Post: #1
Title: ملاسيات .......
Author: Hussein Mallasi
Date: 12-30-2003, 04:33 PM
الرجل الدلوك ........او الرجال الدلاليك
مقدمة لا بد منها
كثيرا ما يتبادر الي ذهني كلمات شائعة فافكر في تصريفاتها و علي سبيل المثال كلمة , دلوكة و طبعا دلوكة معروفة للجميع بانها الة ايقاع شهيرة, بس مرات بيطلق لفظ دلوكة للهجاء كما نعلم, و سؤالي هو هل يمكن ان نطلق علي الذكر لفظ دلوكة ام ان الاصح لغويا استعمال لفظ دلوك
و دعوني اقص عليكم قصتين من و حي الخيال
القصة الاولي:
ما دام الحكاية قصص في قصص خلوني انا برضو احكي ليكم قصة ... هي قصة برضو خيالية الا ان ابطالها لم يموتوا بعد
مرة كان في واحد اسمو عم دفع الله ... عم دفع الله دا كان بيلبس الجلابية بدون سروال – تتصوروا – المهم كان بيركب العجلة و يمشي يقعد في ركن مستشفي الدايات الشمالي الشرقي في بداية الشارع الذي يربط الموردة بالاربعين و ينتهي عند استاد المريخ ... يعني قصاد كلية المعلمات كدا.
كان عمنا دفع الله عندو حجر كبير تحت النيمة مسجلو باسمو طوالي يتكل العجلة و يقعد في حجرو دا.
طبعا الضهر الحركة بتكون خفيفة في الشارع دا و ما بتلقي فيهو غير بنات امدرمان الثانوية و بنات كلية المعلمات و بنات المدارس الوسطي راجعين بيوتهم... المهم عم دفع الله كان عندو حركة غريبة بيعملها, تتصوروا كان بيتلفت و لمن يلقي الشارع فاضي مافيهو غير بنات المدارس ديل ... كان بيرفع ليهم الجلابية ... تتخيلوا زول زي دا ...
المهم يوم شافو ليك صارقيلة لمن كان راجع من مركز شباب امدرمان, و صارقيلة دا من اولاد العباسية - طبعا كل واحد من اولاد العباسية كان عندو اسمين اسم في شهادة الميلاد و التاني في الحلة _ قام اخونا صارقيلة دا خلي ليك عمك دفع الله واقف و جر ليهو الجلابية من
ورا و شرطها ليك بطولها... و لك ان تتخيل منظر دفع اللة – المرة دي بدون عم طبعا –
المهم داك كان اخر يوم دفع الله يقعد في الحتة ديك و اختفي تماما... الا انو بالتاكيد شاف ليهو جلابية تانية و حجر تاني و تحت شجرة تانية و قدام مدارس تانية و مشي يمارس نفس هوايتو العجيبة دي ..... لكين اكيد برضو حيلقي ليهو صارقيلة تاني .....
ملاسى
|
Post: #2
Title: Re: ملاسيات .......
Author: Hussein Mallasi
Date: 12-30-2003, 04:36 PM
Parent: #1
القصة التانية:
الواحد بيتذكر قصص غريبة ... فالقصص الخيالية تحفز الذهن لانتاج قصص اكثر خيالا .... اها كدي هاكم القصة الخيالية دي برضو ....
مرة كان في واحد جارنا استاذ, و الاستاذ دا كان محترم في الحلة احترام شديد خلاص. و لمن الناس تقول استاذ العطا الكلام كان بيقيف ... اخوان استاذ العطا الصغار كانوا معانا في المدرسة ... و هو كان برضو استاذ في المدرسة ... و كان في حصصو كلها بيركز علي مكارم الاخلاق و الالتزام السلوكي و الامور الزي دي كدا.
المهم ما اطول عليكم, يوم انا و جقود و مصران _ و زي ما قلت ليكم كل زول عندو اسمين في حلتنا – كنا راحعين من المسرح القومي و قلنا نمشي الموردة نتعشى سمك... بعدين و قدام حديقة الريفيرا _ طبعا الكلام دا كان قبال 83 – نلقي ليك زولنا الما بنغباهو, استاذ العطا ذااااتو .... لقيناهو ليك واقع في الواطة طينة و كان بيعزف و قميصو مليان نغمات ... ما تتخيلوا الصدمة كانت كيف.... المهم رفعناهو و تكلناهو و هو ما قادر يقيف, و نحنا في الحالة ديك قام بال في روحو .... تتخيلوا .... جقود و مصران قعدوا يضحكوا و قالوا ليهو يا استاذ لو ما بتقدر عليهو بتشربو مالك. المهم و بصعوبة شديدة لقينا تاكسي و وصلناهو البيت.
و انا من الزمن داك و لي الليلة ما بقدر اعاين لاستاذ العطا في عينو و اعتقد هو برضو ما بيعاين لي .... لكين تتصوروا و رغم مرور اكتر من 25 سنة علي الحكاية دي الا انني ما زلت متألما ... فان تري استاذا محترما كاستاذ العطا في ذلك الوضع ليس بالشيئ الهين و ان ينهار لك مثلا اعلي هكذا في ثوان شيئ لا يمكن التعبير عنه ... بس تعرفوا لحسن الحظ – او سوءه ما عارف - ناس الحلة ما زالوا علي احترامهم لاستاذ العطا لانهم لم يشاهدوا ما شاهدته انا ....
ملاسى
|
Post: #5
Title: Re: ملاسيات .......
Author: Hussein Mallasi
Date: 12-30-2003, 06:27 PM
Parent: #2
الدلوكة التالتة:
مرة سنة سبعين جا اب عاج شندي , طلعونا من المدارس و طوالي علي محطة السكة الحديد نلقي ليك اب عاج طالع ليهو في راس عربية من عربات القطر يضرع التقول اسد ..
و طبعا قعدنا نهتف مع الجماعة ... و كانو طبعا جنبنا بنات الثانوي و نحن مبهورين بيهم و عايزين نلفت نظرهم بأي طريقة
يسألنا الهتاف الاكبر ابوكم مييييين فنرد هاتفين نمييييييييييييييري
ثم يسأل اخوكم مين فترد بنات الثانوي نميييييييييييييييييري
حبيبكم مييييين فتقل حدة الهتافات قليلا نميييري ....
رئيسكم مييييين ..... نمييييييييييييييييييييييييييييييييري
الي اخر المنمنة المعروفة للجميع
و كان التنافس الشريف حينها فيمن يسمع صوته اعلي ... و رجعت البيت و انا صوتي رايح الا انني كنت في اشد حالات السعادة و النشوة لان صوتي كان عاليا بما يكفي ... الا انني لا استطيع ان اصف شعوري عندما لوح في اتجاهنا محييا ...
و الغريبة تاني يوم في المدرسة كنت محط انظار و احترام جميع الزملاء عشان صوتي اكتر صوت انقرش فيهم ...
ملاسى
من مشاركة في بوست اخر
|
Post: #6
Title: Re: ملاسيات .......
Author: ASAAD IBRAHIM
Date: 12-30-2003, 09:26 PM
Parent: #5
اخوي حسين ملاسي ادام الله فضلكم
بالله طوالي ذيدنا في القصص الجميلة والمدهشة والتي كاني اري شخوصها يتجولون.
مع الشكر
|
Post: #23
Title: Re: ملاسيات .......
Author: Hussein Mallasi
Date: 12-31-2003, 06:09 AM
Parent: #6
| Quote: كاني اري شخوصها يتجولون |
يتبولون يا ابو السعود ...... يتبولووووووووووون
ملاسى
|
Post: #3
Title: Re: ملاسيات .......
Author: سجيمان
Date: 12-30-2003, 04:38 PM
Parent: #1
ملاسي
يا زول ها
دا نضم شنو؟
عجلتو كانت...... رالي؟
لانو في علاقة بين السروال و سرج العجلة
|
Post: #4
Title: Re: ملاسيات .......
Author: ASAAD IBRAHIM
Date: 12-30-2003, 04:45 PM
Parent: #3
الاخ ملاسي
والله قصص جميلة عسي ان يعتبر اولي الالباب
مع الشكر
|
Post: #25
Title: Re: ملاسيات .......
Author: Hussein Mallasi
Date: 12-31-2003, 06:15 AM
Parent: #3
تعرف يا سجيمان عمك دفع الله دا المشكلة عجلتو ما فيها سرج عشان كدا لمن يسوقها بيسوقها
سداري – صداري - بس المشكلة لمن يتعب ...... كان بيتعب جد !!!!!!
ملاسى
|
Post: #31
Title: Re: ملاسيات .......
Author: سجيمان
Date: 12-31-2003, 01:22 PM
Parent: #25
حسين ................ اوعى تقول لي لما بيتعب كان بينزل من العجلة
|
Post: #34
Title: Re: ملاسيات .......
Author: Hussein Mallasi
Date: 12-31-2003, 04:56 PM
Parent: #31
سجيمان يا خوي ..... اقول ليك كان بيتعب جد و اكتب ليك اربع علامات تعجب و تقول لي ينزل من العجلة .... بالغت و الله يا سجيمان !!!!
|
Post: #7
Title: Re: ملاسيات .......
Author: MaxaB
Date: 12-30-2003, 09:45 PM
Parent: #1
تابع .. يا ملا سي .. تابع .. خيالك أصدق من الحقيقة... صارقيل و جقود و مصران .. لووول .. ألقابكم عجب .. لكن انت كان اسمك التاني شنو يا حسين .. أوعى تزوغ .
منتظرين الباقي ..
تحياتي
|
Post: #8
Title: Re: ملاسيات .......
Author: Hussein Mallasi
Date: 12-30-2003, 10:05 PM
Parent: #7
انا يا مكسب كان اسمي قرادة ... ايه رايك مش اسم مناسب
ملاسى
|
Post: #9
Title: Re: ملاسيات .......
Author: MaxaB
Date: 12-30-2003, 10:26 PM
Parent: #1
ياخي اصلو ما ممكن .. لووووووووووول .. قطعت مصاريني من الضحك .. صارقيل و جقود و مصران ... و قرادة .. الله يديكم العافية .. لووووول .. دي حلة و لا فروة كلب .. شكلكم كنتو مصايب.
تسلم .. يا ملاسي
متابعينك.
|
Post: #10
Title: Re: ملاسيات .......
Author: doma
Date: 12-30-2003, 10:55 PM
Parent: #9
جقود دا اسم حركي يا قراد ؟؟؟؟
|
Post: #33
Title: Re: ملاسيات .......
Author: Hussein Mallasi
Date: 12-31-2003, 04:47 PM
Parent: #10
خالتنا الكبيرة مقاما و احتراما
جقود يا خالة دومة ما متذكراهو .... دا ما ود ناس الجمري البيتهم كان فاتح علي دكان اولاد ابو زيد ....
تتذكري لمن حاج دوم كان بيجي لابوي .... اها الولد الصغير الكانو بيرسلوهو يجيب ليهم الطاولة دا ياهو ذاتو جقود .... اتذكرتي ....
ملاسى
|
Post: #11
Title: Re: ملاسيات .......
Author: Ridhaa
Date: 12-31-2003, 00:12 AM
Parent: #1
ياحسين يابتاع الجمرات
عازف وقميصة مليان الحان
دي القاب أمدرمانية
عوض طراش
منجقة
سنكيت
بلبوط
فونية
رب الطشت
سنبوسة
طلقها
الديك
داموك
أبو التيي
حقوص
جردل
الرهو
أبورجيلة
ابوصدر
العاتي
أبو حجم
|
Post: #12
Title: Re: ملاسيات .......
Author: Abdel Aati
Date: 12-31-2003, 01:11 AM
Parent: #11
حسين ملاسي احبطتني
الواحد يشوف صورتك ؛
يقول مولود في عام 1980
تقوم تقول لي سنة سبعين كنت بتهتف لي نميري ؟
عادل
|
Post: #13
Title: Re: ملاسيات .......
Author: HOPEFUL
Date: 12-31-2003, 02:05 AM
Parent: #12
هاهاهاهاها
ملاسي في زول قبل كدا قال ليك انك زول ذكي؟
اعتقد "الرحمابي" قال كدا برضو
يديك العافيه
وطولة البال وسكيت الجهال
|
Post: #14
Title: Re: ملاسيات .......
Author: HOPEFUL
Date: 12-31-2003, 02:05 AM
Parent: #12
هاهاهاهاها
ملاسي في زول قبل كدا قال ليك انك زول ذكي؟
اعتقد "الرحمابي" قال كدا برضو
يديك العافيه
وطولة البال وسكيت الجهال
|
Post: #15
Title: Re: ملاسيات .......
Author: ASAAD IBRAHIM
Date: 12-31-2003, 02:10 AM
Parent: #14
يا هوبلس
الليلة ما في اي زول يجك معاك رايك شنو اجك انا
|
Post: #16
Title: Re: ملاسيات .......
Author: HOPEFUL
Date: 12-31-2003, 02:26 AM
Parent: #15
كان رياضي جك
|
Post: #17
Title: Re: ملاسيات .......
Author: ASAAD IBRAHIM
Date: 12-31-2003, 02:31 AM
Parent: #16
رأيك شنو في الكاتبو ملاسي دة؟
|
Post: #18
Title: Re: ملاسيات .......
Author: HOPEFUL
Date: 12-31-2003, 02:37 AM
Parent: #17
في زول قبل كدا كتب قصه قطعوا رأسو؟
بس اجمل ما في قصص الأيام دي انها مستوحا من الواقع .. والبيئه المحيطه ..[B] ويا زول ما تكون جنبك بياره بكره تجينا تحكي لينا عنها؟[/B]
|
Post: #19
Title: Re: ملاسيات .......
Author: ASAAD IBRAHIM
Date: 12-31-2003, 02:40 AM
Parent: #18
احيانا القصص تحكي لكي يتعظ الناس واحيانا تحكي حتي لا يظن البعض انهم الوحيديين
الممكن ينجروا.
|
Post: #21
Title: Re: ملاسيات .......
Author: ASAAD IBRAHIM
Date: 12-31-2003, 02:52 AM
Parent: #19
ممكن تقرأ الطرنقوش يصير مثقفا حتي تكون الصورة واضحة قدامك وما تقوم تقع ليك
في حفرة يا هوبلس
|
Post: #22
Title: Re: ملاسيات .......
Author: Hussein Mallasi
Date: 12-31-2003, 06:03 AM
Parent: #12
عبد العاطي تحياتي
تعرف يا عادل اخوك كان عندو حلقوم ما شاء الله اها من سنة سبعين و لي جاي مافي زول ما هتفت
ليهو بس الواحد كان بيتعزز في البداية و يعمل نفسو مع الحرية و التعدد و الانفتاح عشان
زيادة الحوافز و رفع الاتعاب و شوية التحانيس و بعدين الامور بتسلك و طوالي تلقاني وش في اي
تجمع جماهيري و طبعا برضو الواحد كان بيستغل الحكاية دي في الكورة بس الفرق انو زمان في
الكورة ما كان في مقابل مادي ما عارف اسع كيف ... طبعا ناس عبود ما اكذب عليك ما بوعى عليهم
كويس عشان كدا ما طلعتا منهم بحاجة ... بعدين ما تغشك الصور و الحركات الزي دي ... تتذكر
صورتك القديمة من ايام النضال ديك اها انا برضو دي صورتي من ايام النضال بس النضال حقي
انا !!!!
ملاسي
|
Post: #24
Title: Re: ملاسيات .......
Author: Hussein Mallasi
Date: 12-31-2003, 06:12 AM
Parent: #12
اظنك انت برضو يا هوبفول شفت استاذ العطا في الحالة ديك ..... صاح ؟!
|
Post: #35
Title: Re: ملاسيات .......
Author: Hussein Mallasi
Date: 12-31-2003, 05:03 PM
Parent: #11
رضا يا امدرماني يا اصيل
لو بتعرف الناس ديل كلهم لازم تكون بتعرف :
- الدعول
- اللجوس
- و المطران
ديل كمان عندهم قصص غريبة خلاص .... بس معظمها غير صالح للنشر
ملاسى
|
Post: #26
Title: Re: ملاسيات .......
Author: AlRa7mabi
Date: 12-31-2003, 07:10 AM
Parent: #1
ملاسي
اسمك الحركي كان ( قرادة )؟؟؟؟؟
غريبة .. انتا ما عارف القراد بمص دم شنو؟؟؟
يعني كان مفروض يكون دمك ... خفيف!!
كدي الهتاف هسي خليهو الحق بوستيك دا
أسعد وهوبفل مرقهوهو في عد الغنم
رحمابي
|
Post: #27
Title: Re: ملاسيات .......
Author: ASAAD IBRAHIM
Date: 12-31-2003, 08:22 AM
Parent: #26
up
|
Post: #38
Title: Re: ملاسيات .......
Author: Hussein Mallasi
Date: 12-31-2003, 07:37 PM
Parent: #26
ابني الرحمابي "ابو الزهور"
تحياتي
مرة زمان كنا شلة اطفال و معظمنا كان بيخاف من النمل ... واحد مننا قال متفاخرا لخالي الذي
كان يتسامر معانا انه ياكل النمل بعد قتلة .... الكلام دا ما عجب واحد من الاطفال فقال مزايدا:
و انا باكل القراد حي ... و من يوم داك و لي الليلة خالنا بطنو طامة ..... زيّ كدا ..
ملاسى
|
Post: #28
Title: Re: ملاسيات .......
Author: بدرالدين شنا
Date: 12-31-2003, 08:32 AM
Parent: #1
حبيبي ملاسي سلام
دلوكة يا.......؟
الدلوك عندنا هنا في عمان نوع من التمر بعد أن تجرى عليه بعض عمليات الدلك حتى يصبح مثل العجوة ولو سألت العمانين ب(دلوك) على الخطوات والطريقة المثلى لعمله
إذا دلكنا أي شئ دلكاًً بإستمرار صار مرناً وطائعاً وهذا يقودني للإعتقاد بأن الخواجات سرقوا كلمة (دلكت) مننا نحن العرب
لك تحياتي
|
Post: #29
Title: Re: ملاسيات .......
Author: مهيرة
Date: 12-31-2003, 10:43 AM
Parent: #28
الاخ الفاضل ملاسى
كل سنة وانت طيب
بالله زيدنا من قصص (الدلاليك) دى، بس ما تدقها!!!!
اصلو اصواتها بتفتق الاضان!!!!!!!
وما تنس تدينا حبة من قصص الشتامة(بضم الشين)
الشتامة ديى جمع شتم
والشتم صاحب الدلوكة ولا ولدها ما عارفة!!!!!
تسلم يا قرادة!!!!
تحياتى
|
Post: #30
Title: Re: ملاسيات .......
Author: الصادق خليفة
Date: 12-31-2003, 12:02 PM
Parent: #29
الاخ ملاسي ، ليك التحية
عندنا عمن لينا زمان بقول لينا فلان ده دلوكة ساكت مرتو كان قالت ليه صبح بصبح واكان قالت ليه غرب بيغرب ومن ديك انا عندي فهمين للدلوكة فهم متبادر لي ذهني وهي الدلوكة المعروفة بتاعت الحكمات لو بعترفها وفهم تاني للراجل الماعندو راي ( رايو عند مرتو ) لكن المحيرني الدلوكة دي شي بدقوه اهـ اللم ده على ده شنو ( سؤال رقم واحد ) وبعدين ناس عمان بيقولوا الدلوكة لعجوة البلح طيب مما ممكن نحن نقول للدلكة السودانية دلوكة مادام كل شي بعجنوه هو دلوكة ( ومافي حد احسن من حد ).
|
Post: #52
Title: Re: ملاسيات .......
Author: Hussein Mallasi
Date: 01-03-2004, 06:32 PM
Parent: #30
الصادق خليفة
تحياتي
تعرف الازواج الدلاليك ديل اخطر انواع الازواج .... الواحد فيهم يستمر دلوكة كدا و بعين لمن ينقدا بيجيب فرق الايام السودا السابقة ... لذا فلتحذر السيدات من هذة الايقاعات فالنهايات دائما ما تكون في غير الصالح العام !!!!!!
ملاسى
|
Post: #42
Title: Re: ملاسيات .......
Author: Hussein Mallasi
Date: 01-01-2004, 06:11 AM
Parent: #29
اختنا المحترمة مهيرة
تحياتي
تعرفي الشتامة بفتح الشين او ضمها قالوا بقت حاجة واحدة ....و بعدين الشتم دا لا هو ولد
الدلوكة لا هو صاحبها... الشتم دا شيئ كدا ديكوري مكمل للعملية الفلكلورية و ليس اصلا فيها
كما كان في السابق ....
ملاسى
|
Post: #45
Title: Re: ملاسيات .......
Author: Hussein Mallasi
Date: 01-01-2004, 11:47 PM
Parent: #28
البدري يا ابن عمي و الله ليك وحشة
كويس الجيت يا لبدري .... ياخي كف زكية لسه حارقني ... و عندي سؤال من يوم داك حارقني اكتر
منو البالغ اكتر مخرج المسرحية و لا مخرج الاعلان !!!!!!
ملاسى
|
Post: #32
Title: Re: ملاسيات .......
Author: adil amin
Date: 12-31-2003, 02:59 PM
Parent: #1
ملاسى الوجع
تحية طيبة
ان رصد التفاصيل المملة للناس العاديين تجعل منك مشروع كاتب ساخر
اما بخصوص عم دفع الله ابو عجلة ده...عندنا هنا فى اليمن وفى سهول تهامة كبار السن يلبسون الفوطة(تيكة) يعنى من غير سروال على طريقة الامام ..وعند الغضب تعتبر من اهم وسائل التعبير الحاسمة..عندما يرفع الغاضب فوطته فى وجه الخصم امام الجميع
وبعدين نحنةما بنصدق انو اسمك كان قرادة..كان اسمك(الهادى الضلالى)
|
Post: #36
Title: Re: ملاسيات .......
Author: ود شاموق
Date: 12-31-2003, 05:13 PM
Parent: #32
ملاسي يا أساسي
عارف بي طريقتك ممكن تقول أكتر من القالو الحلاج ومحمود محمد طه، دون أن تواجه أي مشكلة، خصوصاً مع حراس الضماير الحايمين في البورد.
واصل .. كلنا متابعين.
|
Post: #53
Title: Re: ملاسيات .......
Author: Hussein Mallasi
Date: 01-04-2004, 06:02 AM
Parent: #36
ود شاموق الاريب
تحياتي
يا زول نحن وين من ناس الحلاج و محمود محمد طه .... يمين مع اول استتابة تلقاني فاصل ...
انت بتهظر ... العصّر دا يا زول ما بنقدر عليهو ...
ملاسى
|
Post: #44
Title: Re: ملاسيات .......
Author: Hussein Mallasi
Date: 01-01-2004, 01:52 PM
Parent: #32
عادل - الحبيب - الامين
| Quote: عندما يرفع الغاضب فوطته فى وجه الخصم امام الجميع |
تعرف انا مقتنع تمام الاقتناع انو اليمنيين ديل احسن ناس .... و دفع الله دا لو كان برفع فوطو للرجال كان مالو يمين ما كان جبنا خبرو .... يعني لو كان عدى الزلط كان لقي الاحفاد بنين ... كم خطوة كمان كان لقي بيت الامانة... يمين وادي سيدنا .... شمال شوية المؤتمر الثانوية ... بس دا حركاتو دي ما كان بيعملها الا قدام مدارس البنات ....و المشكلة ما امام الجميع يعني اول ما واحد يشوفو طوالي بينزل الفوطة .... و يتلفت كأنو ما عمل حاجة
ملاسى
|
Post: #37
Title: Re: ملاسيات .......
Author: بلدى يا حبوب
Date: 12-31-2003, 06:26 PM
Parent: #1
الاخ ملاسى
الداليك والدلوكة ممكن تكون على وزن حكام وحكومة افتكر كده واضحة
لكن عمك جقود ده مش كان قبال ما يتقاعد تكاسى
وعلى وزن دلوكة عم جقود ببحكى ليك ده
واحد عذابى كا ساكن فى حى الموردة وطبعا الناس ديل اصيلين والزول بس مشكلته الوحيدة انو لمن اجى انوم بتكون عليه حكاية عادل امام فى مسرحية شاهد ماشاف حاجة ...زز
المهم صاحبنا ده يوم على التعترة سمع نسوان جيرانه بكوركن الحرامى وعلى طول اتناول عكازة وجرى على الشارع لقى ليه جار نبه رجع للبيت وبسرعة لفه العمة وجرى على الحرامى يعنى الراجل لبس وفى النهاية الحرامى بقى سبب لرحوله من الحلة
وفى انتظار قصصك الملاسييات
وكل سنو وانت طيب
|
Post: #39
Title: Re: ملاسيات .......
Author: عشة بت فاطنة
Date: 12-31-2003, 08:49 PM
Parent: #37
ملاسي عاد لووووووول من دلاليكك خاصة الاولي والاخيرة ، الغريبة الليلة انا وجاراتي كنا نتداعى ونتزكر في الرجال الدلاليك البعترضوا طريق بنات المدارس وحكينا حكايات اسكت ساي ولا دلوكة نميري، ولا اسمو منو دلوكتك الاولي تصبح علي خير وكل سنة وانتو الف خير راس السنة قرب ونحنافي
|
Post: #47
Title: Re: ملاسيات .......
Author: Hussein Mallasi
Date: 01-02-2004, 08:31 PM
Parent: #39
| Quote: ولا دلوكة نميري، ولا اسمو منو دلوكتك الاولي |
ياهو نميري ذاتو يا عشة ...
بس كتب طه اخبارها شنو ... يمين ما نسيتها ...
ملاسى
|
Post: #55
Title: Re: ملاسيات .......
Author: Hussein Mallasi
Date: 01-04-2004, 07:56 PM
Parent: #37
بلدي الحبوب
كل سنة و انت طيب
قالوا في مجموعة من الطلاب السودانيين في اوروبا الشرقية ايام الامجاد القديمة ديك و عندما تكون
الليالي متجلية ... يكونون اشد ما يكون الحرص علي ارتداء الجوارب دون باقي الثياب و حتي
الداخلية منها ... و يرفضون قطعا خلعها مهما كانت التوسلات .... وحتي الان لم يعرف سر هذة
الجوارب و مفعولها !!!! فصاحبنا ابو عمة بتاع الموردة اكيد عندو نظرية برضو !!!!
ملاسى
|
Post: #40
Title: Re: ملاسيات .......
Author: ali othman
Date: 12-31-2003, 09:15 PM
Parent: #1
ملاسي والجميع كل سنة وانتو طيبين أنحنا قعدنا واتحكرنا جنب الكمبيوتر لا راس سنة ولا الرجاء الصالح ذاتو ...
والله ياملاسي ذي جماعتك ديل كتير ، وانحا كان عندنا أستاذتربية اسلامية في المتوسطة يحيرك عديل زول مروق وود عز وكنا مستغربين إنو كان ساكن براهو في شقة رقم وجود أمه واخواته في نفس المنطقة .. أها الأستاذ ده كان من الجماعة الطيبين وبتذكرو في يوم قبل الزواج العرفي البينهم وبين نميري وقف وخطب : انا بفتخر بأني اخو مسلم ( حسه الاستاذ ده جبهة ) ومابخاف من زول وبقولا حتى ولو قطعوا لي راسي المهم هتف لما راسنا وجعنا.
الأستاذ ده ظبطوهو وهو بعاين بفتحة في الباب على مرة جارهم بعد مايمشي الشغل .. وبقت فضيحة ورحلوهو من الحلة لكنو ماإختشى وبطل المدرسة
|
Post: #41
Title: Re: ملاسيات .......
Author: ASAAD IBRAHIM
Date: 12-31-2003, 11:51 PM
Parent: #40
الاخ علي عثمان
لك الود
والله قصة عجيبة وزيها كتير ربنا يحفظكم
ملاسي العفو للسطو علي بوستك
سلام
|
Post: #43
Title: Re: ملاسيات .......
Author: Hussein Mallasi
Date: 01-01-2004, 06:25 AM
Parent: #41
حاشاك السطو يا ابو السعود ....
حلالك يا خوي ....
ملاسى
|
Post: #46
Title: Re: ملاسيات .......
Author: bayan
Date: 01-02-2004, 06:17 AM
Parent: #43
ملاسى شكرا للامتاع والعبر
واستمر..
ود شاموق
عارف مفتشين الضمائر ديل طيبين لانهم بيساعدوا الناس الضيعت ضميرها تلقاه
وهم ناس فزعة ونجدة
انت عندك رايحة عشان نعمل ليك نفير؟؟
|
Post: #48
Title: Re: ملاسيات .......
Author: عشة بت فاطنة
Date: 01-02-2004, 08:59 PM
Parent: #46
هوي يا ملاسي ما شغلتك بكتب طه خليك في دق الدلوكة
قومي يا السكوكة وهبكي الدلوكة
وجري النم علي المابشبهوكولا شنو ما بعرف
بس لكن عادي سجيمان ما ريحك
|
Post: #59
Title: Re: ملاسيات .......
Author: Hussein Mallasi
Date: 01-05-2004, 10:13 PM
Parent: #48
تعرفي يا عشة انا عندي ليكي اقتراح ....انتي ترجعي لطه كتبو و تشيلي منو
كي بورد بدل البتكتبي بيهو دا ....
ملاسى
|
Post: #49
Title: Re: ملاسيات .......
Author: Abdel Aati
Date: 01-02-2004, 09:19 PM
Parent: #46
ملاسي الظريف وعادل امين اللطيف
طبعا اهلنا الاسكتلنديين برضوا بلبسوا فوط ( جمع فوطة ) ؛ ومن تحتها لا شي ؛ اعني الرجال منهم ؛
واذا كان الامر مفهوم في اليمن ؛ حيث درجة الحرارة معتدلة ؛
فلا افهم كيف يطيقه اهل اسكتلندا ذات المناخ البارد القارص ..
كمان الاسكتلنديين ايضا يبدو انهم عند الغضب او رغبة في استفزاز الخصم ؛
يقوموا برفع الفوطة الي اعلي؛ ويقوموا بعرض ما تحتها - من الامام او الخلف-
حسب مقام الخصم - وليس حسب نوعه او جنسه -
والعهدة علي الراوي وميل جيبسون في فيلمه قلب شجاع
اما بالنسبة للراجل الليذكرته ؛
فيبدو انه مصاب بنوع من الامراض النفسية العصابية ؛
وهو مرض يقوم علي عرض الاجزاء الحساسة فجاة علي البنات الشابات او الصغيرات ؛
ولا يفعل هؤلاء اكثر من كشف هذه الاجزاء؛ بقصد ارباك وصدم ضحياتهن
وكلما كانت الصدمة والجزع اكبر ؛ كلما كان رضا هذا الشخص اكبر ..
في اوربا هنا يرتدي مثل هؤلاء المرضي البالطوهات الطويلة ؛
ويكون تحتها لا شي ؛
ويتحاوموا في الحدائق العامة ويمارسوا مرضهم هذا؛
ولا ينتبهوا حتي للبرد القارص
ولهم قصص كثيرة مضحكة - محزنة
عافاهم الله وعافانا
ا
والمسألة مرض وله علاقة بعدم النضوج الجنسي ومشاكل ذاتية اخري كثيرة
|
Post: #50
Title: Re: ملاسيات .......
Author: خالد الحاج
Date: 01-02-2004, 10:02 PM
Parent: #49
Quote: سداري – صداري - بس المشكلة لمن يتعب ...... كان بيتعب جد !!!!!!
|
ملاسي..الله يجازي محنك..
|
Post: #54
Title: Re: ملاسيات .......
Author: adil amin
Date: 01-04-2004, 01:44 PM
Parent: #49
الاخ العزيز عادل ود عبد العاطى
تحية طيبة
اظن المرض ده اسمو الاستعراضيةالجنسيةfetchingالان مصابة به الانظمة العربية من المحيط الى الخليج..ونحن كل يوم نعانى من روية عورتها القبيحةفى الفضائيات والصحف..بل الشاعر العراقى البياتى فى قصيدته الطاووس اول من اكتشف هذا المرض السياسى الخطير(كشف العورة السياسية ) عندما قال في قصيدته الشهيرة الطاووس
مدن يضربها الزلزال
واخرى بالطاعون تموت
والطاووس بلاخجل يظهر عورته للناس
***********
واعتقد يا ملاسى انو عم دفع الله ده كان بمارس عمل سياسى فى لحقيقة بس انتو ما فهمتوا..لانكم صعاليق ما بتفهمو فى السياسة
*********
فلم قلب شجاع فلم متميز بكل المقاييس وعندما صرخ الرجل بكلمة الحرية فى اخر الفلم دوت قاعة السينما بالتصفيق الحاد..لان هذه الكلمة التى تعانى من الغربة فى المجتمع العربى والشرق البائس
|
Post: #63
Title: Re: ملاسيات .......
Author: Hussein Mallasi
Date: 01-08-2004, 06:10 AM
Parent: #54
صديقي عادل الامين
Quote: واعتقد يا ملاسى انو عم دفع الله ده كان بمارس عمل
سياسى فى لحقيقة بس انتو ما فهمتوا..لانكم صعاليق
ما بتفهمو فى السياسة
|
تتصور يا عادل انو دفع الله فعلا قايل نفسو بيمارس في عمل سياسى .....
ملاسى
|
Post: #65
Title: Re: ملاسيات .......
Author: Hussein Mallasi
Date: 01-08-2004, 02:49 PM
Parent: #49
Quote: كمان الاسكتلنديين ايضا يبدو انهم عند الغضب او
رغبة في استفزاز الخصم ؛
يقوموا برفع الفوطة الي اعلي؛ ويقوموا بعرض ما
تحتها - من الامام او الخلف-
|
عزيزي عادل عبد العاطي
تعرف من زمان انا بحب الاسكتلنديين ديل عشان القرب و موسيقي القرب بس اسه ما عارف و الله اقول ليك شنو.....
Quote: والمسألة مرض وله علاقة بعدم النضوج الجنسي ومشاكل
ذاتية اخري كثيرة
|
اما بخصوص هذا التشخيص النفسي العميق فاجدني متفق معك فيه جملة و تفصيلا
ملاسى
|
Post: #61
Title: Re: ملاسيات .......
Author: Hussein Mallasi
Date: 01-06-2004, 04:54 PM
Parent: #46
شكرا للحضور و التشريف الكبير يا بيان ...
ملاسى
|
Post: #56
Title: Re: ملاسيات .......
Author: Hussein Mallasi
Date: 01-05-2004, 06:14 AM
Parent: #40
اخونا علي عثمان
اليك هذه القصة الحقيقة التي تتطابق تماما مع استاذكم المذكور بتاع البصبيص داك .... مرة كان
في واحد بيعمل زي الاستاذ دا ... و مرة وهو بيعمل كدا جا جارو راجع بدري و سمع وقع اقدامو علي
السلم ... مسكتو ليك خوفة و قعد يرمش بعيونو بطريقة متصلة لا تنقطع .... و استمرت حكاية الرميش
دي معاهو فترة طويلة و اتعبتو جدا المهم مشي المستشفي ما لقو عندو أي حاجة عضوية حولوهو
للعلاج النفسي ... لم يذكر لهم شيئ حتي تم تنويمه مغناطيسيا و عندها ذكر للطبيب المعالج
السبب .... تتصور لى الليلة الزول دا ما بطل الرميش المتصل ...
ملاسى
|
Post: #51
Title: Re: ملاسيات .......
Author: بدرالدين شنا
Date: 01-03-2004, 08:57 AM
Parent: #1
| Quote: المهم عم دفع الله كان عندو حركة غريبة بيعملها, تتصوروا كان بيتلفت و لمن يلقي الشارع فاضي مافيهو غير بنات المدارس ديل ... كان بيرفع ليهم الجلابية ... تتخيلوا زول زي دا |
| Quote: البدري يا ابن عمي و الله ليك وحشة |
ياخوي كان داك عمك أنا ما ود عمك
|
Post: #57
Title: Re: ملاسيات .......
Author: ali othman
Date: 01-05-2004, 02:40 PM
Parent: #1
ملاسي كيفك ( كيفك دي كانت السلام الرسمي لطلاب جامعة الخرطوم من 91
ياخوي كنت عاوز اسألك من ايام بوست ود قاسم إنت شوقي ملاسي بيقرب ليك ؟
|
Post: #58
Title: Re: ملاسيات .......
Author: Hussein Mallasi
Date: 01-05-2004, 06:52 PM
Parent: #57
علي عثمان كيفك ...
| Quote: كنت عاوز اسألك من ايام بوست ود قاسم إنت شوقي ملاسي بيقرب ليك ؟ |
ايوا بيبقي لي عمي لزم ...
بس ما وريتني تقصد ياتو في بوستات اخونا ود قاسم .....
ملاسى
|
Post: #60
Title: Re: ملاسيات .......
Author: ali othman
Date: 01-06-2004, 08:01 AM
Parent: #1
ملاسي سلامات
البوست كان بتاع كيف تكتشف أقرباءك في المنبر .
|
Post: #62
Title: Re: ملاسيات .......
Author: Hussein Mallasi
Date: 01-07-2004, 04:28 PM
Parent: #60
Quote: البوست كان بتاع كيف تكتشف أقرباءك في المنبر .
|
شكرا يا علي عثمان .... اصلو اخونا الحبيب ود قاسم الله يديهو العافية في اليوم بينزل ليهو بوستين – عيني باردة - عشان كدا انا سألتك ....
ملاسى
|
Post: #64
Title: Re: ملاسيات .......
Author: ASAAD IBRAHIM
Date: 01-08-2004, 07:15 AM
Parent: #62
يا ملاسي
بوستك دة دائري ولا مربع؟؟؟؟؟؟؟
|
Post: #66
Title: Re: ملاسيات .......
Author: Hussein Mallasi
Date: 01-09-2004, 09:39 AM
Parent: #64
الاعزاء خالد الحاج و اسعد
اهدي عبركم هذه الابيات من شعر المبدع Gazaloat - منقولة من بوست الشعر الخنفشاري –
لكل المهتمين و بالمناسبة احاول الاتفاق مع اخونا الجزولي لدمج القصيدة مع القصص اعلاه و عرضها في مسرح امبدة الاهلي بس ساعدنا يا خال بالموسيقي و كدا ....
Quote: الشارع اطول من احزان المدعوكين فى الحواشة
الشارع مليان دياشة
وعواميد نور مطفية
وناس تتجارى ورا معاشة
واحد شايل سرواله الناصل ومقشاشة
وواحد واقف يبرم فى شنب الامباشى
وجماعة بفرفرو تحت الكماشة
وسكران ماهاميهو الحاصل
واقف فى الخط الفاصل
مابين الزمة وسيد السروال الناصل
وبشاغل فى بنية ملفلفة زى قرطاس السكر
الجوع اتدفق من عينيهو
قزاز النضارة اتكسر
تلميذ شايل كتبو ف سرج العجلة الورانى
دقش البت الزى قرطاس السكر وقع اتكسر
|
و ركز يا خال علي السرج الوراني دا فذكره لم يات عبثا بل لضرورة درامية ملحة !!
ملاسى
|
Post: #67
Title: Re: ملاسيات .......
Author: Hussein Mallasi
Date: 01-26-2004, 03:47 PM
Parent: #66
اتذكر زمان كان في برنامج توعية مرورية في الاذاعة من تقديم نبيل احمد عثمان ان لم تخني الذاكرة
و قد كانت مقدمتة تقول :
لكل سائق عربة و لكل راجل .....
اها خلوني اقتبس هذا التقديم مع تعديل طفيف بحيث يكون :
لكل سائق عجلة و لكل .... و لاّ مافي داعي !!!!
تم رفع هذا البوست لكل الراجليين ....... و ليس الرجال ... لذا لزم التنويه !!!!
ملاسى
|
Post: #68
Title: Re: ملاسيات .......
Author: khider
Date: 04-20-2004, 10:51 PM
Parent: #67
up
|
Post: #69
Title: Re: ملاسيات .......
Author: Elkalakla_sanga3at
Date: 04-20-2004, 11:38 PM
Parent: #68
سلام اخونا ملاسي بالجد تغير جميل ونفحة اريجية لاقتسام البسمة
بس ياخواناء اها ريكم شنو في دلاليك اليومين ديل في البورد دايرين صارقلية يا اسعد و يا ملاسى كدي قول لينا دحين في اكتوبر ما مرقت في المظاهرات
|
Post: #70
Title: Re: ملاسيات .......
Author: Hussein Mallasi
Date: 04-21-2004, 09:30 PM
Parent: #69
كيف ما مرقنا يا كلاكلة ياخي ...
بس مروقنا كان في مسيرات الردع - حينها - فقد كنا ايام ذاك نتعاطف مع "الطغمة" العسكرية
الحاكمة و ما زلنا متاثرين و زعلانين لزوال حكومة 17 نوفمبر .. و كدي بالله اتخيل معاي لو
اعمامنا ديل - او اجدادنا - كانوا حاكمين لحدي اسه و لو من قبورهم، كان الوضع حيكون كيف ..
|
|