الاستاذة الشاعرة اسماء الجنيد على صفحات قوووون الرياضية

اشجع الهلال وتطربني الفلاتية و فهيمة عبد الله
القصيدة الصادقة الاحساس تلامس الوجدان بدون استئذان
اشعاري نالت اعجاب وردي واشاد بها في الصحافة الخليجية
اتمني ان نلتقي ووطننا السودان واحدا موحدا تحت ظل السلام والمحبة والوئام


حاورها: محمد يوسف عبدالرحمن (ميدى )
أسماءالجنيد ..شاعرة غنائية مغتربة .. تدهشك بروائعها وقصائدها الشعريه .. يتميز شعرها بعمق المعنى وسلالة اللفظ .. هى شاعره استثنائيه .. امتطت صهوة الشعر وانطلقت فى بحار القصيده وكلما حطت على شاطئ افرزت لنا احدى روائعها .. تاتيك من خلال البوح فلا تحس بها الا وقد ملأت كيانك بمفردات قمة الروعه والجمال , وقال عنها الاستاذ الكبير محمد وردى ان شعرها مكتوب بسجيه مريحه تجعل قصائدها تصل بسرعه للمتلقى بدون تعقيدات .. باختصار هى حاله رائعه حيث تنمو قصائدها على البيئة السودانية الريفية التى نشأت فيها .. اسماء فتحت قلبها لصحيفة قوون وكان هذا اللقاء.



من هي أسماء الجنيد ؟

انسانة من عامة الناس غبشة من بطن اهلي الغبش

صفي لنا البيئة التي نشأتي فيها ؟

بيئة ريفية بسيطة يتميز اهلها بالصوفية والعفوية . ترعرت بينهم بسماحتهم وطيبة خاطرهم

هل الشعر هواية ؟

الشعر هبة ربانية وموهبة من الله سبحانه وتعالى

متي كان مولد أول قصيدة ؟

لا اذكر التاريخ تحديدا لكن اذكر انني كنت في المرحلة الابتدائية ونظمتها بمناسبة عيد الام

هل القصيدة فكرة أم إحساس ؟

الاحساس هو سيد الموقف فالقصيدة يغلب عليها الاحساس الصادق لتنبع من الدواخل بعفوية وتنفذ للدواخل بدون استئذان

ماهي أشهر قصائدك ؟

بالنسبة لي كل القصائد واحدة لكن ربما اكثر قصيدة نالت شهرة هي قصيدة طعم الغربة التي نالت حظها الوافر من اللحن الجميل المعبر والاداء الجميل من الاخ الفنان مصطفى السني ... له التحية والتقدير

ماهي القصيدة التي تتأثرين عندما تقوليها .. ولماذا ؟

مرثية ( صدقني يابا ولانها في رثاء والدي عليه رحمة الله

من هو أول من تغني بأشعارك ؟

الفنان مصطفى السني

كم قصيدة كتبتيها للمعاناه ..وهل المعاناه تصنع الشاعر ؟

معظم قصائدي تحكي عن معاناتنا مع الغربة الطويلة وفراقنا لوطننا واهلنا وبالتأكيد للمعاناة دور فعال في حياة المبدع عموما

مسافات بين الواقع والخيال كيف تقطعيها ؟

حسب فهمى للسؤال وكرأى شخصى لا توجد مسافات بينهما عند كتابة الشعر ، فهما متلازمان ، بمعنى ان تصوير الواقع يحتاج لخيال عال لكى يوصل المعنى او الوصف الحقيقى للحدث او المشاعر والاحاسيس موضوع القصيدة حتى يتفاعل معها المتلقى

كيف تري الشعر الحر ؟

الشعر الحر مساحته اكبر فهو يطلق العنان للفكرة لتخرج باريحية وسهولة ، وهنا يبرز دور الخيال فى براعة التصوير

قصيدة تمنيتي ان تكوني شاعرتها ولماذا ؟

انا سودانى انا ،،، لانها تحسسنى بانتمائى

هل تقبلين النقد ؟

بالتأكيد اقبل النقد وبصدر رحب

هل هناك قصيدة خلفت وراءها حدثا كبيرا في حياتك؟ أو أن حدثا ما قد أوجد قصيدة ؟

رحيل الوالد كتبت فيه مرثيتان مرثية صدقني يابا ومرثية مرت سنة

والقصيدتان كانتا من نصيب الفنان المبدع الاخ عصام محمد نور لحنا واداء

له التحية والتقدير

ما أبرز الحقول الدلاليه التي تنمو فيها قصائدك؟ وكيف يتسني لك أن تقفو خصائص نصك الشعري في ظل تشابه الاصوات الشعريه؟ وما المميزات التي ينطوي عليها نصك الشعري ؟

بيئتى السودانية الريفية هى الارض التى تنمو عليها قصائدى ،، وبالتالى فمفردات قصائدى بكل ما فيها من بداوة هى التى تميز نصوصى الشعرية فى ظل تشابه الاصوات الشعرية

طعم الغربة أغنيه إبداع في الكلمات والالحان والاداء للفنان مصطفي السني ..ماقصتها ومتي كتبتيها ؟

مثلما ذكرت لك مسبقا هي اكثر قصيدة نالت حظها من اللحن والاداء كتبتها في بداية غربتي في سلطنة عمان مسقط في منتصف التسعينات

إختار الفنان الكبير محمد وردي مجموعة من قصائدك لتقديمها قريبا .. حدثينا عن تعاونك مع وردي ؟

التحية والتقدير لاستاذنا الكبير محمد وردي ربنا يمتعه بالصحة والعافية وكل عام هو واسرته بالف خير ان شاء الله ، كان هذا في مطلع الفين واربعة وفي زيارة له لسلطنة عمان مسقط جلسنا مع بعض وقرأت له مجموعة من اشعارى التى نالت اعجابه واشار اليها في حوار اجرته معه جريدة الوطن العمانية

ووعد بالتعاون معى في اقرب فرصة

كيف تجدين الساحة الشعرية السودانية مقارنة مع الخليجية ؟

الساحة السودانية ثرة بالكتابات والمواهب المتعددة لكن الامكانيات والاعلام بالنسبة للساحة السودانية ضعيف مقارنة بالخليجية

لماذا نجد أن الشعر الشعبي أكثر صدقا وارق إحساسا من كثير من الشعر الفصيح ؟

لانه اللغة البسيطه ولهجتنا الدارجية تجدها اكثر صدقا واحساسا من الفصحي التي نجد صعوبة فى التعبير بها

ما الفرق بي كتابة الأغنية وكتابة القصيدة المنبرية ؟

بالنسبة للشاعر في رأي لا يوجد فرق فالاحساس واحد

{ كثرة الدواويين الشعرية ـ ظاهرة صحية أم تكديس بالمكتبات ؟

بالعكس هو ظاهرة تعكس ثقافة الشعوب وتطورهم وياريت كل ما يكتب يرى النور عبر دواويين وكتب موثقة اكثر من النشر عبر الاسافير

كونك مشتملة علي قراءات شعرية مكثفة .. ما أهم الاصوات التي تتسلل إلي حدود إبداعك وتتقاطع في وجدانك .. وتتماشي مع نصك الشعري ؟

كثير من الاصوات الشابة بدون ذكر اسماء محددة

هل هناك قضية أو حدث أو هم معين يشغلك وتفكرين في طرحه بطريقتك الخاصة ؟

الغربة والبعد عن الوطن اهم قضية تشغل تفكيرى وقد طرحتها من خلال قصائدى العديدة التى تناولت هذا الجانب

الحداثة مارؤيتك لها ؟

الحداثة مطلوبة كنوع من التطور ومجاراة العصر ، ولكنها يجب ان لا تخرج عن اطار الاصالة والواقع البيئى ، بمعنى الا تلغى الماضى

من أوضح الملامح في نصك الشعري إعتناؤه بنفس الالتزام .. كيف للشاعر أن يحقق المعادلة بين الابداع الفني والالتزام المنهجي في الشعر ؟

كل ما تكتب كشاعر بصدق التجربة وحرية التعبير كلما وجدت نفسك ملتزما نصا وحرفا ومضمونا

مارأيك في الشعر النسائي ؟ومن تعجبك فيهن ؟

تجربة الشعر النسائي صادقة لحد بعيد وهن كثر والساحة مليئة بهن ولكن لم يجدن السانحة لترى تجربتهن النور.

اتمنى لهن التوفيق وان يجدن فرصة اوسع اعلاميا

متي تحس أسماء أن الحظ إبتسم لها ؟

عندما اكتسب معرفة ومحبة الناس من خلال نصوصي المتواضعة

مانسبة الواقعيه في قصائدك ؟

كل قصائدي من صميم الواقع فهى تجارب وان لم امر بها شخصيا فقد تكون مرت بكثيرين غيرى فتجسدت في ذاكرتى ومن ثم اكتبها بواقعيتها

ما المؤثرات التي تعيق مسيرة الشاعر ؟

اهمها وسائل النشر والاعلام فهناك صعوبة في التعاون اعلاميا وصعوبة في النشر لما كتب وطبع لخارج ارض الوطن

ايضا هنالك ظاهرة سيئة للاسف الشديد وهي السرقة الادبية فقد ظهرت فى الآونة الآخيرة بصورة مخيفة خاصة

بعد نشر الاعمال فى المواقع الالكترونية ، وهذا سوف يجعلنا نقف كثيرا في المستقبل قبل ان ننشر خوفا من هذه الظاهرة الدخيلة علينا كشعب واعي

لا شك بأن الوطن غال علينا .. هل هناك قصائد قلتيها للوطن ؟

معظم قصائدي عن الوطن الحبيب

مثال هموم مهاجر وسكة الزمن الصعب وسلام من البلد وغيرها

ماهي أجمل قصيدة قلتيها أو سمعتيها ؟

هنالك الكثير من القصائد الجميلة لعدة شعراء ولكن اردد كثيرا قصيدة السرة بت عوض الكريم للشاعر حميد

وقصيدة لمحتك للشاعر الكتيابي وقصيدة سعاد للراحل الدوش

لماذا طغي الغزل علي كل أغراض الشعر ؟

شىء طبيعي تواجد القصيدة العاطفية لكنها لم تطغي على الشعر الوطني الذي يوجد بكثرة الان في الساحة

كشاعرة .. كيف تنظرين الي الساحة الغنائية حاليا ؟ وهل تعتقدين إنها إفراز لواقع إجتماعي وإقتصادي عكس الياته علي الفن ؟

لا يوجد ما يلفت النظر معظم الاصوات متشابه الا القليل جدا وهي نتاج او افراز كما ذكرت لواقعنا.

هل كتبت الشعر الفصيح ؟

نعم كتبت الشعر الفصيح ولكن قليل جدا

متي تتوقفين عن كتابة القصيدة ؟

طالما نبض قلبي بالحياة سوف يظل نبض القصيدة حيا بداخلي

ماهو تعريفك للقصيدة المؤثرة علي النفس ؟

القصيدة الصادقة الاحاسيس هي التي تلامس الوجدان وتنفذ للدواخل دون استئذان

متي تكوني في راحة نفسية ؟

حينما اكون وسط اهلي واسرتي الصغيرة

تتسابقين انت والزمن في رأيك من سيصل اولا ؟

لوكنا نعرف ما سيحدث لنا لسبقنا الزمن بمراحل لا احد يستطيع ان يسبق الزمن

ماذا أضافت لك الغربة ؟

الاعتماد على النفس والتعاون والحميمية بين الاصدقاء والمعارف

من هم ابرز الفنانين الذين تغنوا بأشعارك ؟

عصام محمد نور ومصطفي السني وسيف الجامعة

لهم التحية جميعا وكل عام وجميعهم بالف خير

ماهو اخر دواوينك الشعرية ؟

وتريات المهجر , أتمنى ان يرى النور قريبا

فنان يعجبك التعامل معه ولماذا ؟

كل من تعاملت معم اخوة واصدقاء واتمنى ان يتجدد التعامل مرات اخري

من من الشعراء ظلمه الاعلام ؟

الراحل المقيم الطيب الدوش

من شعراء الرعيل الاول .. من هو الشاعر الذي يعجبك ولماذا ؟

الراحل اسماعيل حسن ، والطيب الدوش لصدق احساسهم

فنان يطربك ؟

وردي ومحمد الامين وابوعركي

فنانه تطربك ؟

من الرعيل الاول الفلاتية ومني الخير عليهن رحمة الله

من شباب اليوم فهيمة عبد الله وحرم النور اتمنى لهن التقدم في تجربتهن الجديده

لو كنت وزيرة للثقافة والاعلام ماهي أول خطوة كنت ستتخذيها ؟

الاهتمام بالمواهب ، ونشر تجاربنا وثقافتنا للعالم العربي

تطوير مراكز الشباب والاطفال في كل مدن السودان

تعليم تلاميذ المدارس اصول الموسيقى من المرحلة الابتدائية

فالموسيقى غذاء للروح والجسد

أغنية تدندنين بها ؟

يا طير يا ماشي لي اهلنا

فريق تشجعيه ؟

الهلال

لاعب كرة يعجبك ؟

يعجبنى الكثير من شباب الهلال ربنا يوفقهم والف مبروك لهم الفوز الاخير ومزيدا من التقدم

شاعر لفت نظرك ؟

الشاعر الرائع حسين يوسف مكي له التحية

كلمه اخيرة ؟

الشكر كل الشكر لاسرة قوون ولك اخي محمد لاتاحة الفرصة

كما اشكر لكم جهودكم ومتابعتكم واهتمامكم

وتحياتي وتقديري لجريدتكم ولكل القراء

Quote: اشجع الهلال

سلام يا هجو
و التحية عبرك لبنت الأكارم أسماء الجنيد
وللفاتح الجنيد المريخابي

هسسسسسة يجي يكسر تلج

ههههههههههه

شكرا هجو على ايراد الحوار .......

الاخت اسماء صاحبة مفردة بسيطة ومعبرة ... تنثر الحروف بلا تكلف ..... تذكرني بقصائد المبدعين حميد واسماعيل حسن ......

Quote: اشجع الهلال

بالطبع اذا عرف السبب بطل العجب ............

Quote: للمعاناة دور فعال في حياة المبدع عموما

اخيراً اصبح للهلال جالب المعاناة لجماهيره فائدة تذكر ان يكون ملهماً للشعراء ............

Quote: قصيدة تمنيتي ان تكوني شاعرتها ولماذا ؟ انا سودانى انا ،،، لانها تحسسنى بانتمائى

بعكس رد كثير من الشعراء على مثال هذا السؤال

بذكر احدي القصائد او الاغاني العاطفية ..........

Quote: هنالك الكثير من القصائد الجميلة لعدة شعراء ولكن اردد كثيرا قصيدة السرة بت عوض الكريم للشاعر حميد وقصيدة لمحتك للشاعر الكتيابي وقصيدة سعاد للراحل الدوش

لو لم يقل حميد في شعره غير هذا المطلع من قصيدة السرة لكفاه (جات داخلة ذي مرقة غضب من جوف حليم في زمن صعب

رمت السلام ذي شنطة من كتف المسافر بي تعب

وتجلي ابداع الدوش في سعاد حينما قال (وأنا جايىّ راجعِ مُنْتَهى لاقتْنى هِي
قالت "تعال"
كِبْرَتْ كُراعي من الفرح
نُص في الأرِض نُص في النِّعال
اتْلخْبَط الشوق بالزَّعل
اتْحَاوروا الخوف والكلام

مرحبا بالاخ الكريم عمر ، كيفك و الاسرة ، هذا اقل واجب ان ننقل لقاء بنت الاكارم حتى يمر عليه محبو شعرها .

نعم هى هلالابية بس بتشبه ناس الصفوة فى كل شى ء ، اسعدنى مروركم اخى الكريم .

Quote: الاخت اسماء صاحبة مفردة بسيطة ومعبرة ... تنثر الحروف بلا تكلف ..... تذكرني بقصائد المبدعين حميد واسماعيل حسن

اخى الكريم عمر عثمان عساك مرتاح ومبسوط كمان ........... ابصم على كلامك بالعشرة ، رد الله غربة كل المبدعين من شعراء بلادنا الحبية فى سودان يكفل الحياة الكريمة لاهلة .

عروس النيل






زمان

فى مره نادتنى حبوبة ....

منتكيه فوق ضل الضحى..ومتوسده توبا..

فارشالا برشاً من سعف ..

فوق عنقريب تاكلاه بى طوبه...

تقلالا بناً فوق جميراتاُ تشطشط ...

طاشه لما تهب نسيمه او هبوبا....

وريحة القلوة تعكل...

والفنيجينات تهلل..

جاهزه للبكريه لما تجيها مصبوبه ...

وجبنة الطين محكره فوق وقاية السكسك..

البلخرزه معصوبه ..

قات لى..

تعالى يا بنيتى جمبى حداى ..

بدور احكيلك الليله ..حكاية السمحه زينوبا..

بنيةُ من بنات الحله جاهله صغيره يا دوبا ..

فريعة بانا منقسمة ...

غزال نافر جبال التاكا والنوبه ..

يغنيلا الفريق كله..وحياتا ديمه حلفوبا ..

جنيات البلد يتلمو..ساعة الورده..

فوق البير يحلموبا ..

كتير من دق باب بيتا .

.وكتير من صدً جارى الخيبه والتوبه ....

شى يقولولو لسه صغيره يا دوبا ..

وشى يقولولو مخطوبه ..

رباية عز..جدودا رجال .

.ركيزه الحله وكت الحاره والحوبه ...

الا القسمه لما تحين تجيك عديل .

.موبى سكة مزروبه ...

***********

فى يوم عصريه جاتنى التومه بت احمد ..

تجر توبا..

تقول كرعيها مكروبه ...

وبى آخر نفس قات لى ...

سمعتى الليله بت العازه زينوبا ....

جاها عريس قدر جدى ..

وابوها اداها بت امى..

بنيه رضيه مغلوبه ...

فى شان شيخ من قبيله مأصله...

ياختى القصه ياها عديله محسوبه ..

عليك الله . . !!!!

.واشرى بت العازه..

يالدفنوك حليل الكان بغنوبا ..

وجات السيره شايله الشيل ..

دفوف وطبول ترز قدامهم النوبه ..

شى زغاريد... وشى نواحات ...

عليك يالزينه بت الحله محبوبه ..

عيون شاردات.... وناس واجمات ...

وكل الحله مقلوبه ....

وفجأة تدوى صرخة تشق سواد الليل ..

تصحى الكان فى غيبوبه ....

الحقو على يا جنيات ..الحقو على جنايات..

الحقو على انا الموجوعه احىى ووبا ..

فى ديك الساعه كان النيل..

ختف نوارة الحله عروسنا السمحه زينوبا ..

انا يابلد






ليك بنتمى .. وفيك احتمى ...

انت السند ...

احلف اقول انت البلد ...

انت البوادى والمدن ...

انت المرافى والسفن ..

انت الولـد ...

يصرخ يقول ..انا يا بلد ..

افرح اكون .. ليك الولد ...

...

منك بكون

لوح الحفظ سبحه وعدد ...

شيخ الذكر ..مدد ..مدد ...

شدر الصمغ طعم الشهد ...

لوزة قطن زى الورد ...

******

انا يا بلد ..

ليك بكون ..

ضهر البنيات والعرض ...

سلوكه تحفر فى الارض ...

نيلك بيسقى كل نبض ...

زولا تقى صلى الفرض ...

شدر اللبان شدر القرض ..

لى كل مريض سدً الغرض...

عالج شفا من كل مرض ...

*****

انا يا بلد

انا فيك بشوف

ابواتنا فى الحاره بتسد ...

كيفن تصد .. كيفن ترد ..

اماتنا زى مطر الدغش ..

نازل غزير مليان برد ...

جنياتنا فى الحوبه الرعد...

بنوتنا لى ضيف الخلا ...

تعزم تشد عز البرد ...

شفعنا تيراب اب كرد...

ترفع تشيل تسمع ترد ....

اعلامنا راياتاً ترفرف من بعد...

*******

انا يا بلد

داير اكون ..

ود البلد .. بت البلد

ام البلد .. اهل البلد .. نهتف نقول...

نحن البلد .. نحن البلد ...

وانا يا بلد .......

كيـف بتنكر






الله اكبر .. الله اكبر

كيف بتنكر .

ما الاماكن والمعالم واقفه تظهر.

والمساجد والمآذن ..

والمصليين البتذكر..

والعيون الشاربه ..

من طرف البحور الجاريه تعبر..

كيف بتنكر .

الدريبات البتحفر..

طمى الجروف الدافق اخدر .

والنفوس الراويه ..

من بطن العقول الما بتودر .

والقلوب الضاويه ..

بى رعشة شعاعا ..

الكان بيجهر.

والمطيرات والبروق ..

الشاقه نص الليل تنور .

كيف بتنكر .

فى سمانا وفى ضحانا ..

و رجعة نهارتنا التحمر .

كيف بتنكر .

والجدود الا نحنت . . تحضن ..

ترابنا الفيه نكبر .

والملامح فى عيونا ..

وفى وجوها اشكال تسطر .

هيبة قبيله . . وملحمة ..

تاريخ بلادى اللونو اخضر .

علما برفرف فى سماها ..

الاصلو زاهر وديمه انضر .

والنزيف المن شهيدنا ..

قبره طاهر مسك و عنبر .

والدموع الناخره ..

لى خد البنيات البتصبر .

والشقوق مدفونه عمرا ..

ذكريات اياما تمطر .

كيف بتنكر .

الحنين الكان رضعنا ..

وبيه نعمر وكيف بنغزر .

والنفير الفى فريقنا ..

وفى بيوتنا وفى شوارعنا ..

بتكبر .

الله اكبر .. الله اكبر

كيف بتنكر وليه بتكفر ..

الا ماك اغبش وماك من

قبايل حاره تنتر .

بالسيوف تضرب تحارب ..

والنياب بتصك تكشر .

وكيف بتنكر.

بالله اذكر ..

بالله كبر ..

الله اكبر .. الله اكبر

لوحات عينيك



لوحات عينيك يا انت ..

رموش الليل تضاريها ....

تجيب البسمه فى الواحات ..

وتفرش شوقها فى الساحات ..

وتمسح دمعه بى ايديها

وتحلم ديمه بى لحظات ...

فيها النيل يلاقيها ..

يسور ليها عشة طيب ..

يشيل من لونو يديها ..

وحات عينيك يا انت ..

عيونك ساحره بهرتنا ..

نشوف جواها سر الكون ..

مساحات ريد..

حنان جواها ضمتنا ..

نسافر فيها ما نرجع ..

ندندن غنوة عجبتنا ..

نعيش فى الدنيا بس اتنين ..

وعيونك لسه دنيتنا ..

عصافير شارده بتغرد ..

دوام افراح معزتنا ..

لما نكون مع العينين ..

نشوف الدنيا جنتنا ..

ولما تفوت ونتفارق

.بنلقى دموعنا سبقتنا

بنلقى دموعنا فاتتنا ..

بنلقى دموعنا فاتتنا ..

الاخ الفاضل هجو الاقرع
تحية ملؤها التقدير لشخصك الكريم
تسلم يا ود القبائل على اهتمامك وفردك مساحة لي كتاباتي المتواضعة
يعلم الله عبيتني فرح حد ا لسقف
مليتني عافية ربي يملاك سعادة وين ما تقبل
وقفتكم ودعمكم المعنوي هو الدافع القوي في استمراريتي في درب الكتابة الطويل
بستمد قوتي منكم وبكتب اليكم
اتمني اكون عند حسن الظن دوما
اخي العزيز هجو شكرا لا تكفي
شكرا ليك ممتدة بطول بحرنا ومخضرة بخضرة جروفه
شكرا أردب محنة

Quote: سلام يا هجو و التحية عبرك لبنت الأكارم أسماء الجنيد وللفاتح الجنيد المريخابي هسسسسسة يجي يكسر تلج ههههههههههه

عمر القرضابي حبابك ياخوي
عجبتك الهلال دي بس ولا داير تكاوي ود الجنيد لوووووووول
تسلم يا عمر والبركة في الشوفة ياخوي
لك التحايا النواضر

Quote: شكرا هجو على ايراد الحوار ....... الاخت اسماء صاحبة مفردة بسيطة ومعبرة ... تنثر الحروف بلا تكلف ..... تذكرني بقصائد المبدعين حميد واسماعيل حسن ......

اخي العزيز عمر شكرا لك وانت تشبهني بعمالقة الادب والفكر السوداني العتيق
حقيقي لقد عبيتني فرح حد السقف

Quote: بالطبع اذا عرف السبب بطل العجب ........... اخيراً اصبح للهلال جالب المعاناة لجماهيره فائدة تذكر ان يكون ملهماً للشعراء ............

لوووووووووول بالغت معاي يا وصيف

Quote: بعكس رد كثير من الشعراء على مثال هذا السؤال بذكر احدي القصائد او الاغاني العاطفية ..........

شكرا يا جنابو ياخ

Quote: لو لم يقل حميد في شعره غير هذا المطلع من قصيدة السرة لكفاه (جات داخلة ذي مرقة غضب من جوف حليم في زمن صعب رمت السلام ذي شنطة من كتف المسافر بي تعب وتجلي ابداع الدوش في سعاد حينما قال (وأنا جايىّ راجعِ مُنْتَهى لاقتْنى هِي قالت "تعال" كِبْرَتْ كُراعي من الفرح نُص في الأرِض نُص في النِّعال اتْلخْبَط الشوق بالزَّعل اتْحَاوروا الخوف والكلام

والله صدقت يا عمر يا خوي
الناس دي بتكتب كلام مارق كده من الجوف ما شاء الله تبارك الله
عارف ديوان حميد
وديوان الراحل المقيم الدوش الاتنين لو ما مريت عليهم قبل ما انوم ما برتاح
شكرا يا عمر لمداخلتك الظريفة

الاستاذة اسماء ، متعك الله بالصحة و العافية ، صراحة و بدون مجاملة ما اوردته لك هنا من شعر ، قمة فى الابداع ، وسوف احاول انزال العديد من القصائد ، طبعااعلم تماما انه مصرح لى ، ما نقلته هنا لك عن صحيفة قوون و الله خشيت ان يسبقنى احد ، ولكن كان لى شرف النقل ، تحياتى للاسرة و الكريمة و الاستاذ شيخنا ود الجنيد.

بعد اذن شاعرتنا الاستاذه اسماء ، يا اخوان بالله اى يزول ممكن يضع عنوانو البريحو ، على المستوى الشخص اهديها الى الغالية ام محمد وهالة .



انا ما حبيتك .. لكنى عشقتك ...
واتمنيتك ...
بى ريشة قلبى .. رسمتك...
وفى الاعماق ختيتك ...
بحنانى الفايض.. برضى شملتك ...
ما خليتك ...
واتخيلتك .. فى بستـان ....
انى زرعتك ...
بى دمى رويتك ...
وكيف راعيتـك ...
لما قطفتك ..
اتحسستك .. وريحة عطرك ...
نرجس نور .. ساحة بيتك ....
ويوم لاقيتك ..
لامست سحابة عرشك ...
واتنهدت عشان حسيتك ...
كتمت الاهه .. وراها التانيه ...
اتوهمت كمان ناديتك ...
كتبتك احلا قصائد ريد ...
كم لحنتك .. وكم غنيتك ....
وتانى بديتك .. وجيت تميتك ...
لما حفظتك واتوشحتك ...
واتغطتيتك ...
ومن خوفى عليك ...
قريت حصنتك ...
وبى رمشى هناك ضاريتك ...
واتوسلتك .. واترجيـتك ..
تعرف انى عشقتك ما حبيتك ..
والله عشقتك ..ما حبيتك ...

Quote: اشجع الهلال

انشاء الله يكون الهلال السعودي تكون مقبوله



مع تحياتي لآل الأقرع وللشاعرة الفنانة اسماء الجنيد




أبومصطفى

بعد اذن شاعرتنا الاستاذه اسماء ، يا اخوان بالله اى يزول ممكن يضع عنوانو البريحو ، على المستوى الشخص اهديها الى الغالية ام محمد وهالة .


الاخ العزيز هجو حبابك واذنك معاك يا خوي
والتحية عبرك للحبيبة ام محمد وهالة
ربنا يخليكم لبعض ويحفظكم ان شاء الله
خالص الود

انشاء الله يكون الهلال السعودي تكون مقبوله
*******
لووووووووووووووووووووووووووووولز ابو مصطفي بالغت معاي لكن بجد
******
مع تحياتي لآل الأقرع وللشاعرة الفنانة اسماء الجنيد
*****
تسلم يا ابو مصطفي وليك التحايا النواضر ولاسرتك الكريمة والحبيبة ام مصطفى




عذرا والله الاقتباس ما شغال معاى
تكون يا ابو مصطفى عشان كتبت الهلال السعودي لووول