شكلها حتكون تاريخية

شكلها حتكون تاريخية


13-07-2005, 07:04 AM


  » http://sudaneseonline.com/cgi-bin/sdb/2bb.cgi?seq=msg&board=77&msg=1135891732&rn=0


Post: #1
Title: شكلها حتكون تاريخية
Author: Hussein Mallasi
Date: 13-07-2005, 07:04 AM

غايتو لو لم تفرقها الرياح؛
فستكون الامطار التي تهطل الان علىالخرطوم تاريخية.

Post: #2
Title: Re: شكلها حتكون تاريخية
Author: عبدالماجد فرح يوسف
Date: 13-07-2005, 07:08 AM
Parent: #1

الله يستر من خميس 88 ياملاسي
اللهم ألطف بنا فبيوتنا وشوارعنا لاتحتمل

Post: #3
Title: Re: شكلها حتكون تاريخية
Author: Hussein Mallasi
Date: 13-07-2005, 07:12 AM
Parent: #2

سلامات يا عبد الماجد؛



غايتو لو السحاب دا كلو نزل؛
فستكون 88 مجرد نزهة.

Post: #5
Title: Re: شكلها حتكون تاريخية
Author: Hussein Mallasi
Date: 13-07-2005, 07:15 AM
Parent: #3

و سوف لن نتمكن من الوصول لدار الاتحاد
يوم 21 الا باستخدام الطوافات.


Post: #7
Title: Re: شكلها حتكون تاريخية
Author: عادل فضل المولى
Date: 13-07-2005, 07:31 AM
Parent: #3

تحية خريفية
انت ما سمعت ناس الارصاد يا ملاسي
السنة دي قالوا الخريف حتكون فيهو معدلات هطول عالية وكمان سيول وفياضانات
والخرطوم واحدة من الولايات التي تشملها التوقعات..

Quote: غايتو لو السحاب دا كلو نزل؛
فستكون 88 مجرد نزهة


ربنا يجيب العواقب سليمة

Post: #4
Title: Re: شكلها حتكون تاريخية
Author: معتز تروتسكى
Date: 13-07-2005, 07:14 AM
Parent: #2

الغريبه اى زول جاى من الغابه جية نهائية بجيب معاهو مطره مبالغه..
حصل ده 88 لمن الوالد جاء راجع من الغابه..

Post: #6
Title: Re: شكلها حتكون تاريخية
Author: Hussein Mallasi
Date: 13-07-2005, 07:19 AM
Parent: #4

كيفك يا معتز؛

اتذكر زمان ادونا في العربي حاجة اسمها البُعاق؛
و ما متذكر هل كان البعاق السحاب الممطر ام غير الممطر.

و على كل حال السحاب الفوق دا شكلو بُعاق بُعاق.

Post: #8
Title: Re: شكلها حتكون تاريخية
Author: Hussein Mallasi
Date: 13-07-2005, 07:47 AM
Parent: #6

كيفك يا عادل؛

الله يستر من السيول و الفيضانات.

و غايتو الرشات الخفيفة - في الخرطوم -
كويسة معانا؛ فبها ينخفض استهلاكنا للكهرباء.

Post: #9
Title: Re: شكلها حتكون تاريخية
Author: عادل فضل المولى
Date: 13-07-2005, 08:02 AM
Parent: #8

يا حسين
المطرة عندنا بي جاي في شارع البلدية عاملة عمايل
عندكم كيف ..؟

Post: #10
Title: Re: شكلها حتكون تاريخية
Author: Hussein Mallasi
Date: 13-07-2005, 08:05 AM
Parent: #9

بدأت - ايضاً - في عمل عمايلها يا عادل.

Post: #12
Title: Re: شكلها حتكون تاريخية
Author: Hussein Mallasi
Date: 13-07-2005, 08:16 AM
Parent: #10

من الطاف الله؛ ان الامطار قد بدأت في الهطول
بعد ان عاد معظم التلاميذ/ات الصغار الى بيوتهم.

Post: #11
Title: Re: شكلها حتكون تاريخية
Author: بلدى يا حبوب
Date: 13-07-2005, 08:16 AM
Parent: #1

ملاسى

يا زول انته فكى
الخرطوم الان تتعرض لامطار غزيرة جعلها الله امطار خير وبركة
تحياتى

Post: #13
Title: Re: شكلها حتكون تاريخية
Author: Hussein Mallasi
Date: 13-07-2005, 08:20 AM
Parent: #11

سلامات يا حبوب؛

Quote: جعلها الله امطار خير وبركة

آمين.

Post: #14
Title: Re: شكلها حتكون تاريخية
Author: waleedi399
Date: 13-07-2005, 09:23 AM
Parent: #1


حسـيـن ملاســي ..


قولي فرتقت ولا لسة قاعـدة

دحين دي ما سحابة الصيف البقولوها ذاتها؟؟

والله صـورك دي تخوف عدييييل كدا

الله يسـتر على البسكـويت

اللهم حوالينا ولا علينا

اللهم اجعله مطر رحمة لا مطر عذاب

اللهم طهر بها القلـوب من الدنس والخطايا والذنوب

Post: #15
Title: Re: شكلها حتكون تاريخية
Author: محمد حامد جمعه
Date: 13-07-2005, 09:57 AM
Parent: #14

هسة كنت فى شارع القصر جوار المريديان

مبالغة .... المياه وصلت الركب .... واظن بكره حيكون عطلة .... مطرية !

Post: #16
Title: Re: شكلها حتكون تاريخية
Author: Esameldin Abdelrahman
Date: 13-07-2005, 10:05 AM
Parent: #15

دي بركات شيخ قرنق

Post: #24
Title: Re: شكلها حتكون تاريخية
Author: Hussein Mallasi
Date: 14-07-2005, 06:49 AM
Parent: #16

سلامات يا عصام الدين؛

Quote: دي بركات شيخ قرنق

أكيد.

Post: #28
Title: Re: شكلها حتكون تاريخية
Author: المكاشفي الخضر الطاهر
Date: 14-07-2005, 08:02 AM
Parent: #16

Quote: دي بركات شيخ قرنق




Post: #23
Title: Re: شكلها حتكون تاريخية
Author: Hussein Mallasi
Date: 14-07-2005, 05:08 AM
Parent: #15

سلامات يا محمد؛

Quote: واظن بكره حيكون عطلة .... مطرية !

لو كانت استمرت تاني نص ساعة؛
كان حيكونوا يومين إجازة.

Post: #22
Title: Re: شكلها حتكون تاريخية
Author: Hussein Mallasi
Date: 14-07-2005, 04:55 AM
Parent: #14

كيفك يا وليد؛

Quote: دحين دي ما سحابة الصيف البقولوها ذاتها؟؟

سحب الصيف دي توجد - فقط - في الترجمات
اللبنانية للروايات العالمية ...



Post: #17
Title: Re: شكلها حتكون تاريخية
Author: lana mahdi
Date: 13-07-2005, 10:08 AM
Parent: #1

عندنا سخانة تقلي حبة البن هنا
ومعاها رطوبة
غايتو اللهم لا حسد
اتمتعوا بالمطرة دي كويس
السنة الفاتت كان نفسي احضر مطرة فى السودان
كل الحضرتو رشة ساكت زى الزول بخا ليهو موية فى حوش
محبتي حسين

Post: #26
Title: Re: شكلها حتكون تاريخية
Author: Hussein Mallasi
Date: 14-07-2005, 07:31 AM
Parent: #17

سلامات يا لنا؛

Quote: غايتو اللهم لا حسد

قبل المطرة دي مرت على الخرطوم ايام
من السخانة و الاتربة خلت الزول يشتاق
لرطوبة الخليج.


و غايتو لو حتجوا اجازة السنة دي؛
ما تنسوا تجيبوا معاكم العوامات.


Post: #18
Title: Re: شكلها حتكون تاريخية
Author: هشام مدنى
Date: 13-07-2005, 10:38 AM
Parent: #1

استاذنا حسين
بقولوا فى السعودية بعد كل موسم حج بنزل مطره.
اكيد ليها اسبابها الربانية.
هى كرم من عند الله للسودان لبداية عهد خالي
من الدماء والاحقاد وعذاب الخلق.
اللهم اكرم اهل السودان بخيراتك
واكرمه القوة لحرث ارضهم.

نسأل ان يصلح حال البلاد والعباد
ويحفظها من الفتن ما ظهر منها وما بطن
اللهم أمين

Post: #19
Title: Re: شكلها حتكون تاريخية
Author: Dr.Mohammed Ali Elmusharaf
Date: 13-07-2005, 11:39 AM
Parent: #1

أخوي الفاضل حسين
شوارع المتعافي الجديدة لسه صامده


Quote: مناظير
تِلت التلاتة كم؟!

زهير السراج

[email protected]


لا أحد من المختصين في الطرق والجسور، يريد أن يسأل والي الخرطوم «تلت التلاتة كم»!!
لا المجلس الهندسي، ولا الجمعية الهندسية، ولا اتحاد المهندسين ولا كليات الهندسة في الجامعات السودانية، ولا معهد بحوث البناء والطرق، ولا بيوت الخبرة في مجال تشييد الطرق والجسور، ولا المهندسين!!
لا أحد من هؤلاء يريد أن يسأل الوالي، أو حتى يكتب في الصحف عن أفاعيل الوالي في طرق وجسور ولاية الخرطوم، فهو يفعل ما يريد، وقتما يريد، بالطريقة التي يريد.. بدون اعتبار لمواصفات فنية او ادارية أو مالية، وكأن ولاية الخرطوم وطرقها ماركة مسجلة له، وكأن المنصب الذي يشغله احدى شركاته الخاصة، يتصرف فيها بما يحلو له!!
ولم يكن غريباً أن تكون النتيجة هي تلك الأخاديد والمستنقعات والتصدعات الأرضية، التي تمتد على طول الخرطوم وعرضها، ويطلق عليها الوالي زوراً وبهتاناً اسم «طرق أسفلت»، ثم يجد من يحرق له البخور ويكتب بدون حياء أو خجل عن «ثورة الطرق» في ولاية الخرطوم التي يقودها والي الخرطوم.. وهي «ثورة» لم تستطع الصمود لحظة واحدة امام اول امطار تنهمر على ولاية الخرطوم، وتكشف عورة هذه الطرق، وسوءاتها وهشاشتها، وضعف مواصفاتها، وجهالة وضعف الشركات التي كُلفت بتنفيذها. والمسؤول الأول والأخير عن ذلك هو الوالي الذي حاول أن يتملص من مسؤولياته قبل بضعة اسابيع، وألقى باللوم على قلة خبرة الشركات الهندسية والمهندسين السودانيين في تشييد الطرق.. عندما سأله الزميل احمد عمرابي بصحيفة «أخبار اليوم» عن تصدع «طريق العرضة» الذي لم يمر على إعادة تشييده وافتتاحه امام حركة السير غير أسابيع قليلة!!
وللاسف الشديد.. لم يجد الوالي من يرد عليه من الجهات التي ذكرتها أعلاه.. واستطيع القول بكل وضوح، وأنا مرتاح الضمير والبال.. ان كل الذين يجلسون على قمة تلك الجهات، اثبتوا بما لا يدع مجالاً للشك، ضعفهم وقلة حيلتهم وعدم قدرتهم على تحمل أمانة المسؤولية المهنية التي قبلوا حملها.. ولم يحافظوا عليها!!
والدليل على ذلك.. الصمت المريب الذي يواجهون به تصرفات الوالي والأساليب التي يتبعها في منح امتيازات تشييد الطرق لشركات فقيرة فنياً وادارياً ومالياً، لدرجة أن الوالي نفسه الذي اختار هذه الشركات لتنفيذ الطرق، شن عليها هجوماً في مؤتمر صحفي ووصفها بالضعف المهني وقلة الخبرة.. وكأن هذا يعفيه من مسؤولية اختيار هذه الشركات، وتجاوزه للوائح والاجراءات الحكومية المعروفة!!
لقد كتبت اكثر من مرة في هذا المكان، وقلت للوالي ولبعض مرؤوسيه في أكثر من مناسبة.. أن معظم الطرق يتم تشييدها بمواصفات ضعيفة جداً، فتنهار باسرع مما يتوقع اي احد.. وكان الرد الجاهز على لسان الوالي ومرؤوسيه «بأن الامكانيات لا تسمح بتشييد طرق بمواصفات جيدة، وأن الطرق التي ننشئها، هي طرق قليلة التكلفة». اي باختصار.. طرق هشة وضعيفة ولا وجود فيها لمصارف مياه أو مجارٍ، أو جزر، أو انارة، أو مداخل أو مخارج، أو علامات مرورية، ولا تصلح حتى لسير عربات الكارو والدراجات، دعك من العربات والشاحنات الثقيلة.. وهي قابلة للذوبان والتصدع والتحول الى مستنقعات وأخاديد مع هطول اول امطار الخريف، بل قبل ذلك، وهي تحتاج الى صيانة مستمرة فتصبح أعلى تكلفة من الشوارع ذات المواصفات الممتازة، وتعوق حركة المرور، وتعرض أرواح الناس للخطر، وتضيع الوقت، وتهلك المركبات، وتزيد استهلاك البنزين وقطع الغيار.
إن انهيار وتصدع الطرق في ولاية الخرطوم، جريمة لا تقل بأية حال من الأحوال عن انهيار عمارة الرباط.. وإذا كان وزير الداخلية، قد تحمل المسؤولية، واستقال من منصبه بكل جرأة وشجاعة، فماذا ينتظر والي الخرطوم؟
وماذا ينتظر الذين بإمكانهم أن يقيلوه ويحاسبوه؟!
إنني أضع هذا الملف أمام الحكومة الانتقالية.. وأتمنى أن يكون أول المهام التي يضطلع بها النائب الأول الجديد!!



http://alsahafa.info/news/index.php?type=6&issue_id=682&col_id=9&bk=1


تحياتي

Post: #20
Title: Re: شكلها حتكون تاريخية
Author: Tabaldina
Date: 14-07-2005, 02:20 AM
Parent: #1

..
.
حقيقة يا ملاسي طلعت تاريخية..
للأسف الشديد امطار 88 تكررت وخصوصاً فى الأطراف
الحاج يوسف/ امبده / الثورات الورا هناك ديل / الكلاكلات
خسائر شديدة فى المنازل وانهيار البيوت ..

Quote: كويسة معانا؛ فبها ينخفض استهلاكنا للكهرباء.

دى قلبت فيها الهوبة .. بس بالله النقطة دى متين نتجاوزا يعنى اقل هبوب
ولا شكشاكة ساي ناس الكهرباء ديل يقطعوها .. والحالة جمرة خبيثة ومن حقنا كلو

Quote: و على كل حال السحاب الفوق دا شكلو بُعاق بُعاق.

والله انا زيك داير نفرز البعاق دا ياتو فيهن.

داخل الأطار :
مقال د. زهير .. يحتاج لموضوع نقاش كامل
صراحة التلاعب فى الطرق بالعاصمة ومنح العطاءات لشركات عديمة خبرة
وتشوف القلابات والحفير والتعطيل بالشهور تقول القبة تحتها فكي
لكن فى النهاية ثغرة مأكل جديدة واستغلالية وعدم حرص ومسئولية ..

تحياتي ،،،

Post: #21
Title: Re: شكلها حتكون تاريخية
Author: Ahmed Osman
Date: 14-07-2005, 02:51 AM
Parent: #20

الاخ ملاسى
تفاءلت بهطول هذه الامطار رغم الخسائر الا ان خيرها اكبر

واتمنى ان يجرف سيلها كل الاحقاد السياسية والعنصرية

هطلت الامطار فى هذا التوقيت لتحرض المروءة السودانية

لترسم ملامحها فى سوداننا المرتقب
لنتكاتف مع المتضررين
-------

اغنبة من88
مطر الخريف ماداير يقيف
نحنا بيتنا وقع - انتو بيتكم كيف؟

Post: #25
Title: Re: شكلها حتكون تاريخية
Author: yasir Abdelgadir
Date: 14-07-2005, 07:24 AM
Parent: #21

سلام للكل ومبروك عليكم المطر
مطر 88 دي كانت حكايه ... كنا برالمه وانقطعنا في البركس عدة اسابيع وكانت مراكب نادي الصيد هي وسيلتنا الوحيده للتنقل بين الغرف والسفره. فاذا اردت الذهاب لدار الاتحادعليك بالمركب.
د. ياسر

Post: #27
Title: Re: شكلها حتكون تاريخية
Author: بلدى يا حبوب
Date: 14-07-2005, 07:31 AM
Parent: #1

ملاسى
اه يا زول الليلة شنو رشاش والله غرق عديل يا شيخنا
---------
Quote:

الخرطوم في 14/7(سونا) اعلن قسم التنبؤات الجوية ان الفاصل المداري يمر حاليا شمال وادي حلفا الامر الذي يضع البلاد بأسرها تحت احتمال التعرض للأمطار خاصة وان البلاد تقع تحت تاثير الرياح الجنوبية الرطبه
واوضح مصدر مسئول بالتنبؤات الجوية ان ولاية الخرطوم تعرضت مساء امس الي امطار متفاوته بلغت حدتها في جنوب الخرطوم
جلت منطقة الشجرة 90 ملم كاعلي معدل وعند مطار الخرطوم 70ملم الارصاد(الرئاسة) 5ر64 ملم , الجريف غرب 65 ملم الكلاكلة القطعية 64ملم جامعة افريقيا 61 ملم , الرميلة 59 ململ , الصحافة 56ملم و سوبا الحله54 ملم , طيبة الاحامدة 37 ملم و مصرف شمبات 24 ملم و الصافية 23 ملم , بحري الشرطة 21.6 ملم ,الموردة البوستة 20 ملم , حي العرب 20 ملم , الملازمين 19 ملم و الثورة 18 ملم , ابوسعد5ر19 ملم توتي 17 ملم
اما في باقي مدن البلاد فقد سجلت واو 20 ملم , القضارف 8ر6 ملم , حلفا الجديدة 6 ملم , ود مدني 6ر5 ملم و ابونعامه 9ر1 ملم , الابيض 1.7 ملم , بابنوسه والدمازين 1 ملم

جعلها الله امطا خير وبركة
تحياتى

تحياتى

Post: #30
Title: Re: شكلها حتكون تاريخية
Author: عادل فضل المولى
Date: 14-07-2005, 08:15 AM
Parent: #27

شفت يا حسين قالو ليك الشجرة وصلت كم..؟
90 ملم
لله الحمد من قبل ومن بعد
تخريمة-
ما عندكم مصرف فاضي..؟

Post: #31
Title: Re: شكلها حتكون تاريخية
Author: Hussein Mallasi
Date: 14-07-2005, 08:15 AM
Parent: #27

سلامات يا استاذ هشام؛

Quote: استاذنا حسين

أصاب بالارتباك التام عندما اقرأ أستاذنا حسين.


و فعلاً زي ما قلتا؛ ان شاء الله تغسل بعض:
Quote: الدماء والاحقاد وعذاب الخلق.

Post: #37
Title: Re: شكلها حتكون تاريخية
Author: هشام مدنى
Date: 15-07-2005, 01:19 AM
Parent: #31

Quote: أصاب بالارتباك التام عندما اقرأ أستاذنا حسين.


أستاذنا حسين
عاطر التحايا
تعليقاتك دائما تذكرنى ايام زيارتي لمدينة خليوة باتبرا
كنت اقيم فى دار أستاذنا الفاضل والعم والاب عبدالرحمن عبدالله اطال الله عمره
كانت تعليقاته اشبه بتعليقاتك.
خاصة مداخلتك فى بوست د.معز ردا على الاستاذ عصمت العالم.
لذلك تظل أســـتاذنا.

Post: #29
Title: Re: شكلها حتكون تاريخية
Author: omar ali
Date: 14-07-2005, 08:09 AM
Parent: #1

Quote: أمطار غزيرة وسيول عارمة بالعاصمة
Thursday, July 14

اجتاحت العاصمة القومية عصر ومساء امس امطار غزيرة وصلت الي 70 ملم وسيول بكل من الجيلي والحتانة وانهارت عشرات المنازل بالعاصمة وعدد من السايفونات والمراحيض وقال العميد يوسف حسين ضرار مدير ادارة الدفاع المدني في تصريح خاص لـ«اخبار اليوم» انه وصل امس حوالي 19 بلاغ بانهيار عشرات المنازل في 19 منطقة بالخرطوم وهي العزوزاب ،اركويت ،العشرة ،ابو آدم ، اللاماب ، ام بدة ، الحارة العاشرة ،الثورة الحارة 17، الديوم الشرقية المايقومات ، الترعة الحاج يوسف الاشلاق.

وقال سيادته انه توجد سيول غزيرة جدا بمنطقة الجيلي لم تحدد خسائرها حتي كتابة هذه المادة وتوجد سيول في الحتانة جرفت مواطنا أنقذه تشبثه بشجرة أسرعت إليه قوات الدفاع المدني وانقذته . وانهارت عدد من السايفونات بالعاصمة وقال سيادته إن عربات الاسعاف توجهت لمنطقة الجيلي لإغاثتها .

وعلمت «اخبار اليوم» من اتصالات هاتفية من بعض مواطني منطقة الجيلي ان السيول قد جرفت عددا من الأبقار والمواشي بالمنطقة وجرفت أشياء أخرى منها طفل تم انقاذه بواسطة المواطنين وفتاة تم انقاذها ايضا . وقال المواطن احمد عبد الرؤوف لـ«اخبار اليوم» في اتصال هاتفي ان الامطار دهمت قرابة المائتي نزل وعددا كبيرا من المواشي والاثاثات ، اما المواطن فضل الله خوجلي فقد قال ان السيول جرفت فتاة في الثالثة عشر من عمرها تم إنقاذها وطفلا في الثالثة من عمره وقال الاستاذ محمد صباخ الخير اخصائي الارصاد ان العاصمة لم تشهد امطارا بهذه الغزارة من قبل فقد وصلت إلى 70 ملم وقال إن سبب الامطار هي سحب تكونت شرق الخرطوم بعد الظهيرة أثرت علي ولاية الخرطوم وجزء من ولاية نهر النيل واتجهت غربا وستؤثر علي مناطق شمال كردفان مساء وذكر انه لا توجد سحب ممطرة في مناطق وسط وشمال الوسط من البلاد .

ومن ناحية اخري تسببت الامطار في اعاقة حركة المرور لمدة ثلاث ساعات وعند الساعة التاسعة مساء قامت «اخبار اليوم» بجولة استطلاعية واسعة بمواقف خطوط المواصلات بالخرطوم حيث تكدس عدد كبير من المواطنين انتظارا لوسائل المواصلات حتى تقلهم الي مناطق سكنهم وهم في حالة عجز تام عن بلوغها لبعدها وغياب المواصلات .. إلتقينا أشرف آدم وادي الذي قال : منذ الساعة السادسة مساء وانا اقف هنا بالموقف من اجل وسيلة مواصلات لتقلني الي منزلي حيث اسكن منطقة سوبا الاراضي ولكن حتي هذه اللحظة لا جدوي ولا امل وأناشد ادارة المرور بالنزول ميدانيا الي مواقف المواصلات للمتابعة والزام اصحاب المركبات بحمل الركاب وان ينزلوا الشارع العام لمشاهدة المواطنين وهم واقفون في انتظار المواصلات . ويضيف اشرف قائلا دائما في أيام الامطار نعود الي منازلنا متأخرين وكل مرة نجأر بمناشدة الجهات المختصة ولا حياة لمن تنادي .

من جانبه قال الهادي يعقوب : الامطار بالعاصمة دائما تتسبب لنا في اعاقة حركة المواصلات .من المسؤول؟ هل اصحاب المركبات ؟ أم إدارة المرور التي من جانبها لا تلزم اصحاب المركبات في مثل هذه الظروف بحمل الركاب؟ ام المسؤولون بالمعتمدية ؟ أصبحنا يوميا نعاني من مشكلة المواصلات خاصة ان مواطني سوبا الحلة فنحن نعاني من مشكلة مواصلات حادة اصبحت تسبب لنا هاجسا يؤرقنا خاصة بعد نزول الامطار . وقال قاسم عبد الرحمن ادروب الامطار بالعاصمة مشكلة لانني لاحظت بأن العاصمة وخاصة مواقف المواصلات تعاني من مشكلة صرف المياه ينعكس ذلك سلبا علي المواصلات وحركة المرور وانا منذ العصر ظللت اقف في انتظار وسيلة مواصلات لمحلية الكلاكلة ولكن لا جدوي والغريب في الامر ان الولايات احسن حالا من العاصمة من ناحية تصريف المياه وعلي المسؤولين مراعاة ذلك واحيي اهلي ببورتسودان حي سلالاب مربع 2 وجعلها الله امطار خير .

ويقول وليم موسي الامطار تسببت في اعاقة حركة مرور المواصلات وانا اقف منذ الساعة السابعة مساء وحتي الان محتار في وسيلة لتقلني الي سوبا الاراضي .

ومن جانبه قال صمويل موانج: الامطار غزيرة والمواصلات صعبة وما زلنا كالعادة نعاني من ازمة في المواصلات دائما في يوم هطول الامطار نناشد بوضع الحلول للأزمة من اجل تخفيف العبء علي المواطنين خاصة وان هنالك بعض المواطنين لا يستطيعون ان يستقلوا التاكسي او امجاد ويعتمدون حسب دخلهم علي المواصلات العامة .

ويقول عباس عوض الكريم علي: ظللت واقفا لساعات طويلة واصحاب الحافلات وحتي الامجاد والتاكسي يتهربون ولا يريدون حمل الركاب .

اما نزار محمد عيسي وبكاسو جوت اوضحا بانهما ظلا بموقف الصحافة بالخرطوم لساعات طويلة ولم يجدا أية وسيلة للمواصلات .

والتقينا بالسائق همزة فضل المولي خط الكلاكلة قال: نحن لا نرفض حمل المواطنين لكن الامطار غزيرة ونخشي ان تتسبب لنا في حوادث مرورية .

اما السائق عبد الواحد محمد عيسي قال الشوارع رديئة والتصريف ايضا رديء لذلك ودائما عقب الامطار المركبة تحتاج الي صيانة مكلفة بسبب ذلك .

Post: #32
Title: Re: شكلها حتكون تاريخية
Author: Hussein Mallasi
Date: 14-07-2005, 09:39 AM
Parent: #29

سلامات يا محمد المشرف؛

Quote: شوارع المتعافي الجديدة لسه صامده

مررت اليوم صباحاً بالشوارع التالية:

1- الاربعين؛ قديم؛ و كان كويس.
2- العرضة؛ من الشرق للغرب؛ قديم و فظيع.
3- العرضة من الغرب للشرق؛ جديد؛ و كان كويس.
4- الموردة ... حديد طبعاً.
5- الغابة؛ جديد؛ و كويس جداً.

و بقية شوارع المتعافي سأقوم بالتفتيش عليها
مساء اليوم الخميس.


Post: #33
Title: Re: شكلها حتكون تاريخية
Author: المكاشفي الخضر الطاهر
Date: 14-07-2005, 09:47 AM
Parent: #32

ملاسي
كيفك التحايا والاشواق

كدا تعال بشارع الوادي عشان يغمى عليك

Post: #34
Title: Re: شكلها حتكون تاريخية
Author: MaxaB
Date: 14-07-2005, 10:13 AM
Parent: #1


سلام .. يا حسين

زمان لما كنا صغار .. كنا لما نشوف بوادر مطر .. بندعي " يالله مطرة .. حدها النخرة .. يالله مطرة .. حدها النخرة " .. الله ستر ما كنا بنصلي الوقت داك !.


رب اجعل هذا بلدا آمنا و ارزق أهله من الثمرات

مكسب

Post: #35
Title: Re: شكلها حتكون تاريخية
Author: Dr.Mohammed Ali Elmusharaf
Date: 14-07-2005, 01:45 PM
Parent: #1

الرجل الرائع ملاسي
الله اديك الصحة والعافية....ودمت لنا
اخوك محمد الشرف

Post: #36
Title: Re: شكلها حتكون تاريخية
Author: Muna Khugali
Date: 14-07-2005, 11:22 PM
Parent: #35

الله يستر من خميس 88 ياملاسي
اللهم ألطف بنا فبيوتنا وشوارعنا لاتحتمل


والله لـو هـاتوقـع بيـوت الحـرامية ..نقـول مـرحـب بالفيضـان..لكـن المشـكـلة هـي ايضـا تبـدوا متآمـرة!

مـني عوض خـوجـلي

Post: #38
Title: Re: شكلها حتكون تاريخية
Author: Hussein Mallasi
Date: 15-07-2005, 10:39 AM
Parent: #36

سلامات يا احمد عثمان؛

Quote: واتمنى ان يجرف سيلها كل الاحقاد السياسية والعنصرية

و لو جرف سيلها كل الحاقديين
و العنصريين كمان يكون ما بطال.

Post: #39
Title: Re: شكلها حتكون تاريخية
Author: Hussein Mallasi
Date: 15-07-2005, 10:41 AM
Parent: #38

سلامات يا ياسر؛

Quote: فاذا اردت الذهاب لدار الاتحادعليك بالمركب.

السنة دي شكلها كدا انو المراكب
لازم يركبوا ليها موتورات.

Post: #40
Title: Re: شكلها حتكون تاريخية
Author: Hussein Mallasi
Date: 15-07-2005, 10:59 AM
Parent: #39

سلامات يا عادل؛

Quote: ما عندكم مصرف فاضي..؟

مصارفنا لم يعد بها متسع من العربات؛
الشي التقول حفروها يشركوا بيها للعربات.

Post: #41
Title: Re: شكلها حتكون تاريخية
Author: Hussein Mallasi
Date: 15-07-2005, 11:03 AM
Parent: #40

بلدي يا حبوب؛

عمر علي؛

الف شكرا على الاقتباسات ذات التفاصيل الوافية.

Post: #42
Title: Re: شكلها حتكون تاريخية
Author: Hussein Mallasi
Date: 15-07-2005, 11:07 AM
Parent: #41

سلامات يا مكسب؛

Quote: زمان لما كنا صغار .. كنا لما نشوف بوادر مطر .. بندعي
" يالله مطرة .. حدها النخرة .. يالله مطرة .. حدها النخرة "

شكلك دا لحدي اسه بتدعي لهطول المطرة الحدها النخرة.


Post: #43
Title: Re: شكلها حتكون تاريخية
Author: Hussein Mallasi
Date: 15-07-2005, 11:14 AM
Parent: #42

كيفك يا المكاشفي؛

Quote: كدا تعال بشارع الوادي عشان يغمى عليك

كدي خلي شارع الوادي للمطرة الجاية؛
اسه بتكون نشفت.

Post: #44
Title: Re: شكلها حتكون تاريخية
Author: Hussein Mallasi
Date: 15-07-2005, 11:22 AM
Parent: #43

سلامات يا تبلدينا؛

Quote: والله انا زيك داير نفرز البعاق دا ياتو فيهن.

اذاً دعنا نوجه النداء سوياً؛
لكل من يعرف ما هو البُعاق.

Post: #45
Title: Re: شكلها حتكون تاريخية
Author: Hussein Mallasi
Date: 15-07-2005, 11:25 AM
Parent: #44

سلامات يا المشرف؛

Quote: الله اديك الصحة والعافية...


و لك الدعوات الطيبات مضاعفة.

Post: #46
Title: Re: شكلها حتكون تاريخية
Author: Hussein Mallasi
Date: 15-07-2005, 11:27 AM
Parent: #45

Quote: كنت اقيم فى دار أستاذنا الفاضل والعم
والاب عبدالرحمن عبدالله اطال الله عمره

يا سلااام يا هشام؛ اطال الله بقاءه و متعه بالصحة و العافية.

Post: #47
Title: Re: شكلها حتكون تاريخية
Author: Haydar Badawi Sadig
Date: 15-07-2005, 11:38 AM
Parent: #46

ِشكراً، عزيزي حسين،

هذه علامة خير. وقد كان
أهلنا يستبشرون بمثل هذا
الهطول المدرار. ويصلي لها
المسلمون للاستسقاء.

فلنستبشر بها نحن أيضاً.
بشراك، وبشرانا، بها وبنزول
بشريات السلام مدارة هطالة!

دمت في حفظ الله.

Post: #48
Title: Re: شكلها حتكون تاريخية
Author: Hussein Mallasi
Date: 15-07-2005, 11:38 AM
Parent: #46

كيفك يا منى؛

Quote: لكـن المشـكـلة هـي ايضـا تبـدوا متآمـرة!


Post: #49
Title: Re: شكلها حتكون تاريخية
Author: Esameldin Abdelrahman
Date: 15-07-2005, 01:19 PM
Parent: #48

Quote: والدفاق : المطر الواسع الكثير المندفق والعزايل مقلوب من العزالي جمع العزلاء ، وهي فم المزادة ، شبه ما يمطر من السحاب بما يتدفق من فم المزادة .
والبعاق بالضم : السحاب الذي يتبعق بالماء ، أي يتصبب وقيل : البعاق : المطر العظيم ، والجم الكثير .

http://www.al-shia.com/html/ara/books/behar/behar20/a31.html

Post: #50
Title: Re: شكلها حتكون تاريخية
Author: الملك
Date: 15-07-2005, 02:01 PM
Parent: #49

ملاسى

....
....

سلامات ومشتاقين

إنت عارف لو الأمطار دى ذادت نص ساعة

كانت الخرتوم دى


بقت








تأريخ

Post: #51
Title: Re: شكلها حتكون تاريخية
Author: Hussein Mallasi
Date: 16-07-2005, 06:53 AM
Parent: #50

سلامات يا حيدر؛

Quote: فلنستبشر بها نحن أيضاً.
بشراك، وبشرانا، بها وبنزول
بشريات السلام مدارة هطالة!
دمت في حفظ الله.

بارك الله فيك يا حيدر؛
و ان شاء الله ننعم جميعاً بما
ستأتي به الامطار ...... و السلام.

Post: #52
Title: Re: شكلها حتكون تاريخية
Author: Hussein Mallasi
Date: 16-07-2005, 06:58 AM
Parent: #51

سلامات يا عصام الدين؛

Quote: والبعاق بالضم : السحاب الذي يتبعق بالماء ،
أي يتصبب وقيل : البعاق : المطر العظيم ، والجم الكثير .

الف شكر على المعنى الوافي؛
و فعلاً مطرة يوم داك ما كان ممكن تكون الا بُعاق .


Post: #53
Title: Re: شكلها حتكون تاريخية
Author: قرشـــو
Date: 16-07-2005, 07:04 AM
Parent: #1

الأستاذ ملاسى


لك التحية



طبعا كانت امطار قوية ولا شك ولكن الحمد لله الخسائر كانت قليلة ما وصلت سنة 88 ..

ولكن يقول محدثى بان اتصالا من اديس ابابا معه يخبره عن هطوال امطار استمرت اربعة ايام بلياليها واهل اديس يقولوا هذه لم تأتى منذ ثلاثون عاما....


ده معناه اننا على أعتاب فيضانات الله يقدرنا عليها بس..

ستكون هذه اول امتحان للحكومة الجديدة وليتها تستعد منذ الان للقادم من قبل الطبيعة..


ربنا يجعلها كلها رحمة وبركة لاهلنا الغبش ..

Post: #54
Title: Re: شكلها حتكون تاريخية
Author: Hussein Mallasi
Date: 16-07-2005, 07:09 AM
Parent: #53

مشتاقين يا الملك؛

Quote: إنت عارف لو الأمطار دى ذادت نص ساعة
كانت الخرتوم دى
بقت

تأريخ




الحمد لله انها ما زادت النص ساعة دي.

Post: #55
Title: Re: شكلها حتكون تاريخية
Author: Hussein Mallasi
Date: 16-07-2005, 07:15 AM
Parent: #53

سلامات يا عمدة و مشتاقين؛

Quote: ولكن يقول محدثى بان اتصالا من اديس ابابا معه يخبره
عن هطوال امطار استمرت اربعة ايام بلياليها واهل اديس
يقولوا هذه لم تأتى منذ ثلاثون عاما....

الله يستر؛ فالفيضانات هي الاكثر دماراً.

Post: #56
Title: Re: شكلها حتكون تاريخية
Author: المكاشفي الخضر الطاهر
Date: 16-07-2005, 07:23 AM
Parent: #1

الاخ ملاسي


اسي الجو كيف شايف فى غبار وسخانة شديدة



لكن ما شائف سحاب