إصلاح الكتابة في المنبر

العزيز محسن صالح

دعوة شنو يا زول اللجميع، واصل يا اخينا
الشغلة ما شغلتنا بس الظروف جبرتنا
بس لاحظ انه اغلب الناس بكتبوا بالحرفنة
في المنبر دا هم اصلا ما كتاب و لا صحفيين
و ما عندهم برامج عربية و لا لوحات مفاتيح
عربية ولا امكانيات تشكيل.

استمتعت جدا و استفت من اصلاحاتك فالرجاء
ان تواصل


صادق ودي

الأكرم نصّار، تحية ماطرة تصلك غيمة بعد غيمة
طبعاً إصلاحنا للكتابة سيكون فيما نقدر عليه، إذا المشكلة من الأجهزة فلا بأس،..
قصدي إنو الشينة تب، زي إنشاء الله، على الأقل نرتقها
وليك الود والاحترام، وسنواصل في هذا الموضوع حتى نهاية الشوط، لو اتسهّلت معانا، وشكرا

الأخ / محسن

فضحتنا وكشفت المستور.

اقحمنا نفسنا على عالم ندرى أن له قواعد وترتيبات نجهلها ربما بدافع رغبتنا الجامحة لإطلاق سراح ما بين جوانحنا.

أرجو أن تواصل الكتابة و بسرعة .
كيف نتحصل على الكتاب المذكور.؟

السلام عليكم جميعا
الشكر لصاحب الكتاب
بعض التنبيهات هنا:المســـك والعنبـــر: اصـــلاح (((اصلاح الكتابة في المنبر))))
نرجو من صاحب الكتاب
أن يتولى مراجعته وتصحيحه.
شكري للجميع
الحبشي

محسن ...
مشكوور ... و الله نجمت لينا المثقفاتية
ديل جنس نجامة ... أتاري نحن من زمان
بنقرأ كتابات مكتوبة غلط و نحن ما عارفين؟؟؟

و بعدين واحد يكتب ليك :
(حيث أن الفزلكة السلحفائيةتدل
على الاستدامة التفكيكية الناشئة من
صيرورة الحداثة البنيوية ، فإن الإمور
تكون قد جاطت كعها جوطة بنت كلبية) !!!

بالذمة ده كلام يتفهم ؟؟؟
عليك الله دي ما نوعية شاذة
من الاستعلاء اللغوي ؟؟؟

لاحظ عدم وجود الهميزة في كلمة الاستعلاء !!!

الاخ محسن.
سلام.
كلامك سليم ومبسط وقواعد سهلة التطبيق ان شاء الله نقدر عليها.
بس فى ملاحظة صغيرة وهى بالنسبة لى انا بالذات بكون داير ارد على عدد كبير من الناس او ان اكتب موضوع والزمن لا يسمح لى بوضع همزة ان او همزة الأكل وهلمجرا عشان كدة الكتابة بتجى بدون ضوابط نحوية او لغوية تقليدية.
على العموم هذه المعلومات التى اوردتها ستفيدنا طثيرا فى الكتابة الرسمية .
نرجو مواصلة اللطائف
ولك الود

لطائف فعلا يامحسن
وعلى قول الحلفاوي ، في نكتة لطيفة : ورمدان (رمضان ) عملتو لينا فيهو شنو ؟
تسلم يا حبيب

شكراً استاذنا الكبير
محسن خالد
وحقو كل مرة ترسل بوست عن الأخطاء الشائعة قي مجال اللغة العربية ، وياريت تعمل كمان بوستات عن قواعد النحو علشان نتسفيد . وما نترك أمرنا للخواجة في الكمبيوتر يقترح لينا الهمزات .

هشام المجمر،..
مرحب يا هشام، شكرا يا فاضل على احتفالك الجميل بي، بعدين لاحظ (احتفالك) بدون هميزة من تحت، هاهها...
ياخي مشتاقين كتير، بعدين اللاب توب، قصتو انحلت وبي كدا لاحظت إني مطوّل منك، تلفن وألا حتى بالتخاطر ما تحرمنا مناجاتك، وخليك عايش ضد أي حاجة، وأولها ضد العيش...

محمد إبراهيم قرض،..
تحياتي ياعزيز، بعدين ما تتورط معاي، أنا ذاتي مرّات بتمسكني نوع حمتن دي، وأقعد أسوي،...
طوبولجي، وميكانيك كم، ونسبولوجي،... وهلمّ خوّافات... هاهاها
وخليك صاحي جناين بس،... ومشكوووور

المعتمد،..
إزيك يا أمير، فهمتك تمام، وأنا ذاتي بجوبكة مرات جوبيك شترتو كعبها تب، لكن ملاحظتك الدقيقة والفي الصميم هي إنو الواحد ممكن يلم الانتباهات دي للكتابة الرسمية، وحقيقي هذا هو قصدي، في البوست ننتبه لإصلاح الكتابة ما أمكن، بس بره بره ننتبه بالضرورة، وفي مقدمتي أنا قلت كدا، وراجع جرايدنا وإعلانات تلفزيونا وووو.... بتعرف قصدي وانتباهتك حول الكتابة الرسمية، وتحيااات من القلب،..

الصادق الرضي،..
شوف ما تعمل لي فيها صحبة صحبة ونحن بيناتنا كلام كتير، كترة الرتيلة في حوض البرسيم، مستني حاجات منك، ومستني تذكرني في مواضيع كتيرة طرحتها عليك، أنا كلمتك إنو الزواج، بلم للزول كرعيهو، لكن بشتت مشهادو البمشوهو بالرأس، (وما تبقه قوّال، هاهاها)،
كتير والله فاقدك ومشتاق ليك،...

محمد الواثق،..
شكرا ليك إنت علي تحريضك دا، وليك مني وعد نجيض إني دائما، وفي نفس المساحة دي أنوّه لكل شيء بستحق، وأرجو من الآخرين وفي نفس المساحة دي، التنويه لكل ما أرتكبه من أخطاء،..
والموضوع مفيد بأي حال زي ما قلت للأخ المعتمد،..
وتسلم دائماً يا سيدنا،...

اعتذار من الاخ محسن خالد الى الاخوان والاخوات المتداخلين في هذا البوست


يعتذر الأخ محسن خالد بشدة عن عدم تمكنه _ او تأخره _ من الرد عليكم لظروف صحية ، حيث دخل مستشفى المفرق صباح اليوم لاجراء عملية جراحية خفيفة ( مساء اليوم) , وسوف يواصل الكتابة بعد انتهاء العملية وفترة التقاهة .

============

امنياتنا للأخ محسن محسن بعاجل الشفاء

والف الف سلامة ليك

الأستاذ محسن خالد

تعلم فك طلاسم اللغة العربية وحفظ القرآن الكريم بثلاث قراءات قبل دخوله المدرسة الابتدائية، لذا فهو عدا كونه فأر كتب وباحث وقاص وشاعر يعد كذلك عالم في مجال اللغة
سلامتك محسن وألف عزيز كرامتك
سنظل منتظرين جديدك المبهر

up

خطوات عملية .. تحريضية .. لقتل كهنوت الكلام المكتوب

.

الأصدقاء،
سمبتيكو،....
شكراً لك عن غيبتي، وأنت رجل كنتَ كريماً معي، ومع جهدي في هذا المكان، تحياتي الغالية والوافرة،...


عاطف عبد الله،...
شكراً يا صديق ويا زول شهم، وشكراً حتى على تنوهيك بخصوص تاريخي، الذي صار للقبض علي حيث الذنبوب، هاهاهها....
وليك محبتي وعميم الود،..


ود شاموق،...
ألف مرحب بيك، ولك تحياتي،..
لقد ذهبت مع اللنك وقرأت ما كتبته أنت كاملا، وأبعاضاً مما كتبه ضيوفك،...
أنت بالطبع أحلتني إلى هناك دون أن تقول رأيك هنا، عليه فأنا سأتكلم موجزاً، لعامل مرضي، عمّا هناك،...
أولاً (إصلاح الكتابة) يتضمن هذه الملاحظات التي أنت قلتها بخصوص كتابة الأحرف إجمالاً (المنطوقة وغير المكتوبة)- في مؤلَّف الدكتور ياسر شرف، وليس التي في اسم الجلالة أو في القرآن والنصوص التي يتعامل معها المسلمون بوجه عام على كونها مقدّسة فحسب،...
مع ملاحظة: أن ما قلته هو أصلاً قائم في بعض كتابات قراءات القرآن الأخرى، يصبح الناتج كالآتي: مع القرآن لا مشكلة، لأنها أحياناً كُتبت، وأحياناً لم تكتب،..
ولكن مع مع النصوص العادية والكلمات العادية مثل كلمة (هذا) نحن ننطقها (هاذا) ونكتبها على النحو الناقص والمعروف،....
أمّا الخط الذي أجابك به الناس، فهو ما لن يتبعه محسن خالد ولن يوافق عليه، قصدي قداسة وما قداسة،... لأن الكتابة للقرآن من عمل البشر وليست شيئاً مقدّساً، ويمكنهم أن يحاجوا بأن الصوت مقدّس (ما قرأه جبريل على محمد) ويمكننا أنا وأنت أن نحتج بـ: ولكن كيف نكتب الصوت؟
ولكن أحد المشاركين في الحوار وجّه إليك تساؤلاً أنا أقررته عليه، وسأُعيد صياغته ليعبّر عني بالضبط وكما أرغب،...
يسألك عن هذه الأشياء هل هي ملاحظات خاصة بمفردات أم هي نظرية كتابة جديدة، ليتبعك أنت من رميت القديمة بالصنمية والقداسة المفترضة؟؟،... أنت ستناصر نظرتك طبعاً، وهو سينقلب ليقول لك: ائتني بنظرية كاملة إذن؟؟؟ وهي ستصبح مطالبة مستحقة له،...
أنا نفسي كتبت حول هذا الموضوع كثيراً، ولي ملاحظات جمّة، وما أبحرت في العربية إلا بمثل مفاهيمك هذه، لكي أدمّر أصنامها وما زلت أنصب شراكي، ولكن ليس ضد ما هو منطقي من اللغة،..
لذا تصبح نظرتي للغة إجمالاً با بابتسار شديد:
أنا مع ماهو منطقي، ولست مع ما هو موروث،...
أوافق الاصطلاح بشكل قوي، لأنّ الاصطلاح هو نفسه لغة،.. أو إلى ماذا سأقود الناس أنا؟ إلى أن يتفاهموا أم لا يتفاهموا؟؟؟
ويا أخي العزيز أسعدتني بحق، بإثارتك لهذه السيرة،.. وأنا معك مع (إصلاح اللغة)،...
ولولا المرض لكتبت لك الليل بطوله، دون أن أزعل من إحالتك الصامتة لي، وحرمانك لي حتّى من التحية، هاههاها
بأي حال شكراً،
وخليك في الجوار،...

اللطيفة (2 )


اللطيفة (2 )
هناك استخدامات خاطئة ومبنية على حس عام خاطئ، تتم مع الروابط التالية:
طالما، ما دام، -- لا زال، ما زال، -- ممّا، ما –
هنا تجب الإشارة إلى أنّ الاستخدامات المبنية على حس عام مكرّس وخاطئ، هي أخطاء يصعب تصحيحها أو النزول عند حسها الجديد، ولكن المسألة أنا أنظر إليها في منحيين، أولاً يمكن للحس أن يتدرّب بمرور الزمن، ثانياً، أنّه لا بد من تصحيحها في استخدامنا لأجل الأجيال القادمة، فالذي نكتبه لن يضيع هباءً، وإنما سيبقى، فوجوده يُسهم في بناء الحس الذي يأتي بعدنا ويقرأ، فإن بنيناه على الخطأ جعلنا أخطاءنا متوارثة وبعيدة الوجود في المستقبل، وإن قمنا بمعالجتها، قمنا بعكس ذلك،....
والناس يقومون بتصحيحات فيما يخص المفردات، مثلاً:
لا تقل: (شيّق)، بل قُل (شائق)، لو كنت تعني المتعة، أي (موضوع ممتع)،...
لا تقل: (وِفْقاً) لقوانين سبتمبر، بل قُل: (وَفْقاً)،....
لا تقل: (صَعَد) لسطح المنزل، بل قُل: (صَعِد)،..
وهكذا، بطريقة مختصرة وسهلة، وهو الأمر الذي سأنزل به قوائم مطوّلة في المستقبل وبهذه الكيفية اليسيرة،.... ولكن الناس ينسون الروابط من جنس:
طالما، ما دام، -- لا زال، ما زال، -- ممّا، ما –
بالرغم من سوء الاستخدام لها ومن الجميع تقريباً،.. لدرجة تكوين حس عام خاطئ في استخدامها، الأمر الذي سأسعى لتوضيحه هنا،...
1- الخطأ الأول كأن نقول:
عليك أن لا تحتج على كلامي، طالما أنت لم تكن حاضراً،... أو:
طالما أنك ستذهب للسعودية فابعث لي بالشيء الفلاني،...
(طالما): تعني كثيراً ما،.... ولا علاقة لها مطلقاً بالاستخدامين أعلاه،،...
والصحيح أن تستخدمها هكذا:
(طالما) أو (لطالما) تغنّيتُ بالحرية،،
طالما نصحتك ولم تستجب،..
(الذي حدث هو أنّ الناس أبدلوا حس (ما دام) بـ(طالما)،... فالجملتان المتقدمتان تصبحان كما يتلي،..
عليك أن لا تحتج على كلامي، ما دمتَ لم تكن حاضراً،
ما دام أنك ستذهب للسعودية فابعث لي بالشيء الفلاني،...
(العجيبة أننا في حسنا العامي (السوداني) نستخدم ما دام، وبشكلها الصحيح، ولكن في الفصحى (نتفلهم شوية) ونخطئها،...
(يا زول ما دام ضمنو ود علي ما بيّتوهو في الحَرَاسة)،،...
(ما دام جيتني آود الشيخ برقبتك للبنيّة، والله تب مي كتيرة علي ولدك)،.... هاهاهها

2- الخطأ الثاني كقولنا:
لم يعثروا على المفقود، ولا يزال البحث جارياً
تركته في لندن، ولا يزال مواصلاً في كذا وكذا
(لا يزال) لا تُفيد أبداً الاستمرارية ودوام الحال،.... ولا علاقة لها بذلك،
بل هي تُفيد الدعاء والتمنّي،...
فالصحيح قولنا:
لم يعثروا على المفقود، وما يزال البحث جارياً
تركته في لندن، وما يزال مواصلاً في كذا وكذا
وفي آخر الحفلات والهجيج يقولون: ولا يزال الليل طفلاً يحبو...
والصحيح: وما يزال الليل طفلاً يحبو،...
لا يزال تستخدم هكذا:
لا زال لي فيك رجاء،...
لا زلتُ أدعوك لنبذ العنصرية،..
فهي بذا تعني: أرجوك، أو لي فيك أمل، أن تفعل كذا وكذا،....

3 – الخطأ الثالث كقولنا:
طفح البورد بالعنصرية، ممّا اضطر البعض للامتناع عن المشاركة فيه
صعبت عليّ الدراسة، ممّا دفعني للاستقالة
وهذا خطأ فادح، (ممّا) تعني (من الذي)،... فالله يقول:
(والذين ينفقون ممّا آتيناهم) أي من المال الذي آتيناهم،...
بينما نحن في الجملتين الخاطئتين أعلاه نقصد (ما يُفيد السبب) أو ما يفيد (الذي) فحسب، وليس (من الذي)،....
فالصحيح:
طفح البورد بالعنصرية، ما اضطر البعض للامتناع عن المشاركة فيه،...
صعبت عليّ الدراسة، ما دفعني للاستقالة،..
بمعنى أنّ (فيض وطفحان) العنصرية هو (الأمر الذي) فعل كذا وكذا،...
فتصبح (الذي) صفة لمحذوف تقديره: (الأمر)،...
وأرجو أن أكون قد نجحت في توضيح ما أحببت توضيحه.

لطائف لذيذة:
وهذه لطائف قابلتني في القواميس، ونحن نستخدمها في عاميتنا،...
نقول: الزول دا (أروش) وألا شنو؟: (أروش) فصيحة وبنفس المعنى الدارج.
نقول: فلان (بات القَوَى): (بات القَوَى) فصيحة وتكتب كما تقدّم، وأيضاً هكذا: (بات القواء).
نقول: خالتك النعمة جاتني هنا أمس زعلانة، قمت أنا (هدّنت) ليها شوية.
(هدّن) وبنفس المعنى فصيحة،.. وهذه الكلمة ظريفة لأننا يمكننا استخدامها مع السيارة أيضاً كما في لغتنا الدارجة، نقول: (هدّنت) ليه العربية شوية عشان يركب معاي، أو (هدّن) لي عشان أركب. (طبعاً أنا زول ريف، ناس (بص الخضار ودغش)،.. (كوريلا وكريسيدا هنا مافي، عشان ما تقولو دا كلام شنو؟ يعني بص واحد ومع صلاة الصبح، لو ما سكّيتو سك، وهدّنوا ليك ما بتلم فيهو).
بالفصيح نقول: فأبطأت له سرعة السيارة، خفضتها، أو قللتها،.. وفي كل الحلات الجملة ستصبح طويلة، للاختصار: هدّنت السيارة،....
وإلى لطيفة (تانية وغنّاية)،....

تنبيه

إلى حين اللطيفة الثالثة، ماذا لو تركنا كتابة (عدا) رابط الاستثناء، على هذا النحو (عدى)،... الصحيح: (عدا) بهذه الشكلانية، بالألف الواقف،... أمّا (عدى) فخطأ، وتجعل من يقرأها يظن أنك ستغنّي أغنية الراحل مصطفى (عدّى فات، زمن العيون، الأُلفة والحضن الملاذ)!!!

لطيفة (3)

هنا سأشير باقتضاب كبير، دون الخوض في تفاصيل المبتدأ والخبر، أو الاختصاص، فهدفي هو (الدرّاب الكبار كبار)،...

خطأ قولك: نحن مقتعنين بحالنا،...

خطأ قولك: نحن العارفون لم نثق بك،...

بمجرد أن ترى (نحن) تبحث في الكلمة التالية لها، أتبدأ بالألف واللام، أم بالتنكير، والقاعدة بدون الخوض في الإعراب سهلة جداً،...

الصحيح: نحن مقتنعون بحالنا،.... ليه؟؟ لأنو مافي ألف ولام.... لو كانت فيها ألف ولام لأصبحت، نحن المقتنعين بحالنا،... بس أمسك في الألف واللام دي شديد،.. ما بتجيك عوجة، لقيتها تنصب، ما لقيتها ترفع،...
نحن العارفين لم نثق بك،..
نحن سودانيون،...
نحن السودانيين،...
ولمن شاء الإعراب،...
نحن سودانيون .... نحن مبتدأ، وسودانيون: خبر المبتدأ،...
نحن السودانيين،... نحن مبتدأ، والسودانيين، اسم منصوب على الاختصاص،...
والانتباهة ماذا لو تلت السودانيين كلمة أخرى تعرضنا لخيار النصب والرفع،،،،
يعني الصحيح: نحن السودانيين باسلون،...
أم....
نحن السودانيين باسلين،...

الصحيح هو: نحن السودانيين باسلون،...
لتعرب كالآتي:
نحن: مبتدأ،...
السودانيين: اسم منصوب على الاختصاص،...
باسلون: تلقائياً تصبح خبراً للمبتدأ،...

وإذا نفذنا نفْس الخيار على الجملة الأخرى،...
نحن سودانيون باسلون،...
أم...
نحن سودانيون باسلين،...

الصحيح: نحن سودانيون باسلون،...
نحن: مبتدأ،...
سودانيون: خبره،..
باسلون: نعت،... نعت للسودانيين، والنعت يتبع المنعوت،...

صديقي خالد

اعتذاري الشديد عن شيئين .. الأول : التأخير الذي لم يكن بالخاطر، وقد كنت مشغولاً عن هذا المكان بملاحقة بعض المجرمين (إلكترونياً) ولازلتُ، ولازالت (الملاحقة) قائمةً ولم يدخلِ السِّجنَ أحد، ولا أظنه سيفعل.

الثاني : لم أكن مترفعاً حين أحلتك إلى نصي دون المرور على نصك، فنصك عندي مقدس، ونصي أنا مدنس، لذا وجدت نفسي بما يشبه الخجل أحليك، هكذا إحالةً، دون أن أقول لك : هذه إحالة، إلى نص أعتبره محاولة من عدة محاولات بائسة لتأسيس واقع جديد أفضل.

وبعد ..

قريتك بتمعن، وملاحظاتك في محلها، بس انتا عارف يا سيد خالد، هنا في المكان دا، المحبطات كتيرة جداً، أتمنى أن يعافيك الله منها.

وأخيراً : يا خي إنتا كتّّاب جداً؛ شكراً على الكتابة.


.

خالد محسن :
الزول الكتاب شديد (عليك الله ما تدقق في كلامي ده لاني لسة ما حفظت اللطائف بتاعتك دي)..
شكراً كبيراً لهذا الجهد المقدر وبس ما تحاول تركز علي البورد ده شديد لأنك لو حاولت تكتب لطائف البورد ده حاتلقي روحك بقيت لطيف شديييييييييييييييد ونحن شعارنا :
في الناس القيافة حبينا اللطافة ..
واصل ياباشا..

انت فعلاً زول مفيد
أها حا تمشي متين زي الجماعة المشو من هنا؟

ود شاموق،...
يا أخي تسلم، وأنا بصدْق، مهما انتشرت الكعوبية في الأرض، دائماً أحمل معي أعذار للناس،..
وما لمتك وفي بالي نعتك مترفعا، بل استوقفتك إذ أحسستك مستعجلاً،..
ولن أشكر لك جمالك "ملاحظاتك في محلها" فالجمال يشكر صاحبه بنفسه،..
بعدين بلغة الخوّة، أقوليك: لما رجعت مع اللنك، لقيتك لغتك نظيفة ومكرّبة كأفضل ما يكون،..
قلت ود شاموق دا، مستهبلللل، وألا شنو؟؟ بعد ما نظم أمورو "وعرف" تمام، كوّن رأيو في الصاح والغلط، بس الناس التانين حالن كيف، يعني كلامك كلام خواص، أو للهظار "فلهمات، وتغيات" العارفين والشبعانين تمام،...
أهلنا بقولوا (اللعوج رأي والعديل رأي)، بس غلطانين، كان يقولوا (اللعوج وجهة، والعديل وجهة)،..
لأنّ الرأي كما أفهم، لا يكون إلا بعد معرفة،...
وأنا أفهم جيداً، إشكالات الحروف الناقصة هذه كناحية في اللغة، وتعاطيك لها أنت من باب المقدّس وغير المقدس، موضوعة من صميم اللغة ومن صميم هذا الحوار،... ولكن تمنيتُ عليك لو أنّك أسرفت في أدلّتك أكثر من باب الموضوع، كي يشعر القارئ بنوع المشكلة، ولا يصبح بمقدوره، قصر مشاغباته على "الرحمن"، وغيرها،..
كان لك: هذا/ هاذا،... ذلك/ ذالك،.... هؤلاء/ هاؤلاء،... أولئك/ أولائك،... كذلك/ كذالك،... السموات/ السماوات، ...
فيسترسل الموضوع ويدخلك في النَبْر: نساءٌ/ نساءُن ... رجلٌ/ رجلن،.. نساءً/ نساءَن،..
ويسترسل الموضوع أكثر فيدخلك أبواباً لنواقص أخرى مع حروف ثابتة، لا علاقة لها باضطرابات حروف العلّة الإشكالية،..
الذي/ اللذي،.... التي/ اللتي،... الذين/ اللذين،... (هنا الحرف الناقص -اللام)،..
وحتّى تصل لإضافة (حرف ناقص) لكل الكلمات المبدوءة بحرف شمسي،..
الششمس، الننور، الددم،... وهكذا،،...
وحتّى تصل إلى أنّ ما بين أيدينا الآن من اللغة، هو نتاج سعي وتعب واجتهاد لا حدود له،...
فتسلم مرة تاني، وخليك أخوي، وخليك ضد إحباط هنا،..
وشكراً، لوقوفك عند كتابتي وح أتابعك أنا كمان،...
والمرة الجاية تعال هنا، بحقّك، بـ"لطايفك" وما تجي تتونّس معاي، عشان أنا زول ونّااااس، وفقّاع،.. هاهاهاهاا
سلام يا صاحبي

عمر الفاروق شيخ الدين،...
عمر الفاروق، شكرااا يا لذيذ،....
وخليهم يتردوا ساي، ونحن نشيل اللطافة،...

محمد السر،...
أرجو يا سيدي أكون كذلك،...
والرحيل عِزّ الباريا، بس (الفولة بتمّلي والبقارة بجوا)،...
و(الحنين بوصفه الموطن)،...

لطيفة صغيرونة/

لا تقل: لن أذهب إليه قط،... لأنّ قط لا يستخدم معها إلا الفعل (الماضي) وليس المضارع،...
بل قل: ما ذهبتُ إليه قط،...

ومع بقية الأفعال استخدم (أبدا) للنفي بدل (قط)
فيصبح تصحيح الجملة الأولى: لن أذهب إليه أبداً،..

لطيفة مستعجلة


ما هي لغة (أكلوني البراغيث)،....

هي إيراد فاعلين لجملة واحدة أو لفعل واحد، وهي متعلقة غالباً بـ"نون النسوة" أو "واو الجماعة" لعامل كمونهما في الفعل،... ---عشان بيلبدوا يعني والعين ما بتشوفم..


كقولك: البنات ذهبن إلى الحقل،...

فيصبح الفاعل هو "البنات" وأيضاً نون النسوة في "ذهبن"،...

أو --- الرجال ذهبوا إلى الحقل،...

فيصبح الفاعل هو "الرجال" وأيضاً واو الجماعة في "ذهبوا"،...

أو المثال نفسه لكونها اسمها "لغة أكلوني البراغيث"،...

أكلوني البراغيث،... واو الجماعة في أكلوني فاعل، وأيضاً البراغيث،...

الأبلغ هو قولك:

ذهبت البنات إلى الحقل،...

ذهب الرجال إلى الحقل،...

البراغيث أكلتني،...


بأي حال كمجرد إشارة، القرآن تكلم بهذه اللغة،...


ولغدٍ أفصح،....

الاستاذ محسن
موضوع رائع ومفيد جدا
ولحد ما نقدر نطبقه استحملوا أخطائنا
يديك ألف عافية

تخريمة: ما عندك حاجة تصلح الخط؟
عشان خطي من شدة ما كعب مرات انا زاتي ما باعرف أقراه

زولة123

zola 123 ،.....

شكراً يا زولة وتحياتي،...
بعدين إنتو برضو أصبروا علي البري،..
ولو لقيتٍ الناس البصلحوا الخط، ما تتوصي، كلمي أخوك (أخاك)، أنا كمان خطي مكعوج ومعيوق في إيدي،...
وليك سلام

الأخ محسن على حسن سلوكه
يديك العافية.

والله ياخي أنا أن وإن دي مجننناتني جن .
لكن بعد دا أمانة ما وقعن.

واصل عليك الله.

Shamashi،...

ويديك العافية، وتاني أحقر بإن وأن، والبتعمل ليك فيها لميضة، كلمني عليها،...
وتحياتي،....

لطيفة:


حروف الجزم معروفة، ولكن هناك ملاحظة تغيب عن واحدٍ منها وعن تأثيره على الفعل المضارع،...
(لا) الناهية، التي تنهى عن فعل معين،...

الناس تكتب: لا تنعي أخاك،.... خطأ،..
وأيضاً: لا تنهى عن خلقٍ وتأتي بمثله،.. خطأ
لا تنسى ذكر الله،.... خطأ

الصواب هو أنّ (لا) هنا ناهية وليست نافية، إذن يجب جزم الفعل المضارع، والذي سيتجلى في حذف حرف العلّة في مثل هذه الحالات الثلاث،..

فالصحيح: لا تنعَ أخاك،...
لا تنهَ عن خلق،...
لا تنسَ ذكر الله،...

والفتح عند آخر الفعل هو واجب (في هذه الحالات) وإشباع للصوت المحذوق لعلّيته،..

وإلا كان الفعل هكذا،.. (بدون فتح) في حا لات ثانية،..

لا يغتبْ بعضكم بعضاً،..

وإلى حين مناديل أخرى،..

إزيّك يا مُـحْسْ.
الحمد لله أنك ما زلت علي قيد الحياة البوردية. تصدق يا محسن أنت الكاتب الوحيد "المحسن" الذي خشيت أن "تـبَـرْبِحه" قوانين البورد الجديدة. أنت يجب أن تبقى أيها المسخوت .. لأنك لست عاطلاً. وقديماً قيل لنا (في جيهة أم شديدة): أرجى سفيه ولا ترجى عاطل.

هذا البورد يا فهيم كشف عن خلل عظيم في حظ السودانيين من البراعة والتجويد النحوي والإملائي. ما كنت أحسبني أحيا إلى زمنٍ يوصف أحدهم بالمفكر أو الرائع وهو لا "يحسن" أداة تواصله اللغوية؛ عربية كانت أو انقليزية. رأيت كل ذلك في هذا البورد اللطيف يا بتاع اللطائف انت. ورأيت ما رأيت.

لدي سؤال فلسفي إبن ستين كلب .. وكم وددت أن أفرد له بوستاً منفصلاً. سؤال لا علاقة له بالنحو أو الصرف أو الإملاء أوالقواعد اللغوية المعهودة .. سؤالي هو عن "حشرة" كلامية جديدة دخلت جحر الكتابة السودانية .. ولست متأكداً من أصلها. أظنها جاءت من الدارجية الشامية واعتلى ظهرها السودانيون قبل غيرهم من أهل الله في البلاد الأخرى، وأنت تعلم حب السوادنة "المثقفين تحديداً" لالتهام كل ما هو غريب، دون مساءلة. قرأتها أول ما قرأت في مطبوعة تصدر عن جماعة خير الدين حسيب (المستقبل العربي) في منتصف الثمانينات. وبحثت في أمر كاتب ذلك المقال الذي تضمن تلك الكلمة فوجدته شامياً، وللشوام "لغا" يعتبرها الهامش لغة. ثم بحثت وبحثت فلم أجد كاتباً مصرياً أو غير شامي يستخدم تلك الكلمة (أهي كلمة؟) بتلك الطريقة. الآن أراها تسرح وتمرح في كتابات السودانيين، في البورد وخارج البورد. وأنا بدي أسألك من "هيك" شغلات يا محسن.

لكن خليها بعدين. أنا هسع بدور أبارك ليك الحياة .. وخروجك سالماً من محكمة البَرْبَحة.

الاخ / المبدع ،الاديب و الروائي
الاستاذ محسن خالد

لطيف .. أن تجد الكتابة كل هذه العناية الفائقة وقد رأيتها يوما تحتضر على ارصفة الحروف النازفة بفعل اقلام غير مبالية بما قد يصيب اللغة من هلاك .
لطيف .. ان اجدني هنا وقد وجدت لي معلما .. يرتب لي لغتي التي يزاحمهاالبوح بلا موازنات نحوية او املائية فكنت دوما ألجا لتحرير النصوص كلما دفعني حدس اللغة للشعور بخطأ ما .. وهكذا طالبت قبل عام من استاذي بالمرحلة الثانوية ان يساعدني لاخرج باللغة من ظلام الاخطاء النحوية الى قبس اللغة الرصينة .

وكم هو لطيف ان تتألق الكتابة بثيابها الباهرة وهي في أقصى حالات اتزانها وثقتها ببلاغتهاوصرفها.

الاخ محسن شكرا لهذا الاهتمام .. فكلنا نحتاج لمثل هذة الوقفة لاصلاح الكتابة لدينا ولاننا بفعل ثقافة الالفية الجديدة لا نستطيع ان نعبر عن اي شيء وعن كل شيء الا بالكتابة والتي يجب ان تخضع لمثل هذا الاهتمام لنكتب بلغة صحيحة نحويا واملائيا وبلاغيا بنسبة 100% .

استاذي الفاضل .. محسن
- لدي بعض تساؤلات حول مخارج الحروف .. فكمااننا نكتب فنحن ما زلنا نتحدث .. فهناك لبس كبير في نطق ( حرف القاف والغين ) ( الثاء والسين ) فارجو ايضا طرق هذا الامر ونكون بذلك قد اعطينا لغتنا الحلوة حقها كاملا .
- الخطأ الفادح في عدم التمييز ( وليس التمييذ ) بين حرفي ( الذال والزين او الزاي )كما يسميها ( اهل الشام ) ..


استاذ محسن خالد،
ازداد اعجابا لطريقتك في سبر اغوار المواضيع التي لم تجد يوما الاهتمام الملائم لها، فاصلاح الكتابة هو في نظري اعظم شأن من اي موضوع ادبي آخر باعتبار انها البداية الحقيقية والتي تأخرنا كثيرا لمعالجتها وتصحيحها حتى كادت ان تلفظ انفاسها الاخيرة لولا ... ( الوجيع ) استاذ محسن .

مجهود مقدر ودا الكلام ياالاستاذ محسن خالد ولي قدام (طبعا كتبت بالعامية حتى ما يكون في تدقيق لغوي على كلامي)..

شنتير،...
إزيك يا شنتير،...
(أرجا سفيه ما ترجى عاطل)، إنت عارف دا أحلى نقد وتعليق سمعتو من الله جابني هنا، وبالجد حبوبتي الحرم بت طيفور ما عندها لي وصف غيرو، دا وواحد تاني، كُل ما أقول لي واحدة من البنات طايرة وين وألا ماشه وين – شوف بنات أهلي أو الجيران، أنا وحيد أمي وأبوي، تناولني أخوه -أخاه: السفيه قلبو مرضان عاد،...
لكن سؤالك الفلسفي دا جاب كثافتي، لأني شكيت في كلمة بدافروا فيها جماعة بهناك، قلت أكتب ليك، خايف تجيب لي الدفاس هنا، وباقي عندي تيراب خايف عليهو، دُفاس البقر يا عاق البحرت يا طرّح الحامل،..
بعدين أنا قبضتك عمرياً من جماعة خير الدين الحسيب، ولا حظ إنو ديل جماعة عراقية، اتخاتفوها ناس هيك شغلات، وشكيت في كلمة تانية أنا مستخدمها، بس المرّة الجاية تعال لي بالأكيدة، وأسألني من تاتيرها ليك مكان مكان،... وسَكْ سَكْ الكلمات دي بدوني عليها ماهية ما تهم،...
وأبقه عافية،..
والله يبارك فيك،....

سمرية،...
يا ستي تسلمي،...
وشكراً لاهتمامك إنتِ، وأرجو أن نتعاون هنا جميعاً في هذه الصفحة، لا تتركوني لكسلي، كل زول يجيب كورتو ويجي،..
وتاني تحياتي وشكرا،..

محمود الدقم،...
شكراً يا أخي، وأرجو أن لا ينقطع وتلحق بنا العطالة،...
تحياتي

Quote: دُفاس البقر يا عاق البحرت يا طرّح الحامل،..

يا مُحْسْ .. لقد تدافس البقر ولم يعق الذي يحرث .. بيد أن الحامل قد طرحت؛ عجْلاً أدهماً برأسين .. فما قولك في "هكذا" طُراح؟. وبين البقر والطُراح تجد الأكيدة.

أين أنت يا هذا؟. مقلول السياسة.

كل سنه وانت طيب استاذ محسن خالد

Quote: دُفاس البقر يا عاق البحرت يا طرّح الحامل،..

تور وحش الخلا الـ خلعو وخِتو الصيّادة
ملفوخ قرْنو ما بِقْلِب لسانو شهادة

دي شوية زيادات كده عشان راوية عتّرت لي وأنا في انتظارك آ ضراعي.

يا مُحْسْ .. لقد تدافس البقر ولم يعق الذي يحرث .. بيد أن الحامل قد طرحت؛ عجْلاً أدهماً برأسين .. فما قولك في "هكذا" طُراح؟. وبين البقر والطُراح تجد الأكيدة.

أين أنت يا هذا؟. مقلول السياسة.

بالله ترانى الطيش وانا كل يوم اسود فى الصفحات..شكرا وفعلا (العلم
نورن) تسلم يا محسن والرجاء ان تواصل عسى ولعل نفك الدفة لى غيرنا
تسلم يا جميل..بالله بعد ما تنصلح الغلطات الاملائية واللغوية نسأل
الله ان ينعدل الطرح كمان لان المنبر صار ينعاف..تسلم،،،،،،،

شنتير،...
التور البنف خرت الحبال وإدلّى
كربو التقيلة محارتو ما بتنقلّه
نهشو الكرباج وفي سريهو اتملّى
كضّمو الشويش قطع الجرير والتلّة
ودي من مسرحية –مجادعة- كتبتها زمان، إن لقيتلي منها شيء بجدعو ليك، حاكم أنا بعد التنتّر الكتابي دا كلو مهمل في كتابتي،.. بعدين عجل 2 رأس دا طُراح السرور،... وللمعلومية (طرحت الأنثى والبهيمة فصيحة كررر)
وبرضك ما قلت لي الكلمة، ما تبقه حاسد،..
وأرقد عافية

راوية،..
مشكورة شديييد، ذكرتيني إنّي عزّابي، بعدين أنا مطوّل لساني علي الصديق وود أمّنا السمندل، ما بقدر أتجرّس هسه، غايتو علينا وعليك مبروك،...

صديق الموج،..
تسلم يا أمير، وبعد وزنا موجة أم درمان، إن شاء الله عاد ربي يوزن أم درمان في رقبتها،...
وتحياتي،..

علي بالدين قلتها. يا زول ركز شوية. وبيني وبينك .. أنا أفضل الخوض معك في أصولها خارج هذا البوست حتى لا أقع تحت طائلة الظلام.

واصل يا محسن بالله في أدوات الاستثناء .. وبعدها تمييز العدد .. وبعدها المفعول معه .. وبعدها ما يسمى بالفضلة .. ثم التوابع، توابع اللغة الأربعة .. و و و .. وهكذا. بلاوي في البورد.

الأستاذ محسن خالد

لك التحية والاحترام

بعد قراءة هذا البوست القيم لابد من مراجعة كل ما نكتب هنا فقد اتضح لنا اننا عثنا فى البورد اخطاءً واننا وضعنا كل شىء فى غير موضعه ولتسامحنا اللغة التى - لا شك - ستعتبرنا دخلاء عليها ولكنها على كل اصبحت لغتنا الاولى ولا مناص من تعلمها بطريقتها الصحيحة كما توردها انت هنا سيدى ..

نسأل الله ان يكون تعليمك لنا ما يفيدنا فى ميزان حسناتك لا سيما وان اللغة العربية هى لغةالقرآن وحرى بمن يود التعامل معها ان يتعلمها جيدا ان لم يتقنها..

مع كل الود

شنتير،..
ياخوي كلامك السمح دا ما تسويهو لطيفة وترميهو لينا هنا، بس إلا أخوك يقوم بيها يعني، قلنا بالساهلة، وبعدين ما في زول مقاولني،..
وكن بخير

قرشو،...
شكراً يا رجل،.. وتحياتي،..
حبّيت أقول ليك حاجة صغيرة، وافهمني صاح أنا ما ضد أدعيتك ونصايحك، وبصحى كل يوم عشان يكون ماعوني أوسع،..
قولك العربية لغة القرآن،.. وفي الحقيقة القرآن هو من لغة العرب، لأن اللغة وقومها سابقون عليه وهو تالٍ لهما،...
أنا عارفك قلتها ساي، عشان كدا قلت ليك كلامي دي ساي، مجرد تصحيح،..
وكن بخير،...

الاخ الفاضل محسن

شكرا على اللطائف الصغيرة ذات الفائدة الكبيرة.

لطيفة صغيرونة:

اعتقد ان القرآن سابق للعرب،لأنه كان فى اللوح المحفوظ قبل ظهور العرب،فى سابق الازمان

كذلك العربية هى لغة اهل الجنة فى قادم الازمان،كما يقول بعض العلماء

والله اعلم

تحياتى

عفواً يا دكتورة مهيرة،
وحقك علي يا خالتو

الأخ محسن
موضوع ممتع و مفيد جدا. كلنا في (حوجة) إليه.... بالمناسبة هل (حوجة) صحيحة؟ سمعت من قبل أن الصحيح حاجة.
المهم الموضوع مفيد جدا و مطروح بصورة مبسطة أرجو ان تواصل فيه. كلمة شنتير القصدها هي الاستعمال لكلمة هكذا كما استعملها هو أعلاه:

Quote: فما قولك في "هكذا" طُراح؟

فقد أصبحت (موضة) في الكتابة.
أمر آخر لم أفهم سر غضيتك على الفاضلة د. مهيرة فهي لم تفعل غير الحديث عن تصورها حول موضوع معين و لم أدر لم فسرته أنت على أنه محاولة لصرف البوست عن وجهته. و عموما هي ضيفتك و وجهة نظري أنها تستحق منك غير ما استقبلتها به. و في انتظار المزيد من اللطائف.

اعتذر لكل من ازعجه كلامى

ولن ازعجكم مرة اخرى

تحياتى

Elawad،...

تحياتي يا أخي، وسلام،...
وشكراً لك عقب التقريظ، وسلامي أوفره
حوجة لم ترد في القواميس كما أسلفت، بل حِوَج/ حاجات/ وحوائج/ ويجوز: حائجة، ومنها أيضاً لكمة لذيذة وهي: المحاويج، التي يُلسن بها بدونا، بمعنى المحتاجين،...
الكلمة التي أشار لها (شنتير) وكلمات أُخر تجادعنا بها على الإيميل،...

(كلامهما وكلامي، مبني على خلفيات غير موجودة في هذا الكتاب)،..
بخصوص مهيرة، أو من عند "قرشو"، هناك "كتاب" أُفرد بخصوص "تيموليلت" قام به "قرشو"، وكتبت فيه "مهيرة"، ويمكنك مراجعة ما فيه، ولم يكن مسيئاً لي أبداً، ثم من خلال رسالة على المسينجر من "قرشو"، وليست مسيئة أيضاً، وإن فيها توجيه ديني كما في الكتابة عن تيموليلت،.............. ترسّخ لدي الآتي، وربما أكون مخطئاً، ولكن بأي حال أُنبّهك إلى أن للغتي المختلفة هنا ما وراءها، ومرّة ثانية قد أكون مخطئاً، فقد شعرت بأنّ الموضوع مطاردة لأفكاري وكيفية تفكيري وإملاءات، ولا أرغب لهذا الكتاب عن اللغة هنا في التشتّت، لأنه لا ذنب له، ولا غبار عليه، إن لم تكن فيه فائدة عميمة، أنا أُريد للناس كلهم أن ينتجوا، وليس فقط التصدّي لإنتاج الآخرين، أو لأفكار صغيرة في أعمالهم، سواءً قدحاً أو مدحاً، وثِق أنني صادق فيما أقول، ولست أعني أن أكون جلفاً مع أحد، وأحفظ الود ما استطعتُ، وراجع كل كتبي هنا، وطريقة تعاملي وروددي على الناس، بل أجتهد لهم في الجمال، لدرجة تطمح في أن تخلق نصاً موازياً، يا خي أنا كتبتُ معكم هنا هرباً من القبح، وإلا فالكتب الورقية تغنيني، وأنا أعتذر منك، ومن ضيوفي، بما فيهم قرشي ومهيرة،.....

مهيرة،...
شكراً جزيلاً، وتقول العرب: كلّمته فما ردّ لي حَوجَاءَ ولا لَوْجاءَ، أي لا كلمةً قبيحة ولا حسنة،...
وكلامي الفوق دا عدّيهو زهجة من ولدك زي ما قلتِ في كتاب قرشو،...

Elawad،...

تحياتي يا أخي، وسلام،...
وشكراً لك عقب التقريظ، وسلامي أوفره
حوجة لم ترد في القواميس كما أسلفت، بل حِوَج/ حاجات/ وحوائج/ ويجوز: حائجة، ومنها أيضاً لكمة لذيذة وهي: المحاويج، التي يُلسن بها بدونا، بمعنى المحتاجين،...
الكلمة التي أشار لها (شنتير) وكلمات أُخر تجادعنا بها على الإيميل،...

(كلامهما وكلامي، مبني على خلفيات غير موجودة في هذا الكتاب)،..
بخصوص مهيرة، أو من عند "قرشو"، هناك "كتاب" أُفرد بخصوص "تيموليلت" قام به "قرشو"، وكتبت فيه "مهيرة"، ويمكنك مراجعة ما فيه، ولم يكن مسيئاً لي أبداً، ثم من خلال رسالة على المسينجر من "قرشو"، وليست مسيئة أيضاً، وإن فيها توجيه ديني كما في الكتابة عن تيموليلت،.............. ترسّخ لدي الآتي، وربما أكون مخطئاً، ولكن بأي حال أُنبّهك إلى أن للغتي المختلفة هنا ما وراءها، ومرّة ثانية قد أكون مخطئاً، فقد شعرت بأنّ الموضوع مطاردة لأفكاري وكيفية تفكيري وإملاءات، ولا أرغب لهذا الكتاب عن اللغة هنا في التشتّت، لأنه لا ذنب له، ولا غبار عليه، إن لم تكن فيه فائدة عميمة، أنا أُريد للناس كلهم أن ينتجوا، وليس فقط التصدّي لإنتاج الآخرين، أو لأفكار صغيرة في أعمالهم، سواءً قدحاً أو مدحاً، وثِق أنني صادق فيما أقول، ولست أعني أن أكون جلفاً مع أحد، وأحفظ الود ما استطعتُ، وراجع كل كتبي هنا، وطريقة تعاملي وروددي على الناس، بل أجتهد لهم في الجمال، لدرجة تطمح في أن تخلق نصاً موازياً، يا خي أنا كتبتُ معكم هنا هرباً من القبح، وإلا فالكتب الورقية تغنيني، وأنا أعتذر منك، ومن ضيوفي، بما فيهم قرشي ومهيرة،.....

مهيرة،...
شكراً جزيلاً، وتقول العرب: كلّمته فما ردّ لي حَوجَاءَ ولا لَوْجاءَ، أي لا كلمةً قبيحة ولا حسنة،...
وكلامي الفوق دا عدّيهو زهجة من ولدك زي ما قلتِ في كتاب قرشو،...

الأخ محسن...
لا أدري... لكن شعرت أن هناك جزءا من ردك قد سقط أو أن الرد غير مكتمل بالذات فيما يتعلق بكلمة (هكذا) التي أثارها الأخ الحبيب شنتير.
أما بخصوص قولك:

Quote: ولست أعني أن أكون جلفاً مع أحد، وأحفظ الود ما استطعتُ، وراجع كل كتبي هنا، وطريقة تعاملي وروددي على الناس، بل أجتهد لهم في الجمال، لدرجة تطمح في أن تخلق نصاً موازياً،

فيعلم الله لو لا ما لمسته منك من علو خلق و حسن مخاطبة ما تجشمت عناء لومك و عتابك على ردك على الدكتورة مهيرة. و كم من كلام غث يقرأه الواحد في هذا المنبر و غيره و لا يعتب على صاحبه لآن حسب كل إناء أن ينضح بما فيه.
لا يفوتني هنا أن أعبر عن إعجابي بقول شنتير:

Quote: هذا البورد يا فهيم كشف عن خلل عظيم في حظ السودانيين من البراعة والتجويد النحوي والإملائي. ما كنت أحسبني أحيا إلى زمنٍ يوصف أحدهم بالمفكر أو الرائع وهو لا "يحسن" أداة تواصله اللغوية؛ عربية كانت أو انقليزية. رأيت كل ذلك في هذا البورد اللطيف يا بتاع اللطائف انت. ورأيت ما رأيت.

فأمثالي معذورون إن خرمجوا في كتاباتهم و لكن المشكلة في من يطرحون أنفسهم كمفكرين و أدباء و إعلاميين و لا يسلم لهم سطر من أخطاء يشيب لهولها الولدان و أمثالهم في المنبر كثير.

الاستاذ محسن خالد
دبايوا
شكرا على هذه المائدة الدسمة.
ولى سؤال مكتبوب اعلى المنبر الحر (المتواجدون الان)
هل الصحيح المتواجدون الان
ام الموجودون الان؟

واعمل حسابك من المادة14

هاشم نوريت،...
دبايوا، إيتانينا،..
فارس ود القبيلة، ما بتكفى دياهو الأثر،...
ولّعت والدرر فيها، فوقين ديا متر،.. هوي هوي مرحبا،..

إزيك يا زول، وتحياتي، وشكراً علي كلامك الجميل، بعدين للنكتة أنا محضّر مخلايتي تب للرحول كان 14 كان 15،... وهاك الفتوى الطلبتها،..

لا يجوز مطلقاً أن نقول (المتواجدون الآن) ونحن نقصد من هم حاضرون، بل الصحيح أن يكتب الأخ بكري (الموجودون الآن)، أو (الحاضرون الآن)،...
وكذلك لا يجوز أن نقول المتواجد في المكان الفلاني،.. بل الموجود،..
لأنّ التواجد تفرّعات من أصل كلمة (الوَجد)، فالمتواجدون الآن، تعني الذين هم في هيام وغرام في هذه الساعة، يعني داخل القواطيع وغرف النوم،..

ودي النصيحة أنا مرقتها ليك يا ود نوريت، وربّك يستر،...

استاذ محسن خالد
دبايوا
شكرا جزيلا على التوضيح وعلى العموم انا حذرتك من العواقب
ويبدو انك غاوى مغامرة وربنا يستر .

Quote: لا يجوز مطلقاً أن نقول (المتواجدون الآن) ونحن نقصد من هم حاضرون، بل الصحيح أن يكتب الأخ بكري (الموجودون الآن)، أو (الحاضرون الآن)،... وكذلك لا يجوز أن نقول المتواجد في المكان الفلاني،.. بل الموجود،.. لأنّ التواجد تفرّعات من أصل كلمة (الوَجد)، فالمتواجدون الآن، تعني الذين هم في هيام وغرام في هذه الساعة، يعني داخل القواطيع وغرف النوم،..

اتارى نميرى(....)مطلعنا ناس هيام ساى وبى كبرنا دا.
تسلم اخى وواصل لان هذا البوست فيه فائدة وكم كنت اتمنى من الاخ بكرى تثبيت
هذا البوست للفائدة بعد استبدال كلمة الموجودون او الحاضرون الان بدل كلمة
المتواجدون الان لانها خطا .

الكاتب الروائي محسن خالد...

Quote: ...بالرغم من كوني "كاتب من ورق"

(فليحتفِ بك الوَرَق إذاً...)

بصراحة يا عزيزي (إسمح لي بها)، أنا مصاب في هذا الفضاء ، هذه الأيام، بحالة من "الزهق" لا حدود لضربته الماحقة ، وهذه بالتحديد – الحالة – هي ما أعجزني عن التداخل معك ، ترحيباً واحتفاءاً... إذ بدا لي صوتك الروائي قريباً من القلب ولصيقاً بهمِّ الكتابة كما أفهمها...

وها أنت تجترح هذا الخيط الذي لديَّ فيه كلام كثير...
سأعود اليك هنا إذاً ، ربما لأتحدث عن جانب آخر من جوانب الكتابة وتجويدها (كلمة إصلاح أزعجتني قليلاً، أظنك ستعرف لماذا)...
سأضيف هنا بعض الملاحظات حول العلامات البيانية في اللغة العربية (بالعلامات البيانية – مقابل البلاغية – أعني ما اصطُلح عليه بـعلامات الترقيم). وكنت قد كتبت دراسة طويلة عن استخدام هذه العلامات في الكتابة العربية ، ولكن انتهى بي الأمر الى قراءة استخدامها في الكتابة الشعرية – سعدي يوسف نموذجاً- مما أجَّل المشروع البحثي (الى حين، مثلما أتمنى) لصالح مشروع المتعة!

لك المودة والتقدير...

و..."سأتواجد" هنا يا عزيزي؛

ح. خير

Elawad،...
تحية، فارهة
أنا أشرت لك لكوني رددتُ على شنتير بشكل خاص، حول (هكذا ...)،.. ولكن من حقك أن تعرف ما دار، هو أنّها تقليعة، هكذا مواضيع، وهي (مواضيعٌ هكذا، أو هكذا صفتها، بحيث لا تتقدم المشار إليه،...
وفي تقديري، هي ركاكة فحسب، أدخلها تحديداً مترجمو الكتابات الأجنبية لأدوات الإعلام العربية، إذا حاولنا أنّ نتقصّى تاريخها فلا علم لي،... ولكن بالتأكيد هي نتاج التعريب بالمفهوم الأوسع والأشمل للكلمة، وأظنها في المقابل للرابط الإنجليزي:
في الإنجليزية: such a matter
Or: such a man… such a woman
ولا حظ الحس هنا، تقريباً هو موضوعة نقل: هكذا مواضيع بالضبط،...
وتحياتي ثانية،..


هاشم نوريت،...
وشكراً لك، يا عزيز، بعدين الهيام ما عليهو كبر، هيم وخلي الشدر المكتّف ذاتو يهيم لو بتقدر،...
وخليك في الجوار،..

Farda،...
كيفك يا زول، وسلّم لي علي قلبك الهمو خاتف لون همّي، همّ التوهّم والجكّة بالقلم،..
(فليحتفِ بك الوَرَق إذاً)، بس برضو جروف سماكم مغرية،.. وسلوكتي معاكم الشبحة بالشبحة،.. يا زول ماني فايت كان ماطردوني بالرقيب والعتيد، وألا كمان طردتني واحدة من بنات نعش،.. وما ببعد! أقرب مجرّة أم عنقريب بنتمدد ونتغطى بالنجم،...
وتاني أريتك طيّب،..
حلوة تسمية (العلامات البيانية، بالجد) وراقية، وفيها ملاوحة كلام كتير،... ودا موضوع موجّع رأسي زمن، وعندي فيهو ملاوة شخصية لا أسميها دراسة،.. وأنا منتظرك، وثِق ببراهو علامة علامة،..
أرجو أن ترميلنا دراستك هنا، وح تكون بكل تأكيد النصف الآخر، المكمّل لشكل الكتابة، لأنني مركّز على الجانب الفني، المحتاج ترقيم كودي أو رمزي شكلي، من باب غير اللغة، ولو ملاحظ تشحيحي للانغماس في اللغة من جانب بنيتها (الدلالية- النحوية) انحرافاً نحو شكل الكتابة في الأعم الأبسط،... فمرحباً بك وبدراستك،..
وزي ما بقولوا أهلنا المغاربة (ما كينش مشكل) بالنسبة (لإصلاح) ربما قادتك إلى السمكرة أو المنطقة الصناعية، وبيني بينك فيها الشاكوش دا،..
وتسلم،...

لطيفة (كتابة الهمزة)
يُراعى على الدوام حركتها وحركة الحرف السابق لها، وهنا رصد لتنظيم وترتيب الحركات، (دا كلام خلاوي بس مهم بشكل حاسم)،...

ـــــــــــــِ الكسر (الجر) أقوى الحركات،..

ــــــــــــُ الضم يليه،..

ـــــــــــــــَ بعده الفتح،..

ـــــــــــــــْ أخيراً السكون،..

وهاهنا القواعد البنائية، والناس لا يخطئون فيها، بل بالحس النفسي للغة يكتبونها بشكل صحيح، ولكن متابعة النهاية ضرورية، لأنّ الإشكالات تأتي لاحقاً، وقد سعيت لتوضيحها بأبسط صورة ممكنة،..

1- إذا كانت (الهمزة) "ساكنة" وما قبلها "مفتوحاً"،... تُكتب على (ألف)،.... (فَـأْل)

2- إذا كانت (الهمزة) "مفتوحة" وما قبلها "مفتوحاً"،... تُكتب على (ألف)،.... (قَرَأَ، صَبَأَ)


3- إذا كانت (الهمزة) "مفتوحة" وما قبلها "ساكناً"،... تُكتب على (ألف)،.... (جُرْأَة)

4- إذا كان ما قبلها "ألفاً" أو "واواً"، وهي مفتوحة تُكتب على السطر:
(مسَاءَه،..................... ضوءه،.....)،...

5- إذا كان ما قبلها "ألف" أو "واو" وهي مفتوحة تُكتب على السطر:
مساءَه،... رداءَه،... ضوءَه،... مروءَة،........

6- إذا كانت مضمومة وما قبلها ألف، أو أي حرف ساكن،... تُكتب على واو:
يجرؤ،.............. دِفؤها،.....

7- وإذا كان ما قبلها مكسور،.... تُكتب على ياء:
يُنْشِئ.......... يُنشئها................ يُبوِئها............. يُجزئها.................

7- إذا سبق الهمزة المتطرفة أي حرف مد،... آآ........... (هذه القاعدة مهمة) تُكتب مفردة، على السطر.... بمعنى متحكّرة علي رقبتها بدون كرسي،...
مساء،................ ضوء،.............. مجيء.................

طيّب إذا قبلها كسر، طوالي بتكون محتاجة لكرسي، والكرسي هو (فقط رسم الياء، بدون نقط، يعني الحرف الفي مفتاح الـz في الكي بورد، والحرف دا مش ياء)، (ومن هنا بتلم فيكم اللخبطة والتردي).............

شَاطِئ...................... الطاء مكسورة، الكرسي مفتاح الـz في الكي بورد،...
بادِئ.......................... الدال مكسورة، الكرسي مفتاح الـz في الكي بورد،...

وللتوضيح أكتر، ركّز علي الخلاصة الجاية:


الياء هي دليلٌ على الكسر،...
الواو دليل على الرفع،...
الألف دليل على النصب،...
(هذا لتبسيط الموضوع)

إذن كيف نكتب الهمزة بعد الياء؟؟؟؟؟؟؟؟
(التركيز على الياء لكثرة الإشكالات مع حروف العلّة عادة)

الهمزة بعد الياء من الطبيعي أن تكون على نبرة لتوافقها:

ليُضيـ{ئ}ـوا..... الياء سابقة، فالهمزة هنا تكتب على النبرة: ليُضيئوا،..

1- طيّب لو كانت الياء نفسها مفتوحة: (تهيَأ)................ تُكتب (الهمزة) على الألف: (أ)،..


2- طيّب لو كانت الياء مرفوعة: (تَهَيُؤ)................ تُكتب (الهمزة) على الواو لأنّه هو الذي يناسب الرفع: (ؤ)،..


3- وأيضاً نفس الحالة أعلاه إذا كان الحرف الذي يسبق (الهمزة) مرفوعاً، حتّى ولو كان غير الياء:
(يَجْرُؤ) أيضاً تُكتب على الواو لأنّ الحرف السابق لها مرفوع،..


4- طيّب إذا كانت الياء مكسورة: (يُهَيِئ)........ وهنا تُكتب على النبرة القاصية، غير المشبعة، أو التي بهذه الصورة الموضّحة: (ئ)،..

5- طيّب إذا سبق (الهمزة) حرف ساكن: (دِفْء).............. وهنا تُكتب على السطر (ء)،..


6- مع ملاحظة أنّ الخوض في البنية الدلالية- النحو أيضاً يقودنا لطرق كتابة الهمزة، يعني الإعراب برضو بدّيك القاعدة:
جاءني دِفْؤها، على الواو لأنّه يناسب الرفع،..
ظللتني بدفئها، على النبرة لمناسبة الجر،..
تلقيتُ دِفْأها،...
وهنا تحديداً (تلقيتُ دِفْأها) ملاحظة، فالقاعدة كما هو واضح يجب أن تنتهي إلى كتابة الهمزة بهذه الصورة (أ) في حالة النصب، كما تقدّم أعلاه، ولكن الاصطلاح جرى على أن تُكتب هكذا: دفئها، أي بدون فرق عن حالة الجر، وأنا شخصياً أمتلك الشجاعة لأكتب كما يقودني المنطق والبنية الداخلية للغة دون خوف.

وتحياتي،...


معليش: مع أي شيء أعتذر،...
ليشنو: لأي شيء هو،...
هولي: هو لي،... هولك: هو لك،..
هسّه، وهسّع: هذه الساعة،..
كيفنّك: كيف إنّك؟
براك، براي، برانا: براءتك، براءتي، براءتنا،...
ومنها براءة اختراع، أي ما يخص الشخص وحده، بُرءاً لنفسه، وهي أفصح الفصاحة،...
قشط: فصيح
انشحط: فصيح، ولكن باستخدام البدو لها، بمعنى البُعد،
الدرب انشحط، واللوس جبالو اتناطن
والبندر فوانيسو البيوقدن ماتن
بنوّت هضاليم الخلا البنجاطن
أسرع قودع أمسيت والمواعيد فاتن
(والأبيات للطيب ود ضحوية، وليست لشاعر مجهول، كما كتب الطيب صالح على مدخل كتابه).

لطيفونة

لدى الاستفهام نقوم بحذف الألف من (ما):

فنقول: لِمَ

حَتَّامَ

إلامَ

علامَ

بِمَ

فيمَ

فبمجرد أن تجد حس السؤال والتساؤل (الاستفهام) واجب عليك حذف الألف،..

إلى حين إنزال اللطيفة التالية، نظل في الانتظار.

الأخ فردة .. في انتظار إسهامك المنتظر. قرأت لأحدهم أن "الترقيم" البياني ليس من أصل اللغة العربية. وكان الأولون في كتاباتهم يصلون الكلمة بتاليتها دون حاجز ترقيمي، إلى نهاية الموضوع. لا أعلم مدى صحة هذه المعلومة. إشهامك في هذا البوست قد يكشف لنا عما نجهل.
ولك الشكر.

أين أنت يا محسن؟

عليك النبي يا محسن واصل عشان خاطر الكتابة
و
*
*
*
(
ترفع عن كل سفيه وذمّهُ
خلقُكَ يأبى عليك تميلُ

وحيِّ كل شريف نطق حقاً
وضع على حرفهم إكليلُ
)
*
*
*
أرجو إعادة تشكيل النص أعلاه وهو (للشاعر) ود الشيخ
وفتح فصل للدروس الخاصة ..
وشكراً ...

- الناس دي ما عايزة كتابتا تنصلح والا شنو؟
- .....
- طيب مالن بخلو زي البوست ده يحتل؟
- .....
- إنت ما سامعني والا شنو؟
- ....
- طيب كان ماب تسمع ماب تقرا؟
-....
- خلاص أنا بدفر البوست لي قدام وانت الله يعدل علينا وعليك.

الزول ده مشى وين؟ يا زول الكتاب خربت .. وفي مطالبات بتحسينها بشرط تغييرها. يعني فرنساوي كده وللا سنسكريتي.

يسلم السلام من تكنيك النضم، يسلم السلام ويطيب من عَوَجة مقاصدنا حد يكون السلام،..
السلام متعافي، عليكم،..
يا أحباب خليكم متلخبطين بالحزن، وبالرماد، طوّالي طوّالي، في الحزن معرفة وخَرَس جميل،...
اخرسوا من حزن،..
أو قولوا من طول صمت الأصدقاء، سنعبر،...

شنتير،....
تحياتي يا عزيز،... وماك طيّب؟؟
طبعا الترقيم ليس من أصل "الكتابة" العربية مش "اللغة"، ولا غيرها من اللغات حسب علمي، بل هو اجتهادات حداثية، (ولا حتى النقاط كما تعلم –بخصوص اللغة العربية) مع أنّها من بنية النبر، وواجب توضيحها، وكتاب الأصنام باعتباره من النصوص العربية الأقدم، لو رأيت مخطوطاته تجد أنّك أمام خربشات آخر ما يمكن أن تكونه "الكتابة" الحالية،...
وأنا معك أنتظر الأخ فردة ليُرينا رؤيته كي نستفيد منها جميعاً،...
وليك السلام آخوي،...

بدري الياس،....
إزيك يا زول، وأهو وصلنا وبنشوف الفي الكتاب، ربك يسهّل،..
إنت بس كان أنا سهيت والله شالتني موتة وألا سفرة، أدفر البوست قِدّام، وأهل الرايحة بلقوها،...
وتحياتي يا عزيز،...


أهو جينا يا شنتير،...
وين حاجاتك بتعة اللغة ديك، فكّها هنا، في البال حاجات كتيرة، بس خايفين الكتاب المبسّط يتحول إلى كتاب نحو ممل،...





أصدقائي كلكم،...
يبدو أنني متعب جداً، على غير العادة، فالتعب والألم والحزن المؤجلون بتمامهم، لحقوا بي عند هذا الحد من الدنيا والدهر، لذا أعتذر منكم، فاليومي أصبح مثل كأس لئيمة جدا، وبحال إمرأة لا تدري هي ولا أنت ماذا تريدان من بعضكما، الحب ينهار في طريقه إلى الحب، ودرويش وصديقه نوري الجرّاح يتحاوران منذ زمن طويل: الطريق إلى البيت أجمل أم البيت؟
سأعتني بكم، رغم تعبي، وأنتم هنا هنا هنا، الآن أؤشّر ناحية القلب،...

يا شقي .. الكتابة تطير .. ياخي شفّقتنا في رقبتك دي. نجعت وين آآ عكليت؟. تصدق أنا قربت اسوي لي فراش هنا واستقبل المعزيين .. وحيكونوا بوذيين عن بكرة أمهم .. نعمنّك طفشت وقلت لي راجع فسراع. والله حمدللا بسلامة الرجعة .. ومن دربك ده أدّها نومة يومين تلاتة .. وبعد داك تعال صلح الكتابة .. إن بقيتن بتتصلّح

والله ليك وحشة. ثم رابعاً: غتست وين؟ يعني ما "رفسوك"؟ الحمد لله من قبل ومن بعد ومن تحت ومن فوق

برضو في انتظار الزول الراقي فردة الذي كان مزنوقاً زنقة الكديس. أها ورونا الجديد القديم

معليش يا محسن .. أنا قصدت الكتابة، التي هي غير اللغة. يكتبوك الجماعة إياهم إن شاء الله. أنا عارف إنها الكتابة لكن ترانا بنقول اللغة. أها .. في الكتابة العربية .. حسب علمي شبه المتواضع لا يوجد ترقيم .. أما الكتابات باللغات الأخرى فلا علم لي بها لأنني وحيات عيونك وعيون الصيد لا أتكلم غير هذه اللغة المجغمسة

والله ليك وحشة ووحشات

شنتير،...
والله الكتابة تطير، هسي رأسي لا فيهو عربي ولا محل للتمباك،... يرعوها كيف ما عرفتها؟؟
بعدين بكاك دا ح يكون بكاء يوبيلي ماسي،...
والجماعة ياهم كاتبني برضو والكتبة بايتة، وشايلها زي الحنّة لأنها مطبوقة فوق كتبات كتيرة،...
ياخي مشهادي جايط الأيام دي،... وأتمنى كلو يوم لو أطير وأتبدد متل ريمودوس بتاعة عمك ماركيز، تشيل ملايات علي الحبل تشرّهن تقوم هي والملايات فو فو في السماء،... يبقيها علي الله دي،...

تسلم،...
حس أب جقرة والقَرَبين دوام باريني............. وأنا أخو اللينة كان يبقه الحديث عانيني،... (جدك ود ضحوية يرد على الضرير في مجادعة)

محسن خالد
دبايوا
بتزوغ وين يازول خلاص قلنا لقينا لينا واحة بقيتى تكب الزوغة
كدى ادينا الجديدالمفيد.

يا محسن خالد و الله العظيم
و كتابه الكريم
انا اكان في محلك اسيب اي شي
و ألبي طلب هاشم نوريت
ياخي دي نقلة نوعية كبيرة جدا
و ان شاء الله بكرة هاشم نوريت
يطلب من الجماعة البنزلو المديح
بردةالامام البوصيري او يا راحلين الي مني
بتاعة برعي اليمن .
و الله يا هاشم نوريت انتا مجيرني عديل
كلامك في اشياء كتيرة منطقي خاصة الوطنية
بس تجي تلبس جلابتك القصيرة بتاعة انصار السنة
ترجع الف سنة لي وراء
علشان كده انا اي بوست بتاعك قاريو داير اشوف
نهاية تفكيرك شنو خاصة انك زول ما ساهل
يعني عديل كده اناشايفك زول تمام
بدون جلابية انصار السنة دي و خاصة في مسائل التصوف
و موقفك من الاخوة الجمهوريين
سلام

هاشم نوريت،...
تحياتي يا عزيز،...
وصدقني دنيتي جايطة شوية، بس ليك وعد نجيض، من هنا لي بكرة، نباصرها،....
سنرى،...
وشكرا يا غالي،..

domdom،...
ياخي سلامات وماك طيب،...
واحمد ربك إنك ما في محلي،... لو ملاحظ كل الناس في البورد دا، بقولوا ما فاضيين ولو لقيت زمن وما برد عليك هسي، وبنجي راجعين،... ياخي جنس الكلام دا، أنا بكجنو عديل،... وبتمنى لنفسي ما تقولوا إلا مغبية وتبحت طايحة علي الأرض من فتفتة موت التعب مش تعب الموت،...
ودي أنا عاملها لرقبتي، ما للناس، (يعني تدور 24 ساعة زي المكنة) لأنني لا آمن نفسي على نفسي من التفكير،... أُريد لها الانشغال، بدل السهك أو حتّى مغازلة التجارب الغامضة-الرحيل لغابة إلى لا مكان إلى أي حُفرة بعيدة عن هنا، كل هنا،...
أو حتى تجريب الالتحام مع الغياب الكبييير،...
بس تفكّني الحاجات، وتلقاني هنا،...
وما بطوّل،...
تحياتي يا جميل

مرة كده يا محسن رجاء جابت كلام انا كتبتو زمان وحبت تستشهد بيه عشان ترفع من مقامى

ولما طالعت الكلام المكتوب لقيت فيه غلطة لغوية قدر الهجمة كمان مكررة ...وانا طبعا جابدنى ابوى بنضرس من الاخطاء اللغوية والاملائية...فلما شفت غلطتى ...عرفت انه اخطاء الكتابة فى المنبر ده "قضاء وقدر"..

جيت هنا عشان اشيد بجهدكم المقدر..فى البوست ده...وعلى موهبتكم الابداعية المعتبرة فى مقام الكتابة فى بوستات أخريات.."بضم الالف" والابداع قسم...

لك محبتى

وعـُـقـْـبان يا الـلّـصَـم عـادَن ليالي ســهـَـرْنا

محسن خالد .. الدُّخْري .. داير لي معاك زمْبَعة، بصحبة أقحاحٍ كِرامٍ كزاعرِ. وكزاعِر هذي لا بعلمها إلا الله والراسخون في فقه الشِّياص. يا رفيقي .. استمر هنا في إصلاح ما لا يمكن إصلاحه. ولك الضروع الدِّلاء .. أو كما قالت: الضروع الدَّلَوَة.

يا سيدي .. هل لك أن تشعلها حملة تطهيرية ركينة الجناب والعِماد؟. اشعلْها ودعْـها تحرق الغثاء.

ليك وحشة مرة أخرى. وأنا بين حضوري وغيابي .. أراك مفلقاً. وسوف يطووووووول غيابي وعشم حضورك.

إنت عفريت. وقد أتيتها من حيث تؤتى. فيا لك من سائس أنفسٍ عتيق. عتق دنّك ذواهب المعتقين (المعرّي قال هذا ردئ) ودارت كؤوس السعد (سنيحاً وبارحاً) فوق رأسك "المفارِق".

آآ جنى .. أنا كان ما لميت فيك عيني ما بتلاقي (دي رطانة يا مُحْسْ).

الليل أمسى وألبِل حرّرنّو مشيهِن
عَقَبَن موية .. والجبل أب قِرود راجيهِن
الـ خَلاني فرْض الخمسة ماقَـضِّـيهِن
رزْق الدنيا .. والـمِـحَـن البصارِع فيهِن

رحم الله شيخنا ود ضحوية .. وبوّأنا مكانته الأدبية.

يا زول إت مطَرطَش.

أنا تاني ما عندي بيك شغلة. من هنا وغادي ما بقدر أدافر الانترنت .. لأني معزِّل إلى ما شاء الله.

دمدم
دبايوا
شكرا على كلاماتك واتمنى ان اكون عند حسن ظنك وحكاية انصار سنة دى نخليها
حسى وارجو ان تكون من الموجودين هنا عشان تساعدنا فى مناشدة محسن كما
والراجل نستطيع انو نستفيد منو بس يخلى زوغاناتو دى .



الاستاذ محسن خالد
دبايوا
الاسئلة كثيرة والهموم كبيرة بس شوية وقت منك تخصصه لنا ستعم الفائدة
ودمت.

أولاً عذري يا أصدقائي جميعا، انتهينا من السفر دخلنا في مشهاد الحُمى، وما زلت بنصف روح،...



تماضر،...

تحياتي يا عزيزة، وأوافقك إنو في أخطاء قضاء وقدر، وأنا بعد فلهمتي دي كلها، كل يوم أقرأ فيهو واحد من كتبي ألقى بالة أخطاء مش خطأ واحد، وأرجع للناشر والديّة تقوم، لأنو ح يضطر يستخدم بليت جديد للطباعة،..
وتحياتي لك يا جدعة،...

شنتير،...

ياخوي هسي أنا محمووم، ورأسي نمل نمل،..
بعدين بلاد الساكي دي ما جربتها، بس ما تخاف، بقوم أسك ليها تأشيرة وأخليك توصف: لا شارع تايوتا خليهو،... تمسك سوني طوالي وتدلى بعدلك، لامن تلم في بنايات توشيبا، أها...
خلي الحمى تروح، أو تروحنا،..

هاشم نوريت،...

تحياتي يا عزيز،...
وهسي المادة جاهزة، يعني فكّرت فيها، بس كيف نتنتنها في الكمبيوتر ونراجعها، مِد الصبر براحات،...
وسنرى،..

متأخر بعض الشيء، فعذراً يا أصدقاء.

أتفق معكما يا شنتير ومحسن خالد. الترقيم – أو العلامات البيانية – هو ظاهرة حديثة ، وهي مربوطة أساساً بعصر الطباعة. فالترقيم ينتمي للعلامات الصورية ، يعني هي (visual signifier) وليست مثل الحرف المكتوب على الورقة فـالحرف المكتوب هو "صورة تدلُ على صوت". فعندما تقرأ صورة الحرف "أ" فأنت تستبدله بـالصوت "أ". ولكن حين "تقرأ" (أو، للدقة، حين "تبصر") العلامة: فاصلة "،" أو نقطة"." فإنك تستبدلها بتبديل في سرعة استرسال القراءة أو وتيرة اندفاعها. أو بالصمت التام مثلاً. وهكذا، فإن علامة الإستفهام في قصيدة لإمريء القيس مثلاً ستبدو مثل ساعة رقمية على معصم فارس يرتدي زيَّ العصور الوسطى.
لم يكن الترقيم معروفاً قبل الكتابة، والأهم ، أن الكتابة نفسها لم تكن مركز اللغة. كان الصوت سيد الموقف.
ولكننا نخطيء لو ظننا أن الكاتب القديم لم يكن يُعمل الترقيم – أو يدرك أهميته – في قصيدته مثلاً. العلامات البيانية تمفصل المعاني، تعيد ترتيب وإحكام التراكيب اللغوية ودلالاتها. وللصوت أيضاً علاماته البيانية. إن الإلقاء (ويسميه البعض فناً) هو في حقيقته تجليٍّ لقدرة القاريء أو المُلقي في "ترقيم" و"تنويت" النص المقروء: الضغطُ على كلمةٍ ما، تلوينُ الصوت، إرتفاعُ وتائره، إنخفاضُها، الصمتُ المفاجيء، الإسترسالُ والتتابع – كل هذه علامات بيانية مهمتها أن تُـدخل النصَ المقروءَ فضاءَ الأذن السامعة، منوَّتاً بحركية المعاني وجدلها (وبجماليات الصوت أيضاً!)
طبعاً، العرب تعلموا العلامات البيانية مؤخراً جداً، لذلك لا يعرف أغلب من يستخدمونها في العربية سوى علامات محدودة جداً: النقطة، الفاصلة، التقويس، وعلامتي الإستفهام والتعجب، واستخدامها يكون فقيراً جداً. هنالك بالمقابل إرث ضخم في العناية بالعلامات البيانية في الإنكليزية. ومثلما يقول لك مدرس اللغة العربية – لتضخيم أهمية الإعراب والتنوين – أنَّ كلمة "في" دي بـتـْجُر "الفيل" ذاتو!، يقول لك مدرس الإنكليزية أنْ: the Full Stop, or the Period, will stop a speedy train on it's tracks!
هنالك كتاب صدر حديثاً عن العلامات البيانية في الإنكليزية، تأمل معي غلافه الطريف، ولك أن تتمعن خطورة الأخطاء الفادحة في العلامات البيانية التي يمكن أن تصيب المعنى الذي تقصده في مقتل:

إليك إذاً هذه اللطيفة القصيرة عن التقويس:
إذا فتحت قوساً في منتصف الجملة (لتضيف شرحاً، أو جملة واصفة، أو إعتراضية مثلاً) فاحرص على أن تغلق القوس وتأكد أن جملتك النحوية ستظل مكتملة ومتواصلة حتى لو سحبت القوسين وما بينهما تماماً.
الجملة السابقة نفسها تحتوي على مثال جيد لما أعنيه. فلأعيد كتابتها مرة أخرى إذاً دون الأقواس:إذا فتحت قوساً في منتصف الجملة فاحرص على أن تغلق القوس وتأكد أن جملتك النحوية ستظل مكتملة ومتواصلة حتى لو سحبت القوسين وما بينهما تماماً.

أيضاً، تجنب أن تفتح قوساً في منتصف (أو بعد كتابة فعل ينتظر فاعله، أو وصف ينتظر الإكتمال، أو بين مضاف ومضاف إليه،) الجملة. هل تبدو لك الجملة السابقة مرتبكة التركيب ومختلة المعنى؟ هي كذلك، لأن التقويس المستخدم فيها يفصل المفردات قسراً بدلاً عن أنْ يمفصل المعاني ويربطها.
أخيراً، لا تثرثر بين القوسين للأبد! فإنك حينما تفتح قوساً فكأنك تقيم موعداً مع القاريء على الضفة الأخرى من النهر. والى أن تغلق هذا القوس اللعين (عذراً للمغاربة السودانيين) قد يمل القاريء الإنتظار وقد يصيبه الإرتباك وربما يفقد الإهتمام.
من المهم في الكتابة وتجويدها هو لا ننظر الى الترقيم واستخدام العلامات البيانية وكأنما كانت إجراءاً تقنياً منفصلاً عن الكتابة، فالعلامات البيانية هي جزء أصلي من مجهودك وفعلك الكتابي، وهي أيضاً تتطلب ذات العناية والتجويد الذي نوجهه للنحو والقواعد والإعراب.

أما أكثر العلامات التي يثيرُ استخدامها غيظي في سودانيز أون لاين فهو تكرار علامات التعجب "!" أو الإستفهام "؟". فهذا يوحي لي بأن الكاتب يتوقع فيَّ الغباء، وأحياناً أقول أنه قد عجز عن قول ما يريد، وينتظر مني أناأن أقوم بالمجهود نيابة عنه: عليَّ أناأن أتخيل حدة غضبه، دهشته، فرحه، الخ. لست أدري بحق الجحيم لمَ يفعل البعض ذلك؟؟؟؟؟؟!!!!!؟؟؟!!؟؟؟؟!!؟!!!!!

ح.خير

farda،...

تحياتي، لقد هُددتُ تماماً، لأكتب هناوبالحمى والرهق، معلقا أو محرضاً،... وأها بكرر الكلام المكجنو، ح أجي لكلامك تاني،..
وإلى ذلك الحين، واصل أنت هنا في موضوعك، واترك لي عنوان الدار التي أصدرت ذاك الكتاب لو أمكنك،..
وتحياتي أبدا،...
ودم بخير

محسن خالد
فردا
سلامات
وفى انتظار المزيد.

محسن خالد،

لا عليك. سنواصل الى أن تعود.
يمكنك الحصول على Eats, Shoots & Leaves بزيارة موقع الكتاب نفسه هنا:
http://eatsshootsandleaves.com/book.html
أو من أمازون هنا:
http://www.amazon.co.uk/exec/obidos/ASIN/1861976127/026-4875863-3465214

ح.خير

Quote: Eats, Shoots & Leaves

A perfect riddle; if not properly punctuated.0

Thanx ya Farda for this funny, telling example.0

هاشم نوريت،...
إزيك وماك طيّب، أها الليلة فيها عمار،..

فردة،...
يا عزيز، أستمر طوالي، وما تهم بوجودي وعدمو،...
واصل،...
أنا طبعاً ما راجي الأقواس والفواصل والشرطات والنَقْط، ولا علامات التعجب والأسئلة والكلام دا، داير أشوف ما بعد داك، وحتى ما بعد علامات القرآن البيانية: (قلي، صلي، لا، م، نهي وسجدة) ودي برضو كانت محاولات فقهاء يا شنتير،...
لأنو عندي رأي إنو طريقة الترقيم العربي دي لسه في الروايات دايرالها اجتهادات،...
ولاحظ قصة يوسف، سورة (يوسف) –الرواية، كيف كانت صعبة في توجيه الحوارات، الحوار لأنو بدون ترقيم كان محتاج ينزل في بنية النص،...
واصل،...

شنتير،...
أريتك عافية،...
وكُن بخير يا عزيز

لطيفة حول كتابة الألف الممدودة والمقصورة

هنا أيضاً نعوّل في كتابة الألف على الفعل المضارع، وهو الفيصل الوحيد بالإضافة للمصدر في طريقة كتابة الألف،...

فيما يخص الأفعال:
هل الصحيح أن نكتب:
غلا الماءُ على النار......... أم: غَلَى الماء
علا الطيّار بطائرته.......... أم: عَلَى الطيّار

فيما يخص الأسماء:
هل الصحيح أن نكتب:
(رُبا) جمع رابية ..... أم: رُبى
خُطَا......... أم خُطَى

القاعدة هي استخراج الفعل المضارع أوّلاً والمصدر ومن بعد الحُكم،..
1- غلى.............. يغلي............. غلياناً
الذي مضارعه أو مصدره بالياء يصير لألف مقصورة:
إذن الصحيح: غَلَى

2- علا........ يعلو ............... عُلوَّاً
الذي مضارعه أو مصدره بالواو يصير لألف ممدودة:
إذن الصحيح: عَلا

وكتطبيقات:
دعا............. يدعو.......... دعاءً
خلا............. يخلو.............. خُلوَّاً
***
مضى........... يمضي........... مُضاءً
زنى............. يزني.............. زِناءً

(يعني في حالة المقصورة بتشابهو شوية في الشكل (ى) (ي)، لكن أعملوا حسابكم دا لمجرد التسهيل، لأنو واحدة ألف والتانية ياء، يعني فرق الليل والنهار)،...

بخصوص الأسماء:
نَفْس القاعدة، مضارع/ مصدر وبعدين الحُكم:
1- خُطا الاسم، الفعل منها،... خَطا.............. يخطو........... خطواً
المضارع والمصدر (واو) إذن تصير لألف ممدودة

2- رُبا الاسم، الفعل منها، رَبا.............. يربو........... رُبُوَّاً
المضارع والمصدر (واو) إذن تصير الألف ممدودة،..

نموذج للألف المقصورة:
لُقَى الاسم، الفعل منها،.. لقي.... يلقى.... لقاء


سلامات:
ممكن نخلي: سارا سوياً، بقصد معاً،...
سوياً تعني مستقيما وليس معاً،...
فإن كنا نقصد المعية وجب علينا أن نقول: سارا معاً،.... بعداك يتلولو في الدرب وألا لا ، دا شيء تاني
والزخم بقصد الاحتشاد والكثرة، هي لا تعني لا الاحتشاد ولا الكثرة، وحتى بقت غلطة قديمة والناس خلتها من الاستخدام بهذه الصورة،.. لأنها تعني اللحم المتعفن والمنتن الرائحة،..

والناس أيضاً يقولون بإدماج الشركتين في بعض،.... وهذا خطأ،..
الصحيح بدمج الشركتين،...
لأن الفعل أدمج موجود بالفعل ويعني لفَّ الشيء بالشيء، وليس أدخل أو دغم الشيء في الشيء،...

وطيبين،...

هناك أخطاء كثيرة يمكن أن أساهم معك في إيضاحها. ولكن ماذا عن علامات الترقيم؟

هناك أخطاء كثيرة يمكن أن أساهم معك في إيضاحها. ولكن ماذا عن علامات الترقيم؟

عزيزنا محسن
تحية لك ، وأنت
تُشير علينا وتضيء
مواضع الضعف لنُصلِح
اللغة والإمــــلاء ، وهي
مفتاح للقراءة
وللكتابة .
شكراً لك ،
ونحمد عودتك من السفر حتى نلقاك

عبد الله الشقليني،...
تُشكر يا أخي، وتحياتي لك أوفرها،..
أهي محاولة، وبرضو الخوف يترصدها من أمام ومن خلف، خوف الخطأ والدعوة له،...
وتحياتي لك إلى حين لقاء قريب،...

محسن خالد
دبايوا
صدقنى ناس يربو ديل عملوا لى ربو فى المخيخيخ ماعلينا

لكن قول لى هل صحيح ان نكتب(مساءا) كما هو شائع ام (مساء) والتنوين على
الهمزة (ماعرفتها موجودة فين على الكى بورد)
وقس عليها بقية الكلمات التى اخرها همزة على السطر وقبلها الف.

نوريت،...
سلامي يا هاشم،..
ياخي إنت أدروب شنو؟ أسئلتك كلها عكاز –شوتال في الركبة،...
وصحيح هنا في شوية ربكة،...

نجد أن الكتابة لكلمات مثل: مساءً، قضاءً، ضياءً، سماءً،.... تتم على هذا النحو، يُوضع التنوين هكذا بدون ألف متأخرة،...
بينما كتابة كلمات أخرى مثل: ضوءاً، جزءاً، نوءاً،... يتم فيها تثبيت الألف،...
والثابت هو أنّ أساتذة اللغة منذ عهد الفقهاء رأوا أن لا يكتبوا الألف مرتين، في حالة الكلمات التي تكون فيها ألف سابقة (نموذج المجموعة الأولى) لا نكررها،..
أما في نموذج المجموعة الثانية، فلا بد من كتابتها، لكي لا يسقط صوت الحرف حين القراءة،..
يعني هم لا يكتبونها في الحالة الأولى حفاظاً على شكل الكلمة،...
ويكتبونها في الحالة الثانية حفاظاً على بنيتها،...
جات معاك يا ود نوريت وألا نحرتها تاني؟
(بعدين علي الكي بورد عادية بتكتب الهمزة من (X) والتنوين عليها من حرف (ص: W)، وجرِّبها علي كدا)،...
وتحياتي يا عزيز

معاً

خضر حسين خليل،...

شكراً يا ذوق،...

وسوياً،..

الإلفة خطأ.............................. الصواب: الأُلفة

خطأ: في هكذا موضوع. صواب: في موضوعٍ كهذا.

إزيك يا مـحْـس ود خالد. كيف أحوالك؟.

يا أخي أنا حكاية: هكذا موضوع دي عملت لي عقدة. نفس العقدة التي عانيتها من مفردة البنفسج. لقد كرهت مفردة البنفسج تماماً، وبعدها الالق.

قلنا نسلّم عليك لأنك واحد من قلائل الظرفاء الخسوسيين.

سلام جميعا
الأخ محسن
شكرا على هذا البوست المفيد
أمجد

Shinteer،...

تحياتي يا شنتير،...
يايخي الحكاية دي ما قلنا مشهادها زمان، إنت محرقة روحك عند زول وألا شنو؟
بعدين قبل كم يوم، لقيت لي حوار عاملاهو معاي مجلة وأنا ذاتي كاتبها "حبيبتك هكذا بطولها،..
أها الليلة أمش ماتنوم،..
وأبقه عافية،...
وإنت أهم الظرفاء الحلوين في هذا المكان،...


Amjad ibrahim،....

تحياتي وسلامي، وأنا أشكر لك اهتمامك به،..
ودُم بخير،...

لطائف نتشه



الغِواية،... بالكسر خطأ، الصواب (الغَواية) بفتح الغين


الغِلالة،... بالكسر خطأ، الصواب (الغُلالة) بضم الغين


العَنجهية،... بفتح العين خطأ، الصواب (العُنْجَهية) بضم العين


لا تقل (عَياناً بياناً) بفتح العين خطأ، الصواب (عِيانا بياناً) بكسر العين،..


وأيضا (شاهد عِيان) بكسر العين وليس بفتحها،..


الودِع، (ست الودِع) الكلمة فصيحة، ولكن (الودَع) بفتح الدال وليس بكسرها،..

أنا (الإنسان) ولست ظاهرة، والموت لا وجود له سوى على حياتي، فأيُّنا الظاهرة؟

الأعزاء، غصباً عنا، وشوية شوية، نجد أنفسنا مضطرين للخوض في أُسس الدلالة اللغوية، بنية النحو، ومفارقين لشكل الكتابة، هناك الكثير من القواعد البسيطة، ولكن الناس هنا "يتردونها ترداً، جنسو بَرَا"، هذا المكان هو عالَمٌ ليس من الافتراض أو الوهم التكنولوجي، كما يروّج الكُسالى والمتهرّبون من ضرائب الكتابة "وقطايعها"، بل هو عالمٌ من الكتابة، وشروط هذا العالم كلها موضوعةٌ على أُسس الكتابة، فيا أحباء رجائي إليكم دعوا العجرفة الجاهلة، وتعالوا إلى هذا المكان واذهبوا أيضاً إلى غيره، لمجرّد محاولة تحقيق شروط هذا العالَم،..

(الأفعال الخمسة)

(يفعلان... تفعلان).... (يفعلون... تفعلون) (تفعلين)
أمثلة:
(يذهبان... تذهبان) ... (يذهبون... تذهبون) (تذهبين)
أها ديل مالم؟
هذه الأفعال الخمسة (الصياغات) تُنصب وتُجزم بحذف حرف "النون"، وفي حالة الرفع تترك النون لتكون علامة الرفع،..
حروف النصب: (أن)، (لن)، (كي)، (إذن) (واو المعية)، (حتى)، (لام التعليل)، (فاء السببية) (لام الجحود)،..
حروف الجزم: (لم) ، (لمّا) ، (لا الناهية)، (لام الأمر)

أنا هنا تجاهلت عن عمد حروفاً أخرى، وعن الجوازم التي تجزم فعلين، نحن بصدد ماهو ضروري، وليس احترافي،...

طيّب خطأ قولك: حتى يمضون في هذا الاتجاه.... الصحيح: حتى يمضوا في هذا الاتجاه...
ولاحظ العطف أيضاً، هناك من يطبّق القاعدة مع فعل ويتجاهلها مع أفعال معطوفة عليه، ...
كأن يكتب: حتى يمضوا في هذا الاتجاه ويصلون إلى نتائج تشرّفهم ويفرحون بذلك،.. هذا خطأ إذا جاء ناصب وهو في مثالنا هذا (حتى) وتلته أفعل أخرى، إن شاء الله 100 فعل، كلها تنصب، عطفاً على الفعل الأول،...
الصحيح: حتى يمضوا في هذا الاتجاه ويصلوا إلى نتائج تشرّفهم ويفرحوا بذلك.

يقول حبيب لمن أعطته شاكوش: لن تتركيني لتمضين مع ذلك المغترب،.. خطأ..
الصواب أنّ لام التعليل تُوجب حذف النون، الصحيح: لن تتركيني لتمضي مع ذلك المغترب،..

الجزم:
ألم تذهبان إلى المدرسة بعد؟ وهذا سؤال ضال وغير صحيح،...
الصواب: ألم تذهبا إلى المدرسة بعد؟
أداة الجزم (لم) تحذف النون من آخر الأفعال الخمسة،..
لا تجادلين وكأنك الأعرف بالحقيقة،.. وهذا خطأ،..
الصواب أنّ (لا) الناهية تُوجب حذف النون،...
لا تُجادلي ولا تكذبي ولا تسرقي،.... إلخ


يبدو أنني نعست وسأعود لنفس النقطة لألوكها حتى يفتح الله بيني وبين من يتردون الكتابة واللغة في هذا المنبر، عفوكم

up

up

يا أخوانا (لا الناهية) دي بتأثّر على الفعل المضارع، بتجذو جذ،..
سواءً كان من الأفعال الـ5 أو إن لم يكن:

في القرآن، الفعل: يقفو....
تدخل لا الناهية،... لا تقفُ ما ليس لك به علم،... شايفين؟ جذت حرف العلة طوالي (الواو)، وكُتبت ضمة على آخر الفعل،..
يخبو............. لم يخبُ.... حرف الجزم (لم) أيضاً يُقصي حرف العلة (الواو)، وكُتبت ضمة على آخر الفعل،..

يرمي........... لم يرمِ............. .... حرف الجزم (لم) أيضاً يُقصي حرف العلة (الياء)، وكُتبت كسرة على آخر الفعل،..

يلقى..... لم يلقَ.................... حرف الجزم (لم) أيضاً يُقصي حرف العلة (الألف –طبعا الحرف دا كدا (ى) يعني "ألف" مش "ياء")، وكُتبت فتحة على آخر الفعل،..

أما الأفعال الخمسة، مع لا الناهية، فتحذف النون مع حالتي النصب والجزم،...
الصحيح: لا تكتبي على الجدار،.............. فخطأ إن تكتبها (تكتبين)
الصحيح: ألم تغفري............... أو.. ألم تغفرا....... أو... ألم تغفروا.......
فخطأ : تغفرين ... تغفران.... تغفرون... لأنّ (ألم) هي (لم) مع صيغة السؤال،..

طيّب (لام التعليل):
بمعني (لكي) يحدث كذا وكذا،...
هذه اللام، تنصب الفعل المضارع وتحذف (نون) الأفعال الخمسة، ولا تحذف أبداً حرف العلَّة،...
كيف؟
أنتظرك (لــــ)ـتقولَ لي كيف جئت،..
هنا تنصب الفعل المضارع (تقول)،..
طيّب نحن عارفين مع أدوات النصب مفروض نحذف نون الأفعال الخمسة،..
ولام التعليل من أدوات النصب، كما بيَّنا أعلاه،..
يجتهد التلاميذ ليكتبوا قصيدةً،.. لا يجوز أبداً قولنا (ليكتبون)، بل يكتبوا، بنون محذوفة،..
أمّا كونها (لا تؤثِّر) على الفعل المضارع بحذف (حرف العلّة) منه، فنفس المثال:
أنتظرك لتقول لي كيف جئت،.. هذا هو الصحيح،
الخطأ هو أن نتعامل معها كأنها لام أمر: فتصبح الجملة، أنتظرك لتقل لي الآن كذا وكذا،.. أي حذفنا (الواو العلي) في تقول، وهذا خطأ، هي لا تؤثِّر على العلّية،..

(لام الأمر):

تقوم هذه (اللام) بجزم الفعل المضارع، وبحذف نون الأفعال الخمسة، كما تحذف حرف العلة من الأفعال المعتلة،..
(يعني بتخرب خراب القرنتية في البرسيم)
وهي اللام بمعنى (افعل كذا) بصيغة الأمر،...

جزم الفعل المضارع:
لـــتقل لي كيف جئت، وهذه جملة أستاذ أو أب أو صاحب سلطة لآخر واقع به الأمر،..
الفعل تقول: مع لام الأمر لــتقل،.... حذفنا الواو
ومثلها،... لتنم الآن....... بدل تنوم

لتُعْطِني هذا الكتاب،.... بدل تعطيني..... نحذف الياء

بالنسبة لنون الأفعال الخمسة:
تأمر أمٌ ولدها الأكبر بخصوص إخوته الأصغر منه: ليمضوا معك إلى حيث تلعب،،..... مش يمضون،... نحذف النون
لو له أخوان: ليمضيا معك،.... مش يمضيان،..


لو أسرة متحررة شوية، سيأمرون بنتهم: لتمضي مع أصحابك،..

ولاحظ الأخيرة ليست (لتمضِ) لأنّ الياء الأخيرة هي (ياء المؤنّث المخاطب) ولذلك تبقى كما هي لأنو دي ما عندها علاقة بياء العلّة،..
فإن كان رجلاً نقول: امضِ مع رفاقك،.. (نحذف الياء، ونكسر الضاد)
اشترِ حلاوةً،.. (نحذف الياء، ونكسر الراء)
وإن كانت امرأة نقول:
امضي مع رفيقاتك
اشتري حلاوةً،

بالنسبة لحرف العلة ولام الأمر:
لتمضِ من هنا يا رجل،.. وليس: لتمضي من هنا يا رجل،.... هكذا ستفهم اللام هنا لام تعليل، وإلا فعليك حذف حرف العلّة،..

انتبهوا للامات دي ولحروف العلّة جيداً،...


...

التحية لاستاذنا محسن خالد

هاشم نوريت،..
وتحياتي لك يا عزيز، وسلامي ومعزتي،..
كنُ بخير أبداً وأزَلاً

كنت متابع البوست دا من قولة تيت يامحسن ومفنجل عيوني منتظركم تحلوا لينا مشكلة تعريف حرف غير بإضافة الف لام التعريف، مثل قولهم: الغير سودانيين..وغير حرف والف لام التعريف يجب أن تلحق بالاسم والمصدر ولكن مش بالحرف..لتكتب: غير السودانيين..صحي؟

كتبت هذا ، فرموني بالعنصرية ،،،
فيروس يضرب المنبر الحر

banadieha،...
تحياتي يا رجل ومحبتي،..
هذا صحيح، فالحرف (غير) بالإضافة لـ(إلا) و(دون) هي روابط للاستثناء، حروف استثناء بالتعريف القديم، فلا يجوز تعريفها،...
هو بالفعل خطأ شائع ما أوردته -الغير سودانيين، والغير محرمين،...
وأيضاً الحركة نفسها مع (بعض)،...
فخطأ قولنا: مع بعضهم البعض، الصحيح أن (بعض) لا يدخل إليها التعريف،..
مع بعضهم بعض،..
خطأ: البعض منهم قال،........... الصواب: بعضهم قال،..
وصحيح أنّ التعريف يتم لبابي المصدر والاسم دون (الحروف)،..
وفي ما ندر يدخل التعريف على (الفعل)، وإن كانت هذه القاعدة معتمدة في كل عاميات البلدان العربية،..
البت دي أنا الرَّسلتها للدكان،... سوداني،..
نحن الريايل اللنيب الأغراض هاي،... خليجي
دا اللجبتها يا بيه،......... مصري،..
مو أنا اللّبعتها يا زلمة،........... شامي
أما الفصيح فمثل قول الفرزدق: ما أنت بالحكم الترضى حكومته،..
هذا رأي فقهاء اللغة، ولمحسن خالد آراء أخرى،...

ودقاسم،...
التحايا،..
رجعت للمادة وهي دعوة جيّدة في تقديري، للّغة، وليس للعروبة، لأننا بأي حال نتحدّث العربية، قراءة التاريخ والأصول والإثنيات ليس بوسعها حل المسألة، يتبقى حاصل أنّ الذي يتحدث العربية ويكتب بها عليه أن يتحدثها ويكتبها كما هو صحيح،..
وهناك من يعتقد بأنَّ الكتابة مزحة، وهذا شيء يؤلمني على نحو خاص، الذي يريد أن يكتب عليه أن يتعلم الكتابة، فنحن ولدنا بسوء الكتابة نفسه، ولكنا اجتهدنا وأدّبنا أنفسنا لنبدّله،..
وكُن بخير،..

Quote: فخطأ قولنا: مع بعضهم البعض، الصحيح أن (بعض) لا يدخل إليها التعريف،.. مع بعضهم بعض،.. خطأ: البعض منهم قال،........... الصواب: بعضهم قال،..

مشكور يامحسن على النقطة دي بالذات وتستأهل عليها دن شربوت نقي ودافئ فقد ظللت أكتبها العمر كله أتوماتيكيا وكتبتها آخر مرة هنا وللمرة الأخيرة إن شاء الله في ترجمة موضوع السودانيين المحبوسين في بغداد..ربنا يفك أسرهم

Banadieha،..
مشكور يا عزيز،..
لكن... وبيناتنا، المحل دا هنا محل آبري وتمر، جنس زرّيعتك تربيع دي، حد الشربوت، شيلها وأسبقني بيها علي تيموليلت، هسي بجي، فوق دربك،..

يا شباب أنا أخدت لي خفسة في البورد دا اليوم، لقيت واحد دون شك تاوق هنا، في لا الناهية،..
ولمّ في الأفعال المضارعة التي كتبها جذَّاً، كررها مع كم فعل، ما جعلني أتيقّن بأن هذا الشخص يقصد لا الناهية، لكن الخطأ الذي وقع فيه، أن (لا) التي قصدناها هي (الناهية) و(لا) التي أجرى عليها تطبيقاته للأسف كانت (النافية)،..
لا النافية تنفي، ولا تنهى،.. لا حظ أنني في جملتي هذه نفسها،
كتبت: لا النافية تنفي، ولا تنهى،... أي أنني لم أقم بجذ حرف العلّة في (تنهى)،..
أما لو كانت الناهية، لكان الأمر هكذا: لا تنهَ عن خلقٍ وتأتي مثله،...

(لا) النافية للجنس، قاعدتها هي، الاسم الذي يليها "اسمها" يُبنى على الفتح، لاحظ يبنى، وليس يفتح فحسب، يعني لا إعراب له سوى البناء على الفتح، يعني حركة الفتح ثابتة معاهو وين ما طار ولي ديمة،..
أما الاسم التالي لاسمها فيكون صفة منصوبة، إلى الأبد،..
لا أحدَ حاضراً،..
لا أحدَ مهتماً بهذا البوست،..
لا رجلَ مغموطاً حقه،..

سلام عليك يا زول يا نجيض. نعلّك بيخير آ ضراعي.

البوست ده يجب تخليده .. علّه يزيل بعض العلل، أو ما وصفه ود قاسم قبلاً بالفيروسات أو شيئ من ذلك.

أها أنا سادر. ودعتك الله

شنتير،..
لعلّك عافية آزول، والله متقريف لك بالحيل خلاص، إلا إيميلك طاشي مني، وكل يوم أقول أنتلك إيميل ببتاع البورد دا، أشوف الزول دا حي وألا ميّت، وما أخبرلو، إلا أعمل ربلاي وبس، دحين آخوي هسي رأسي تقل خلاص، وبقيت زول نوم، لكن من الليلة لا بُكرة، راجي منك كلام خاص علي إيميلي،..

هناك كتابة قديمة، بعد تمحيص فيها من أساتذة اللغة، ولكي تتزن الكتابة في مناطق ثانية ومع حركات أخرى قاموا بتعديلها، أمثلة:
قديم: قرأوا................. حديث: قرؤوا
قديم: بدأوا.......................حديث: بدؤوا
قديم: شئون..................... حديث: شؤون
مسئولية: مسؤولية، ......... مسئول... مسؤول

لطيفة أخرى:
الاسم الذي يلي (لولا) دائماً يكون مرفوعاً،..
لولا الماءُ لهلكت
لولا الولدان،........ لاحظ ما تقع في المقلب، المثنى يُرفع بالألف
لولا المقاتلون.............. جمع المذكر السالم يُرفع بالواو،...

وهناك القول الجميل لجرير،...
لولا الحياءُ لهاجني استعبارُ........... ولزرتُ قبرَكِ والحبيبُ يُزارُ
وَلَّهتِ قلبي إذ علتني كِبْرَةٌ........... وذو التمائم من بنيك صِغارُ

وهناك القول القبيح، من إعلام الكيزان:
والله لولا اللهِ ما اهتدينا، وهذا تحريف جاهل لقول ابن رواحة،..
يا كيزان يا بتاعين العروبة والإسلام، الاسم الذي يلي (لولا) يكون مرفوعاً،..
والله لولا اللهُ ما اهتدينا،.. اسم الجلالة الأوّل بالكسر لواو القسم، والتاني بالرفع لأنّه تالٍ لولا،..

غبت عن هذا المكان طويلاً يا صديقي يا محسن
ولكن وجدت أن علي أن أعبر من هنا لأقول لك ان ما تقوم به هنا كبير ، كله كبير ويشبهك
"خالص" فأنت كما أعرف تحترم ما تفعل.
وأقول لك: كثيرون يمرون من هنا ، وللأسف كثيرون منهم لا يسرهم الذي تقوم به. وأنت تعرفهم ؟
فهم لا يودون الاعتراف بأن:

Quote: هذا المكان هو عالَمٌ ليس من الافتراض أو الوهم التكنولوجي، كما يروّج الكُسالى والمتهرّبون من ضرائب الكتابة "وقطايعها"، بل هو عالمٌ من الكتابة، وشروط هذا العالم كلها موضوعةٌ على أُسس الكتابة

محبتي وتقديري ،،،

تحياتي يا ود الياس،..
لك امتناني، والمحبَّة،..
الزعل أكتر من موضوع الهمزات، مرّات الواحد يفكّر يعمل كوبي من اللطيفة بتاعتها ويمشي يلصّقها في أي بوست، يقوموا الصباح يجوا يلقوا درس الهمزات
دا في أي مكان كان يريحونا من الموضوع دا، وهو موضع جد بسيط، ما دايرلو عبقرية ولا طولة بال،..




طيّب للاختصار:
البادئة (است) لو لقيتها في أي محل، الكلمة أو الفعل ما بياخد همزة، إنما ألف (حاف)،..
استفهمت من الأستاذ،...... مش الخطأ (إستفهمت)
استلفت قروشاً من صديقي،.... مش الخطأ (إستلفت)
الاستقطاب،...
الاستمالة،...
الاستحضار،..

هنا صيغٌ، متى حضرت وجب علينا أن ننصب ما بعدها، مباشرة،..

1- بوصف + الضمير (الموجّه للكلام)............. لتصبح: بوصفي، بوصفها، بوصفه، بوصفهم، بوصفهن،.. إلخ،..
حيّيتُه بوصفه رجلاً فاضلاً................ بوصفها إمرأةً فاضلةً
ألقى عليهم خطاباً بوصفهم مرشّحين للتأهل (مرشحين) وليس (مرشحون)،..


2- باعتبار + الضمير (الموجّه للكلام)................. لتصبح: باعتباري، باعتبارها، باعتباره، باعتبارهم، باعتبارهن،.. إلخ،..
تناولتُه باعتباره كتاباً مهماً
ناقشتهم باعتبارهم المسؤولين عن القضية

3- (بكون + الضمير) وأيضاً (لكون + الضمير) (الموجّه للكلام)................ لتصبح: بكوني، بكونها، بكونه، بكونهم، بكونهن،.. إلخ،..

اعتذرتُ له لكونه رجلاً يستحق
أقنعتني بكونها مطلعةً على الأمر


والقاعدة الضابطة لما أسلفناه هي:
كلما يضاف الفاعل إلى المصدر يأتي الذي بعده منصوباً، مع فعل متعدٍّ تحديداً،...
شرب الطفلُ الشاي، شُرْبِه الماءَ
قاتل الفارس الأعداء، قتالِه الأعداءَ
(وعشان ما تجوط رأسك أحفظ الـ3 الفوق ديك (باعتباره، بوصفه، بكونه) وتكون ما قصّرت، لأنهن بتكررن كتير، ومستخدمات أكتر،..

(ويا تماضر وجنّي ما تضحكوا، أوعَ)

عودة ياسي محسن لموضوع لا النافية..وقد شدني الإستعمال غير الدارج لها لها مع ال التعريف في هذا المقال للكاتب أحمد المديني:


http://www.aawsat.com/details.asp?section=28&issue=9662&article=298761

Quote: ثم يقفون ضاحكين ومزهوين أمام فعلتهم الشنيعة ظانين أنهم خدموا البشريةـ أما الإنسانية فشأن آخر ـ بهذا اللا يوصف

المألوف أن نقول مقابل (بهذا اللا يوصف): بهذا الذي لا يوصف.

Quote: هو ذا الوعي الكلي لا يمكن لأي غرّ أو دعيّ أو طري العود من ناحية التجربة، وضمنها العمر بلا شك، أن يتوفر عليه ويشتمل على مزاياه اللا تحصى

المألوف أن نقول مقابل (مزاياه اللا تحصى): مزاياه التي لا تحصى.

ولاحظ أن لا النافية المعرفة ب ال هي مفردة مستقلة عن الفعل المضارع الذي يليها وليست مقترنة بها بل بينهما مسافة كما هو بين أي كلمتين. عموما المقال به الكثير من نماذج هذه الإستعمالات.

وحقيقة أنا دخلت البوست عشان أتكلم عن استخدام الذي والتي (من اسماء الوصل؟) ولكن لا النافية طيرتها في رأسي وطشت مني الأمثلة..معليش خليها يوم تاني.

شكرا استاذ محسن جدا

وقد تعلمت ان شاء الله ان للهميزة فعل السحر فى نطق الكلمة !!


احيانا لااعرف اين اضع الهميزة .. والان فى طريقى نحو المعرفة فلك جزيل الشكر ..

يا أستاذي
حصصك دي بقت صعبة وعايزة ليها درس عصر

banadieha،..
العزيز لك المحبة، والسلام لك، وجيب أسماء الموصول القلتها وتعال، لي زمن بأذِّن في مالطا، مافي أي زول جاب كورتو وألا قدحو وجاني تب،..
(اللا).... الصيغة دي مستحدثة، وأوَّل ما ظهرت في الستينات، حينما كتبها مترجم كتاب (اللامنتمي) لكولن ويلسون، وأنا مبسوط منها وشايفها حركة حريفة منو،..
اللا يحصى، واللا يوصف،.. هي غير موجودة، وركيكة بدون شك، لأنّ (حس) الفعل بعد نفيه يصبح غريباً وبدون معنى،..
هو اجتهاد مش حلو منو، واضح إنو عارف قصة اللامنتمي دي، وداير يبتكر أكتر، خلينا نقطع فيهو شوية،..
ويضحك صباحك يا أمير،..

محمد السر،..
إزيك يا صاحبي،..
شوف لو بعد دا داير درس عصر، إنت كان كدي ما داير القراية ساي،..
وأبقه طيّب ومتعافي،.

شكرا ياسي محسن وربنا يحفظك..وبرضو لسه ما لقيت الورقة الكتبت فيها الأمثلة العويصة وما قادر اتذكرهم. ولكن هاك المثالين ديل كقولة خير:

هذا هو الرجل التي تبيع بنته الورد.
هذا هو الرجل الذي تبيع بنته الورد.

الثاني متعودين عليه وما فيه مشكلة لكن الأولاني فهو الذي يصادفنا اليومين ديل وما بتبلع بسهولة رغم أنو المعنى واصل.

Dear Muhsin Khalid
.Thanks for this post. I am getting to learn and refresh my Arabic
I used to have a "love-hate" relationship with Arabic grammar, and still remember those books from Egypt, one with an orange cover, one blue and the other probably green.

.Now this is a nice and smooth way to present the subject
Regards
Iman

banadieha،..
تحياتي، وربنا يحفظك كمان يا سيدي،..
مثلك لاحظت الكثير من نوع هاتين العبارتين،..
لو الواحد بخلي بالو في الضمير أكتر من الفاعل ما بقع في خطأ زي دا،..
وأبقه طيّب، ولك المحبة،..


إيمان أحمد،..
تحياتي يا سيدتي، وسلام
طبعاً الكتابين المصريين ديل بالذات، ياهن الخربن العربي السوداني، معروف أنّ الكتابة المصرية أردأ الكتابات العربية، وأنا منحازٌ كبير لكتابة بلاد الشام، لأنّها عندها ذوق وفي نفس الوكت مدروسة،..
أرجو أن تعملي (رفريش منت) كويس من خلال هذا البوست، وأن يمنحك شيئاً،..
وكوني بعافية وأمن،..

الإنسان في المكان أعمى عنه، الإنسان مع الإنسان وبينهما سوء التفاهم،..
المحبّة قاطرة البلاد كلها، الصلات كلها،..

يا أستاذي عساك طيب
أنا لما قلت عاوز درس عصر ما قصدت شرحك ما واضح بالعكس شرحك يفهِّم صاحب أنكر الأصوات، لكن الحصل أنا غبت فترة من البوست دا عشان كدا فاتتني حاجات كتيرة عشان أحصلها محتاج درس عصر (على شرط يكون مختلط)
لك محبتي

محمد السر،..
إزيَّك يا صاحبي، خابر كلامك أنا بكاوي فيك، خلي أضانك خفيفة،..
يلا بالسلامة

يا أخوانا صَعِد على الطاولة............... مش صَعَد....

بالعامية نقول، كمان جا معاهو ود عمّتو................ (كمان) هي تطفيف لتركيبة ( كما أنّ)............... كما أنّ ابن عمّته جاء معه

البدل.. وعلاقته بأسماء الإشارة

1- إذا جاء اسم الإشارة قبل (نكرة) يكون الإعراب على أنَّه (خبر) و(مبتدأ)،..

هذه بنتٌ
هذا رجلٌ

2- إذن كيف هو "البدل"؟
البدل يكون إذا جاء اسم الإشارة قبل "اسم معرفة"، يعني فيهو "ألف ولام"، مش زي "بنت" و"رجل"،..

قابلتُ هذا الرجلَ،...
قابلتُ هذه البنتَ،..

قابل فعل ماضٍ مبنيٌّ على الفتح لا محل له من الإعراب، وتاء المتكلم في محل رفع فاعل، الهاء للتنبيه وذا اسم إشارة مبنيٌّ على السكون في محل نصب مفعول به و"الرجل" بدل،..


3- وإذا كانت الجملة بالعكس تصبح توكيداً،..
بمعنى إذا جاء اسم الإشارة بعد الاسم "بعد الكلمة المعرفة"،..

قابلتُ الرجل َ هذا،..
قابلتُ البنتَ هذه،..

وبذلك يُعرب اسم الإشارة توكيداً لما سبقه،..
إذن يتبعه في أخذ حركة إعرابه،..

لا تكن مثل هذا الغافلِ
تفلسف علينا هذا الغافلُ
سئمتُ هذا الغافلَ



مختصر القاعدة هو كالآتي:
البدل.... اسم معرفة يأتي بعد اسم الإشارة،..
لا تسخر من هذا الضعيف

التوكيد... "معربٌ" أي يأخذ حركته بموقعه في الجملة، وهو يأتي في آخر الجملة،..
لا تسخر من الضعيفِ هذا،..


إضاءات:
المنتزهات خطأ شائع،..
الصواب المتنزّهات،..

نقول بالعامية "رزَّة" الباب،... وهي فصيحة مئة بالمئة،..
يقال دخلوا الإسلام عن بَكْرَة أبيهم،..
والصواب، دخلوا الإسلام على بَكْرَة أبيهم،..


الحويَّة، بتاعة الإبل لأجل الركوب عليها، فصيحة مئة بالمئة،..

يا عازة الفراق بي طال، وسال سال مني الدمع وشّال،..
وَشَلَ، وشْلاً، ووَشلاناً الماءُ، أي سالَ وقَطَر،..
والوشل جمع أوشال، القليل من الدمع، أو الماء القليل يتحلّب من صخر أو جبل،..

العندو بليلة بِعاشي بيها. أها

1- البدل يتبع المُبدَل منه في حركات إعرابه. يعني دلدول تابع.
2- العطف (عطف النسق وعطف البيان) يتبع المعطوف في كل حركاته. دلدول آخر.
3- النعت أيضاً يتبع المنعوت محل ما قبّل. يعني شرْحو.
4- والتوكيد (اللفظي والمعنوي) تابع للمؤكَّد قياماً وقعوداً. وده آخر طرطور.

وتعرف هذه الطراطير بالتوابع الأربعة.

محسن ياخي عليك الله أغشى معاك الاستثناء .. لأنه عامل دشمان عجيب في بعض المحافل.

يا شنتير،..
إت يا زول ما تجدع سرجك وتنهر معاي، البليلة دي دفقها كلها هنا، وخلينا نغرف،..
بعدين وعد مني ليك، نقوم بمباصرة الاستثناء،..
عمَّا قريب... فارتقب إنا مرتقبون،..

كلمة (الرزيلة) تُكتب هكذا (الرذيلة)،..

كلمة (المرزول) تكتب هكذا (المرذول)،..


شايف بعض منابر الحوار بتكتب: اعتبر كل المواضيع قرأت

هسي الجملة ماشه علي وين،..

من الذي يعتبر؟ الزول وألا الكمبيوتر؟
ومن قرأ؟ الزول وألا الكمبيوتر؟

بقترح إنها تُكتب: اعتبر المواضيع كلها قُرئت،..
ويبقى المخاطب الكمبيوتر، مش اللاأحد، لأنو هو البعمل التظليل بالأحمر مش الزول،..

استاذنا محسن خالد
دبايوا
قلت اسلم عليك ومتابع بس قراية الكبر باقى ليك تنفع؟
كدى شوية تحدثنا عن تصريف الاسماء ناس /عمر/عثمان/بعلبك/وابن عوف
ناس حلتنا دول ياريت توسع وكما تكون الامثلة تشمل كل الانواع.
ولك كل التقدير..

هاشم نوريت،..
تحياتي يا رجل،..
المحبة واتوحشناك آسيدي،..
هسع إنت مديني إحساس إنك زول في بداية التلاتينات، ما تعمل لي فيها عجوز وتأكلني كبر،..
ما فهمت سؤالك بالضبط،..
بأي حال هنا في قاعدة عنصرية، وبتجيبلينا ناس الجندرية والجندريات،..
لأنو العلم المذكَّر في (العموم) يُصرف، إلا ما اشتبك مع قواعد مانعة -أخرى- مانعة للصرف،..
عثمان هذه مثلاً: تشتبك مع قاعدة (فعلان) مثل ظمآن وعطشان، كما تعلم،..
بينما العلم المؤنّث لا يُصرف،..
في مدخل (قاموس) المنجد بتلقى تبسيط وشرح جميل للقاعدة، الخاصة بالممنوع من الصرف للعلمية والتأنيث،..
إن بقينا حيين ناوين علي مداقشة الكثير بعون الأصدقاء هنا،..
وخليك عافية وطيّب،..

أستاذي وزملائي الدارسين... سلام
بروفيسور/ عبد الله الطيب –طيِّب الله ثراه- في شرح:
وثدياً مِثلَ حُقِّ العاجِ رخصاً ***** حصاناً من أكفِّ اللامسنا
قال: دي قراية غلط لأن حق العاج صلِب ما رخص، الصاح نقراها كدا:
وثدياً مِثلَ حُقِّ العاجِ... هنا تقيف شوية حتين بعد داك تقول: رخصاً *****حصاناً من أكفِّ اللامسنا.
الوقفة شوية دي أكيد عندها حركة تتكتب زي: الـ "،" أو الـ " ..." أو الـ ".." أو الـ "." أو الـ " ،.." أو "–فصلتي الاعتراض-"أو الـ "!!!" أو الـ " !؟. " إلخ.
أها يا أستاذي... عاوز أعرف كيفية استعمال الحاجات دي، خصوصاً في الشعر.

وثدياً مثل حُقِّ العاج رَخصاً ... حَصَاناً من أكفِّ اللامسينا

حق العاج، صلبٌ... هذا صحيح، ولذلك هو طارَد المعنى بمحاولته "لَزق" معنى جديد، وإضافته،... ما جَعَلَ الفقهاء يقولون بأنّ تشبيهه ركيك، وأنّ القرآن كان أبلغ منه، حين قال: "كأنَّهن بيضٌ مكنون"،..
البيض المغلي، لامن يغلوه في موية على النار ويقشّروه، شوفتو ببقه تكتكوني كيف يا ود السر، أها العَضَّة بتاعة الجنة لادنة زي دا، وفرنيب،..
إذن يصبح كلام عبد الله الطيّب، غير منطقي، لأنو اللازمة الصامتة ما بتفك البيت برضو من الركاكة، فالشاعر بالأصل أراد من "حق العاج" التكوير، ولكن عليه غسل المعنى جيداً، وإلا لقصّر عن وظيفة الشاعر، فالشاعر مهمته البلاغة الناجزة، وأن يقول لك كلاماً ما تقدر تقول بعدو بِغِم، وبدون لصّيق،..
إلا عجبني الـ ومعها علامة بيانية زي ما بقول فردة،..
الكلام دا دايرلو مجابدة طويلة،..
وأخوك هسع، غير انشطاف الروح متابَق بالزهج والكتابة دايرة الروقة،..
بس قلت أرد عليك، لأني شايفك مسجّل حضور،..

محسن الحبيب الأديب الأريب
أمتعتنا بحكاك.. وهسه بادبك.. يازول يا كون... واصل.. كلو منك زيك.. راقي وجميل

nashaat elemam،..
أهلا أهلا، والحب وراك وقدامك،..
إنت عارف أي زول بكتب معاي هنا، بديني إحساس ما، ما شرط يكون صاح وألا غلط، "توما" قلت ليها إنت "بنيتي"، أها يا نشأت دائماً بتديني إحساس ولدي الوسطاني،..
ما تقول لي ليه ولدك وليه الوسطاني، ما عارف،..
مجرد صور بلتقطها اللاوعي من وين؟ الله أعلم،..
بناء على ماذا! برضو مجهول،..
يلا خليك طيّب،..

كويس انك ابعدت عني شبهة عوارة البكر.. وعجن السغيروني..
انا ما كبرتك للحد ده.. يعني ممكن تقول اخوي الصاحبي.. فرق بين اخوك ساي
واخوك صاحبك.. وشكراً لجميل شعورك
يلا واصل.. ما نلخمك بالصلات الاجتماعية دي.. وبعد ما تورينا كيف نصلح
كتابتنا.. ورينا كيف نصلح افكارنا ذاتا.. وانت كروائي حنعتبرك استاذنا
وحنجيب كراساتنا تصححا لينا.. ونعذبك في الفسحة البين الحصص
وحنجي درس العصر بتاع زمان.. المجاني الما بقروش
وانت ما حتبخل علينا.. انا اكيد من كده

nashaat elemam،...
نشأت في الدرب، يا رجل،..
نمشي ونمشي نحو بلاد، محبة وصداقات وحبيبات، هكذا هي سيرة الطريق إذن،...

ABUZEEGH،...
هناك أخطاء كثيرة يمكن أن أساهم معك في إيضاحها. ولكن ماذا عن علامات الترقيم؟



ABUZEEGH،...

سلامي يا رجل، وتحياتي،..
هلم إذن لإعانتنا في رصد الأخطاء،..
العلامات أنا سأتكفَّل بها، سأقول ما هو متعارف عليه، وأيضاً شطحاتي حول ذلك،..

استاذنا محسن
دبايوا
ارجو ان تحدثنا عن المفعول /له/معه
وعن /لا التى تقوم بعمل /ان واخواتها
لانك حدثتنا عن لا الناهية ولا النافية.
متعك الله بالصحة والعافية.

ياريت عنوانك الالكترونى.
وان كنت لا تريد كتابته فهذا عنوانى.
[email protected]

هاشم نوريت،...
المحبة والسلام، والود،..
ياخي إنت وشنتير وبناديها، وباقي الشباب، أنا ذاتي داير ألفح لي منكم عِلِم علمين،..
جيبوا إنتو الحاجات دي وأرموها هنا وخلونا نتشارك فيها، أنا براي ما بكفي الفضاءات دي كلها، "شولبوا معانا شوية"،..
وما يهمك، لو بقى في العمر نصيب، وحَبَّة انطلاقة، بنزوع علي المواضيع دي كلها،..
وتحياتي،..

أنا بعثت ليك رسالة علي بريدك وجات راجعة،.

[email protected]

سلامات يا محسن؛

كنت اظن ان إذاً تكتب هكذا؛
حتى قرأت بوستك الاخير:

هي الحرب إذن؟ فخذوا..................

فاختلط عليّ الامر!

حسين ملاسي،..
تحياتي وسلام وافر، وشكراً لقدومك،..
ولو للمزحة كدا، بقوليك تمنيناك أبكر، وهسي جاي تعتقلني عند خطأ وألا شنو؟..
ويضحك مساك،..
إذن: حرف مكافأة وجواب،.. هذا هو (إعرابها) أو تعريفها،..
وهي تنصب الفعل المضارع إذا تقدّمته: إذن تنجح،.
وإليك قاعدة كتابتها:
إذا وقفت على إذن تُكتب هكذا: (إذاً).... كما تقول عمراً وزيداً،..
وإن وسطّتها (كما فعل محسن خالد) وكان ما بعدها معتمداً على ما قبلها، تُكتب هكذا: إذن،..
فلا تثريب عليك،..
ولك منا المحبة يا رجل،..

سلامات يا محسن؛

إذن فقد ضاع مني ما ظننته صيداً ثميناً.

يا ود ملاسي سلام وتحية،...
وما بيناتنا والله،...
إنت بس كَرِّب شباكك للمرة الجاية، البحر قاعد، قبض الحوت الكبار داير التعب،...
لكن أعمل حسابك، البحر دا كان قام زعل منك وتلَّب ليك جُوَّة المركب بتاعتك –بوستاتك، بتبقه في "سيك" زي ما بقول ود السر،..
وكلامي دا للضحك، بس أنا ما بعرف ألصِّق الوشوش الضاحكة دي، بصارتي ومروَّتي في الكمبيوتر قليلة، لكن ناس (إذن، وإذ، وبز) ديل، طابقلهن الحبال ورابطن زي السخيلات في راكوبتي،..

العزيز المحسن خالد
لك من الود أجمله ...
عذراً للغياب والمشغوليات التي (هدت حيلي) ....
كيفك وعساك بالخيرات آزول ...
لقد سعدت للغاية وأنا أقرأ إصلاح الكتابة ... و(عدل المشي في شارع الكلام) في زمن أصبحت فيه الأشياء مترهل بفعل الغياب التام للوعي ... بكل شئ ...
أكتب يا سيدي ولا (تشغل بالك .... ولا تبقالك مشغولية) من كل الحاصل والبحصل كل صباح ....
في يوم بجي بعرفوا فيهو محسن خالد وبعرفوا الشي البسوي فيهو شنو عشانم وزي ما قلته (قاعد أشيل عيونن ديل وأجدعن ليهم في ياتو شوك لا بد منو، الكحل البسمّح جد جد حاااار) ...
والشوف من زاوية واحدة زي ما بيسووا الجماعة ديل (عبث طفولي) زي ما بيقول عثمان صالح ..
(إصلاح الكتابة) منهج متقدم لتفكيك العقلية المتحجرة والخروج من وهم المعرفة والعنجهية العروبية التي تسيطر على عقول البعض .. هو تصحيح لمسار كان من المفترض أن يكون قبل هذا ....
سأعود لاحقاً
ويبقى لك مني الود
و ... معاي ومعاي
مصوبر بي لقاك والشوق ...

زملائي الأساتذة والطلبة
دخلت الفصل وما لقيت زول... الظاهر الليلة إجازة!!!
المهم يا أستاذ لما تجي من الإجازة أشرح لي الكلمة العامية الحا أكتبا ليك في السبورة دي:

يِتْكايتْ!!!
عندي بيها شغلة صغيرة كدة
ولي قدام لو لقينا فرصة بنعمل بوست زي دا ونسميهو
"شروح العامية لصاحب السحاقية"
عبد المحسن بن خالد المسيكتابي
معليش اليومين دي أنا مشغول شوية
أها علقوك فوق الشجرة ولاَّ لسة
أبقى Cool

استاذنا محسن خالد
دبايوا
مازال سؤالى قائما عن المفعول /له/معه.
وساكون لك شاكرا ان عرجت الى العدد.
وعندى ايضا اشكالية صغيرة حول اننا اعتدنا وضع التنوين على الالف
كمثال...شكرا نضع فتحتين على الالف هل الصحيح وضع ا لتنوين على الالف
ام الحرف الذى يسبقها؟

لبابى.

عبد الله إبراهيم الطاهر،...
الصديق عبد الله، تحياتي يا رجل وأريتك عافية،...
وكيف حال البنوتة العسل، تحياتي ليها يا سيدي،..
وأهو كلها مدافرات لأجل إعطاء القلم رُشدَه،...
تعرف بالطبع أننا في محيط اللغة العربية من باب كونها اللغة التي نتكلمها ونكتب بها لا أكثر، وتعرفني بالطبع أنني من أكثر أعداء الدعوات القومية، وأنني لا أؤمن إلا بالإنسان مُجَرَّداً،..
فلك التحية والحب على هذه الإشارة، ولك السلام
ولندع العبث الطفولي كما يقول زميلنا عثمان للطفوليين،..




محمد السر،....
إزيك يا محمد صاحبي،..
الليلة غايتو عندنا بهنا الجمعة،..
يتكايت: مثال، أهلنا بقولوا (صَبَّت المطر واتكايتنا كلنا في الأوضة) يعني دخلنا وأدخلنا معنا أشياءنا، بالتالي بحصل شنو: تكَدُّس،..
وهذا هو المعنى الفصيح من القاموس: كَيَّتَ الوعاء حَشَاه،...
يعني فصيحة طق طرق،..

بعدين رقبتي دي متوفرة للضبح، بس هم خلوا شجر؟

وأبقه (عيزانا)،..




هاشم نوريت،...
دبايوا،..

سؤالك يا سيدي ما رافض الإجابة عليهو ولا حتى (العدد) الطلبوهو ناس كتيرين،..
لو أخوك قام جاب الدروس دي من المراجع مباشرة وكباها هنا، الناس بتطش، وألا كمان بطنها بتطم من الكلام الكتير والمعقد،..
يعني لا بد لي من فرقة -بس- عشان أقعد أختصرها، وأعملها بلغتنا المفهومة دي، وأبربحها تمام التمام،..
وكت ألقى فرقة والله يا ود نوريت الطلبات دي كلها ما بقصر فيها، إلا أصبروا علي شوية،..


بخصوص كتابة التنوين علي الحرف السابق، صحيح في كلام زي دا، ورأيي فيهو إنو حذلقة فاضية، لأنو التنوين براهو مابديك الصوت المطلوب... يعني: (الألف + صوت "ن" -التنوين) حتى يدوك المطلوب،..
وأصلاً قاعدة الكتابة لو ما انحشر فيها الإعراب، لأنو الإعراب لو انحشر بكون ضروري مراعاتو هو أكثر من غيرو، ولو ما انحشر براعو فيها حاجتين: التبسيط والجمال –يعني شكل الكلمة مهم،..

بعدين نظام كلام خاص كدا، ومشاغلَة، أجدني مبسوطاً منك جداً جداً يا زول، لأنك قادر تفرز الكيمان، وتقسم عقلك لمناطق مختلفة ما يجوط بعضها في بعض،...
يعني محل (إصلاح الكتابة) بتقولي يا "أستاذ" ومحل تيموليلت والكلوروفيل بتديني فوق رأسي، وإن بأدب وبدون شتائم،..
عارف؟ أخوك زمان كان أنصاري سنة، يحوم من جامع لجامع ويتكلم على المنابر، وأهو حالياً زي ما إنت شائف!

لبابى،... ولو إني ما عارف معناها لكن قَدَّرت إنها بتكون (خليك عافية)

محسن سلامات
ومستمتعين معاك ... عجبني كلامك - وقبلو احترامك - للأخ هاشم نوريت ,
قصة أنك كنت أنصار سنه دي طبعا حكاها لي عبد البديع دفعتك ,
قال لي الزول دا كان أنصار سنه وكمان كان مكحل عيونو,
أها يازول قال لي محسن كان بجيني في البيت , قام واحد من أعمامي _ أعمام عبد البديع والرواية لا زالت له _ قال لي هوي يا عبد البديع زول المكحل وكيف كيف دا أخير تزحو مننا , أو كما قال ....
بأحكي ليك القصة دي وفي بالي رد من مسئول في السفارة السودانية في المغرب لما الطلبة كانو مسخنين , عمك قال ليهم : يا ولدي كلنا زمان كنا يساريين . القصة دي أظني قريتا في واحد من بوستات السمندل لو ما خانتني الذاكرة ...
الشاهد : ستبقي لغة محسن خالد الهادرة ويمضي نهرها , أما برك الهوام فأشعة الشمس كفيلة بتجفيفها ...
محبتي يا رجل .

الوليد محمد الامين،...
تحياتي يا محمد، واتوحشناك آلشريف، زيد آسيدي زيد،..
ياخي إنت ماكفّاك الـcv البكتبو أنا، ماشي للزيادات من (عَبُّوش)،..
لكن في حاجة هو ما كلمك بيها، حيهم معروف بالكُفُر، وكلام للسماء ضفاري عادي، لأنهم كلهم لعيبة كورة، أتخيل إنو يجي مع ولدن أنصاري سنة، الزمن داك كانت الكلمة دي غامضة جداً، كأنك تتحدث عن المعتزلة مثلاً،....
بعدين هاشم نوريت دا أنا والله عندي ليهو تقدير خاص، وأكتر،..
(يا ولدي كلنا زمان كنا يساريين)، العبارة دي حلوة، يعني شنو يعني؟ محل قاعدين دا، أنحن جينا منو؟
وهذه أحلى: بِرَكُ الهوام أشعة الشمس كفيلة بتجفيفها،...
أتفضلي يا الشمس إذاً،...
ومعاك قلبي ما تنسَ،...

استاذنا محسن خالد.
دبايوا.
كل ما اكتبه هنا او فى اى مكان من هذا البورد اكتبه صادقا
دون ادنى مجاملة ولا ادعى تملكى للحقيقة ولا اقول باننى على
الحق دائما وكلمة استاذنا انا صادق فيها وانت تستحق هذه
المكانة لاننى وجدت عندك مالم اجده عند غيرك ويقينى ان هذا
البوست المتاوقون اكثر من المتداخلين .
ارجو ان يستمر عطاءك وفخرنا بك لن ينقطع ان استمريت او انقطعت.
فلك كل الود والتقدير..

لبابى.
تعنى فى رعاية الله فتك بعافية اتمنى لك السلامة.

هشام نوريت،...
دبايوا،..
أعرف أنَّك صادق ولا تجامل فيما تؤمن به، وهذا ما قصدته بالضبط،..
وأنا أيضاً قصدتُ أنني أحترمك بالفعل، وأُقدّرك، وكل من قال رأيه في كتابتي بقصد الرأي أنا أحترمه،..
وحتى من قالوا رأيهم من باب الظهور وتوضيح أسمائهم فلا مشكلة لي معهم،..
لأنَّ الشخص هو الذي يُقَرِّر لنفسه ما هيتها وليس أنا،..
تبقى بيننا المحبَّة يا ود نوريت، والمودة، وتبقى من أصدقائي وأصدقاء هذا المكان،..

وأنا شفت بوست لغة البجة، ودا كلام سمح، لأني بحب اللغات، وإن شاء الله نكون من حيرانك هناك،...

ولبابى

عارف يا استاذ محسن خالد
وبقول ليك هنا يا استاذ
لانه فعلا البوست يستحق القراءة
وفيه من المفيد الكتير
مما يجعلنا منصتين للدرس
بس عارف ياسيدي
وأظن البوست دا قبل .. ما " طيارة جات بفوق "
الناس ادتك حقك من الاحترام فيه كاملا ..
بقت عليك يا سيدي حكاية حارس المرمي
طار فوق قبض الكورة ..
الناس صفقت ليهو ..
شاتها جوه القون .. !

humida،...
تحياتي،... وكيفنَّك؟
أولاً أنا زول أشتر في الكورة، أشتر تب، بس ما لدرجة أمسك الكورة وأدخلها قون بنفسي، أظن النكتة بتقول إنو الزول البعمل كدا، دا العتالي بتاع البطيخ الجابوهو عشان يحرس المرمى، لأنو كان متعوِّد علي جدع البطيخ جُوَّه اللوري، في النهاية نسى وجدع الكورة جُوَّه القون،..
قول لي ليه ما بطلع هو، لأنو البطيخ ما هو الكورة،..
لكن الكتابة ياها اللغة،..
يعني عشان تكتب مفروض تعرف اللغة،...
مثلاً، أنا شفت البوست بتاعك -بتاع الضفدع الفي خشمو نملة وفوق غصن،...
أول جملة بتقول: (الاثارة ..
لها وجهين كما العملة)، ..
وكلمة الإثارة متروكة بدون همز سفلي، دا زي الجنس السفلي، القلتو ما عجبكم دا، ودا أول موضوعة في بوست إصلاح الكتابة، كيف تكتب الهمزات،..
ما علينا... الدرابة الأكبر هي (لها وجهين)،..
الضمائر دائماً يا حميدة البجي بعدها بجي مرفوع، إلا الزول كان ما بعرف الضمير،...
يعني الجملة بتبقه: (الإثارة لها وجهان)،..
أنا قلتلك الكلام دا ليه، أول شيء عشان أعلمك تكتب صاح، وثانياً عشان أوريك إنو البوست دا مش (فيه من المفيد الكثير)، بل ما فيهو سوى الفائدة، يعني كلو فائدة،..
ودي نقطة اختلافك التانية معاي، لاحظ أنا ما عندي معاك اختلاف، لأنو أنا ما ممكن أمشي أخصّصص ليك بوست، طيّب أنا عارف إنك إنت قلت الكلمة دي (ساي)، ما قاصد فيها حاجة، ومصدّقك، بس كتابة محسن الما عاجباك دي، إنطلاقتها الأساسية ما من بيوت النسوان الما كويسات، لكن من هنا، اللي هو تفادي البايت من اللغة والنظرة إلى اللغة كشغلانية كبيرة بدون أي تدخل من ناحية (ساي)، أمشي أقرأ كلام (أبو ذر المطر)،..
وقبل تمشي أعلمك تاني حاجة، إنت كتبت:
مما يجعلنا منصتين للدرس،.. ودا غلط،..
الصاح: ما يجعلنا منصتين للدرس،..
وراجع البوست دا فوق بتلقى الفرق بين –ما- ومما- وطالما- ومادام،...
أها للنكتة كدي بقوليك، نكتتك جابتلك الهوا،..
آخر كلام مني ليك، المحل دا "مَسيد"... المرة الجاية، تجيب لوحك وتدلِّي شرافتك مع أخوانك ديل هنا، ولمَّن تمرق من هنا، بتكون اتعلمت عشان تكتب الداير تكتبو بشكل صحيح، وصدقني تجي تتعلم هنا وتمرق تشتِّر بالحجار ببرّه ما فَرَقت، وبرضو الحصّة الجاية لا أستقبلك إلا بمحبة الأستاذ لتلميذه، وأكثر، ممكن أصحّح ليك كلامك البتكتبو قبل النشر، ودي ما اتعلمتها من مسيحية متمسكنة، لكن الدنيا هي الورتني إنو العندو كلام داير يكتبو، مافي شيء بقدر بوقفو،..

Quote: آخر كلام مني ليك، المحل دا "مَسيد"... المرة الجاية، تجيب لوحك وتدلِّي شرافتك مع أخوانك ديل هنا،

مدد يا شيخ محسن ..
يديك العافية يا زول
والله انا اكتر حاجة عاجباني فيك
العنجهية الفارغة بتاعتك دي ..

زمان يا شيخنا ..
قالوا اللبيب بالاشارة بيفهم ..
ما بدقق فيها كتير ..
وجهين ولا وجهان قلبة ولا عدلة
المهم في الامر من باب الكلام ليك يا المنطط عينيك
وكذلك الامر مع البطيخ .. أنف الذكر

بالنسبة للغة ..
او نوعية الكلام هنا .. في المنبر
الطابع الغالب .. العامية
دي ما عندها وزن معين للفلسفة
يعني اعتمادها علي المسموع
اديك مثال بسيط
اذا جينا ننسب كلمة اساس لواحد مثلا
ممكن نقول . اساسهُ ..
ولا نكتبها بالعامية السودانية .. اساسو
بالعامية وبالواو بتدينا الجرس بتاعنا
وبتكون مفهومة
والشيء الاهم ..
الناس هنا ما طارحين نفسهم
كأدباء ومفكرين .. عشان ما نعمل ليكم زحمة وكدا
ثقافة الـمنتديات في الانترنت ..
ثقافة شعبية .. ودا المديها الرواج بتاعها
ما شرط حتي يكون كاتب البوست بجيد الكتابة
ممكن يكون رسام .. وبتقنية الاكواد ينزل صورة
بتكون في نفس جمال الكتابة ..
وكذلك الاغاني .. واي نوع من التسلية الراقية

كدي النمسح اللوح دا .. ونجيك

Quote: (صَبَّت المطر واتكايتنا كلنا في الأوضة) يعني دخلنا وأدخلنا معنا أشياءنا

أنا المعنى كان واصلني ،خصوصاً مع كلمة التأكيد "كُلِّي"، لكن حبيت أتأكد
أها يا أستاذ لمَّن إنت عارف معناها... كتبت كلامك داك مالك؟؟؟
كدي بجيك في محل المكايتة بي غادي.
ملاحظتك عن أخوي نوريت في محلها، أنا زاتي ،من البوست دا، بديت أشوف فيه حاجات جميلة
ودي واحدة من الفوائد الكتيرة الفي البوست دا
،،إن شاء الله في ميزان حسناتك،،
أمين
وكعربون محبة أقول لاخوي نوريت:
يا هاشم... أستاذك بقى يدي دروس خصوصية... الظاهر الماهية ما حايقة
أها قبضتو بدي حصة مهمة لي زول في الحلة الغادي، وأنا ما حبيت الكلام السمح دا يفوتك لأني شايفك أكتر واحد فينا مركِّز في البوست دا... إذن، إلى الدرس:

Quote: وما من كاتب إلا سيفنى ويبقى الدهر ما كتبت يداه فلا تكتب بكفك غير شيئ يسوؤك في القيامة أن تراه وبالشكل الصحيح هي هكذا: وما من كاتبٍ إلا سيفنى ويُبقي الدهرُ ما كتبت يداه فلا تكتب بكفك (غير شيء) يسوءك في القيامة أن تراه أنا صلّحت ليك (يُبقي.. بدل.. يبقى)، و"الشيء" تُكتب بالياء المشبَّعة والهمزة على السطر، و"يسوءك" هي الأخرى تُكتب همزتها على السطر وليس على الواو كما فعلت أنت،.. دا كلو ما همية زيك وزي أخواتك البكتبو "الحذف" بالزاي، مافي مشكلة هنا، بس المقلب يا المكاشفي في (غير شيء) معقول الشاعر يكون قال كدا، ببقه زول جاهل، لأنو دي زيها زي (لا ينقصنا شيء سوى عدم رؤياكم الغالية)،.. إما أن يقول الشاعر: فلا تكتب بكفك غير شيء يسرك في القيامة أن تراه،.. وكدا بكون صلّح المعنى، ووقع في خطأ لُغوي، اللهو: لما تنفي الجملة، ما بجوزلك تستخدم (غير)، الجملة المنفية (لا تكتب) ياهو دا النفي، عشان تعرفو، أها الجملة المنفية بجي بعدها "سوى: مش "غير"،.. تقول: لا تكتب سوى شيء مفيد،. لا...... طوالي بتعادلها من هناك ....سوى إذن الشاعر ما قال كدا،.. الشاعر دا ما بحلو شيء (سوى) يكون البيت هكذا،.. (فلا تكتب بكفك أيَّ شيء يسوءك في القيامة أن تراه)،.. ولو جبت أي رابط (أنا فتشتها في رأسي كويس)، أي رابط غير "أي" بكسر البيت، لأنو دا بحر الوافر،... (مفاعلتن مفاعلتن فعولن)،....

سلام

الجميل محسن
ظللنا ولفترة طويل ننسب للرئيس، بإضافة الياء أو الياء مقرونة بتاء التأنيث فنقول "الرئيسي" و"الرئيسية"، وظلت هذه المفردت تلوكها media مقروءة ومسموعة ومرئية، ثم فجأة تغيرت وأسقطت اليا فصارت تقرأ:
الرئيس والرئيسة. وأصبحنا نسمع
وإليكم العناوين الرئيسة.
والخبر الرئيس.

شنو "الجدة على المخدة"، وما هي القاعدة التي إستند عليها المجددون.
إبتد أهل تيموليلتك بعض التعديلات وسار على إثرهم عربان المشرق،
كمفردة "المشكل" بدلا عن "المشكلة".
فياريت تأتينا بتفسير وقواعد هذه التعديلات.
وشكرا و"لسه بيناتنا العبارة"

الاستاذ محسن خالد
إسمح لي أن أقول لك أن هذا البوست






































تحسد عليه

سأقوم بطباعته وقرآءته بتروي وتؤده وطمأنينة

استاذنا محسن صالح
دبايوا
بعد اذنك ارجو من الاخوة الكرام الالتزام بقوانين البوست.
لان هذا البوست فقط للدارسين والمتاوقين
وغير مسموح لاى هرجلة او خروج عن مضمون البوست وبصفتى الالفه هنا انبه
الجميع الالتزام بقواعد وضوابط البوست حتى لا نفقد السيطرة على النظام.


لبابى.

محمد السر،..
تحياتي ليك يا صاحبي،..
وداير أنبهك،...

إنو تقريباً كلَّ الأفعال البنستخدمها في العامية هي أفعال فصيحة،..
يعني لو في نجر بكون في مسميات، لكن أي مسمّى بتقدر تطلّع منو فعل، ستجد له علاقات ولو من بعيد بجذر صحيح، ويا ريت والله تلم كل ملاحظاتي عن لغتنا العامية، ونشتغل تاني عليها مع الأحباب هنا، ونطلّع منها حاجة جميلة،..

أبقه طيّب وخليك عافية،...






المكاشفي الخضر الطاهر،...
تحياتي يا المكاشفي، ومرحباً،..
فعلاً هذا البوست فيه من الخير والفضل الكثير،...
وبإسهامات الأحبة هنا نستطيع تغيير بعض ما نقع فيه من أخطاء،..
بعد ما تطبعو لرقبتك كمان قسّمو، كان ينوبنا منّو ثواب وأجر،..
وخليك عافية،..
وتحياتي ليك،..








هاشم نوريت،...
دبايوا،..
يا زول تحيات،..
بعدين شايف في غياب كتير،..
خصوصاً "شنتير" و"بناديها"،..
أبقه طيب،

لبابى

ولست بنحويِّ يلوك لسانه ....
سلام يا محس وسلام لأهل البيت

أوضح الأخ محسن القاعدة العامة للأسماء التي تأتي بعد الضمائر، في معرض رده على الأخ حمّيدة. والقاعدة العامة تقول إن هذه الأسماء تكون مرفوعة؛ مثلاً: الاثارة .. لها وجهان كما العملة.
فماذا إذا جاء ناصبٌ قبل هذه الضمائر؛ من عائلة كان أو عائلة إنّ؟
1- كان وإخواتها: لا تنصب الاسم الذي يعقب الضمائر. إذن تكون الجملة: كان لها وجهان كما العملة.
2- إنّ وجماعتها: تنصب الاسم الذي يأتي بعد الضمائر، فتكون الجملة: إن لها وجهين كما العملة.

والله أعلم. ولو في أي خطأ في كلامي ده يبقى على مولانا محسن أن يتدخّل قبل ما سوبا تخرب.

nadus2000،...
والحب والتحايا يا أستاذ،...

الموضوع كلو مستحدث، يعني هم ما عملوا حاجة، قالوا "الرئيسي والرئيسية" كموضوع حديث، وتاني رجعو ينسبوا (الرئيس والرئيسة) كموضوع حديث،..
ليه؟
لأنو بنية المفردة نفسها (الرئيس.... والرئيسة) تتضمَّن النسبة، ودي واحدة من مخاتلات اللغة العربية النادرة، زي الأشرتها ليها قبل كدا،...
مع الفعلين في فعل واحد،...
مثال: تقاتلا..... تحاربا..... تخاصما..... وكل لغات الدنيا ما فيها الحركة دي،..

يعني هم، رجعوا للمعنى الأساسي المتضمن في المفردة نفسها، ودَقِّق فيها شوية بتلقى إنو النسبة بالفعل قاعدة ببطن الكلمة،..

"المشكل..... من مشكلة....
"الموضوعة..... من موضوع....
"البحاثة.... من باحث عن (الحق)

يعني هسي لو قابلك عروة بن الورد..... وقلت ليه ("الإشكالية" دي نحلها كيف؟)،... ما ح يفهمك،..


وكل التطويرات الزي دي، كانت حراكات تطويرية طبيعية، بعدين أُعتمدت،...
يعني هسي: حِراك.... وتطويرية.... دا كلو كلام جديد،...
طيّب ليه أُعتمدت؟
لأنها بالأصل زحفت من أفعال راسخة....
مثال... "المُشكلة..... الفعل هو (أشكلَ......)،...
إذن يجوز أطلّع فعل (مُفْعِل)، مُشكل،....

بعدين داير أقولك، أنا مع تطوير اللغة دا، لاحدي حدو،....







شنتير،...

اتوحشناك يا رجل،..


طبعاً، أي قاعدة في العربي –قائمة- ما لم تنحشر مسألة أخرى، أو أولوية ثانية،...
كويسة جداً إضافتك هنا للقاعدة، (في العموم)، ومن بعد التخصيص،..
طبعاً هذا هو عيب العربية الأفدح، تقريباً لا توجد قاعدة بدون استثناءات وانحشارات، ومش في حالة أو حالتين، لكن بكثرة تكاد تلغي القاعدة نفسها، الشيء الأساسي في العربية هو أن نعرف (الإعراب)، أي اتجاهات الكلام، الفاعل منو، والمفعول شنو،... ودي النقطة التانية المهمة،...
ودي نفسها النقطة الأساسية الانطلقوا منها كل العلماء الحاولوا إدخال إصلاحات في اللغة، وهو إنو عدم الاهتمام بالجُمل إلا من باب بنيتها الأساسية،...
يعني لو قلت: جاء أحمدُ راكباً.............. يعني هنا في شكلها القديم (الحال)
أو: جاء أحمد راكبٌ،... يعني هنا بقت (نعت)
الجملة ما بتتأثر، ودا صحيح،....

لو قلت: قابلتُ أحمد مساءً.......... (ظرفية)
أو قابلتُ أحمد مساءٍ،... (اعتبرتها إضافة)
الضرر شنو؟ مافي ضرر، وهنا مجمل فلسفة د. ياسر شرف، (في إصلاح الكتابة)،...

هو عندو جن مع الزوائد المزعجة دي زي ما بسميها،...

لاحظ يا شنتير إنو اللغات التانية بتنضبط لحد كبير بقواعد ثابتة، ما عدا استثناءات وانحشارات نادرة جداً،..
اللغة الإنجليزية مثلاً، ربما هناك قاعدتان فحسب (الشتر)، الباقي كلو راكب عدلو من أولو لآخرو،..

أتذكر منهن (جزئية) من القاعدة بتاعة (if 2)
أو ما يُسَمَّى بـ(preterite tense)
اللهو القاعدة العامة إنو: I .... الضمير أو (الفاعل) subject..... بجي معاهو الفعل المساعد (am)،..... طيب القاعدة دي ما بتتكسر إلا في حالة (preterite tense) الذكرناها دي،...

واللهي تستعمل مع الافتراضات اللامنطقية وفي ظرف ماضوي،..

If I were you I would change my life

أو القاعدة الشتره التانية بتاعة Question Tag

وزي ما عارف دا لعبتو قايمة على (نفي... باليمين) إثبات بالشمال، أو العكس،..
You are Ali ….. Aren’t you?
She isn’t Salma …. Is She?

ما عدا قاعدة واحدة، وغريبة،...
I’m Muhsin ….. Aren’t I?

بس ديل الشترتين البعرفن أنا في الإنجليزية،..

أما العربي فافتح عِبَّك يا صاحبي،...

إذن التعليق علي كلامك، يكون الضمير (في العموم) البجي بعده بنرفعو، ما لم ينحشر منحشر، زي (إنَّ) وأخواتها وغيرن،..

حتى لو تقدّم فعل، برضو بلكلك الجملة،..
سيوفنا التي (قاتلنا) بها المشركين،..

لو اتقدم اسم القاعدة في محلها،...
(مكة) بها مشركون كثر،...

بعدين الموضوع كلو إنت يا شنتير عارفو تسهيلات،....

وكن بخير، وما تغيب تاني،..

عزيزي العزيز محسن .. ما سعلت منك شينة. أبعدتنا عنكم بعض مشاغل واستضافة وِرْدة خفّافية.

سمعت أن اللغة الألمانية أيضاً متشعبة القواعد وبها شرتمات قد تضاهي شرتمات اللغة العربية. وقيل إن اللغة الصينية خارتة رسنها وكاسرة قيدها وملصقة للنحو رفسة في صفاقو. أحد أصدقائي الصينيين قال لي في لغتهم لا عندهم ماضي لا حاضر لا مستقبل بس تركب راسك وتقول الفيه بشرط إضافة قرينة دالّة على زمن وقوع الفعل: أنا أمشي أمس/ أمشي بكرة/ أمشي حركة ورا. الزول ده يمكن يكون ببالغ شوية.

الإنقليزي شتاراتو النحوية ماها كتيرة. بالإضافة للشتارات التي أوردتها أنت، هنالك شتارة أخرى، وهي ما يعرف بـ The Unreal Past ده ضيفو للشتارات الإنقليزية. لكن يا سيدي شتارة الإنقليزي العظمى تكمن في تهجيته غير المبنية على أي منطق. في النقطة دي اللغة العربية أسهل بكتير من الإنقليزي ......... عشان كده بحتار في الأخطاء الإملائية في لغة تُكتب (في مجملها تقريباً) حسب الصوت.

دي ونسة بتاعة زول معاه بواقي وِردة. المرة الجاية داير منك مباصرة المصيبة الاسمها لدى دي. إعراب لَدَى .. وصلِّحو بالله.

Quote: بعدين شايف في غياب كتير،.. خصوصاً "شنتير" و"بناديها"،..

يسأل منك العرس ياسي محسن وتبراه العافية ووراءها القروش..ولكنه الجدب وأكثر منه الوقت الممحوق بركته.

كلنا حضور، من ذُكر ومن لم يُذكر.
أعانك الله يا محسن.

Shinteer،....
شنتير،...
الزول اللحو وشنحيب،..
ياخي سلامتك من الوردة، وتاني السلام،..

الألمانية دي عارف ما عندي عنها معرفة بتاتاً، يعني الفرنسية شوية بكابس فيها واللاتينية القديمة وتطلعات أخرى،..
المهم إنو الصينية دي كان عندي منها أصحاب كتيرين، وبعرف بعض معلومات وجذاذات، والكلام القلتو دا صحيح، الناس ديل لغتن طلقيت ساي يا شنتير، وكمان لغة (تصويرية ما زالت –زي موسيقى تصويرية، بالأحرى كودية من كود،...
بعدين إنت أهلك اليابانيين ديل ما بعرفوا الكلام دا تمام، وتقاطعاتن مع الصين أثّرت على الصينيين بحكم الاحتلال الياباني ليهم،..

بعدين شكلنا كدا ح نقلبها إنجليزي،..

لأنو The Unreal Past هو برضو (افتراض ماضوي) يعني زي قاعدة ( If 2) مشكلتن هم في الحتة دي، التخيل على صعيد الماضي، الناس ديل ناس عمل ساااااي يا شنتير أخوي، وشغل الخيالات وكمان في الماضي دا هم بالكلام ساي ما بعرفولوا .... شوف نجاضتن دي ساي،..

If only I met you yesterday

I wish you fought with us


وزي ما قلت دي ونسة زول مع سيد وردة،...


banadieha،...
تسلم يا بناديها،...

وتحياتي ليك يا عزيز،..

أريتك طيّب، وأجمل أمنياتي ليك،...

سؤال من باب المحبة،...



أشرف السر،...
صديقي أشرف،...

السلام والتحية،...
وواظب علي الحضور، إياي أنا أفتقدك

عزيزي محسن خالد

هذا بوستٌ مفيدٌ جداً
إنَّ بوستاً كهذا (من بوست) / كهذه (من بوسة) لمفيدٌ / ةٌ جداً

أها...العربي الفوق ده، وجندرتو، خَبَرُن شنو.

والعربي التحت ده، خبرو شنو:

ياخوي رايح لي، من دارجيتنا، حرف. فَدْ حرف. علي بي جملة الأيمان، كُسْتَ عربي أفرنجي ما لقيت لي درباً أكتبو بيهو كأنو "جنيَّة في لعوتة". تعرف لما الكلب يكشِّر عن أنيابه ويصدر صوتاً عدائيَّاً نقول: "الساعة ال*رَّ ليك الكلب فيهو..." أها الحرف * ده ألقاهو وين في الكيبورد. مثال تاني: لما "ندعِّي" زول، وأللا قول شي، بأن تقطع يده زي ما دعَّى واحد قريبنا جلابيتو لما ما لقى إيدا: هيْ إيدك وينا إيدك *تْ.

ألحقني ياخوي، الله يرضى عليك، بمكان الحرف * عندي نضماً داير انضمو وواضح إنِّي ما "نكتَّ" البوست ده إلا لأنِّي متضايق تَبْ.

ومشكور على البوست (البوس) كلو.

Adil Al Badawi،..

تحياتي يا عزيز وسلامي،..
والمحبة لك،..
الحرف دا انا ذاتي كان مزازيني، لكن شخصياً عندي ليهو ابتكار، ما عارف لو بقدر أنزلو هنا،...
بأي حال تسبقو بـ(نون) وبعداك تكتب بعدها (ج) معطّشة،..

نچـرَّ فيني الكلب،..

أو

نچـت الخملة

بعدين الحرف دا بتلقاهو بالنسبة للويرد في:
Insert
ثم:
Symbol

بعدين عشان الحرف يربط مع أخوانو، لو أبى يربط في أخوانو تختار ليهم (خط واحد) يعني نيو تايمز أو سيمبليفايد، أو أو...

وتحياتي يا رجل،..

كاليم أُوقظ حياتي، وأمضي في الموج دون أن أنتظر،..
العواصف تضرب رجلي، والنوارس تتخطّف مشيتي،..

..


اليوم ح نشوف محنة كبيرة، ظللتُ أُطاردها لسنوات طويلة،...

نحن والمصريون نستخدم كلمة (زي) بمعنى (مثل)،..

لزمن طويل وأنا أُطارد أصل هذه الكلمة فأوشكتُ على أن أجنح لكونها مختلقة وما من أصل لها، حتى فُتِح لي، فعرفتها،..

هناك رواية لحديث عن الرسول (ص) يقول فيه:
(إنما بنو هاشم وبنو المطلب (سِيٌّ) واحدٌ)،... أي مِثْلٌ وسَواءٌ،...

مع أنَّ الرواية الشهيرة للحديث تقول:
(إنما بنو هاشم وبنو المطلب (شيءٌ) واحدٌ)،..

بالعامي كدا نقول: زي بعض، ودي بالضبط الكلمة الفصيحة والقديمة (سِيٌّ)،..
يقول الشاعر:
وهُم سِيٌّ، إذا ما نُسِبُوا،
..... في سَناء المجد من عبد مَناف

يقول ابن منظور:
السِّيَّان: المِثلان، وهما سَواءان وسِيَّان: مِثْلان، والواحد (سِيٌّ)،..



الغريب في الأمر، ومع أنني مقطّع إعراب (لا سِيَّما) تماماً، (عندي كتاب قديم، كتاب كامل في إعراب لا سيما بس) إلا أنني لم أقرنها بها أبداً، ولو فعلت لانحلّ اللغز في لمحة ولأضحت سهلة ومكشوفة على الفور،..
ما علينا، أي حاجة ما بتبقه سهلة إلا بعد تعرفها، التذاكي بعداك بجي، يضحك نهاركم،..

الخلاصة (زي) هي بالفصيح (سِيٌّ)،..

وما تنسَ حرف (السين) مكسور،..

طيّب، (لا سيّما)، هي (سِيٌّ) مع (ما) مضافة،..
وهي (لا سِيّما) تحسب في روابط (الاستثناء)، والاسم الذي يأتي بعدها يُعرب على وجهين،..

(الرفع) و(الجر)

زارني الشباب لا سيّما (أخوك) أو (أخيك)،..

في حالة (الرفع) بنعتبر (ما) بمنزلة (الذي)، فنرفع ما بعدها...
في حالة (الجر) بنعتبر (ما) زائدة وحشرية، بالتالي بنتجاهلها،..

أها، البحصل شنو؟
تجي صاحبتنا (زي –سِيٌّ)، التي تعني (مثل) فيأتي ما بعدها كمضاف لها،..

زارني الشبابُ سِيٌّ أخيك،...




انتهى،...




لاحظت النسوان الكبار بقولوا:
يا بت ما تخمي (السفير) من تحت الشدرة دي،...
هَيْ يا حبوبتي هي النيمة دي بتتقابل؟

(السَّفير) كلمة فصيح طق طرق، بدون أي تعديلات: تعني ما تساقط من ورق الشجر،...












..

الزول السمح ...
المحسن الخالد ...
عساك بالخيرات ....
متابعين يا حبيب ...
واصل سعيك ... واصل ...

عبد الله إبراهيم الطاهر،...

تحايا، وحب،...
وما نزال في المخاضة، سنسعى في الأمر،...
وسنرى،...

...

المستثنى بـ(إلا)

في شباب كتيرين طالبوا بالمستثنى، وأولهم صاحبي الشاب شنتير ود أشيقر،...



يلا خلونا نشوف الفي الشونة،..


عندنا حاجتين بنجي نشوفن أولاً بالتبادي، لو لقيناهن الكلام ببقه ساهل، ولو ما لقيناهن بعداك بنشوف الدواء كيف!


الحاجة الأولى هل الجملة قبل أداة الاستثناء (مثبتة) أم (منفية)؟

الحاجة الثانية، هل (المستثنى منه) موجود أم غائب؟



أمسك في المدخلين ديل كويس، والباقي كلو هيّن،...
في البداية نشوف الاستثناء بالرابط (إلا) لأنو هو الأصل والأهم، وبالمهلة بنرجع نشوف الاستثناء بالروابط (غير) و(سوى) و(خلا) و(عدا) و(حاشا)،...


الأمثلة:
عاد الغائبون إلا أخاك،...

القاعدة الأولى فحصناها، فوجدنا أنّ الجملة قبل أداة الاستثناء (إلا) طلعت (مثبتة)، إذ قال (عاد الغائبون) ولم يقل (لم يعد الغائبون)، بل أثبت عودة الغائبين،...

القاعدة الثانية فحصناها أيضاً، ووجدنا أنَّ (المستثنى منه) وهو (الغائبون) موجود، أي مذكور في الجملة وليس بمجهول،...

ومن هو المستثنى؟ المستثنى هو ما يرد بعد أداة الاستثناء، وهنا يكون هو (أخاك)،...

طيّب، وجدنا المستثنى منصوباً، لأنه من الأسماء الستة،...

إذن ما هي القاعدة العامة؟

القاعدة العامة هي: أنَّ المستثنى بـ(إلا) يكون منصوباً في الأحوال كلها إذا تحقَّق له شرطا أن تكون جملته (مثبتة) وأن يكون (المستثنى منه) موجوداً في الجملة،...

أمثلة:

عاد الغائبون إلا أخاك،... (الغائبون –المستثنى منه)، إعرابه هنا فاعل، ومع ذلك نصبنا (المستثنى -أخاك)....

قابلتُ الشباب إلا شابَّاً،... (الشباب –المستثنى منه)، إعرابه هنا مفعول به، ومع ذلك نصبنا المستثنى -شابَّاً)،..

سَلَّمتُ على الأصدقاء إلا خالداً،... (الأصدقاء –المستثنى منه)، إعرابه هنا مجرور بـ عَلَى)، وبالرغم من ذلك نصبنا (المستثنى –خالداً)،...

أيوووة، إذا كانت الجملة قبل أداة الاستثناء (إلا) (مثبتة) وكان (المستثنى منه) مذكوراً وموجوداً، نقوم بنصب المستثنى، أي الاسم بعد أداة الاستثناء (إلا) طوالي وبدون تردّد وفي كل الأحوال،...


يلا بعد دا نخش في الكسور وبواقي،...

طيّب نبدأ بكسر القاعدة الأولى، لو كانت الجملة قبل أداة الاستثناء (إلا) (منفية) مش (مثبتة)، الرأي شنو؟

(منفية) إما بأداة نفي مثل (ما) القاعدين نستخدمها في عاميتنا السودانية دي، (الزول دا (ما) مشيتلو في بيتو تب)،..

أو (لا) النافية المعروفة، لا أحب كذا وكذا،..

أو حتى لو كانت الجملة (شبه نفي) ودي زي (النهي)... لا تلعب بالنار، لا الناهية المعروفة دي،..

مثال:
ما وصلت الرسائلُ إلا (رسالتَك –بالنصب، أو رسالتُك –بالرفع)،...

يعني شنو؟
يعني لو كانت الجملة (منفية) إلا إنو (المستثنى منه –الرسائل) قاعد ومنطط عيونو (مذكور في الجملة)، بجوز (النصب -للمستثنى) أو كمان بجوز إنو (المستثنى) يتبع (المستثنى منه) ويكون (بدل) ليه، ومعروف إنو (البدل) بتبع (البدل منه) في حركة إعرابه، لو مرفوع بكون مرفوع متلو، ولو منصوب بكون منصوب، ولو مستهبل برضو بكون مستهبل زيو،..

أمثلة:

لا أحب دواوينَ الشعر القديم إلا ديوانَ أبي العلاء المعري،...

(ديوانَ) في الحالتين بتكون (منصوبة)، إما لكونها (مستثنى بإلا) وإما لكونها (بدل)،........ علي كيفك،...

لا تمشِ مع أحد إلا (الجيّدَ –منصوبة، أو الجيّدِ –مجرورة)،.....

(الجيّدَ) في حالة (النصب) لكونها (مستثنى بإلا)،،،...
(الجيّدِ) في حالة (الجر) لكونها (بدل) من (أحد)، وبدل المجرور (مجرور)،...


إذن القاعدة هي:
لو كانت الجملة قبل حرف الاستثناء (إلا) (منفية) وكان (المستثنى منه) موجوداً ومذكوراً في الجملة، يجوز أحد أمرين (نصب المستثنى) أو إتباعه للمستثنى منه في إعرابه على أنه بدل منه.

يعني في الحالة الفوق دي كسرنا قاعدة إنو الجملة تكون (مثبتة) وعملناها (منفية) وشفنا كيف نتصرف معاها،...

طيّب خلينا نكسر القاعدة التانية، اللي هي إنو يكون (المستثنى منه) مذكور في الجملة، خلينا نجيب جملة (المستثنى منه) مافي ونشوف الرأي معاها شنو؟

مثال:

لا يقع في السوء إلا (فاعلُه)،..

لا يُشاغل في الشوارع إلا (أخوك)،...

خلينا نشرح بالجملة رقم اتنين لأنها واضحة،...

(المستثنى منه) مافي، وهو الأولاد،...
يعني لودايرين نجيب (المستثنى منه) بتكون الجملة: لا يشاغل الأولادُ في الشوارع إلا أخاك أو أخوك،... وبتجوز فيها الحالتين لأنو الجملة (منفية)، ولأنو (المستثنى منه) ظهر،..


في نوع الحالة دي، المافيها (مستثنى منه)، المستثنى يسمّى (مفرغاً) يعني (ماعندو شغلة)، بيقوم يسوي شنو؟ بشتغل في المستثنى اللي هو (الاسم) البعد (إلا)،...







الأمثلة:

لا يقع في السوء إلا فاعلُه -مرفوعة

هنا لم يجد الفعل (يقع) معمولاً له، فتفرَّغ لرفع (فاعلُه)،...

لا تتبع إلا الحقَ –منصوبة

هنا لم يجد الفعل (تتبع) معمولاً له، فتفرَّغ لنصب (الحقَ)



لا يحيق المكرُ السيئُ إلا بأهلِه –مجرورة

هنا يتفرَّغ الفعل (يحيق) لجرِّ (بأهلِه)

يعني هنا الإعراب بكون حسب ما يقتضيه العامل قبل (إلا)..... و(إلا) نفسها بتكون في الحالة دي أداة (حصر) مش استثناء، وبتكون عاطلة لا عمل لها،...





طيّب المرة الجاية، نشوف الاستثناء بـ"غير" و"سوى"، والمرة البعدها نشوف "خلا)" و"عدا) و"حاشا"،... وأبقوا عافية،...



طبعاً أصول الكلمات الإنجليزية في عاميتنا السودانية كتيرة، لكن في بعض منها غير واضح واتلخّ فيها تمام التمام، لدرجة بقه أصلو ما معروف،...



تفكيك عامية:

مثلاً الجزار بقوليك: ياخي خلاص ولا تزعل أنا بديك من اللحمة المعلقة قدامك في "الشنكل" دا،...

"الشنكل" هي كلمة Shackles بالإنجليزية،...


كمان الناس عندنا في الريف الشمالي الكبار منهم، الواحد يقولك: يا زول المصيبة دا نوعو أبدا ما شفناهو، والله الناس دي كلها "بَلَفا" ليك "بلف" تمام، أنا سيد شركة، وأنا بعملكم إقامات وتشتغلوا في السعودية بكم، عييك، في النهاية شال قريشاتن وحتل،..
كلمة "البلف" هنا، هي كلمة Bluffed الإنجليزية،... بمعنى الخداع ومن منطلق القوة،....

الكلمة العذبتني جداً في العثور علي معناها، عندنا الناس بقولوا "قدون" العجلة، وبقصدوا منها الميزان بتاع العجلة، أو الدركسون بتاعها،...

كلمة "القدون" بالمعنى دا هم جابوها من Guide on الإنجليزية،..

وخليكم عافية،....




..

سلام يا محسن يا زول يا مَجَيَّه. نأسف لطول الغياب وانقطاع الخبر. المشاغل أصبحت أوسع من رقعة الحياة ولا نملك إلا مغافلتها والنظر عبر ثقوبها صوب البورد. لسع في بالي الاتصال، لكن متين!!! الله أعلم.

طيب يا سيد أبوك. الاستثناء بـ "إلا" نجضتو نجاض القبورة. لكن مين يشرح لبعض الناس الفرق بين التاء المربوطة والتاء المفتوحة .. والفرق بين التاء المربوطة والهاء؟.

واصل في الاستثناء .. ولا تستثني أحداً.

وهذه يا شقيقي في
عـنت التدوين ـ
محسـن ـ سنـدة
للبوسـت
أرك دوماً جسوراً
و بخير

شنتير،...
السلام في أبهائه وقِبَابه الصالحة والعالية،..

ولا يهمك يا سيدي، وأنا في انتظار أسمع صوتك، وأرجو أن يكون ذلك قريباً،..

والناس دي الدايراهو كتير، لكن منو بقول البغلة في الإبريق؟

أنا أكتر شيء واجعني إنو ناس قال الله وقال الرسول ديلاك، بكتبوا (إنشاء الله) هكذا،..
يعني الواحد لو دخل هنا كان عرف: إن شاء الله، وكان عرف الهمزات وحاجات كتيرة،..

بس إنت خليك عافية، والشترة ربنا يزيلها من فيضو وجودو،..



Osman M Salih،...
تحياتي يا أستاذي الكريم والفاضل،..
وأهي علامة على الطريق وخطوة من مشوار، يا شقيقي في حارة الحبر والقلم،..
وأرجو أن لا تخزلنا الجسارة لدى هاوية،..

تسلم يا رجل وتحياتنا المحبة كلها لك،.
وشكراً لمؤازرتك إصلاح الكتابة، ومن لها إن لم يكونوا الكتاب؟
والمحبة قدامك ووراك،..

حضرَ الطلابُ للدرسِ إلا نوريتاً

إزيك يا ود السر،..
كويس بالتطبيقات الحية، واتوحشناهو ود نوريت، أريتو طيّب،..
وكيفك يا ود السر، خليك عافية وبطل،..

يا ود السر،...
أنا كنت منتظر نوريت يجي وأشاغلو شوية، لكن الظاهر إنو قابضاهو ظروف،..
خلينا نشاغلو في غيابو، وبالمرة نجاوب علي جزء من طلب هو طلبو،..
إنت قلت:
حضرَ الطلابُ للدرسِ إلا نوريتاً

أها أخونا هاشم نوريت قبل كدا سأل عن الممنوع من الصرف وفي الأعلام تحديداً كما أذكر،.. غايتو بجاوبك، كان ما يقوم هاشم يجيب لينا بنادق البجا وحركاتن ويجينا،

الجملة الصاح كدا:
حضر الطلاب للدرس إلا نوريت

لأنو نوريت اسم غير عربي وأكثر من ثلاثة أحرف، بالتالي بكون ممنوع من الصرف،..
وأنا ما ح أقوليك اسم (عجمي) لأنو الكلمة دي سخيفة وعنصرية، ومعناها البهيمة، يعني العرب (القدماء) بشوفوا إنو أي زول ما بتكلم بالعربي دا أعجمي،..
بالرغم من إنو ثقافة العرب نفسها والإسلام بنوها الناس الما عرب، الفرس والروم والروس وغيرن من المولدين،..
وشوف أشهر ناس في العربي هم الإربلي والدؤلي وسيبويه والسيوطي وقوم كتيرة ما متذكرها هسي، ماعدا (ابن الأعرابي) العربي، وديل كلهم ما عرب،...
التاريخ كتبوهو (الطبري) و(ابن كثير) و(ابن هشام) و(ابن الأثير) وديل ما عرب، والقرآن فسّروهوا (ابن كثير) و(القرطبي) و(الجلالين) و(المسعودي) و(ابن تيمية) وديل ما عرب،..
الأدب كتبوهوا (ابن عبد ربه) و(الأصفهاني) و(المبرّد) وديل ما عرب،..
الحديث كتبوه (البخاري) و(مسلم) و(ابن ماجة) و(النسائي) و(أبو
داؤد) وديل ما عرب،...
والمتصوفة الكبار هم (ابن عربي) و(الجنيد) و(الحلاج) و(السُهْرَوردي) و(ابن عطاء السكندري) وديل ما عرب،...
والأئمة الأربعة (أبو حنيفة) و(مالك) و(الشافعي) و(ابن حنبل) العربي الخالص فيهم هو (ابن حنبل) بس،...
والعلماء الفلاسفة (الرازي) و(ابن النفيس) و(ابن خلدون) و(الطوسي) وغيرهم، كلهم ما عرب، ما عدا (جابر بن حيان)،..
والجغرافيون (البيروني) و(ابن الفقيه) و(ابن إياس) و(الهمداني –الفارسي) ووو كلهم تقريباً ما عرب،..
أهم قواميس العربي (لسان العرب) و(مختار الصحاح) و(المنجد) عملوها ما عرب، وأهمها على الإطلاق هو لسان العرب، ودا عملو ابن منظور الإفريقي ومعروف إنو (نوبي –دنقلاوي) من أهل زميلنا "بشاشا"،...



وووو... لو فتحت في الموضوع دا ما بننتهي،..

يعني في النهاية بطلعو العرب هم العجم والبجم، هنا في الخليج بقولوا للهندي والباكستاني عجمي، بالرغم إنو الهندي والباكستاني عندو قنبلة نووية، وهم ما عندهم غير ضراطن،..
يضحك نهاركم،..

..

المستثنى بـ"غير" و"سوى"

بما أننا ما نزال في درس "الاستثناء" نفسه، فعلينا أن نبدأ بقاعدة الدرس الماضية نفسها، أو كما قلنا في الحلقة الأولى من المستثنى،..


عندنا حاجتين بنجي نشوفن أولاً بالتبادي، لو لقيناهن الكلام ببقه ساهل، ولو ما لقيناهن بعداك بنشوف الدواء كيف!


الحاجة الأولى هل الجملة قبل أداة الاستثناء (مثبتة) أم (منفية)؟

الحاجة الثانية، هل (المستثنى منه) موجود أم غائب؟


أها مع "غير" و"سوى" برضو نمسك في المدخلين ديل كويس، والباقي كلو هيّن،...


أمثلة المجموعة الأولى:

لاحظ إنها بنفس شروط المجموعة الأولى بتاعة (إلا) بمعنى إنو الجملة (مثبتة)، و(المستثنى منه) موجود:

تصدأ كُلُّ المعادن غيرَ الذهبِ، (لاحظ إنو غيرَ –منصوبة، أو...
تصدأ كُلُّ المعادن سوى الذهبِ، (وهنا برضو كان مفروض ننصب سوى، لكن بيتعذر نصبها عشان ما بنقدر ننصب فوق الألف زي ما في درس المقصور، بمنع النصب هنا التعذُّر، لكن مفروض هي تكون منصوبة، ولمن نعرب بنقول منصوبة بفتحة مقدّرة منع من ظهورها التعذُّر،...

سمعتُ القصيدة غيرَ بيتين.... أو سوى بيتين...

أثنيتُ على الطلاب غيرَ المهملِ.... أو سوى المهملِ

طيّب الخلاصة شنو؟
إذا كانت جملة الاستثناء (مثبتة) و(المستثنى منه) مذكور وموجود، أول حاجة إنو "غير" و"سوى" بياخدن حكم المستثنى نفسه، يعني حكم الاسم البجي بعد (إلا) في الدرس بتاع (إلا)، فبنعمل شنو؟ بنقوم ننصبن في رقبتن دي، وكأنهن هن المستثنى، والاسم البجي بعدن طبيعي إنو نقوم نجرو بالإضافة،...

قاعدة سهلة جدا، لو الجملة (مثبتة) و(المستثنى منه) موجود بننصب (غير) و(سوى) وبنجر الاسم البجي بعدن بالإضافة، هو أصلا ما في طريقة غير إنك تجر الاسم البجي بعدن، معقول يعني تقول: جاء الرجال كلهم غير (رجلان).. دا إلا زول خشمو أشتر من خشم معتّر ليهو العرقي،....

يعني الاسم البعد (غير) و(سوى) في جميع الحالات بكون مجرور، ودي قاعدة،..

طيّب لو كسرنا القاعدة الأولى، اللي هو أصبحت الجملة (منفية) –مش مثبتة، و(المستثنى منه) مذكور وموجود، نشوف الأمثلة:

لا يسعى أحدٌ في طلبِ الفضيلةِ غيرَ الفاضلِ...... أو....
لا يسعى أحدٌ في طلبِ الفضيلةِ غيرُ الفاضلِ....

وكمان بالنسبة لـ"سوى"،...
لا يسعى أحدٌ في طلبِ الفضيلةِ سوى الفاضلِ.... بتقدير إنو "سوى" –منصوبة،....
أو...
لا يسعى أحدٌ في طلبِ الفضيلةِ سوى الفاضلِ..... بتقدير إنو "سوى" –مرفوعة، ومنع من ظهور حركات الإعراب عليها التعذّر كما أسلفنا،...


لا أعرف مذهباً غيرَ مذهبِ الحق.... أو سوى مذهب الحقِ...




لا تثق بأحدٍ غيرَ الأمين "غيرَ" –منصوبة،.......... أو لا تثق بأحدٍ غيرِ الأمين... "غيرِ" –مجرورة،...

ونفس الطريقة مع "سوى"، هن أصلاً قاعدتن واحدة، وفي جميع الأحوال، يعني ما شرط نضرب أمثلة بيهن الاتنين، أمثلة أي واحدة بتنطبق علي التانية، الفرق بس إنو غير بتظهر عليها الحركات، وسوى بتقدّر تقدير، وبنقول منع من ظهورها التعذّر،..

طيّب القاعدة شنو:
إذا كانت جملة الاستثناء "منفية" و"المستثنى منه" مذكور في الجملة، علي كيفك، إما أن تنصبهما (غير –سوى) على الاستثناء، زي مثال: لا يسعى أحدٌ في طلبِ الفضيلةِ غيرَ الفاضلِ...

وإما أن تُتبِع (غير - سوى) لما قبلهما، زي مثال: لا يسعى أحدٌ في طلبِ الفضيلةِ غيرُ الفاضلِ....
وعشان ما يسأل زول طيّب ليه ما (جَرّيناها) لأنو (الفضيلة) اللي قبل "غير" مجرورة، بنقولو لامن نعاملها على أساس إنها جزء من الجملة، مش أداة استثناء، وهذا معنى الاتباع لما قبلها، عليه بنعاملها بموقعها الإعرابي في الجملة، وهي هنا تكون مرتبطة بالفاعل (أحدٌ)... يعني بتصبح الجملة: لا يسعى أحدٌ غيرُ العاقل في طلب الفضيلة....
طيّب من هنا ولافوق لو غلبك تصرّف معاها، أنصبها وبس، لأنو النصب في الحالتين بجوز،... زي قاعدة (إلا) في نفس الحالتين:
(مثبتة) و(المستثنى منه) موجود، (نصب) أو (رفع)
(منفية) و(المستثنى منه) موجود، (نصب) أو (موقعها الإعرابي في الجملة)..

إذن لامن تتلكلك معاك أنصبها وبس، لأنو النصب في الحالتين بجوز،..


طيّب، لو كسرنا القاعدتين، يعني لو كانت الجملة (منفية) وكمان (المستثنى منه) غائب وغير مذكور أو موجود في الجملة:

أمثلة:

لم ينفعني غيرُ الصدقِ.......... أو سوى الصدقِ...

لا تقل غيرَ الحقِ....................... أو سوى الحقِ...

لا تتعرّف بغيرِ الأخيارِ........... بسوى الأخيارِ


طيّب هنا القاعدة بتقول: إذا كانت الجملة (منفية) و(المستثنى منه) غير موجود، بنقوم نعربن (غير-سوى) على حسب موقع إعرابن من الجملة،..

يعني في الجملة الأولى بتكون (غير-سوى) فاعل... للفعل ينفعني...

الجملة التانية (غير-سوى) بكونوا (مفعول به) للفعل تقل... الفاعلو إنت...

في الجملة التالتة (غير-سوى) بكونوا مجرورين لأنو اتقدمن حرف جر،...

تفكيك عامية

لو عدنا للطفولة، والحريم بعوسن في الكسرة، ونحن نتلب جاي وجاي:

خالتي أديني شيطة... ها ولد ماتفوت من النار دي جاي وألا جاي ما تحرق،..

وبنقصد بالشيطة الكسرة البتحرق لامن تنشف وتمسك في الصاج،..

وهي فصيحة طاخ طراخ...

شَاطَ الشيءُ... شَيْطَاً... وشِياطةً وشيطوطةً: احترق،..
وشاطتِ القِدرُ شيطاً.... احترقت ولَصِقَ بها الشيءُ...
وقال الليث: التشيُّطُ شيطُوطةُ اللحم إذا مسَّته النارُ يتشيّطُ فيحترقُ أعلاه...


يقول ود ضحوية، متكلماً عن الإبل المُهَبْتَة، مخاطباً خيالات ابنته الزينة:
أبوك يا الزينة (عَكَّاهن) قبض في روسن
الهوج والشرق فوق العواتي بكوسن
أمسوا الليلة في الغُوب الكتير جاموسن
نووا العودة للغالي ورفيع ملبوسن

وفي الفصيح:
عَكَّه يَعُكُّه عَكَّاً: حَبَسه، وإبل (معكوكة) أي محبوسة،...

وكذلك نقول: فلان عكشو البوليس.... وهي بالأصل عكشبه البوليس... لأنو الباء ثقيلة حُذفت... في غرب السودان يقولون (عكشبه) كما هي في الأصل،..
وفي الفصيح: عكشب... بمعنى شَدَّه وثاقاً، كتّفو وقبضو،..


وأيضاً حين كنا صغاراً كنا نقول، فلان طَلَع فوق رأس البيت بالعُكَن،...
ونعني تلك النتوءات على الجدار، التي بمستطاع الإنسان أن يضع فيها رجله للصعود...

والعكن فصيحة تماماً، ومئة بالمئة..

في القواميس:
العُكَن والأعكان: الأطواء في البطن من السِّمَن... وواحدتها عُكْنَة... وتعكّن البطنُ صار ذا عُكَن...
وعُكَن الدرع، ما تَثَنَّى منها.......





وإلى اللطيفة القادمة مع الاستثناء بـ(خلا) (عدا) (حاشا)





...

اتوحشناك يا رجل،..

الافاضل
محمد السر
محسن خالد
دبيانا..
اعجبنى الدرس الجديد وفى شوق شديد ل(ما) المصدرية وعمايلها
وداير اعرف هم كم (ما) موجودة...
محمد السر حكاية الاسماء غير العربية دى عايزة ليها قعدة
وحكايتها كبيرة وياريت استاذنا محسن يكتر الحديث عنها..



همسة....
استاذنا محسن الليلة نوريت اتجه للجزيرة عديل كده ربنا يستر...

أكوجا الممنوع من الصرف... حمد لله على السلامة.
أستاذنا محسن
صبحك ومساك الله بالخير
يعني المثقفين رفاقتك ديل.. لو كل واحد فيهم سوَّى عرفته في بوست زي حقك دا وبسَّطو قدر أمخاخ الزيي أنا وأخوي نوريت ما كان دعينا ليهم بالخير.. بدل ساوينها لي الليل والنهار تناص وتشيوء وما بعد الحداثة و..
يعني أنا بعد تلاتين سنة كدا لما أسمع زول يكوجن في المستثنى أقول ليهو يا حمار أستاذ محسن "الله يطراهو بالخير أو ألله يرحمه ويحسن إليه" قال: هنا لازم ننصب لأنـ..
وتخيل الدعوة دي لاقت باب السما مفتوحة... آآآآآآآآممممممييييييييييننننننن..
الساعات البتاخدا من وقتك عشان تعلمنا مقدرنها.. وإن شاء الله في ميزان حسناتك..
يا زول أنا عشان عارف دعوتي مجهجهة رفعتها لي جهات أعلى.. الليلة ضربت لي عمك الحاج عشان يديك دعوة.. بس لقيتو مافي.. لكن ما بخليه.
يضحك صباحك..
ومساك

Elawad Eltayeb،...
ونحن كمان آلشريف،...
أريتك طيب، وهاني ياك؟

كن بخير دوماً،...


هاشم نوريت،...
دبايوا،...
إنت عارف يا ود نوريت ياهو إنت زي جدودك "الدؤلي" و"سيبويه" و"الإربلي" و"الزمخشري" الماعرب ديل، ما عرب ومقدّدنها، كلو فوق جاه القرآن والإسلام وعزةً لي الله ما لي زول،..
أها (ما) المصدرية ماشة عليك، أنا قلتلك الكلام دا، لأنك إنت عارفها جاية علينا في (خلا) و(عدا)... يعني الحلقة الجاية من المستثنى،....
أنواع (ما) كتيرة، قبل كدا ما انتبهت لإني أعدهن، بتذكر هس منهن ما (النافية)، وما (النكرة) وما (الزائدة) وما (المصدرية)،...

وطلبك يا ود نوريت إن ربنا مدّ في العمر بجيهو،..

قبّال ما أقولك (لبابى) الجزيرة دي الله يستر عليها،..

كن بخير،..


محمد السر،...
تحايا، ومحبة،...
جنس كلامك دا، وكلام نوريت، دا كلام ناس هم ذاتن بعرفو وعندهم (عَرَف) زي ما بقولوا أهلنا،...

غايتو مستني دعوة عمي الحاج، أضربلو تاني، ناس أمريكا ديل دعواتن ما مضمونة،...
ويضحك دهرك،...

..



الحلقة الأخيرة من المستثنى

المستثنى بـ"خلا" و"عدا" و"حاشا"

هنا الموضوع أسهل من الدرسين الفاتو بكتير،....


أول حاجة بنجي نشوفها، هل الشباب ديل: "خلا" و"عدا" و"حاشا"... سبقتم (ما) وألا قاعدين أم ميطي ساي، بدون (ما)...

لأنو لو (ما) دي اتقدمت الأدوات –الحروف ديل، بتقوم ما تديهن فرصة غير إنهن يكونن أفعال... وبرضو الموضوع بكون ساهل، لأنو لو قطعنا شَكّهن أفعال معناها البجي بعدن وهو (المستثنى) ببساطة بكون مفعول به ليهن،... معناها لو اتقدمتن (ما) وجب بالضرورة نصب الاسم البجي بعدن (المستثنى)،...



طيّب لو ما سبقتن ما (بدون ما)... هنا علي كيفك، ممكن تعتبرن أفعال وتنصب البعدن، وممكن تعتبرن حروف جر وتجر البعدن،....

قلنا الدرس دا هنا موية بس،...

الأمثلة:

وضَعَ أبو الأسود الدؤلي أبواب النحو عَدَا بابَ النعتِ.... (بابَ –المستثنى... منصوب)...

أو وضَعَ أبو الأسود الدؤلي أبواب النحو عَدَا بابِ النعتِ.... (بابِ –المستثنى... مجرور)...

طيّب، لأنو المثال دا، عاينا وما لقينا (ما) الشقية، أها الحصل شنو، الحصل طبّقنا القاعدة ببساطة، وهي عندنا الخيار، إما ننصب الاسم بعد عدا (المستثنى) ونعتبر إنو (عَدَا) دي فعل ماضي، والبجي بعدها بكون مفعول به لها، -المثال الشق الأول،...

أو كمان نعتبر عَدَا دي حرف جر، المثال الشق الثاني، ونقوم نجر المستثنى بها،...

مثال 2

نَبَغ الطلاب ما عدا أخاك...

أو: نَبَغ الطلاب ما عدا طالباً...

وهنا ما عندنا خيارين، لأنو (ما) اتقدمت (عدا)... بالتالي بننصب ما بعدها (وجوباً)... وبنعربو مفعول به لها.... ودائماً الفاعل بكون ضمير مُسْتَتِر فيها،..
يعني هنا (عدا) بتكون فعل ماضي كسر رقبة، ليه؟ لأنو اتقدمتها ما،...


مثال 3
أُحِبُّ السفر في كُلِّ الأوقات حاشا فصلَ الشتاء.... أو حاشا فصلِ الشتاء،...

يعني بدون (ما) بالتالي بجوز النصب والجر،...

طيّب هل بجوز دخول (ما) على (حاشا)؟

ناس قالوا أيوة بتدخل، واستشهدوا بقول الشاعر:
وأما الناس ما حاشا قُريشاً.... فإنَّا نحن أحسنهم فعالاً

وبرضو بحديث الرسول: (أُسامة أحبُّ الناس إليَّ ما حاشا فاطمة).

وناس قالوا ما بتدخل، وإنو بيت الشعر الفوق دا شاذ، والحديث طبعاً ما بقدروا يقولوا شاذ سكتوا خلوهوا،...

رأيي أنا فيها إنو (ما) ممكن تدخل على (حاشا)، بيت الشعر الفوق دا ما شاذ والحديث بأكّدوا، والشاعر والرسول هما حجة على علماء اللغة المتأخرين وليس العكس،... ليه؟ لأنو أهم قاعدة في العربي إنو لغة سماعية،...

طيّب لو دخلت (ما) على (حاشا) ياها القاعدة نفسها، وجب نصب ما بعدها،...


طيّب الخلاصة شنو؟ بالنسبة لـدرس "خلا" و"عدا" و"حاشا"؟
لو ما دخلت (ما) بجوز النصب والجر،...
لو دخلت (ما) وجب النصب فقط،..


إذن لو غلبتك أي جملة، ما عليك إلا إنك تنصب وبس، لأنو النصب بجوز في الحالتين، ولو الدرس دا زهّجك، ما عليك إلا تجيب البعد (عدا) و(خلا) و(حاشا) منصوب وبس، وما تشوف ذاتو لو فيه (ما) وألا ما فيهو (ما)، لو غلبك تنصب وبس، وفي جميع الأحوال،...

تفكيك عامية

هناك كلمة غريبة، نحن فقط من يستعملها، أنا سألتُ عنها في معظم بلدان العرب لا يعرفونها، نحن بنقول: فلان دا أحوص... وفلانة دي حوصاء...

وفي لعبة البنات المعروفة:
أريكه... عمياء.... أريكة حوصا...
بقولوا (عمياء) لما الكراع تكون مائة بالمائة في نص المربع، يعني إنت ما شايف بطرف عينك،...
وبقولوا (حوصا) لما الكراع تهبش خط من خطوط المربع،...

الكراع طبعاً فصحية ومعروفة للناس،..
وكمان (أريكه) دي ذاتها فصيحة طاخ طراخ، معناها... أُريكها... أي (أوَ أُريك إياها)... يعني أورّيك ليها.... (أورّيك ليها) يعني (أُريك إيّاها)،..

العرب بقولوا أحول،... أو أحور.... تب ما عندهم أحوص وحوصاء دي،...
بمعنى العين المعيبة، أو التي فيها خلل،...

وحتى لما تكتبها في الكمبيوتر بخطلك تحتها خط أحمر، بمعنى نجرتها من رأسك،..



والكلمة فصيحة بالضبط وبدون أي تحوير فيها،..

يقول ابن منظور: الحَوصاء من الأعين التي ضاق مَشَقُّها، غائرةً كانت أو جاحظةً،..
يقول ابن الأعرابي: الحَوَصُ بفتح الحاء، الصغارُ في العيون وهم الحُوص،...

ابن منظور: الحَوَص ضِيقٌ في مؤخر العين، حتى كأنها خِيطَت، وقيل: هو ضِيقُ مَشَقِّها، وقيل: هو ضِيقٌ في إحدى العينين دون الأخرى،..





***
طيّب، برضو بنقول: حاحيت الغنم،.. والمحاحاة،... ودا كلام فصيح تمام التمام، وأنا ملاحظتي إنو اللغة المبارية الرواعية دي كلها فصيحة، ما دخلت عليها تأثيرات كتيرة،...


يقول أبو زيد: حاحَيْتُ بالمِعْزَى حِيحاءً ومُحاحاةً: صِحتُ،..
يقول أبو عمر: حَاحِ بضأنك وبغنمك... أي: ادعها،..
يقول سيبويه: أبدلوا الألف بالياء لشبهها بها، لأنّ قولك: حاحيتُ، إنما هو صوتٌ بنيتَ منه فعلاً... كما أنّ رجلاً لو أكثر من قوله (لا) لجاز أن يقول (لاليتُ)، بمعنى قلت (لا) كثيراً،...




..

يا شنتير، خلاص؟ استبينا؟؟؟

للرفع والتوثيق وتعميم الفائدة


الحلقة الأخيرة من المستثنى

Quote: المستثنى بـ"خلا" و"عدا" و"حاشا" هنا الموضوع أسهل من الدرسين الفاتو بكتير،.... أول حاجة بنجي نشوفها، هل الشباب ديل: "خلا" و"عدا" و"حاشا"... سبقتم (ما) وألا قاعدين أم ميطي ساي، بدون (ما)... لأنو لو (ما) دي اتقدمت الأدوات –الحروف ديل، بتقوم ما تديهن فرصة غير إنهن يكونن أفعال... وبرضو الموضوع بكون ساهل، لأنو لو قطعنا شَكّهن أفعال معناها البجي بعدن وهو (المستثنى) ببساطة بكون مفعول به ليهن،... معناها لو اتقدمتن (ما) وجب بالضرورة نصب الاسم البجي بعدن (المستثنى)،... طيّب لو ما سبقتن ما (بدون ما)... هنا علي كيفك، ممكن تعتبرن أفعال وتنصب البعدن، وممكن تعتبرن حروف جر وتجر البعدن،.... قلنا الدرس دا هنا موية بس،... الأمثلة: وضَعَ أبو الأسود الدؤلي أبواب النحو عَدَا بابَ النعتِ.... (بابَ –المستثنى... منصوب)... أو وضَعَ أبو الأسود الدؤلي أبواب النحو عَدَا بابِ النعتِ.... (بابِ –المستثنى... مجرور)... طيّب، لأنو المثال دا، عاينا وما لقينا (ما) الشقية، أها الحصل شنو، الحصل طبّقنا القاعدة ببساطة، وهي عندنا الخيار، إما ننصب الاسم بعد عدا (المستثنى) ونعتبر إنو (عَدَا) دي فعل ماضي، والبجي بعدها بكون مفعول به لها، -المثال الشق الأول،... أو كمان نعتبر عَدَا دي حرف جر، المثال الشق الثاني، ونقوم نجر المستثنى بها،... مثال 2 نَبَغ الطلاب ما عدا أخاك... أو: نَبَغ الطلاب ما عدا طالباً... وهنا ما عندنا خيارين، لأنو (ما) اتقدمت (عدا)... بالتالي بننصب ما بعدها (وجوباً)... وبنعربو مفعول به لها.... ودائماً الفاعل بكون ضمير مُسْتَتِر فيها،.. يعني هنا (عدا) بتكون فعل ماضي كسر رقبة، ليه؟ لأنو اتقدمتها ما،... مثال 3 أُحِبُّ السفر في كُلِّ الأوقات حاشا فصلَ الشتاء.... أو حاشا فصلِ الشتاء،... يعني بدون (ما) بالتالي بجوز النصب والجر،... طيّب هل بجوز دخول (ما) على (حاشا)؟ ناس قالوا أيوة بتدخل، واستشهدوا بقول الشاعر: وأما الناس ما حاشا قُريشاً.... فإنَّا نحن أحسنهم فعالاً وبرضو بحديث الرسول: (أُسامة أحبُّ الناس إليَّ ما حاشا فاطمة). وناس قالوا ما بتدخل، وإنو بيت الشعر الفوق دا شاذ، والحديث طبعاً ما بقدروا يقولوا شاذ سكتوا خلوهوا،... رأيي أنا فيها إنو (ما) ممكن تدخل على (حاشا)، بيت الشعر الفوق دا ما شاذ والحديث بأكّدوا، والشاعر والرسول هما حجة على علماء اللغة المتأخرين وليس العكس،... ليه؟ لأنو أهم قاعدة في العربي إنو لغة سماعية،... طيّب لو دخلت (ما) على (حاشا) ياها القاعدة نفسها، وجب نصب ما بعدها،... طيّب الخلاصة شنو؟ بالنسبة لـدرس "خلا" و"عدا" و"حاشا"؟ لو ما دخلت (ما) بجوز النصب والجر،... لو دخلت (ما) وجب النصب فقط،.. إذن لو غلبتك أي جملة، ما عليك إلا إنك تنصب وبس، لأنو النصب بجوز في الحالتين، ولو الدرس دا زهّجك، ما عليك إلا تجيب البعد (عدا) و(خلا) و(حاشا) منصوب وبس، وما تشوف ذاتو لو فيه (ما) وألا ما فيهو (ما)، لو غلبك تنصب وبس، وفي جميع الأحوال،... تفكيك عامية هناك كلمة غريبة، نحن فقط من يستعملها، أنا سألتُ عنها في معظم بلدان العرب لا يعرفونها، نحن بنقول: فلان دا أحوص... وفلانة دي حوصاء... وفي لعبة البنات المعروفة: أريكه... عمياء.... أريكة حوصا... بقولوا (عمياء) لما الكراع تكون مائة بالمائة في نص المربع، يعني إنت ما شايف بطرف عينك،... وبقولوا (حوصا) لما الكراع تهبش خط من خطوط المربع،... الكراع طبعاً فصحية ومعروفة للناس،.. وكمان (أريكه) دي ذاتها فصيحة طاخ طراخ، معناها... أُريكها... أي (أوَ أُريك إياها)... يعني أورّيك ليها.... (أورّيك ليها) يعني (أُريك إيّاها)،.. العرب بقولوا أحول،... أو أحور.... تب ما عندهم أحوص وحوصاء دي،... بمعنى العين المعيبة، أو التي فيها خلل،... وحتى لما تكتبها في الكمبيوتر بخطلك تحتها خط أحمر، بمعنى نجرتها من رأسك،.. والكلمة فصيحة بالضبط وبدون أي تحوير فيها،.. يقول ابن منظور: الحَوصاء من الأعين التي ضاق مَشَقُّها، غائرةً كانت أو جاحظةً،.. يقول ابن الأعرابي: الحَوَصُ بفتح الحاء، الصغارُ في العيون وهم الحُوص،... ابن منظور: الحَوَص ضِيقٌ في مؤخر العين، حتى كأنها خِيطَت، وقيل: هو ضِيقُ مَشَقِّها، وقيل: هو ضِيقٌ في إحدى العينين دون الأخرى،.. *** طيّب، برضو بنقول: حاحيت الغنم،.. والمحاحاة،... ودا كلام فصيح تمام التمام، وأنا ملاحظتي إنو اللغة المبارية الرواعية دي كلها فصيحة، ما دخلت عليها تأثيرات كتيرة،... يقول أبو زيد: حاحَيْتُ بالمِعْزَى حِيحاءً ومُحاحاةً: صِحتُ،.. يقول أبو عمر: حَاحِ بضأنك وبغنمك... أي: ادعها،.. يقول سيبويه: أبدلوا الألف بالياء لشبهها بها، لأنّ قولك: حاحيتُ، إنما هو صوتٌ بنيتَ منه فعلاً... كما أنّ رجلاً لو أكثر من قوله (لا) لجاز أن يقول (لاليتُ)، بمعنى قلت (لا) كثيراً،... .. (

التحية والتقدير للأستاذ محسن خالد
جعفر هاشم

العزيز النصيح ... محسن. شِن حالك؟

لقد استبينا، فيما يتعلق بالاستثناء. وقد طلبت منك توضيحه متقمصاً همّاَ عاماً. أما الآن يا قريبي فإليك طلبي الخاص الذي سبق لي ذكره على حاشية إحدى المداخلات.

لَدَى .. بنت الذين. مشكلتي مع لدى (غير الظرفية). أها دي شني في عالم الإعراب؟. لدى الظرفية ظريفة ولذيذة وبنت حلال. عليك بـ لَدَى الثانية الأخرى؛ عليها النَعْلَة.

تفكيك العامية: زيادة خير.
لفتت لغة الرواعية وجذورها الفصيحة انتباهي منذ زمنٍ بعيد. وفي تقديري فإن اللغة العربية أصلها لغة رعوية في المقام الأول، مع شوية بهارات لاحقة وليدة التمدن الطارف. لقد عرفتُ كلمة رِبِق قبل أن أعلم أنّ للاستعمار ربقة، وعرفت الغارب الذي ما زال في ظن البعض قارباً.

نِخْ قلوصَك فوق صنقور لَدَى. وبالمناسبة .. كلمة قلوص دي من المفردات اليومية الدارجة بين عتاة الرعاة الأبّالة في الشرق، وربما الغرب أيضاً. أكتفي بهيك مثالات، وغيرهن كتير موجود.

وإلى لقاء. أو زي ما بتقول: يضحك صباحك/مساءك

تلحيقة:
رغم إغراءات الألف الأحمر أبو همزة .. تركنا فعل الأمر من أناخ هكذا "نِخْ"؛ فأي قياس لغوي يجيز لنا هيك استخراج يا مُحْسْ؟.

"هيك" دي عندي معاها غرام لأنها الأم البيولوجية لـ "هكذا" الركيكة ديك.

في انتظارك .. ويسعد نهارك. النهار انقرض عندكم وللا لسع فيه بليص؟.

كما في أدناه.

كما في أدناه.

عزيزي محسن خالد

شُكُر متأخِّر على الحرف الكان مزازيني والشكر أجزله على هذا البوست التحفة. حاجات ليها علاقة بدرس المستثنى العظيم:

1. حبوباتنا بقولن، لتأكيد النفي، "لا حاشا" أها، دي راكبة من وين ونازلة وين؟!
2. كلامك عن كلمة المحاحاة فرَّحني جداً لأنَّو دي الكلمة البستخدما الأيام دي عشرات المرَّات في اليوم لأنَّو، وانت عارف، حياة المدن ما فيها شي غير المحاحاة من ما تقوم تشيل وتحاحي وحتى وإنت نايم برضك ما بتنجى من المحاحاة. الحاصل إنّو أيام الجامعة (85 – 89) ولأنَّو محاحاة الزيت، البصل، الفحم...الخ كانت، كما يقول بشرى الفاضل، تعنينا فقط على تجريداتها، إدَّعى صديقنا جاليليو إنُّو نجر معكوس لكلمة المحاحاة وهي كلمة "رهرجة"وسؤالي: يا ترى عندك ليها دَرِبْ وأللا منجورة بي قَدُّوماً سنين؟!
3. يا أخوي ما دام انت وشنتير هامَّاكم لغة الرواعيَّة ما تفتحوا لينا ليها بوست براها وبالمرَّة دخِّلو معاها لغة المزارعيَّة، يعني ببساطة، لغة أهل الخلا خلا من تمدَّن منهم (وأعرب المثال ده باللاهي). بمناسبة لغة المزارعيَّة، مرَّة سألتَ في حفلة عن مراحل نمو العيش (شوكة، أضان فار، سواسيو، جداد، صقَّار...إلى أن يفرك ويقاوي) ولمَّا بقيت خلاص داير أدِّي الجايزة رفع واحد إيدو وقال لي: غلط، العيش أوَّل حاجة بِزِم!! فألقمني حجراً إذ كيف فاتت عليَّ مرحلة من مراحل نمو العيش هي الأهم في صناعة أهمَّ مشروبين سودانيين أصيلين: المريسة والآبري وما بقول الحلومر لأنَّو أعتقد دي تسمية ناس مدن ساكت وأللا شنو؟!. وعلى ذكر كلمة الآبري، عندك ياخوي ليها دَرِبْ وأللا برضها منجورة نجراً مَمَيَّز؟!.

وليضحك يومكم كلَّه ضحكاً لا يشبه "ضحك أب سنينة علي أب سنينتين" في شيء.

العزيز محسن ،

لم تكن قواعد اللغة العربية يوما بهذا الجمال .

jafar hashim،...
المحبة لك يا صديقنا، وماك طيّب،..
أرجو أن تكون بخير،...
والأشواق والمحبات لك،..







Shinteer،...


الحبيب شنتير، كيفنك واتوحشناك آجنى،..
وماك طيّب،..
عارف إنو طلبك تقمّص لطلب عام، بعدين إنت دارس شنو؟ أظنو عربي، لو ما أطلع أشتر، مش كضيضيب،...
العربية فعلاً لغة رواعية بالإضافة لتحديد إنو اللغة الجات السودان على وجه الخصوص جاء بها الرعاة من العرب -قبل الإسلام بكثير، وبملاحقتنا للبيوتات العربية التي وفدت على السودان عن طريق الشرق والشمال والغرب بنجد إنهم معظمن كانوا قبائل رعوية، بالإضافة للغة الرواعية ممكن نضيف (الأفعال)، تقريباً كل الأفعال إما أنها فصيحة أو زاحفة أو منجَرَّة من فعل فصيح، هذا مع العلم إنو "أبو العلاء المعري" في "رسالة الغفران" بيرجع الأصل في لغة العرب للأسماء مش الأفعال، طبعاً ممكن تشم التأثر بنظرية القرآن في اللغة من هذه الناحية (وعَلَّمَ آدم الأسماءَ كلها)، أي من يقولون بأنَّ اللغة "علم توقيف"، بعيداً عن نظرية عمك "دارون" في التطور، ومن ثم الأصوات ثم الحاجة الوظيفية ووو....
عندنا في السودان ممكن تلقى في "التسميات" أصول إما "كوشية قديمة" أو "قبطية" أو "تركية-فارسية" أو حتى "لاتينية"، أما الأفعال فعربية كلها،...
(كلها تقريباً)
يعني: هَبَدَ... قَشَط... صَفَعَ ...خَبَط.. مَزَق... كَفَت... خَمَشَ...
يقولك، والله الجماعة ديل البيناتن ما خربت خلاص، اتلادموا قِدّام الدكان دا جنس ملادَمَة..
لَدَمَ، يلدم، لدماً... يقول ابن منظور: اللَّدمُ: اللَّطم، والضربُ بشيء ثقيل يُسمع وَقْعُه..

أخوك آلشنتيري حام مع أهلك البدو، لكن قلوصي دي تب ما شرمت أضاني، يمكن ديل أبّالة الشرق، ديل ما شفتهم،..
يقول البحتري:
حَنَّت قلوصي بالعراق وشاقها في ناجرٍ...... بردُ الشآم وريفُه


وقُبَّال ما نترد في الكلام كتير واتشايلنو اللسنات أرجع ليك لأنواع من (ما)،...
ما "النافية"،...
ما "الحجازية"،..
ما "التميمية"،..
ما "الظرفية –الزمانية"،..
ما "المصدرية"،..
ما "الصلة"،..
ما "الزائدة" لكيما، ربما، فبما...
ما "الزائدة / للتعويض"،..
ما "الكافَّة"،..
ما "المسلّطة"،..
ما "الموطئة"،..

وبالمرة كدي يا ود أشيقر أدلك علي كتاب مودِّك تمام في (حروف المعاني) هو كتاب موزون وزنة تمام يعني ما بغرِّق في الهردبيس وما بفطلو شيتاً مهم، وهو كتاب الدكتور أحمد جميل شامي (معجم حروف المعاني)،..

بالنسبة لموضوع "نِخ"،...
أيوة صحيح إنو القاعدة دائماً بنحذف حرف العلة حين الإتيان بالأمر،...
بس إنت غلطان، (نِخ) فعل أمر...... مستخرج من الفعل: (ناخ)..... مش أناخ،... وهذه تُوجّه للجمل (غالباً) وليس للشخص،...
أناخ فعل الأمر منها (أنِخ) وهذه للشخص، تقول له أنخ راحلتك،..
يقول ابن منظور: أنختُ البعير فاستناخَ... ونوَّخته فتنوَّخ، لاحظ ما بتقول نوَّخته فـ"ناخ" ولا حتى "أناخ" ممنوع، بل نَوَّخته فتنوَّخ،...
وبتذكر قول الشاعر السوداني:
نوَّختو حنّستو حَلّيت القشاط من دايرو
يا .... الماهن كشايمة بشايرو
محل النقاط طشَّ منّي ضُمّة،..
لو تبقى متذكر الرباعية دي تمها عليك الله،..

وطبعاً الأفعال مشكلتها مشكلة، والمسألة كلها سماعية بالرغم من وجود قواعد ضابطة لا أول لها ولا آخر،...
الكتاب الممتاز في مزازاة الأفعال سأوصيك به، وهو (معجم عين الفعل) للأستاذين جوزيف الياس، وجرجس ناصيف،..




بالنسبة للسيدة الفاتنة (لدى)،...
ابن منظور قصرها على معنى "عند" واستشهد بقوله تعالى (هذا ما لديّ عتيد) والعبارة يقولها الملَكُ وليس الله- يعني ما كُتِب من عمل العبد حاضرٌ "عندي"،..
الجوهري يقول: (لدى) لغة في لَدُن، ولَدُن ظرف مكان بمعنى عند إلا أنَّه أقربُ مكاناً من عند وأخصُّ منه، ويستشهد بـ(وألفيا سيِّدَها لدى الباب) ويضيف: اتصالها بالمُضْمَرات كاتصال (عليك)، يعني: لَدَيْكَ، لَدَيْكِ، لَدَيْهم، لَدَيْهن،..

غايتو ما عرفت إنت قاصد بالأخرى شنو، لكن.....
في "تذكرة أبي علي" ذكر لها هذا الرجل أحد المعاني الغريبة، ربما هو الذي تقصده أنت، قال إنها تأتي بمعنى ("هل" عن المفضَّل) واستدلَّ بقول الشاعر:
لَدَى من شبابٍ يُشترى بمشيبِ.... وكيف شبابُ المرء بعدَ دبيبِ
بمعنى: هل من شبابٍ يشترى بمشيبِ.... وكيف شبابُ المرء بعدَ دبيبِ

أها، دي ياها القاصده إنت يا شنتير وألا واحدة "لوخرى" كما تقول تيموليلت وأهل المغرب،...

وهيك فعلا بالطريقة دي بتطلع الأم الروحية لهكذا مواضيع...
أنا قايل إرجاعك ليها لي (هيك) أحسن من إرجاعي بتاع such a
لكن لاحظ، إنو الشوام ما عندهم قليب، القليب دا حقنا نحن، يعني نحن بنقول: يا زول إنت اسمك منو؟ هم بقولوا: شو اسمك يا زلمة؟
والفصيح ببدأ أقرب لكلامن هم، بأداة السؤال أولاً، وتاني باقي السؤال،..
نحن بنأخر دائماً أداة السؤال،..


يا ود أشيقر خليك عافية،...
وأرقد لليوم بالكالود تحت المسيميع، ما بوصيك،...





Adil Al Badawi،....

إزيك يا حبيب، وليك الحب،..
وأريت بلدك ممطور وقلبك كمان،..
بتاعة حبوباتنا دي ياها ذاتها، إلا مركبلها (لا) من صنقورن، مع إنو لامن يستخدموها كحرف بقولوا (حاشاي يا يمة) بدون (لا) وكدا بتظبط علي الفصيح تمام،..
ففي حاشا نجد، أنها تُكتب: (حاشَ) و(حاشى) و(حاشا) في موقع الحبوبات الذي ذكرته أي بمعنى براءةً لله ومعاذاً لله، وتُسمى في ما يقابله من الفصيح (حاشا "التنزيهية")،..

بعدين الزول ليهو حق: في زمّ، دي ضربة البداية وقولة تيت، وقولة المزاج في اتجاه المرايس والآبري،..

الآبري دي من زمان كايسة وماعارف ليها درب، المشكلة إنو اللغات الكوشية ما في ليها قاموس، أنا برجّح إنها تطلع كوشية مع إنو زمان كنت شاكّي في إنها جابوها الأتراك وربما تكون فارسية،..
غايتو لو طلعت معاي ياهو بجي بكتبها هنا،..

يا زول بالسلامة، والمعزّات كلها لك، وسلامي

أشكرك عزيزي محسن مرَّة أخرى

كلامك مع شنتير عن "نِخْ" ذكَّرني موضوع كنت داير أقول ليك تمسكو في بابك حق تفكيك العاميَّة والموضوع هو لغة تخاطب أهلنا (كان رواعيَّة كان مزارعيَّة) مع حيواناتهم. يعني لاحظت إنُّو "نِخْ" دي ياها، الخالق الناطق، "إخْ" البقولوها، زي ما اتفضَّلت، للجمل. الملاحظة التانية إنُّو لغة تخاطب أهلنا مع حيواناتهم فيها تقتير مريع في استخدام الحروف، يا ترى الحكاية دي من شنو؟! شوف مثلاً: عَرْت/حاو، تَكْ/حاس، هُرْد/بَسْ، جَرْ، كَرْ، إِخْ، بِسْ...

وعلى ذكر كلمة كَرْ، أود أن أهديك هذه القصة الحقيقية راجياً أن يكون فيها استراحة لعينيك من زغللة نَضْمَ العقود، أم هي السِّبَح، البتسوِّي فيهو ده:

حبوبة فَضْلَرَّاجِ (فَضْلَ الرَّاجِي) صلَّت صلاتا وقاعدة تسبِّح. جا جداداً زاحما في مصلاتا، لمَّا طردتو بي سِبْحَتَا وما اشتغل بيها نَهَرَتو: كَرْ...كَرْ...كَرْ إِكُر دينك!! بِنَيَّات بِتَّها اسغرَبَنْ: أجِيْ آحبوبة بِتْسِبِّي الدين؟!!، قالت ليهن: هَيْ أنا خابراهو ما تَراني بشوف التيمان بِقولو جِنِس كلامي ده!

وبالسلامة إلى حين، وما بعد، تفكيك عاميَّة نضمينا مع بهايمنا.

Adil Al Badawi،...

سلام، وتاني شكراً علي النكتة –القصوصة الحلوة،..
أصوات البهائم، وأصوات النضم معاها وتوجيهها دي أبواب مطولة في العامية وفي الفصيح، لا أول ليها ولا آخر، لأنها أصوات تختلق بما يشبه حركة وأشكال ووو... شغل سوريالي،...
هناك مثلاً في الفصيح: هاع هاع... لحث الإبل، والكثير الكثير، من أصوات المستأنس والوحش،..

وبتاعة العامية ديل ترا إنت لميتن كويس، انزغمت منك: عَيْ .. دي للنعاج،..
أما لامن يعزمو البهائم علي موية وألا برسيم، ديل دايراتلهن طرق كتابة في البداية، وشيء منهن صفافير، نوع صفافير معين، وعييييك،..
الموضوع شائق... وليس شَيّقاً... كما هو في الخطأ الشائع،...

السلام يا حبيبنا، ويبدو إنو إصلاح الكتابة دا لقى حبيب جديد ومكرّب، فهنيئاً لنا بك،..

1- في العامية قصة شكلها كدا:
أسمعي يا سلمى، أنا بنقل ليك المحاضرات مافي مشكلة،...
أها الزول دا وصاحبوا بعد يبعدوا شوية من البت صاحبو بكاويهو:
أنا بنقل ليك، والله جنس بلبصة،..
بلبصة شنو ياخي البت عيانة،...
عيانة؟ بالله، ما أنا دا المرض قاجي فوقي قطية فيكم واحد بنقل لي محاضراتي؟
ياخوي بطّل البلبصة،...
بلبصة شنو ياخ،..

(البلبصة) هي بالفصيح: (البَصْبَصة)، تحريك الكلب لذنبه طمعاً أو خوفاً، شوف الكلمة دي لعيمة كيف؟ و(التَّبَصْبُص) هو التملُّق،..


2- من الكلمات العامية التي لها مرجعية إنجليزية،...

يقولك، والله لاقوهم رباطية (هنضبوهم) ليك جنس (هنضبة)

الهنضبة جاءت من Hands up البقولوها الشباب وفي وشك المسدس

كما في أدناه

أشكرك عزيزي محسن خصوصاً على ما وقع من طرف القُفَّة! أي، قولك:

Quote: الموضوع شائق... وليس شَيّقاً... كما هو في الخطأ الشائع،...

والواقع أنَّني كنت في حزب هذا الخطأ الشائع حتى نبَّهتني، فيمن نبَّهت، إليه وهذه إحدى فوائد هذا البوست.

تعرف، الكتابة مرَّات فيها عمى بصيرة غريب: يعني شوف لو ما نبَّهتني وكنت داير أقول، مثلاً: "الموضوع شائق وشائك في آن واحد" تلقاني، رغماً عن إنَّو الله أدَّاني جناس لا حاريهو ولا داريهو، برضك أتحذلق وأجوبكو قائلاً: "الموضوع شيِّق وشائك في آن واحد" وأكون لا لمّيت جاي (أي، في العبارة الصحيحة) ولا جاي (أي، في العبارة الرشيقة) فبالله عليك في عمى بصيرة أكتر من كده. واصل...واصل...فتِّح بصرنا وبصيرتنا...ومشكور.

Adil Al Badawi،...
فعلاً إنت زول حلو، وأنا بعرف الزول من طريقة تعبيرو،..
ونادراً نظرتي تجلّي،..
ودا ما اسمو عمى بصيرة، عمى البصيرة ما بتصلّح، دا اسمو تأخر الوقوف على الشيء،..
عارف عمى البصيرة شنو؟ إنو تحبك مغربية وتقوم تتفلهم عليها، وتطلقها،..

أها في الوداعة،...
ويضحك نهارك

يا شيخنا محسن .. نعلك عافية.
أها بعد وصل أخونا عادل البدوي هنا .. أمانة ما تشوف قفشات وردود واستفسارات مجنونة في راسها. عادل ده من الناس المغرمين بالحكي واكتشاف الغريب من المتداول بين الناس، من الكلام يعني.

قلت لي لَدَى تاريها عاملة لخبطة من زمان؟ عليها النعلة في الأولين والآخرين. وأنا كمان لخبطتك بحكاية "لدى الأخرى" .. التي أعني بها لدى المعروفة الكثيرة الاستخدام دي. يعني: لديّ شوية قروش. هنا بقى بتكون مختلفة عن لدى الظرفية بتاعة "لدى الباب". أنا داير أعرف إعراب لدى .. بتاعة لديّ حمار وكلب وديك. شوف أنا خليت ليك حمار وكلب وديك كلهن بدون أي حركات إعراب لأني ما عارف لدى دي بتكون سوّت فيهن شنو. أنا داير أعرف إعرابها وبس عندما تقع في جملة بصورة زي دي.

شغلك نضيف في مسعلة نِخ وأنِخ. وعادل جاب ليها هُوادات من عائلة إخ وتك وحاو.



لـ قدّام

إزيك يا شنتير،...

وماك طيّب،..




لديَّ كلبٌ

هي أصلاً (لدى) (البمعنى "عند") + ياء المتكلم، إذن بتعرب بشكل عادي، حسب موقع "عند + ياء المتكلم" الإعرابي،..


أمسك في عند، مثلاً في القرآن: (أم عندهم خزائن ربّك) (عندهم) مضاف ومضاف إليه، الظرف والضمير، و(عندهم) كلها خبر مقدّم


تصبح جملتك: لديَّ كلبٌ.....


لدى ظرف مكان وياء المتكلم مضاف إليه،..

وتكون مرتبطة بخبر مقدّم،(في محل خبر محذوف)، زي: في الحديقةِ بقرةٌ.... عارف اللعبة دي طبعاً إنت، تقدم الظروف والجار والمجرور، بنعربو بصفتو وبنقول كتمامة في محل خبر محذوف،..
(في) حرف جر، الحديقة مجرور بفي، والجار والمجرور في محل خبر المبتدأ،...


تبقه الجملة: لديَّ حمارٌ وكلبٌ وديكٌ،...


هسي أنا قفّلت خلاص وكنت ماشي، لما شفت البوست اترفع رجعت... يعني بالمهلة بمشي أحفرها حفر تمام وأجيك، وأنا ذاتي ما كنت مفتّح ليها عيوني كويس،..



وحبابو صاحبنا عادل البدوي شكلو زول فَنّان، خلينا نقطع فيهو بالخير،...

أشكرك عزيزي محسن واسمح لي أن أشكر شنتيرَ (أم هي شنتيراً) عبرك. إنتو بتقطعو فيني بالخير وأنا، والله، طاريكم الاتنين بكلَّ الخير...ومشتاق، والله، لي نَضَمي شنتير..

تعرف أنا زول مُغْرَبي، يعني عَقَابي من تالا المُغْرَبِيَّة الحَبَّتَك واتفلهمت طلَّقْتَها دي، أمانة ما اتلوَّمت لوماً شين...الزولة ما بِتَّ أعَمَّنا لَزَم...تصدِّق إنُّو لمَّا الهلال السوداني لِعِب مع الرجاء المُغْرَبي كانت راياتنا (هلالاب علي مرِّيخاب) تّهَبْهِب تَكَنَّنا في استاد؟!.

يا أخوي مسَكْتَك محل بوجعك وخلِّيني اسْتَغِل دي عشان تَفِكَّ لي الماسِكْني محل بوجعني: أَهَبِش لي عليك الله استخدامات "أنَّى" نَعَمِنُّو اتغالطنا أنا ورفيقاً لي في إنَّها بتستخدم، بالتناوب، في ظرفي الزمان والمكان وللاستفهام كمان. أهَبِشا، مافي زولاً بِفِك الاشتباك ده غيرك...ومشكور مقدَّماً.

Shinteer،....

تأكيد يا ود أشيقر،..

مشيت راجعت إعراب الآية: (هذا ما لديَّ عتيد) من سورة قاف، (معجم إعراب ألفاظ القرآن الكريم)، وطلع تقديري ليها صحيح مائة بالمائة، فقد أورد (لدى) على أنَّها (مفعول فيه-ظرف) و(الياء على أنها مضاف)،...
ونفس التفكيك مع الآية الأخرى من نفس السورة: (لا تختصموا لديَّ)، (مفعول فيه-ظرف) و(الياء على أنها مضاف)،...
وكمان مع الآية الثالثة من نفس السورة: (ما يُبَدَّلُ القول لديَّ وما أناْ بظلامٍ للعبيد)
يعني أرقد قَفَا،...


Adil Al Badawi،...
عادل البدوي ماك طيّب،..
أتاريني ردتك من أول وهجة، أظن الحاسة السادسة شمّت ريحة محبتها،..
كلو فوق جاه المغرب،..

أول حاجة بالنسبة لطريقتي أنا الخاصة مع العربي إني بتعامل معاهو كالدنيا الزائلة، مافي قاعدة بتقدر تعتمد عليها مائة بالمائة، المهم إنك بتشوف -التصنيف العام-، وبعد داك بتتعامل بمعرفتك للربكة والجوطة بس، مش بامتلاكك لقاعدة نهائية، يعني مافي قاعدة في العربي مافيها كسور وبواقي، حتى الفاعل المرفوع أبداً دا، بجي كمان "مجرور"، زي ما ربنا قال: (وكفى بالله شهيداً) اسم الجلالة هنا فاعل مجرور بـ"باء" زائدة، والآية: (وما تسقط من ورقةٍ إلا يعلمها)، وورق هنا فاعل مجرور بـ"مِنْ" زائدة.

طيّب دا مدخل لـ"أنَّى"...
أولاً هي في -التصنيف العام- ظرف مكان وبس، ليه؟ لأنو الظروف أو (درس المفعول فيه) بنقسم لقسمين أساسيين،...
1- الظرف المتصرِّف: وهو الممكن يكون ظرف أو أي حاجة تانية ما ظرف، مثل: صباح.. ضحى... مساء
(صباح.. ضحى... مساء) ديل ممكن نقول: الصباحُ بدايةُ اليوم... هنا اتعاملنا معها كمبتدأ.. و(رفعناها) إذن أمكننا أن نتصرَّف فيها... وباقي الشلّة كذلك..
2- الظرف الجامد: ودا البكون ظرف وبس، لاحدي القيامة تقوم، ما بكون أي حاجة تاني غير ظرف.
طيّب "أنَّى" البتسأل عنها دي، في -التصنيف العام- التصنيف العام قصدت منها ما تعارف عليه العلماء، والحالة التي تُطرح بها كقانون عام في كتب النحو،..
تصنيفها العام إنها ظرف مكان-جامد، (جامد الفوق دي ذاتها) يعني المفروض ما تكون إلا ظرف مكان وبس، وما بجوز تكون ظرف زمان ولا أداة سؤال بناءً على هذا التصنيف،...
دا كلام الفقراء قلناهو،..
كلامي أنا إنو في حالات وروائح كتيرة لـ"أنَّى" غير كدا، ومافي ليها داعي، يعني زمان ومكان زي ما اقترحتو إنت وصاحبك، مفروض نرسي القواعد علي بر ما أمكن، وأنا ما قابلتني بمعنى السؤال بتاتاً،...
القرآن: (أنَّى لهم التناوش) وهنا واضح إنها ظرف مكان فعلاً بمعنى: بَعُد عليهم التناوش... هنا مامعناها أداة سؤال.. انتبه يا عادل أخوي، ربما من هنا اقترحتما السؤال،...
أما (نساؤكم حرثٌ لكم فأتوا حرثكم أنَّى شئتم) فياها دي الجابت الجقلبة للجماعة النحويين –طبعاً خوفاً من الجماعة الدينيين، ما بقدرو يقولوا ظرف مكان، ويبقى بجوز صَلْق النساء من قُبُل ومن دُبُر، (صَلق دي فصيحة)،..
أها قالوا المسألة إنها رمضان وما رمضان، والصلق بالليل كان محرّم وتاني حَلّلوهو و"أنَّى" دي طلعت حَقَّت بالليل، يعني زمان،..

ويضحك نهارك،...

رأيي يا ود البدوي نسد بابها علي مكان ونتوكّل علي الله،...

كما في أدناه

أشكرك عزيزي محسن وأمانة ما جيتني بالفايدة. أصلو الآية "نساؤكم حرث لكم فأتوا حرثكم أنَّى شئتم" هي ذاتا سبب الغُلات، لأنَّو إن بِقَت "أنَّى" ظرف زمان أوب وإن بِقَت ظرف مكان أوبين. صاحبي بقول إنُّو قاطع الشك إنُّو "أنَّى" هنا ظرف مكان وكان داير يقوم من محلَّو داك يمشي يسوِّي سواتو وين ما داير أكان ما حَجَّزْتو بي قولي إنُّو "حرث" دي في ناس بقولو معناتا "فرج" ويبقى تجيهو من ورا، تجيهو من قِدَّام، من فوق، من تحت، بالجنبة ما فَرقت بس ما تختاهو. قام تاني جاب لي نضماً نسبو لسيدنا عمر بن الخطاب...قمت قلت ليهو يا زول كدي قول بسم الله، أنا عندي فقيراً لاحق بداوي ليك الكلام ده الكمدة بي الرمدة...خلِّيني انَّشوفو بعد داك سوِّي البِعَجْبَك..أها، قمت جيتك.

تراكا لحقتنا وفزعتنا آلفقير بي قولك رأيي يا ود البدوي نسد بابها علي مكان ونتوكّل علي الله،...بَسْ الله يقدِّرني عاد أثبت ليهو حكاية "حرث" دي وأللا إبقى أدِسَّ الكلام ده من زولي المغالتني ده، غير كدي المنعول ياهو المتوكِّل على كلام الله ومبشتن بت الناس دي كل ما جاتا العادة.

أوب ظرف الزمان القاصِدا سبَبا إنِّي جقلبت ليهو جقلبة النحويِّين القلتها إنت (رمضان وما رمضان) قام قال لي: المعنى يعني "شد وأركب" أكان في عادة أكان مافي؟! أها قام راح لي الدَّرِب في الموية وجِبت ليهو حكاية "حرث" دي وأظِنِّي سمعتها في رادي وأللا شي، لكين هي عندها مرجع وأللا كلام روادي ساي؟!.

...




إزيك يا عادل، وحبابك،..
ضحكتني بقصة صاحبك، وفي نفس الوكت اضطريتني أجر شريط القصة دي من أولو،...

الآيات كاملة:

(ويسألونك عن المحيض، قُل هو أذىً فاعتزلوا النساء في المحيض ولا تقربوهن حتى يَطْهُرن، فإذا تطهَّرن فأتوهن من حيث أمركم الله، إنَّ الله يحبُّ التوابين ويحبُّ المتطهرين(222) نساؤكم حَرْثٌ لكم فأتوا حَرْثكم أنَّى شئتم، وقَدّموا لأنفسكم، واتقوا الله واعلموا أنكم ملاقوه، وبَشِّر المؤمنين(223) -البقرة،...


طيّب، خلينا نحلل الآيات دي، من جهة لغتها، وروايتها، وما تدلُّ عليه،..
أولاً إيماني إنو القرآن دا ما فيهو كلمة مختوتة ساي، أبداً، أي كلمة في القرآن هي كلمة نجيضة ومقصودة في رقبتها، كما أنني لا أؤمن بوجود الترادفات في القرآن، يعني أي كلمة ترد في القرآن عندها معنى خاص بيها، لا هوادة لا لُحَّاقة،..
والقرآن نص متين، وبتحمّل أي مجابدة، مهما تكن،..
أها، قصة عمر بن الخطاب معروفة، ومختصرها، إنو كانت المضاجعة في رمضان ممنوعة، وكان الصيام بعد الفطرة أو لاحدي قريب العشاء، ببدأ صيام اليوم التاني، أها عمر بن الخطاب كان بنسرق وألا بياخدلو خفسة يسويلو فيها دور دورين، قُبَّال ما صيام اليوم التاني يدخل،...

طيّب، القصة دي ما عندها أي علاقة بآية (أنَّى شئتم) إطلاقاً، ولو كسروا رقبتم ما ممكن يسحبوا الموضوع دا لهنا، ليه؟

لأنو الآية 187 من سورة البقرة هي الآية البتظبط معاها القة دي، طاق طراق، لا زيادة لا نقصان،..
وعمر بن الخطاب ذاتو، ما كان كايسلو موضع لرفاثه، بل كان الموضوع موضوع تعدي لخطوط واضحة وتانية ما عندها علاقة بآية (أنَّى شئتم)،..

وهاهي الآية 187 أقراها براك، وشوفها كيف مفصّلة تفصيل علي قصة عمر بن الخطاب:

(أُحِلَّ لكم ليلةَ الصيام الرَّفَثُ إلى نسائكم، هُنَّ لباسٌ لكم وأنتم لباسٌ لهن، علم الله أنكم كنتم تختانون أنفسكم فتاب عليكم وعَفَا عنكم، فالآن باشروهن وابتغوا ما كتب الله لكم، وكلوا واشربوا حتى يتبيّن لكم الخيطُ الأبيضُ من الخيطِ الأسودِ من الفجر، ثم أتموا الصيام إلى الليل، ولا تباشروهن وأنتم عاكفون في المساجد، تلك حدود الله فلا تقربوها، كذلك يبيّن الله آياته للناس لعلهم يتقون) الآية 187 من البقرة،..


يعني كدا، انتهينا من قصة عمر بن الخطاب وعلاقتها بآية (أنَّى شئتم)
لاحظ إنو الآية دي رقم 187 وآية (أنَّى شئتم) موضوعها التسلسلي ببدأ بالآية 222 وهي بترد الآية رقم 223... يعني بيناتم 35 آية مختلفة القصص والمواضيع،..

إذن أول حاجة نسلم بيها إنو آية (أنَّى شئتم) دي عندها موضوع براها، ولا دخل لها مطلقاً بقصة عمر بن الخطاب،..

طيّب أنا بحاول أستبعد قصة عمر ليه؟ عشان ننفي شبهة إنو المراد هو الزمن، لأنو "أنَّى" بالقصة دي بتبقه كسر رقبة معناها الزمن، أنَّى شئتم يعني متى شئتم،..
بس القصة ما عندها فعلاً علاقة بآية (أنَّى شئتم)

(ويسألونك عن المحيض، قُل هو أذىً فاعتزلوا النساء في المحيض ولا تقربوهن حتى يَطْهُرن، فإذا تطهَّرن فأتوهن من حيث أمركم الله، إنَّ الله يحبُّ التوابين ويحبُّ المتطهرين(222) نساؤكم حَرْثٌ لكم فأتوا حَرْثكم أنَّى شئتم، وقَدّموا لأنفسكم، واتقوا الله واعلموا أنكم ملاقوه، وبَشِّر المؤمنين(223) -البقرة،...

طيّب الآيات دي بتبدأ بشنو، إنو في ناس جوا سألو الرسول عن (الجماع) "زمن" المحيض وأقيفوا كويس عند "زمن" دي، لأنها مهمة جداً،..
الإجابة إنو ممنوع النساء "زمن" المحيض، بعد ينتهي "زمن" المحيض مسموح ومن الحتة الأمركم بيها ربكم، طبعاً المقترح إنو الحتة دي قِدّام والدعم من الحديث الشريف: من أتى امرأة من دبرها فقد كفر، مش عصى، أبداً، بل كفر عديل كدا،..
طبعاً هنا بجوا سمكرجية تانين، اسمون ناس (فقه أصول الدين) ديل بقوموا يقسموا الكفر لي أنواع، وعندهم قاعدة كبيرة اسمها (الكفر دون كفر)، بقوموا يطلعوا الزول دا كافر حَبّة مش كتير، عشان ما يصطدموا بنصوص تاني بتقول إنو الكفر دون مرتبط بس بالأشياء العقائدية وما عندو علاقة بالمعاصي، شايف كيف؟...

(أها، الحديث دا ذاتو لو ربنا مدّ في العمر أنا عندي معاه وقفة في الإسناد بتاعو، وفي لغتو، هل هي "من دبرها" أم "في دبرها" لأنو الفرق بين "من" و"في" شاسع جداً، شساعة ما بين ناس قِدّام وناس ورا)،..

طيّب نواصل في الآية،..
أها، خاتمة الآية إنو الله يحب التوابين ويحب المتطهرين، ودي الحتة الأنا قدمت ليها بإنو القرآن مافيهو كلام ساي، كلو محكم ومقصود،..
التوابين اتقدمت علي المتطهرين، ليه؟
لأنو معناهو كان في ناس بناموا مع زوجاتن وهن حايضات، مش كانوا بنوموا مع زوجاتن من ورا، والمتطهرين معناها الناس ديل لما يتطهروا من الفعل دا (النوم مع امرأة حائض) يطهروا بالمعنى المادي يستنوهن يطهرن والدم يقيف، ويطهروا بالمعنى المعنوي ما ريجعوا للفعل دا تاني كربط للكلام بالتوابين المتقدمة،...


أها، نجي علي آية: (أنَّى شئتم)،..
اللي هي جاءت من صميم الآية التي تقدمتها، "الحَرْث" هو الحصاد بدون أي غلاط،..
نساؤكم حَرْثٌ لكم فأتوا حَرْثكم أنَّى شئتم، وقَدّموا لأنفسكم، واتقوا الله واعلموا أنكم ملاقوه، وبَشِّر المؤمنين(223) -البقرة،.

يعني النسوان ديل (تَقَاة الفول وألا القمح) حقتكم، طيب قمحكم دا تسولوا شنو؟ تحصدوهو من (وين) ما شئتم، وألا تحصدوه "متين" ما شئتم،...
وسؤال مبدئي جداً، في زول بحصد حواشتو "وين" ما شاء يعني في جرفو الفلاني وغرب أو شمال ساقية فلان، وألا كمان بحصدها "متين" ما شاء "قُبال ينتهي الخريف، قُبّال يدخل الشتاء، بعد المطر، قبل المطر"،...
طبعاً المنطقي التحكم في المكان لأنها حواشتو وعارفها وين، مش الزمان، لأنو مافي زول بيقلّع طماطمو نيَّة، ولا العجور قبل ياخد عدد معلوم من السقيات، ولا البصل،...
ودي مش المشكلة، المشكلة وين؟
المشكلة إنو لو قلنا "أنَّى" ظرف زمان، والآية مرتبطة بالناس الجو سألو عن "زمن" المحيض، ببقى نقوليهم، أشلعوا ساكت، حايض ما حايض ما عندكم شغلة، ولو قلنا "أنَّى" ظرف مكان، كمان ناس ورا بقولوا "أبشر بالخير"،..
أها، الحل شنو؟


أصلاً أهل اللغة ما عندهم مشكلة، عارفين إنو (أنَّى) دي بتاعة مكان، بس ما بدخلوا مع بتاعين الدين في غلاط خوف التكفير،..

وفقهاء الدين ما عندهم هنا مشكلة واحدة، بل مشكلتان، لو قالوا بتاعة زمان، زمانيتها بتكون راجعة علي الشباب البسألوا عن المحيض،...
ولو قالوا بتاعة مكان، ناس ورا بعيروا، ودي الجزء الصغير من المشكلة، الكبير إنو الكلام بتضارب ليهم مع الفقرة الفوق البتقول: (من حيثُ أمركم الله)،...

أها، علم المسألة دي عند ربي، وفوق كل ذي علم عليم،..



بعدين يا ود البدوي، كان حَرْث الفوق دي عملتها (الفرج) عشان تتخارج من مدلول الآية دي، "الحَرْثات" التحت ديل بتعمل فيهن شنو:
(وإذا توَّلى سعى في الأرض، ليفسد فيها ويهلك الحَرْثَ والنسل)
(كمثلِ ريح فيها صِرٌّ أصابت حَرْثَ قوم ظلموا أنفسهم فأهلكته)
(وجعلوا لله مما ذرأ من الحَرْثِ والأنعام نصيباً)
(وقالوا هذه أنعام وحَرْثٌ حجر لا يطعمها إلا من نشاء بزعمهم)
(من كان يُريدُ حَرْثَ الآخرة نزد له في حَرْثه)
(ومن كان يُريدُ حَرْثَ الدنيا نؤته منها وماله في الآخرة من نصيب)
(أن اغدوا على حَرْثكم إن كنتم صارمين)


هسي في ذمتك آود البدوي الآيات الفوق ديل كلهن، بشبهن من بعيد وألا من قريب "الفرج" وألا بعند السروال ساي بجن؟
في رأيي إنو بتوع اللغة يحلوا مشكلتن بمرق الحد للناس فوق السروبة، ويخلوا بتوع الدين والمفتتين يحلوا مشكلتن بطريقة تانية، غير تخريب اللغة، ولو ما عاجبن يقعوا قِدَّام بس، زولاً واحد عازمن ورا مافي،..
الغريبة كلهم يحاجوك في الجامع إنها (قِدّام) وبعد يصلوا العشا يتراوحوا بيوتن ناس ورا ساااكت،..

أها لامن الشِبكة دي يحلوها، صاحبك الليعَيِّد عيدو، ويحمد سيدو
يضحك نهارك



..

..

أها يا ود البدوي، خلينا واقفين في محل "من حيثُ أمركم الله" دا، هسي ضهري وجعني، واليوم عندنا هنا شطّب، إن بقينا حيين بجي بسوق الكلام من "من حيثُ أمركم الله" وأنا باحث عن المعرفة،...
والله يا ريت الزول الصحفي داك، بتاع "شهادتي لله" القال يا شيخ فلان وشيخ علان، يلحقنا بشيوخو ديل في حل المسألة دي، وأنا على استعداد للمناقشة، ولو آخد إجازة من العمل بتاعي،...

كن بخير، والمحبة كلها ليك يا ود البدوي


..

يا أستاذ..
ود البدوي دا ما واقع لي!!!
أنا خايفو يكون من حمَلَة الشهادات..!! "ناس شهادتي لله وكدا!!" وشغال يدودر فيك في الدرب دا لمن تقع.. ويجي صاحبنا داك ويجيب جماعتو ويقيموا عليك الحد..
ويتخيل لي حا يفرقوا بينك وزوجك.. حا يلقوك مطلق!! يقوموا يفرِّقوا بينك وبين الذكريات الجميلة في تلك الزيجة..!! وأهو كُلُّو في الآخر حِسبة..
المهم.. بعد تخلصوا إنت وود البدوي من تحديد المكان "قُبُل ولاَّ دُبُر"، لي صاحبو داك،.. دا كان لسة زولو داك راجي فتوى، وما حدد براهو وأدبرَ وتولَّى.. الله يكضب الشينة.. أها بعد تقضوا غردكم شوف لينا دي:
كتير قعد نقول: (سوف لن)
وهسة في بوست في الصفحة الأولى فيسوف لن يتم إلا بإجراء نقد موضوعي لكل مفردات التاريخ و.. )
سوف.. وبعدها النفي دي ما قعد تقع لي.. ودخلتها في أضاني بعطس!!
أها كلامي صاح ولاَّ الجيوب الأنفية دي وصلت الأضان كمان؟؟
يضحك يومكم

أشكرك عزيزي محسن فقد أوفيت وما خلِّيت. تقول لي: أها لامن الشِبكة دي يحلوها، صاحبك الليعَيِّد عيدو، ويحمد سيدو هو المنعول بتغشَّ بي دسديس الكلام وأللا بِرْجَاني أوصِّل ليهو الوصية، كلامك ده لي حدي هسي بكون فات أضانو بي غادي وأكان قريب بكون بِدُق في نوبة عيدو...ده طبعاً أكان ما بِقى أصلاً بِسَوْ سواة جماعتك القلت عليهم يحاجوك في الجامع إنها (قِدّام) وبعد يصلوا العشا يتراوحوا بيوتن ناس ورا ساااكت، الزول ظنَّيتو كان بغالت فيني حمل جمل في شان الغُلات لكين أول ما يفارقني بسوي الدايرو.

لكين الحديث آخوي لا تنساهو...شوفو...وورينا خبرو...وأهبش لينا العرب القبل الحديث لأنُّو الشي دا ما كان جا فيهو ما قال الله وما قال الرسول أكان ما كان الجماعة عايسنُّو عواسة جد وركِّز علي شعراهُم المطاليق الما بْتِتْبَلَّ في خَشُمُن فولة ديلاك إن ما لقيت فيهم مجرِّب، قَطِع شك، بتلقى فيهم طبيب ومشكور تَبْ لحدي ما أجيك بي نصيبتن تانية.

واسمح لي بي همسة في أضان ود السِّر ده: محسن دا يا خوي ما راجي ليهو زولاً يدودرو...واقف ليهو زمناً مِعِد يكسِّر في الدرق قِدَّام القلابة بَس الموضوع آخوي كان مَرقتَ مِنُّو غلاتي مع صاحبي ما بتمرُق منو غلات الناس، كل الناس، مع الناس الماسكين الدِّين من رُكْبَتو. يعني، كَدي قوم أطبع نضمي محسن الفوق ده (وهو بالمناسبة أغلبو ما قال الله وما قال الرسول) وخُتَّ الورقة في جيبك وأمش ليك أقرب جامع أنْضُم، مثلاً، في الحجاب تلقى أول واحد يمرقك كافر علي الأقل بي بعض الكتاب...أها هنا أمرق ورقتك ووريها ليهو تلقاهو قام هو ذاتو تراح كفر بي بعض الكتاب لكين ما بِرجاك تفهم الحاصل شِنو أكان ما مرَقَنَّك كرعيك ياهو المِلَحِّقك بصطونة بصطونتين.

إزيك يا ود السر،..

ياخي فقدناك في الموضوع الشائق وشائك دا،...

الغريبة ناس كتار جوا يتأكدوا تلفونياً، غايتو الدنيا دي فيها كترة مستهبلين،..

قلتيلهم ياناس هوي، أنا لا مُفتي ولا إمام جامع، أنا روائي،...

والشغلانية دي حرام بالشرع والتذوق وبقوانين الطبيعة،..

أنا مجرَّد زول داير يقول بس إنو (أنَّى) دي ظرف مكان،...


سوف لن...

طبعاً سوف بتاعة مستقبل............ ولن برضو بتاعة مستقبل،...

أها، لامن يختوهن مع بعض، صاح بتبقه في (ضرسة) بس ما حرام،...

يعني جائز تكون كدا مع الضرسة، زي بتاعة مع حلال مع الكراهة،..


وخليك أجمل مما تُمليه الظروف،..

...



بسم الله يا صاحبي عادل البدوي،..
ويسعد صباحك،..

وقفنا لدى (من حيث أمركم الله)
طيّب، النحويون بقولوا إنو (حيث) دي ظرف مكان جامد، يعني زيها زي (أنَّى) بالضبط، وكهوادة وزيادة فايدة مني بقولكم إنو الاسم البجي بعد (حيثُ) بكون مرفوع، سبحنا حيث (النهرُ) ممتلئٌ بالصخور، مثلاً،..

أها، أهل القواميس بقولوا شنو؟ ابن منظور: حيثُ ظرف مُبْهم من الأمكنة،..
يعني لا دخل لها أبداً بالزمان،..

ح نشوف نهاية موضوع ورا وقِدّام في نفس الحلقة دي،..

لكن عشان نطلع بفائدة لغوية من كلامنا دا كلو (وما نبقى بنتونّس وبنهرجل ساي) نقوم نورد المقطوع شكو من الظروف المتصرِّفة وكمان الظروف الجامدة علي المكان أو الأخرى الجامدة علي الزمان أو التالتة البتجي مرة جامدة علي المكان وتارة علي الزمان، أي الفيها خيارين،..

وبرضها مقدمة ممتازة لمواصلة نقاش قضية ناس ورا وناس قِدّام،..

الجامد قلنا إنو ما جمد على وظيفة نحوية واحدة لا يتعداها،..
يعني بجي بوظيفة نحوية واحدة هي الظرفية، كان ظرف زمان، كان ظرف مكان، أو ظرف قابل لأن يكون زمان أو مكان، بس في النهاية ظرف وليهو وظيفة (نحوية-إعرابية) واحدة،..

الظروف الجامدة على المكان:
أينَ،..
أنَّى،..
ثَمَّ –بفتح الثاء ما تفتكروها ثُمَّ بضمها،...
هنا،..
لدى،..
حيثُ،..
فوقَ،..
حَوْلَ،..
حَوالَيْ،..

الظروف الجامدة على الزمان:
قطُّ،..
عَوْضُ،..
متى،..
أيَّانَ،..
لَمَّا،..
ذاتَ مساءٍ.... لاحظ إنو "ذاتَ" دي بتكون جامدة لما تكون مضافة لزمان بس، يعني لو أضفناها لمكان بنصرّفها ونقول: بيتُك ذاتُ الشمال، وكدا (ذاتُ) المضمومة دي، بقت تختلف عن (ذاتَ) المفتوحة أبداً عشان نعربها كظرف،..
ذا صباحٍ،..
بينا،..
بينما،..

الجامد على الظرفية "زماناً" حيناً، و"مكاناً" حيناً آخر:
عند،..
لَدُن،..
قبل،..
بعد،..


طَيّب طلعنا من المقدمة دي بإنو (من حيثُ أمركم الله) دي، بتتكلَّم عن المكان بالنسبة للنحويين وبدون غلاط، لأنو (حيث) دي ظرف مكان جامد،..
(طبعاً كلامنا الذي تقدّم والفيهو الآن كلو بالنسبة للنحويين، وبنمشي نشوف ناس القواميس كمان قالوا شنو)،..

طَيّب، هل القرآن فيهو آيات تانية بتناقش القضية بوضوح أكثر، لأنو الله بقول من حيث أمرتكم، هل عندو أمر في القرآن عن نَفْس القضية في موقع آيات أخرى، الإجابة القاطعة (لا)،..
اللهم إلا باللفّة: (ما أتاكم الرسول فخذوه وما نهاكم عنه فانتهوا)، ونقوم نمشي نعتمد حديث النهي عن إتيان الدبر، وكدا نصل لقاعدة تشريعية، ويحموا صاحبك يا ود البدوي أخوي يعيّد عيدو،..

طيّب، قبل ما نمشي بهناك، لناس القواميس ونشوف الجماعة ديل مجورتن كيف، زي ما بقول أخوي شنتير، أدّي شوية ملاحظات عن الكيمان دي،...

النحويون بدؤوا بالإمام علي بن أبي طالب، يعني برؤية المسلم، ومش أي مسلم، علي بن أبي طالب تحديداً،... هذا في رواية،..

أو أنَّهم بدؤوا بأبي الأسود الدؤلي، وهو أيضاً من المسلمين الأوائل،... وهذه رواية ثانية،...

الخلاصة أنَّ نظرة "معظم" النحويين، للغة، هي نظرة تضع في حسابها عدم التضارب مع النصوص الدينية، بخاصة القرآن والحديث،...

طيّب أهل القواميس، وديل برضهم بالرغم من إنو معظمهم بياخدوا من المفسرين، وبدخلوا بشكل أساسي لنقاش لغة القرآن وغيرها من خلال كتب المفسرين –الدينيين بامتياز- إلا أن منهم ناس (الجمع) وديل زي جدّي الدنقلاوي (ابن منظور)، يعني بحجّة الجمع بدوك الأدلة كلها، من الشعر الجاهلي مروراً بالقرآن والحديث، وإلى المتأخرين،..

المتأخرون طبعاً ظهر فيهم أهل الكلام والغلاط والمعتزلة وأهل الباطن وحتى الملاحدة عديل والشرسين،...
الملاحدة أنا ذكرتهم هنا، لأنو ديل بجوا يقيسوا الكلام من خلال علوم اللغة أولاً، وثانياً بالمنطق والمقايسة مع لغة العرب القديمة والأصلية (قبل) القرآن والحديث،..
طيّب الفقرة الفوق دي موضوعة ضخمة وخطيرة جداً، منذ سنوات عديدة أنا وقفتُ لديها وسألتُ نفسي: الحل شنو؟
الحل هو إنشاء قاموس لُغوي مثل قاموس (ويبيسترز في الإنجليزية) أي الاهتمام بتحديد تاريخ المفردة كأولوية من أهم الاعتبارات،...

(لعزل اللغة التي جاء بها الإسلام عن اللغة العربية القديمة –الأصلية، الماعندها شغلة بحرام وحلال، وما عندها شغلة بتدابير فقهاء تُريد إثبات أفكار معيّنة بِلَيْ عنق اللغة ليَّاً لإثباتها)

ودا مشروع كما أسلفت، أنا شَغَّال عليهو من سنين، الكلام دا هنا ما استعراض بل في موقعو تمام، وأنا أعلنتو عشان الناس يشهدوا إنها دي فكرتي، لأنو واحد من أصدقائي شاف المشروع دا، وعرف اللعبة المكّارة والعبقرية البسوي فيها، فبمحبة قام نشر عنها موضوع في الصحافة، شوية شوية رسّل لي جواب قال لي إنو سامع همهمة تحت تحت بتقول إنو جامعة الدول العربية –المصرية، بتتكلم عن تدابير لسواة مشروع زي دا،...
أولاد الكلب، أصلو المشروع القوي لاحدي هسي في القواميس ياهو ابن منظور الدنقلاوي دا، والتاني دا برضو حق السود، وأتحداكم أعملوهو لو بتقدروا، لأنو خطاباتي لجامعة أكسفورد قاعدة عربي إنجليزي، وبشهدوا علي الشغل دا إنو حقي عشرات الأساتذة من بلاد الشام والمغرب والخليج ومصر والسودان وموريتانيا،...

(الداير الخطابات دي بنشرها ليهو، وفي نفس البوست دا، خطابات أوكسفورد)،..

وهو الموضوع ما موضوع لعب، بل من سابع المستحيلات، داير ليهو مع جلادة الباحث طربة زول بريد حاجاتو شديييد، سنين أنا عديتها بس بنتج في آلية إنتاج هذا القاموس، كيف بتعرف تاريخ المفردة، وماهي الأُسس التي ستعتمدها لمعرفة تاريخ المفردة، لأنو لو كانت هي جاهزة وألا ساهلة ما كان سووها من زمان، ما كان رجتني، بس أنا الله فتح عليّ وباصرتها،...
(المشكلة هي الفلوس الفلوس الفلوس، فلوس قدر تبقيك مجرّد طالب دكتوارة في جامعة غربية، لو عندك فلوس تصبح ابن منظور بكرة دي، منعول أبوها من حياة فقر)،..

أها، نجي نشوف كلام القواميس في "أنَّى" بعيداً عن أهل النحو،...
هل في طريقة نخارج بيها معنى الآية من إجازة ورا وقِدّام وألا لا؟

قلنا النحويين غير أنها (ظرف مكان جامد ما عندهم أكتر وألا أقل)،...

ابن منظور يقول: أنَّى كلمة معناها "أين" وقد تكون بمعنى "كيف"،...

يعني كلامك يا ود البدوي، الأنا قلت ليك ما سمعت بيهو بطلع صحيح إذا أخذناها بالمعنيين ديل، وأنا كلامي جايبو من أهل النحو لأنهم ما عندهم ليها غير أنها (ظرف مكان)،..

شوف ابن منظور بقول إنها (كلمة) بمعنى "أين" و"كيف" ودا المعنى الأساسي ليها عندو،..
ثم يضيف ابن منظور وبدون إسناد، {قال بعضهم: "أنَّى" أداةٌ ولها معنيان، أحدهما أن تكون بمعنى "متى"، وبعد دا بجيب استدلالات كلها من القرآن، لاحظ إنو ما جاب شعر جاهلي): بل قرآن:
الآية (قلتم أنَّى هذا) أي متى هذا وكيف هذا،...
ثم يُكمل: وتكون "أنَّى" بمعنى من أين، ويستدل بالآية: (وأنَّى لهُمُ التناوشُ من مكانٍ بعيد)، يقول، أي: من أينَ لهم ذلك؟}

أها، بعد داك بقع في أمثلة من الشعر، والشعر ما عندو ليها أي معنى غير "أين" وأحياناً قليلة "كيف"،...



إذن واضح إنو (الجامع –ابن منظور) الحتة الأنا حددتها بأقواس الاقتباس دي، جابها من كتاب ديني، بل بشكل واضح وبتعَمَّد يقدّم حتى معنى "متى" على "أين" الكل الاتجاهات متفقة علي إنو دا المعنى الأساسي للكلمة بالنسبة (للمعنى) والاتفاق الآخر بتاع النحويين كلهم علي إنو هي "ظرف مكان"،...
والغريبة ابن منظور دائماً بوريك الكلام جابو من وين، بس دي ما قال فيها، ولو كان الكلام ماخدو من "التهذيب" كان ثبّتو، بس يبقالي جايبو من محلاً ممهمج،..


شفتَ المجورة دي كيف يا ود البدوي!؟

قاموسي دا زي ما قلتكلم ضروري بالحيل؟ ضروري عشان تكون في لغة لأنها لغة، ومن باب إنها لغة وبس، مش لأنها داير تصحّح أو تغلّط نصوص لغوية تانية وتتصارع مع أهلها أو كمان تخاف منهم،...

طيّب نحن من حَلْقة ورا وقِدّام الفاتت قلنا إنو لا المكان بحل، مع الآية الفوق دي ولا الزمان،..

(نساؤكم حَرْثٌ لكم فأتوا حرثكم أنَّى شئتم)،..

طيّب لو جربناها بمعنى (كيف)؟

طبعاً واضح إنو لو دخّلنا الكيوف والكيّيفين الموضوع بخرب مرة واحدة،...
خصوصاً إنو الإمام مالك سُئل عن (كيف) هو استواء الله على العرش؟

فقال: الاستواء معلوم، والكيف مجهول، السؤال عنه بدعة، والإيمان به واجب،..

طبعاً السؤال عنه بدعة دي نظام محاحاة،..

المهم إنو (الكيف مجهول) ولو الآية دي "أنَّى" بتاعتها بتعني "كيف"، وأصلاً الكيف مجهول، أو بتصبح معناها "كيفما شئتم" يعني مخيّرين في الكيف، أها يا ود البدوي دي ياها ذاتها أم الطلقيت من ضنبها لقرونها،...

أها الحل شنو؟

الحل قالوا الشيخ "فرح ود تكتوك حلاّل المشبوك": إنْ ما مرقتك النصيحة، الكضب ما بمرقك"،..

بعدين لاحظ، القرآن دا مُحْكَم، أي تحريف غبي من قبل الفقهاء عشان يمرقوهوا من مشكلة "مُتَوَهَّمَة" بحشروه في مشكلة أكبر من الدايرين يمرقوه منها، ببقوه في قِلَّة عدييل- لام قِلَّة دي تفخمها عشان تديك معناها الدارجي،..

طيّب مقترحي أنا شنو: إنهم ما يكابروا ويعترفوا بإنو "أنَّى" دي من الله عَلَّمها لآدم ظرف مكان، لكن....
يرجعوا لبداية الآية (من حيثُ أمركم الله)...

وتاني يجيبوا ناس (شرطة العمليات الخاصة –القواعد الأصولية للفقه)، وديل عندهم "قاعدتان"، الأولى بتتكلم عن:
1- (آيات العام المقيِّد للخاص)
2 – (آيات الخاص المقيِّد للعام أو المطلق)


المهم، نخت القاعدتين ديل ونطلع بـ(من حيثُ أمركم الله) دي (خاص أو مُتَعَيِّن) (مُقيِّد لعام) اللي هو (نساؤكم حَرْثٌ لكم فأتوا حرثكم أنَّى شئتم)،..
(الآية الأولى معناها: في الحتة الأمركم بيها ربكم، والحتة نفسها غير مذكورة في الآية)
(الآية التانية يبقى معناها: في أي حتة تعجبكم، لكن العجب دا ذاتو نحن محدّدنو بالآية الفوق، والآية الفوق بدون شك بتأكد إنو في أمر بخصوص المسألة، بس الأمر ما مذكور، لا في الآية نفسها، ولا في القرآن كلو، وبعد داك بجوا الفقهاء بوروك إنو "العجب مُحدّد" في الحديث الشريف: البنهى عن إتيان الدبر)،..

تصدّق الفقهاء ديل وألا رجّتك وحجّتك تقيف معاهم قَنَا، بطريقتك،..

ودي أنسب تخريجة للآية، إن لم تكن التخريجة الوحيدة،..

لكن يا ود البدوي الناس المتحيّلين ممكن يقولوا في حل أحسن، ونضيف تمام التمام، بدون سمكرجية، إنو الآية التانية نسخت الأولى، ويمشوا يقصوا درب تاريخ نزول الآيات دي ومن (الروايات والرواة بتاعين القرآن أنفسهم) مش من بتاعين التفسير، لأنو بتاعين القراءات متخصصين في القرآن بس، وما عندهم غير الحفظ صم، لكن بتاعين التفسير ديل شُداد، والحتة البتخيّل ليهم إنها "ما مواسية وألا بتجيب الهواء" بقوموا يواسوها من خلال تفاسيرن، ودي كلها شغلانية غلط، مفروض الحتة المابتقع ليهم يقولوا: الله أعلم، ويبطلوا الملاوة لأنها بتجيب الملاوة،..


غايتو أنا شايف إنو أنسب تخريجة ليهم للآية ياها حقتي الفوق دي، إن لم تكن التخريجة الوحيدة،..


ألحق زولك دا أحبسو يا ود البدوي ما يغرّق في الذنوب،..


تخليص ذمة،..
أنا كلامي هنا دا، لا يدعوا إلى أي اتجاه موقفي، مع الأحكام أو ضدها، مع ما تعارف الناس على أنّه صحيح أو ضده، بل هدفي الأول والأخير هو محاحاة اللغة،...
لأني في النهاية ما ح أشبّلي زول من بتوع قِدّام، ولا كمان ماشي أحجز لي زول من بتوع ورا...

(وكلٌّ آتينا يوم القيامةِ فردا)...




..

أشكرك عزيزي محسن مرَّة أخرى.

أها، شُفْتَ يا ود السِّر؟! حتى لو دودرتو، محسن، ماني غلطان هَديل ترانا استفدنا بي نَضِم لا كُنَّا حاريِنُّو لا داريِنُّو وده طبعاً فيه بعض من إجابة على سؤال: لماذا يكتب الكاتب ولماذا يقرأ القارئ؟...يعني هَسِّي محسن ساوِّي ليهو بوست لإصلاح، شكل، الكتابة في المنبر لكين إصلاح، موضوع، الكتابة في المنبر وغير المنبر ياهو بِجِي بي زي الدَّرِب السَلَكو محسن فوق ده يعني نظام "النقود الجيِّدة تطرد النقود الرديئة" وكدا وأوعَ بالَك "النقود" دي، الكتابة يعني، ما بتطرد بعضها إلا بالتداول بين الناس ومثال على ذلك جنيه الدَّهب المرق من جيب محسن فوق ده حتماً حا يصنقر تَّبْ في محل جنيهاً رَدِي مدفون في راس زول وأللا زولة وتلك قصة أخرى كبيرة جداً بس ما كبيرة علي الله ثمَّ الأقلام الساكَّاها.

يا ود البدوي دوديرك جا بي فوائد كتيرة.. من ضمنها خبر القاموس.. دا الأستاذ كان داسيهو مننا
يا ريت تواصل
وتسلم

يا ود البدوي وود السر، ماكن طيبين،..

باقي إنتو ناس أهل محبة وأهل خاصة، وإن شاء الله أكون عندكم زي ما إنتو عندي،..
أرواحٌ لا هَمَّ لها سوى الجمال، والتفتُّح، لا تبغض ولا تعادي ولا تكره بالمبدأ،...
وتحب وتحتفي بكل ما هو جميل بالمبدأ،...
خليكم وازنين موجة الروح علي كدا، وقطع شك أماتكم عافيات منكم،..
وأنا في سعي دائم أخَلِّي موجة روحي مضبوطة معاكم،...


طيّب الدنيا ما مضمونة، بكرة يمكن أموت، والجماعة ديل يهمبتو قاموسي، وبقوة عين يلقى "تيم الأشرار" محل خنجر في جنازتي ويقولوا "القاموس المحسني" دي أحلى زَنَّة سمعناها من محسن خالد،....

هنا الخطاب الأكسفوردي عربي إنجليزي، والداير يسابقني علي عمل القاموس دا مرحب، وواحـ1... اتنيـ2... تلاتـ3
واحد /استعدال... اتنين /ضرب نار.... تلاتة/ جَري

Quote: القاموس التاريخي إنه لمن الجميل لدي أن أتقدّم إليكم بمشروعي الخاص للدكتوارة، راجياً أن تَحظَى بالقبول والدعم من قبلكم، ولكم أجزل الشكر وأوفاه. وبعد: على نحو مختصر جداً، أُحاول تعريف موضوعتها بأنها خُطّة لبناء قاموس تاريخي للّغة العربية، لأنّها واحدة من اللغات التي لم يتوافر لها قاموس كهذا. وموضوعة تاريخانية اللغة تُمثّل المنحى الأساسي للقاموس المقترح، فضلاً عن مزايا أخرى كثيرة، إذ أنّ هناك (إضافات) و(تحسينات) و(تصويبات) تالية سنستدخلها على (القاموس التاريخي) ليكون متجاوزاً لكافة القواميس المتوافرة من ناحية "المضمون" و"التصنيف" و"الأُسلوب" و"العَرْض". ولكي تصبح فكرة (قاموس تاريخي) هذه واضحة، نقارب بين ما ننوي فعله وبين الإشارات المحدِّدة لتاريخ ظهور (المفردة) لدى قاموس (ميريام ويبسترز)، ففيه نجد أنّ المفردة تُسْتتبَع بالتصنيف: (إنجليزية قديمة: OE، إنجليزية وسيطة: ME، إنجليزية حديثة: MD) وبتاريخ ظهور الكلمة مباشرة لو كان معيّناً. ونظراً لوعورة الموضوع ولشساعة حقله المعرفي، فيما يخص اللغة العربية تحديداً، وإشكالية تاريخها السردي، ناهيك عن اللُّغوي، سنقوم بافتراض ثلاث مراحل ننتخبها من التاريخ الحضاري للعرب إجمالاً، (بوصفهم شعوباً، ولغةً، وديانةً) عَبَرت من خلال مخاضات تاريخية/ جغرافية/ أيدولوجية كبرى، أثّرت على صياغة لغتهم وخطابهم الحضاري والإنساني بشكل عام. ولكن رغم ذلك، نجد أنّ القريحة أو السليقة (الذاكرة الخفية والآلية للّغة) العربية قَلِقت عند تاريخ ما، لما يمكن أن يحدث للغتها، سواءً بأيدي مستعربين أو بأيدي أبناءٍ لها بعُد البون –زمانياً كان أو مكانياً- بينهم وبين أجدادهم، أصحاب تلك القريحة الصافية. وهذا ما حدث بتأكيد التاريخ والمؤرخين والواقع الملموس، ولولاه لما وُجِدت القواميس العربية من أساسه. والوقوف عند تاريخ وجغرافية –الزمكانية- اللّغة العربية له أهمية فائقة، لأنها اللغة الوحيدة في العالم التي تتحدث بها 22 دولة تتفرّق بين قارّتين، وتتمدد في مساحة شاسعة الأمداء. أمّا الرابط العميق والمتجذِّر بين (قواميس هذه الأنحاء كلها) فهو تاريخ المفردة، وأيضاً الدال الأهم على صحتها أو خطئها، فالكلمة ما قبل القرآن (الجاهلية) لها وزن (معياري) يختلف عن الكلمة بداخل القرآن أو الحديث أو النصوص الأخرى من شعر وغيره (إبّان وخلال زمن القرآن والحديث)، والكلمة في مآثر (عهد الخلافات) في معيارية وزن جديدة، مثلما أنَّ الكلمة في العهد الأُموي (المتقوقع –لحدٍ ما- إثنياً/ لسانياً) هي غيرها في العهد العباسي (المنفتح إثنياً/ لسانياً)، وهكذا..... حتى مرحلة زمكانية اللغة، حيث ظهر (الاصطفاء الجغرافي للّغة، بعامل الاستخدام) فهناك ما استخدمه (العراقيون) و(الشوام) من الماعون الكبير للّغة، وأيضاً الحجازيون واليمانيون والمصريون والأندلسيون، وما استخدمه عربٌ آخرون مثّلوا قِلّة في بيئاتهم أو مجتمعاتهم، كعرب المغرب والجزائر وتونس وسط شعوب (المور) وعرب موريتانيا والصحراء الغربية والسودان وسط (الأفارقة) وهكذا... ومن هذه الزاوية أيضاً تتضح الطبيعة الهامة والحاسمة لتاريخانية الكلمة، وأهمية ذلك في تحديد وزنها المعياري،... وبإشارتنا أعلاه (بوصفهم شعوباً، ولغةً، وديانةً) نُمَهِّد بلفظة "ديانة" إلى مراجعة الانقلاب الكبير الذي أحدثه الإسلام في لغة العرب، أوّلاً بكون القرآن الوثيقة الأقدم والأكثر تفوُّقاً من ناحية ثبوتها، ما خلا بعض الجُذاذات المتفرّقة واليسيرة. ثم يتلوه (الحديث) لكونه نَعِم أيضاً بدرجة توثيق لم تتوافر لنصوص غيره كثيرة، وإنْ كانت معاصرة له. وما يهمنا هو مدارس الفقهاء الدينيين التي نشأت تبعاً لذلك، وبمقوماتٍ أساسها الأبجدي هو معارف اللغة. فـ(القاموس التاريخي) يُضيء لنا تاريخ المفردة على المستويين المهمّين، إبّان وجودها على لسان (قوم) اسمهم (العرب، وكفى)، وإبّان وجودها خلال (مجتمع) اسمه (العرب/ الإسلام/ الفقه/ الخطاب الدينوسياسي). ومن هذا المنظور يُحقّق لنا (القاموس التاريخي) الكثير الفاضح، والموجع، من كشف أخطاء القراءات والخطابات والأقنعة واللُّبوسات، باعتبار أنّ النصوص الإسلامية هي هَديُّ العرب الرئيس حتى يومنا هذا، ولكون حروب المسلمين التنظيرية والفكرية كلها، وفي كافّة المجالات لا زالت حروب لغة/ نصوص/ مفردة. فمثلاً، ما أبعد معاني مفردة "النسيء" عند العرب، عنها في نص آخر يُفَسِّر القرآن لابن كثير/ الطبري/ الزمخشري/ سيد قطب، وما أغربها في معيّة فقهاء آخرين وبجيوبهم. أما التطبيق لهذه الرسالة (القاموس التاريخي) فسأقوم بإجرائه على ألف كلمة فقط، بالنسبة لمشروع دراستي، أي سأضع منه ما هو أساس وأوّلي (الإطار النظري والآلية، مع قاموس نموذج يعالج 1000 مفردة)، على أن يستكمل المشروع من خلال عمل مؤسسي، لو توافرت الرغبة في صنع قاموس شامل وجامع، لطبيعة حجمه الضخم بالطبع. وهذه هي الخلاصة الجوهرية لفكرة مشروعي الدراسي (القاموس التاريخي). * أما التحقُّقات الجانبية التي يمكن تحصيلها أيضاً من خلال هذا القاموس فتتجلّى في معالجة الطبيعة الكلاسيكية -غير المعصرنة- لقواميس اللغة العربية، فسيشتمل القاموس مقترحنا على الآتي: 1 – تعيين حركة عين الفعل بالنسبة لكلمات القاموس كلها. لكونها الأساس في النطق والكتابة الصحيحين للمفردة وتصريفاتها. 2- تعيين "التأنيث"، "التذكير"، "الجمع"، الإفراد"، وهذا الشيء نجده غير متمّم في القواميس الحالية، والمتّمم منه نجده قد ثُبّت بدون قصدية، ما يجعله يحدث أحياناً ويغيب في معظم الأحايين، إذ كان تواجده محض عَرَض أو مصادفة مفيدة، فهو لم يكن مقصوداً في حد ذاته، ولم تتم معالجته وتصفيته والانتباه له بصورة مدروسة واستقصائية. 3- "حصر معاني الكلمة كلها"، أو تثبيت كل ما أوردته القواميس حول المفردة مع تبيين مرجعية كل قاموس باسمه. والزعم الإضافي أن عملنا لن يكتفي بلعب دور توفيقي فحسب بين تضاربات القواميس الكثيرة واختلافاتها، بل سيُنْجِزُ وظيفةً علاجية أولاً، ثم يقوم ثانياً بوضع تراتبية انتقائية (لمعاني المفردة) حسب مكانة وقيمة القاموس الأم المأخوذ عنه. فالقواميس كلّما تأخرت لحظة ميلادها، كلّما ازدادت جمعاً وضعُفت مصداقيةً، ما لم تُتدارك بالتمحيص الدقيق والبحث المتأني. 4- سيعتمد القاموس في تبويبه على التسلسل الأبجدي الطبيعي للأحرف، ولن يعتمد طريقة معظم القواميس الكلاسيكية في التبويب لمادتها عن طريق مصدر (اللفظة). وسيتم تبويب المعجم التاريخي على هذا النحو لاعتبارات كثيرة أهمها أن القواميس القديمة تفترض في كل متصفحٍ لها عالماً باللغة، وهذا شيء يتناقض مع وظيفة القاموس نفسها، إذ لا يُعقل أن يهتدي قارئ غير محترف أو قارئ من ناطقين بغير العربية، إلى أنّه لا يمكنه العثور على كلمة "ميزان" إلا في باب مادة "وزن"، أي في مادة "حرف الواو"، الذي لن يراه مطلقاً ومهما اجتهد في كلمة "ميزان" بُغية بحثه. مع العلم بأنّ (القاموس التاريخي) سيبيّن مصدر كل كلمة، لمعرفة أصلها وتفرّعاتها المنبنية على ذلك. 5- بل سينُوف على ذلك بأن يُثبت المصادر للأفعال الرباعية والخماسية والسداسية، الأمر غير المتحقِّق في القواميس الكلاسيكية.

Quote: A Historical dictionary The following is an overview of my doctoral degree research project. I hope that you find it acceptable in terms of desirability and originality. Briefly, I define its subject matter as a plan to compile a historical dictionary of the Arabic language. Arabic is one of the languages that lack such a dictionary. The historicity, in addition to other characteristic features: ‘additions’ ‘improvements’ ‘corrections’ which will be an integral part of the historical dictionary. This will endow it with supremacy among currently available dictionaries in terms of ‘content’ ‘style’ and ‘presentation. To elucidate the idea of the "historical dictionary" I have to approximate between what I intend to do and particular references to the appearance of the ‘word’ (as a vocabulary item) in Merriam - Webster’s dictionary, where words (vocabulary items) are followed by categorical labeling – OE (old English), ME(Middle English), and MD (Modern English); and by the history of the appearance of the word directly if this history is of note. In view of the difficulty of the subject and the expansiveness of its field, particularly with reference to Arabic language, in addition to the problematics of its narrative and lingual history, I will assume the existence of three phases, selected from the overall history of Arabic civilization (in terms of Arabs being peoples, language and religion), that have been transposed via major historical, geographical and ideological parturitions. These birth processes have generally affected the way Arabs formulate their language and discourse in the fields of civilization and humanities. This not withstanding, we find that the natural disposition (i.e. the hidden memory and tool of the language) of the Arabic language is irritable at a certain history. This irritation derives in a great measure from what could happen to the language, either in the hands of Arabized people, or people who are separated- whether temporally or spatially- by a great chasm from their ancestors, the fountainhead of pure natural disposition. That this has actually happened is emphasized by historians and tangible reality. If it had not been so, the focus on the history and geography- temporal spatiality- of the Arabic language in the world that is spoken in 22 countries spread over two continents. The landscape of Arabic extends over domains of expansive reaches. The deep, rooted link between the lexicons of these expansive domains is the history of the ‘word’. This history is also the most important indication of its correctness or falsity. The word prior to the Koran (in the Jahiliya) has a different standard morphology from the word in the Koran, or Hadith, or other poetic and non-poetic texts (during and through the era of the Koran and Hadith). The word in the tradition of the era of orthodox caliphates has a new morphology just as the word in the Umayyad era (to some extent pure in ethno-lingual terms) is different from the word in the Abbasid era. In the Abbasid era geographical selection in usage emerged; there is a variety used by Iraqis and Sham inhabitants (the people living in the Fertile crescent area) Chosen from the big repository of the language. There are also varieties used by Hijazis, Yemenis, Egyptians and Andalusians. Still there are other varieties used by other Arabs Who Were minorities in their milieus and societies, such as the Arabs of Morocco, Algeria and Tunisia among Moors, and the Arabs of Mauritania, Western Sahara and the Sudan among (Africans), and so on. Viewed from this angle, the important and crucial nature of the historicity of the word becomes clear; so to is the role this plays in determining its morphological standard. With reference to the above (the fact that speakers of Arabic form a continuum of nations, language and religion), I use the word ‘religion’ as an introductory item to review the great upheaval that Islam initiated is the oldest and most superior document in terms of constancy except for some dispersed and easy to deal with scraps. Secondly, there is the Hadith Which enjoyed a degree of documentation that was not available to many other texts which were contemporaneous to the Hadith. What one is concerned about here is the schools of jurists which were founded according to the tradition of the Hadith and their constituent parts- linguistic knowledge. The ‘historical dictionary’ sheds light on the history of the word on two important levels: during its reign as a lingua franca among a people called (Arabs) and during its reign in a society called (Arabs/ Muslims/ jurists/ and propellers of a religo-political discourse). This perspective avails us of the (historical dictionary)– a painfully revealing vehicle that lays bare errors of reading and discourse and masks. This is so because, firstly, Islamic texts are the main guide of Arabs up to today and, secondly, because all the theoretical and scholarly fights in all domains are still ones that involve language/texts/words. For instance, the meaning of ‘postponement’ (al nasi’iy) for Arabs is quite different from its meaning in a text explaining the Koran by Ibn kathir/al Tabri/al Zamakhashri/ Saiyd Qotb. Still its meaning is quite novel in the Writings and implications of other jurists. Applying this (historical dictionary) will involve one thousand words only. The application includes fundamentals and primaries (the theoretical framework and the tools, together with a sample dictionary dealing with 1000 entries). The project can then be completed via institutional work if there is a desire to compile a comprehensive dictionary. This is my research project in a nutshell. The dictionary also comprises ancillary investigative works dealing with the classic nature of Arabic dictionaries. It will include in this respect the following: 1. Determining second radicals of all the words of the dictionary because this is the base of correct pronunciation and writing as well as derivatives. 2. specifying ‘feminine’ ‘masculine’ ‘plural’ and ‘singular; this aspect is neglected in current dictionaries. Where they are specified thes is usually unintentionally done; thus the practice is occasional and lacks scrutiny and investigation. 3. ‘specifying all the meanings of a Word’ or confirming all the material about a word contained in existing dictionaries, with reference to each dictionary by title. My aim is not to reconcile discrepancies and differences here, but performing a remedial function, firstly, and then creating a selective hierarchy of the meanings of the word in accordance with the rank and value of each dictionary. Belated births of dictionaries result in accumulated entries and weakened authenticity unless followed by close scrutiny and investigation. 4. in its classification, the dictionary will rely on alphabetical order; it will not adopt the dictionary will rely on alphabetical order; it will not adopt the methods of classic dictionaries whose classifications depend on the infinitive forms of verbs. The classification of the historical dictionary will depend on this method for many reasons. The most important of these is the assumption on the part of compilers of classic dictionaries that every user is knowledgeable about language. This assumption contradicts the very function of a dictionary. It is inconceivable that an ordinary reader, or a reader whose mother tongue is not Arabic, Would know that a word should be looked up under the letter of the infinitive form of the verb formed from that word: ‘mizan’ (beginning by meem) should be looked up under ‘wazan’ (beginning by wawo). The historical dictionary will specify the indefinite form of every word in order to show its origin and derivatives. 5. Moreover, the dictionary will include the infinitive forms of quadliteral, quinqueliteral and hexametric verbs. This is not usually done by classic dictionaries.

...

مشكور يا ود السر وأشاركك، يا محسن، الرأي في أنَّ أجَلَّ خدمة قدَّمها هذا الموضوع هي: محاحاة اللغة وهذا هو الشيء الذي يجعلنا نضيف، لما قلناه حتى الآن، تعليقاً متعلِّقاً بمشروع قاموسكم المنتظر وتحديداً قولكم:

Quote: ...فـ(القاموس التاريخي) يُضيء لنا تاريخ المفردة على المستويين المهمّين، إبّان وجودها على لسان (قوم) اسمهم (العرب، وكفى)، وإبّان وجودها خلال (مجتمع) اسمه (العرب/ الإسلام/ الفقه/ الخطاب الدينوسياسي). ومن هذا المنظور يُحقّق لنا (القاموس التاريخي) الكثير الفاضح، والموجع، من كشف أخطاء القراءات والخطابات والأقنعة واللُّبوسات، باعتبار أنّ النصوص الإسلامية هي هَديُّ العرب الرئيس حتى يومنا هذا، ولكون حروب المسلمين التنظيرية والفكرية كلها، وفي كافّة المجالات لا زالت حروب لغة/ نصوص/ مفردة...

والتعليق هو: دايرنَّك، أكان الله مدَّ في أيَّامك وسوِّيت قاموسك، تخلِّي "خلال (مجتمع)" دي تبقى خلال (مجتمعين)، يعني كومين: كوم اسمو (العرب/الإسلام/الفقه) وكوم تاني خالص اسمو (الخطاب الدينوسياسي) وشُفتَ الكوم التاني دا، تمسكو تعلِّقو من كريعاتو وتَسلخو سلخة نضيفة تَخَلِّي جلدو قَّد قَدُر قَّدَّ الإبرة ما فيهو ودا، بالمناسبة، ما من كراهيَّة في الخطاب ذاتو بقدر ما هو من حرص على الوصول لتصحيح ما تسمِّيه "أخطاء القراءات والخطابات والأقنعة واللُّبوسات" التي أحسب أنَّ هذا الخطاب، خصوصاً المعاصر، مليان بيها لي اضنيهو. وبالتوفيق.

..

Adil Al Badawi،...
إزيك يا حبيب،..

تعرف إني من أكبر الكارهين للغة، لأنها هي المعرقل الأساسي لجميع نواحي التفكير في البلاد المسلمة والعربية، والمتأثرة بذلك،..
في درب المزحة بقوليك، ياخي أتخيل بنية عيونة عسلية وفيهن بريق بسمة خِلْقة، وغمازات حلوين وغاليين جداً، في جيب كلو خد،...
تقوم إنت (اللغوي) (تلغلغ) وتقول ليها: إنتِ شعر، وإنت شنو وشنو... ديني أنا... القمرة ووو
تقوم هي بس تبتسم، بريق البسمة الخِلْقة يحتل ويقلّع زي فينار السفن، والغمازات يلفّن دوائر زي شيمة في دميرة عسل، يتكلّم صمتها الأبلغ،...
أها إنت ينخطف قلبك، تقوم تتعاور تاني: إنتِ شعر، وإنت شنو وشنو... ديني أنا... القمرة ووو..
لو في زول –عاقل- كان جنبك، وكان مشارك بالتأمل بس، بركبك حي الله عُكاز،..

وفي درب اللغة التاني،..
لاحظ إنو الكندي الغزالي الخوارزمي والرازي وابن النفيس ونصير الدين الطوسي وابن حيّان وووو...

الناس ديل كلهم كانوا علماء ناجحين جداً، وكانوا فاشلين جداً كمفكّرين وفلاسفة، فقط اكتفوا بنقل الفلسفات الفارسية والرومية والهندية، وأوربا عرفت أثينا من خلالهم هم،...
عارف ليه؟
لأنهم كانوا بتغالطوا مع اللغة والنصوص وحُرّاس تلك اللغة وتلك النصوص،..
علومن اتصدّرت لأوربا، مع تفكيك "جاهز" للإرث الهيليني، ومجتمعاتم هم، استمرت تغالط فيهم فيما نقلوه من فلسفة، من الجهة التانية، الجهة التانية بقت ممتلكة لعلوم وفلسفة، وجهتم هم ما تزال مستمرة في الغلاط اللغوي....
هسي عليك الله لاقاك مسيحي وألا يهودي بتغالط معاك في قضية يومية بلغة ونصوص؟ أبداً... لأنهم حسموا الغلاط دا من جاليلو وكبلر بعد ما راح فيها المسكين كوبرنيكس،...

هسي أنا لامن أشوف الناس دي بتقول العلمانية معناها فصل الدين عن الدولة بضحكوني،...
طيّب مصطلح العلمانية دا نحتوه باستدخال كلمة علم ليه؟ عدم عرفة!؟
العلمانية كانت بالأساس وبالتعريف الصحيح، فصل العلم عن سلطة الكنيسة،...
الدولة دي شني هني؟ ما موضوعة تافهة بنجز العلم الحر، وبنجزها مجتمع متعلم، مش غالاط،...

العلمانية بدت لما كوبرنيكس وغاليلو وكبلر، أشاعوا مفاهيم "علمية" ضد نظرية أرسطو، المعتمداها الكنيسة وحارساها بعكازة، وقالوا إنو نظرية أرسطو من أنّ الأرض مركز الكون والكواكب والنجوم بتدور حولها، دا كلام غلط،..
يعني لما وقف الغلاط مع اللغة والنصوص،...

العلمانية بالأصح العميق هي وقّيف الغلاط يا بتاعين السياسة الدعائيين وجهلاء،..



المسلم هو الوحيد الذي لا يزال بتغالط في كل شيء باللغة والنصوص، تقول ليهو الناس طلعوا القمر، يقولك كضب كان ذكروها في الكتاب، أو كمان مذكووورة وقديييمة، ودا أسوأ نوع من مغالطية طبقة (الدينوسياسي) الجديدة، بس الغلاط ما بديهو أي فرصة يقول: والغلاط حاكمو زي البول، ما مخليلو نفس يقول طلعوا كيف؟


..

سلام ياسي محسن..من غياب ولغياب ولحدي ما يزول الشاغل.

البوست مترع بالمفيد الذي لا غنى عنه لنا ومهما بلغ شأننا في اللغة ولكن طي الصفحات والعودة لما سبق من فوائد قد يقعد الكثيرين ممن أقطعوا عن متابعة المنبر وبالتالي البوست دا..ومما فاتني موضوع إذا وإذن الذي هبشك به حسين ملاسي..ولسهولة الرجوع إليه لمن اراد اضع اللينكات هنا..فورة حسين وفشتك ليها:

Re: إصلاح الكتابة في المنبر


Re: إصلاح الكتابة في المنبر

مشكور، عزيزي محسن، وتجدني آسفاً لأنِّي تَوَّرْتَ نَفَسَك بالموضوع إيَّاه الذي أرجو أن لا يجد فيه سناير الطلاب بهذا البوست انحرافاً عن موضوعه، أي البوست، رغم أنف التحذير وإن كنت لا أرى ذلك فقد بدأ الموضوع بسؤال في اللغة وتشعَّب في ذلك وانتهى كذلك، مع محاحاة هنا وهنالك.

في شأن الغلاط، صدقتَ. أنا بَضيف لي كلامك إنُّو الغلاط كان ما قصَّر عمر الزول بإهراق جزء مقدَّر من هذا العمر، في فارغة ومقدودة، بقصِّرو بإنُّو يسلَّط عليك واحد يهرق دمَّك إما بإنُّو يقُص رقبتك عديييل زي ما سوَّى الجماعة مع الأستاذ محمود، أو بإنَّك ما تنجى على الأقل من بذرة من كُفُر. أعتقد أنَّ أغلب الآيات الوَرَد فيها الجدال في القرآن، سبحان الله، إمَّا إنَّها ما شاكراهو أو بتقول صراحة إنُّو يكون بي أدب حتى مع عتاة الأعداء زي فرعون مثلاً وتوجد قصة لطيفة وردت في تفسير الآية "وكان الإنسان أكثر شيء جدلاً" توضِّح إنُّو الغلاط تَّبْ ما مشكور.

كلامك عن تعريف العلمانية ذكَّرني حوار شهير أجراه صحفي فرنسي مع حسن الترابي، أم كان تعقيب من الترابي على الحوار أم غير ذلك؟! لست متأكِّداً، استغلَّ فيهو الترابي الضبابية حول تعريف العلمانية بكلِّ دهاء وأعلن على رأس الأشهاد إنُّو علماني. بيني وبينك، لو الناس عاينت للتعريف، من حيث اشتقاق الكلمة، حا يلقو إنُّو مافي زول ما علماني وحتى الناس البحاربو في العلمانية (حسب فَهَمُن ليها) تلقاهم بِحاربو فيها بأدوات علمانية*. وعشان المشاركين في البوست دا ما يقولو إنِّي اتجاهلت، تاني، تحذير الانحراف بموضوع البوست بقول إنِّي جِبْتَ الكلام دا لأنُّو نازل تِكْ في موضوع البوست ومن هسِّي صُرَّها في طرف توبك لي حَدِّي ما تفضى ليها: ضمن مسعاك لإصلاح الكتابة في المنبر، شوف لينا الاستخدام الخاطئ للمصطلحات والمفاهيم خصوصاً المتداولة تداولاً كثيفاً في هذا المنبر وتلك الناتجة عن حركة الترجمة وخصوصاً الترجمة التي نشطت في ثمانينات القرن الماضي**

*واحد أمريكي محارب للعلم (أو قول العِلْمانية بتعريفها كمشتقَّة من كلمة العِلْم) وقاعد ليهو في حتَّة ما فيها منتجات العلم (ناس كهربا وكدا) إضطرَّ يحارب علمانيتو دي بأدوات غارقة في العِلْمَانية: كان برسِّل قنابل بالبريد!...عِلِم وأللا ما عِلِم؟!
**اضطرَّ مترجم كتاب الاستشراق لإدوارد سعيد إلى أن يقوم ببحثٍ في أمر المصطلحات نتج عنه، حرفيَّاً، كتاب في جوف ترجمته لذلك الكتاب وهو البحث الذي أخرج إلى الناس كلمات مثل الجغراسي وما إليه. طبعاً شنتير أخوك دا شَرْبَان كورة النَّضَمي دا لا حتروبا.