
ما سألتَ إذ سألتَ ،
و ما نصحتَ إذ نصحتَ ،
و لكنّ منوتاً هو السائل ،
و الناصح ،
و المنتظر ما يتناثر " حبراً " على ورق الصحائفِ كلّها ،
منبريها ،
و سائرها من فصيلة الأوراق !

* ألا يا ايها المجالد ،
يا بن خالد ،
غِب دهراً ،
و زر سانحةً واحدةً تطمئن المريدين !!

Post: #20
Title: Re: مخ - سن خالد -- المعروف ب "محسن خالد"
Author: Osman Musa
Date: 04-17-2007, 06:20 PM
Parent: #18


أستاذ أبوذر . فى الهجرة البعيدة نحس بالاختناق _ ندلف الى شاشات التواصل
نجد صالون أبوذر مفتوحآ على الأفق _ صالون لا تحس فيه بالاختناق _ أركان
تحفها الكتب البديعة وعلى المجلس الوسير جمع من اهل الكلام الرصين.
أين زارع النخيل محسن خالد؟
ارجو ان يكون عنترة قد وجد ( النوق)
أين الرجل المحسن الخالد؟كان يزيد اصالون سعة وضخامة ومعرفة له التحية
حتى يعود.
أبو ذر سلام يا من فأجاتنى ضاحكآ بشعرك فتعرفت عليك كاتب فوق النجم
وفوق (عين الكفيل) الله هو الكفيل . تحياتى
اخيك عثمان

Post: #33
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 08:18 AM
Parent: #20

العزيز عثمان موسى

قال

وما تلكَ بيسراكَ؟

قلتُ
هى أمنيتى
أتوكأ على سناءِ وعدها البريقْ
أهشُ بها على ندمى
أمدّ وسادةً من لحمِ الماءِ
فُوقَ ألحفةِ الحريقْ
أطلب الخلاصَ من عدمى
من وحشتى الدفينة

ما تلكَ بيسراكَ؟

هى أغنيتى
أولمتها للعابرينَ حديقةً
فليأكلوا
خبزَ المراثى نشوةً
لينشدوا
بوحَ المواتِ المرِ فينا
فوقَ أشلاء السكينة

تحياتى يا صاحبى الأنيق
وكيف الحال

أين زارع النخيل محسن خالد؟

بل هو النخيل
سامق يداعب رموش الغيم ويقص عليها بعضا من حكايتنا
بكل ما فيها من مراراة ووجع
بكل ما نتمناه من فرح وسعد

أحييك يا عثمان
وأهديك مودة لا تنتهى

Post: #31
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 07:26 AM
Parent: #18

منوت

يا مغيث الخائفين
من رهق الدروب المجدبة

تسألنا وأنت الإجابة
وتمد كفك الأخضر
موسما يكتنز بالخصب وندى المعانى العريضة

نحن الذين ننتظر مدرار الحرف من لدنك
سخيا وكريما مثل محنة الأمهات
طريا مثل أمنيات العاشقين

ومن أمثال ذلك المحسن النضر
تبزغ شمس المعنى

فلا عتمة وهو حضور
والعمى ينصب سرادق موت البصيرة

وهو غياب

ولكن أكثر الناس لا يفقهون
لا يتذوقون
ولا يعشقون

أحييك يا منوت
يا صحو الحرف فينا

وأهديك المحبة

Post: #19
Title: Re: مخ - سن خالد -- المعروف ب "محسن خالد"
Author: haider osman
Date: 04-17-2007, 06:01 PM
Parent: #1

Quote: أيها المطرُ الصبيّ ،
ما سألتَ إذ سألتَ ،
و ما نصحتَ إذ نصحتَ ،
و لكنّ منوتاً هو السائل ،
و الناصح ،
و المنتظر ما يتناثر " حبراً " على ورق الصحائفِ كلّها ،
منبريها ،
و سائرها من فصيلة الأوراق !

* ألا يا ايها المجالد ،
يا بن خالد ،
غِب دهراً ،
و زر سانحةً واحدةً تطمئن المريدين !!


منوت مرفوع القوة 100

Post: #34
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 08:19 AM
Parent: #19

العزيز حيدر

تحياتى وكل طيب وعطر الأمنيات

وحيدر مرفوع القوة 1000

أو يزيد

Post: #27
Title: Re: مخ - سن خالد -- المعروف ب "محسن خالد"
Author: مجاهد عبدالله
Date: 04-18-2007, 05:52 AM
Parent: #1

Quote: (نحن نحب جهات الحب يا منوت)

محسن خالد

الأخ ابوذر

الزول ده محل ما تلاقوا أشكوا ليهوا انو العقول إتيتمت من غياب حرفك الحي..

وقولوا ليهو نحن بنحب جهات الحب يا محسن وكتابتك هي البتحدد لينا إتجاه الريح.

محسن أنا مشتاقون..

كتابـــات تدخّل الزول في أحــوال (محسن انّا مشتاقون).

خالص الود...

Post: #35
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 08:23 AM
Parent: #27

تحياتى يا مجاهد

سعد المكان وانتشت مفاصل الزمان
بحضورك المورق
وها أنت تنضم غلينا
لجوقة منشدى نداءات الهطول

ويا مطيره صبى لينا

وليت ذلك الإنسان الغيمة
يجود علينا بزخات الحروف التى تسمن ووتغنى وتروى
من كل جوع وظمأ

وجميعنا نولى الأرواح شطر جهات الحب

لنحيا

آلاف الشكر وعميم التقدير لك يا حيدر

Post: #28
Title: Re: مخ - سن خالد -- المعروف ب "محسن خالد"
Author: Ashraf el-Halabi
Date: 04-18-2007, 06:10 AM
Parent: #1

Quote: لا زلت أذكر انعكاس الشخص الدراوي والحزين، أنا، في عينيها البنيّتين، لا أدري كيف طلّقتها، كانت بنيّة رائعة لي، فعمرها لم يعتّب الـ19 بعد، ولم تكن تتحدّث عن الناس بسوء أبداً،.. هيّا، أنا ذنوبي كثيرة يا ربي، ومَلَكا التدوين خاصتي، أسلما يديهما لتُوضعا على رأسيهما تمحّناً، وسقط قلماهما منذ زمن بعيد، ليخلو الجو لقلمي وحده،..
أنا رجل خرجت في الكتابة، فالله وأهلي ومعارفي ومن تتزوجني، عليهم أن يعرفوا ذلك،.. فلا فائدة مني إلا بصدد كتاب.
تيموليلت: سيرة وحجر.

Post: #29
Title: Re: مخ - سن خالد -- المعروف ب "محسن خالد"
Author: على احمد النعيم
Date: 04-18-2007, 06:21 AM
Parent: #28

Quote: سلم لى عليك


لك التحيه اخ ابو ذر لاماطتك اللثام عن هذه القامة ، رغم انه "علم فى راسه نار"
سلامى كيمان كيمان للكاتب الفذ محسن خالد الذى انار بكتاباته فضاءات هذا المنتدى الرائع ولك انت، وعشمى ان تبقوا اخوتى منارات لكى نقتبس نحن من نورها، وفى انتظار إبداعات الاخ محسن.

دمتم

Post: #32
Title: Re: مخ - سن خالد -- المعروف ب "محسن خالد"
Author: Mohamed E. Seliaman
Date: 04-18-2007, 07:38 AM
Parent: #29

تحياتي مجددا لك يا أبا ذر ولكل أصحاب القار
Quote:
دعنا نموت نحن أولا
نخبر عنك تراب القبح، أنك أجمل العالمين
عسى أن يحجز لك مقعدا بعيدا عن حموضة الموت
قريبا من حلاوة الحياة

هذا المقطع ذكرني
بمقطع للأديب محسن خالد عن الموت يقول فيه :
Quote: إنتو يا ناس عورا؟ تقولوا في جمل ممضوغة من بداية الكون ومتوفية، هي المعركة دي يا وليد فيها الموت، كونو يقولك ود الشرموطة وتقوليهو ود الشرموطة يعني شنو؟ المعركة دي فيها السونكي بركب في الرقبة وبمر بالفقر دي واحدة بعد التانية كع كع كع، (شفتها شهقة الكائن لما الآلة الحادة تشطفو من رئتينو وكلاويهو، وتبقه عيونو حاحظة ومدقوقة في السماء، أها في اللحظة دي هو بقوليك موت يا ود الشرموطة، وإنت بتوقل ليهو ما دوامة يا ود الفعلتها والفعلتها، وبتبقى كلها لغة تافهة وبدون معنى في مواجهة الموت، الموت العريييييض، اللهو جابتو المعركة)

وزيادة كمان :
Quote: وأنا زي عمرو بن هند: (مُضَرِّط الحجارة)، وبعد دا مافي فضل، أي واحد بجيني متقنطر أشوتو والله لامن أقلع كراعي في إسته، ..

وفي مقطع أدبي آخر يقول :
Quote: أقول ليك حاجة؟ لمدى 16 سنة تعلمت فيها الأمة السودانية كل تعاليم النفاق واللأ أخلاق الممكنة،..أيوة صاح السوداني خجول، وما بقول "شنبورة" مثلاً، لكن في الضلمة بستخدمها عملي،..
الجبهة الإسلامية لمدى 16 قامت باختصار الأخلاق في المفردات، أما الأخلاق نفسها، الله الله ياما وزراء ووزراء، الواحد يقبضوهوا بالثابتة، و(عينو ما بترمش، حليلو، وشعرة جلدو ما بتكش، حليلو) أو كما قالت الغناية،..
خجول= قناع،...
شنبورة= عضو بدني، يجب ذكره بوضوح كي لا يلتبس أمره بأعضاء أخرى،..

يعني أنا لو قلتلك فوق يا الطالب، أي كلمة غير"ذب" ببقه كلامي ني، ومش واضح، والزول البقراهو داك ما بصل لي (خبثك في عبارتك الفوق)


____________
وطبعا المقاطع دي منقولة من مكتبات
الأدباء في المنبر ده .....
ويبقى الحكم في القضية كما كتبت يا أبا ذر :
Quote: ومجتمعنا على سبيل المثال، وهو هنا يلعب دور المتلقى المباشر، مع أى مجتمع آخر يمكن أن تصله كتابة "محسن خالد" ايضا، و يتلقى الصدمة اللغوية على وجهه دون ساتر يحميه، فقد تم نزع ذلك الساتر بشكل عفوى تلقائى فى أغلب الأحيان، وبشكل متعمد فى أحيان قليلة، وفى الحالتين كانت وسائل النزع لا تخرج عن، السائد من عرف وتقليد، دين ومعتقد، تراث، وقناعة أو فهم فردى شخصى

وسأعود للحوار حول الفرق بين القراءة والتلقي
نشكر لك فتح هذا الباب

Post: #37
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 01:22 PM
Parent: #32

التحية ليك يا
Mohamed E. Seliaman

وشكرا على المساهمة معانا فى الإحتفاء بمحسن
وإجترار بعض من ضوء حروفه

Post: #36
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 12:50 PM
Parent: #29

عزيزى على النعيم

تحياتى وأجمل المنى
Quote: "علم فى راسه نار"


هو نار تستهدى بها البصائر وسط عتمة السطحية
وهو نور منبلج لترى العقول
قبل العيون ما لطخ جنباتها من ظلام
لتشق دربها صوب آفاق أرحب وأجمل

أدامك الخالق نعيما مقيما لا ينتهى
وزادك عافية وسعادة

وحتما سوف يشرق محسن ذات فرح

Post: #38
Title: Re: مخ - سن خالد -- المعروف ب "محسن خالد"
Author: Elmosley
Date: 04-18-2007, 01:29 PM
Parent: #1

مطر العشم
=============
محسن خلد
(كان يبقي قي المستقبل احسن)
لكن عشمنا فيه مازال
تسلم

Post: #39
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-18-2007, 03:07 PM
Parent: #38

حبيبنا الموصلى

عشمنا فيهو الما انقطع

محسن "مدروش" الأيام دى فى فجج الواطا الواسعة

وأكيد

سعيدة الأرض الشايلاهو

شكرا يا زول يا فنان

Post: #40
Title: Re: مخ - سن خالد -- المعروف ب "محسن خالد"
Author: عبد المنعم ابراهيم الحاج
Date: 04-18-2007, 08:25 PM
Parent: #39


"تيموليلت" كشخصية تمثل اقصي حالة للعقم العربي كخطاب معاصر كما وضحه محمد عابد الجابري في مجموعته "نقد العقل العربي" وهو تصوير دقيق من الكاتب لحالة الخزي والاحباط وعدم اتخاذ الوضع المناسب لاستنسال الافكار ، أو الخروج من مأزق الاجترار الدائري للتاريخ الذي لا يمثل سوى ارضية لبنية العقل التناسلي ..منذ الفتوحات العربية الاسلامية الاولي حتي هذه اللحظة لم تتجاوز الثقافة العربية شروط هذه البنية ، فتوحات ،سبايا، مجون. "تيموليلت" تمارس وضعا فوق العادة بسحاقها "المثلي" كنتيجة طبيعية او كانما يريد الكاتب محسن خالد ان يصور لنا ان هذه الثقافة العربية وصلت آخر
مراحلها من العقم ولكنها تصر علي "سحاق" بعضها البعض لغرض الاستهلاك .



اعتمد الكاتب محسن خالد في هذه الرواية تكتيكا رائعا في مقاربة اللغة وروحها العامية وزاوج في سردية متماسكة بين ايقاعها المتداول في بيئة الحدث وبين موروثه اللغوي السوداني الذي نهض في الذاكرة وهو يقارب الظاهرة بعد استغرابه لها حين سأل صديقه بوحردة " سحاقية؟"..ولكن رويدا رويدا تكشفت الحقيقة وشحنت مخياله بحالات مشابهه في محيط بيئته ، مع توضيح فوارق التعاطي مع بيئة الحدث."أُريد أن أعرف عن هذا العالم، فالموضوع مغيّم في رأسي منذ زمن بعيد، حين كنت في 3 متوسط، وذهبت لقرية بعيدة من ريف سنار لزيارة أختي، التي كان زوجها يعمل مفتشاً زراعياً بتلك المناطق" بمقارنة الظاهرة وفحصها نجدها تتحرك في بيئة الحدث بصورتها المقننة، وسقف حماية اجتماعية تسير فيه
بحرية مع ظواهر أخرى تعي وضعيتها وموقفها من اخلاقيات تلك البيئة والتي تبان من خلال
رد بوحردة"را السيد المزيان ما يهتم بالقحاب واللي بحال هدي الشيطان. را هدي السيدة تحوي البنات، والله ما تطال منها شيء آلسي خالد" تحوي كمفردة تكشف دلالات
الفعل من واقع نشاط الكلمة ومحيط استخداماتها ، حوى الشئ - احاطه - وسبغ عليه معرفة وادراك ،باستخدامها هنا كاشارة الي حالة يفعلها كل بدوي لناقته حين يريد ان يستحلب منها لبنا تحسبا لثائرتها ،وضع المفردة هنا يكثّف حالة "المثليات" وشروط العلاقة الشبيهه في مجتمعات اخرى"ليسبيان" التي تصل الي مرحلة الزواج بتقسيم الادوار زوج-زوجة،تداعي الظاهرة من ذلك الزمن السحيق في بيئة الكاتب يوضح تباين في المسلك مابين التقنين هناك والعفوية في البيئة الريفية في ثقافتنا السودانية من خلال نموذج الفتاتين التي اصطدم بهما الراوي- وللتوضيح هنالك فرق بين الراوي "سي خالد" وبين الكاتب محسن خالد حتي لا
نخلط بينهما ولا شئ يجمع بينهما غير تلك العلاقة بين الكاتب وبطله.اختلاف الظاهرة في محيطها السوداني لا تاخذ وضعا مقننا يكرس لفكرة "السحاقيات" بمعناه المعرفي وقد
اشار اليه الكاتب من خلال رد الفتاة وهي تقاوم حياءها" انتفضت الفتاتان كلمح البرق، إحداهما تفتش سفنجتها، الثانية تريد خداعي وشغلي: شفتَ طرحة البت دي، تزيل اللعاب عن فمها، تواصل تلاعبها:
قصدي هنا في (كركية)، ونحن جينا ماشين،.." الكركية تعني تلك الحفرة التي يخلفها الجفاف كشقوق فوق سطح الارض. وظفها الكاتب هنا ليوضح الظاهرة ويكشف عن مدي رسوخها
فكانت مجرد سقطة عابرة مقيدة بشرط عفوي نابع من المرحلة كمراهقة ..وطبيعة ممارستها في خفاء لا تؤسس الي فكرة "الليسبيان" بمفهومها المعرفي. الاشارة الي تجدد الظاهرة في الذاكرة بنصف وعي حينما تطرق لها في حالة "جامعة الجزيرة" وهي اشارة الي امكانية تحقيق الشرط المعرفي لتقنين الظاهرة ومن هنا يأتي التنبيه لقيمة الرواية لاختبار وضع المجتمع وجها لوجه امام ظواهر تتخلق في السرد وفي نفس الوقت تسعي لمشروعيتها .

Post: #41
Title: Re: مخ - سن خالد -- المعروف ب "محسن خالد"
Author: Emad Abdulla
Date: 04-19-2007, 00:34 AM
Parent: #40


يا مطر ..

الله يمسيك بالخير ..

داير ترجع الزول تاني مالك ؟؟
الزول فايتنا كتير , صاحبك بيشبح .. خطواتو بعيدة و مشاي , عينو فوق و القلب جناح حدادي مدادي .
محظوظ المنعول ..
( لو كان لي جناحٌ كنتُ أطير معك ) .
يا جداد الوادي يا نحنا , لا قادرين نطير , و لانا كمان كريعاتنا بالحيل .. مخير الله علينا .
( فلما مروي دخلها الطاعون , تمرغ الناس في طمي النهر , قالوا يشفي , ما شفاهم , و انتبذ كهنتها مكانا عصيا , قالوا : قد توعدتكم الآلهة بالطاعون و البرص , يا قوم قد صدقت النبؤة و ما نحن بآبهون ) .
دحين يا مطر ياخوي , الطاعون الطاعون ..
الحصار و المصيدة و السجم و الخبوب ..
خلي صاحبك غادي , يمكن الله راضي عليهو مرقو بدري .

يمسيك بالخير يا مطر .
و يطراك بالخير يا محسن .


Post: #47
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-21-2007, 05:52 AM
Parent: #41

عماد

عمدة "الحبارين"
وصمد الناس المتأبطة القلم

صباحك والشمس
فضة الناس الخُدُر
ومساءك والقمر
زينة يا دهب الفناجر
يا بدر

Quote: داير ترجع الزول تاني مالك ؟؟


تعرف
بى تحت تحت
دايرو يرجع

لكين برضو ما دايرو يجى هسه

ما سمعتنى قلت ليهو شنو

Quote: رجاءا لا تعد الآن
فالمكان يضج بصمته
والصمت إسم الموت الأعلى
ونحن لا نريدك أن تموت معنا

دعنا نموت نحن أولا
نخبر عنك تراب القبح، أنك أجمل العالمين
عسى أن يحجز لك مقعدا بعيدا عن حموضة الموت
قريبا من حلاوة الحياة

لا تعد الآن


الفجة بقت ما خايله مع قدلة حروفه
والبكانات كلها مستفه بالخبوب والطين

الزول ده مأواه الجروف بس

وكلامك صح
الله رضيان عليهو
لكين ساعة يجى، نحن بنرضى من روحنا

كدى أول تبادى هو اليجى

ياهو نديدك

وإنت وهو "سجمينا واتلاقينا"

سمحين وطيبين وتريانين وقربكن مرسفه بى موية كوثر النضم السمين الثمين

يا زول بنتفاهم مافى مشكلة

وأرقد سعادة وعافية

Post: #42
Title: Re: مخ - سن خالد -- المعروف ب "محسن خالد"
Author: Ashraf el-Halabi
Date: 04-19-2007, 07:21 AM
Parent: #1

Quote: أنا ما أنقصتموه لتكتمل حياتكم
ما ألقيتموه رشوةً للبحر
ليكون لكم سفين
أنا الهالك وحدي، خالعاً عمري،
لتلبسوا أعماركم،
يا ناجين بي،..


رواية المراسيم، عشق إدريس للضابطة اليونانية

Post: #43
Title: Re: مخ - سن خالد -- المعروف ب "محسن خالد"
Author: Ahmed Yousif Abu Harira
Date: 04-20-2007, 04:46 PM
Parent: #42

الزول فايتنا كتير , صاحبك بيشبح .. خطواتو بعيدة و مشاي , عينو فوق و القلب جناح حدادي مدادي .
.
.
.
.
.
.
.
محظوظ المنعول ..

(عماد عبد الله)

Post: #44
Title: Re: مخ - سن خالد -- المعروف ب "محسن خالد"
Author: محسن خالد
Date: 04-20-2007, 08:51 PM
Parent: #43

وإيه كنّا غير جفير الصحاب؟
ولامن خنجر الشوق المدقوق في القلب للعود، عودو يخضِّر




--------------------------
يا أبا ذر، والصحاب أجمعين،
شكررررررررررا، وإن حيين نعود

Post: #51
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-21-2007, 01:02 PM
Parent: #44

جيت آ المبروك

كم نظرنا هلال
ما شاقنا غير هلالك
وما اظنه زلال
يروينا غير زلالك

وتتقاصر الأمثال
عن حسنك عن إكمالك

وما اظنه زلال
يروينا غير زلالك

إكراما لعين شمس جيتك يا محسن
غيرنا وبشتنا ليك كلام ابوصلاح
وال "كاف" ذاتها تلقاها هسه طربت وانتشت
وهى بتناغم فيك
جدعت "ها" الغائب بعيد، ومسكت فى طرف نورك

عودك خدر
بعد ما طال
ديداب الشوق الودر
مطرك نقع
برقك جرجر
فتح عينة الفرحه
وخبر
ووردك فقع

تتبارك ايامك يا محسن، وخلينا النضاير ليك فرقات الفجه هنا
نمسح ليك من وشها الغبار ونكسيها بى ديباج الضو

وساعة تجى

تلقى قدامك مقعد الروح الموهط

ومستنين عِيناتك البطرانه

Post: #49
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-21-2007, 05:59 AM
Parent: #43

يا ود اب حريرة

نحن يانا المحظوظين

بالزول العينو فوق هامة السما
والدم الجوه قلبه
لما خدرة الواطا دى كلها
وقعد يقسم فيها للبلود

ودى خطواتك يا محسن
ولا البراق داك؟

كتر خيراتك يا ابا حريرة

وايامك طيبة دائما

Post: #48
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-21-2007, 05:55 AM
Parent: #42

اشرف

كراعك خدرا

وإيدك هزت غصن الكلام الرطيب

Quote: يا ناجين بي،..


الغياب تهلكة
والحضور مشوب بالضجر

والنجاة تتأرجح بين صوت الحس الصديق
وسكات المعنى الما فيهو معنى

تتبارك يا حلبى

وتطيب ايامك إن شاء الله

Post: #45
Title: Re: مخ - سن خالد -- المعروف ب "محسن خالد"
Author: منوت
Date: 04-20-2007, 09:11 PM
Parent: #1

يا بن خالد ،
يا مُجالد ،


خلاص كفاك !
أمرق للقراطيس و الحبر الجد جد !!

ودعناك الحي المغيث ،
و ابقى عشره على الكتابة " الجد جد " ..

طمنتنا ،
الله يطمن الباقين !!!

Post: #52
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-21-2007, 03:09 PM
Parent: #45

منوت

يا ايها المتلفع بخضرة الدم القديم

على وجه الشمس
غرسنا عرش الحلم الأول
عالية عالية
كانت الممالك

على دفء الهمس
أزهر طعم الصمت
هتافا
أناخ الحزن
رواحله وترجل
خضراء خضراء
أضحت المسالك

على ترنيم الأمس
غنانا القمر وهلل
تزين ليل الوجع الحالك

فى جب خطيئتنا الرجس
إنفتح الحلم تأول
أن، سبع ضحكات وضيئة
تطفئ سبع آهات عجاف
ونجتاز المهالك


سبع كلمات ندية
سبع أغنيات بهية
ووجه محسن

وسوف نجتاز المهالك

حتما نجتازها يا منوت

Post: #46
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-21-2007, 05:41 AM
Parent: #1

يا منعم

كيف الأحوال

Quote: اعتمد الكاتب محسن خالد في هذه الرواية تكتيكا رائعا في مقاربة اللغة وروحها العامية وزاوج في سردية متماسكة بين ايقاعها المتداول في بيئة الحدث وبين موروثه اللغوي السوداني


روح اللغة، لحم المعنى

الدم القريب والعظم المتين

تلك هى "تكاتيك" هذا المحسن الخلاب

والغوص فى أعماق الحبر لديه
يحتاج حتما إلى كل أنفاس "خلق الله أجمعين"

والظَفَر حتمى ويقين
بكل مباهج القراءة وفيوض متحها السخى

لك الشكر المبين
وله الحب المتين

Post: #50
Title: Re: مخ - سن خالد -- المعروف ب "محسن خالد"
Author: الجيلى أحمد
Date: 04-21-2007, 08:33 AM
Parent: #1

ليك المحبه يامطر

الزول السمح محسن يبدو أنه متوعك قليلآ..


وعلى قولك

"أبلغه عنا المحبه
بعد ماتغرف منها كفايتك"

Post: #53
Title: Re: مخ - سن خالد -- المعروف ب "محسن خالد"
Author: Siddig A. Omer
Date: 04-21-2007, 07:49 PM
Parent: #50

انا زول قرائ........ وبس.....

محسن مجنون... والله ما بقدر على جنو...و ربنا ازيدو جن فوق جنو....

صديق - الدوحة

Post: #55
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-22-2007, 06:41 AM
Parent: #53

كيف الحال يا صديق الصديق

تعرف

تانى حقو الزول "يشرك" ليك بى محسن
عشان نشوفك

ومحسن أب طعماً حلو
دائما بجيب الناس الحلوين

Post: #54
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-22-2007, 06:39 AM
Parent: #50

جيلى القوم

المودة وكل اهلها ليك

محسن تب ما دايرنه يجينا هسه

الدار خلا
وهو
ما هو الرفيق الفسل

على راحته
خلينا ال "نقُش" ليهو المحل
ونفرش ليهو رمل النداوة والسماح

والمحبة واصله

Post: #56
Title: Re: مخ - سن خالد -- المعروف ب "محسن خالد"
Author: السوباوي
Date: 04-22-2007, 07:57 AM
Parent: #1

المطر .. ينادي محسن خالد ..

ومحسن خالد يستجيب للمطر والجميع ...

هذا جمال مطلق لا قبل لنا به ...

أنه بوست للسمو والتقرفص على ناصية الجمال

لأغازل كل شاردة وواردة من نضمكم الطاعم ...

مرحق ودي والشوق أقصى ما تراه عيون ..

Post: #58
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-22-2007, 12:25 PM
Parent: #56

السوباوى

كيف حالك يا زين

فى أحايين كثيرة

يكون "الشيخ" قابعا فى علياء ذكره
يتمتم أوراده، أو يتمم ورده
منشغلا بها، به عن "الحيران"

يشعل "الفقرا" "تقابة" ونار شرافة الحبر المبين
وهو غائب

تضاء الدواخل، وتشتعل الأرجاء
وهو غائب

ثم
وبعد حين
بعد أن يستقر المداد على ألواح الأرواح

يطل عليهم
فتشرق الشمس ليلا

هو ذا حالنا يا سوباوى
وهو ذاك محسن

شيخنا البهى

وأنت

ميف حالك ايضا يا صاحبى السامى

أما زلت متأبطا "بخلك" المعهود
تمارس "فسالة" الطيبين
وتمنح الناس طيبهم؟

عليك المودة ولك الشوق الهطول

Post: #57
Title: Re: مخ - سن خالد -- المعروف ب "محسن خالد"
Author: Ishraga Haimoura
Date: 04-22-2007, 08:32 AM
Parent: #1

العزيز أبو ذر
شكرا يا صديقي وأنت -كالعهد بك- تنقب في مواطن الجمال
وتغوص في الأعماق بحثا عن الدرر والجمال

محسن خالد ذلك الرجل الذي يكتب بنصل شديد الحدة ويعمل مبضع المعرفة والحضور الكمال ... فيتحفنا بالحرف الأنيق

كنت في زيارة للإمارات وكنت أمني النفس بلقاءك محسن خالد ولم أعلم أنك
Quote: الآن تلتحف ذلك البرد الساكسونى الجامد

Post: #59
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-22-2007, 01:28 PM
Parent: #57

إشراقة العزيزة

بركة الشفناك طيبة

ومؤكد
زاد الإشراق حيث ذهبتِ
وكثر وهج النهار فى "الخرتوم"
وأنتِ تعودين إليها

ليتكِ يا إشراقة نعمتى بلقيا ذلك الإنسان الفريد
كانت ستحسدك اللحظات وتستعمرك الغبطة حتما

أمنياتى المقيمة والدائمة

لكِ وله

بكل سعادة الدنيا
وعافية الأيام

وهميم الود لكِ

Post: #60
Title: Re: مخ - سن خالد -- المعروف ب "محسن خالد"
Author: haider osman
Date: 04-22-2007, 01:37 PM
Parent: #1

حمدلله على سلامة الظهور...

زيد وزيد فى البخور....

ما يسحروا الود المسحور..

Post: #61
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-22-2007, 03:02 PM
Parent: #60

مسحور ساى نان هو يا حيدر

الزول مسقابالسحر والنور
وما بخليلو حرفا بور

محجوب بالحصن الحصين

متشكرين يا حيدر
على إيقاد صندل الإبتهاج

Post: #62
Title: Re: مخ - سن خالد -- المعروف ب "محسن خالد"
Author: Ashraf el-Halabi
Date: 04-24-2007, 05:57 AM
Parent: #1

Quote: الإنسان في المكان أعمى عنه، الإنسان مع الإنسان وبينهما سوء التفاهم،..
المحبّة قاطرة البلاد كلها، الصلات كلها،..

Post: #63
Title: Re: مخ - سن خالد -- المعروف ب "محسن خالد"
Author: Ashraf el-Halabi
Date: 04-26-2007, 00:02 AM
Parent: #1

Quote: اليوم روحي واثبة، وقلبي ناره نار،..
في مُضاء لحظة كهذه، أكون الله مُفْرَّغاً في قناني الإنسان، أكون ما أشاء، مالك يومي وأبدي وغدي، وكاتب هَسَاهس الداخل،..

كأعلاه من بوست "تيموليلت: سيرة وحجر.

Post: #64
Title: Re: مخ - سن خالد -- المعروف ب "محسن خالد"
Author: سمية الحسن طلحة
Date: 04-26-2007, 05:19 AM
Parent: #63

نقرأكم
من كتاباتكم نقتات
نسد الرمق
نرد الذماء
نروى الغليل
فهى متنفس
وبها نحيا

لك الشكر ولمن لبى النداء
و
لكم أطيب التحايا

Post: #65
Title: Re: مخ - سن خالد -- المعروف ب "محسن خالد"
Author: عواطف ادريس اسماعيل
Date: 04-26-2007, 05:31 AM
Parent: #64

أخونا العزيز أبوذر !!!

محبتي ,,,

محسن خالد زميل عزيز عطر سماء أبوظبي بأريج إبداعاته حينا من الدهر ,,, نفتقده بشدة كما تفتقده

دار المتنبي للطباعة والنشر,,, لك ولمحسن عاطر التحايا ,,,

Post: #81
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 05-02-2007, 09:02 AM
Parent: #65

العزيزة عواطف

عوافى وسلام ملون ومعطر

محسن وين ما يقبل بكب أريجه وعبقه

زول باهى وعديل

وإنتى برضو والله يا عواطف

نفس المعنى النبيل السمح

وليك التقدير وهميم الود دائما

Post: #80
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 05-02-2007, 08:59 AM
Parent: #64

سمية الحسن

وبى حُسن حضورك السامى

تتجدد موية اللقيا
وتخرج الأرض أزهارها

إنتى الكتابتك قوت

وزى ما بقول شيخنا القدال
تغشاهو ريدة المولى

مخلاية الزاد
بتعشى الوين
مداح الزين
ضيفا درويش
بتعشى الديش

والتحايا كلها ليك

Post: #66
Title: Re: مخ - سن خالد -- المعروف ب "محسن خالد"
Author: معتصم دفع الله
Date: 04-26-2007, 08:01 AM
Parent: #1

يا مطر بقيت شديييد ؟



محســـن خالد ..
أنا برضو ..
سلم لى عليك ..

Post: #67
Title: Re: مخ - سن خالد -- المعروف ب "محسن خالد"
Author: محسن خالد
Date: 04-26-2007, 01:40 PM
Parent: #66

أبو جهينة،..
يا أبا جهينة لك المحبّات بركاوي وقنديل وتمود، وبكلّ أضراب النخيل
كتابك الجديد الطلع دا ما تدونا فيهو سحبة؟

هشام المجمّر،..
ويخليك تقول: مخ-سن خالد بيجيب الكلام ده من وين؟
الشى ده على عندو شيطان
كيفك يا هشام وأبو ظبي؟
يا زول شيطان شنو؟ الدنيا الباردة دي الحكاية فيها جوز جوز
وأخوك عندو fairy friend

Tariq،..
هو إنت الصيف يلم فيك بوين مع "الشاطئ"؟
آل صيف آل مع آل نهيان آل

Post: #68
Title: Re: مخ - سن خالد -- المعروف ب "محسن خالد"
Author: محسن خالد
Date: 04-26-2007, 01:46 PM
Parent: #67

Ashraf el-Halabi،..
ياخي إنت عَزَّال في الكتابة
إلا في واحدات كدا "وعيرات" بلكنة المغاربة
لامن تقع في واحدة منهن، ودخالد بآمنوا

Ahmed Yousif Abu Harira،..
أبو حميد ماك طيب، وأريتك بخير يا صديقنا في الله و(الغار)
لاهسع ما بلغني منك شيء،
أقوم أتكامل ود شنتير يعني
كن بخير

esam gabralla،..
ويينك يا فردة، مشتاقين
أنزل ليك الصور، وألا تقول الروب؟
جادي أنا، لو ما جيت قلت الروب: لا تلومنّ إلا تلك البهجة
تيك كير




-----
الكمبيوتر جنَّ، معليش

Post: #69
Title: Re: مخ - سن خالد -- المعروف ب "محسن خالد"
Author: محسن خالد
Date: 04-26-2007, 03:16 PM
Parent: #68

عبد الغني كرم الله،
وينك؟ بتكتب في شنو الأيامات دي؟
كن بخير يا فنّان

بد الدين شنا
يا زول يا جميل كيفنك
وأريتك بأمان
الصورة دي من مسرحية "المهرج"!
وألا قبل كدا؟ وألا أنا ضهبان مرّة واحدة

شهاب الفاتح
إزيك يا دكتور وأريتك بخير
مشكور على المحبّة
ولك الود

Post: #70
Title: Re: مخ - سن خالد -- المعروف ب "محسن خالد"
Author: محسن خالد
Date: 04-26-2007, 03:32 PM
Parent: #69

صديق الموج،..
ويا ريتو كان يجدي!
وينك؟ أنا منتظرك


منوت،..
أخبارك؟
يا حنين،
وأخبار الليمون؟

Osman Musa،..
يا جميل مشكوور
ويا ريت بالقلب حيلة، وبالعمر حيلة
زي ديوان أبي ذر دا أصلو ما بنفات
وطب دهراً
وكن بخير

haider osman،..
حيدر إزيك
وأريتك بخير
ومشكور على الحب البيناتنا بالنص

مجاهد عبد الله،
متااابعك بهناك
ومشكور كتير

Post: #71
Title: Re: مخ - سن خالد -- المعروف ب "محسن خالد"
Author: محسن خالد
Date: 04-26-2007, 03:47 PM
Parent: #70

علي أحمد النعيم،..
يا زول مرااحب وحبابك، غايتو الليلة اتشربكت ليك في مكاواة معاي، البحلك من محبتنا شنو؟ عشان كدا خليتك على جنب، في قولك:
Quote: لك التحيه اخ ابو ذر لاماطتك اللثام عن هذه القامة ، رغم انه "علم فى راسه نار"
طيب يا علي لو كان أعدت صياغة الجملة كلها، مش كان أحسن من ترتيقها بإضافة جملة جديدة؟ لأنك عرفت براك وبذوقك السليم وصااحي، إنو الإماطة تتم لإجلاء (ما هو تحت الغبار وخَفَاء الضلام)، فاضطريت تضيف جملة (علم في رأسه نار) لترتيق العيب. إن شئنا التخلّص من عيب أي جملة فلا حل معنا سوى إعادة صياغتها، وليس بإضافة جملة جديدة، فالذي أفهمه أنّ العيب سيظل قائماً ومنظوراً، وستبقى الجُملة منطوية عليه.
أقول ليك يا صديقي في الغار علي النعيم: (رغم أنه) دي لو خليت ليها بالك –في الكتابة الإبداعية- وأعني بخصوص النقطة أعلاه فقط، فما عندك طريقة غير تستخدمها لعزل "الإيجاب" من "السلب"، زي المقالة العسكرية: الشر يعم والخير يخص. مثال:
كان والي الخرطوم "رجلاً محتالاً كحزبه، يسرق أموال البلدية والمجلس، بل ويسرق الكهرباء من المسجد" رغم أنّه من "المصلين" فيه.
عشان تبقى الجُمّلة قوية ومؤثّرة. أها لامن تبدأ الجملة بإنو الوالي طوالي بصلي في الجامع ويقرأ قرآن فيه ووو إلخ، وبعدييين تذكر إنه سرق الكهرباء، كدا –كأنّك- بتقول: معليش ياخ ما أصل هذا الرجل الخير والبر، وسرقته حادثة مفردة ومجرّد استثناء من سلوكه الجميل، ولامن تعمل الجملة زي حقتي الفوق دي، وتبدأها بقراءة أصل الوالي ومبتناه، كدا بتوضّح إنو "أصل الكيزان كلهم" اللصوصية والسرقة والحرامية، وما الوالي إلا كبيرهم الذي علمهم السرقة، وما صلاته إلا ذريعة وغطاء كي لا يلاحظ الناس انحطاط هؤلاء الناس فيسرعون إلى الخلاص منهم.
وما قلتُه أعلاه، كلّه مسائل بتاعة حرفنة كتابة –ساااكت- مش منطق ولا قواعد لغة، كنتُ أنوي تقديم بوست "المعرب الصحفي" لأجل التشارك في ما قَدّمتُ له مطلع ذلك البوست بـ: (المعرب الصحفي في تقويم الكتابة الإبداعية ومراجعة الذهنية السودانية). إلا القلم ليه رافع.
معليش علي الشدة دي، وتأكد محبتنا ليك مشيها أطول من مشي النيل الما بنتهي.

----
وإن حيين نعود

Post: #72
Title: Re: مخ - سن خالد -- المعروف ب "محسن خالد"
Author: محسن خالد
Date: 04-28-2007, 00:25 AM
Parent: #71

الموصلي يا صديقي،
أمّا مشتاقين، شايفك في كم كاسيت شادّي حيلك ومنكرب
ومبروك، دا المطلوب من كل صانع فن
ياخي إنت ما تهديني موسيقى، ليه ما عملت لي موسيقى هدية؟
شفت قوة العين دي؟
كن بخير ولك الحب

Post: #73
Title: Re: مخ - سن خالد -- المعروف ب "محسن خالد"
Author: محسن خالد
Date: 04-28-2007, 01:04 AM
Parent: #72

عبد المنعم إبراهيم الحاج
ياخي أمتعتني، وبقيتني أتلفت من حرف للتاني
والله عجبني تخريجك لكلمة "حوى" أيما عجب، برغم المفارقة التي تخلقها هذه المفردة في اللغة المغربية الدارجة، هذه المفردة في دارجتهم غليظة وتعني "النيك" عديييل، قالها أخوك بالصدفة بينما هو خاطب لتلك البنية، فاختفت الأم فوراً وبساقي ريح، وأخدت الخطيبة ساتر تحت الطاولة، يا ربي قلت شنو أنا؟ سألت نفسي تمحناً، وأنا قلتها بفهم إني محنّك، وتقول للحبيبة أحتويك وأحافظ عليك وكدا وكيت كيت، شفت مقالب الجغرافيا كيف؟ وشفت أوهام اللغة؟ عشان كدا أخوك ماخد راحتو، اللغة دي وهم اصطلاحي وجغرافي فحسب.
المهم حبي لك وأنت زول فنّان،
ومشكور كتير

Emad Abdulla،..
عماد الفنَّان من جميعو، رسم وحروف وإنسانأريتك طيب
إنت دا الفايتنا، وحَرَّم مشتاق ليك غاية الشوق
أريتها الدوحة بخير، وصاحبي ود رملية خذوا بالكم منو، الزول دا مبروك وفيهو خير كتير
يا عماد خَلِّي بالك من الكتابة والرسم
إنت شاطر في حارتين
وسلالالالالام

الجيلي أحمد،
كيفك يا زول
مما قلت ليك فيها زرزرة شردت مني
إنت طيب؟
لو الكتابة البتعنيها هي المع ناس المشاء الخواض قريتها يمين وسمحة
وممتعة غاية المتعة، ولو غيرها بطريقتك
كن بخير

Post: #74
Title: Re: مخ - سن خالد -- المعروف ب "محسن خالد"
Author: محسن خالد
Date: 04-28-2007, 01:21 AM
Parent: #73

Siddig A. Omer،..
يااا صديق
أمَّا مشتاقين بصحيح،
وأهاا الدوحة كيف، والخور؟ والنونات الصُغار
بالجد متوحشك بزّاف وكل من معك
ياخي تلفوني في البروفايل، أبقى أعمل لي تلفون
وخلينا نتونس
لأني بالجد مشتاق ليك

السوباوي
ألف تحايا، وأهو نحن فيها
وأبو ذر رجل فنّان وفرسان
وهو أخوي في الكتابة والإنسانية
عارفني بريدو، وأنا عارف إنو بريدني
وبنريدك إنت ذاتك، يا سوباوي، وكل من يريد "الريد" لوجه الله
وكن بخير

Ishraga Haimoura،..
إشراقة، إنت وييييييينك؟
من آخر مداخلة وجهت ليك فيها كلام بإصلاح الكتابة وتاني ما شفتك
أريتك بخير
ما بتتخيلي زعلتي قدر شنو، أنا الشقي دا، فارقت أبو ظبي قبل أشوفك
دائماً صيدي ناجع
اتمنيت والله لو كنت هناك وقابلتك
كوني بخير
وما تنقطعي مني أصلك

Post: #75
Title: Re: مخ - سن خالد -- المعروف ب "محسن خالد"
Author: محسن خالد
Date: 04-28-2007, 01:35 AM
Parent: #74

سمية الحسن طلحة،..
الفنّانة، وشاعرة وعالمة الدوبيت القاصعة كمان
أنا فرحان كتير بطلّة بت شيخ العرب علينا هنا
وفرحان كمان بشعرك فوقي
لسع منتظرك ترسلي لي كلام أولاد الشلهمة،
وكمان الصديق ود أب حريرة
"بريدي بتلقوهو في البروفايل بتاعي والمكتبة، يا عرووب"
كوني بخير، وخلي الخوّة والمودة بيناتنا
متواصلة
وكوني بخير

عواطف إدريس،..
إزيييك
ياختي الصحفية الفنانة الحلوة والفنانة
ويييينك؟
أنا منتظرك هنا، قلتِ بتجينا بريطانيا شهر كم؟
خلي بالك من روحك ولامن تصلينا
كوني بخير


معتصم دفع الله،..
يا زول يا راقي إنت، كيفك؟
وأنا يمين بسلم عليك وكلي تقدير ومودة
ليك ولروحك الإنسان المحبّااات كلها
كن بخير

Post: #76
Title: Re: مخ - سن خالد -- المعروف ب "محسن خالد"
Author: عبد المنعم ابراهيم الحاج
Date: 04-28-2007, 03:40 AM
Parent: #75

Quote: عبد المنعم إبراهيم الحاج
ياخي أمتعتني، وبقيتني أتلفت من حرف للتاني
والله عجبني تخريجك لكلمة "حوى" أيما عجب، برغم المفارقة التي تخلقها هذه المفردة في اللغة المغربية الدارجة، هذه المفردة في دارجتهم غليظة وتعني "النيك" عديييل، قالها أخوك بالصدفة بينما هو خاطب لتلك البنية، فاختفت الأم فوراً وبساقي ريح، وأخدت الخطيبة ساتر تحت الطاولة، يا ربي قلت شنو أنا؟ سألت نفسي تمحناً، وأنا قلتها بفهم إني محنّك، وتقول للحبيبة أحتويك وأحافظ عليك وكدا وكيت كيت، شفت مقالب الجغرافيا كيف؟ وشفت أوهام اللغة؟ عشان كدا أخوك ماخد راحتو، اللغة دي وهم اصطلاحي وجغرافي فحسب.
المهم حبي لك وأنت زول فنّان،
ومشكور كتير




الاديب القامة محسن خالد..حمد الله بالعودة الجميلة مفردة "حوى " خلال سردك ليها في النص
اطلاقا لاتبتعد عن المعنى الذي اوردته هنا ..كنت احاول في ذلكم التخريج لايضاح الظاهرة
وعقدة النص ..حالة التكثيف للرواية ومقاربتها للواقع العربي الراهن ..بل الذهاب ابعد
في متن الدلالة ..المغرب كجغرافيا للحدث ،يقع بين ثقافتين عالميتين احداهما في صيرورتها
والاخري في سيرورة تؤثر علي تلقيح السائد.

التحليل الفاعلي في رواية " تيموليلت"


قد يقول قائل ان رواية تيموليلت هي سيرة ذاتية للكاتب محسن خالد (AUTOBIOGRAPHY) كما هو الحال عند بعضهم حين قرأ الرواية علي فضاء
سودانيز اون لاين ..وهي قراءة لا علاقة لها بقراءة الادب في اطار موضوعي، الا اذا
كنا نتعامل مع الادب علي اساس مذكرات، وهذا شأن آخر لا نستعرضه في هذه القراءة
المستعجلة لرواية "تيموليلت"، نقول مستعجلة لانها لا تعتمد علي مرجعيات بحث لتمتين
وجهة نظرنا باستثناء ما اوردناه من منهج الاستاذ الشيخ محمد الشيخ "الفاعلية" حتي
يتثنى لنا وللقراء من تقريب مساحة استشفاف آفاق جديدة، ربما فعلنا مستقبلا علي تمتينها
متي ما وجدنا برهة من الزمن الذي يمكننا من قراءة نقدية متكاملة لاعمال محسن خالد .

كان قد استهل محسن خالد كتابته بهذا المقطع "(هاهنا وعلى حَلْقات سأكتب قصة أجمل امرأة وأجمل قصة عرفتها في حياتي)

""تيموليلت: المغربية السحاقية، الفاتنة وصيّادة الفتيات
الكتاب ماعونٌ للمحو، مثلما هو ماعونٌ للكتابة،...
هاهنا، سنمحو ونكتب سيرة تيموليلت، في رهان مع محو وكتابة سيرتي، وسأكف وإيّاكم عن الخوض في حالها وحالي،...
ما ضرّ الشجر لو جلس حين أحبّ، ولكني لم أجلس،...""

وهو استهلال يزيل بعض الالتباسات الظاهرية مابين الكتابة والمحو ..حيث يقدم المحو
علي الكتابة وفي ذلك اشارة محو الواقع وكتابة سيرة موازية في فضاء التخيل والمشافهه
في تجسير واقع متحرك في مخيال البيئة العربية او بالاوضح هو اعادة صياغة للاحداث
علي نحو يتقبل اسس ابداعية الكتابة ،فمن هنا تنشا فكرة الكاتب في فضاء فاعلي متخيل
يلم بالظواهر التي تتحرك في مجتمعه ، مع حسبان تفاوت نسب رسوخها من بيئة الي اخري.
المحيط العربي والافريقي اذا حاولنا الكشف فيه عن معطيات بناه التي تستدمج برامج عطائهما
لقلنا هو تلك المساحة من التوازن بين بنيتي الوعي التناسلي والبرجوازي وهي مرحلة
(تناز) بمعني (تآزر+تنازع) أو في نفس الوقت هو ذلك المقدار الملغي من بنية الوعي التناسلي
والمكتسب من بنية الوعي البرجوازي. حيث تتبع الكاتب هذه الظاهرة من مصادرها ..والمغرب
هنا قد يكون اشارة الي الغرب كثقافة بانتخاب اقرب ارضية مطلة تلتقي عندها ثقافتين
شرقية \ وغربية، ليحرك تلك الظاهرة ومدي توغلها وكيفية التعاطي معها في حالة المنتج مرة، وفي حالة المستهلك مرة أخري ، وفي حالة (المنتهلك) بمعني منتج+مستهلك بينهما.

Post: #83
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 05-02-2007, 09:06 AM
Parent: #76

يا منعم

أنا قبال ده قتا ليك

إتا زول زى الجروف فى العصرية

وهسه بقول ليك

زى الجروف فى الصباح

Post: #82
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 05-02-2007, 09:04 AM
Parent: #66

معتصم

والله مانى شديد

علا ساى بنتحايل على الدنيا ونغش فيها

اريتا تتغش لينا

البطن طامه من أى شى

كدى ادعى لى إنت

يمكن تصدق

Post: #77
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 04-28-2007, 09:17 AM
Parent: #1

الحبان

أشرف وسمية وعواطف ومعتصم ومنعم

والزول "اللخدر" المفرهد ديمه

الأيام دى
نشفان فينى ريق الكتابة

خلونى الناخد لى جمه
واتوهط حبرى المعاند واجيكم

ولحدى الوقت داك

مأواكم الروح
مع الحلوين
وحسن اولئك صديقا

Post: #79
Title: Re: مخ - سن خالد -- المعروف ب "محسن خالد"
Author: عاصم الطيب قرشى
Date: 05-01-2007, 05:30 AM
Parent: #77

البصير أبو ذر

أسرتنى حفاوتك البالغة

فما رأيتك حينها إلا ساكبا ضوء روحك

فى سيرة هذا الفتى المسكون حسنا

فازداد ألقا على ألق.

التحية لك وأنت تحتفى به

والثناء لمحسن وهو يتحفنا


Post: #84
Title: Re: مخ - سن خالد -- المعروف ب "محسن خالد"
Author: أبوذر بابكر
Date: 05-02-2007, 09:11 AM
Parent: #79

عاصم

يا طيب زى قلب الطمى

أو

الذى يعصمنا من الغرق فى وحل الكآبة
ويأخذ بأيدينا وأرواحنا
إلى أعلى شرفات المعنى الصادق الصديق
وإلى أسمى ذرى الكتابة

يا عاصم
هدهد حروفك جاب نباك
خلانا نتحرى الفرح
نسعد معاك

وأنت منذ حين من الجمال تاسرنا يا عاصم

روحك نغم وقلبك حقل يهب سنابل الجمال المكتنزة بخيرات ليس كمثلها شئ

أحييك

وأهديك المحبة عميمة هميمة

ومثلها لمحسن

Post: #85
Title: Re: مخ - سن خالد -- المعروف ب "محسن خالد"
Author: ابو جهينة
Date: 05-02-2007, 09:16 AM
Parent: #84

عزيزي الأديب محسن خالد ( أبو خالد )

أرتال من المحبة

Quote: أبو جهينة،..
يا أبا جهينة لك المحبّات بركاوي وقنديل وتمود، وبكلّ أضراب النخيل
كتابك الجديد الطلع دا ما تدونا فيهو سحبة؟


سحبة بس؟
إنت تأمر يا أبو خالد ..

Post: #86
Title: Re: مخ - سن خالد -- المعروف ب "محسن خالد"
Author: خضر حسين خليل
Date: 05-02-2007, 09:57 AM
Parent: #85

محسن ده زول طاعم ونعناعو ظابط في الكتابة
ياسلام ياابو زر أنا سعيد جداً بعودة محسن

إدفق ياخ ادفق يامحسن


خضر