خيمـة الحاردلو

وسـط الدارة نزلـن من قصورن
عامـن شوقـن قلبـي البـدورن
هج وضج في ود عينـي نـورن
وطابت روحي من نفحـة عطورن

قمر السبعتيـن قدلت حمـامـة
غطـت جملتن متـل الغمـامـة
محزوز جيدها فوق بانة قوامـه
مجروح ريدها وين يلقى السلامة

ساحت إيـدا في الخـد المبهرج
وعامت ديسها نام فوق المرجرج
صـورةً جهجهت قلبي المضـرج
وفـرع البانـة لعلع فينا كـربج


شالت إيـدا مـن صفحة جبينـا
ومالت ولعـت نـار الكميـنـة
ودارت شتـت شوق ليما فينـا
حليل الراحـة يا روحي الحزينة

حسدت التـوب على اللفة الهنية
وحاسد الروج على الرطب الجنية
وحاسد الحنة في قـدم البنـيـة
على النعمة وعلى الدرجة السنية


شكيت الصيدة كان شالت منامي
وهبّت جمرة الشوق في عضامي
عفيت الصيدة تسلم من كلامـي
براي بربحت تعذيبي وهيـامـي

حلـف بالله أنـا إن كُـت حليلـك
زي المتلي مـا ِبلمـح كحـيلـك
أغطـيك بالرموش في العين أشيلك
واخبيك فـي القليب نومـك مقيلك

طلع نجم الغفر المسمى بالميزان
هبّ نسيمو جاب ريحة جناين اسوان
البسماتو تطرِب تفرِح الحزنان
ظرافة وزوق.. نهداً حاكى الرُمان
------------------------
نجم البُلدة يا خِلايا ربط بي غمامو
الليل طال والمخلوق كتير النامو
مرضان أم رشوم العارفنو تب ما لامو
بي حسر القلب لامن يعدي أيامو
---------------------
سنجاوي ..سلامين..

الخّلاني برِد القاش معاك وأتغرّب
شايفلِك ضيوف زمن السنين تتكرّب
أبشر الصيفي وجهو عليك وخيِِرك قرّب
لابد نزلة في الليد المقامة محرّب

وتقعد عافية
قيسان

حباب قيسان عشا الضيفان
الله يبارك في الأيام ويجمّع الحبان
قول آمييييين
ومن درر ماوي في الخيمة التانية هاك دي

مساء النور عليكم والخيمة تب عمرانه
مساء الورد و الياسمين معاه ريحانه
مساءاتكم بهيجـة وتشجي بي الوانا
و للسودان بتضوي وتعلي ليه مكانه

جينـا الخيمة نسعـد وللشعر نتسامع
وفوق ديس البنات قافياتنا يات تتجادع
غلبني امات فواطر لي هديلهن سامع
حرقن بس قليبي و سوو فيهو مواجع
تحياتي

سنجاوى اخوى ياولدة العربان
جيت شاقى ساكت وكمان ضهبان
لقيت الخيمة منورة بالضيفان
قلت اقعد معاكم ونعمر المكان

Save@Pc
AnwarKing

نجم الشولة صبُّ نزيلو
والقلب فاقد الفدغ المزنّد تيلو
قمر السبعتين وجهك ضوّا فوق جيلو
يا مولاي بعد الحال أضوق عسيلو
--------------
سعد وزابح جاب بردو ونسيمو الحار
العين لاجُّة والقلب إنحرق بالنار
عانس الدوّر القفرة ولقاها خدار
مغِّيب عاشقو ضلام الليل عليهو نهار
-------

وتقعدوا عافية
قيسان

أبشروا يا شابين جملة ... قيسان عليك بي كالندر ود الزمزمي .. أتحفنا ، أتحف الله قدرك .

حرقوصك نتل جاب من هواكي دعاش
خيّم فوقك الليلي ومكاييل هاش
اتهتم سماك اسقى الـ كانوا عطاش
عربك تالتة واقفين ، لا برش لا فراش

ركزنلك بروقك عكّلن قيزانك
انهلن بشايرك واستعد عربانك
اتدلقن سحابك نعّ فوق وديانك
بي فرحة وطرب دقو الرباب عربانك

أضحو مبسطين شاكرين كريماً حي
سندوا الواقعة حلبو وشربو من الني
اتملى التبوب مصعن حمير الري
قاموا يعافرو في الشقق الرباطن ني

أخدوا الهجسة لي الكيفة الشميشا ضحي
يات من كان حلف قال الكرامة علي
أم ريد لولت القلاي ، جميلة الزي
أرياح الدمك غمرن ربوع الحي

اهل الخيمة الكرام

محمد بشير عتيق كتب الابيات الشعرية التى سوف اوردها
وكانما يتكلم بلسان اهل الخيمة.

وكذب القال ينافس لى اصولنا يضارع
ابناء عز واعظم دوحة مــجدنا فارع
نحنا قبيلة منبت كل عالـــم ووارع
اقطاب دين واسياد طين جـزر ومشارع

له الرحمة

أهل العوض ..كيف حالك آخوي ..
والله لي زمن راجي حرقوصك يشلع أكان يجيب دعاشو السمح بالحيل في النم ..
وخلنا الناخد الهجسة للكيفة الشميشا ضحى ..وأم ريد السمحة تلولي القلاي ..
----------
الزبنان مع الإكليل
نجوماً فضلهن نضربو التمثيل
ديل الخلّن العاشق منامو قليل
محروق ديمة بي نار أم لهيب والويل
-------
طلع نجم القلب والفوف كسا الجبّال
دور الحُم ظعنهن جدّد المُرحال
المعشوق دوام يتقلىَّ في الملاّل
خلُّن قلبي قدّاد بس التقول غربال
--------------
وتقعدوا عافية
قيسان

سنجاوى

تانى قمت علي الكلام البسر القلب!!

حليل زمن الغنايين شنتير وسف كلى واهل العوض والملاعمر وسينتمنتال الخ

لكن بنجادعك جاى لى جاى


المعزن البجازن ديمة فووووق في خلاهن
بالغت النصاب انصارى ما ذكاهن...

الباقى تمها براااااك...

مبسوطة البطانة وقاستا النقاعة
دوّر خبر الرحيل اتباشروبو جماعة
قاصداك أريل الفودة البضوي شعاعة
أحمت عيني تغمِد عقربا اللطاعة

------------
إتطمطم سماك الليلة وعاتم
وبراقك مع فم السحابة بلاطم
إنشبكن تعولك نازلات هواهن كاتم
وديانك لفض سيلن سماحن خاتم


*****************ويا أهل العوض مسعول من الخير ..شانتير خبرو شنو؟؟ أريتو عافية؟؟


قيسان

الأحباب أهل الخيمة والنميم .. سلام جاكم وبركة العودة للخيمة .. بهديكم سلام عائد جديد من السودان .. والتحية للجميع .. على خفيف نبدأ معاكم رفع الخيمة بالنمات الحلوة دي:

دوبيتا والدوباي حلـــو
البلفاني في الأخوان مِنـو
نسقيك يا البرقة أم حُقـو
والله كــان الــدم جـرو

طالبني الغرام رسل لي خمسة عساكر
وأنا عامل جنايات والعقل مو فاكر
بعد ودوني قابلتو القبيح الماكـر
قال : ختوه يرقد في السجن لا باكر
***
بعد الصبح أصبح والسجن فتحــوه
والمكتب عمر قالوا الأسير جيبوه
قال ليهم الـولـد ياتو هـــو ؟
قال : لو عشوق خدود اللينة ما عرفتوه ؟
***
قالوا ها بلحيل بنعرف الغرام شاويهــو
ومِـن فضلـك تسامحو وغايتو لا تقاويهــو
الماسكو الهوى العذري نــازل فـيهـــو
في حُكــم الشـرع لا يكـون جنايـة عليهو

الحبان سنجاوي وأبقوتة والسنتي وقيسان وأهل العوض وبقية العقد النضيد .. في انتظار نميمكم السمح

طالبني الغرام رسل خممممسة عساكر ؟؟؟؟؟
سيف كلي ..؟؟
يا زول سلامة الوصول ..
بشوفك مارق من بنطون شندي ..دحين وانتا بي عجاج سفرك دا أدينا الخبر ..كيف حال الجيت منّهم انشاء الله طيبين..
باقي لي جيت مالي في النم..؟؟

------
إتنين: الزبنان مع الإكليل
نجوماً فضلهن نضربو التمثيل
ديل الخلّن العاشق منامو قليل
محروق ديمة بي نار أم لهيب والويل
--------
يا البطانة إسمّحتي من لونا لبستي جديد
وتصبحي كل يوم نايرة وحلاتِك تزيد
تعّالِك نزل ساوى الضهور والليد
وإجادع فريقك في نزلتو بعيد
*******
مبسوطة البطانة وقاستا النقّاعة
دور خبر الرحيل اتباشروبو جماعة
قاصداك أريل الفودة البضوي شعُاعة
أحمت عيني تغمد عقربا اللطّاعة


وتقعدوا عافية
قيسان

سنجاوى

لك المعزة و الجنان
خيمتك مليانة بالنم البيطرب البال
و ما شاء الله زوار الخيمة كلهم اعلام تحياتى ليهم


اخبار ذكرك الفى خسوسى
وصلن عندى محفوظات بقن فى الدوسى
القت سيف برنجو و محددنو لبوسى
خلّن قلبى يلعب زى نتيجة السوسى


** حاشية : الدوسى : الكلمة الفرنسية المعروفة بمعنى دفتر او سجل
البرنجو : لعلها من كلمة برنجى التركية الاصل و هى بمعنى ممتاز او اول
السوسى : هو المنجم كما يسميه بعض البدو

الأخ قيسان وأهل الخيمة الحبان .. تحية موصولة
السودان رائع بى ناسو رغم كل شي ورغم الظروف القاهرة ويمكن وصف الوضع باختصار في هذه الأبيات من نميم أخونا التجاني حسين :
يا بلدي العزيز مكتول هواك يا طاهرة
مطعون في سبيلك في الفؤاد والخاصرة
كاتلاني المغايض والهموم متكاثـرة
شوف العين بصيرة بس الأيادي القاصرة

بحلم بالنعيم والخير يعم ودياني
ما يفضل فقير في ملتي وأخواني
تتوحد صفوف في يوم قريباً داني
نهتف عند النيل: يحيا ويعيش سوداني

أما الناس فهي يمكن تصويرها في هذه النمة
في الدنيا أم قدود ناساً بكت محظوظة
زي موية الخليج جوة القزاز محفوظة
والناس اللي كانت في الجهاد ملحوظة
صارت في ركاب الضايعين ملفوظة

الأخ قيسان بخصوص بنطون شندي أذكر لك قول الشاعر كدكي
قايل مراكب زي زمان
جابولنا بنطون الحديد
أي ما شاء الله وكان
الناس تعمر في العمار
راس البيوت نسجاً جديد
وتقعدوا عافية

سيف كلي ..كتر خيرك علي النم ..الفيهو ريحة البلد ..دحين ماك شايف "السيّالة" الكبيرة الورا من سوق كبوشية؟؟
أها بس ..دحين في ضلها داك انا راجي باقي النم ..
-----------
طريت بنطون شندي وشدرات مشرعو
فيهن التوبو ابيض وأخدر مُقنعو
قول للراجني اتوب من الغُنا اليقنعو
قلبي إنبدل بركة الشيخ نعيم التفزعو


وتقعدوا عافية
قيسان

أخوي قيسان والله ما بعيد من السيالة ديك في جزيرة اشبيلية (يا اسمها كده ومن ما عرفها أهلنا اسمها اشبيلية) معزومين أيام العيد جابودي نضيف وليك من نمه:
قش البطانة الفاقع
برعنو أمات براقع
أنا ما بديك: دهبي اللقيتو واقع

قش البطانة الفرهد
فوق المزرقن يرعد
انا ما جافيت لكن دريبك أبعد

الأخدر عيش الشاتي
صيفو وخريفو مشاتي
أرمولو القيد مفتاحو في حجباتي

ومن نظم البنات
الشايب ما بندورو
بالملالة فوق صنقورو
ناخد الصبي ساكت على حنجورو

الشايب بى التسلو
وبالشوكة التنكسرلو
شايب الضلال أحماني قريني أتلو

الشايب الجمجمــــة
نفسك دعاش الرمـــة
ناخد الصبي ساكت يبرد الحمى

يا اللخدر عيش الزرع
انا منك ما بنقرِع
يا اولاد ابوي السوسة بتاكل الفرع

****----
سيف كلي ..السلام عليك
جابودي ؟؟ وفي ضل سيالة كمان؟؟ والله بختك..
اها فوق درب الجابودي المتلّت هاك:

يابا ود حيسونة
يا راجل العيلفونة
عرب أم ضمير ما يرحلو يخلونا

أقعدوا عافية
قيسان

الصلاه علي النبي ياجنيات الخيمه كلامكك سمح بالحيل

الحبان أهل الخيمة.. كدى النسوي شي من شغل البطانة أكان شيخنا شنتير يبان
شنتير السمتان وين مشاهدك يا أخي

تيس القنة دعدغ بالكرب وإتشابى
قطع الباح مغبي بي وهسالو ربابة
تبقى عليهو جافل من قميري الغابة
أهجم بي البقطع في البطون ساكلابا

وواحد نهاض يخاطب بعيره:
بيش ما بيش أخير من العدم بتخيَّـل
وبى بيتين تعدي التالتة حتى تقبِّـل
كم لله راكب فوق كلس مو قلـيـِّـل
مو متلك إديبس وبالعلال متكيـــِّل

فرد عليه البعير:
أنا عارفك فصيح وعلى النبز متحيًـل
كان أنضم معاك تراني متلك عيـِّـل
الفرقة التبقسى على القفارو مسيل
أنا بقطعها وزينه مسورها منيـِّـل

وتقعدوا عافية

جيناك يا بيت الأنس و اللطافة ...

كلامكم .. سمح بالحيل .. إلا والله يا سنجاوي .. عقدتونا عديل كدة .. أنا قاعد ألتق لي أربعة ابيات كل يوم .. بقول دي مسادير .. تراها طلعت ... مشاتير .. غايتو .. أكان رضيتو بيها .. و لا ما رضيتو بيها .. ياهو الدراب الجاييكم ... لا جنبي ديوان الحاردلو .. و لا اني .. الحار .. دلو .. أظرف مرة بدري .. مسكت ديوان الحاردلو .. أقلب فيهو .. بديت بمسدار الصيد .. و عينك ما تشوف إلا النور .. ياا خوانا ناولونا الديكشنري ؟.. ها يا جنى هه .. ياتو ديكشنري ؟ .. الديكشنري .. الديكشنري .. بتاع دكتور فضل .. و أنا أضحك .. قاموس اللهجة العامية في السودان .. و الله غلبني .. و طبعا .. الديكشنري .. عزيز الوجود.. احترمت نفسي و ختيت الكتاب.

لكم التحايا .. و الود.

رطانة سمحة خلاس .. بس ها الليام نازلة فوقنا زيفة حمتنا النار ما نوقدها .. لا شاهي لا سبارس

ضُهْريك سابَق السارية وصبيبو انحتّ
وقِبْليك ساوَق أم بَرَد الـ بيرْمي صَقَطّا
زي توب الزراق سُحْب السواري نَهَتّا
جَبّالِك جَبَد كُجَر التعول .. واتغتى
======
ميّلوا بالدويحيّة العرب عارقين
ومتناقلين .. مسفّلة عُطْفَتُن .. مارقين
عَقّاد العليو نزلوبو متفرقين
وباشنديهو فوّح .. وكِتْرو جاب دُلْقين
======
الليلة السحاب فوق البطانة منيِّل
وولّع جمرة القلْب الـ قبيــل متحيِّل
طريت ست الصبا الـ ما جالسوها العَيِّل
جمالها يفوق على قدر العقل ما يخيِّل

وكان الله يحب المحسنين

إن مـال الشـدر بتكسـرن فـراعو
وقمحـان الطلب للمابجيبو ضـراعو
ليـه يا أهلنـا للبيناتنـا ما بتراعو
البقول راسو موجعو بتربطولو كراعو

الحبان
قيسان ، أبوقوتة ، أنور كنق ، أهل العوض ، دورنقاس
سنتمنتال ، سيف كلي ، كوستا ، دوما ، ماكساب ، شيخ العرب ود شنتير

السلام والريد يغشاكم ويلقاكم تامين سالمين غانمين
مشاغل الدنيا وامتحانات الأشبال حرمتني من التمتع بمخاطبتكم فرداً فرداً
أسبوع وأجيكم صادي واتحكر بدل المتاوقة والجري
لكم عاطر التحايا وخالص الود

سلام عروب سلام


غاب نجم النطح و الحر علينا اشتدّ
ضيّقنا و قصر ليلو و نهارو امتدّ
نظرة المنو للقانون اتحدّى
فتحت عندى منطقة الغنا الانسدّ

ـــــــــــــــــــــــــــــــــــــــ


خبّك مو وشيك الليلة مالك
تتقل فى اليمين و تجر شمالك
بنيتآ لى شيوما بشنّى حالك
رقادآ دونا قط لا تسيهو بالك

ــــــــــــــــــــــــــــــــــــــ

اربطو الجانا ضامر لا كبد و لا كرشه
سحّار الغروب جيب لى العلوق بى الورشه
نفّضن المراتب و طرّحن بالفرشه
داير يبرى جرحآ فى القلب مو خرشه


...............................


ارقدوا عافية

خبّك مـو وشيـك الليلة مالك
تتقل فى اليمين و تجر شمالك
بنيتآ لى شيوما بشنّى حالـك
رقادآ دونا قط لا تسيهو بالك

عيييييييييييك ياكوستا

آآزول انت كنت لابد وييييين
عقب ياعشــاي .. عقب

سنجاوى والاخوة كدى شوفو النم دا قبل كدا سمعتوه

ياجليس امات وضيبا كابى
ياركاب على مهرا قبيض واجابى
صدرك لهب النار اللسانه يشابى
وشنبك ضنب عقرب الهرب المراضعة الدابى

أهل الخيمة السلام جاكم ..وإنشاء الله ديمة عامرين ..
-----
اللصهب الماريق علُوقُو واكلو
والدرب البِهابنو الجُمال شركلو
دِريب الحِلة ما بتلملمو ويضحكلو
علي المتبورة ما برتالو ينعل شكلو
-----------
اللصهب مالها الليلة بطنك ضامرة
اراحك قوم افزع الفي الصواقير هاملة
ديك دريبات الصِفيَة ام شغلتاً عامرة
منّك وليها عبلوجة السبعات دامرة
---------------
أخونا شانتير ..يا القِبليك ساوق أم بَرد البترمي من الصقطا
يا زول كيف حالك ..الزيفة احمتكم نار الشاهي ؟؟
إنشاء الله ربنا يكفيكم شرها وتنصرف ..
ميّلو بالدويحية العرب عارقين ؟؟
ومتنافلين مِسفِلة عُطفتن ..مارقين ؟؟
عقّاد العليو نزلوبو متفرقين ؟؟
والله يا شانتير عربك ديل ..انا غايتو أصلو ما بتلا منهم ..والله معاهم محل ما يقبّلو..
----------
أب حسكة مالها الليلة بطنك ضامرة
اراحك قوم افزع الفي الصواقير هاملة
ديك دريبات الصِفيَة ام شغلتاً عامرة
منّك وليها عبلوجة السبعات دامرة

وتقعدوا عافية
قيسان

قيسان .. كلامك كبار وسمح .. وبِوْزِن صواميل الراس

نزلوا .. وعدّوا في "أب شقروت" تمانْة ايام (تمان تيّام)
بقرهُن برعى قمبيلاً منيّل ودام
عنانيف النجوع جابن خبر قدام
وفي اطراف النهار سرّب عقيدهُن قام
===
مادّين و"الغبيّة" أوان مقيل هدّوها
عركسوا فوكّا ملّوا روايا واتعدّوها
داروا "القُرني" ها الشورة الكبار عقدوها
والعُطفة الموشحة بالحَبَر قادوها
===
نزل شيخ "الفحل" بيغادي سافل جاي
وللضيفان بسوْ كرماً عجبني براي
تلْ قمري الصباح في ديارهُن الخُلّاي
وبسمعو من "قَبَالة" وسفّل الواواي

الواواي دي كويسة معاك يا قيسان .. أها واوي وأنجع معاهم .. في وداعة الله

السلام عليكم جملة ..

اللصهب ود ام دغمة روبز زاع
وقام بي حنيتو قُمري وطارلو من فرّاع
اب رقبة الرِقيّق عودو ورِيدو ضُراع
قلبي كلاّهو وعيني ساهَرِن دماّع
-------------------
***شانتير ..والعنانيف البجيبن خبر قدام ..
شُفتا العُطفة الموشحة بالحبر دي ..والبقر البيرعى الدام..النجعة معاهم والله حبابة ..بس قولي كيييييف الراي ؟؟؟ الله كريم

البعنيهو في غناي -يا شانتير- أمسى وينو
دا السِنو براقاً بعيييييد زِرقينو
العليهو اللصهب طوال كرعينو
زولي الزي نضاضيرالمِفتِش عينو

أقعدوا عاااااافية
قيسان

الحبان سلام
سيف كلي/قيسان
بالله كلمونا عن الجابودي دا شوية .. محو أمية وكدا
غايتو الشيء الجبتوهو ذكرني الآتي
يا فتيل الريحة
الريدة ليك صحيحة
انت كان جافيت
كلمني بالنصيحة
سنتمنتال
وعد الحر دين عليه
أبوقوتة
مسكت الدرب .. عقب ياجنى
شنتيييييييير
مالحكمة في كونك بخيييييل
وأهلك أرابيب الندى

سنجاوي السلام جاك

الجابودي ..أو "الطمبور" هو لون من الوان الغناء لدى اهل البادية..ويتم تأديته بالتصفيق مع ضرب الأرجل تصحبه "حمحمة"
(والله ماني متأكد من حمحمة دي..)أو أصوات جماعية بشكل معين النبرة فيه تخرج من الداخل..والإيقاع العام ضربة واحدة بالأيدي تعقبها أخرى بالرجل.. والذي أقصده هنا هو اللون الذي يمارسه بعض اهل البطانة (أظنه موجود ايضاُ في البادية الغربية مع بعض الاختلاف البسيط)(**)..والفريق الذي يقوم بذلك يسمون "الطمبارة" ..أما الغناء فيكون بشكل دوبيت ولكنه من ثلاث مقاطع ..والمقطع عادة ما يحمل ثلاث كلمات أوكلمتين أما المقطع الأخير فيكون زائداً (اربعة او خمسة كلمات)..مع ترديد "الغناي" للبيت الاخير او البيتين الأخيرين ..وتكون البداية بـ"رمية" من الغناي ثم يواصل أثناء التصفيق وضرب الأرجل..تقوم المرأة فيه بالرقيص وغالباً ما تكون الراقصة واحدة ..تتبع "الطمبارة" مجيئاً وذهاباً..و"الغناي" هو الذي يتحكم في طول الفاصل وقصره ..مع مراعاته للراقصة أو الراقصات التي عادة ما تحمل "سوطاً" او سيفاً او عصا خفيفة "مطرق"..ودرجة قياس الرقيص للمرأة بمدى حفظها للإيقاع في الرقيص ومدى طول فترتها في داخل "الدارة"..فيقال فلانة "فتّرت الطمبارة "..
من نماذج دوبيت الجابودي :
قاعدين في خلانا
متونسين برانا
فوقك تقيل يا مطرق الخيدرانة
****
جدياً دابو قرم
يرعىَ العسين والبرم
شعرو سواد شبه الليل الضلم

أتمنى ان اكون قد وفقت في ذلك..و وصلت الفكرة يا سنجاوي ..اما نمة "فتيل الريحة" فهي من دوبيت الجابودي ..مع التحية ..
*** سيف كلي الكلام دا كيفنو مو ياهو؟؟؟

أقعدوا عااااافية
قيسان

الاخوان
تحياتى

اذكر وانا صغير امشى مع ابوى باليل عشان نودى عشاء العمال
وقت الحصاد وهم يدقون العيش..واسمع منهم هذه الاهزوجة ممكن
يكون دا نوع من الجابودى؟؟؟؟

العيش لين
تقو مو هين
حليل حامد
الفى الرجال بين

وبعده تسمع الهمهمة

بت البدين طمبرلها
وبنت الفقرى خلها


[blue]كدى اسمعو النمة دى.....

تيلاد الحورن اللمه من النيس
اجمل من الجدى بالصى دليلن تيس
ما دام حبك شبك فى القلب لويس
دا هالكنى زى ما ليلى هلكت قيس

سلام للجميع ..

من وِلِدتا مالقيت في الزمن مبدوع
عِجلك تُرُو فِج بي كُوعك المفدوع
مسك السِكة هِضليماً ختمنا بزوغ
طالب القرنو مِنّو بِدفِق المجموع
---------
وتقعدوا عافية
قيسان

هاكم شوية من الجابودي كمان

قـوقـن يا قمــاري
لى أهلنا الفي الضهاري
رشرش تومي .. بقيــِّد البشاري
***
جابـو التِـلـوب شـدوهـن
بـي تويلـي الريف عموهن
بجز قرني .. يا خالي أما جبتوهن
****
البكرة الحومرية
من الغداد بريــة
لا ضاقت قيد .. لا إنشدت بى حوية
***
الأخــدر المتقايــس
يا صنـــدل العرايــس
الناس عرب .. ما بتفهم الحدايـث
***
يا صندل الشقيـقــة
تهمونـي بيـك رفيقـــة
الناس عرب .. ما بتعرف الحقيقة



وتقعدوا عافية

سنجاوى

التحيات النواضر
ليك وحشة .
من زمااااان دايرين نخش الخيمة ، لكن المشاغل الكتيرة و ان شاء الله نقدر ندخل كلما سمح لنا الزمان .


عتود الدقدق ألمن قام نشيّط
عصاقيلا تخلى ألكور يعيّط
تقولب ايديك تقول مكنة مخيّط
بلا ست ريدى ما اظنك تبيّت

تقولب ايديك تقول مكنة مخيط

بينى وبينك ياكوستا الزول بكون وصل

ولا دابته دى ماتت

كدى هاك دى

خشمك كوكوبه جابو اللبار لدقو
بالنيلة زيقه ماهو المسيخ فى لقو
عاشقو مبرعمو مصيرو ياخد حقو
خدرت برعمت درت عسل لمقو

المقـدر الشد عديلو ختـوتـو
كسار هربت الأوسام جفل بى تنيتو
على بلـد المواتـر النمـو فوق قافيتو
دبلوب دابـو تمّـن مهى سنين عديتـو
***
الخـلاني أشـد يا تيس وأصبـح خاتـر
أوقيـن قوني من كترت همومـو مواتر
دواريب شلوخو ما بسووه ليه سواتـر
أو كيهـا لابس حيــاة الســاتــر

وتقعدوا عافية

سلام عروب سلام

ابا قوته

باقى ليك بيكون وصل سالم ؟؟؟
تحياتى


اخدنا اليل تفنن بى طرب غير علّه
تمم كيفى تيس قنّه اب حديدآ شلّه
انا و الديسو لى عند المتان ادّلى
نومنا بقى لنا من بعد الامام ما صلّى

الأخوان الأحباب .. تحية ومودة
وتحية خاصة للشيخ شنتير السمتان وبركة الطلة وطمنتنا عليك ..
قيزان قاش برور طارن صباحــك
شبــال الزمـام كمـّـل مزاحـك
خريـر جماجم قفاك أصبح وشاحك
أرح للعنـدهـن مضمـون ربـاحك
***
خش القاش وبـرد كربتـيـبــو
دخل حيشان أرابيـو وطبيـبـو
بـرك في بيـت أهـل عزو وحبيبو
شرب زاواتي من نــاقـع زبيبـو

وتقعدوا عافية

الحبيب قيسان

مشكور على الشرح المفصل للجابودي
وصفك المجود ذكرني بمشاهدتي لهذا الضرب من الفن على شاشة تلفازنا القومي واستمتعت به غاية المنى
تفاجأت بوجودك أنت وشيخنا سيف كلي بالرياض .. قريب مننا يعني وكل قريب للقريب نسيب .. لن أعجز عن التواصل بإذن الله
تحياتي

إن خلانـي بـن البنـات يقلنـي
جمعن محفلن فـي فندقن هرسني
أو خلاني زيت في بشرتن مسحني
أو مسواك أراك قامن فجر مضغني

حليل بناتنا وحليل السماحه
وحليل اللوادن القدلن بالراحه
سارات القلب زايداتنو شراحه
مستورات توبن مابلفحنو لفاحه

ملعون ابوك يا زمن كسيتن قباحه
التوب اترمى والمحاسن مباحه
جاريات جري الوحوش حبسن الساحه
وان اقبلن قبال تمامن تسبقن كتاحه



التحيه لصاحب الخيمه وصحبه ... وان شاء الله يساعدنا النجر بالمواصله

الأخوان الأحباب .. تحية ومودة
قلنا نزور الخيمة من وقت لآخر ونوقد فيها نار الجبنة عشان ما تغتس تلحق رفاقتها وفزعتكم معانا
ما بجـمــع بلاهــن مـال أدور وِفيـــر
مـرعـاهـن عسيـن قـش الخـلا القفـيـر
ما سكـنن كُـمُـر بـلـداً وخيـم زفـيــــر
زوال جامـوس عليهن كشكشة ونفيـر
***
الليلة الغرام أحكامو في مشـاهِـن
باح أسرارو منـي وكلهـن فشاهِـن
بِـت البى زلف غنامي ما نشاهِـن
سلمن من كلاب البى الشرع وشاهن

وتقعدوا عافية

الأخوان الأحباب .. كل عام والجميع بخير

ريحة الدهيـــر الشـقـــن
بالمايقو أدعج وفي الكلاوي محقن
سرور أم خدود منو المفاصل رقّـن
كم لله .. مِـين دفــن الجنى واتيقن
***
ليش يا نعيم كتّـر عليا عتابك
أسعل ربك الصايبني ما يكون صابك
جاهلاً صغير رشرش عيونو اتشابك
ضيّـع فكري وأصبح في شعوري متابك
***

بعد الشدة فوق شهر البحدر الطافة
صرفتو المضيفة كل يوم بى لفافــة
أكان النعمة بتدوم والعمر بترافا
كم شادك على عنافي ليـهـو حفـافـة
***
وهاكم فنجان الشاي دة
أنظر للكبابي وشوف جمال برادهــا
والشاي أب شعيرة الجاي من بغدادها
ست نحلاً قديم حارسهـا من أجـدادهـا
قبــال السـلام للضيف بيحضـر زادها
***
ما طحنت دريش ما كوفتت قـرمـادها
ما ســدت بيوتها وللبحـر وراده
صايمة من الطعام حب القرنفل زادها
ما ضاف المريض كباية من بـــرادها
وتقعدوا عافية

العيد مبارك عليكم وتحياتي للجميع

كم شديــتا فـوق تيسـاً مسوكو الغلة
كم قـرّن لِـقــاح شهـدان علي عبدالله
فـرتيك البكان حارسني مـن فضـل الله
بعرفني البتيتلن بى فريق جـــودالله
***
ليش يا الدفع نعيد نعيم في عتابـو
قلبـك من حديـد والله انحسب جوز تابو
حـلـف بالله العــزيــز وكتـــابـو
العارضنـي أفــرش لـومـو واتغتـابو
***

وتقعدوا عافية

ناس الخيمة جميع

سلام

عيدكم مبارك و عساكم من عواده
و يعود علينا و عليكم بالصحة و العافية ... و النم البيوزن الرأس
ــــــــــــــــــــــــــــــــــــــــــــــــــ

تقول لى يا ولوف طوّل غيابك
تلاتة شهور تمام معروف حسابك
دحين وكتين حضرت و المولى جابك
أقيف لا تلجلج النوريك حسابك

أقول ليها العتاب لىّ ليه تشنّى
زمانآ ماهو دا غيّك مكنّى
اتركى ها العتاب لى روحى دنّى
براك لى من بنوح دايمآ و اغنّى

تقول لى يا ولوف لى امّى ماشّه
بجيك بسراع وحاتك مانى غاشّه
على الفانوس بشوف دمّاعآ باشّه
أنا الفلاّح و هى أفندينا باشّا


ابقوا عاااااااافية

رفاق الخيمة وأسيادها وزوارها
كل عام وانتم تمام
القابلة على أمنياتكم

سيف كلي
عاااااااااافي منك
كل ثانية وانت طيب
تحياتي

الأحباب الطيبين .. العيد مبارك عليكم وربنا يحقق مرادكم.
العزيز سيف كلي .. سمعت قالوا كنت متحسس شوية، إن شاء الله تكون ملكت الصحة
====
البارح وأول البارح في المنام تخربنا
واقفين ديدبان، جناً كبيـــر راكبنــا
لا في من قريب لا من بجي يطــايــبـنـا
أصبع ضوّة في عين الفـكي الـ بحــجبنا
===

أين أنت يا قيسان؟ الجماعة رحلوا يا زول و ......
جوا في الغُر ضحيوة موتّرين لا شمال
ناطحين البطانة مقفّرين للمال
عنقاناً مساكنهِن لكيب وشُمال
ختّن في فلاة ريل الخلا الهُمّال

وإلى اللقاء في العام القادم .. أكان الله مدّ في العاريّة.

سنجاوي

كل سنة وانت طيب
وكل صحبة الورد

وانتم تشكرونا معكم هذا العالم الجميل

يخليكم يارب
وينعاد عليكم باليمن والبركات

ياناس الخيمة العيدعليكم سعيد
والنسام هب وطرانى ..غزال الصعيد
الزول البريدو .. قاتلنى ليه الريد
مالو ناسينى وما جابو لينا العيد

كل سنة وانتو طيبين يارواد الخيمة الحلويييين


العجلة الرباعية الما شبنك التيران
ودربك حسكنيت ما بقطعو حفيان
بيتك بردعوب فى الوادى ابو دنان
ونفسك مسك جاب المدير غمران

الحبان
هوب فل ، كوستا ، شنتير ، شيـريييييي ، دوما ، أبوقوتا ، أهل العوض ، قيسان ، نزار ، نزار ، مكسب ، ياسر محجوب ، سنتمنتال
كل ثانية وانتم طيبين .. عيد سعيد ، وعمر مديد ، أعاده الله عليكم وعلى أحبابكم باليمن والبركات .. العزابة منكم أسأل الله يرزقهم النصف الحلو ويحلي أيامهم والمتزوجين الله يديم عليهم المحبة والسكن والذرية الصالحة ... آمين يا رب العالمين .

الجـواب كتبتــو وللبنـــات رسلتـــو
بعد يقرنــو جيب لي ردو يا الوصلتــو
جانـي العيــد مـا لقيـت جديد فصلتــــو
من الحـال العلــي اللابسـو ما غسلتـــو
***
شتيلات الروى .. يوت البلل ساقيهن
ديمة منورات ما هـج دورت فيهـــن
آه يــا قلبــي مــن الدرمن حرتيهـــن
زرقن لي نشاشيـبـن طبيب ما ليهــن

***

وإن شاء الله حالكم في العيد أبرك وأخير من حال صاحنبنا ده
وتقعدوا عافية

الزملاء الكرام عمار هذه الخيمة .. كل عام وانتم بخير ... ساعلين منكن .. سنجاوي كتر خيرك والسنة الجاية على امنياتك (على أمنياتي ليك عريس) .. سيف كلي .. والله تطرب الحجر الما فوقو كبدة كلو كلو .. يعلم الله .

تحياتي لباقي الجنيات .. قيسان وشيخ العرب والجعلي نزار .. الذي قطع البحر ..وسوى مشهادو بين أضنين العنافي

وكتن كان قريب وكل الخلوق ليك تطرا
والري فوقك المصبوب قهارة الخترة
عندك طبعة يومن تطرى هيلك شكرة
زي صفق الأراك .. الشم ريحة النترة

آ ناس .. الطشاش يصيب العدو الموصليح ..
مكسب .. دوما .. كوستا .. أبوقوتة .. شيري .. دورنقاس .. سنتي منتال .. العيد مبارك عليكم . القابلة كلكن عرسان ..

الأخ أهل العوض .. مودتي لك موصولة .. عادين نفسنا حيران في مسيدتكم العامر
الأخ شنتير .. يسعل منك الخير ويديك الفي مرادك

مــن رشـــاشـــاً بالبطانــة اتهــــــوّن
وقفـن فـوق علـــو ومن الأنيس إتحوّن
وا أسفــايــا مـن الكــل يــــوم بتلــوّن
شهـــدان موســي من فرو المنازل ضوّن
***
المـلـك المـمـلـك من جدود حبـابــو
سلطان مصر والسودان بتتنبابــــو
سبعـة دول منفـتــنـــة في أسبـابــو
والعلم أب هــلال منصوب على سن بابو
****
أصبــح يـا نــديم تـاجـراً مــراكبــك غِـرقـن
عــوضــك الإلـــه زولــن مجالسو يشـرقـن
كشمــت فاطر البـرق أب سحابــا زرقــــن
غيــر مكتــب فــؤاد عندي الدفاتر حرقــــن
****


خلينــا البيـــوت وهجـرنا وادي الفطـــرة
قـاصـدين النزول في دار صبـــاح البكرة
من يــوم صرنـــا عـادمين الملاح والكسرة
عبيــنـا اللـواري الليــلة يــوم الهجرة
***وتقعدوا عافية

السلام جاكم أهل الخيمة عموم..
وكل سنة وانتو طيبين ..
وربنا يجيب العاقبة خير..

والتحية لي كل الذين مروا من هنا ..

-------
سيف كلي ..
ها زول ما شاء الله عليك ..ساند الخيمة ..الله يديك العافية..

اقعدوا عافية
قيسان

اهل الخيمه جاكم سلام كيفن حال عربانكن................

راقيه دارسه بطون الكتب يا زهره النرجاس
يابت ناظر القبيله الحاشيته ماسكه الترباس
تضرب بفت اشاره منه ماهه عايزه الحقاره خلاص
يا نواره الفريق ويا لحم المراقد موه فشفاش

يوم قدلت العصير متل جني حمام الوز
بين بيتهم وبيتنا تترنح ولليدين بتهز
متل ريم الخلا جفال لو صفقتالو بيفز

الجاهله يادابا صغير ناقص سته من عشرين
رمت الطرحه ووضع يديه في النهود ما تبين

امك بتقول الرزينه وخالتك بتقول الرزينه
وانا بنقول الرزينه وجهك صؤه يضفئ الرتينه

خالتك بتقول الرزم وانا ذاتي بنقول الرزم
وكل الناس بتقول الرزم يا فتيل الريحه ينشم

لو محظوظ في الدنيا وعمري ما اندم
اضمك في صدري وبي عسل اللهيج تتكلم

حلات كلامك والنونه في وجينك لامن اقضم
يا بت ملوك العز علي حالي شويه ارحم

هي صغيره ومتين الجمال كبرتلو
حجل الميه تمشيبو وتواقع رتله
الخلاني ليل ونهار عيوني تسرحبو
دا ناعم جليده من دون دهن تمسحبو

صديره زي كرسي المدير الجلوسو مرتاح
دا لمن تتوهضبو لغو الكلام فيه مباح
مسكه خصره بقبضه يد يتمايل وينداح

فراسـنا استعــدوا الكابتـن أدى ســلام
المزيق ضرب .. خبت البروجي تمام
ما شُــف يا نديم نايح الطفلة إن حــام
شيـشكـم يا بواشــات خففوا الأحكــام
***
الليلــة الدبـاســة علــى الدجيـج والــدي
تقـول فارسـة حريمـاً باتعـة في الحنضي
بجض السير على أم شلاخ سمحة الــزي
سابل ديسها .. راسي حديثها .. مو تقـزي


***
وتقعدوا عافية

نـمـي أنا لأم خــدود سـاكـت بقـالـي وجعـة
عشـان كـل يــوم راميـنــي بعـد الهـجعــــة
شــن أنــا المــن بـــدري عـــبّ النجـعـــــة
أحـاكــي الطــايــف الفوق فرعو ياخد سجعة

***
وتقعدوا عافية

سلام عروب سلام

جميع اهل الخيمة تحياتى و سلامى


فكرى انا يا زميل يوم الاحد مو رايق
سفر اصلو بى المخصوص خطر مو لايق
قلبى مكجنو و من قام معفرت و ضايق
من دامر حمد لى الداخله سته دقايق

من الداخله اتوجه على دار مالى
ادوهو الاشارة اخد الامر طوالى
سواقو انسطل من السفر مو مبالى
علم القوز بدا بربر بقت فى بالى

السدر البخيت لا زال هو في تحسين
دنده شـال ثمارتو العنب والتيـن
يتباشـرن حـور الجنـان والعـين
كركون إن رطـن بالعسكي والقربين


***
وتقعدوا عافية

ناس الخيمة سلام

و يا سيف كلى الظاهر النمّ بقى بينى و بينك ..دحين : سّو !!!


قدمت من هنا بى اضانا سمعت كرّه
فوق كرتوت شخيتيرآ تخين خرّ
قلاّتو الوهاط بى لشغه قبلو محرّه
يا باسط النعم ما تلقى فيهو مضرّه

أخوي كوستا .. تسلم إن شاء من كل أذية .. وأرجو المواصلة في الكلام السمح ده والأخوان أكيد مع مشاغل الغربة كسلوا شوية .. وسوووووووو نميمك يا أخي .. نحن أصلنا مدمنين

سـام الحفلـة الفيـهــو أتـبـختـرتـي
يا ندفـة بنـي بشـرى التقودي الحرتي
تسجلي في القرارات والبقية أسـرتي
خافي الله في الناس المساكين جورتي



***
وتقعدوا عافية

Quote: يا نواره الفريق ويا لحم المراقد موه فشفاش.حجل الميه تمشيبو وتواقع رتله

لا حوله ولا قوله الا بالله العلي العظيم شفتو بلاغه الناس دي كيف والله يا محمد ادم حديثك بديع

السلام جاكم اهل الخيمة
وسلام خاص لكوستا وسيف كلي

-----

الليلة هبوب أهلي ملت علي نَفَسي
ومن رطني الضناقلة واكتير هوسي
فارقتا الحُوار الفي الشَبك رفسي
فارقتا الخَلفة المسارى والجمل رَادِي
***

شغبة ما تلوموها في كلام الحر
وُطارياهُن عكاكيز البحر والبر
أولاد أب زُمام البركبو اللشقر
الناس من خيالاتُن جميع تَنصَر
***

حليل البنزلو جيهة حدب ام قِضيضيمة
وحليل الجاهلُن ما بدورلو تعليمة
حليل البقطعوا الشك في العزيمة
وأهلي المُرغُماب يا دوبة ليهُن ديمة

وتقعدوا عافية
قيسان

طريفي أمّات حقيبة الـ بالضهور لـفّاف
رقيقاً غَرْدو جايِل مو بدين نـفّاف
على أم ظَرْفاً بياخد الكَبدة والرفّاف
خويرات السليم جاهِن كفوفو خفـــــاف
===
يا فارِط جُـمال الميس بعد تتعارك
سُرْعَك صيحة الكرْسة ووهيـــط تَتوارَك
يا عفريت سليمان الـ ضرب صُـفّارك
على سيدة بنات آدم مغيت ترّارك

And ......... belated Happy Bedouin Valentine Siesta

والمجد لذات الأخفاف

شيخ العرب ... حمدلة على السلامة ... والله حقك الضبيحة حرّم
أها ... استمتع بي غفوتك وفوق فالنتاينك .. الله يعدل عليك ، وكب لين معاك

ها جنيات ماكن طيبين...والقابلة علي امانيكم
والعيد مبارك علينا وعليكم...اعفوا مننا وعافين منكم


اهل العوض...ات كت حاج واللا مالك اختفيت
الصديق...اها سيستتك كيف...مقيل خلا واللا كتر

سيف كلي...ود الملوك التماسيح...طاب حالك...وحمدالله سلامة حسنة واجر ان شاء الله....

سنجاوي كوستا وقيسان وباقي الجنيات...ومبدعتنا شيري كلكم بنسلم عليكم سلام فيه شوق شديد...ومحبة صادقة يحفظكم ربي والرسول سيدي


ولامن اجيكم بي غنا...هسع ما بقدر اتخترا الابيات المبروزة الجاية دي

تخرب خرابا آ ودشنتير آ زول الشي ات ماك نصيح كلو كلو



يا فارِط جُـمال الميس بعد تتعــارك
سُرْعَك صيحة الكرْسة ووهيـــط تَتوارَك
يا عفريت سليمان الـ ضرب صُـــفّارك
على سيدة بنـات آدم مغـــيت ترّارك

قال عفريت من الجن
ده بيصل قبل رمشة العين...
واسرع من كدي في دنيانا دي مافي لا صوت لا برق لا جن

ومو دايرلو حوية...

ها ناس دا كلام شنو!!! جن واللا نصاح

سلام عليكم ياجنوي والله حديثكم سمح بالحيل يا شيخ العرب دحين الشئ سيستاولا نومه اهل الكهف يازول علك طيب ؟؟؟

لكم الشكر يا احلى ناس.....فوق
_____


أتق الله حيث ما كنت واتبع السيئة الحسنة تمحها وخالق الناس بخلق حسن

نزلوا في البابنوتة وربّحوا الوُراد
وكربوا غُردة السابل علي الشَرّاد
عيال البيبشاب البمِدوا الزاد
بكريهُن علي صف الدرق بنقاد
------------
مرحبتين حباب شانتير ..وأهل العوض ..

أقعدوا عافية
قيسان

من قديم يا شنتير


غردتو تجـــول لا صرتو
شال بهم ام خدود في فرّتو

بعدل عوجة الدرب بي ترّتو
وينقض مسيرة الراس بي حرتو



ومن تلفونك هاك


عين الفرقة دمعك وشّلي واســخـلو
حاكي الوابل اللافي النهار بي ليلو

بعد رحل العشاري وقلبي حاربو دليلو
سهرك لازمــك نايح الســـقد آنسـيلو

أبا يارا ... العائد لتوه من علامات التعجب ... ياخ والله ماجوديين بي كترة ... لاكين النفس ... أمست حزينة وعامدة .. وما بتتسلى بي برقع حميدة وحامدة ... فارقنا الرباعة أبان قلوبن جامدة .. قلت لي الجن .. كدي شوف المربع دا ... عن الصديق يرويه عن عمه المغترب في بلد اليانكي :

جفيل البل علي المطر الـ وقع في رشاشو
وحن القمري لفريخاتو في عشاشو
حنين الغربوهن وفي المنافي بشاشو
عندى,وشاهدي ها الدمع النزل بشاشو

نتابع الناس ديل عليك أمان الله قلبنا دا زاااااتو ما نلقاه .. ما سمعت الراجل قال .. اتب من نومي واتلافى الهبوب ... أختاها !!

أهل العوض .. وأهالي العوض .. سلووووووم
العم المغترب في بلاد اليانكي فاضت عيناه دمعاً سخيناً مع أمطار أريزونا و"تكيك" رعودها. لقد بكى فأبكى

أرعدي كان بترعدي يا مطور الخير
بشوف سِحْبك مَرَدَّم فوق جُبالك دير
طريت أهلي البريتّن ما بريد الـ غير
حليل جهلي وزماناً بَضحك القُرقير

إنت حجيت مع بدر الدين شنا وللا خبارك مختفي؟

اهل العوض والصديق..



حبابكم عشرة...

والله فعلا يا اهل العوض جيت راجع وخليت علي قفاي علامات تعجب
توسم الجواميس لا حدهن...ها زول الشي البلد بقت ما بتتصاقر تب

والله بعد دا كلنا الا نقرجن ونبكي...

والعم الله يصبروا ويصبرنا معاه


بت اليا زمان نطحت فيافي وصي
يجادعن بالبغو قش البطانة الني
دغسات العيون الما بيرد الحي
لي ليمك شحت ربي ورفعت ايدي

ياخوانا أنا حجيت عمنول (عاما أول) ... السنة دي خليناه لي ناس بدر الدين .. ناس الأقاليم

أرجوك يا نسيم يوماتي أبقى بريدا
كل ما تمشي جيب لي من خبارا جريدة
السبب المخلي أفكاري ديمة شريدة
قلبي بحن إلى أرض الحجاز وبريدا

أرض الحجاز أنثى من سيدات المجتمع السوداني

الكتراااااابه الـــ.. انتو يا عربان من تانى اتلميتو للغناء الطاعم ...

بس النجيب مخلاتى ونجيكم

ألَماَ في فؤادي مطوّل
يمسي شمال، ويصبح باليمين متحوّل
قول يا نوح، وِطِيت العقرب الـ بتشوِّل
من سَخَلة مِعيز قِمِش الـ جَمالها يهوّل

سنتي منتي .. ألحق المخلاية الحمار ما يمعطها

أهل الخيمة الكرام ...

سلام كتير ...

والله جيت حايم بي جاي وبردان أصلها اليومين ديل جابتلها برداً عجيب زيو ما شفنا حتى في أيام الشتا العديل.

ريحة البن ساقتني ليكم ...

دخلت لقيت ليك خيمتكم دافيه والجبنة حاره ،،، كدي أدوني فنجان أدفي بيه جوفي وسمعوني مسدار يرد لي روحي ،،،

ويا ود كلي كيف حالك وحمداً لله على السلامة ،،، دائماً متابع أخبارك من الأخوان وما يكتب في المنبر،،، بس أنت ديمه بعيد وناسي،،،

برجع ليكم مره تانية لأنعم بالدفئ في ضل الخيمة الجميلة والتي قد تعد من أجمل واحات المنبر التي نلجأ إليها كل مرة بعد أن تتعب أرجلنا من الحوامة فوق البوستات،،،

بالله حافظوا عليها فوق وما تخلوها تغطس وتروح ...

راجع ليكم ،،،
...

اهل الخيمة عموم ..
سلااااااام عليكم
------
طِريت البِركبوا التيس البُشاري
وطِريت الكمشوا الخَلفة المِساري
حليلُن وكتين يلفحوا التوب العُشاري
حليلُن الفي الكِتال حاكوا الهِلالي

** نذار ..سلامة الوصول ..ومتابع علامات التعجب الخليتا فوق قفاك دي ..وبالحيييييل
متمحِّن ..وبس ربك يجيب العاقبة خير ..

أقعدوا عافية
قيسان

سلام عروب .. سلام
بركة إنلميتوا تاني .. ونزار حمد لله على سلامة الطلة .. وإن شاء الله الخيمة بيكم تعمر كمان وكمان

بدور ألبل بدور مرحالنا بـلَّـج
بدور الشرفهـّـن متل الهجلـج
بدور عيش الشبيك لوما قالوا علّج
بــدور الحرمشــو الإنقيـب وسلّـج
***
بـدور ألبــل بـدور بُكـراً سمايـح
بــدور الضنقلي المربوط وصايح
بدور بــت الرجـال تامة القرايـح
بدور يوم الكتــال عند المنايـح
***
بــدور الأصهب البى تنيتـو شارد
بدور الضنقلي البى فريخو وارد
بدور الرخرخ الشلاخو عــارض
بدور يوم الكتال .. الهولي بارد

السنجك الشايقي .. ( الحسن صاقعة النجم) والله وحات خوتك ماني ناسي .. لكن ترانا في وسط الشيمة اللواية الاسمها الغربة دي
أن أصبح بقول يا ربي فرج همي
وإن أمسيت بجر في قصايدي ونمي
الهالكني وداير يضيّع دمــي
مشتول ناس هناااااي الفي جزايرو مرمي
***
وتقعدوا عافية

نزااااااار ... حمد الله على السلامة
شنتيييير ... بركة الشوفة والطلة .. مالك مجافي الناس .. لابد ليك في المسنجر زمن
كوستا ... لك العتبى حتى ترضى
سنتمنتال ... انت عرقوب بقرب ليك ولا حاجة .. الجنى سيد المثل داااك
وهاكم بكية سنجاوية قدييييمة

الليلة الغـرام حـكـم عـلي سلطـانـو
ذكرنـي الحبيب وشواني بـي نـيرانـو
وين الشـال قليبي وساقنـي في حيرانو
وا شـوقي الشديد لي ضمتو وهمسانـو
مجـبور القـدر حتم عـلي هجـرانـو

الليل الطويل زاد الفـراق تـعذيـبـو
وجمر الشـوق يحرّق في حشاي لهيبو
وين الشال قليبي وخلـى عنـدي قليبو
ما بنسى إن نسيت ليلة فراقنا نحيبـو
معليش يام خدود الحر بيرضى نصيبو

سنجه

وكل ناس الخيمة الحلوين


سلام عروب سلام



فى ظل القدير الكلعلم بنشاف
الكهرب سطع نورو و ضرب كشّاف
حلاة لهج الظريف اللافح الشفّاف
قنديلة و منزّع غبته لى الرشاف

سلام عروب .. سلام
إستـأذن وقــف .. عزيزي نقّـر بابي
زي ساعلــن قديم بتنابحن كــلابــي
عند بهم الخزين أنا ما قريتـاجوابي
ربي العودة لى ناساً بعـزُّوا جنابـي



وتقعدوا عافية

شنتير..جراب النم...سيف كلي ودالتماسيح...اهلي اهل العوض...سنجاوي اب نضما يداوي...كوستا الفهيم...قيسان.. واهل الخيمة واسيادها
كلكم بلا فرز...طاب معناكم...واريت حالكم زين.................

اها بسم الله نبدا المجادعه


سكران النقيب حكمت معانا الفتقه
ابرك يا سمع رعد ام عتيم الاتقة
علي دور الفلير دموره عاتق عتقه
جبدك للزمام نتيل رباب مو نتقه


اها هاكم الهجيمة دي

هجين الجرحو فتقنو البروق بي دعاشن
طفّر منعقـــل عارفني ليــه مخاشن

علي ست الجمال الحادق المو داشن
لوبع والجوالس رحّلن بي فراشهن

سلام مربع .. ومتقايس

قطع وادي العشر تيس العُلو أب سيقان
قبــض السكة واتقيقم رمــى الفــدان
نيتـو يماسـي حورية جنان رضـوان
عندهـا لينـا عظمـة وشندقوقة وشـان


وتقعدوا عافية

سلام مربع ..

الليلة البلد أصبح معاي متقفل
كل ما أقوم صعيد بلقى روحي مسفل
عيني سنقدن والنوم بقالــى تجِفِــل
الميزانو بعد الرحجة جابلو تِنِفِــل


وتقعدوا عافية

up

Quote: هجين الجرحو فتقنّو البروق بي دعاشن طفّر منعقـــل عارفني ليــه مخاشن علي ست الجمال الحادق المو داشن لوبع والجوالس رحّلن بي فراشهن

دي يا نزار أكبر من هجيمة ... وروروروووك ... لوبع والجوالس رحّلن بفراشِن. التكسر غاربك يا هجين الجرحو فتقنّو البروق بدعاشن

يا ود شنتير...هاك الورورووووووووك دي

الضير اللسان سوط العنج مو قالسو
فات نص المسافة وسرجو فكّ جوالسو
ناطحبي الغرامو فؤادي حسسه مسالسو
نفسو عفيفة مو مداين السعوب ومخالسو

وروروررووووووووك يا نزووور. ده كلام غلاااااااد خلاس .. ووهيـــط يعدل ميزان القلب.

يا سيف كلي .. كلام اللحويين ده جبتو من وين؟
بدور ألبل بدور ننزل قبلنا
بدور الـ تعّـلن ليهن زَقَنـّة

هات الباقي بالله
======
ود الحوري شاف قلع النواصل جرّف
السوط منّو زي عادي المحيرة اتغرّف
يا ود العنانيف أب قفاياً سرّف
وااااا سهرك على الـ لفسلْنا ما بتحرّف

عقاد شاية يا الهضليم زوالن باين
من زمن البلام انت الشروف دنّاين
اللحمتنا لي شيبنا وشرفنا نعاين
انفها سيف,تسلب الضيف,خدوده رتاين

همباي مرتع القود واللرايل النفّر
طلعا وفاتا هضليم النعايم الطفّر
ناطح المنو سهران والضماير جفّر
فايز بي زكا وتيبان حشمتو الوفّر


يا ودشنتيييير همباي دي دحين سدر فوكا هي بين بعلوك وام شديدة

بعلوك الملوك قضّينا في اسبوعين
في فايق احترام .. لكن مساهرة العين
وهـــــكذا
=====
البلد الـ اسودو بتبلعك متعارض
شقّاه أب شنب فوق الـ بِزيم وبطارد
وهــــكذا
=====
أصبحْ(ت) مِنْكلي وأمسيت منامي محجّر
بدور الشَّدة فوقو الـ بالزمام بتكجّر
عرباً شاشوا للنشغة وعقيدتن فجّر
يرزم قلبي بدروبهُن عقيرو مهجّر
====
مزاجي معكنن .. أخير أبقى متراوح قبال ما آخد زول بالسليماني الحديدتو نضيفة

شيخنا شنتير .. مودتي لك موصولة ولجميع العربان
كلام اللحوين جبت من الجراب القديم ( وزي ما قالوا الجراب ما بختى من كشكاش..)

الخُمرية في غاية الكدر هي وسيدا
بدُّور أب عَلال الباهتا ما بزيدا
الشاقا المارقدا قوزّن المرميدا
زي البرعي ما بريد الحرم بتريدا
***
مشكورين فيك ولا شلاعة حافظين شأنك
وكان قام سحاب لي أب صوفة ما بنحانك
بى قدرة الله يتملن تبوب قــيزانـــك
يجي وارد معاك ربل التمد في جرانك
***
الخُمرية من طول الحفاير شاكيا
ديمة عليها فوق ايدا العسير متاكيا
قيزان همد العشماني ليهن باكيا
داير الجنة تشرب فيها مويتن زاكيا



وتقعدوا عافية

والله الجنيات ديل نضمو جنس نضمي

وسط هذه المعارك التي تجتاح البورد

ناخدلنا جمة في البكان السمح دا

الله اديكم العافية جت عليكن

الرحمابي حبابك عشرة
لك عاطر التحايا وصادق الود ولرفاق الخيمة

الليلة من الهكعة يتردم سحابك يسوق
يقلب نيلو يتعفرت رعـود وبـروق
صبح سيلو دافق فى الانيس وشقوق
قرن تبابـو لا ميع السرابى الفـوق

أحبابنا أهل الهوى
الشوق والريد
يعاينن توبتي في كامن ضميري ويمحن
الشـاف روعتن ونـور جمالن يمحـن
قلوبا ما انشون بي نار حسارن قمحـن
اللـه يكـبـرن الكبـرنـي وسمحـن

فوق
نتكرف شميم اهلنا
عسى ولعل
الرويحة تترد

سلام لناس الخيمة جت

بالله الرحمابي مر بي هنا؟
وشنتير ونزار وسيف كلي وقيسان وكل هذه الكوكبة ..
أها فوق فنجان هذه الجندرية .. نكرف
ومشهادنا عزيمة الشايقي وكوستا ، والسنجاوي الذي يجرح فينا ويداوي ..

بعيدة بلودك آ المتل المزرقن فمك
وأحلى من الروائح ومن عبيرن شمك
قت لي قلبي ها المجروح بمتّر دمّك
وابشر بي نظرة الشوفتو تفرج همّك

الفرجوني في منافيه الجعيصة والمختارة

اهل العوض والجندرية حبابكم...وبركة الشوفة طيبين هاكم...
...واشاطركما الدعوة لكل احبابنا...ناس النم والدوبيت...
يشربوا معانا قهوتنا هنا...


فارط القود عقيد البي البطانة بشقّن
شاف شباك سراية ام ريد رتاينو يبقّن
الوالاه بي تعبـــا مواقــل ورقّن
لهجا مو مسيـــــخ نغما حلاتا ودقن

بس في ضمة في الشاء والباء والراء والدال في الكلمات الاخيرة عليكم الله افكروا لها

بجيكم صادي باكر...الهلال...كان طلع

امطرتنــــي في المقل....
بعثرتني في المزيد من الصـــور...
اسكنتني لونها..بادلتني قلبي المملوء فيها فانتشر...
واعدتني بالندى ...واختلتني وحدها....
فانتشتني في لغات لاتذاع ولا تســــــر...
كيفما شاءت تغازلني بها عيناي..
شئت او لاشئت يردعني .....البصـــــــــــر...
من وعدها روحا تمازجها دمـــــــــــاي...
اينما شاءت نزيفا تستقــــــــــــــــر...
فهي ذات الروح تحمل ياسمين الحرف قبلة.....
وهي ذات الروح تحمل احتراق الشوق طفلة.....
واحتمال البعد انفاس وقمر..فلربما سفر يجئ ولا سفر..
ولربما قد تصبح الاحزان....صانعة الوجود المنتظــر..
ولربما في اخر النبضات في ذات الحريق المحتضــــر...
برية العينيـــــــن....تخفى وتستتــــر...
لكنني في صوتها ...في صمتها... في نبضها...
احببتها موتا وعشقا للمطــــــــــر........
فالتهطل الكلمات .. من رهف الشفاة .. للموت عشقا للحياة...
وعدا لدى تلك الفتاة ........موتا اسميـــه المطــــــر...
عشقــــــــــا كما شائت هى..............

او شاءت الاقـــــــــــــدار..............



الحردلـــــــــــــــو

لكم الود

نـــــــــــــوف

حباب أهل خيمة الحاردلو وسلام من الحشا معجن والله جابتني النمة وناركم المولعة دي . كدي ناولوني لي براد شاهي وخلوني نجــر النم.

نظراتك علينا قسن
وفاطرك كيف بريق القبلي ذادنا شجن
ست السابل الكيف الزقي جنبن
وريدك من مطارح الســر بقالي علن
جلدك خلقت التلج ومناصح الشـن
كيف لون الفروع الجنجـنن وحنن


شـــبة العوكلة وفـــز
حـالي لهيجها من طعم الفواكة ألز
قلبي عليك بالغ في غرامة أشذ
غالية عليّ أكتر من عيوني أعز


بحيراوي

ها دي الخاسَة جاتك يا مَأصَّل جارّة
واغل الـ فقدو قرّشْني الحَناضْل المارّة
مِدَادات الدوايات من مَحاجْمَك خارّة
لـ شوف ملكة الدنيا أم عساكْراً فارّة
---

أيديك خِفّهن قبل الشمش ما تطيح
محاجْمك خَسَّرَن عاج الرسن بالقيح
يقِّن وسوّي "فورفورت" النصارى صحيح
واتواقد متل نار الغَباش في الريح

النم فوق البل سمح خلاص يا ود شنتير


يا تيس رزمــي المزرقــن راعدو الواء <ه>
خشبك دقة من ذورك جناحــك باعدو
سيدك كان يتم املو وظروفو تساعدو
عازم بكره حوّال ام شديده يواعدو




ود العانس التحويرو سمّـــح صورتــو
شدّيتو ونشـــق طوفو وحــدر مخلـوفتو
قصدي الليله دهب البرته اشوف منسوفتو
قبّال فوقنا صقـــط المصري تقرن فوفتو

نفحات من شمال دارفور. الزياديه
عنز ام شومراب الوضيب تلاكي
العتليب قطع قيدوه بي هاني مالاقاكي
قالتلو كدم في السرحه ديك مناكي
وعان السانيه فاطرا تقول تمباكي

تحكي هذه الابيات عن شخص يبحث عن جحش له( عتليب) فوجد بنت حسناء جميله فسالها عن عتليبه اذا ما هي راته في اثناء سيرها! فردت عليه بانها راته ياكل من شجره السرح قبل قليل ثم غادرها متوجها نحو السانيه(بئر عميقه جدا) وتظهر اسنانه(فاطره) مثل اسنان اكل التمباك من شده السواد.

ام شومراب: الغزال
الوضيب: الشعر الكثيف
العتليب: الجحش
كدم: قرض. اكل
السرحه: شجره لاشوك لها واشبه باشجار السافنا الفقيره
وتتواجد بكثره في شمال دارفور
السانيه:يئر عنيقه

الحاردلو قال:
البارح انا وقصبة مدالق السيل
فى ونسه وضحك لامن قسمنا الليل
وكت النعام اتشنكتنبوا الخيل
لاجادت لا بخلت على بلحيـــــل

النعام والخيل من منازل النجوم عند العرب ،وهن النجمات التى يبقن مع القمر حتى قريب مطلع الفجر.
فالحاردلو وصف هذه الملهمة بالقصبة التى تنمو على مجرى السيل حيث الماء الوفير والطمى فتكون القصبه اكثر اخضرارا وتكون متينه ورويانه،كما وصف الجزء الاول من الليل الذى قضاه فى ونسه وضحك،ولكن قبيل شروق الشمس وعندما طاردت النجوم بعضها وهى فى طريقها للافول قال لا جادت ولا بخلت على بلحيل تلك القصبه التريانه،وترك الحاردلو الناس فى هذا الطوربيد يميلون حيث يهوى،وكل يتخيل ما حدث فى تلك الليله المستفزه......

البارح طريتك وما طريتيني
كوني انا عند ابوك بعتي وشريتيني

اليوم يا رداد روحي ان جفيتيني
دربا جابني ليك تاني بيوديني

عبلوجة الدرو الهبالها شاتيها
ام صمدا نشيط بالموية راويها
اكلي واشربي دي الدني شن فيها
كم وـــلّت رجال رمّت طواقيها

البارح بعد ناس الفريق ما هجعوا

عقبان صادنى طاعونى المنوسر وجعوا

يا ابو الحاج اخوى مزازات العريب النجعوا

ما ببقولنا متل القدمونا ورجعوا


............


والله ما ببقولنا متل القدمونا ورجعوا والا رايكم شنو يا جنيات

البارح جلس فوق الفراش الماهل
مهتم شايفو بي نزول اب قفايا باهل

كفّيت بصري قت لي قلبي خليك ماهل
يهوداك خلّ عقلك صبرو زي الجاهل

يا صديق الموج البارح دي ما بنحليها الا تنقلب باكر

وين هنده القبيل ما جابت قبيح جيرانه

وين هنده القبيل ناوى الظلم سلطانه

ساعة الوقفه عندهن رجحت برزانه

وينا الخفيف نومه وتقيل ميزانه

البارح سمع ساجع القماري النوّح
اتذكر زمن جهلي و شبابي الروّح
بقين دورا ستاتي العطارهن فوّح
لقن ايامي و ايامهن مطرهن شوّح

البارح كلام الناس بدور يفرقنا
كلو طلع كضب عقبان حلينا ورقنا
الخضرة ام شلوخا ستة مالكة عشقنا
تتمايل تقول قصبة مدالق الحقنة


يلا يا اهل البارح...صديق الموج ابرجنا...والعجب ودشنتير والله اتلقي عندو بارحات.... مبرحة...اهل العوض حبابك...مالك سرح من الونسة..تحياتنا يا صاحبي...

البارح .. البارح .. البارح. والله ما عارف اي حاجة . لخبطوا كياننا الصهيوني هؤلاء الناس الـ مش عارف أصفهم بشنو. البورد ده بيحيب المرض ... عشان كده أنا بزورو كل يومين مرة واحدة .. ومرات مرة واحدة في تلاتة ايام. وما بزورو إلا عشان أعرف حاجات معينة .. ما بتزيد ليها من أربعة أو خمسة.
البارح

البارح مع ساجع القماري بقوقي
خليت قلبي في الليد الـ ورا الباهوقي
الباقي ودروهو الحيوانات

البارح رقادنا كسيدة فوكّا بريش
رويكيبةً تجيب سقطاً معاه رشيش
الخلاني ما أشهّل جمال العيش
هنيهيداً بسوّنّو الدُغش بيــشيـــــــــــش

مع السلامة

البارح فوق حدب الصعيد قفينا

شايلين اب عشرة مالانت جرايد ايدينا

اما جبنا مالا فرح الراجينا

واما خوجلن فينا الصقور ما جينا

البارح صبيب برق السواري قبلهن
صقطو الجابو موجات القلب حولهن
الإتسربقن قبل السبية قبلهن
سفكن دمنا وجرًح ضميرنا شللهن

نزووور .. وي حبابووو .. الونسة خيتا انقطع ، تاني وحاتك إلا من البيت ، تحياتنا للمعاك .. قلعنا البتاع من شنشونو .

اها دي بارحتي

البارح بعد قدّم مرادي وقمت منّها قادم
حسّيت قلبي راحل وساس بناي متهادم
وصف الفي الجلوس تحلي وتروق وتنادم
الديس كابي والدوف للحقايب رادم


ابرحكم تاني والله كفاكم يا اهل العوض وشنتير وصديق الموج...

ابرحوا ابرحوا...البارحات الندمانين عليها كتيييييييييرة

نزار وباقى العروب...سلام،

كان عندى خالن لى توفى وهو ابن ستاشر سنه وكان يعانى من داء الازمة

وهو رجل عاشق وحبوبتى كانت وكت تطراه تقول الله يرحمه العقيد كتلوا

(العوشق).

وفى واحده من ازماته جن بنيات وهو كان ممكون وعينه بى دمعته لما

سمع صوت البنيات ماشات عليه والدنيا ليل عمل نائم عشان خجلان من

الدموع،قامن دنقرن فوقوا واتحمدلن السلامة ومرقن..وبينهن واحده من

الملهمات..قامت خالتنا بعد مرقن قالت.تب عليكن هسع جيتن تشوفنوا

والله جيتن تزيدن مرضوا.قام هو قال:

البارح جن من بعيد حسيت فرزت حسوسن

جلسن يطربن كل الحزين بى انوسن

تب الببغضن وبى عين حساده يدوسن

بتأمل رضاهن وبتفكر الفى خسوسن

نزار ...والله ياشافع احى انا من البارحات ديل !!!!!

دي البارحة التانية لي خالك يا صديق الموج... نجر اخّدر


البارح دموع عينيّ يصبن شوووو سباليق
طاريات العشوق..طبع الجدي النافر المخاليق

وقت حسيت..دعاش حسّو..ومناجاة القماري مع البطاريق
تبيت ..روحي ردت..لي نصاحها ...نعلت ابليس العواليق

وما زلت مع خالى يا نزار..لمن جن شافنوا البنيات قامت

واحده فيهن قالت دقر يا عين بكره يطيب ويقوم يمشى على مدرستو.

قام هو قال:

البارح جن من بعيد حسيت فرزت النقره

جلسن شوفتن تغنى وتزيل الفقره

تضحكى يا الحشيمة وتدى عينك دقره

من بعد النميم ماظنى ارجع واقرا

البارح بعد نميت قريت البقرة
شان احوابها مرضا تب حلف ما يبرأ
دقر يا عين سمعتها..علّ جاتني العبرة
طار قلبي فر شركا موالي الهبره

ما بحسب حساب وقتين ضحكت قبالي...
وممكون بي غرامك..لا قلب لا بالي
وقتين الفصول بعدت علي ترحالي
ما مهم بس هواك..لو كان دفرت طبالي

نزار وما زال بارح خالى الله يرحمه يطول..واحده من البنيات قالت:

جاهل وصغير ما قدر المرض قام هو قال:

البارح كبسن فوقى وقالن العقيد الجاهل

وانا خات بالى للدرعه ام وريدا باهل

سمحات وطاعمات لكن الوصول مو ساهل

يا على جنن ولى غرامن ضاهــــل

**على خالى الكبير،،،،

ابرحنا يا شافع،،،

بعد ده البارح بي الجابودي...ودي بتغني فيها انت يا صديق الموج



البارح انا وعلي خالي
سارحين بلا مخالي
لي الملكة الدرة...سيدة ام لهيجا حالي

نزار هاك اخر بارحات خالى وهو فى نفس ذلك المنظر

البارح كبسن فوقى وقالن العقيد بتبكى

وانا خات بالى للمن الصبيط بتكى

برتاح لى ازاهن منو ما بشكى

يا اللكوم عجيوة مساكن مكة

اهل الخيمة كيف حالكم ..
بشوف دارتكم عِمرت ..وغناكم يجيب الضهبان ..
ومِيسكم يا نزار و ود الموج أصبح بعييييد..
دحين هاكم:

من أُم شديدة يا اللصهب نويت مِتصاعد
ضهرك قج وسدرك باب وراسك قاعد
زولي اللصلو من كلام الناس مِتباعد
سِنونو البرق وبرطمو نيل ساحباً راعِد
***
بِريريبة البساتين والعُلو المتسايف
ممطور برقو يلهب همبريب وعسايف
بطارية اليمني ..الضميرك هايف
دغسة وفرَ وشامك خلى نومي جسايف
***
يا ليمون سودري في وصفك نحنا خِدرنا
وقاعدين في الوعِد غيركم شن جابرنا
لا اديتينا شيتاً ساكت جبر خاتِرنا
ولا قنّعتِينا نطير نشوف فِكرنا
***

فُوتكم بي عافية
قيسان

قيسان حبابك...ميسنا جيت عليتو بي نضمك السمح دا...ياهو البجيب الضهبان...

ويا صديق الموج ما قلنا البارحات نقلبها جابودي


البارح في خلانا
سارحين مع هوانا

شن جاب اللوم يا مطيرق الخيدرانه

ناس الخيمة سلام

عاد يا صديق يا اخوي
حبوبتك مي خاتية
يعلم الله خالك دا كتلو ( العوشق )
الله يرحمه ويحسن اليه
لكن ما زول حياة دا

سلام عليكم ..أهل الخيمة جمييع من دون فرز ..
قصيت الصفحة دي من فوق وباريت كلامكم ..لقيت فيهو غُناياً ونماً وقّفني مساااافة ..لاكين كلو في النهاية كيف (مِي كيف حقت السُعال ..كيف حقت المزاج والإنبساط..)

* البلد الـلِِسودو بتبلعك مِتعارض
شقّاه أب شنب فوق الـ بِزيم وبطارد

** بِعدِل عوجة الدرِب بي تَرّتو
وينقض مسيرة الراس بي حِرّتو

**الضير اللسان سوط العنج مو قالسو
فات نص المسافة ..وسرجو فكّ جوالسو

** انفها سيف ،تسلِب الضيف ،خدودا رتاين

*** عرباً شاشوا للنشقة وعقيدتن فجّر

**يقلب نيلو يتعفرت رعـود وبـروق

***قت لي قلبي :ها المجروح بمتّـــــر دمّك

** شاف شُباك سراية ام ريد رتاينو يبُقّن
الوالاه بي تعبـــاً مِواقـِـل ورُقّن
لهجاً مو مسيـــــخ ..نغماً حلاتاً ودُقن
(وأهل العوض كمان مواعدنا بي هلة الشهر ..والله يا اهل العوض أظنك فايق ورايق ..يا زول هو جري الزمن دا بِدينا طريقة نصنقِع للسما؟؟؟)

**واغل الـ فقدو قرّشْني الحَناضْل المارّة
مِدَادات الدوايات من مَحاجْمَك خارّة
لـي شوف ملكة الدنيا أم عساكْراً فارّة

(والله يا شنتير عاد شِن نقول في محاجمو الخارة دي ..؟؟ هلا هلا يا أم عساكراً فارّة.. )

****يا تيس رزمــي المزرقــن راعدو
خشبك دقة ..من ذورك جناحــك باعدو

**عنز ام شومراب الوضيب تلاكي
(نفحة من الزيادية ..أظن يا محمد آدم في كلمات كتيرة مشتركة بين الباديتين الغربية والشرقية ..على اي حال النم دا بذكرني بي نم الكبابيش قريب منو..)

**شدّيتو ونشـــق طُوَفو وحــدّر مخلـُوفتو

** البارح انا وقصبة مدالق السيل
فى ونسه وضحك نامن قسمنا الليل
(قصبة مُدلق السيل دي يا الموج..بتذكرني بي غناياً في بلدنا ديمة يقوقي فوق (بصلة التقنت)..قال اصلو بصلة التقنت دي ما فيها كلام ..وهو زولاً زرّاع بصل "قرّاع وطوريتو فوق كتفو تب "..لاكين قطِع شك القصبة اعز من البصلة..مويتا من سماها عديييل ..ومتعافية بي نسّام الخلا ..والله شنو؟؟)..

***عقبان صادنى طاعونى المِنوسِر وجعوا
......
ما ببقولنا متل القدمونا ورجعوا
(غايتو الله يلزمنا الصبر سااااكت يا ود الموج )..

** مهتم شايفو بي نزول اب قفاياً باهل
كفّيت بصري قُت لي قلبي خليك ماهل
(لاكين يا نزار القلب داير يسمع كلامك؟؟)

* البارح سِمِعْ ساجع القماري النوّح
اتذكرْ زمن جهلي و شبابي الروّح
بقين دورا ستاتي العطارهن فوّح
لقن ايامي و ايامهن مطرهن شوّح
(اهل العوض..لا تعليق من جانبنا..و بس )

أها لحدي هنا ..والباقي بكمّلو المرة الجاية ..فوتكم عافية
قيسان

نزار..قيسان...الجندريه وباقى العروب سلام

كلامكم سمح بلحيل...يتور النفس ويودى الزول بعيد...ملعون ابوالغربة

وداير اخليكم مع خالى..وليس ذلك من باب التمجيد بقدر ماهو من باب

الاعجاب بالعبقرية:

مرة خالنا العقيد عليه الرحمة كانوا زارعين فى جزيرة لنا بها ارض

وكعادة اهلنا عندما يصل الزرع مرحلة معينة يذهب بعضهم لحراسته من

السرقة وللمتابعة.وكان الدور على خالى المذكور وعندما تم حوالى

اسبوعين داخل الجزيره ذهب اليه خالى الاكبر وبعض ابناء عمومته

ليزودوه ببعض الدقيق والسكر والشاى ويقضوا معه جزء من الليل

فبينما هم يتشامرون سالهم عن واحده بعينها كان يكن لها ود كبير

وكانت هى من جميلات القريه ذات شعر لايصدق وجمال حتى عندما كبرت

لم تذهب عنهاتلك اللمحه الجماليه وعندما سال عنها وهم يعرفون ذلك

فقام خالى الكبير قال ليه والله ياعقيد جاتا ملاريا ظعتت الشعر داك

وبقت شينه وضعيفةيعنى لاتاكله لاتديها كلبك.قام هو عمل ليهم الشاى

وجابوا ليهم مر مع انهم احضروا معهم السكر..وقام احدهم ساله وين

السكر قام قال ليهم دفقتوا فى البحر داك الحلو علينا شنو.وحلف ما

ما يشرب السكر الى ان توفاه الله لم يتذوقه . وقال:

من زمنا قريب كاسى الوضيب شاهدتو

لا الطول الشنى لا القصير ختو

كان دار دوام كانت المبوبح ستو

الا من طبع الشتله بتشيل الثمار وتحتو

رحلوا أولاد حَمَد .. الـ للبلد ركّازة
عقبوا اللتبراوي .. ومتوجّهين الـبازة
سِتـــّات اللكيك الـ عُقْلَتِن نَـزّازة
ببكن بالدموع .. من ريرة .. لا المُنْحازة
===============

مالّا تْكِبِّس الساحة وبسيلو ملامة
أخير الخَتْرة يا "البيرق" .. َدرَكّا سلامة
سوق أم قُجّة مو هَرَفي وكضب خَشَّامة
أنا يا الوَزْنة .. يوم ضرب السُّلاح في الهامة
===============

أبكَن يا الـ بقيتن للغبينة مساكِن
عليكَن طال .. ظِبَيْ ناس بت فلانة فَرَاكِن
حسس الديمة قمْحان منّهِن شرَّاكِن
زي ما بْتَرْكُن النار في الحجر .. فِيْ راكِن
=====

هلاتيت كوكتيل كل حجر من جبل .. تنفيس ومحاولة للتحلل من الوخم والوغر .. وعودة للروح .. وربنا يرحم يوسف ود عَبْشِبيش .. والوزنة (وزنو قاسي) ... وعوووووووووك:

نسيمِك يا ام هَبَج شفخانة الـ متألّم
حُقَنِك سيف .. وسَلْفِك راس حصان متكلّم
أكان كتّم سماكي وليلِك أمسى مضلّم
ما بْشُق بيكي طالْب الجامِعة المِتْعلّم

شوف السخرية من طالب الجامعة يا صديق الموج يا شيخ الحكاوي؟

شكيتك شكيتا.......يا ود شنتير...هسع تاني نقول شنو...

وحات نضري ماك نصيح....ام هبج دي دحين عندك هناك ما بتلقاها...

كدي شاقق...اتلقي في...



البن البطقطق وحرّق القاليه
خلّ مزاجي راحل بي جميع ما ليه

مشتول القريرات النتر خوليه
خدّرو طرفي,,شايفو وروحي علقت فيه

أيها الهمباتة الرايقين .. تحياتنا .

لا قاني القُطابي ، وقال حَلَفت قَسَمتَ
طرْ في الجو على سَابع القبايل حُمتَ
رَحلوا ال..بشبعُونِي وبي قفاهُم صُمتَ
فاتُو وماتُو هَجُواتي الكِتالِهُن غَمتَه

الأحباب أهل خيمة الحاردلو السلام عليكم . يعلم الله كلما الزول يغشاكم بي جاي يلقي نمكم المنمق يبرد الحشا .
واليوم أنا جاييكم من دار حمر بي تراث جماعتنا . وإنشاء الله يعجبكم

ومن جراب الهمباتة أو السّراجة المنتشرون في بادية كردفان سوف أديكم شئ من تراث حمر حول ظاهرة الهمباتة وإن كان القانون ينظر لهم كلصوص إبل وقطاع طرق فإن حياة الهمباتة ومعيشتهم ومغامراتهم تحكي لنا صورة حية لحياة الصعاليك وقطاع الطرق في العصر الجاهلي . إذ أن حياة الهمباتو تحتمها الرغبة وهواية تلك الحياة . وكل ذلك مع القوة والشدة والشجاعة الفائقة لتحمل المصاعب.
فالدوبيت للهمباتي رفيق حياة وأنيس وهو عامل نفسي ودافع ومشجع للأمام. والدوبيت هو المرآة التي تعكس حياتهم ومغامراتهم ومعاناتهم وسيرهم وتطلعاتهم وذكر الديار والحنين للأهل والوطن . وقد قال أحمد عدريب
واحدين حرسوا الحلة سوا العبادة بنات
نحن خطرنا فوق قلصاً مصابعة شتات
نديكم كلمة وكلمتين الليلة يا وليدات
أحلي المنقة ولا البوسة في أم عاجات
ولا سوق المداقمات فوق السروج صادرات
يقول البعض حرس الحلة متهكماً علي الزراع في القري وهمهم البنات , لكنة الهمباتي خطر ( والخطرة من المخاطرة وتعني السفر ) سفر المهباتي وهو بلاشك مخاطرة , سافر علي القلص أو القلوص وهي الناقة التي تستعمل للركوب , وتحدث سائلاً أولاد القرية أيهما ألذ فاكهة المنقة أم العيش مع البنات أم سوق الإبل . وسوق الإبل هي مهنتة التي يعتز بها


بحيراوي

سلام ..اهل الخيمة ..

كان أكل البلاد من الشليخ لا تقاتو
إيديك ترزي مِقاولِنو ولِقى السوق فاتو
علي حدق البردرد ولبّدنو أماتو
سوّا خباً وهيط وتِنِهِضن يا حلاتو

**
اللحمر الماريق علُوقو واكلو
والدرب البِهابنو الجُمال شركلو
بِذر الدكة ما بتلملموا ويضحكلو
علي المتبورة ما بِرتالو ينعل شكلو
***

البحيري ..سلامين ..
في نمة من البادية الشرقية "البُطانة" قريبة من نمتك الجبتها من البادية الغربية دي ..بتقول:

واحدين قاعدين في البيوت ما بخترو
من كي وكشف..حال الحريم ما بفترو
أخير أختر براي أسد الرضيمة بنترو
صاحبي إن ضل ما بفشاهو ديمة بسترو

وتقعدوا عافية

قيسان

حباب ناس الخمية جملة وأهلاص أخوي قسيان ومن بطن البطانة جيتنا بي الن السمح. ومن الغرب عندي ليك كلمات.

يا حليل أم خديد... يا خزن الشباك
يا أن بناياً حجر... بيبانة مقفولات
غفرها الديدبان ... ما بطبق الكلمات
شايل قرمصيص ... وظروفها مصريات
شن تشبة ... بلا الجك وعلي الزينات
أدرع من ورا ... والبيضة من عاماك
كفل الما قحم .... البيدي بو حجيلات
نيران أم خديد ... فوق جوفي وقادات
ريقك تقلو... كوباتة مغسولات
هممتيني .. أني شيباتي جن طاقات
هم الباشروة.. بالعدمة والإهلاك
هم أم الفريد .. العرسولة ومات



بحيراوي

نم غُناي الليلة الفروج ابو دريقات
واسع سدرو ومن قدام إيدي فاجات
خيل الكورة رقدن منو ماكدانات
بمجِّد سيدو في الحنجور وفي مطيرقات
****
البحيراوي.. سلام عليك..
فلتواصل في هذا النم من تلك الجهة ..
وهاك برضو فوق ألبل ومن بادية الكبابيش :

عراقيبك حنايا وجِنقهِن مِنذَر
وّحدو ما تشوف زول قدامو منوإنصر
هسع يالعيدر البشبه حمام البر
دخلت ضل اب خيشة البضاري الحر
****

اقعد والمعاك بي عافيتكم
قيسان

اها يا قيسان هاك في ألبل


فات العقده جاري اب محجما بكّاي
قصد سمحو ومصع ربد الخلا العنّاي
ريق الفاها مزر الهاطل السرّاي
عنكوليب حلاتو بتشرق النقّاي

وانا عارف الشرح بيخرب المعني يا اهل العوض لكن مطلوب مني اشرح شو اسوي

العقده او العقد هي منطقة...المحجم البكاي ...لوصف ما يصب من دومة الابل واهي اعلي الرأس...مافي حاجة بتصب زي الحبر الاسود بس تراها..
ربد الخلا هو : الاربد هو اللون ما بين الابيض والرمادي... وهو هنا يقصد ذكر النعام...وهو سريع وقوي .... العناي يعني السريع..

مزر : دي السحاب الابيض: العنكوليب : اظنه معروف: قصب سكري المذاق
اها ربطوهن مع بعض بتلقوا المعني

دفعا لهذا البوست الى الصفحة الاولى وسأعود لاحقا ان شاء المولى

_____



أتق الله حيث ما كنت واتبع السيئة الحسنة تمحها وخالق الناس بخلق حسن

سلام علي العروب محل ما يقبلوا ويتلاقوا

البارح في المنام يا عيني شن أريتي
ساهرتي بي قبل الحمار حسيتي
من المجيقيف يا نفسي ما إستغنيتي
أبو لهيجاً مدنكس من بلودا جليتي



أبوك تيس العشانيق القفاة محني
بكرة نمسكا النعناع دريب أم كنة
طوطح راسه فلاتي رطن كي ونه


أنا بريدك بريد جيرتك
بريد اليوانسني يجيب لي سيرتك
أسمح من حلاوة ريا فوق تصويرتك
لي مكرب الحزامه واردة ضفيرتك

بحيراوي

روى استاذي الجليل المرحوم حسان أبو عاقلة أبو سن .. عن سندنا الروحي محمد ود ابراهيم ود السمّيري الفادني سليل العترة الصالحة .. عترة أب ناجْمة .. مسداراً تواضعوا على تسميته بالأفرنجي .. وإليكم بعض من نظم ود السمّيري يا أهل العوض ويا نزار ود حسين .. وكل الأحباب .. أهل المغنى:
من الافرنجي شدّيتو المغارب
وشيك في خبّو لــ يمناي ضارب
دريبات الحِلل جاهن هضارِب
و لا ام شدرات مكوزر بيّ قارب
***
وعرات الرهد بـــ فوق براهن
بيوت البابنوس .. الهجعة جاهِن
ارح للـ في الضلام يلهج ضياهن
تذوب أفكاري عند ساعة طُراهن
***
نطح وعر الحجير يجريبي عاني
وقاطع الشك عليك .. فرقو بتداني
عجّل بيْ على أب طعناً شقاني
وداخرك لـ شيومهن من زماني
***
مناسمك زرْق متل كحْل السراري
خبيبك فاق على مطر الضهاري
أرح للـ غيّهن زلّل فِكاري
عليك اتفاسحن .. يا ذا الفقاري

وفي الحلقة الاخرى قد نطربق .. أكان المولى حلّ القيد وراد الشوف

والله يا ود شنتير طربقتك ما بتنعقب تب...وحالك دا...مطرّف هنااااااااااك....اتلقي الرادي زاتو ما بشتغل بالعربي...

الشي الكلام دا بتجيبو من وين....




هممم

يـا الهرع الجفيلك طبعه ماك مسيوق
برّد..ديك جنينة الشيخ وحوش السوق
هجيم دكة ابطعـــم الفواطره بروق
خلّ زراق قفـــاك فوق محـردك مدفوق

يا نزار .. التعليق على درر شيخنا تتعدى درجة الكراهة المغلظة إلى الحرمة .. لاكين ، برضو أنا شختيا ما لي كتير في الجابودي والجراري وما شابه .. نحن ناس المربعات العدااااال ديلك .. من قبيل

أمك حاكر العجمي وحسب لا اسبوعا
لامن نطت التسعة الكبار متبوعة
إيدك من نعال زورك مفاسع كوعا
أشغا وصدرو شابب ولبتن مرفوعة

بركة ساي السمعنا ها الصوت . أين نجع الباقون ؟ يا جامع يا رقيب .

اللخو شنتير ..
يازول كيف حالك ..واريتك طيب ..
عليك بي بركة جُملة الناجماب أن تواصل في هذه السيرة..
تعرف يا صاحبي بلدنا اليومين دي جابت كتمة و حراً مو حر نصاح ..عوزانة من نسَام ..
أهلنا بقولو الكتمة والحر إما بحر وإما مطر ..لاكين بلدنا دي بي جاي خاتياهن اللتنين ياكافي البلا..
لا سحاباً بقلّع من جيهة الصعيد ..لا براقاً بعد المغرب يشلع ..وربك يجيب العاقبة خير..
- قُلتلي كيف "الفرنــــاغة"؟؟؟؟ انا والله لي كم يوم بضحك في الكلمة دي .."الفرناغة"؟؟


اخونا نزار ود الحسين ..
يازول كيف حالك ..وشنو قاطع مننا الخبر ..من ديك وعِيك؟؟

استاذنا أهل العوض ..
قلتا لي إنتا من ناس المربع العديييل دا..؟؟
انا والله زولاً ما عندي قشة مرة إن لقينا جابودي وإن لقينا المربع وإن لقينا جراري المهم ناخد هزتنا ..
اها عاد كل ما تلقى طريقة برضك ما تسكت علي الغنا يا زول ..

والسلام موصول لي باقي الرباعة ..
---- الكباشي قال:

ماها مدالى نبّاح كلبها وساهار
ومي ناقصة عقل خابر فريقها العار
أُماتِك ضهرِك ..صَدفاً ولِسانهن حار
قلّ فيك خُمش ورقاً كتير وكُبار

وأقعدوا عافية
قيسان

الحبان : قيسان ، أبو قوتة ، أنور كينق ، أهل العوض ، دور نقاس ، سنتمنتال ، سيف كلي ، كوستا ، حاجة دوما ، ماكساب ، شيخي ود شنتير ، هوبفل ، شيري ، محمد آدم ، نزار حسين ، فرانكلي ، الشايقي ، الرحمابي ، الجندرية ، ود امي ، البحيراوي ، صديق الموج ،
سلام الله عليكم ورحمته وبركاته
أسأل الله أن يبارك في العمر والعمل
قبل دخول الخيمة الإرشيف ، سامحوني غلطان بعتذر .. المعايش والدرش مع العيال في المذاكرة باقي الدنيا آخر سنة والمساسقة مع الشبكة قربت تضيع الأولاد دراسياً . لذا أرجو السماح .. السمااااااح يا غاااااالي .. نحن طالبييييين السمااااااح . نتقابل في الخيمة الجديدة .. وكان صدق من أخبرني .. يقال إنها مكندشة وسمارها كرام لا يبخلون بالمدكن في جراب القول ، وبنها لا ينقطع ليلا ولا نهاراً .. أرجو عدم انتظاري لنصبها فما يزال أمامي أربعتاااااااشر يوم من الدعك على مدار الساعة ، فيكم الخير والبركة البسبق فيكم ينصبها وياها دارنا ومنتدانا . وتقابل فيها إن الله مدّ في العمر

تحياتي