الشاي الشربتو مالو ما طمر فيك ؟

طبعا يا أحباب انتو سياد العارفين انو العرس قسمة لكن في درب القسمة دي بتحصل حاجات عجيبة
انا غايتو بديكم طرف الحاجات دي لكن تتمو باقيها انتو
يعني في درب القسمة لما تمشي زيارة لي ناس عندهم جكس للعرس وكده
بتلقاهم بيتعبو في ضيافتك تعب شديد
يعني الكبابي المدسدسة بتجي مارقة مع جيتك
والملايات الجديدة حقات العيد بيتفرشن في سكتك
وأهم حاجة الشاي
الشاي بلبن تقيييييييل
تجي تصوت الكباية بدل كلينك كلينك كلينك تسمع جلوط جلوط جلوط
الشي شاي والا مديدة
المهم تقرطع شايك وتقرمش زلابيتك وتكمل ونستك وتقوم تتخارج
غايتو عز تقيل


أها

بعد العرس تجي تزورهم يجيبو ليك الموية بالكوز المطرقع
والشاي ابو كلينك كلينك كلينك زاتووو يمكن ما تلم فيهو

يسلمو عليك وهن قاعدين بدون وقفة ولا شلهتة حقت زمان ديك

واحدة قابلتها وقلت ليها وييييين يا هومة مشتاقين لشايك الختير داكا

عوجت وشها وقالت لي هو الشاي الشربتو طمر فيك

ما مرقتها في الحلة البعيدة ديك