*** أمس بمسقط 000ليلتنا كانت صوفيه***

نفحات الصوفيه واريج الذكر كان فائحا من ندوة امس 11/12 بدار نادى الجاليه السودانيه العامر بمسقط ...
عطر سمانا مولانا الشيخ د/ الطاهر الدرديرى والاخت الاستاذه/ سميه طلحه ومقدمة الندوة الاخت الاستاذه/ مى ابو قصيصه..
كان الحوار روحيا منذ نقطة البدايه
مع تلاوة آيات من الذكر الحكيم ..تلاها على مسامعنا الاخ الاستاذ/ عبد الوهاب عيسى..
الاخت سميه طلحه شاعره من بلادى افخر واتباهى بها فى كل المحافل ..
ليس فقط للصلة القويه التى تربطنا ..ولكن هناك رباط روحى لا يعلمه الا هى وانا ولا ندرى السر فى ذلك
نحمد الله كثيرا على هذا ونتمنى من الله الحفظ والصون
تكتب الشعر بلهجتنا السودانيه البسيطه المحببه و العربى الفصيح والمدح فى الحبيب المصطفى .... والدها الشيخ الجليل طلحه عطر الله ثراه .. له دور بارز فى نشأتها الصوفيه ..له الكثير والكثير جدا من المدائح النبويه .. له الرحمه والمغفره ..
لا تحتاج الاخت سميه الى تزكية منى.. ولكن من حقها علينا ان نطرح هذه الابداعات عبر هذا المنبر للجميع ونتمنى قريبا ان تكون بيننا ..تكتب بقلمها وتبدع رسم احاسيسها الجميله الصادقه الصافيه كصفاء سريرتها ..
استهلت الاخت سميه الحوار بطرح نماذج من مفرداتنا اليوميه التى بدأت فى الاندثار . مع تحليلها الكافى والوافى .. وايضا نفحتنا ببعض من مدائح واشعار الوالد فى المصطفى علية الصلاة والسلام ..
وطافت بنا قليلا فى البطانه وقرأت علينا نماذج الشعر و الدوبيت ..

ومن ثم سبحنا جميعا فى بحور الذكر والادب الصوفى بشتى انواعه
وتعمقنا كثيرا بخيالنا متابعين بشغف ومتعه متناهيه تلك الصور البديعه التى نقلنا اليها
دكتورنا الجليل مولانا الطاهر .. وذلك من خلال الصور الحيه التى تتحرك فى وجدان كل الحضور
اثناء سرده ووصفه المنسوج بدقة متناهيه .. خيال كاتب محترف، و روح انسان طيب متواضع للغاية ، وفكر وادب عالم جليل .. ما شاء الله وتبارك الله..
تناول الدكتور بشرح مفصل الطرق الصوفيه فى السودان ، ومن اين اتت ومن هم الشيوخ واصحاب تلك الطرق.. على سبيل المثال لا الحصر .. الطريقه القادريه للشيخ عبد القادر الجيلانى
والطريقه السمانيه، والبرهانيه، وغيرها من الطرق المعروفه على امتداد السودان بمساحة اراضيه ومساحة نفوس اهله الطيبين الكريمين ..
فسحت الاخت مى ـ التى ادارت المحاضره بجداره تشكر عليها ـ المجال للحضور
للمداخلات .. وكان الحضور بهيا .. والمداخلات على مستوى الحضور .. اجاب عليها باهتمام مولانا د/ الطاهر والاخت سميه..
الاخوة القراء كانت بحق ليلة معطره ومعتقه بنفس اهل الفكر والذكر .. لم نشعر بمرور الزمن ..
كما اننى اشعر الان برغبه قويه فى مواصلة الكتابه وعدم التوقف .. ولكن اترك فرصه للاخوه بورداب مسقط والذين سعدنا بحضورهم معنا للمواصله ..
التحيه مثنى ، وثلاث ، ورباع ،والى ما لا نهاية
لاسرة النادى السودانى .. والقسم الثقافى .. ولكل اللذين يعملون خلف الاضواء
والتحية للاخت مى ابو قصيه والتحيه والتقدير للدكتور العالم الجليل مولانا الطاهر الدرديرى
والشكر للشيخة بت الشيوخ الاستاذه سميه طلحه
ومزيدا من الابداعات لاسرة نادى الجالية السودانى بمسقط ..

اسماء الجنيد ...

سلام ادروبة بختكم وان شاء الله انحن حنجيكم لمن تجيبو الجبنة
يعني كنت في جلسات روحانية عالية اسأل الله ان يجمعنا في جنات الفردوس
مع تحيات ادروب

العزيزة الاستاذة سومه

هنئيا لكم بذلك الدفق الروحى الجميل فى ازمنة طغت عليها المادة

كم نتمنى مثل تلكم الليلة التى تعطر الوجدان وتزيح عن الانسان عناء الغربة وعناء اللهث وراء الحياة الذى لا ينتهى ...

ليتك تنقلى لنا شئيا مما قيل فى مدح المصطفى صلى الله عليه وسلم

مع تحياتى لك

الأستاذة أسماء لك كل الشكر من قبل ومن بعد وأنت تسلطين الضوء على ما يدور في النادي من فعاليات بيراع شاعري متمكن..
تشرفت-يا سيدتي-بحضور تلكم الأمسية التي حلقت بنا في فضاءات ملؤها عبق وطن يحتل حدقات عيوننا قراراً مكيناً..
الدكتور الطاهر الدرديري ذلكم الوقور، المتواضع، المتقشف، الإنسان، المسالم بقلبه ووجدانه وعقله وتصرفاته.. والشاعرة سمية التي تتسربلها الرزانة قولاً وفعلاً أتحفانا لساعتين من الزمن ذهبنا إثرهما وألسنتنا تلهج بعاطر الثناء لهماوهي تردد :
اللهم إنا نعوذ بك من فتنة القول كما نعوذ بك من فتنة العمل. ونعوذ بك من التكلف بما لا نحسن كما نعوذ بك من العجب بما نحسن ونعوذ بك من السلاطة والهذر كما نعوذ بك من العي والحصر..
ما أضفى نكهة خاصة على المحاضرة-من وجهة نظري المتواضعة-اهتمام المحاضرين بتأصيل المفردة السودانيةوإسنادها إلى جذورها...

الزاكي

مرحب بالاهل ..حبابكم عشره

ادرووووووب
وينك ؟
والله الشوق ليك جبنة شرق بى بخورا
طولت الغيبه يا الدخرى ..
اتمنى ان تكون بخير والصحه عال العال ..
ابقى اظهر والجبنه بتلقاها محكره فى طبليه وبى بنابرها..
شكرا ادروب شكرا ولف وشوقا الف ...

***
الاخ العزيز عمدتنا قرشو
حبابك يا ود الشيوخ
وحباب طلتك السمحه
حقيقى كانت ليلة رائعه من اروع ندوات النادى للجاليه بمسقط
غالى والطلب رخيص ..ان شاء الله انزل ليكم مقتطفات من مدائح والدنا الشيخ طلحه عليه رحمة الله.. وابنته الاخت سميه
شكرا اخى قرشو قدر مكانتك فى القلوب يا طيب ..

***
اول مداخله لى .. شرف كبير اخونا الزاكى ..
من عبق حروفك زينت البوست
كلامك من الجوف عطر الدار .. وهذه شهاده اعتز بها
لك التحيه والتجله .. ونحن طمعانين فى مزيد من الابداع
شكرا اخى الزاكى وفعلا ليلتنا كانت اكتر ما رائعه
ربنا يديكم الصحه جميعا ..

شكرا لكم جميعا وراجعه ليكم ان شاء الله

الأستاذة الشاعرة سمية,
اعترف إنني (زول أطرش وساهي ومروح).
تصدقي إنني لم أربط بين الإسم SOMA وبين الشاعرة سمية إلا بعد أن قرأت ردك على ترحيبي بالزاكي. (شفت الحالة دي؟).
فاتتني ليلة الصوفية بسبب مشاغل الدنيا الفانيةعلى الرغم من قناعتي بأننا كسودانيين ناطقين بالعربية, فنحن صياغة صوفية خاصة. خاصة لأن الأمة السودانية الناطقة بالعربية هي أمة منتجة لصوفيتهاالمتفردة. ودون الجميع كتاب الطبقات. والموضوع طويل ومتشعب وليس ههنا مقامه. فقط أتحسر بصوت مسموع على ما فاتني من درس صوفي.

حامد بدوي

عمر الله ساحاتكم بالذكر والاذكار
وجمعكم على محبته ومحبة من احبه
بينكم فى مسقط احد المجاذيب استاذ جامعى
ماهر العبيد العوض
رباطابى روحانى
اتمنى ان يكون بينكم فى مثل هذه اللحظات السعيده
مع محبتى

حبابكم..
الاخ الكريم حامد البدوى
كيفنك واريت حالك زين
حاشاك ياخوى من الطرش والسرحان
لكن بينى وبينك الغربه دى والعيشه المزحومه
العايشنها فيها .. تخلى الزول يجلى من اى شىء
الشكيه لى الله .. لافيها كيف اصبحتو ..ولا كيف امسيتو ؟
ولا المطايبه بالحيطه ..ولا المناوله بالشىء الموجود
والبركه فى كل الحاجات القلتها دى يعلم الله ..
عشان كده عقولنا بقت زى الماكينه.. تعمل ليها (( اب ديت ))
تشتغل يومين تلاته ..
تنساها امورك تتوقف بعامل النسيان ..
برضو اصحح ليك المعلومه بالنسبه للشاعره سميه
سميه طلحه شاعره لها نكهه خاصه .. اتمنى ان تتحاح لك الفرصه وتسمعها يوما..
وهى الشاركت مع مولانا الطاهر الدرديرى فى تلك المحاضرة
اختك سومه ..هى انا والعياذ بالله من كلمة انا .. اسماء الجنيد ..
كنا مع بعض فى ندوة اخونا د/ احمد طراوه الله يطراه بالخيرلو تتذكر كانت عن الاغنية السودانية ودور المرأة على ما اذكر .. فى مسرح نادى الجاليه بمسقط
لك التحايا اخى حامد وان شاء الله تعوض الفاتك فى ندوات قادمه ان شاء الله
وحبابك من تانى ..

***
اخى معاذ منصور
اهلا ومرحب بى طلتك اخى الكريم
والف شكر على كلامك البشرح الصدر
نتمنى دوما ان نلتقى فى ساحات الذكر تحت راية الاخاء والمحبه
بالنسبه للاستاذ/ ماهر العبيد .. حقيقه ما حصل لى الشرف بالتعرف عليه
لذلك لا اقدر ان ااكد لك كان يومها موجودا ام لا ؟
واتمنى ان يكون من الحضور فى تلك الليله البديعه
مثل الاستاذ الروحانى ماهر العبيد نتمنى ان ينضم لاعضاء النادى ..
لكى ينفحنا ويحدثنا عن اهلنا المجاذيب اصحاب الفكر والذكر فى كل مكان..
حبابك اخى معاذ وحباب استاذك الجليل..
وشكر على المشاركه والمعلومه القيمه

الاخت / اسماء

تحياتى وودى

غيبة طويلة


ومرحبا بعودتك


أزرق

ازرق يااااا ازرق
الشوق نيلين يعلم الله
كيفك يا لون الفرح فى كل مكان
الصحه والاحوال ..
طلتك اسعدتنى والله
لك التحايا النواضر
والحمد لله البقيت طيب
شكرا ازرق شكرا فرحة بقدومك

الاخت الغاليه سومه
سلام ورحمة الله وبركاته وأنشاء الله بخير ليك وحشه
تعرفى ياسومه دى الحاجات البنفتقدها هنا فى بلاد الغرب ،ودى من الاشياء البنفكر عشانها أننا نرجع نعيش فى السودان أو على الاقل نعيش فى بلد مسلم وقريب منه ، فالروحانيات من اهم الاشياء فى حياتنا، وانا على ثقه أن كل من حضر تلك الليله سيستمتع براحه نفسيه عميقه لفتره وستتوق نفسه لها مره أخرى
هنيئاً لكم ،وادعو لنا الله بالعوده للأستمتاع بذلك العبق

اشرقت الانوار ورقصت بساتين الكلام
فى دارنا احلا زهرة روما ؟؟
لك وحشه والله يا غاليه
شكرا ليك على الطله
وفعلا كانت ليلة من ذات الليالى
آمين ياااااااااااا رب ترجعوا بالسلامه
تسلمى سهام الحبيبه وشكرا من تانى يا سمحه