Post: #1
Title: **** برطعة في القصر الجمهوري ****
Author: اسماء الجنيد
Date: 04-19-2011, 05:35 PM
سلام وتحية للجميع ونواصل المشهد التالت من المسرحية
المشهد الأول كان تحت إسم حرررم نتلب في تل ابيب
المشهد التاني الطيارة ام ضنب
نجي نشوف المشهد التالت مع البرطعة في القصر الجمهوري
****
قبل ما يتخارج الطفل المعجزة مصطفي اسماعيل كويس من مكتب البشير
يجي نابل زي النبلة نافع الما نافع
ايوة يا ريس انا هنا قريب
ينط الريس
قريب وين ؟ قريب زي قرابتك مع اهلك اليهود الفتنتني معاهم.!!!
كنت وين جاي تدبأ لي زي الحرامي؟
متلبد زي الدبيب ورا الصريف في الخريف!!
كنت بتتجسس علي زي ما قال شيخ علي ؟؟
بتجسس علي آآآآآ نافع ؟
يقاطع نافع
لا حررررررم
انا عارفك بتناديني بعدما نضمت مع عليي عثمان
بعدين يا ريس البخليهو هو شيخ علي، وانا نافع حااااااف شنو ؟
يقاطعو الريس
آآ آآآآي حاااااف وكمان ماك نافع زاتك
كتر خيري انا الزمن ده كلو بناغمك على غباي بي نافع
الله ينتف جلدك كان نتفت ريشي وقصرت اجلي
انا عارفك بتجسس علي وبتجسس على البلد دي كلها
ده ما شغلك البتاكل منو عيشك .
يقاطع نافع ,,
انت مالك الليلة نفسك حار معاي كده يا ريس؟
اكيد علي عثمان ده قال ليك كلام زعلك مني,
ينهره الريس بي حدة
وانت بالله عليك و في زمتك دي ياتو يوم عملت ليك حاجة كويسة؟؟
ما ياها حالك ، كلها مسويها ضرب وإعتقالات و تعذيب في الناس وبيوت اشباح وملافيظ ورجالة بي ضراعك ، وفي الأخير جابتلها مساخة .
لحس الكوع دي زاتها اتعلمناها منك انت.
كل البلاوي دي جبتها معاك من كورساتك الجيت بالينها بيها من إيران
عذبت الناس وكرهتهم فينا
وهسة ضربة اليهود لينا في بورتسودان دي كلها طالعة من راسك المقودس ده.
ويهب الريس داير يعمت نافع
وتقوم الكركبة
كرب رب كو كع بردلب تااااااخ
كلو في الهواء ساااااااي
ده يلافح وداك يتدرق ويتحرقص ويفنجط من تربيزة لي تربيزة
ومن كرسي لي كرس
يكورك آآآآ زول اقيف ,,, اقيف آآآ زول النحكي ليك انا
اقيف كدي اسمعني زي ما سمعت شيخك علي ده
اسمعني بعدين الداير تسويهو سويهو ...
علي بالطلاق طلاق تلاتة الزول الإسمو علي عثمان ده بدور
يطفشني من البكان ده حسادة سااااااي منو
. علي ده مكجني من يوم اتلاقينا
حررم قلبي ابى دخلته عليك الليلة في مكتبك , من قبيل بزازي بي برة
. عااااارفو جاك هنا ضرا شراه ومشا
انت زاتك خابرو وخابر مساختو معاي.
انت نسيت يوم عيد الضحية الفات ده؟
جيت باركت ليكم العيد
من الصباح . طايبت الناس كلها ، من جيت عندو هو
سلمت عليهو وقتلو العيد مبارك عليك العفو لله والرسول
نتل ايدو من ايدي وفات
ما بدورلو عفوا معاي ولا بدورني ..
ينط الريس
نان انت بتندار يا الطير ابو منقار
قاعد تنقر في روسينا من طرف ونحن مانا خابرين.
كل يوم بلية منك
وانا قاعد فوق اضني التخان ديل
التقول محوطني عند وداعية
قدر ما يقولوا لي ات فعلا ماك نافع
, اشيل واتعضر لك التقول انا ابوك
الببو اليشقك نصين
نص نوديهو دارفور للناس الهجمتهم ورجمتهم وشردتهم.
ونص اسفروا لليهود ان شاء الله يترسوا بيك الشارع
ولا يسدوبك حفرة ,,
,,,,
العوا حدها السماء والحليفة واقفة ألف أحمر
وريسنا يغلي ويزبد
والعرق يتنتف منو زي موية نقاع زير السبيل
ونافع قلبو ينتح متل طاحونة الملح من الجكة والتدرق
يعاين لي الريس بي طرف عينو، اها بتسمعني ولا افوت ؟
يقاطعو الريس بي نهرة
تفوت وين ؟؟ تفوت وين يا الدابي اب درقتين ؟؟؟
والله الليلة يحلك مني الحلا بلة
نافع
سمح اسمعني وبعدين افجخني في البكان ده
إن شاء الله تقرشني بي سنونك انا قبلان
الريس ,, اقرشك ؟ مالي جنيت
بتدور تسممني ؟؟
حرم افجخك بي جزمتي دي
وأطرشقك وأبعج بطنك ، والله إلا يخموك بي كوريق من هنا
ونافع يحاول بكل قواه وحيلته انه يهبد الريس في كرسيه
لأنه منظر الريس بلا هيجان وبلا زعلة لا بتقابل ولا بتصابح.
ناهيكم عن الغضبة والفوران المخلياه يرغي ويزبد ،،
تحلف تقول التور الهايج في السلخانة
غالب الضباحين والجزازير من المسكة و الضبح..
بعد مزازة و خراج روح حتي قبل الريس يسمع كلام نافع
الريس
اتكلم لكن بي شرط
عندك ربع ساعة دقيقة ما تزيدها ،واي كضبه والله الليلة إلا تنوم في شرفي
دايرين ترحلوني وتقعدوا تقدلوا فيها إنتو ؟..
. تقعدوا في نارا جمرها يشطشط
بدأ نافع روايته
اسمع يا ريس البتقول عليه شيخ علي ده
داير كرسيك الهسه انت قاعد فيهو ده
,,
يحمر ليهو الريس وداير ينط ..
اصبر النتم كلامي وبعدين انت اجدعوا في البحر
علي بالطلاق الزول ده كل يوم مسافر وكل يوم في بلد،
انت عارف علي ده زاتو هو دبر محاولة إقتيال حسني مبارك في الحبشة
وانت زاتك يا ريس زعلت من الموضوع ده لما عرفت علي خطط ودبر الموضوع من وراك.
والترابي حي الدنيا دي شاهد على الكلام ده.
هداك ليه متفن في السجن امشي اسعلو,
وبعدها مشا خت راسو مع حسني مبارك زاتو وخلاك تتنازل من حلايب ,
وانت عارف الشعب السوداني كلو غضبان منك بسبب موضوع حلايب
والجاب ليك الغضبة هو علي عثمان وافكاره الخشنة البدور يطفشك بيها من الكرسي,,
وهو الجاب الجنجويد. وجندهم وسلحهم وخلاك تعترف بي عضم لسانك انك كتلت عشرة ألف مواطن مدني في دار فور، وخلاك تقول ما داير اسرى
اها ده ياهو الورطك مع اوكامبو ,,
بعدين يا ريس علي ده زاتو ياهو الورطك في نيفاشا الخلتك تفصل الجنوب وتزيد غضبة الشارع عليك .
يقاطع الريس
انت ده السبب في فصل الجنوب ، انت ده يا اب فاخورة ، بي سبب مشاكلك ومساختك وشتيمتك ولؤمك العاملها لي مع ناس الحركة الشعبية ؟ .
فصل الجنوب سببو انت ده ، يفصل ركبتك ويخليك تتلوح بي ساق برا ركب شاحد ليك الله
نافع متنح وخجلان من عمايلو.
الطبع كده يا ريس ، الطبع غلب التطبع لكن المهم انا دايرك تعرف عمايل علي اكتر من عمايلي،. انا صحي كتلت وعذبت وشردت لكن ماني طمعان لي في كرسي
علا علي ياهو البخطط لي شيلتك ويقعد محلك .
بي أي طريقة بدور يكره فيك الشعب
يقاطعه الريس
وهسة انت شايف الشعب بقالد فيني في الشارع ؟؟
ولا شايلين صوري حايمين بيها ؟
تحوم عريان بركة ناس ام ضوا بان
ما هداك الوش بوك كلو ملان منابزة
والحيشان الفي النت كلها جازاني جز حمار في السوق
ده غير واحدين رسامين خلوا شغلتهم كلو كلو وبقوا يشيلوا ويلصقوا في صوري ويبهدلوا فيها
التقول انا ناقص بهدلة ، ولا من سماحتي ..
ينط نافع
اها انت برااااااااااااك جبت الرايحة
شفت الحاجات دي والله انا ما بخبر دربها كلو كلو .
يا زول انا حدي معاك القصر ده من امشي بيتي لا بعرف نت ولا غيره ، الموبايل ده زاتو ما بخبروا, إلا اناغم الشفع يجي يوروني الحاصل فيهو شنو .
يقاطعوا الريس بي حرقة,,,
نااااااااااافع ما تكضب انا قلت ليك ماااااااااا تكضب ,
انت ماك رئيس شعبة التهكير والتنفير؟ وانت مش العملت وحدة لي مكافحة إرهاب ناس الفيس بوك؟
واعلنت الجهاد على ناس الإنترنت؟ وهسي دي
ما عملت الكتيبة المسلحة لسحق جماعة الفيس بوك والإنترنت؟؟
وحلفت انك تصلي بيهم العصر في بني قريظة؟؟؟
بقيت نبي كمان آآآ نافع ؟؟ يبنوك حيطة قول آمين,
يرد نافع بي عين مكسورة
الفيني ده كلو انا عارفو ومعترف بيهو ، لكن ما هبشتك في كرسيك
ولاني مفكر اطعنك في ضهرك.
هسي دي يا ريس بالله عليك الكلام القلتو ليك في شيخك علي ده مو صحيح؟
امورو البسويها جوة البلد وبرة البلد ، بعرف المحن وبخطط ليها
ده مربى مع الخواجات وبعرف اللغات ومتخرج من الجامعات وبخبر الدريبات
كلامي مو صحيح ؟؟
آآآي في دي صحيح
اها جاك كلامي الأولاني ؟.
عشان كدي آآ خوي خت الرحمن في قلبك ده ,,
واعرف صليحك من عدوك
ما كل مرة يجيك شيخ علي يولع النيران في الحيشان ويمرق يمشي
ويخلينا نحن ننكوي بيها برانا
الزول ده عشان عارفني انا من ايدك دي لي ايدك دي
بدور يبترني ويقعد هو براه يتحكر ليك
لامن يقنطرك وينهزك بره ويقعد هو ويجيب ناسو
وبعدين يقول للناس انا معاكم , شلت ليكم رأس الحية
الهو انت يا ريس
يقاطعو الريس بي نهرة
الحية التلحقك ابوي
نافع
انا بوصف ليك و بقول ليك الحكاية ساي ، لكن والله ماني شمتان فيك
. ات بس اسمعني وقول بسم الله وانعل إبليس
اها بعدما يقلك من الكرسي يقول ليهم مو البشير ده
عامل المشاكل كلها مع الأمريكان ، ومحظور من السفر برة السودان
الغلبان ومنكد علي الشعب
وقسم البلد كيمان كيمان.
فصل الجنوب وبدور يفصل دار فور وحلايب .
اها اول بالتبادي بمشي يصالح اليهود ويصالح الأمريكان
ويجيب ناس حقوق الإنسان والحيوان، ويقول ليهم انتهينا من البشير
والخواجات يكشحوه بي حبة قروش يشيل نصها، ونصها التاني يغش بيه الناس ويفتكر انه عشان الغلاء الشديد ممكن بي زيادة الفين في الراتب
يخلي الحريم يزغرتن في الشارع
والرجال يعرضوا لا الصباح.
وكمان ينسوا الفات كلو ويهللوا للريس شيخ علي.
اها انت يا ريس لما علي يقعد في كرسيك ده انت بتكون وين الوقت داك ؟؟ .....
البشير متمحن طابق يدينو في راسو
ومسمر في كرسيه
شكيتكهم على سيدي الحسن ود حسونة يهينكم ويقطع دلاقينكم
ان بتدوروا تجننوني وتسرحوني بالخلاء
شاحد الله تجنوا إنتو و انا بي ايدي
اربطكم في ضريح سيدي الحسن ود حسونة، كان انت كان علي ود عثمان
نافع
علي ولا شيخ علي ؟؟
علي ساااااااااااااااي العلية ام زرد
ينط
نافع
الله اكبر
الله اكبر
عملك انفك تب
انا كنت عارف الزول ده كان مسويلك عمل
الله اكبر
ويتخارج نافع تحت التكبيرة الكبيرة
ويخارج روحو من الميتة المحققة
يخلي ريسنا
مرارته مفقوعه
وعينو بي دموعه
ورقبتو مفدوعة
وبطنو ميجوعة
والفي راسو مقطوعة
****
الدعاء على أهل الإنقاذ
يا الله الكريم ويا رب العرش العظيم تلم فيهم باعوض بلاعات الإستباليات كلها على قول حبوبتي التومة
وتقرص لحمهم وتفك فيهم ملاريا
تخليهم يتحرقصوا ليل نهار
وحمي يلمسوها بالعود
النبي قولوا آمين
ونواصل أن شاء الله
|
Post: #2
Title: Re: **** برطعة في القصر الجمهوري ****
Author: معاوية عبيد الصائم
Date: 04-19-2011, 05:44 PM
Parent: #1
Quote: الدعاء على أهل الإنقاذ
يا الله الكريم ويا رب العرش العظيم تلم فيهم باعوض بلاعات الإستباليات كلها على قول حبوبتي التومة
وتقرص لحمهم وتفك فيهم ملاريا
تخليهم يتحرقصوا ليل نهار
وحمي يلمسوها بالعود
النبي قولوا آمين
ونواصل أن شاء الله
|
اميييييين يا بت الجنيد اريتك طيبة والولاد بخير والله كريم
|
Post: #3
Title: Re: **** برطعة في القصر الجمهوري ****
Author: اسماء الجنيد
Date: 04-19-2011, 06:24 PM
Parent: #2
| Quote: اميييييين يا بت الجنيد اريتك طيبة والولاد بخير والله كريم |
حباب الحنين , اريتك طيب انت يابا
والمعاك
تسلم ايامك يا ود القبايل
|
Post: #4
Title: Re: **** برطعة في القصر الجمهوري ****
Author: Abdlaziz Eisa
Date: 04-20-2011, 06:08 AM
Parent: #3
آمــــــــــــــــــــــــــــــــــــــــــــــــــــــين..
عليك نور يا بت أمي سوما
ابدا ما قصرت..
شرّفت ونورت..
وقعدت الحروف..
تقعدي في أعالي الامكنة وبعد عمر طويل في أعالي الجنان ان شاء..
مودتي
|
Post: #5
Title: Re: **** برطعة في القصر الجمهوري ****
Author: AMNA MUKHTAR
Date: 04-20-2011, 06:22 AM
Parent: #4
العزيزة سوما..
دى مسرحية جااااهزة ..
عليكى الله بعد الجماعة ديل ينقشطوا باذن الله...اديها لناس محمد السنى والنعيم سعد
عشان دايرين نشوفها فى المسرح .
|
Post: #6
Title: Re: **** برطعة في القصر الجمهوري ****
Author: عبد الحي علي موسى
Date: 04-20-2011, 07:21 AM
Parent: #5
Quote: وتقوم الكركبة
كرب رب كو كع بردلب تااااااخ
كلو في الهواء ساااااااي
|
وسوف تكون نهايتهم فيما بينهم.
تحياتي بت الجنيد الرايعة.
|
Post: #7
Title: Re: **** برطعة في القصر الجمهوري ****
Author: اسماء الجنيد
Date: 04-20-2011, 11:25 AM
Parent: #6
Quote:
عليك نور يا بت أمي سوما
ابدا ما قصرت..
شرّفت ونورت..
وقعدت الحروف..
تقعدي في أعالي الامكنة وبعد عمر طويل في أعالي الجنان ان شاء..
مودتي |
حبابك يا عزيز العزيز
طلتك سمحة بالحيل يا الحنين
تتعلا انت يا يابا وما تدلا
ويديك الفي مرادك
كتر خيرك على دعوتك السمحة
اللهم آمين يا يابا جمعا
|
Post: #8
Title: Re: **** برطعة في القصر الجمهوري ****
Author: اسماء الجنيد
Date: 04-20-2011, 11:38 AM
Parent: #7
Quote: العزيزة سوما..
دى مسرحية جااااهزة ..
عليكى الله بعد الجماعة ديل ينقشطوا باذن الله...اديها لناس محمد السنى والنعيم سعد
عشان دايرين نشوفها فى المسرح . |
امونة حبابك يا خية
عارفة والله العظيم اول ما خطر بي بالي يمثلها هم فرقة الأصدقاء تصدقي !! لووووووووولز دافننو سوا انا وانتي زاتك
طبعا دافننو سوا ده المشهد الرابع حا يكون إن شاء الله
غايتو ناس محمد السني ومحمد نعيم سعد وناس بدر الدين شنا وفيصلوه وباقي المجموعة الظريفة دي بجضموها كويييييس
وحا يزيدوها روعة بي حركاتهم المضحكة
شكرا يا أمونة على طلتك ويا رب ينقشطوا سريع ونرتاح منهم
|
Post: #9
Title: Re: **** برطعة في القصر الجمهوري ****
Author: اسماء الجنيد
Date: 04-20-2011, 11:53 AM
Parent: #8
Quote: وسوف تكون نهايتهم فيما بينهم.
تحياتي بت الجنيد الرايعة. |
حبابك اخي عبد الحي
تسلم على مرورك الجميل
يسمع منك الله يا خوي وتكون نهايتهم فيما بينهم
ويرتاح منهم الشعب الغلبان الظلموه 22 سنة
|
Post: #10
Title: Re: **** برطعة في القصر الجمهوري ****
Author: الطيب رحمه قريمان
Date: 04-20-2011, 11:55 AM
Parent: #7
الاخت الفاضلة اسماء الجنيد
لك التحية الطيبة و التقدير
و الله يا اسماء انا مت من الضحك
من الواقعة التى استطعت ان تعكسيها باحرف تنبط بالحياة و الابداع.
Quote: الدعاء على أهل الإنقاذ
يا الله الكريم ويا رب العرش العظيم تلم فيهم باعوض بلاعات الإستباليات كلها على قول حبوبتي التومة
وتقرص لحمهم وتفك فيهم ملاريا
تخليهم يتحرقصوا ليل نهار
وحمي يلمسوها بالعود
النبي قولوا آمين
ونواصل أن شاء الله |
آآآآآمين
|
Post: #11
Title: Re: **** برطعة في القصر الجمهوري ****
Author: اسماء الجنيد
Date: 04-20-2011, 12:38 PM
Parent: #10
Quote: الاخت الفاضلة اسماء الجنيد
لك التحية الطيبة و التقدير
و الله يا اسماء انا مت من الضحك
من الواقعة التى استطعت ان تعكسيها باحرف تنبط بالحياة و الابداع.
|
حبابك اخوي الطيب ,و يطيبن ايامك يابا
البركة في ضحكتك دي يا خوي
عارف جاتني ايميلات كتيرة جدا بي تعليقات مضحكة اكتر من النص زاتو
من ناس ما بعرفهم خالص إلا من خلال الكتابة
اللطف واظرف تعليق جاني من اخ كريم
قال لي والله يا بت الجنيد عملتي لي وجع في الحجاب الحاجز لوووووولز
شكرا اخي العزيز لمرورك الجميل
|
Post: #12
Title: Re: **** برطعة في القصر الجمهوري ****
Author: Isa
Date: 04-20-2011, 12:56 PM
Parent: #11
| Quote: جاك هنا ضرا شراه ومشا |
Like
على قـول ناس الفيس وش (دي ضيفوها معاكم لقاموس الوش بوك والفيك بوس الخ!)
سـلامات يا أسماء وشكـرا على الإمتاع والطرافة، وما شاء الله عليكي متابعة كل نوادر نافع، يعني لو كان كتبتي المسرحية الليلة كان دخلتي فيها عنقريب الترابي برضو..
|
Post: #13
Title: Re: **** برطعة في القصر الجمهوري ****
Author: اسماء الجنيد
Date: 04-21-2011, 02:26 AM
Parent: #12
Quote:
Like
على قـول ناس الفيس وش (دي ضيفوها معاكم لقاموس الوش بوك والفيك بوس الخ!)
سـلامات يا أسماء وشكـرا على الإمتاع والطرافة، وما شاء الله عليكي متابعة كل نوادر نافع،
يعني لو كان كتبتي المسرحية الليلة كان دخلتي فيها عنقريب الترابي برضو.. |
العزيز عيسي سلام وتحية
وانا كمان لايك البنوتة السغنونة الحليونة النايمة دي ما شاء الله عليها
ربنا يحفظها ويخليها ليكم
شكرا لطلتك وكلماتك الطيبة
ياخوي نافع ده منو الما جايب خبرو .؟ بي عمايلو السودا دي الناس كلها مكجناهو
ما طارينو حبا فيهو
تسلم كتير وشكرا من تاني ليك
|
Post: #14
Title: Re: **** برطعة في القصر الجمهوري ****
Author: بله محمد الفاضل
Date: 04-21-2011, 07:45 AM
Parent: #13
غايتو بي طريقتك دي يوم بتكتلي ليك زول
يعلم الله
الضحك فطسني
لووووووووول
أقوليك حاجة
كفاية الله يرضى عليك
ما خليتيلون صفحة يرقدو عليها
إنا لله يا اخي
بالمناسبة
ختي الروابط بتاعت الشغلين الأولانيات ديلاك فوق قبل ما تدخلي
في الجديد
وشنو
سوي نفس الشي في الكتابة الجاية
المنتظرنها بفارغ الصبر
وربنا يديك العافية
يا أجمل روح
ود الفاضل أخوك
|
Post: #15
Title: Re: **** برطعة في القصر الجمهوري ****
Author: اسماء الجنيد
Date: 04-21-2011, 10:24 PM
Parent: #14
Quote: غايتو بي طريقتك دي يوم بتكتلي ليك زول
يعلم الله
الضحك فطسني
لووووووووول
أقوليك حاجة
كفاية الله يرضى عليك
ما خليتيلون صفحة يرقدو عليها
إنا لله يا اخي
بالمناسبة
ختي الروابط بتاعت الشغلين الأولانيات ديلاك فوق قبل ما تدخلي
في الجديد
وشنو
سوي نفس الشي في الكتابة الجاية
المنتظرنها بفارغ الصبر
وربنا يديك العافية
يا أجمل روح
ود الفاضل أخوك |
حباب بلة ود الفريق والحلة . مشتاقين يا يابا
تسلم يا ود القبائل والبركة في طلتك دي
والله فكرتك دي سمحة بالحيل يا حنين
بالنسبة لي انا زاتي مرجع
لأنه كتير بطلبوا مني رابط للحلقات السابقة
تابعنا وإن شاء الله قبل ما ننزل الحلقة القادمة
ناسنا ديل يلحقوا امات طه
قول آمين يا بلة ياخ
إنت زول بركة
والله صحي
|
Post: #16
Title: Re: **** برطعة في القصر الجمهوري ****
Author: رشا بابكر
Date: 04-22-2011, 05:03 AM
Parent: #15
كيف حالك أسماء
بت الأهل العزاز
قدر ما أقول أصلك
القى الضهب
بس البكوس المحنة
زولا شايل قلب طيب ..
بعيد من قصر السلطة
موضوعك
دعوة ليك في الجمعة الجامعة والدعوة السامعة
يتبني ليك قصر في الجنة
قولي آميين
كدي بعد ما تمري علي ناسك هنا
أختفي كراعك بي هناك
ومري علي بوست ( محنة)
خاصتك انتي
من أمس مصنقر راجيك
البوست مني أنا
رشا بت بابكر
بت أهلك ناس ودراوة
وما تنسي سلام كميات لأخونا العزيز
الفاتح
ودمتي في الغربة طيبة
|
Post: #17
Title: Re: **** برطعة في القصر الجمهوري ****
Author: معاوية المدير
Date: 04-22-2011, 06:04 AM
Parent: #16
| Quote: اها انت يا ريس لما علي يقعد في كرسيك ده انت بتكون وين الوقت داك ؟؟ .... |
الوكت دآك بيكون عِرِف شي.
والله صحي.
بت اعمي، أريت حالك زين؟؟؟
|
Post: #18
Title: Re: **** برطعة في القصر الجمهوري ****
Author: اسماء الجنيد
Date: 04-22-2011, 02:59 PM
Parent: #17
Quote:
كيف حالك أسماء
بت الأهل العزاز
قدر ما أقول أصلك
القى الضهب
بس البكوس المحنة
زولا شايل قلب طيب ..
بعيد من قصر السلطة
موضوعك
دعوة ليك في الجمعة الجامعة والدعوة السامعة
يتبني ليك قصر في الجنة
قولي آميين
كدي بعد ما تمري علي ناسك هنا
أختفي كراعك بي هناك
ومري علي بوست ( محنة)
خاصتك انتي
من أمس مصنقر راجيك
البوست مني أنا
رشا بت بابكر
بت أهلك ناس ودراوة
وما تنسي سلام كميات لأخونا العزيز
الفاتح
ودمتي في الغربة طيبة |
اهلييييين يا حبيبة من بطن الأهل القراب وحنان
تسلمي يا غالية وطلتك بالحيل بندورها يا يمة
بوست محنتك ده مش اجيهو بس بجي وبتحكر في بطنو تب يا خية
السلام ليك كيمان كيمان
وسلامك للفاتح وصل تب
ما تقولي اليومين ديل معانا بي جاي, متونسين في بلد الفرنجة دي
اها ودعتك الله وارقدي عافية وسلامي الكتير عبرك لكل العقاب
|
Post: #19
Title: Re: **** برطعة في القصر الجمهوري ****
Author: Souad Taj-Elsir
Date: 04-22-2011, 03:36 PM
Parent: #18
متابعة واجبة لهذا الخلق والإبـداع،
هذه اللغة الرصينة، السلسة، الحبيبة،
هذا التصوّر المسرحي الرائع،
يا سلام، يا سلام سـوما يا حبيبة،
فخر ثورة نسـاء السـودان الشامخات.
مررو فقط للتحية نحو المزيد من الجمال،
يا أيتها المسكونة إبـداعـاً، جمـالاً، وبهـاء.
لك دائماً والاسرة الكريمة محبتي التي تعرفين،
ومودتـي الما بتغبـاك.
|
Post: #20
Title: Re: **** برطعة في القصر الجمهوري ****
Author: اسماء الجنيد
Date: 04-22-2011, 04:35 PM
Parent: #19
Quote:
الوكت دآك بيكون عِرِف شي.
والله صحي.
|
لوووووووووولز[ ود عمي المدير لووووووووولز تكعيب عديل
ياخ دي بالغت فوكااا
وينو ود ابوي البشاري ؟؟ دي الجابها لينا هو
مشتاقين يا يابا
والله صحي
/B]
|
Post: #21
Title: Re: **** برطعة في القصر الجمهوري ****
Author: Hassan Elhassan
Date: 04-22-2011, 05:06 PM
Parent: #20
ابداع
|
Post: #22
Title: Re: **** برطعة في القصر الجمهوري ****
Author: اسماء الجنيد
Date: 04-23-2011, 00:28 AM
Parent: #21
Quote: متابعة واجبة لهذا الخلق والإبـداع،
هذه اللغة الرصينة، السلسة، الحبيبة،
هذا التصوّر المسرحي الرائع،
يا سلام، يا سلام سـوما يا حبيبة،
فخر ثورة نسـاء السـودان الشامخات.
مررو فقط للتحية نحو المزيد من الجمال،
يا أيتها المسكونة إبـداعـاً، جمـالاً، وبهـاء.
لك دائماً والاسرة الكريمة محبتي التي تعرفين،
ومودتـي الما بتغبـاك |
سعاد يا حبيبة الروح
حباب طلتك البترد الروح
ويا سماحة الطلة والمرة دي معاها الصورة
ابدا ما خذلني إحساسي في صورتك , كنت متأكدة من سماحة الطلعة بالضبط كما سماحة روحك الحلوة
يشهد الله انا زاتي فخورة بيك وبمعرفتك البتشرف بلد يا ستي
تسلمي كتير يا حنينة وربنا يحقق الشوفة وجها لوجه وفي ارضنا الحبيبة
بعدما نرتاح من البهدلوا بلدنا
الله يريح اهلنا الغلابة منهم
شكرا يا حبيبة من تاني وحبابك الف
|
Post: #23
Title: Re: **** برطعة في القصر الجمهوري ****
Author: Abdlaziz Eisa
Date: 04-23-2011, 03:31 AM
Parent: #22
Quote:
تابعنا وإن شاء الله قبل ما ننزل الحلقة القادمة
ناسنا ديل يلحقوا امات طه
|
العزيزة الغالية/ سومـــا
وكمان في حلقة جاية!!
نحن لسه بنتحرقص في الضحك..
غايتو عقاب ما الجماعة ديل يلحقوا أمات طــه...
حيكون في موت بنيران صديقة..
مودتي
|
Post: #24
Title: Re: **** برطعة في القصر الجمهوري ****
Author: ود الباوقة
Date: 04-23-2011, 09:00 AM
Parent: #23
يا اسماء
قريت الرواية دي مرتين
وما عرفت راسها من قعره
غايتو بحاول اقراها مرة ثالثة
ان شاء الله افهم ربعها
مودتي
|
Post: #25
Title: Re: **** برطعة في القصر الجمهوري ****
Author: يوسف السماني يوسف
Date: 04-23-2011, 09:21 AM
Parent: #24
Quote: الدعاء على أهل الإنقاذ
يا الله الكريم ويا رب العرش العظيم تلم فيهم باعوض بلاعات الإستباليات كلها على قول حبوبتي التومة
وتقرص لحمهم وتفك فيهم ملاريا
تخليهم يتحرقصوا ليل نهار
وحمي يلمسوها بالعود
النبي قولوا آمين
ونواصل أن شاء الله |
اللهم امين أمين .
سوما بت الجنيد
سلمتي من كل شر
ويظل حب الوطن محفور في خيال ابداعك نثرا وشعرا ووعياً .
سيأتي يوما فيه ترفرح اجنحة فرح الوطن علي زفة الثورة القادمة من غضب الغلابة .
لك وللاسر ة السلام
|
Post: #26
Title: Re: **** برطعة في القصر الجمهوري ****
Author: اسماء الجنيد
Date: 04-23-2011, 12:52 PM
Parent: #25
حبابك اخوي حسن ود عمي الحسن
حبابك يابا وكتر خيرك على تعبيرك الجميل الملاني فرح حد السقف
ربي يملاك سعادة وعافية إن شاء الله
|
Post: #27
Title: Re: **** برطعة في القصر الجمهوري ****
Author: اسماء الجنيد
Date: 04-23-2011, 05:02 PM
Parent: #26
Quote: العزيزة الغالية/ سومـــا
وكمان في حلقة جاية!!
نحن لسه بنتحرقص في الضحك..
غايتو عقاب ما الجماعة ديل يلحقوا أمات طــه...
حيكون في موت بنيران صديقة..
مودتي |
عزيز العزيز حبابك يا ضي شبابيك بيوتنا[
هي داب مشهد ولا حلقة واحدة ؟ وحاتك الناس دي إن ما قالت الروب
علا اشتغل انجد فيهم كدة ليل نهار زي مراتب اولاد الداخلية لامن يلحقوا امات طه على قولك
تسلم يا عزيزنا الحنين
سلام كتير ليك ولولي العهد الجديد وامه الحبيبة
ودعتكم الله/B]
|
Post: #28
Title: Re: **** برطعة في القصر الجمهوري ****
Author: اسماء الجنيد
Date: 04-23-2011, 08:56 PM
Parent: #27
Quote: يا اسماء
قريت الرواية دي مرتين
وما عرفت راسها من قعره
غايتو بحاول اقراها مرة ثالثة
ان شاء الله افهم ربعها
مودتي |
ود الباوقة حبابك يا خوي
يا خوي ما قلنا ليك سلم سااااي لامن تجينا داخل ، السلام لي الله يابا ..
الشيء ما فهمت ولا ربع واحد من الكلام ده كلو ؟؟؟
ولا المداخلاات دي كلها ما فهمت منها شيء برضو ؟
سمح النقول ليك
امشي اقرأ فصول المسرحية من البداية بتفهمها إن شاء الله
وإن ما لقيت النصوص الفاتت جت لي ايميلك هنا ليك علي يا خوي
ارسلها ليك كلها عشان تفهمها وتتابع معانا الحلقات الجاية
وبعد ده بندور رأيك ياخوي
شكرا ليك على المرور والمشاركة تسلم
|
Post: #29
Title: Re: **** برطعة في القصر الجمهوري ****
Author: اسماء الجنيد
Date: 04-24-2011, 09:12 AM
Parent: #28
Quote: اللهم امين أمين .
سوما بت الجنيد
سلمتي من كل شر
ويظل حب الوطن محفور في خيال ابداعك نثرا وشعرا ووعياً .
سيأتي يوما فيه ترفرح اجنحة فرح الوطن علي زفة الثورة القادمة من غضب الغلابة .
لك وللاسر ة السلام |
حباب ود ابوي السماني ’’ حبابك يا يابا[
اريتك طيب وكل العقاب المعاك يا خوي,,
تسلم إنت من كل بلاء يا ضرا اماتك
كتتتتر خيرك يا الحنين على الطلة والكلام الزين
يا الله الكريم يجي يوم يفرجها على اهلنا المغلوبين المظلومين
ويخلصهم من الطقمة الظالمة
تسلم يا يوسف كتير
ربي يوسعها عليك وين ما تقبل
قول آميـــــــن
/B]
|
Post: #30
Title: Re: **** برطعة في القصر الجمهوري ****
Author: اسماء الجنيد
Date: 05-01-2011, 10:58 AM
Parent: #29
وما زالت البرطعة قائمة
|
Post: #31
Title: Re: **** برطعة في القصر الجمهوري ****
Author: اسماء الجنيد
Date: 05-19-2011, 10:07 PM
Parent: #30
لي هسة ببرطعوا وموية مافي في البلد,, حكمتوا باااااااااالغة
|
|